TITUS
Homer, Odyssee
Part No. 7
Previous part

Chapter: 7    
ΟΔΥΣΣΕΙΑΣ Η


Verse: 1       ῝Ως ὁ μὲν ἔνθ' ἠρᾶτο πολύτλας δῖος ᾽Οδυσσεύς,
Verse: 2    κούρην δὲ προτὶ ἄστυ ϕέρεν μένος ἡμιόνοιιν.
Verse: 3    ἡ δ' ὅτε δὴ οὗ πατρὸς ἀγακλυτὰ δώμαθ' ἵκανε,
Verse: 4    στῆσεν ἄρ' ἐν προθύροισι· κασίγνητοι δέ μιν ἀμϕὶς
Verse: 5    ἵσταντ' ἀθανάτοις ἐναλίγκιοι, οἵ ῥ' ὑπ' ἀπήνης
Verse: 6    ἡμιόνους ἔλυον ἐσθῆτά τε ἔσϕερον εἴσω.
Verse: 7    αὐτὴ δ' ἐς θάλαμον ἑὸν ἤιε· δαῖε δέ οἱ πῦρ
Verse: 8    γρηὺ:ς ᾽Απειραίη, θαλαμηπόλος Εὐρυμέδουσα,
Verse: 9    τήν ποτ' ᾽Απείρηθεν νέες ἤγαγον ἀμϕιέλισσαι·
Verse: 10    ᾽Αλκινόῳ δ' αὐτὴν γέρας ἔξελον, οὕνεκα πᾶσι
Verse: 11    Φαιήκεσσιν ἄνασσε, θεοῦ δ' ὣς δῆμος ἄκουεν·
Verse: 12    ἣ τρέϕε Ναυσικάαν λευκώλενον ἐν μεγάροισιν.
Verse: 13    ἥ οἱ πῦρ ἀνέκαιε καὶ εἴσω δόρπον ἐκόσμει.

Verse: 14       καὶ τότ' ᾽Οδυσσεὺς ὦρτο πόλιν δ' ἴμεν· ἀμϕὶ δ' ᾽Αθήνη
Verse: 15    πολλὴν ἠέρα χεῦε ϕίλα ϕρονέουσ' ᾽Οδυσῆι,
Verse: 16    μή τις Φαιήκων μεγαθύμων ἀντιβολήσας
Verse: 17    κερτομέοι τ' ἐπέεσσι καὶ ἐξερέοιθ' ὅτις εἴη.
Verse: 18    ἀλλ' ὅτε δὴ ἄρ' ἔμελλε πόλιν δύσεσθαι ἐραννήν,
Verse: 19    ἔνθά οἱ ἀντεβόλησε θεὰ γλαυκῶπις ᾽Αθήνη
Verse: 20    παρθενικῇ εἰκυῖα νεήνιδι, κάλπιν ἐχούσῃ.
Verse: 21    στῆ δὲ πρόσθ' αὐτοῦ· ὁ δ' ἀνείρετο δῖος ᾽Οδυσσεύς:

Verse: 22       "ὦ τέκος, οὐκ ἄν μοι δόμον ἀνέρος ἡγήσαιο
Verse: 23    ᾽Αλκινόου, ὃς τοῖσδε μετ' ἀνθρώποισιν ἀνάσσει;
Verse: 24    καὶ γὰρ ἐγὼ ξεῖνος ταλαπείριος ἐνθάδ' ἱκάνω
Verse: 25    τηλόθεν ἐξ ἀπίης γαίης: τῶ οὔ τινα οἶδα
Verse: 26    ἀνθρώπων, οἳ τῆνδε πόλιν καὶ γαῖαν ἔχουσι."

Verse: 27       τὸν δ' αὖτε προσέειπε θεὰ γλαυκῶπις ᾽Αθήνη·

Verse: 28       "τοὶ γὰρ ἐγώ τοι, ξεῖνε πάτερ, δόμον ὅν με κελεύεις
Verse: 29    δείξω, ἐπεί μοι πατρὸς ἀμύμονος ἐγγύθι ναίει.
Verse: 30    ἀλλ' ἴθι σιγῇ τοῖον - ἐγὼ δ' ὁδὸν ἡγεμονεύσω -
Verse: 31    μηδέ τιν' ἀνθρώπων προτιόσσεο μηδ' ἐρέεινε.
Verse: 32    οὐ γὰρ ξείνους οἵ γε μάλ' ἀνθρώπους ἀνέχονται,
Verse: 33    οὐδ' ἀγαπαζόμενοι ϕιλέουσ' ὅς κ' ἄλλοθεν ἔλθῃ.
Verse: 34    νηυσὶ θοῇσιν τοί γε πεποιθότες ὠκείῃσι
Verse: 35    λαῖτμα μέγ' ἐκπερόωσιν, ἐπεί σϕισι δῶκ' ἐνοσίχθων·
Verse: 36    τῶν νέες ὠκεῖαι ὡς εἰ πτερὸν ἠὲ νόημα."

