TITUS
Hartmann, Iwein
Part No. 40
Previous part

Verse group: (40) 
Verse: 3901    nû schant erz dâ erz weste
Verse: 3902    veizet und aller beste,

Verse: 3903    und nam des einen brâten dan.
Verse: 3904    nû gienc ouch diu naht an.

Verse: 3905    er schurft ein viur und briet daz
Verse: 3906    und âz diz ungesalzen maz

Verse: 3907    âne brôt und âne wîn:
Verse: 3908    ezn moht eht dô niht wæher sîn.

Verse: 3909    daz im dâ überiges schein,
Verse: 3910    daz âz der lewe unz an diu bein.

Verse: 3911    Her Îwein leite sich und slief:
Verse: 3912    der lewe wachet unde lief

Verse: 3913    umb sîn ors unde umb in.
Verse: 3914    er hete die tugent und den sin

Verse: 3915    daz er sîn huote zaller zît,
Verse: 3916    beidiu dô unde sît.

Verse: 3917    diz was ir beider arbeit,
Verse: 3918    daz er nâch âventiure reit

Verse: 3919    rehte vierzehen tage,
Verse: 3920    und daz mit selhem bejage

Verse: 3921    der wilde lewe disem man
Verse: 3922    sîne spîse gewan.

Verse: 3923    Dô truoc in diu geschiht
Verse: 3924    (wande ern versach sichs niht)

Verse: 3925    vil rehte an sîner vrouwen lant,
Verse: 3926    dâ er den selben brunnen vant,

Verse: 3927    von dem im was geschehen,
Verse: 3928    als ich iu ê hân verjehen

Verse: 3929    grôz heil und michel ungemach.
Verse: 3930    als er die linden drobe sach,

Verse: 3931    und dô im dâa zuo vor erschein
Verse: 3932    diu kapelle und der stein,

Verse: 3933    dô wart sîn herze des ermant
Verse: 3934    wie er sîn êre und sîn lant

Verse: 3935    hete verlorn und sîn wîp.
Verse: 3936    des wart sô riuwec sîn lîp,

Verse: 3937    von jâmer wart im alsô wê,
Verse: 3938    daz er vil nâch als ê

Verse: 3939    von sînem sinne was komen,
Verse: 3940    unde im wart dâ benomen

Verse: 3941    des herzen kraft alsô gar
Verse: 3942    daz er zer erde tôtvar

Verse: 3943    von dem orse nider seic.
Verse: 3944    und als er vol sich geneic,

Verse: 3945    daz swert im ûz der scheide schôz:
Verse: 3946    des güete was alsô grôz

Verse: 3947    daz ez im durch den halsperc brach
Verse: 3948    und im ein grôze wunden stach,

Verse: 3949    daz er vil sêre bluote.
Verse: 3950    des wart in unmuote

Verse: 3951    der lewe, wânde er wære tôt,
Verse: 3952    und was im nâch dem tôde nôt.

Verse: 3953    er rihte daz swert an einen strûch
Verse: 3954    und wolt sich stechen durch den bûch,

Verse: 3955    wan daz im her Îwein
Verse: 3956    dannoch lebende vor schein.

Verse: 3957    er rihte sich ûf und saz
Verse: 3958    unde erwante dem lewen daz

Verse: 3959    daz er sich niht ze tôde stach.
Verse: 3960    her Îwein clagete unde sprach

Verse: 3961    'unsælec man, wie verstû nû!
Verse: 3962    der unsæligest bistû

Verse: 3963    der ie zer werlte wart geborn.
Verse: 3964    nû wie hâstû verlorn

Verse: 3965    dîner vrouwen hulde!
Verse: 3966    jane wær diu selbe schulde

Verse: 3967    zer werlte niemans wan dîn,
Verse: 3968    ezn müese sîn ende sîn.

Verse: 3969    Er ist noch baz ein sælec man
Verse: 3970    der nie dehein êre gewan

Verse: 3971    dan der êre gewinnet
Verse: 3972    und sich sô niht versinnet

Verse: 3973    daz er sî behalten künne.
Verse: 3974    êre unde wünne,

Verse: 3975    der hât ich beider alsô vil
Verse: 3976    daz ichz gote clagen wil

Verse: 3977    daz ich ir ie sô vil gewan,
Verse: 3978    ichn solde stæte sîn dar an.

Verse: 3979    wær mir niht geschehen heil
Verse: 3980    und liebes ein vil michel teil,

Verse: 3981    sone west ich waz ez wære:
Verse: 3982    âne senede swære

Verse: 3983    sô lebet ich vrîlichen als ê:
Verse: 3984    nû tuot mir daz senen wê,

Verse: 3985    daz mir daz solde geschehen
Verse: 3986    daz ich muoz ane sehen

Verse: 3987    schaden unde schande
Verse: 3988    in mîner vrouwen lande.

Verse: 3989    diz ist ir êre unde ir lant:
Verse: 3990    daz stuont ê in mîner hant,

Verse: 3991    daz mir des wunsches niht gebrast:
Verse: 3992    des bin ich alles worden gast.

Verse: 3993    ich mac wol clagen mîn schœne wîp:
Verse: 3994    war umbe spar ich den lîp?

Verse: 3995    mîn lîp wære des wol wert
Verse: 3996    daz mich mîn selbes swert

Verse: 3997    zehant hie an im ræche,
Verse: 3998    und ez durch in stæche.

Verse: 3999    sît ich mirz selbe han getan,
Verse: 4000    ich solts ouch selbe buoze enpfân

Next part


This text is part of the TITUS edition of Hartmann, Iwein.

Copyright TITUS Project, Frankfurt a/M, 6.5.2019. No parts of this document may be republished in any form without prior permission by the copyright holder.