TITUS
Sachsenspiegel
Part No. 173
Previous part

Chapter: V 
V. Anevanget man gut, daz deme manne gelegen adir zu behaldene getan ist, verlusit her daz. Stirbit phert ader vie binnen satzunge.


Paragraph: 1.     Waz man einem manne liet adir tut zu behaldene offenbare, mag her daz gezugen selbe dritte, man en mag im dube noch roubiz dar an gezien. Dries ubir vierzchenacht sal man ienen vorladen vor zu stende sin gut, ab her wil. En tut herz nicht, man geweldiget ez ieneme, der dar uf klaget. Den tag sal abir kundigen, der daz gut undir im hat, ieme, der ez im tete mit orkunde zu hove unde zu huse, ab herz ane schaden bliben wil.
Paragraph: 2.     Lenunge muz her ouch zu dem ersten wol wider brengen, deme herz abe gelegen hat, ab her sin huz weiz, da der kleger zu kegenwertig si.
Paragraph: 3.     Welch man deme anderen sin gut zu behaldene tut, wirt ez im verstolen adir abe geroubit, adir verbrant adir stirbit ez, ab ez vie iz, her en darf dar keine not umme liden, tar her dar sin recht zu tun, daz ez ane sine schult geschen si.
Paragraph: 4.     Waz man abir deme manne liet adir setzt, daz sal her unverterbit weder brengen adir gelden nach sime werde.
Paragraph: 5.     Stirbit abir ein phert adir ein vie binnen satzunge, ane ienes schult, der ez undir im hat, bewiset her daz unde tar her dar sin recht zu ton, her en gilt ez im nicht. Her hat abir sin gelt verloren dar ez im vor stunt, ir gelubde en stunde den anders.



Next part


This text is part of the TITUS edition of Sachsenspiegel.

Copyright TITUS Project, Frankfurt a/M, 7.5.2019. No parts of this document may be republished in any form without prior permission by the copyright holder.