Verse: 37       ὣς ἄρα ϕωνήσασ' ἡγήσατο Παλλὰς ᾽Αθήνη
Verse: 38    καρπαλίμως: ὁ δ' ἔπειτα μετ' ἴχνια βαῖνε θεοῖο.
Verse: 39    τὸν δ' ἄρα Φαίηκες ναυσικλυτοὶ οὐκ ἐνόησαν
Verse: 40    ἐρχόμενον κατὰ ἄστυ διὰ σϕέας: οὐ γὰρ ᾽Αθήνη
Verse: 41    εἴα ἐυπλόκαμος, δεινὴ θεός, ἥ ῥά οἱ ἀχλὺν
Verse: 42    θεσπεσίην κατέχευε ϕίλα ϕρονέουσ' ἐνὶ θυμῷ.
Verse: 43    θαύμαζεν δ' ᾽Οδυσεὺς λιμένας καὶ νῆας ἐίσας
Verse: 44    αὐτῶν θ' ἡρώων ἀγορὰς καὶ τείχεα μακρά
Verse: 45    ὑψηλά, σκολόπεσσιν ἀρηρότα, θαῦμα ἰδέσθαι.
Verse: 46    ἀλλ' ὅτε δὴ βασιλῆος ἀγακλυτὰ δώμαθ' ἵκοντο,
Verse: 47    τοῖσι δὲ μύθων ἦρχε θεὰ γλαυκῶπις ᾽Αθήνη·

Verse: 48       "οὗτος δή τοι, ξεῖνε πάτερ, δόμος, ὅν με κελεύεις
Verse: 49    πεϕραδέμεν· δήεις δὲ Διοτρεϕέας βασιλῆας
Verse: 50    δαίτην δαινυμένους: σὺ δ' ἔσω κίε μηδέ τι θυμῷ
Verse: 51    τάρβει· θαρσαλέος γὰρ ἀνὴρ ἐν πᾶσιν ἀμείνων
Verse: 52    ἔργοισιν τελέθει, εἰ καί ποθεν ἄλλοθεν ἔλθοι.
Verse: 53    δέσποιναν μὲν πρῶτα κιχήσεαι ἐν μεγάροισιν·
Verse: 54    ᾽Αρήτη δ' ὄνομ' ἐστὶν ἐπώνυμον, ἐκ δὲ τοκήων
Verse: 55    τῶν αὐτῶν οἵ περ τέκον ᾽Αλκίνοον βασιλῆα.
Verse: 56    Ναυσίθοον μὲν πρῶτα Ποσειδάων ἐνοσίχθων
Verse: 57    γείνατο καὶ Περίβοια, γυναικῶν εἶδος ἀρίστη,
Verse: 58    ὁπλοτάτη θυγάτηρ μεγαλήτορος Εὐρυμέδοντος,
Verse: 59    ὅς ποθ' ὑπερθύμοισι Γιγάντεσσιν βασίλευεν.
Verse: 60    ἀλλ' ὁ μὲν ὤλεσε λαὸν ἀτάσθαλον, ὤλετο δ' αὐτός,
Verse: 61    τῇ δὲ Ποσειδάων ἐμίγη, καὶ ἐγείνατο παῖδα
Verse: 62    Ναυσίθοον μεγάθυμον, ὃς ἐν Φαίηξιν ἄνασσε·
Verse: 63    Ναυσίθοος δ' ἔτεκεν ῾Ρηξήνορά τ' ᾽Αλκίνοόν τε.
Verse: 64    τὸν μὲν ἄκουρον ἐόντα βάλ' ἀργυρότοξος ᾽Απόλλων
Verse: 65    νυμϕίον, ἐν μεγάρῳ μίαν οἴην παῖδα λιπόντα
Verse: 66    ᾽Αρήτην· τὴν δ' ᾽Αλκίνοος ποιήσατ' ἄκοιτιν,
Verse: 67    καί μιν ἔτισ' ὡς οὔ τις ἐπὶ χθονὶ τίεται ἄλλη,
Verse: 68    ὅσσαι νῦν γε γυναῖκες ὑπ' ἀνδράσιν οἶκον ἔχουσιν.
Verse: 69    ὣς κείνη περὶ κῆρι τετίμηταί τε καὶ ἔστιν
Verse: 70    ἔκ τε ϕίλων παίδων ἔκ τ' αὐτοῦ ᾽Αλκινόοιο
Verse: 71    καὶ λαῶν, οἵ μίν ῥα θεὸν ὣς εἰσορόωντες
Verse: 72    δειδέχαται μύθοισιν, ὅτε στείχῃσ' ἀνὰ ἄστυ.
Verse: 73    οὐ μὲν γάρ τι νόου γε καὶ αὐτὴ δεύεται ἐσθλοῦ·
Verse: 74    οἷσί τ' ἔυ ϕρονέῃσι, καὶ ἀνδράσι νείκεα λύει.
Verse: 75    εἴ κέν τοι κείνη γε ϕίλα ϕρονέῃσ' ἐνὶ θυμῷ,
Verse: 76    ἐλπωρή τοι ἔπειτα ϕίλους τ' ἰδέειν καὶ ἱκέσθαι
Verse: 77    οἶκον ἐς ὑψόροϕον καὶ σὴν ἐς πατρίδα γαῖαν."

