TITUS
Gottfried von Strassburg, Tristan
Part No. 22
Previous part

Chapter: 22 
22: Melot


Verse: 14235    Nu daz der truhsaeze ersach,
Verse: 14236    daz sînes willen niht geschach,

Verse: 14237    er versuohte ez aber anderswâ.
Verse: 14238    ein getwerc was in dem hove dâ,

Verse: 14239    daz selbe solte namen hân
Verse: 14240    Melôt petit von Aquitân

Verse: 14241    und kunde ein teil, alsô man giht,
Verse: 14242    umbe verholne geschiht

Verse: 14243    an dem gestirne nahtes sehen.
Verse: 14244    ine wil aber nihtes von im jehen,

Verse: 14245    wan alse ich 'z von dem buoche nim.
Verse: 14246    nune vinde ich aber niht von im

Verse: 14247    an dem wâren maere,
Verse: 14248    wan daz ez kündic waere,

Verse: 14249    listic unde rederîch.
Verse: 14250    daz was dem künege heinlîch

Verse: 14251    und ouch der kemenâten.
Verse: 14252    mit dem begunde er râten,

Verse: 14253    swenne ez zen vrouwen kaeme,
Verse: 14254    daz ez dâ war naeme

Verse: 14255    Tristandes unde der künigîn.
Verse: 14256    möhte ez im dâ zuo guot gesîn,

Verse: 14257    daz man die wâren künde
Verse: 14258    der minne an in bevünde,

Verse: 14259    ez haete es iemer mêre
Verse: 14260    wider Marken lôn und êre.

Verse: 14261    Dâ kêrte ouch ez spâte unde vruo
Verse: 14262    sîne lüge und sîne lâge zuo.

Verse: 14263    ez leite sîne vâre
Verse: 14264    an rede und an gebâre

Verse: 14265    ze iegelîchen stunden
Verse: 14266    und haete ouch schiere ervunden

Verse: 14267    die liebe an den gelieben zwein.
Verse: 14268    wan si haeten under ein

Verse: 14269    sô süeze gebaerde,
Verse: 14270    daz Melôt die bewaerde

Verse: 14271    der minnen al zehant dâ vant,
Verse: 14272    und seite ouch Marken al zehant,

Verse: 14273    daz binamen dâ minne waere.
Verse: 14274    sus triben si drî diz maere,

Verse: 14275    Melôt und Marke und Marjodô,
Verse: 14276    biz si under in gevielen dô

Verse: 14277    mit gemeinem râte dar an:
Verse: 14278    würde mîn hêr Tristan

Verse: 14279    von dem hove gescheiden,
Verse: 14280    man möhte an in beiden

Verse: 14281    die wârheit offenbaere sehen.
Verse: 14282    nu diz was al zehant geschehen

Verse: 14283    reht alse ez wart gerâten dâ.
Verse: 14284    der künec bat sînen neven iesâ

Verse: 14285    durch sîn selbes êre,
Verse: 14286    daz er dekeine kêre

Verse: 14287    zer kemenâten naeme
Verse: 14288    noch niemer dâ hin kaeme,

Verse: 14289    da der vrouwen keiniu waere.
Verse: 14290    der hof der tribe ein maere,

Verse: 14291    man wolte es hüetende sîn,
Verse: 14292    dâ von ime unde der künigîn

Verse: 14293    leit unde laster möhte enstân.
Verse: 14294    nu diz was al zehant getân,

Verse: 14295    daz er gebôt und des er bat.
Verse: 14296    Tristan meit iegelîche stat,

Verse: 14297    dâ der vrouwen heinlîche was.
Verse: 14298    kemenâten unde palas

Verse: 14299    dâ enkam er niemer în.
Verse: 14300    daz ingesinde daz nam sîn

Verse: 14301    und sîner vremede grôze war.
Verse: 14302    si redeten ime ze leide dar

Verse: 14303    vil übele und anders danne wol.
Verse: 14304    sîn ôren wurden dicke vol

Verse: 14305    mit iteniuwem leide.
Verse: 14306    Er unde Îsôt, si beide

Verse: 14307    si triben die zît mit sorgen hin.
Verse: 14308    triure unde clage was under in

Verse: 14309    in micheler unmüezekeit.
Verse: 14310    si haeten leit unde leit.

