TITUS
Lancelot und Ginover I: Prosalancelot
Part No. 4
Previous part

Page: (16) 
Sentence: 30    Ai herre got, nu gebe das ich mir im ersterbe ee er mit mit dem libe entgee, wann dann were alles myn leyt gesenfftert!« Da stachen sie beyde zuhauff, und der konig Ban stach yn darnyder so freischlich das all sin lút wonten das er dott were, und der konig fur zuhant dannen und was fro und wonde das gott syn gebete hett gehört; und reyt bald biß er kam zu Treb, und biß an den vierden tag wart die burgk gewunnen da Claudas fur geseßen was.
Sentence: 31    Und darnach des abendes kam der konig Ban zu Trebe inn; und da er wúst das er nit dot was, da was er vil unfro inn sym herczen, das die ruw nymer ußer sym herczen kam, als es darnach vil wol schyn wart.
Sentence: 32    Claudas saß vor Trebe manchen tag, und der konig Ban besante sich allenthalben und zu dem konig Artus.
Sentence: 33    Der hatt aber so vil zu thun in mange wise das er sich nit getorst underwinden andere dinge.
Sentence: 34    Und der konig Bohort syn bruder, der im viel geholffen het, der lag dotsiech, und alle tag teglichen furen die futerer durch sin lant, wann sin marck und die marck von Bonewig stießen zuhauff gegen Trebes wert.
Sentence: 35    Da Claudas sah das er die burgk nit licht kunt gewinnen, da nam er ein gesprech geyn dem konig Ban, und gaben beyde sicherheit mit fried zu farn und zu komen.
Sentence: 36    Der konig Ban kam zu dem tag selb dritt und nicht me.
Sentence: 37    Und der eyn von den zweyn was sin truchseß, und der ander was ein ritter.
Sentence: 38    Also glich kam Claudas selb drytt on me lúte, und der tag was gemacht vor der porten der burg.
Sentence: 39    Die burg was hoh gelegen und was unden gelochet und was hart gäch und múlich offzugene.
Sentence: 40    Da der konig Ban gesah den konig Claudas und er yn wiedder und sie waren genehett, da macht der konig Claudas sin clag groß das im was erschlagen Ponton Antonies.
Sentence: 41    Da clagt der konig Ban das er im sin lant hett genomen zu unrecht.
Sentence: 42    Da sprach der konig Claudas:
Sentence: 43    »Ich nem es uch nit umb keynerley sach die ir mit ye gedaten, noch umb keyne mißedatt noch durch dheynen haß, wann ich thuns umb den konig Artus den ir zu herren habt, wann syn vatter Uterpandragon hatt mich enterbet.
Sentence: 44    Ich sol uch machen ein gut teiding:

Next part


This text is part of the TITUS edition of Lancelot und Ginover I: Prosalancelot.

Copyright TITUS Project, Frankfurt a/M, 7.5.2019. No parts of this document may be republished in any form without prior permission by the copyright holder.