Verse: 78       ὣς ἄρα ϕωνήσασ' ἀπέβη γλαυκῶπις ᾽Αθήνη
Verse: 79    πόντον ἐπ' ἀτρύγετον, λίπε δὲ Σχερίην ἐρατεινήν,
Verse: 80    ἵκετο δ' ἐς Μαραθῶνα καὶ εὐρυάγυιαν ᾽Αθήνην,
Verse: 81    δῦνε δ' ᾽Ερεχθῆος πυκινὸν δόμον. αὐτὰρ ᾽Οδυσσεὺς
Verse: 82    ᾽Αλκινόου πρὸς δώματ' ἴε κλυτά· πολλὰ δέ οἱ κῆρ
Verse: 83    ὥρμαιν' ἱσταμένῳ πρὶν χάλκεον οὐδὸν ἱκέσθαι.
Verse: 84    ὥς τε γὰρ ἠελίου αἴγλη πέλεν ἠὲ σελήνης
Verse: 85    δῶμα καθ' ὑψερεϕὲς μεγαλήτορος ᾽Αλκινόοιο.
Verse: 86    χάλκεοι μὲν γὰρ τοῖχοι ἐληλέδατ' ἔνθα καὶ ἔνθα,
Verse: 87    ἐς μυχὸν ἐξ οὐδοῦ, περὶ δὲ θριγκὸς κυάνοιο·
Verse: 88    χρύσειαι δὲ θύραι πυκινὸν δόμον ἐντὸς ἔεργον·
Verse: 89    ἀργύρεοι δὲ σταθμοὶ ἐν οὐδῷ χαλκέῳ ἔσταν,
Verse: 90    ἀργύρεον δ' ἐϕ' ὑπερθύριον, χρυσέη δὲ κορώνη.
Verse: 91    χρύσειοι δ' ἑκάτερθε καὶ ἀργύρεοι κύνες ἦσαν,
Verse: 92    ουἠς ῞Ηϕαιστος ἔτευξεν ἰδυίῃσι πραπίδεσσι
Verse: 93    δῶμα ϕυλασσέμεναι μεγαλήτορος ᾽Αλκινόοιο,
Verse: 94    ἀθανάτους ὄντας καὶ ἀγήρως ἤματα πάντα.
Verse: 95    ἐν δὲ θρόνοι περὶ τοῖχον ἐρηρέδατ' ἔνθα καὶ ἔνθα,
Verse: 96    ἐς μυχὸν ἐξ οὐδοῖο διαμπερές, ἔνθ' ἐνὶ πέπλοι
Verse: 97    λεπτοὶ ἐύννητοι βεβλήατο, ἔργα γυναικῶν.
Verse: 98    ἔνθα δὲ Φαιήκων ἡγήτορες ἑδριόωντο
Verse: 99    πίνοντες καὶ ἔδοντες: ἐπηετανὸν γὰρ ἔχεσκον.
Verse: 100    χρύσειοι δ' ἄρα κοῦροι ἐυδμήτων ἐπὶ βωμῶν
Verse: 101    ἕστασαν αἰθομένας δαί:δας μετὰ χερσὶν ἔχοντες,
Verse: 102    ϕαίνοντες νύκτας κατὰ δώματα δαιτυμόνεσσι.
Verse: 103    πεντήκοντα δέ οἱ δμῳαὶ κατὰ δῶμα γυναῖκες
Verse: 104    αἱ μὲν ἀλετρεύουσι μύλῃς ἔπι μήλοπα καρπόν,
Verse: 105    αἱ δ' ἱστοὺς ὑϕόωσι καὶ ἠλάκατα στρωϕῶσιν
Verse: 106    ἥμεναι, οἷά τε ϕύλλα μακεδνῆς αἰγείροιο·
Verse: 107    καιροσέων δ' ὀθονέων ἀπολείβεται ὑγρὸν ἔλαιον.
Verse: 108    ὅσσον Φαίηκες περὶ πάντων ἴδριες ἀνδρῶν
Verse: 109    νῆα θοὴν ἐνὶ πόντῳ ἐλαυνέμεν, ὣς δὲ γυναῖκες
Verse: 110    ἱστὸν τεχνῆσσαι· περὶ γάρ σϕισι δῶκεν ᾽Αθήνη
Verse: 111    ἔργά τ' ἐπίστασθαι περικαλλέα καὶ ϕρένας ἐσθλάς.
Verse: 112    ἔκτοσθεν δ' αὐλῆς μέγας ὄρχατος ἄγχι θυράων
Verse: 113    τετράγυος: περὶ δ' ἕρκος ἐλήλαται ἀμϕοτέρωθεν.
Verse: 114    ἔνθα δὲ δένδρεα μακρὰ πεϕύκασι τηλεθόωντα,
Verse: 115    ὄγχναι καὶ ῥοιαὶ καὶ μηλέαι ἀγλαόκαρποι
Verse: 116    συκέαι τε γλυκεραὶ καὶ ἐλαῖαι τηλεθόωσαι.
Verse: 117    τάων οὔ ποτε καρπὸς ἀπόλλυται οὐδ' ἀπολείπει
Verse: 118    χείματος οὐδὲ θέρευς, ἐπετήσιος: ἀλλὰ μάλ' αἰεὶ
Verse: 119    ζεϕυρίη πνείουσα τὰ μὲν ϕύει, ἄλλα δὲ πέσσει.
Verse: 120    ὄγχνη ἐπ' ὄγχνῃ γηράσκει, μῆλον δ' ἐπὶ μήλῳ,
Verse: 121    αὐτὰρ ἐπὶ σταϕυλῇ σταϕυλή, σῦκον δ' ἐπὶ σύκῳ.
Verse: 122    ἔνθα δέ οἱ πολύκαρπος ἀλωὴ ἐρρίζωται,
Verse: 123    τῆς ἕτερον μέν θειλόπεδον λευρῷ ἐνὶ χώρῳ
Verse: 124    τέρσεται ἠελίῳ, ἑτέρας δ' ἄρα τε τρυγόωσιν,
Verse: 125    ἄλλας δὲ τραπέουσι· πάροιθε δέ τ' ὄμϕακές εἰσιν
Verse: 126    ἄνθος ἀϕιεῖσαι, ἕτεραι δ' ὑποπερκάζουσιν.
Verse: 127    ἔνθα δὲ κοσμηταὶ πρασιαὶ παρὰ νείατον ὄρχον
Verse: 128    παντοῖαι πεϕύασιν, ἐπηετανὸν γανόωσαι.
Verse: 129    ἐν δὲ δύω κρῆναι, ἡ μέν τ' ἀνὰ κῆπον ἅπαντα
Verse: 130    σκίδναται, ἡ δ' ἑτέρωθεν ὑπ' αὐλῆς οὐδὸν ἵησι
Verse: 131    πρὸς δόμον ὑψηλόν, ὅθεν ὑδρεύοντο πολῖται.
Verse: 132    τοῖ' ἄρ' ἐν ᾽Αλκινόοιο θεῶν ἔσαν ἀγλαὰ δῶρα.