Verse: 14311    leit umbe Markes arcwân,
Verse: 14312    leit, daz sî niht mohten hân

Verse: 14313    keine state under in zwein,
Verse: 14314    daz sî geredeten in ein.

Verse: 14315    ietwederem begunde
Verse: 14316    von stunde ze stunde

Verse: 14317    herze unde craft geswîchen.
Verse: 14318    bleichen unde blîchen

Verse: 14319    begunde ir varwe unde ir lîp.
Verse: 14320    der man bleichete durch daz wîp,

Verse: 14321    daz wîp bleichete durch den man;
Verse: 14322    durch Îsôte Tristan,

Verse: 14323    durch Tristanden Îsôt.
Verse: 14324    daz tete in beiden michel nôt.

Verse: 14325    es wundert mich cleine,
Verse: 14326    was ir nôt gemeine

Verse: 14327    und ir leit ungescheiden.
Verse: 14328    ez enwas ouch an in beiden

Verse: 14329    niemê wan ein herze unde ein muot.
Verse: 14330    ir beider übel, ir beider guot,

Verse: 14331    ir beider tôt, ir beider leben
Verse: 14332    diu wâren alse in ein geweben.

Verse: 14333    swaz ir dewederem gewar,
Verse: 14334    des wart daz andere gewar.

Verse: 14335    swaz sô dem einem sanfte tete,
Verse: 14336    des enpfant daz ander an der stete.

Verse: 14337    si wâren beide under in zwein
Verse: 14338    mit übele und mit guote al ein.

Verse: 14339    ir gemeiniu herzeswaere
Verse: 14340    diu wart sô schînbaere

Verse: 14341    under ir beider ougen,
Verse: 14342    daz man vil cleine lougen

Verse: 14343    der minnen an ir varwe vant.
Verse: 14344    Und Marke enstuont sich al zehant

Verse: 14345    und kôs wol an in beiden,
Verse: 14346    ir vremeden unde ir scheiden

Verse: 14347    daz in daz an ir herze gie.
Verse: 14348    westen sî wâ oder wie,

Verse: 14349    si saehen gerne ein ander.
Verse: 14350    ein ursuoche vander

Verse: 14351    und hiez an den stunden
Verse: 14352    die jegere mit den hunden

Verse: 14353    ze walde sich bereiten.
Verse: 14354    er enbôt in unde seiten

Verse: 14355    und hiez ouch in den hof sagen,
Verse: 14356    er wolte zweinzic tage jagen.

Verse: 14357    swer mit gejegede kunde
Verse: 14358    oder swer sô sîne stunde

Verse: 14359    dâ mite vertrîben wolte,
Verse: 14360    daz sich der reiten solte.

Verse: 14361    urloup nam er zer künigîn
Verse: 14362    und hiez si nâch ir willen sîn

Verse: 14363    dâ heime vrôlîch unde vrô.
Verse: 14364    verholne bevalh er dô

Verse: 14365    dem getwerge Melôte,
Verse: 14366    daz ez Tristande unde Îsôte

Verse: 14367    zuo z' ir tougenheite
Verse: 14368    lüge unde lâge leite.

Verse: 14369    ez genüzze es iemer wider in.
Verse: 14370    er selbe vuor ze walde hin

Verse: 14371    mit michelem geschelle.
Verse: 14372    sîn weidegeselle

Verse: 14373    Tristan beleip dâ heime
Verse: 14374    und enbôt dem oeheime,

Verse: 14375    daz er siech waere.
Verse: 14376    der sieche weidenaere

Verse: 14377    wolt ouch an sîne weide.
Verse: 14378    er unde Îsôt, si beide

Verse: 14379    beliben an ir triure
Verse: 14380    und suohten âventiure

Verse: 14381    in anclîcher trahte,
Verse: 14382    mit wie getâner ahte

Verse: 14383    daz iemer kunde geschehen,
Verse: 14384    daz sî sich möhten gesehen.

