TITUS
Hartmann, Iwein
Part No. 36
Previous part

Verse group: (36) 
Verse: 3501    willeclîchen an gesiht.'
Verse: 3502    alsus enoucte sî sich niht

Verse: 3503    unz in diu salbe gar ergienc
Verse: 3504    und er ze sinnen gevienc.

Verse: 3505    Dô er sich ûf gerihte
Verse: 3506    und sich selben ane blihte

Verse: 3507    und sich sô griulîchen sach,
Verse: 3508    wider sich selben er dô sprach

Verse: 3509    'bistûz Îwein, ode wer?
Verse: 3510    hân ich geslâfen unze her?

Verse: 3511    wâfen, herre, wâfen!
Verse: 3512    sold ich dan iemer slâfen!

Verse: 3513    wand mir hât mîn troum gegeben
Verse: 3514    ein vil harte rîchez leben.

Verse: 3515    ouwî waz ich êren pflac
Verse: 3516    die wîl ich slâfende lac!

Verse: 3517    mir hât getroumet michel tugent:
Verse: 3518    ich hete geburt unde jugent,

Verse: 3519    ich was schœne unde rîch
Verse: 3520    und disem lîbe vil unglîch,

Verse: 3521    ich was hövesch unde wîs
Verse: 3522    und hân vil manegen herten prîs

Verse: 3523    ze rîterschefte bejaget,
Verse: 3524    hat mir mîn troum niht missesaget

Verse: 3525    ich bejagte swes ich gerte
Verse: 3526    mit sper und mit swerte:

Verse: 3527    mir ervaht mîn eines hant
Verse: 3528    ein vrouwen und ein rîchez lant;

Verse: 3529    wan daz ich ir doch pflac,
Verse: 3530    Sô mir nû troumte, unmanegen tac,

Verse: 3531    unz mich der künec Artûs
Verse: 3532    von ir vuorte ze hûs.

Verse: 3533    mîn geselle was her Gâwein,
Verse: 3534    als mir in mînem troume schein.

Verse: 3535    Sî gap mir urloup ein jâr
Verse: 3536    (dazn ist allez niht wâr):

Verse: 3537    dô beleip ich langer âne nôt,
Verse: 3538    unz sî mir ir hulde widerbôt:

Verse: 3539    der was ich ungerne âne.
Verse: 3540    in allem disem wâne

Verse: 3541    sô bin ich erwachet.
Verse: 3542    mich hete mîn troum gemachet

Verse: 3543    zeinem rîchen herren.
Verse: 3544    nu waz möhte mir gewerren,

Verse: 3545    wær ich in disen êren tôt?
Verse: 3546    er hât mich geffet âne nôt.

Verse: 3547    swer sich an troume kêret,
Verse: 3548    der ist wol gunêret.

Verse: 3549    Troum, wie wunderlich dû bist!
Verse: 3550    du machest rîche in kurzer vrist

Verse: 3551    einen alsô swachen man
Verse: 3552    der nie nâch êren muot gewan:

Verse: 3553    swenner danne erwachet,
Verse: 3554    sô hastû in gemachet

Verse: 3555    zeinem tôren als ich.
Verse: 3556    zewâre doch versihe ich mich,

Verse: 3557    swie rûch ich ein gebûre sî,
Verse: 3558    und wær ich rîterschefte bî

Verse: 3559    wær ich gewâfent unde geriten,
Verse: 3560    ich kunde nâch rîterlîchen siten

Verse: 3561    alsô wol gebâren
Verse: 3562    als die ie rîter wâren.'

Verse: 3563    Alsus was er sîn selbes gast,
Verse: 3564    daz im des sinnes gebrast:

Verse: 3565    und ob er ie rîter wart
Verse: 3566    und alle sîn umbevart

Verse: 3567    die heter in dem mære
Verse: 3568    als ez im getroumet wære.

Verse: 3569    er sprach 'mich hât gelêret
Verse: 3570    mîn troum: des bin ich geêet,

Verse: 3571    mac ich ze harnasche komen.
Verse: 3572    der troum hât mir mîn reht benomen:

Verse: 3573    swie gar ich ein gebûre bin,
Verse: 3574    ez turnieret al mîn sin.

Verse: 3575    mîn herze ist mînem lîbe unglîch:
Verse: 3576    mîn lip ist arm, daz herze rîch.

Verse: 3577    ist mir getroumet mîn leben?
Verse: 3578    ode wer hât mich her gegeben

Verse: 3579    sô rehte ungetânen?
Verse: 3580    ich möhte mich wol ânen

Verse: 3581    rîterlîches muotes:
Verse: 3582    Iîbes unde guotes

Verse: 3583    der gebristet mir beider.'
Verse: 3584    als er diu vrischen cleider

Verse: 3585    einhalp bî im ligen sach,
Verse: 3586    des wundert in, unde sprach

Verse: 3587    'diz sint cleider der ich gnuoc
Verse: 3588    in mînem troume dicke truoc.

Verse: 3589    ichn sihe hie niemen des sî sîn:
Verse: 3590    ich bedarf ir wol: nû sîn ouch mîn.

Verse: 3591    nû waz ob disiu sam tuont?
Verse: 3592    sît daz mir ê sô wol stuont

Verse: 3593    in mînem troume rîch gewant.'
Verse: 3594    alsus cleiter sich zehant.

Verse: 3595    als er bedahte die swarzen lîch,
Verse: 3596    dô wart er einem rîter glîch.

Verse: 3597    Nu ersach diu juncvrouwe daz
Verse: 3598    daz cr unlasterlîchen saz:

Verse: 3599    sî saz in guoter kündekheit
Verse: 3600    uf ir pfärit unde reit,

Next part


This text is part of the TITUS edition of Hartmann, Iwein.

Copyright TITUS Project, Frankfurt a/M, 6.5.2019. No parts of this document may be republished in any form without prior permission by the copyright holder.