TITUS
Hartmann, Iwein
Part No. 42
Previous part

Verse group: (42) 
Verse: 4101    ouch entrûw ichs niemen wan den zwein.'
Verse: 4102    dô sprach der her Îwein

Verse: 4103    'nû nennet mir die drî man
Verse: 4104    die iuch mit kampfe sprechent an:

Verse: 4105    und nennet mir danne mê
Verse: 4106    die zwêne umbe diez sô stê,

Verse: 4107    der ietweder sô vrum sî
Verse: 4108    daz er eine væhte wider drî.'

Verse: 4109    sî sprach 'ich nennes iu alle wol.
Verse: 4110    die drî der gewalt ich dol,

Verse: 4111    der ein ist truhsæze hie,
Verse: 4112    und sîne bruoder, die mir ie

Verse: 4113    wâren nîdec und gehaz,
Verse: 4114    wand mich mîn vrouwe hâte baz

Verse: 4115    dan sî mir des gunden,
Verse: 4116    und hânt sî des überwunden

Verse: 4117    daz sî nû wol übersiht
Verse: 4118    swaz mir leides geschiht.

Verse: 4119    dô mîn vrouwe ir man nam,
Verse: 4120    der ir nâch wâne wol gezam

Verse: 4121    und sî dar nâch niht wol enlie,
Verse: 4122    dô begâben sî mich nie

Verse: 4123    mit tägelîcher arbeit,
Verse: 4124    sine zigen mich der valscheit

Verse: 4125    daz ez schüefe niuwan mîn list
Verse: 4126    daz ir sus missegangen ist.

Verse: 4127    und swaz ouch mir dâ von geschiht,
Verse: 4128    sône lougen ich des niht

Verse: 4129    ezn vuocte mîn rât und mîn bete
Verse: 4130    daz sîz ie umb in getete;

Verse: 4131    wand ich mich wol umb in versach,
Verse: 4132    geschæhez als ez doch geschach,

Verse: 4133    sî hetes vrume und êre.
Verse: 4134    nû velschent sî mich sêre,

Verse: 4135    ich habe sî verrâten.
Verse: 4136    wand sî mir dô tâten

Verse: 4137    michel unreht unde gewalt,
Verse: 4138    dô wart mîn leit vil manecvalt,

Verse: 4139    unde ich armiu verlorne
Verse: 4140    vergâhte mich mit zorne.

Verse: 4141    wan daz ist gar der sælden slac,
Verse: 4142    swer sînem zorne niene mac

Verse: 4143    getwingen, ern überspreche sich.
Verse: 4144    leider alsô tet ich mich.

Verse: 4145    ich hân mich selben verlorn.
Verse: 4146    ich sprach durch mînen zorn,

Verse: 4147    swelhe drî die tiursten man
Verse: 4148    sich von dem hove næmen an

Verse: 4149    daz sîz beredten wider mich,
Verse: 4150    einen rîter vund ich

Verse: 4151    der mit in allen drin strite,
Verse: 4152    ob man mir vierzec tage bite.

Verse: 4153    der rede giengen sî dô nach:
Verse: 4154    wand mir was gewesen ze gâch:

Verse: 4155    man liez mich ir niht wandel hân,
Verse: 4156    und enwart ouch des niht erlân

Verse: 4157    ichn schüef in rehte sicherheit
Verse: 4158    daz ich der rede wære gereit

Verse: 4159    als ich dâ hete gesprochen,
Verse: 4160    daz ich in sehs wochen

Verse: 4161    mich mit kampfe lôste.
Verse: 4162    die zwêne der ich mich trôste,

Verse: 4163    die reit ich suochen in diu lant,
Verse: 4164    daz ich ir dewedern vant.

Verse: 4165    dô suocht ich den künec Artûs,
Verse: 4166    und envant dâ nieman ze hûs

Verse: 4167    der sich ez wolde nemen an:
Verse: 4168    sus schiet ich âne kempfen dan.

Verse: 4169    des wart ich sô ze spotte hie
Verse: 4170    daz ez mir an mîn herze gie.

Verse: 4171    sus wurfen sî mich dâ her in,
Verse: 4172    als ich des beitende bin

Verse: 4173    daz sich mîn lîp sol enden:
Verse: 4174    wan die mirz hulfen wenden,

Verse: 4175    die sint mir nû vil ungereit.
Verse: 4176    mir hulfe ûz dirre arbeit

Verse: 4177    sweder ez weste von in zwein,
Verse: 4178    her Gâwein ode her Îwein.'

Verse: 4179    'Welhen Îwein meinet ir?' sprach er.
Verse: 4180    sî sprach 'herre, daz ist der

Verse: 4181    durch den ich lîde disiu bant.
Verse: 4182    sîn vater ist genant

Verse: 4183    der künec Urjên.
Verse: 4184    der kumber dâ ich inne stên,

Verse: 4185    der ist von sînen schulden.
Verse: 4186    mir was ze sînen hulden

Verse: 4187    alze liep und alze gâch,
Verse: 4188    unde ranc starke dar nâch

Verse: 4189    daz er herre wurde hie
Verse: 4190    leider als ez ouch ergie.

Verse: 4191    er behagete mir ze gâhes wol:
Verse: 4192    wan swer den man erkennen sol,

Verse: 4193    dâ hœret langer wîle zuo.
Verse: 4194    ich lobet in leider alze vruo:

Verse: 4195    ich wânde er kunde lônen baz.
Verse: 4196    mîn rât vuoget ime daz

Verse: 4197    daz sichs mîn vrouwe underwant
Verse: 4198    und gap im lîp unde lant.

Verse: 4199    nû hât er uns beswichen
Verse: 4200    im selben schädelichen.

Next part


This text is part of the TITUS edition of Hartmann, Iwein.

Copyright TITUS Project, Frankfurt a/M, 6.5.2019. No parts of this document may be republished in any form without prior permission by the copyright holder.