Verse: 133       ἔνθα στὰς θηεῖτο πολύτλας δῖος ᾽Οδυσσεύς.
Verse: 134    αὐτὰρ ἐπεὶ δὴ πάντα ἑῷ θηήσατο θυμῷ,
Verse: 135    καρπαλίμως ὑπὲρ οὐδὸν ἐβήσετο δώματος εἴσω.
Verse: 136    εὗρε δὲ Φαιήκων ἡγήτορας ἠδὲ μέδοντας
Verse: 137    σπένδοντας δεπάεσσιν ἐυσκόπῳ ᾽Αργειϕόντῃ,
Verse: 138    ᾧ πυμάτῳ σπένδεσκον, ὅτε μνησαίατο κοίτου.
Verse: 139    αὐτὰρ ὁ βῆ διὰ δῶμα πολύτλας δῖος ᾽Οδυσσεὺς,
Verse: 140    πολλὴν ἠέρ' ἔχων, ἥν οἱ περίχευεν ᾽Αθήνη,
Verse: 141    ὄϕρ' ἵκετ' ᾽Αρήτην τε καὶ ᾽Αλκίνοον βασιλῆα.
Verse: 142    ἀμϕὶ δ' ἄρ' ᾽Αρήτης βάλε γούνασι χεῖρας ᾽Οδυσσεύς,
Verse: 143    καὶ τότε δή ῥ' αὐτοῖο πάλιν χύτο θέσϕατος ἀήρ.
Verse: 144    οἱ δ' ἄνεῳ ἐγένοντο δόμον κάτα ϕῶτα ἰδόντες,
Verse: 145    θαύμαζον δ' ὁρόωντες: ὁ δὲ λιτάνευεν ᾽Οδυσσεύς:

Verse: 146       "᾽Αρήτη, θύγατερ ῾Ρηξήνορος ἀντιθέοιο,
Verse: 147    σόν τε πόσιν σά τε γούναθ' ἱκάνω πολλὰ μογήσας,
Verse: 148    τοῦσδέ τε δαιτυμόνας, τοῖσιν θεοὶ ὄλβια δοῖεν,
Verse: 149    ζωέμεναι, καὶ παισὶν ἐπιτρέψειεν ἕκαστος
Verse: 150    κτήματ' ἐνὶ μεγάροισι γέρας θ' ὅ τι δῆμος ἔδωκεν.
Verse: 151    αὐτὰρ ἐμοὶ πομπὴν ὀτρύνετε πατρίδ' ἱκέσθαι
Verse: 152    θᾶσσον, ἐπεὶ δὴ δηθὰ ϕίλων ἄπο πήματα πάσχω."

Verse: 153       ὣς εἰπὼν κατ' ἄρ' ἕζετ' ἐπ' ἐσχάρῃ ἐν κονίῃσι
Verse: 154    πὰρ πυρί· οἱ δ' ἄρα πάντες ἀκὴν ἐγένοντο σιωπῇ.
Verse: 155    ὀψὲ δὲ δὴ μετέειπε γέρων ἥρως ᾽Εχένηος,
Verse: 156    ὃς δὴ Φαιήκων ἀνδρῶν προγενέστερος ἦεν
Verse: 157    καὶ μύθοισι κέκαστο, παλαιά τε πολλά τε εἰδώς:
Verse: 158    ὅ σϕιν ἐυϕρονέων ἀγορήσατο καὶ μετέειπεν·

Verse: 159       "᾽Αλκίνο', οὐ μέν τοι τόδε κάλλιον οὐδὲ ἔοικε,
Verse: 160    ξεῖνον μὲν χαμαὶ ἧσθαι ἐπ' ἐσχάρῃ ἐν κονίῃσιν·
Verse: 161    οἷδε δὲ σὸν μῦθον ποτιδέγμενοι ἰσχανόωνται.
Verse: 162    ἀλλ' ἄγε δὴ ξεῖνον μὲν ἐπὶ θρόνου ἀργυροήλου
Verse: 163    εἷσον ἀναστήσας, σὺ δὲ κηρύκεσσι κέλευσον
Verse: 164    οἶνον ἐπικρῆσαι, ἵνα καὶ Διὶ τερπικεραύνῳ
Verse: 165    σπείσομεν, ὅς θ' ἱκέτῃσιν ἅμ' αἰδοίοισιν ὀπηδεῖ·
Verse: 166    δόρπον δὲ ξείνῳ ταμίη δότω ἔνδον ἐόντων."

Verse: 167       αὐτὰρ ἐπεὶ τό γ' ἄκουσ' ἱερὸν μένος ᾽Αλκινόοιο,
Verse: 168    χειρὸς ἑλὼν ᾽Οδυσῆα δαί:ϕρονα ποικιλομήτην
Verse: 169    ὦρσεν ἀπ' ἐσχαρόϕιν καὶ ἐπὶ θρόνου εἷσε ϕαεινοῦ,
Verse: 170    υἱὸν ἀναστήσας ἀγαπήνορα Λαοδάμαντα,
Verse: 171    ὅς οἱ πλησίον ἷζε, μάλιστα δέ μιν ϕιλέεσκε.
Verse: 172    χέρνιβα δ' ἀμϕίπολος προχόῳ ἐπέχευε ϕέρουσα
Verse: 173    καλῇ χρυσείῃ, ὑπὲρ ἀργυρέοιο λέβητος,
Verse: 174    νίψασθαι· παρὰ δὲ ξεστὴν ἐτάνυσσε τράπεζαν.
Verse: 175    σῖτον δ' αἰδοίη ταμίη παρέθηκε ϕέρουσα,
Verse: 176    εἴδατα πόλλ' ἐπιθεῖσα, χαριζομένη παρεόντων.
Verse: 177    αὐτὰρ ὁ πῖνε καὶ ἦσθε πολύτλας δῖος ᾽Οδυσσεύς:
Verse: 178    καὶ τότε κήρυκα προσέϕη μένος ᾽Αλκινόοιο·

