TITUS
Gottfried von Strassburg, Tristan
Part No. 23
Previous part

Chapter: 23 
23: Baumgartenszene


Verse: 14583    Melôt gie dan und reit zehant
Verse: 14584    ze walde, dâ er Marken vant.

Verse: 14585    vür wâr er ime dô seite,
Verse: 14586    daz er der wârheite

Verse: 14587    ze ende waere komen dâ.
Verse: 14588    und seite im wie unde wâ,

Verse: 14589    als ez zem brunnen was geschehen.
Verse: 14590    'ir muget die wârheit selbe sehen '

Verse: 14591    sprach Melôt 'hêrre, wellet ir,
Verse: 14592    ze naht sô rîtet dar mit mir.

Verse: 14593    ine versihe mich keines dinges baz,
Verse: 14594    swie sô sî gevüegen daz,

Verse: 14595    sine komen noch hînaht beide dar.
Verse: 14596    sô muget ir selbe nemen war,

Verse: 14597    wie sî gewerben under in.'
Verse: 14598    der künec reit mit Melôte hin

Verse: 14599    sînes herzeleides warten.
Verse: 14600    nu si in den boumgarten

Verse: 14601    bî nahtzîte kâmen,
Verse: 14602    ir gewerbes war genâmen,

Verse: 14603    done vant der künec noch daz getwerc
Verse: 14604    dekeine stat noch kein geberc,

Verse: 14605    daz in reht unde gebaere
Verse: 14606    zuo ir lâge waere.

Verse: 14607    nu stuont dâ, dâ der brunne vlôz,
Verse: 14608    ein öleboum, der was mâze grôz,

Verse: 14609    nider unde doch billîche breit.
Verse: 14610    dâ zuo tâten s' ir arbeit,

Verse: 14611    daz si ûf den beide gestigen.
Verse: 14612    ûf dem sâzen s' unde swigen.

Verse: 14613    Tristan, dô ez nahtende wart,
Verse: 14614    er sleich aber ûf sîne vart.

Verse: 14615    nu er in den boumgarten kam,
Verse: 14616    sîne boten er ze handen nam

Verse: 14617    und leite s' in die giezen
Verse: 14618    und lie si hine vliezen.

Verse: 14619    die seiten ie genôte
Verse: 14620    der seneden Îsôte,

Verse: 14621    daz ir geselle waere dâ.
Verse: 14622    Tristan gienc über den brunnen sâ,

Verse: 14623    dâ beidiu schate unde gras
Verse: 14624    von dem öleboume was.

Verse: 14625    aldâ gestuond er trahtende,
Verse: 14626    in sînem herzen ahtende

Verse: 14627    sîn tougenlîchez ungemach.
Verse: 14628    sus kam, daz er den schate gesach

Verse: 14629    von Marke und von Melôte,
Verse: 14630    wan der mâne ie genôte

Verse: 14631    durch den boum hin nider schein.
Verse: 14632    nu er des schates von in zwein

Verse: 14633    bescheidenlîche wart gewar,
Verse: 14634    nu haete er michel angest dar,

Verse: 14635    wan er erkande sich iesâ
Verse: 14636    der vâre unde der lâge dâ.

Verse: 14637    'got hêrre' dâhte er wider sich
Verse: 14638    'beschirme Îsôte unde mich!

Verse: 14639    ist daz si dise lâge niht
Verse: 14640    bî disem schate inzît ersîht,

Verse: 14641    sô gât si vür sich her ze mir.
Verse: 14642    geschiht ouch daz, sô werden wir

Verse: 14643    ze jâmer und ze leide.
Verse: 14644    got hêrre, habe uns beide

Verse: 14645    durch dîne güete in dîner pflege!
Verse: 14646    bewar Îsôte an disem wege.

Verse: 14647    beleite sunder alle ir trite.
Verse: 14648    warne die reinen eteswâ mite

Verse: 14649    dirre lâge und dirre archeit,
Verse: 14650    die man ûf uns zwei hât geleit,

Verse: 14651    ê s' iht gespreche oder getuo,
Verse: 14652    dâ man iht arges denke zuo!

Verse: 14653    jâ hêrre got, erbarme dich
Verse: 14654    über sî und über mich!

Verse: 14655    unser êre und unser leben
Verse: 14656    daz sî dir hînaht ergeben!'

