TITUS
Lancelot und Ginover I: Prosalancelot
Part No. 7
Previous part

Page: (22) 
Sentence: 67    Da sieß da alles hatt bereyt, da sagt sieß dem konig.
Sentence: 68    Da kose der konig under allen synen knechten eynen dem er allerbast getruwet, und sagt im das er seh das im nichts gebrest an sim roß, wann er must zuhant ryten.
Sentence: 69    Der knecht mynnet sere synen herren und det schier syn gebott.
Sentence: 70    Er hett das roß groß und starck und wol gande und was von allen dingen wol bereytt.
Sentence: 71    Da ging der konig zu synem truchseßen und saget im allen synen willen, wie er wolt farn zu des konig Artus hoff.
Sentence: 72    »Ich getruw uch wol«, sprach er, »fur alle manne, wann ir sint mir ye und ye lieb gewesen.
Sentence: 73    Nu bevelhe ich uch zu gottes truwen myn burgk zu behúten als myn hercz in mym libe, und morn solt ir sprechen zum konig Claudas das ich hab gesant an myn herren den konig Artus, und ir solt im dienen nach synem willen, und saget im:
Sentence: 74    enhabe ich keyn hilff von mym herren konig Artus in dißen vierczig tagen, so thu ich yn gewaltig der burgk nach sym willen.
Sentence: 75    Und hútent wol das er myner fert icht wißse, wann er solt wenig achten off das ich hinder mir han gelaßen!« »Herre«, sprach der mörder, »ensorget nicht, wann ich sol uch das wol bewarn!« Des abends ging der konig bezytt schlaffen, wann die nacht kurcz warn, wann es was zu halbem augst eins fritages zu abent.
Sentence: 76    Der konig was in großen angsten von dem weg den er hatt zu farn, wann es ging im an syn ere.
Sentence: 77    Da stund er off vor tag dry milen und die pfert wurden gesattelt und alles wart bereyt.
Sentence: 78    Da bevalh er gott synen truchseßen und darnach all syn lút.
Sentence: 79    Da reyt der konig uber eyn cleyn brúcken, die von hurden was gemacht, die ging uber ein cleyn bach, die under der burgk floß, und die burgk was nicht beseßen dann einhalb; und da sie allermeyst beseßsen was, das was ferrer dann man mit einem bogen geschießen möcht zu dry malen, wann zu lande wert was es alles ein gebirg und ein tieff tal und vil böß zuzukomen.
Sentence: 80    Und anderhalben gegen dem waßer wert enmocht man sie nit besiczen, wann es was eyn tieff mere und breyt, und da ging nit me weges zu dann eyn cleyn pfedelin sere schmal, und was wol zweyer mylen langk.

Next part


This text is part of the TITUS edition of Lancelot und Ginover I: Prosalancelot.

Copyright TITUS Project, Frankfurt a/M, 7.5.2019. No parts of this document may be republished in any form without prior permission by the copyright holder.