TITUS
Hartmann, Iwein
Part No. 38
Previous part

Verse group: (38) 
Verse: 3701    sus wart bereitet der gast
Verse: 3702    daz im nihtes gebrast.

Verse: 3703    Dar nâch eines tages vruo
Verse: 3704    dô sâhen sî dort rîten zuo

Verse: 3705    den grâven Âliers mit her:
Verse: 3706    ouch sazten sich ze wer

Verse: 3707    die rîter vonme lande
Verse: 3708    unde ir sarjande,

Verse: 3709    unde mîn her Îwein
Verse: 3710    zaller vorderest schein.

Verse: 3711    sî wârn ê vaste in getân,
Verse: 3712    und heten joch die wer verlân,

Verse: 3713    und alsô gar überriten
Verse: 3714    daz sî von vrävellîchen siten

Verse: 3715    vil nâhen wâren komen:
Verse: 3716    nû wart der muot von in genomen,

Verse: 3717    dô sî den gast sâhen
Verse: 3718    zuo den vîenden gâhen

Verse: 3719    und sô manlichen gebâren.
Verse: 3720    die ê verzaget wâren,

Verse: 3721    die sâhen nû alle ûf in
Verse: 3722    und geviengen manlîchen sin.

Verse: 3723    Dô liez er sîne vrouwen
Verse: 3724    ab der were schouwen

Verse: 3725    daz ofte kumet diu vrist
Verse: 3726    daz selch guot behalten ist

Verse: 3727    daz man dem biderben manne tuot.
Verse: 3728    sîne rou dehein daz guot

Verse: 3729    daz sî an in hete geleit:
Verse: 3730    wand sîn eines manheit

Verse: 3731    diu tetes unstätelîchen
Verse: 3732    an einen vurt entwîchen.

Verse: 3733    dâ bekoberten sî sich.
Verse: 3734    hie slac, dâ stich!

Verse: 3735    nû wer möhte diu sper
Verse: 3736    älliu bereiten her

Verse: 3737    diu min her Îwein dâ brach?
Verse: 3738    er sluoc unde stach,

Verse: 3739    und die sîne alle,
Verse: 3740    daz jene mit maneges valle

Verse: 3741    muosen unstätelîchen
Verse: 3742    von dem vurte entwîchen

Verse: 3743    und in den sige lâzen.
Verse: 3744    die der vluht vergâzen,

Verse: 3745    die wurden âne zagen
Verse: 3746    alle meisteil erslagen

Verse: 3747    und die andern gevangen.
Verse: 3748    hie was der strît ergangen

Verse: 3749    nâch hern Îweines êren.
Verse: 3750    sî begunden an in kêren

Verse: 3751    den lop unde den prîs,
Verse: 3752    er wære biderbe hövesch und wîs,

Verse: 3753    und in enmöhte niht gewæren,
Verse: 3754    heten sin zeinem herren

Verse: 3755    od einen im gelîchen.
Verse: 3756    sî wunschten vlîzeclîchen

Verse: 3757    daz sî des beidiu zæme
Verse: 3758    daz in ir vrouwe næme.

Verse: 3759    Sus wart dem grâven Âliere
Verse: 3760    genendeclîchen schiere

Verse: 3761    gevangen unde erslagen sîn her.
Verse: 3762    dannoch entwelter ze wer

Verse: 3763    mit einer lützelen kraft,
Verse: 3764    und tete selhe rîterschaft

Verse: 3765    die niemen gevelschen mohte.
Verse: 3766    dô daz niht langer tohte,

Verse: 3767    dô muoser ouch entwîchen,
Verse: 3768    und vlôch dô werlîchen

Verse: 3769    gegen einer sîner veste
Verse: 3770    die er dâ nahen weste.

Verse: 3771    dâ er zuo dem hûse vlôch
Verse: 3772    dâ was der burcberc sô hoch

Verse: 3773    beidiu sô stechel und sô lanc,
Verse: 3774    daz in sunder sînen danc

Verse: 3775    her Îwein ergâhte an dem tor:
Verse: 3776    dâ vienc er in vor

Verse: 3777    und nam des sîne sicherheit
Verse: 3778    daz er gevangen wider reit

Verse: 3779    in der vrouwen gewalt,
Verse: 3780    diu sîn dâ vor sô dicke engalt,

Verse: 3781    und ir verwüestet hete ir lant.
Verse: 3782    er sazte ir gîsel unde pfant

Verse: 3783    daz er alle sîne schulde
Verse: 3784    buozte unz ûf ir hulde.

Verse: 3785    Ezn wart nie rîter mêre
Verse: 3786    erboten grœzer êre

Verse: 3787    dan mînem hern Îweine geschach,
Verse: 3788    dô man in zuo rîten sach

Verse: 3789    unde sînen gevangen man
Verse: 3790    eneben im vuorte dan.

Verse: 3791    dô in diu grævinne enpfienc
Verse: 3792    unde engegen ime gienc

Verse: 3793    mit allen ir vrouwen
Verse: 3794    dô mohte man schouwen

Verse: 3795    vil vriuntlîche blicke.
Verse: 3796    sî besach in ofte und dicke:

Verse: 3797    und wolder lônes hân gegert,
Verse: 3798    des wærer dâ gewert:

Verse: 3799    sîne versaget im lîp noch guot.
Verse: 3800    sone stuont ab niender sîn muot:

Next part


This text is part of the TITUS edition of Hartmann, Iwein.

Copyright TITUS Project, Frankfurt a/M, 6.5.2019. No parts of this document may be republished in any form without prior permission by the copyright holder.