Verse: 14657    Sîn vrouwe diu künigîn
Verse: 14658    unde ir beider vriundîn,

Verse: 14659    Brangaene diu reine,
Verse: 14660    si zwô si giengen eine

Verse: 14661    Tristandes boten warten
Verse: 14662    in ir jâmergarten,

Verse: 14663    in dem si z' allen stunden,
Verse: 14664    sô sî vor vâre kunden,

Verse: 14665    ir jâmer clageten under in.
Verse: 14666    dâ giengen sî her unde hin

Verse: 14667    trûrende unde clagende,
Verse: 14668    ir senemaere sagende.

Verse: 14669    viel schiere wart Brangaene
Verse: 14670    der boten unde der spaene

Verse: 14671    in der vlieze gewar.
Verse: 14672    ir vrouwen wincte si dar.

Verse: 14673    Îsôt diu vienc si und sach s' an,
Verse: 14674    si las Îsôt, si las Tristan.

Verse: 14675    si nam ir mantel al zehant,
Verse: 14676    umbe ir houbet sî den want

Verse: 14677    und sleich durch bluomen und durch gras,
Verse: 14678    hin dâ boum und brunne was.

Verse: 14679    nu daz si kam sô nâhen,
Verse: 14680    daz si beide ein ander sâhen,

Verse: 14681    Tristan stuont allez ze stete,
Verse: 14682    daz er doch nie dâ vor getete.

Verse: 14683    sine kam ê mâles zuo z' im nie,
Verse: 14684    ern gienge verre gegen ir ie.

Verse: 14685    nu wunderte Îsôte
Verse: 14686    sêre unde genôte,

Verse: 14687    waz dirre maere waere.
Verse: 14688    ir herze daz wart swaere.

Verse: 14689    si begunde ir houbet nider lân
Verse: 14690    und vorhtlîche gegen im gân.

Verse: 14691    der verte sî grôz angest nam.
Verse: 14692    nu s' alsô lîse gênde kam

Verse: 14693    dem boume ein lützel nâher bî,
Verse: 14694    nu gesach si mannes schate drî

Verse: 14695    und wiste niuwan einen dâ.
Verse: 14696    hie bî verstuont si sich iesâ

Verse: 14697    der lâge unde der vâre
Verse: 14698    und ouch an dem gebâre,

Verse: 14699    den Tristan hin z' ir haete.
Verse: 14700    'â dirre mortraete '

Verse: 14701    gedâhte sî 'waz wirdet der?
Verse: 14702    waz brâhte dise lâge her?

Verse: 14703    binamen mîn hêrre der ist hie bî,
Verse: 14704    swâ er hie bî verborgen sî.

Verse: 14705    ich waene ouch, wir verrâten sîn.
Verse: 14706    beschirme uns, hêrre trehtîn!

Verse: 14707    hilf uns, daz wir mit êren
Verse: 14708    von hinnen müezen kêren.

Verse: 14709    hêrre, bewar in unde mich!'
Verse: 14710    nu gedâhte s' aber wider sich:

Verse: 14711    'weiz Tristan nû dise ungeschiht
Verse: 14712    oder enweiz er ir niht?'

Verse: 14713    nû bedûhte sî zehant,
Verse: 14714    daz er die lâge haete erkant,

Verse: 14715    wan sî 'n in den gebaerden sach.
Verse: 14716    Si gestuont von verre unde sprach:

Verse: 14717    'hêr Tristan, mir ist harte leit,
Verse: 14718    daz ir mîner tumpheit

Verse: 14719    so gewis und alsô sicher sît,
Verse: 14720    daz ir mir ze dirre zît

Verse: 14721    dekeiner sprâche muotet.
Verse: 14722    daz ir iuwer êren huotet

Verse: 14723    wider iuwern oeheim unde mich,
Verse: 14724    diu rede vüegete sich

Verse: 14725    und stüende iuwern triuwen baz
Verse: 14726    und mînen êren danne daz,

Verse: 14727    daz ir sô spaetiu teidinc
Verse: 14728    und sus getânen haelinc

Verse: 14729    ûf leget und ahtet her ze mir.
Verse: 14730    nu sprechet an, waz wellet ir?

Verse: 14731    ich stân mit angesten hie,
Verse: 14732    wan daz mich 's Brangaene niht erlie,

Verse: 14733    diu mich es bat und mir ez riet,
Verse: 14734    als si hiute von iu schiet,

Verse: 14735    daz ich her zuo z' iu kaeme
Verse: 14736    und iuwer clage vernaeme.