Verse: 179       "Ποντόνοε, κρητῆρα κερασσάμενος μέθυ νεῖμον
Verse: 180    πᾶσιν ἀνὰ μέγαρον, ἵνα καὶ Διὶ τερπικεραύνῳ
Verse: 181    σπείσομεν, ὅς θ' ἱκέτῃσιν ἅμ' αἰδοίοισιν ὀπηδεῖ."

Verse: 182       ὣς ϕάτο, Ποντόνοος δὲ μελίϕρονα οἶνον ἐκίρνα,
Verse: 183    νώμησεν δ' ἄρα πᾶσιν ἐπαρξάμενος δεπάεσσιν.
Verse: 184    αὐτὰρ ἐπεὶ σπεῖσάν τε πίον θ' ὅσον ἤθελε θυμός,
Verse: 185    τοῖσιν δ' ᾽Αλκίνοος ἀγορήσατο καὶ μετέειπε·

Verse: 186       "κέκλυτε, Φαιήκων ἡγήτορες ἠδὲ μέδοντες,
Verse: 187    ὄϕρ' εἴπω τά με θυμὸς ἐνὶ στήθεσσι κελεύει.
Verse: 188    νῦν μὲν δαισάμενοι κατακείετε οἴκαδ' ἰόντες:
Verse: 189    ἠῶθεν δὲ γέροντας ἐπὶ πλέονας καλέσαντες
Verse: 190    ξεῖνον ἐνὶ μεγάροις ξεινίσσομεν ἠδὲ θεοῖσι
Verse: 191    ῥέξομεν ἱερὰ καλά, ἔπειτα δὲ καὶ περὶ πομπῆς
Verse: 192    μνησόμεθ', ὥς χ' ὁ ξεῖνος ἄνευθε πόνου καὶ ἀνίης
Verse: 193    πομπῇ ὑϕ' ἡμετέρῃ ἣν πατρίδα γαῖαν ἵκηται
Verse: 194    χαίρων καρπαλίμως, εἰ καὶ μάλα τηλόθεν ἐστί,
Verse: 195    μηδέ τι μεσσηγύς γε κακὸν καὶ πῆμα πάθῃσι
Verse: 196    πρίν γε τὸν ἧς γαίης ἐπιβήμεναι· ἔνθα δ' ἔπειτα
Verse: 197    πείσεται ἅσσά οἱ Αἶσα κατὰ Κλῶθές τε βαρεῖαι
Verse: 198    γεινομένῳ νήσαντο λίνῳ, ὅτε μιν τέκε μήτηρ.
Verse: 199    εἰ δέ τις ἀθανάτων γε κατ' οὐρανοῦ εἰλήλουθεν,
Verse: 200    ἄλλό τι δὴ τόδ' ἔπειτα θεοὶ περιμηχανόωνται.
Verse: 201    αἰεὶ γὰρ τὸ πάρος γε θεοὶ ϕαίνονται ἐναργεῖς
Verse: 202    ἡμῖν, εὖθ' ἕρδωμεν ἀγακλειτὰς ἑκατόμβας,
Verse: 203    δαίνυνταί τε παρ' ἄμμι καθήμενοι ἔνθά περ ἡμεῖς.
Verse: 204    εἰ δ' ἄρα τις καὶ μοῦνος ἰὼν ξύμβληται ὁδίτης,
Verse: 205    οὔ τι κατακρύπτουσιν, ἐπεί σϕισιν ἐγγύθεν εἰμὲν
Verse: 206    ὥς περ Κύκλωπές τε καὶ ἄγρια ϕῦλα Γιγάντων."

Verse: 207       τὸν δ' ἀπαμειβόμενος προσέϕη πολύμητις ᾽Οδυσσεύς:

Verse: 208       "᾽Αλκίνο', ἄλλό τί τοι μελέτω ϕρεσίν· οὐ γὰρ ἔγωγε
Verse: 209    ἀθανάτοισιν ἔοικα, τοὶ οὐρανὸν εὐρὺν ἔχουσιν,
Verse: 210    οὐ δέμας οὐδὲ ϕυήν, ἀλλὰ θνητοῖσι βροτοῖσιν·
Verse: 211    οὕς τινας ὑμεῖς ἴστε μάλιστ' ὀχέοντας ὀιζὺν
Verse: 212    ἀνθρώπων, τοῖσίν κεν ἐν ἄλγεσιν ἰσωσαίμην.
Verse: 213    καὶ δ' ἔτι κεν καὶ πλείον' ἐγὼ κακὰ μυθησαίμην,
Verse: 214    ὅσσά γε δὴ ξύμπαντα θεῶν ἰότητι μόγησα.
Verse: 215    ἀλλ' ἐμὲ μὲν δορπῆσαι ἐάσατε κηδόμενόν περ·
Verse: 216    οὐ γάρ τι στυγερῇ ἐπὶ γαστέρι κύντερον ἄλλο
Verse: 217    ἔπλετο, ἥ τ' ἐκέλευσεν ἕο μνήσασθαι ἀνάγκῃ
Verse: 218    καὶ μάλα τειρόμενον καὶ ἐνὶ ϕρεσὶ πένθος ἔχοντα,
Verse: 219    ὡς καὶ ἐγὼ πένθος μὲν ἔχω ϕρεσίν, ἡ δὲ μάλ' αἰεὶ
Verse: 220    ἐσθέμεναι κέλεται καὶ πινέμεν, ἐκ δέ με πάντων
Verse: 221    ληθάνει ὅσσ' ἔπαθον, καὶ ἐνιπλησθῆναι ἀνώγει.
Verse: 222    ὑμεῖς δ' ὀτρύνεσθαι ἅμ' ἠοῖ ϕαινομένηϕιν,
Verse: 223    ὥς κ' ἐμὲ τὸν δύστηνον ἐμῆς ἐπιβήσετε πάτρης
Verse: 224    καί περ πολλὰ παθόντα· ἰδόντά με καὶ λίποι αἰὼν
Verse: 225    κτῆσιν ἐμήν, δμῶάς τε καὶ ὑψερεϕὲς μέγα δῶμα."

