TITUS
Hartmann, Iwein
Part No. 43
Previous part

Verse group: (43) 
Verse: 4201    ez ist sîn unsælekheit:
Verse: 4202    wan des swüer ich wol einen eit,

Verse: 4203    mîn vrouwe ist ein sô edel wîp
Verse: 4204    daz er niemer sînen lîp

Verse: 4205    bestætet ûf der erde
Verse: 4206    ze hôherem werde:

Verse: 4207    sî ist sô schœne und sô rîch,
Verse: 4208    wær sî sînem lîbe gelîch,

Verse: 4209    sô vreuter sich daz sîz getete'
Verse: 4210    dô sprach er 'heizet ir Lûnete?'

Verse: 4211    sî sprach 'herre, jâ ich.
Verse: 4212    er sprach 'sô erkennet mich:

Verse: 4213    ich binz Îwein der arme.
Verse: 4214    daz ez got erbarme

Verse: 4215    daz ich ie wart geborn!
Verse: 4216    nû wie hân ich verlorn

Verse: 4217    mîner vrouwen hulde!
Verse: 4218    sît diu selbe schulde

Verse: 4219    niemannes ist wan mîn,
Verse: 4220    der schade sol ouch mîn eines sîn:

Verse: 4221    ichn weiz wem ich sî mêre gebe.
Verse: 4222    jane müet mich niht wan daz ich lebe:

Verse: 4223    ouch sol ich schiere tôt geligen.
Verse: 4224    deiswâr ich trûwe wol gesigen

Verse: 4225    an den rîtern allen drin,
Verse: 4226    die iuch geworfen hânt her in:

Verse: 4227    und swenn ich iuch erlœset hân,
Verse: 4228    sô sol ich mich selben slân.

Verse: 4229    mîn vrouwe muoz doch den kampf gesehen:
Verse: 4230    wander sol vor ir geschehen.

Verse: 4231    ichn weiz waz ich nû mêre tuo
Verse: 4232    wan daz ich ir morgen vruo

Verse: 4233    über mich selben rihte
Verse: 4234    und zuo ir angesihte

Verse: 4235    durch ir willen lige tôt:
Verse: 4236    wand ez muoz doch mîn senediu not

Verse: 4237    mit dem tôde ein ende hân.
Verse: 4238    diz sol allez ergân

Verse: 4239    daz sî niht wizze wer ich sî,
Verse: 4240    unz ich ersterbe und die drî

Verse: 4241    an den ich iuch rechen sol:
Verse: 4242    sô weiz mîn vrouwe danne wol,

Verse: 4243    sô sî bevindet, wer ich bin,
Verse: 4244    daz ich lîp und den sin

Verse: 4245    von leide verloren hân.
Verse: 4246    diu râche sol vor ir ergân.

Verse: 4247    Ez ist reht daz ich iu lône
Verse: 4248    der erbæren krône

Verse: 4249    dich ich von iuwern schulden truoc.
Verse: 4250    ich hete êren genuoc:

Verse: 4251    waz half mich daz ich golt vant?
Verse: 4252    ez ist eht vil unbewant

Verse: 4253    zuo dem tôren des goldes vunt:
Verse: 4254    er wirfet ez doch hin zestunt.

Verse: 4255    swie ich zuo mir selben habe getân,
Verse: 4256    ir sult iedoch gewis hân,

Verse: 4257    ichn lâze iuch niht under wegen.
Verse: 4258    wan dô ich tôt wære gelegen,

Verse: 4259    dô hulfet ir mir von sorgen:
Verse: 4260    alsô tuon ich iu morgen'

Verse: 4261    Nu entwâfent er sîn houbet:
Verse: 4262    dô wart ez im geloubet

Verse: 4263    daz erz her Îwein wære.
Verse: 4264    geringet wart ir swære:

Verse: 4265    von vreuden sî weinde
Verse: 4266    und sprach als sîz ouch meinde

Verse: 4267    'mirn mac nû niht gewerren,
Verse: 4268    sît ich mînen herren

Verse: 4269    lebenden gesehen hân.
Verse: 4270    ez was mîn angest und mîn wân

Verse: 4271    daz ir wæret erslagen.
Verse: 4272    ichn hôrte dâ ze hove sagen

Verse: 4273    von iu dehein daz mære
Verse: 4274    daz iuwer iht wære.'

Verse: 4275    Er sprach 'mîn vrouwe Lûnete,
Verse: 4276    wâ was der noch ie tete

Verse: 4277    des alle vrouwen ruochten
Verse: 4278    die sînen dienest suochten,

Verse: 4279    mîn lieber friunt her Gâwein,
Verse: 4280    der ie nâch vrouwen willen schein,

Verse: 4281    ie ranc und noch tuot?
Verse: 4282    het ir im gesaget iuwern muot,

Verse: 4283    er hete iuch alles des gewert
Verse: 4284    des ir an in hetet gegert'

Verse: 4285    sî sprach 'het ich den vunden,
Verse: 4286    sô het ich überwunden

Verse: 4287    mîne sorgen zehant.
Verse: 4288    daz ich sîn dâ niene vant,

Verse: 4289    daz was wunderlîchen komen.
Verse: 4290    in was diu künegîn genomen

Verse: 4291    daz hete ein rîter getân:
Verse: 4292    den woltens alle gelastert hân,

Verse: 4293    und was in den selben tagen,
Verse: 4294    dô ich dar kam durch clagen,

Verse: 4295    her Gâwein nâch gestrichen.
Verse: 4296    ich liez dâ wærlichen

Verse: 4297    umb die vrouwen grôz clagen,
Verse: 4298    unde ouch umb sîn nâch jagen.

Verse: 4299    sî vorhten daz sî daz wîp
Verse: 4300    verlürn, und dâ zuo er den lîp;

Next part


This text is part of the TITUS edition of Hartmann, Iwein.

Copyright TITUS Project, Frankfurt a/M, 6.5.2019. No parts of this document may be republished in any form without prior permission by the copyright holder.