Verse: 14737    daz aber ich ir 's gevolget hân,
Verse: 14738    daz ist vil sêre missetân.

Verse: 14739    si sitzet aber hie nâhe bî.
Verse: 14740    und ouch swie sicher ich hie sî,

Verse: 14741    ich gaebe ê doch zewâre
Verse: 14742    durch boeser liute vâre

Verse: 14743    ein mîn lit von mîner hant,
Verse: 14744    ê ieman waere bekant,

Verse: 14745    daz ich hie bî iu waere.
Verse: 14746    man hât sô michel maere

Verse: 14747    von iu gemachet und von mir.
Verse: 14748    si geswüeren alle wol, daz wir

Verse: 14749    vil harte waeren kumberhaft
Verse: 14750    mit valschlîcher vriuntschaft.

Verse: 14751    des wânes ist der hof vol.
Verse: 14752    nu weiz ez aber got selbe wol,

Verse: 14753    wie mîn herze hin ziu stê.
Verse: 14754    und wil ein lützel sprechen mê:

Verse: 14755    des sî got mîn urkünde
Verse: 14756    und enmüeze ouch mîner sünde

Verse: 14757    niemer anders komen abe,
Verse: 14758    wan alse ich iuch gemeinet habe,

Verse: 14759    mit welhem herzen unde wie.
Verse: 14760    und gihe 's ze gote, daz ich nie

Verse: 14761    ze keinem manne muot gewan
Verse: 14762    und hiute und iemer alle man

Verse: 14763    vor mînem herzen sint verspart
Verse: 14764    niwan der eine, dem dâ wart

Verse: 14765    der êrste rôsebluome
Verse: 14766    von mînem magetuome.

Verse: 14767    daz mich mîn hêrre Marke
Verse: 14768    bewaenet alsô starke

Verse: 14769    durch iuwern willen, hêr Tristan,
Verse: 14770    weiz got dâ missetuot er an,

Verse: 14771    sô gâr als er erkunnet hât,
Verse: 14772    wie mîn herze hin z' iu stât.

Verse: 14773    die mich ze maere habent brâht,
Verse: 14774    weiz got, die sint vil unbedâht.

Verse: 14775    in ist mîn herze vil unkunt.
Verse: 14776    ich hân iu hundert tûsent stunt

Verse: 14777    vriundes gebaerde vor getân
Verse: 14778    durch die liebe, die ich hân

Verse: 14779    ze dem, den ich dâ lieben sol,
Verse: 14780    dan durch valsch, daz weiz got wol.

Verse: 14781    ez waere ritter oder kneht,
Verse: 14782    sô diuhte mich und waere ouch reht

Verse: 14783    und êret ouch mich starke,
Verse: 14784    swer mînem hêrren Marke

Verse: 14785    liep oder sippe waere,
Verse: 14786    daz ich dem êre baere.

Verse: 14787    nû verkêret man mir daz.
Verse: 14788    und enwil ich iu doch niemer haz

Verse: 14789    durch ir aller lüge getragen.
Verse: 14790    hêrre, swaz ir mir wellet sagen,

Verse: 14791    daz saget mir, wan ich wil gân.
Verse: 14792    ine mag niht langer hie bestân.'

Verse: 14793    'Saeligiu vrouwe' sprach Tristan
Verse: 14794    'ine hân dâ keinen zwîvel an,

Verse: 14795    dâ ir 's die volge haetet,
Verse: 14796    irn spraechet unde taetet,

Verse: 14797    swaz tugend und êre waere.
Verse: 14798    nune lânt iuch lügenaere,

Verse: 14799    die iuch mit mir sus hânt bedâht
Verse: 14800    und uns undurften habent brâht

Verse: 14801    ûz mînes hêrren hulden
Verse: 14802    mit michelen unschulden,

Verse: 14803    daz got vil wol erkennen sol.
Verse: 14804    saeligiu, nû bedenket wol,

Verse: 14805    tugenthaftiu küniginne,
Verse: 14806    und nemet in iuwer sinne,

Verse: 14807    daz ich sô rehte unschuldic bin
Verse: 14808    wider iuch und wider in,

Verse: 14809    und râtet mînem hêrren daz,
Verse: 14810    sînen zorn und sînen haz,

Verse: 14811    den er mir âne schulde treit,
Verse: 14812    daz er den durch sîne höfscheit

Verse: 14813    hele unde höfschlîche trage
Verse: 14814    niht langer wan dise ahte tage.

