TITUS
Hartmann, Iwein
Part No. 37
Previous part

Verse group: (37) 
Verse: 3601    als sî dâ vür wære gesant
Verse: 3602    und vuorte ein pfärit an der hant.

Verse: 3603    weder sî ensach dar noch ensprach.
Verse: 3604    dô er sî vür sich rîten sach,

Verse: 3605    s dô wærer ûf gesprungen,
Verse: 3606    wan daz er was betwungen

Verse: 3607    mit selher siecheite
Verse: 3608    daz er sô wol gereite

Verse: 3609    niht ûf enmohte gestân
Verse: 3610    als er gerne hete getân,

Verse: 3611    unde rief ir hin nâch.
Verse: 3612    dô tete sî als ir wære gâch

Verse: 3613    und niht umb sîn geverte kunt,
Verse: 3614    unz er ir rief anderstunt.

Verse: 3615    dô kêrte sî sâ
Verse: 3616    unde antwurt im dâ.

Verse: 3617    sî sprach 'wer ruofet mir? wer?'
Verse: 3618    er sprach 'vrouwe, kêret her.'

Verse: 3619    sî sprach 'herre, daz sî.'
Verse: 3620    sî reit dar und habet im bî.

Verse: 3621    sî sprach 'gebietet über mich:
Verse: 3622    swaz ir gebietet, daz tuon ich',

Verse: 3623    und vrâget in der mære
Verse: 3624    wie er dar komen wære.

Verse: 3625    Dô sprach her Îwein
Verse: 3626    als ez ouch wol an im schein

Verse: 3627    'dâ hân ich mich hie vunden
Verse: 3628    des lîbes ungesunden.

Verse: 3629    ichn kan iu des gesagen niht
Verse: 3630    welch wunders geschiht

Verse: 3631    mich dâ her hât getragen:
Verse: 3632    wan daz kan ich iu wol gesagen

Verse: 3633    daz ich hie ungerne bin.
Verse: 3634    nû vüeret mich mit iu hin:

Verse: 3635    sô handelt ir mich harte wol,
Verse: 3636    und gedienez immer als ich sol.'

Verse: 3637    sî sprach 'rîter, daz sî getan.
Verse: 3638    ich wil mîn reise durch iuch lân:

Verse: 3639    mich hete mîn vrouwe gesant.
Verse: 3640    diu ist ouch vrouwe übcr diz lant:

Verse: 3641    zuo der vüer ich iuch mit mir.
Verse: 3642    ich râte iu wol daz ir

Verse: 3643    geruowet nâch iuwer arbeit.'
Verse: 3644    sus saz er ûf unde reit.

Verse: 3645    Nû vuorte sî in mit ir dan
Verse: 3646    zuo ir vrouwen, diu nie man

Verse: 3647    alsô gerne gesach.
Verse: 3648    man schuof im guoten gemach

Verse: 3649    von cleidern von spîse und von bade,
Verse: 3650    unz daz im aller sîn schade

Verse: 3651    harte lützel an schein.
Verse: 3652    hie hete her Îwein

Verse: 3653    sîn not überwunden
Verse: 3654    und guoten wirt vunden.

Verse: 3655    Diu vrouwe ouch des niht vergaz
Verse: 3656    sîne wolde wizzen daz

Verse: 3657    wâ ir salbe wære.
Verse: 3658    mit einem lügemære

Verse: 3659    beredte sich diu wîse maget.
Verse: 3660    sî sprach 'vrouwe, iu sî geclaget

Verse: 3661    wie mir zer bühsen ist geschehen.
Verse: 3662    ez hât der riter wol gesehen

Verse: 3663    wie nâch ich ertrunken was.
Verse: 3664    wunder ist daz ich genas.

Verse: 3665    ich kam in michel arbeit,
Verse: 3666    dô ich über daz wazzer reit

Verse: 3667    die hôhen brücke hie bî.
Verse: 3668    daz daz ros unsælec sî!

Verse: 3669    daz strûchte vaste unz an diu knie,
Verse: 3670    alsô daz ich den zoum verlie

Verse: 3671    unde der bühsen vergaz
Verse: 3672    und selbe kûme gesaz.

Verse: 3673    dô enpfiels mir in den wâc zetal,
Verse: 3674    und wizzet daz mich nie dehein val

Verse: 3675    sô starke gemuote.
Verse: 3676    waz hilfet älliu huote?

Verse: 3677    wan daz man niht behalten sol,
Verse: 3678    daz verliuset sich wol.'

Verse: 3679    Swie vil gevüege wære
Verse: 3680    diz guote lügemære,

Verse: 3681    doch zurnte sî ein teil.
Verse: 3682    sî sprach 'heil und unheil

Verse: 3683    diu sint uns nû geschehen:
Verse: 3684    der mac ich beider nû wol jehen.

Verse: 3685    den schaden suln wir verclagen
Verse: 3686    des vrumen gote gnâde sagen.

Verse: 3687    ich hân in kurzen stunden
Verse: 3688    einen rîter vunden

Verse: 3689    und mîn guote salben verlorn.
Verse: 3690    der schade sî durch den vrumen verkorn.

Verse: 3691    niemen habe seneden muot
Verse: 3692    umbe ein verlornez guot

Verse: 3693    des man niht wider müge hân.'
Verse: 3694    hie mite was der zorn ergân.

Verse: 3695    Sus twelte mîn her Îwein hie
Verse: 3696    unz in diu wilde varwe verlie,

Verse: 3697    und wart als ê ein schœne man.
Verse: 3698    vil schiere man im dô gewan

Verse: 3699    daz beste harnasch daz man vant
Verse: 3700    und daz schœnest ors über al daz lant

Next part


This text is part of the TITUS edition of Hartmann, Iwein.

Copyright TITUS Project, Frankfurt a/M, 6.5.2019. No parts of this document may be republished in any form without prior permission by the copyright holder.