TITUS
Hartmann, Iwein
Part No. 41
Previous part

Verse group: (41) 
Verse: 4001    (nû gît mir doch des bilde
Verse: 4002    dirre lewe wilde,

Verse: 4003    daz er von herzeleide sich
Verse: 4004    wolde erstechen umbe mich,

Verse: 4005    daz rehtiu triuwe nâhen gât);
Verse: 4006    sît mir mîn selbes missetât

Verse: 4007    mîner vrouwen hulde,
Verse: 4008    unde dehein ir schulde,

Verse: 4009    ân aller slahte nôt verlôs,
Verse: 4010    und weinen vür daz lachen kôs.'

Verse: 4011    Dô disiu grôze clage geschach,
Verse: 4012    daz gehôrte unde sach

Verse: 4013    ein juncvrouwe, diu leit
Verse: 4014    von vorhten grœzer arbeit

Verse: 4015    danne ie dehein wîp,
Verse: 4016    wand sî gevangen ûf den lîp

Verse: 4017    in der kapellen lac.
Verse: 4018    und dô er dirre clage pflac,

Verse: 4019    dô sach sî hin vür
Verse: 4020    durch eine schrunden an der tür

Verse: 4021    sî sprach 'wer claget dâ? wer?'
Verse: 4022    'wer vrâget des?' sprach aber er.

Verse: 4023    sî sprach 'herre, daz hie claget,
Verse: 4024    daz ist ein alsô armiu maget

Verse: 4025    daz von deheiner sache,
Verse: 4026    von manegem ungemachc,

Verse: 4027    deheiniu armer möhte leben.'
Verse: 4028    er sprach 'wer möhte iu geben

Verse: 4029    sô grôzen kumber als ich hân?
Verse: 4030    ir muget wol iuwer clage lân:

Verse: 4031    wan der vervluochte daz bin ich.'
Verse: 4032    sî sprach 'daz ist unmügelich

Verse: 4033    daz iuwer kumber müge sîn
Verse: 4034    des endes iender sam der mîn.

Verse: 4035    ich sihe wol daz ir stât
Verse: 4036    unde rîtet unde gât

Verse: 4037    swar iuch iuwer wille treit:
Verse: 4038    sô ist mir daz vür geleit,

Verse: 4039    ich bin alsô gevangen,
Verse: 4040    verbrant ode erhangen

Verse: 4041    wird ich morgen an dem tage.
Verse: 4042    niemen ist der michs übertrage

Verse: 4043    mirne werde der lîp benomen.'
Verse: 4044    cr sprach 'vrouwe, wie ist daz komen?'

Verse: 4045    sî sprach 'hab ich dehein schulde,
Verse: 4046    got welle daz ich sîn hulde

Verse: 4047    niemer gewinne.
Verse: 4048    vür eine verrâtærinne

Verse: 4049    bin ich dâ her in geleit:
Verse: 4050    daz lantvolc hât ûf mich geseit

Verse: 4051    eine schult sô swære:
Verse: 4052    und ob ich schuldec wære,

Verse: 4053    sô wær ich grôzer zühte wert.
Verse: 4054    ez nam in dem jâre vert

Verse: 4055    des landes vrouwe einen man:
Verse: 4056    dâ missegienc ir leider an:

Verse: 4057    die schulde legent sî ûf mich.
Verse: 4058    nû herre got, waz moht ich

Verse: 4059    daz ir an im missegie?
Verse: 4060    deiswâr geriet ich irz ie,

Verse: 4061    daz tet ich durch ir êre.
Verse: 4062    ouch wundert mich iemer mêre

Verse: 4063    daz ein alsô vrumer man
Verse: 4064    sô starke missetuon kan:

Verse: 4065    wander was benamen der beste
Verse: 4066    den ich lebende weste.

Verse: 4067    ouch enistz niht von den schulden sîn:
Verse: 4068    ez ist von den unsælden mîn.

Verse: 4069    alsus ring ich mit sorgen.
Verse: 4070    sî beitent mir unz morgen:

Verse: 4071    sô nement sî mir ouch den lîp.
Verse: 4072    wan ich bin leider ein wîp,

Verse: 4073    daz ich mich mit kampfe iht wer:
Verse: 4074    so enist ouch niemen der mich ner.'

Verse: 4075    Er sprach 'so lâze ich iu den strît,
Verse: 4076    daz ir angesthafter sît

Verse: 4077    dan ich, sît ez so umbe iuch stât
Verse: 4078    daz ez iu an den lîp gât,

Verse: 4079    ob ir iuch niht muget erwern.'
Verse: 4080    sl sprach 'wer möhte mich ernern?

Verse: 4081    der joch den willen hæte
Verse: 4082    daz erz gerne tæte,

Verse: 4083    wer hete dannoch die kraft
Verse: 4084    erne dulte meisterschaft?

Verse: 4085    wan ez sint drî starke man
Verse: 4086    die mich alle sprechent an.

Verse: 4087    ich weiz ir zwêne, und ouch niht mê,
Verse: 4088    an den sô volleclîchen stê

Verse: 4089    diu tugent und diu manheit,
Verse: 4090    die sich sô starke arbeit

Verse: 4091    durch mich armen næmen an.
Verse: 4092    daz sint ouch zwêne selhe man,

Verse: 4093    ir ietweder slüege âne wer
Verse: 4094    disses volkos ein her;

Verse: 4095    und weiz daz ouch als mînen tôt,
Verse: 4096    west ir ietweder mîne nôt,

Verse: 4097    er kæme und væhte vür mich.
Verse: 4098    der dewedern mac ich

Verse: 4099    ze disen zîten niht hân,
Verse: 4100    und muoz mir an den lîp gân:

Next part


This text is part of the TITUS edition of Hartmann, Iwein.

Copyright TITUS Project, Frankfurt a/M, 6.5.2019. No parts of this document may be republished in any form without prior permission by the copyright holder.