Verse: 14815    biz daz hab er und habet ouch ir
Verse: 14816    die gebaerde her ze mir,

Verse: 14817    als ob ir mir genaedic sît.
Verse: 14818    so bereite ouch ich mich in der zît,

Verse: 14819    daz ich von hinnen kêre.
Verse: 14820    wir verliesen unser êre,

Verse: 14821    der künec mîn hêrre und ir und ich.
Verse: 14822    ist daz ir alsus wider mich

Verse: 14823    gebâret, alse ich hinnen var,
Verse: 14824    sô sprechent unser vînde dar:

Verse: 14825    'entriuwen hie was eteswaz an.
Verse: 14826    nemt war, wie mîn hêr Tristan

Verse: 14827    gescheiden ist von hinnen
Verse: 14828    mit des küniges unminnen.''

Verse: 14829    'Mîn hêr Tristan' sprach Îsôt
Verse: 14830    'ich lite sanfter den tôt,

Verse: 14831    dan ich mînen hêrren baete,
Verse: 14832    daz er iht des durch mich taete,

Verse: 14833    daz hin ze iu waere gewant.
Verse: 14834    nu ist iu doch daz wol erkant,

Verse: 14835    daz er mir iezuo lange vrist
Verse: 14836    durch iuch vil ungenaedic ist,

Verse: 14837    und wiste er und waere im kunt,
Verse: 14838    daz ich bî iu ze dirre stunt

Verse: 14839    eine unde nahtes waere,
Verse: 14840    ich kaeme es in daz maere,

Verse: 14841    daz er mir niemer mêre
Verse: 14842    erbüte liep noch êre.

Verse: 14843    ob ouch daz iemer sus geschiht,
Verse: 14844    entriuwen des enweiz ich niht

Verse: 14845    und wundert mich des starke,
Verse: 14846    wâ von mîn hêrre Marke

Verse: 14847    an disen arcwân kaeme,
Verse: 14848    von wem er den rât naeme,

Verse: 14849    und ich mich doch noch nie enstuont,
Verse: 14850    als doch diu wîp vil schiere tuont,

Verse: 14851    daz ir mir keine valscheit
Verse: 14852    mit gebaerden haetet vür geleit,

Verse: 14853    noch ich selbe hin z' iu nie
Verse: 14854    valsch noch üppekeit begie.

Verse: 14855    ine weiz, waz uns verrâten hât,
Verse: 14856    wan unser beider dinc daz stât

Verse: 14857    übel unde erbermeclîche,
Verse: 14858    alse ez got der rîche

Verse: 14859    enzît bedenken müeze
Verse: 14860    und ez bezzere unde büeze.

Verse: 14861    Nu hêrre, nû gebietet mir.
Verse: 14862    ich wil gân, sô gât ouch ir!

Verse: 14863    iuwer swaere und iuwer arbeit,
Verse: 14864    daz wizze got, die sint mir leit.

Verse: 14865    ich haete schulde hin z' iu vil,
Verse: 14866    der ich doch nû niht haben wil,

Verse: 14867    daz ich iu solte sîn gehaz.
Verse: 14868    mich erbarmet aber daz,

Verse: 14869    daz ir durch mich ze dirre zît
Verse: 14870    âne schulde sus beswaeret sît.

Verse: 14871    durch daz wil ich ez übersehen,
Verse: 14872    und swenne der tac sol geschehen,

Verse: 14873    daz ir von hinnen müezet varn,
Verse: 14874    hêrre, sô müeze iuch got bewarn.

Verse: 14875    der himelischen künigîn
Verse: 14876    der müezet ir bevolhen sîn!

Verse: 14877    iuwer bete und iuwer boteschaft
Verse: 14878    und wiste ich, ob diu keine craft

Verse: 14879    von mîme râte haete,
Verse: 14880    ich riete unde taete,

Verse: 14881    swes sô ich mich versaehe,
Verse: 14882    dar an iu wol geschaehe.

Verse: 14883    nu vürhte ich aber sêre,
Verse: 14884    daz er mir 'z verkêre.

Verse: 14885    swie sô ez aber dar umbe ergê,
Verse: 14886    swie harte ez mir ze vâre stê,

Verse: 14887    ich wil iuch doch geniezen lân,
Verse: 14888    daz ir niht valsches habet getân

Verse: 14889    wider mînen hêrren unde mich.
Verse: 14890    swie mir gelinge, sô wirb ich

Verse: 14891    iuwer bete, sô ich beste kan.'
Verse: 14892    'genâde vrouwe' sprach Tristan

Verse: 14893    'und swaz rede ir vindet dâ,
Verse: 14894    daz enbietet mir iesâ.