Verse: 226       ὣς ἔϕαθ', οἱ δ' ἄρα πάντες ἐπῄνεον ἠδὲ κέλευον
Verse: 227    πεμπέμεναι τὸν ξεῖνον, ἐπεὶ κατὰ μοῖραν ἔειπεν.
Verse: 228    αὐτὰρ ἐπεὶ σπεῖσάν τε πίον θ' ὅσον ἤθελε θυμός,
Verse: 229    οἱ μὲν κακκείοντες ἔβαν οἶκον δὲ ἕκαστος,
Verse: 230    αὐτὰρ ὁ ἐν μεγάρῳ ὑπελείπετο δῖος ᾽Οδυσσεύς,
Verse: 231    πὰρ δέ οἱ ᾽Αρήτη τε καὶ ᾽Αλκίνοος θεοειδὴς
Verse: 232    ἥσθην· ἀμϕίπολοι δ' ἀπεκόσμεον ἔντεα δαιτός.
Verse: 233    τοῖσιν δ' ᾽Αρήτη λευκώλενος ἤρχετο μύθων·
Verse: 234    ἔγνω γὰρ ϕᾶρός τε χιτῶνά τε εἵματ' ἰδοῦσα
Verse: 235    καλά, τά ῥ' αὐτὴ τεῦξε σὺν ἀμϕιπόλοισι γυναιξί·
Verse: 236    καί μιν ϕωνήσασ' ἔπεα πτερόεντα προσηύδα·

Verse: 237       "ξεῖνε, τὸ μέν σε πρῶτον ἐγὼν εἰρήσομαι αὐτή·
Verse: 238    τίς, πόθεν εἰς ἀνδρῶν; τίς τοι τάδε εἵματ' ἔδωκεν;
Verse: 239    οὐ δὴ ϕῂς ἐπὶ πόντον ἀλώμενος ἐνθάδ' ἱκέσθαι;"

Verse: 240       τὴν δ' ἀπαμειβόμενος προσέϕη πολύμητις ᾽Οδυσσεύς:

Verse: 241       "ἀργαλέον, βασίλεια, διηνεκέως ἀγορεῦσαι
Verse: 242    κήδε', ἐπεί μοι πολλὰ δόσαν θεοὶ Οὐρανίωνες:
Verse: 243    τοῦτο δέ τοι ἐρέω ὅ μ' ἀνείρεαι ἠδὲ μεταλλᾷς.
Verse: 244    ᾽Ωγυγίη τις νῆσος ἀπόπροθεν εἰν ἁλὶ κεῖται,
Verse: 245    ἔνθα μὲν ῎Ατλαντος θυγάτηρ, δολόεσσα Καλυψώ,
Verse: 246    ναίει ἐυπλόκαμος, δεινὴ θεός: οὐδέ τις αὐτῇ
Verse: 247    μίσγεται οὔτε θεῶν οὔτε θνητῶν ἀνθρώπων.
Verse: 248    ἀλλ' ἐμὲ τὸν δύστηνον ἐϕέστιον ἤγαγε δαίμων
Verse: 249    οἶον, ἐπεί μοι νῆα θοὴν ἀργῆτι κεραυνῷ
Verse: 250    Ζεὺς ἔλσας ἐκέασσε μέσῳ ἐνὶ οἴνοπι πόντῳ.
Verse: 251    ἔνθ' ἄλλοι μὲν πάντες ἀπέϕθιθεν ἐσθλοὶ ἑταῖροι,
Verse: 252    αὐτὰρ ἐγὼ τρόπιν ἀγκὰς ἑλὼν νεὸς ἀμϕιελίσσης
Verse: 253    ἐννῆμαρ ϕερόμην· δεκάτῃ δέ με νυκτὶ μελαίνῃ
Verse: 254    νῆσον ἐς ᾽Ωγυγίην πέλασαν θεοί, ἔνθα Καλυψὼ
Verse: 255    ναίει ἐυπλόκαμος, δεινὴ θεός, ἥ με λαβοῦσα
Verse: 256    ἐνδυκέως ἐϕίλει τε καὶ ἔτρεϕεν ἠδὲ ἔϕασκε
Verse: 257    θήσειν ἀθάνατον καὶ ἀγήρων ἤματα πάντα·
Verse: 258    ἀλλ' ἐμὸν οὔ ποτε θυμὸν ἐνὶ στήθεσσιν ἔπειθεν.
Verse: 259    ἔνθα μὲν ἑπτάετες μένον ἔμπεδον, εἵματα δ' αἰεὶ
Verse: 260    δάκρυσι δεύεσκον, τά μοι ἄμβροτα δῶκε Καλυψώ·
Verse: 261    ἀλλ' ὅτε δὴ ὀγδόατόν μοι ἐπιπλόμενον ἔτος ἦλθε,
Verse: 262    καὶ τότε δή μ' ἐκέλευσεν ἐποτρύνουσα νέεσθαι
Verse: 263    Ζηνὸς ὑπ' ἀγγελίης, ἢ καὶ νόος ἐτράπετ' αὐτῆς.
Verse: 264    πέμπε δ' ἐπὶ σχεδίης πολυδέσμου, πολλὰ δ' ἔδωκε,
Verse: 265    σῖτον καὶ μέθυ ἡδύ, καὶ ἄμβροτα εἵματα ἕσσεν,
Verse: 266    οὖρον δὲ προέηκεν ἀπήμονά τε λιαρόν τε.
Verse: 267    ἑπτὰ δὲ καὶ δέκα μὲν πλέον ἤματα ποντοπορεύων,
Verse: 268    ὀκτωκαιδεκάτῃ δὲ ϕάνη ὄρεα σκιόεντα
Verse: 269    γαίης ὑμετέρης, γήθησε δέ μοι ϕίλον ἦτορ
Verse: 270    δυσμόρῳ· ἦ γὰρ μέλλον ἔτι ξυνέσεσθαι ὀιζυῖ
Verse: 271    πολλῇ, τήν μοι ἐπῶρσε Ποσειδάων ἐνοσίχθων,
Verse: 272    ὅς μοι ἐϕορμήσας ἀνέμους κατέδησε κέλευθον,
Verse: 273    ὤρινεν δὲ θάλασσαν ἀθέσϕατον, οὐδέ τι κῦμα
Verse: 274    εἴα ἐπὶ σχεδίης ἁδινὰ στενάχοντα ϕέρεσθαι.
Verse: 275    τὴν μὲν ἔπειτα θύελλα διεσκέδασ'· αὐτὰρ ἔγωγε
Verse: 276    νηχόμενος τόδε λαῖτμα διέτμαγον, ὄϕρά με γαίῃ
Verse: 277    ὑμετέρῃ ἐπέλασσε ϕέρων ἄνεμός τε καὶ ὕδωρ.
Verse: 278    ἔνθά κέ μ' ἐκβαίνοντα βιήσατο κῦμ' ἐπὶ χέρσου,
Verse: 279    πέτρῃς πρὸς μεγάλῃσι βαλὸν καὶ ἀτερπέι χώρῳ·
Verse: 280    ἀλλ' ἀναχασσάμενος νῆχον πάλιν, εἷος ἐπῆλθον
Verse: 281    ἐς ποταμόν, τῇ δή μοι ἐείσατο χῶρος ἄριστος,
Verse: 282    λεῖος πετράων, καὶ ἐπὶ σκέπας ἦν ἀνέμοιο.
Verse: 283    ἐκ δ' ἔπεσον θυμηγερέων, ἐπὶ δ' ἀμβροσίη νὺξ
Verse: 284    ἤλυθ'· ἐγὼ δ' ἀπάνευθε Διιπετέος ποταμοῖο
Verse: 285    ἐκβὰς ἐν θάμνοισι κατέδραθον, ἀμϕὶ δὲ ϕύλλα
Verse: 286    ἠϕυσάμην· ὕπνον δὲ θεὸς κατ' ἀπείρονα χεῦεν.
Verse: 287    ἔνθα μὲν ἐν ϕύλλοισι, ϕίλον τετιημένος ἦτορ,
Verse: 288    εὗδον παννύχιος καὶ ἐπ' ἠῶ καὶ μέσον ἦμαρ·
Verse: 289    δείλετό τ' ἠέλιος, καί με γλυκὺς ὕπνος ἀνῆκεν.
Verse: 290    ἀμϕιπόλους δ' ἐπὶ θινὶ τεῆς ἐνόησα θυγατρὸς
Verse: 291    παιζούσας, ἐν δ' αὐτὴ ἔην εἰκυῖα θεῇσι.
Verse: 292    τὴν ἱκέτευσ'· ἡ δ' οὔ τι νοήματος ἤμβροτεν ἐσθλοῦ,
Verse: 293    ὡς οὐκ ἂν ἔλποιο νεώτερον ἀντιάσαντα
Verse: 294    ἑρξέμεν· αἰεὶ γάρ τε νεώτεροι ἀϕραδέουσιν.
Verse: 295    ἥ μοι σῖτον δῶκεν ἅλις ἠδ' αἴθοπα οἶνον,
Verse: 296    καὶ λοῦσ' ἐν ποταμῷ καί μοι τάδε εἵματ' ἔδωκε.
Verse: 297    ταῦτά τοι ἀχνύμενός περ ἀληθείην κατέλεξα."

Verse: 298       τὸν δ' αὖτ' ᾽Αλκίνοος ἀπαμείβετο ϕώνησέν τε·

Verse: 299       "ξεῖν', ἤτοι μὲν τοῦτό γ' ἐναίσιμον οὐκ ἐνόησε
Verse: 300    παῖς ἐμή, οὕνεκά σ' οὔ τι μετ' ἀμϕιπόλοισι γυναιξὶν
Verse: 301    ἦγεν ἐς ἡμετέρου· σὺ δ' ἄρα πρώτην ἱκέτευσας."

Verse: 302       τὸν δ' ἀπαμειβόμενος προσέϕη πολύμητις ᾽Οδυσσεύς:

Verse: 303       "ἥρως, μή μοι τοὔνεκ' ἀμύμονα νείκεε κούρην·
Verse: 304    ἡ μὲν γάρ μ' ἐκέλευε σὺν ἀμϕιπόλοισιν ἕπεσθαι,
Verse: 305    ἀλλ' ἐγὼ οὐκ ἔθελον δείσας αἰσχυνόμενός τε,
Verse: 306    μή πως καὶ σοὶ θυμὸς ἐπισκύσσαιτο ἰδόντι·
Verse: 307    δύσζηλοι γάρ τ' εἰμὲν ἐπὶ χθονὶ ϕῦλ' ἀνθρώπων."