Verse: 14385    Nune kunden sî 'z ertrahten nie.
Verse: 14386    under disen dingen gie

Verse: 14387    Brangaene zuo Tristande,
Verse: 14388    wan sî vil wol erkande,

Verse: 14389    daz sîn herzeswaere
Verse: 14390    vil nâhe gênde waere.

Verse: 14391    si clagete ime und er clagt ir.
Verse: 14392    'â reine' sprach er 'saget mir,

Verse: 14393    welch rât gewirdet dirre nôt?
Verse: 14394    wie gewirbe ich und diu arme Îsôt,

Verse: 14395    daz wir sus niht verderben?
Verse: 14396    ine weiz, wie wir gewerben,

Verse: 14397    daz wir behalten unser leben.'
Verse: 14398    'Waz râtes mac ich iu gegeben?'

Verse: 14399    sprach aber diu getriuwe
Verse: 14400    'daz ez got iemer riuwe,

Verse: 14401    daz wir ie wurden geborn!
Verse: 14402    wir haben elliu driu verlorn

Verse: 14403    unser vröude und unser êre.
Verse: 14404    wir enkomen niemer mêre

Verse: 14405    an unser vrîheit als ê.
Verse: 14406    Îsôt ôwê! Tristan ôwê!

Verse: 14407    daz ich iuch mit ougen ie gesach
Verse: 14408    und allez iuwer ungemach

Verse: 14409    von mir ûf erstanden ist!
Verse: 14410    und enweiz nu weder rât noch list,

Verse: 14411    dâ mite ich iu gehelfen müge.
Verse: 14412    ine kan niht vinden, daz iu tüge.

Verse: 14413    ich weiz ez alse mînen tôt,
Verse: 14414    ir komet es in grôze nôt,

Verse: 14415    belîbet ir iht lange
Verse: 14416    in huote und in getwange.

Verse: 14417    Sit ez niht bezzer mag gesîn,
Verse: 14418    sô volget doch dem râte mîn,

Verse: 14419    nu meine ich und ze dirre zît,
Verse: 14420    die wîle ir uns sus vremede sît.

Verse: 14421    als ir des werdet gewar,
Verse: 14422    daz iu diu state widervar,

Verse: 14423    sô nemet ein öleboumes rîs
Verse: 14424    und snîdet spaene in lange wîs

Verse: 14425    und zeichent die mit nihte mê,
Verse: 14426    wan machet einhalp ein T

Verse: 14427    und machet anderhalp ein Î,
Verse: 14428    daz niwan der êrste buochstap sî

Verse: 14429    von iuwer beider namen dar an,
Verse: 14430    und leget dâ weder zuo noch van

Verse: 14431    und gât zem boumgarten în.
Verse: 14432    ir wizzet wol daz bechelîn,

Verse: 14433    daz von dem brunnen dâ gât,
Verse: 14434    hin dâ diu kemenâte stât.

Verse: 14435    dar în sô werfet einen spân
Verse: 14436    und lât in vliezen unde gân

Verse: 14437    hin vür der kemenâten tür.
Verse: 14438    dâ gân wir z' allen ziten vür

Verse: 14439    ich und diu vröudelôse Îsôt
Verse: 14440    und weinen unser herzenôt.

Verse: 14441    als wir in danne ersehen dâ,
Verse: 14442    dâ bî bekennen wir iesâ,

Verse: 14443    daz ir dâ bî dem brunnen sît.
Verse: 14444    dâ der öleboum schate gît,

Verse: 14445    dâ wartet unde nemet war.
Verse: 14446    diu senede gât ie zuo z' iu dar,

Verse: 14447    mîn vrouwe und iuwer vriundîn,
Verse: 14448    und ich ouch, alse ez mac gesîn

Verse: 14449    und ez an iuwerm willen ist.
Verse: 14450    hêrre, diu selbe kurze vrist,

Verse: 14451    die ich noch ze lebene hân,
Verse: 14452    diu sol mit iu zwein hine gân,

Verse: 14453    daz ich iu beiden gelebe
Verse: 14454    und iu ze lebene rât gegebe.