Verse: 14895    wirde aber ich ihtes gewar
Verse: 14896    und lîhte alsô von hinnen var,

Verse: 14897    daz ich iuch nie mêre sehe,
Verse: 14898    swaz sô mir danne geschehe,

Verse: 14899    vil tugenthaftiu künigîn,
Verse: 14900    sô müezet ir gesegenet sîn

Verse: 14901    von allem himelischem her!
Verse: 14902    wan got weiz wol, erde unde mer

Verse: 14903    diun getruogen nie sô reine wîp.
Verse: 14904    vrouwe, iuwer sêle und iuwer lîp,

Verse: 14905    iuwer êre und iuwer leben
Verse: 14906    diu sîn iemer gote ergeben!'

Verse: 14907    Sus schieden sî sich under in.
Verse: 14908    diu küniginne diu gie hin

Verse: 14909    siuftende unde trûrende,
Verse: 14910    ameirend unde amûrende,

Verse: 14911    mit tougenlîchem smerzen
Verse: 14912    ir lîbes unde ir herzen.

Verse: 14913    der trûraere Tristan
Verse: 14914    der gienc ouch trûrende dan

Verse: 14915    und weinende starke.
Verse: 14916    der trûrige Marke,

Verse: 14917    der ûf dem boume dâ saz,
Verse: 14918    der betrûret aber daz

Verse: 14919    und gieng im rehte an sînen lîp,
Verse: 14920    daz er den neven und daz wîp

Verse: 14921    ze arge haete bedâht.
Verse: 14922    und die in dar an haeten brâht,

Verse: 14923    die vervluochte er tûsent stunde
Verse: 14924    mit herzen und mit munde.

Verse: 14925    er verweiz ie genôte
Verse: 14926    dem getwerge Melôte,

Verse: 14927    daz ez in haete betrogen
Verse: 14928    und ime sîn reine wîp belogen.

Verse: 14929    si stigen von dem boume nider
Verse: 14930    und riten an daz gejegede wider

Verse: 14931    mit jâmer und mit leide.
Verse: 14932    Marke und Melôt beide

Verse: 14933    si haeten zweier hande leit.
Verse: 14934    Melôt durch die trügeheit,

Verse: 14935    die er begangen solte hân.
Verse: 14936    Marke durch den arcwân,

Verse: 14937    daz er den neven und daz wîp
Verse: 14938    und allermeist sîn selbes lîp

Verse: 14939    sô haete beswaeret
Verse: 14940    und z' übele vermaeret

Verse: 14941    über hof und über lant.
Verse: 14942    Des morgenes al zehant

Verse: 14943    hiez er den jegeren allen sagen,
Verse: 14944    daz sî beliben und vüeren jagen.

Verse: 14945    er selbe kêrte wider în.
Verse: 14946    'saget an' sprach er 'vrou künigîn,

Verse: 14947    wie habet ir vertriben sît
Verse: 14948    iuwer stunde und iuwer zît?'

Verse: 14949    'hêrre, mîn unmüezekeit
Verse: 14950    daz was undurftenez leit.

Verse: 14951    sô was aber mîn vîre
Verse: 14952    diu harphe und diu lîre.'

Verse: 14953    'undurften leit?' sprach Marke dô
Verse: 14954    'waz was daz und wie was dem sô?'

Verse: 14955    Îsôt ersmierete unde sprach:
Verse: 14956    'swie ez geschaehe, ez geschach

Verse: 14957    und geschiht ouch hiute und alle tage.
Verse: 14958    triure und üppeclîchiu clage

Verse: 14959    deist mîn und aller vrouwen site.
Verse: 14960    hie reine wir diu herze mite

Verse: 14961    und liutern diu ougen.
Verse: 14962    wir nemen uns dicke tougen

Verse: 14963    ein michel leit von nihte
Verse: 14964    und lâzen 'z ouch inrihte.'

Verse: 14965    alsus treip sî 'z mit schimpfe hin.
Verse: 14966    doch nam ez Marke in sînen sin

Verse: 14967    und marcte ez al gemeine,
Verse: 14968    ir wort und ouch ir meine.