Verse: 308       τὸν δ' αὖτ' ᾽Αλκίνοος ἀπαμείβετο ϕώνησέν τε·

Verse: 309       "ξεῖν', οὔ μοι τοιοῦτον ἐνὶ στήθεσσι ϕίλον κῆρ
Verse: 310    μαψιδίως κεχολῶσθαι· ἀμείνω δ' αἴσιμα πάντα.
Verse: 311    αἲ γάρ, Ζεῦ τε πάτερ καὶ ᾽Αθηναίη καὶ ῎Απολλον,
Verse: 312    τοῖος ἐὼν οἷός ἐσσι, τά τε ϕρονέων ἅ τ' ἐγώ περ,
Verse: 313    παῖδά τ' ἐμὴν ἐχέμεν καὶ ἐμὸς γαμβρὸς καλέεσθαι
Verse: 314    αὖθι μένων· οἶκον δέ κ' ἐγὼ καὶ κτήματα δοίην,
Verse: 315    εἴ κ' ἐθέλων γε μένοις: ἀέκοντα δέ σ' οὔ τις ἐρύξει
Verse: 316    Φαιήκων· μὴ τοῦτο ϕίλον Διὶ πατρὶ γένοιτο.
Verse: 317    πομπὴν δ' ἐς τόδ' ἐγὼ τεκμαίρομαι, ὄϕρ' ἔυ εἰδῇς,
Verse: 318    αὔριον ἔς: τῆμος δὲ σὺ μὲν δεδμημένος ὕπνῳ
Verse: 319    λέξεαι, οἱ δ' ἐλόωσι γαλήνην, ὄϕρ' ἂν ἵκηαι
Verse: 320    πατρίδα σὴν καὶ δῶμα, καὶ εἴ που τοι ϕίλον ἐστίν,
Verse: 321    εἴ περ καὶ μάλα πολλὸν ἑκαστέρω ἔστ' Εὐβοίης,
Verse: 322    τὴν περ τηλοτάτω ϕάσ' ἔμμεναι οἵ μιν ἴδοντο
Verse: 323    λαῶν ἡμετέρων, ὅτε τε ξανθὸν ῾Ραδάμανθυν
Verse: 324    ἦγον ἐποψόμενον Τιτυόν, Γαιήιον υἱόν.
Verse: 325    καὶ μὲν οἱ ἔνθ' ἦλθον, καὶ ἄτερ καμάτοιο τέλεσσαν
Verse: 326    ἤματι τῷ αὐτῷ καὶ ἀπήνυσαν οἴκαδ' ὀπίσσω.
Verse: 327    εἰδήσεις δὲ καὶ αὐτὸς ἐνὶ ϕρεσίν, ὅσσον ἄρισται
Verse: 328    νῆες ἐμαὶ καὶ κοῦροι ἀναρρίπτειν ἅλα πηδῷ."

Verse: 329       ὣς ϕάτο, γήθησεν δὲ πολύτλας δῖος ᾽Οδυσσεύς,
Verse: 330    εὐχόμενος δ' ἄρα εἶπεν ἔπος τ' ἔϕατ' ἔκ τ' ὀνόμαζε·

Verse: 331       "Ζεῦ πάτερ, αἴθ' ὅσα εἶπε τελευτήσειεν ἅπαντα
Verse: 332    ᾽Αλκίνοος: τοῦ μέν κεν ἐπὶ ζείδωρον ἄρουραν
Verse: 333    ἄσβεστον κλέος εἴη, ἐγὼ δέ κε πατρίδ' ἱκοίμην."

Verse: 334       ὣς οἱ μὲν τοιαῦτα πρὸς ἀλλήλους ἀγόρευον·
Verse: 335    κέκλετο δ' ᾽Αρήτη λευκώλενος ἀμϕιπόλοισι
Verse: 336    δέμνι' ὑπ' αἰθούσῃ θέμεναι καὶ ῥήγεα καλὰ
Verse: 337    πορϕύρε' ἐμβαλέειν στορέσαι τ' ἐϕύπερθε τάπητας,
Verse: 338    χλαίνας τ' ἐνθέμεναι οὔλας καθύπερθεν ἕσασθαι.
Verse: 339    αἱ δ' ἴσαν ἐκ μεγάροιο δάος μετὰ χερσὶν ἔχουσαι·
Verse: 340    αὐτὰρ ἐπεὶ στόρεσαν πυκινὸν λέχος ἐγκονέουσαι,
Verse: 341    ὤτρυνον ᾽Οδυσῆα παριστάμεναι ἐπέεσσιν·

Verse: 342       "ὄρσο κέων, ὦ ξεῖνε· πεποίηται δέ τοι εὐνή."

Verse: 343       ὣς ϕάν· τῷ δ' ἀσπαστὸν ἐείσατο κοιμηθῆναι.
Verse: 344    ὣς ὁ μὲν ἔνθα καθεῦδε πολύτλας δῖος ᾽Οδυσσεὺς
Verse: 345    τρητοῖσ' ἐν λεχέεσσιν ὑπ' αἰθούσῃ ἐριδούπῳ·
Verse: 346    ᾽Αλκίνοος δ' ἄρα λέκτο μυχῷ δόμου ὑψηλοῖο,
Verse: 347    πὰρ δὲ γυνὴ δέσποινα λέχος πόρσυνε καὶ εὐνήν.



Next part


This text is part of the TITUS edition of Homer, Odyssee.

Copyright TITUS Project, Frankfurt a/M, 30.11.2024. No parts of this document may be republished in any form without prior permission by the copyright holder.