TITUS
Hartmann, Iwein
Part No. 23
Previous part

Verse group: (23) 
Verse: 2201    dâ sî ir vrouwen eine vant,
Verse: 2202    unde machte sî zehant

Verse: 2203    von vreuden bleich unde rôt.
Verse: 2204    sî sprach 'gebet mir daz botenbrôt:

Verse: 2205    iuwer garzûn der ist komen.'
Verse: 2206    'waz mære hâstû vernomen?'

Verse: 2207    'guotiu mære.' 'sage doch, wie?'
Verse: 2208    'dâ ist ouch mîn her Îwein hie.'

Verse: 2209    'wie mohter komen alsô vruo?'
Verse: 2210    'dâ treip in diu liebe darzuo.'

Verse: 2211    'sage durch got, wer weiz ez doch?'
Verse: 2212    'vrouwe, ezn weiz niemen noch,

Verse: 2213    niuwan der garzûn unde wir.'
Verse: 2214    'wan vüerstun danne her ze mir?

Verse: 2215    nû genc enwec, ich beites hie.'
Verse: 2216    dô diu maget nâch im gie,

Verse: 2217    durch ir gämelîche
Verse: 2218    dô gebârte sî gelîche

Verse: 2219    als sî mit bœsem mære
Verse: 2220    zuo im gesendet wære.

Verse: 2221    sî hienc daz houbet unde sprach
Verse: 2222    trûreclîchen, dô sî in sach

Verse: 2223    'ichn weiz waz ich tuon sol.
Verse: 2224    mîn vrouwe weiz iuch hinne wol:

Verse: 2225    ir ist ûf mich vaste zorn,
Verse: 2226    ich hân ir hulde verlorn,

Verse: 2227    daz ich iuch hie behalten hân,
Verse: 2228    und enwil mich doch des niht erlân

Verse: 2229    sîne welle iuch gesehen.'
Verse: 2230    'ê des niht ensüle geschehen,

Verse: 2231    ich lâze mir ê nemen den lîp.'
Verse: 2232    'wie möhte iu den genemen ein wîp?'

Verse: 2233    'sî hât doch volkes ein her.'
Verse: 2234    'ir geneset wol âne wer:

Verse: 2235    ich hân des ir sicherheit,
Verse: 2236    daz iu deheiner slahte leit

Verse: 2237    nû von ir mac geschohen.
Verse: 2238    sî wil iuch niuwan eine sehen.

Verse: 2239    ir müezet ir gevangen wesen:
Verse: 2240    anders lât sî iuch wol genesen.'

Verse: 2241    er sprach 'sî vil sælec wîp,
Verse: 2242    ich wil gerne daz mîn lîp

Verse: 2243    immer ir gevangen si,
Verse: 2244    und daz herze dâ bî.'

Verse: 2245    Sus stuont er ûf und gie dan
Verse: 2246    mit vreuden als ein sælec man,

Verse: 2247    und wart doch undâre enpfangen:
Verse: 2248    dô er kam gegangen,

Verse: 2249    weder sî ensprach noch enneic.
Verse: 2250    dô sî alsô stille sweic,

Verse: 2251    daz begund im starke swâren,
Verse: 2252    unde enweste wie gebâren,

Verse: 2253    wan er saz verre hin dan
Verse: 2254    und sach sî bliuclichen an.

Verse: 2255    dô sî beidiu swigen, dô sprach diu maget
Verse: 2256    'her Îwein, wie sît ir sô verzaget?

Verse: 2257    lebet ir ode habt ir munt?
Verse: 2258    ir sprâchet doch in kurzer stunt:

Verse: 2259    wenne wurdent ir ein stumbe?
Verse: 2260    saget durch got, war umbe

Verse: 2261    vliehet ir ein sô schœne wîp?
Verse: 2262    got gehazze iemer sînen lîp

Verse: 2263    der âne danc deheinen man,
Verse: 2264    der selbe wol gesprechen kan,

Verse: 2265    ze schœnem wîbe ziehe,
Verse: 2266    der sî sô sêre vliehe.

Verse: 2267    ir möhtent sitzen nâher baz:
Verse: 2268    ich geheize iu wol daz,

Verse: 2269    mîn vrouwe enbîzet iuwer niht.
Verse: 2270    swem von dem andern geschiht

Verse: 2271    sô leide als ir ir habt getân,
Verse: 2272    und sol man des genâde hân,

Verse: 2273    dâ zuo hœret bezzer lôn.
Verse: 2274    ir habt den künec Ascalôn,

Verse: 2275    ir vil lieben man, erslagen:
Verse: 2276    wer solt iu des genâde sagen?

Verse: 2277    ir habet vil grôze schulde:
Verse: 2278    nû suochet ouch ir hulde.

Verse: 2279    nû bite wir sî beide
Verse: 2280    daz sî ir leide

Verse: 2281    geruoche vergezzen.'
Verse: 2282    done wart niht mê gesozzcn:

Verse: 2283    er bôt sich drâte ûf ir vuoz
Verse: 2284    und suochte ir hulde unde ir gruoz

Verse: 2285    als ein schuldiger man.
Verse: 2286    er sprach 'ichn mac noch enkan

Verse: 2287    iu gebieten mêre
Verse: 2288    wandels noch êre,

Verse: 2289    wan rihtet selbe über mich:
Verse: 2290    swie ir welt, alsô wil ich'

Verse: 2291    'Welt ir allez taz ich wil?'
Verse: 2292    'jâ, michn dunket nihts ze vil.'

Verse: 2293    'sô nim ich iu lîhte den lîp.'
Verse: 2294    'swie ir gebietet, sælec wîp.'

Verse: 2295    'nu waz hulfe danne rede lanc?
Verse: 2296    sît ir iuch âne getwanc

Verse: 2297    in mîne gewalt hât ergeben,
Verse: 2298    næme ich iu danne daz leben,

Verse: 2299    daz wære harte unwîplich.
Verse: 2300    her Îwein, niene verdenket mich,

Next part


This text is part of the TITUS edition of Hartmann, Iwein.

Copyright TITUS Project, Frankfurt a/M, 6.5.2019. No parts of this document may be republished in any form without prior permission by the copyright holder.