Verse: 14455    solte ich umbe eine stunde,
Verse: 14456    in der ich iu zwein kunde

Verse: 14457    ze iuwern vröuden geleben,
Verse: 14458    mîner stunde tûsent geben:

Verse: 14459    ich verkoufte alle mîne tage,
Verse: 14460    ine gesenftet iuwer clage.'

Verse: 14461    'Genâde schoene!' sprach Tristan
Verse: 14462    'ine hân dâ keinen zwîvel an,

Verse: 14463    an iu sî triuwe und êre.
Verse: 14464    der zweier wart nie mêre

Verse: 14465    in einem herzen begraben.
Verse: 14466    solte ich dekeine saelde haben,

Verse: 14467    die solte ich iu wol kêren
Verse: 14468    ze vröuden unde z' êren.

Verse: 14469    swie kumberlîche ez aber nu stê,
Verse: 14470    swie kûme sô mîn schîbe gê,

Verse: 14471    wiste ich, wie ich nu kunde
Verse: 14472    mîne tage und mîne stunde

Verse: 14473    ze iuwern vröuden hin gegeben,
Verse: 14474    ich wolte ouch deste kurzer leben.

Verse: 14475    des getrûwet unde geloubet mir!'
Verse: 14476    weinende sprach er aber z' ir:

Verse: 14477    'getriuwe, saeligez wîp!'
Verse: 14478    hie mite twanc er si an sînen lîp

Verse: 14479    mit armen nâhe und ange.
Verse: 14480    ir ougen unde ir wange

Verse: 14481    kuste er mit maneger quâle
Verse: 14482    dicke und ze manegem mâle.

Verse: 14483    'schoene' sprach er 'nû tuot wol
Verse: 14484    und alse der getriuwe sol,

Verse: 14485    und lâzet iu bevolhen sîn
Verse: 14486    mich und die seneden sorgaerîn,

Verse: 14487    die saeligen Îsôte.
Verse: 14488    bedenket ie genôte

Verse: 14489    uns beidiu samet, si unde mich.'
Verse: 14490    'gerne hêrre, daz tuon ich.

Verse: 14491    gebietet mir, nu wil ich gân.
Verse: 14492    tuot, alse ich iu gerâten hân,

Verse: 14493    und sorget niht ze sêre.'
Verse: 14494    'got sî, der iuwer êre

Verse: 14495    und iuwern schoenen lîp bewar!'
Verse: 14496    Brangaene neic weinende dar

Verse: 14497    und gienc trûrende dan.
Verse: 14498    der trûraere Tristan

Verse: 14499    der sneit und warf die spaene,
Verse: 14500    als ime sîn rât Brangaene

Verse: 14501    ze sînen dingen lêre bôt.
Verse: 14502    sus kam er und sîn vrouwe Îsôt

Verse: 14503    zem brunnen an des boumes schate
Verse: 14504    vil heinlîch und ze guoter state

Verse: 14505    in ahte tagen wol ahte stunt,
Verse: 14506    daz ez nie nieman wart kunt,

Verse: 14507    noch ez kein ouge nie gesach.
Verse: 14508    wan eines nahtes ez geschach,

Verse: 14509    dô Tristan aber des endes gie,
Verse: 14510    dô wart sîn Melôt, ine weiz wie,

Verse: 14511    daz vertâne getwerc,
Verse: 14512    des vâlandes antwerc,

Verse: 14513    von ungelücke gewar
Verse: 14514    und sleich allez nâch im dar

Verse: 14515    und sach in zuo dem boume gân
Verse: 14516    und niht vil lange dâ bî stân,

Verse: 14517    unz daz ein vrouwe zuo z' im gie
Verse: 14518    und er die nâhe zuo z' im vie.