Verse: 14969    'Nu vrouwe' sprach er 'saget mir:
Verse: 14970    weiz ieman hinne oder wizzet ir,

Verse: 14971    wie Tristandes dinc stê?
Verse: 14972    man seite mir, im waere wê,

Verse: 14973    do ich aller nâhest hinnen reit.'
Verse: 14974    'hêrre, iu wart ouch wâr geseit '

Verse: 14975    sprach aber diu küniginne.
Verse: 14976    daz meinde sî zer minne.

Verse: 14977    si wiste wol sîn swaere,
Verse: 14978    daz diu von minnen waere.

Verse: 14979    der künec sprach aber dô vürbaz:
Verse: 14980    'waz wizzet ir, wer seite iu daz?'

Verse: 14981    'ine weiz, wan alse ich waene
Verse: 14982    unde als mir Brangaene

Verse: 14983    von sîner siecheite
Verse: 14984    in kurzen zîten seite.

Verse: 14985    diu sach in gester an dem tage
Verse: 14986    und enbôt mir, daz ich sîne clage

Verse: 14987    und sîn wort hin z' iu taete
Verse: 14988    und iuch durch got baete,

Verse: 14989    daz ir im niht sô sêre
Verse: 14990    gedaehtet an sîn êre

Verse: 14991    und haetet iuwer mâze
Verse: 14992    an übelem gelâze

Verse: 14993    dise ahte tage doch wider in,
Verse: 14994    biz daz verrihtet er sich hin,

Verse: 14995    und lâzet in mit êren
Verse: 14996    von iuwerm hove kêren

Verse: 14997    und von dem lande scheiden.
Verse: 14998    des gert er her z' uns beiden.'

Verse: 14999    und seite im alle sîne bete,
Verse: 15000    als er si bî dem brunnen tete

Verse: 15001    und alse er selbe wol vernam,
Verse: 15002    wie ez umbe ir beider rede kam.

Verse: 15003    Der künec sprach aber: 'vrou künigîn,
Verse: 15004    unsaelic müeze er iemer sîn,

Verse: 15005    der mich dar an ie brâhte!
Verse: 15006    daz ich in ie verdâhte,

Verse: 15007    daz ist mir inneclîche leit.
Verse: 15008    wan ich hân sîne unschuldekeit

Verse: 15009    in kurzen zîten wol vernomen.
Verse: 15010    ich bin es alles z' ende komen.

Verse: 15011    und saeligiu künigîn,
Verse: 15012    als liep als ich iu süle sîn,

Verse: 15013    so sî der zorn an iuch verlân.
Verse: 15014    swaz ir getuot, daz sî getân.

Verse: 15015    nemet uns beide mich und in
Verse: 15016    und leget ez under uns beiden hin.'

Verse: 15017    'hêrre, ine wil' sprach diu künigîn
Verse: 15018    'hie mite niht harte unmüezec sîn,

Verse: 15019    wan leite ich ez hiute nider,
Verse: 15020    ir griffet aber morgen wider

Verse: 15021    an iuwern arcwân als ê.'
Verse: 15022    'nein zwâre vrouwe, niemermê.

Verse: 15023    ine wil im niemer mêre
Verse: 15024    gedenken an sîn êre

Verse: 15025    und iuch, vrou küniginne,
Verse: 15026    umb ûzerlîche minne

Verse: 15027    iemer lâzen âne wân.'
Verse: 15028    diz gelübede wart dâ getân.

Verse: 15029    hie mite wart Tristan besant
Verse: 15030    unde der arcwân zehant

Verse: 15031    gâr hin geleit ze guote
Verse: 15032    mit lûterlîchem muote.

Verse: 15033    Îsôt wart aber Tristande
Verse: 15034    von hande ze hande

Verse: 15035    bevolhen wider in sîne pflege.
Verse: 15036    der pflag ir aber alle wege

Verse: 15037    mit huote und mit râte.
Verse: 15038    si und diu kemenâte

Verse: 15039    dien wâren niwan als er gebôt.
Verse: 15040    Tristan und sîn vrouwe Îsôt

Verse: 15041    diu lebeten aber liebe unde wol.
Verse: 15042    ir beider wunne diu was vol.

Verse: 15043    sus was in aber ein wunschleben
Verse: 15044    nâch ir ungemüete geben,

Verse: 15045    swie kurz ez wernde waere,
Verse: 15046    âne iteniuwe swaere.




Next part


This text is part of the TITUS edition of Gottfried von Strassburg, Tristan.

Copyright TITUS Project, Frankfurt a/M, 6.5.2019. No parts of this document may be republished in any form without prior permission by the copyright holder.