TITUS
Hartmann, Iwein
Part No. 24
Previous part

Verse group: (24) 
Verse: 2301    daz ichz von unstæte tuo,
Verse: 2302    daz ich iuwer alsô vruo

Verse: 2303    gnâde gevangen hân.
Verse: 2304    ir hât mir selch leit getân,

Verse: 2305    stüende mir mîn ahte und mîn guot
Verse: 2306    als ez andern vrouwen tuot,

Verse: 2307    daz ich iuwer niht enwolde
Verse: 2308    sô gâhes noch ensolde

Verse: 2309    gnâde gevâhen.
Verse: 2310    nû muoz ich leider gâhen:

Verse: 2311    wandez ist mir sô gewant,
Verse: 2312    ich mac verliesen wol mîn lant

Verse: 2313    hiute ode morgen.
Verse: 2314    daz muoz ich ê besorgen

Verse: 2315    mit einem manne der ez wer:
Verse: 2316    der ist niender in mînem her,

Verse: 2317    sît mir der künec ist erslagen:
Verse: 2318    des muoz ich in vil kurzen tagen

Verse: 2319    mir einen herren kiesen
Verse: 2320    ode daz lant verliesen.

Verse: 2321    nune bit ich iuch niht vürbaz sagen.
Verse: 2322    sît ir mînen herren hânt erslagen,

Verse: 2323    sô sît ir wol ein sô vrum man,
Verse: 2324    ob mir iuwer got gan,

Verse: 2325    sô bin ich wol mit iu bewart
Verse: 2326    vor aller vremder hôchvart.

Verse: 2327    und geloubet mir ein mære:
Verse: 2328    ê ich iuwer enbære,

Verse: 2329    ich bræche ê der wîbe site:
Verse: 2330    swie selten wîp mannes bite,

Verse: 2331    ich bæte iuwer ê.
Verse: 2332    ichn nœtlîche iu niht mê:

Verse: 2333    ich wil iuch gerne: welt ir mich?'
Verse: 2334    'spræch ich nû, vrouwe, nein ich,

Verse: 2335    sô wær ich ein unsælec man.
Verse: 2336    der liebste tac den ich ie gewan,

Verse: 2337    der ist mir hiute widervarn.
Verse: 2338    got ruoche mir daz heil bewarn,

Verse: 2339    daz wir gesellen müezen sîn.'
Verse: 2340    dô sprach diu künegîn

Verse: 2341    'Ouwî, mîn her Îwein,
Verse: 2342    wer hât under uns zwein

Verse: 2343    gevüeget dise minne?
Verse: 2344    es wundert mîne sinne,

Verse: 2345    wer iu geriete disen wân,
Verse: 2346    sô leide als ir mir hât getân,

Verse: 2347    daz ich immer wurde iuwer wîp.'
Verse: 2348    'mir rietz niuwan mîn selbes lîp.'

Verse: 2349    'wer rietz dem lîbe durch got?'
Verse: 2350    'daz tete des herzen gebot.'

Verse: 2351    'nû aber dem herzen wer?'
Verse: 2352    'dem rieten aber diu ougen her.'

Verse: 2353    'wer riet ez den ougen dô?'
Verse: 2354    'ein rât, des muget ir wesen vrô,

Verse: 2355    iuwer schœne und anders niht.'
Verse: 2356    'sît unser ietwederz giht

Verse: 2357    ez sî des anderen vrô',
Verse: 2358    sprach diu küneginne dô,

Verse: 2359    'wer ist der uns des wende
Verse: 2360    wirn geben der rede ein ende?

Verse: 2361    dazn vüeget sich niht under uns drin:
Verse: 2362    nû gân wir zuo den liuten hin.

Verse: 2363    ich hân gester besant
Verse: 2364    die besten über mîn lant:

Verse: 2365    vor den suln wirz niht stillen.
Verse: 2366    ich hân in mînes willen

Verse: 2367    ein teil dar umbe kunt getân.
Verse: 2368    die suln wir an der rede hân:

Verse: 2369    deiswâr ez vütget sich deste baz.'
Verse: 2370    nû tâten sî ouch daz.

Verse: 2371    dô sî sich ze handen viengen
Verse: 2372    und in daz palas giengen,

Verse: 2373    und sî den hern Îwein sâhen,
Verse: 2374    benamen sî des jâhen,

Verse: 2375    sin gesæhen nie sô schœnen man.
Verse: 2376    dâne lugen sî niht an.

Verse: 2377    Ouch enwart nie rîter anderswâ
Verse: 2378    baz enpfangen dan er dâ.

Verse: 2379    sî besâhen in als ein wunder
Verse: 2380    und sprachen alle besunder

Verse: 2381    'wer brâhte disen rîter her?
Verse: 2382    Ob got wil, ez ist der

Verse: 2383    den mîn vrouwe nemen sol.'
Verse: 2384    in behaget nie rîter also wol.

Verse: 2385    alsus vuorten sî in
Verse: 2386    durch die liute enmitten hin,

Verse: 2387    und gesâzen beide an einer stat.
Verse: 2388    diu vrouwe ir truhsæzen bat

Verse: 2389    daz er ir rede tæte
Verse: 2390    und sî des alle bæte

Verse: 2391    daz sî ez liezen âne zorn:
Verse: 2392    sî het ir disen man erkorn.

Verse: 2393    sî sprâchen, ez wær âne ir haz
Verse: 2394    und in geviele nie dinc baz.

Verse: 2395    ein ros daz willeclîchen gât,
Verse: 2396    swer ouch daz mit sporn bestât,

Verse: 2397    sô gât ez deste baz ein teil.
Verse: 2398    sî mohten ir willen unde ir heil

Verse: 2399    ir lîhte gerâten.
Verse: 2400    ich wæn sî rehte tâten:

Next part


This text is part of the TITUS edition of Hartmann, Iwein.

Copyright TITUS Project, Frankfurt a/M, 6.5.2019. No parts of this document may be republished in any form without prior permission by the copyright holder.