TITUS
Sachsenspiegel
Part No. 46
Previous part

Chapter: XX 
XX. Waz itlich man zu morgengabe geben mag. Wie man morgengabe nemen unde behalden sal unde gerade.


Paragraph: 1.     Nu vernemet, waz itlich man von ritters art muge geben sime wibe zu morgengabe. Des morgens, alse her mit ir zu tische get vor ezzene, ane erben gelob, so mag her ir gebin einen knecht adir eine mait, de binnen iren iaren sint, unde zune unde zimmere unde veltgenge vie.
Paragraph: 2.     Wor der vrowen die stat nicht en ist mit deme gebuw, alse ire man stirbit, binnen sechz wochen nach deme drisigesten sal si mit deme gebuw rumen, so daz se de erden nicht en wunde. But si ez abir zu losene nach der gebure kore ieneme, des de stat iz, unde wil herz nicht, su muz sie ez wol ufgraben, daz sie de erden wider ebene.
Paragraph: 3.     Blibet si abir mit den kindere adir mit ires mannes erben lange wile adir kurtze ungezwelet mit irme gute, wenne si sich denne von in scheidet, sie nimt al ire recht an deme gute, alse si ez nemen solde do ire man starp.
Paragraph: 4.     Blibit abir de wetewe nach ires mannes tode mit den kinderen an deme gute, daz ire nicht en iz, ungescheiden von deme gute, nimt ire son wip bi irme libe unde stirbit ire son dar nach, ires sones wetewe nimt mit merem rechte ires mannes morgengabe unde mosteil unde gerade an ires mannes gute, denne sin muter, ab si ires mannes unbeschuldenen were unde ihres selbes daran gezugen mag.
Paragraph: 5.     Stirbit abir der son in der muter gute, so ist ez de muter nehir zu behaldene mit gezuge, den des sones wetewe.
Paragraph: 6.     Morgengabe behelt daz wip uf den heiligen, de gewere abir mit gezuge.
Paragraph: 7.     Sus behelt ouch ire niftele ire gerade nach irem tode, ab si er irem manne stirbit billicher, den des mannes muter. Die muter ist gast in des sones gewere unde der son in der muter.
Paragraph: 8.     Alle de von ritters art nicht en sint, die en mugen iren wiben nicht geben zu morgengabe, wen daz beste phert adir vi, daz si haben.
Paragraph: 9.     Morgengabe muz ein wip uf den heiligen wol behalden ane gezug.



Next part


This text is part of the TITUS edition of Sachsenspiegel.

Copyright TITUS Project, Frankfurt a/M, 7.5.2019. No parts of this document may be republished in any form without prior permission by the copyright holder.