Verse: 14519    wer aber diu vrouwe waere,
Verse: 14520    des was ez ungewaere.

Verse: 14521    Des anderen tages wart,
Verse: 14522    Melôt sleich aber ûf sîne vart

Verse: 14523    ein lützel vor dem mitten tage
Verse: 14524    und haete mit velschlîcher clage

Verse: 14525    und mit vil arger âkust
Verse: 14526    wol understôzen sîne brust

Verse: 14527    und kam ze Tristande hin.
Verse: 14528    'entriuwen' sprach er 'hêrre, ich bin

Verse: 14529    mit sorgen her gegangen.
Verse: 14530    wan ir sît sô bevangen

Verse: 14531    mit merke und mit vâre,
Verse: 14532    daz ich mich her zewâre

Verse: 14533    verstolen hân mit maneger nôt
Verse: 14534    und daz mich diu getriuwe Îsôt,

Verse: 14535    diu tugenthafte künigîn,
Verse: 14536    erbarmet in dem herzen mîn,

Verse: 14537    diu leider nû ze dirre vrist
Verse: 14538    durch iuch in grôzen sorgen ist.

Verse: 14539    diu bat mich dâ her zuo z' iu gân,
Verse: 14540    wan s' anders nieman mohte hân,

Verse: 14541    der ir ze disem maere
Verse: 14542    alse gevellic waere.

Verse: 14543    si bat mich unde gebôt mir,
Verse: 14544    daz ich iuch gruozte von ir

Verse: 14545    und daz von herzen taete
Verse: 14546    und iuch vil verre baete,

Verse: 14547    daz ir si noch gespraechet dâ,
Verse: 14548    ine weiz, ir wizzet wol wâ,

Verse: 14549    da ir nâhest bî ir wâret,
Verse: 14550    und ouch vil rehte vâret

Verse: 14551    der selben stunde unde der zît,
Verse: 14552    als ir gewon ze komene sît.

Verse: 14553    ine weiz, wes s' iuch dâ warnen sol.
Verse: 14554    und sult ir mir gelouben wol,

Verse: 14555    ir leit und iuwer ungemach,
Verse: 14556    daz mir nie leider geschach,

Verse: 14557    dan mir geschehen ist dar an.
Verse: 14558    nu hêrre, mîn hêr Tristan,

Verse: 14559    ich wil varn, gebietet mir.
Verse: 14560    swaz ir welt, daz sage ich ir.

Verse: 14561    in getar hie langer niht gesîn.
Verse: 14562    daz hovegesinde, würde ez mîn

Verse: 14563    an dirre verte innen,
Verse: 14564    ich möhte es schaden gewinnen.

Verse: 14565    si jehent doch alle und ist ir wân,
Verse: 14566    swaz under iu zwein ist getân,

Verse: 14567    daz allez sî mit mir geschehen.
Verse: 14568    des wil ich hin ze gote jehen

Verse: 14569    und hin z' iu beiden, daz ez nie
Verse: 14570    mit keinem mînem râte ergie.'

Verse: 14571    'Vriunt, troumet iu?' sprach Tristan
Verse: 14572    'waz maere trîbet ir mich an?

Verse: 14573    waz ist der hoveliute wân?
Verse: 14574    waz hât mîn vrouwe und ich getân?

Verse: 14575    ûz! strîchet balde in gotes haz!
Verse: 14576    und wizzet waerlîche daz:

Verse: 14577    swes ieman waenet oder giht,
Verse: 14578    liez ich ez allermeiste niht

Verse: 14579    durch mîn selbes êre,
Verse: 14580    irn geseitet niemer mêre

Verse: 14581    hin wider ze hove maere,
Verse: 14582    waz iu hie getroumet waere.'




Next part


This text is part of the TITUS edition of Gottfried von Strassburg, Tristan.

Copyright TITUS Project, Frankfurt a/M, 6.5.2019. No parts of this document may be republished in any form without prior permission by the copyright holder.