TITUS
Sachsenspiegel
Part No. 284
Previous part

Chapter: XXV 
XXV. Wie unde wenne der man sime gute volgen sal an den oberen herren. Waz unde wievil iarzal si. Weme der obirste herre daz gut lien sal. Wenne der manne iarzale beginne. Wenne ein herre lien muge. Wie sich der man veriaren mag, al habe sin herre sin gut nicht entphangen.


Paragraph: 1.     Alse hir vor gesaget iz, also sal der man sime gute volgen an den obirsten herren, manschaft zu bettene, ab sin herre stirbit; ader ab her sin gut uf lezit ader ez im verteilet wirt, so sal her beten den obirsten herren, daz her im daz gut lie ader inwise, daz herz mit also grozen eren haben muge, alse her ez hatte von sime ersten herren. Wenne daz en iz nicht recht, daz man imande nidere mit sime gute.
Paragraph: 2.     Wene der herre binnen iar unde thage nirgen en wiset mit sines selbes munde, sint her der wisunge an im hat gegeret, den en muz her nirgen wisen unde sal im daz gut selbir lien.
Paragraph: 3.     Wenne der herre gestirbit unde lesit her einen son, der man en sal nicht sines gutes sinnen an den obirsten herren binnen sines iuncherren iarzale. Ab daz kint sine iarzale versumet, der man hat doch sine iarzale dar nach zu volgene sime gute. Also manich schilt, alse von deme koninge iz niderwert, also manich iarzale iz zu volgene itlichem sime gute binnen sechz wochen unde eime iare.
Paragraph: 4.     Itliches mannes iarzale beginnet in der zit, alse sin herre belent wirt mit deme gute, daz her von im haben sal, wen ez en mag kein herre gut lien, er ez im selber gelegen werde, ez en habe im der herre mit unrechte geweigeret zu liene. Iz ouch sin herre buzen landes ader gevangen, daz her sines gutes nicht sinnen en mag, her thu da lenrecht mite unde underwinde sichz zu sime nutze, alse ab ez im gelegen sie, biz daz her zu sinen iaren kome. Liet her ez abir, er her ez entphet, her sal ez in stete halden.
Paragraph: 5.     Welch herre ein gut eines entphet, ab sin herre stirbit ader ab her uf lezit also getan gut, alse her von im hat, itlich man, der von deme nideren herren gut haben sal, mag sich kegen im veriaren, alleine en habe ez der herre nicht entphangen anderweide, dewile her sich nicht veriaret hat; wenne so en mag her dewile sime herren an sime gute nicht entphernen mit der lenunge, de her thut, ane da her mit rechte zu getwungen wirt.



Next part


This text is part of the TITUS edition of Sachsenspiegel.

Copyright TITUS Project, Frankfurt a/M, 7.5.2019. No parts of this document may be republished in any form without prior permission by the copyright holder.