TITUS
Homer, Odyssee
Part No. 11
Previous part

Chapter: 11    
ΟΔΥΣΣΕΙΑΣ Λ


Verse: 1       Αὐτὰρ ἐπεί ῥ' ἐπὶ νῆα κατήλθομεν ἠδὲ θάλασσαν,
Verse: 2    νῆα μὲν ἂρ πάμπρωτον ἐρύσσαμεν εἰς ἅλα δῖαν,
Verse: 3    ἐν δ' ἱστὸν τιθέμεσθα καὶ ἱστία νηὶ: μελαίνῃ,
Verse: 4    ἐν δὲ τὰ μῆλα λαβόντες ἐβήσαμεν, ἂν δὲ καὶ αὐτοι
Verse: 5    βαίνομεν ἀχνύμενοι, θαλερὸν κατὰ δάκρυ χέοντες.
Verse: 6    ἡμῖν δ' αὖ κατόπισθε νεὸς κυανοπρῴροιο
Verse: 7    ἴκμενον οὖρον ἵει πλησίστιον, ἐσθλὸν ἑταῖρον,
Verse: 8    Κίρκη ἐυπλόκαμος, δεινὴ θεὸς αὐδήεσσα.
Verse: 9    ἡμεῖς δ' ὅπλα ἕκαστα πονησάμενοι κατὰ νῆα
Verse: 10    ἥμεθα· τὴν δ' ἄνεμός τε κυβερνήτης τ' ἴθυνε.
Verse: 11    τῆς δὲ πανημερίης τέταθ' ἱστία ποντοπορούσης:
Verse: 12    δύσετό τ' ἠέλιος σκιόωντό τε πᾶσαι ἀγυιαί·

Verse: 13       ἡ δ' ἐς πείραθ' ἵκανε βαθυρρόου ᾽Ωκεανοῖο.
Verse: 14    ἔνθα δὲ Κιμμερίων ἀνδρῶν δῆμός τε πόλις τε,
Verse: 15    ἠέρι καὶ νεϕέλῃ κεκαλυμμένοι· οὐδέ ποτ' αὐτοὺς
Verse: 16    ᾽Ηέλιος ϕαέθων καταδέρκεται ἀκτίνεσσιν,
Verse: 17    οὔθ' ὁπότ' ἂν στείχῃσι πρὸς οὐρανὸν ἀστερόεντα,
Verse: 18    οὔθ' ὅτ' ἂν ἂψ ἐπὶ γαῖαν ἀπ' οὐρανόθεν προτράπηται,
Verse: 19    ἀλλ' ἐπὶ νὺξ ὀλοὴ τέταται δειλοῖσι βροτοῖσι.
Verse: 20    νῆα μὲν ἔνθ' ἐλθόντες ἐκέλσαμεν, ἐκ δὲ τὰ μῆλα
Verse: 21    εἱλόμεθ'· αὐτοὶ δ' αὖτε παρὰ ῥόον ᾽Ωκεανοῖο
Verse: 22    ᾔομεν, ὄϕρ' ἐς χῶρον ἀϕικόμεθ' ὃν ϕράσε Κίρκη.

Verse: 23       ἔνθ' ἱερήια μὲν Περιμήδης Εὐρύλοχός τε
Verse: 24    ἔσχον· ἐγὼ δ' ἄορ ὀξὺ ἐρυσσάμενος παρὰ μηροῦ
Verse: 25    βόθρον ὄρυξ' ὅσσον τε πυγούσιον ἔνθα καὶ ἔνθα·
Verse: 26    ἀμϕ' αὐτῷ δὲ χοὴν χεόμην πᾶσιν νεκύεσσι,
Verse: 27    πρῶτα μελικρήτῳ, μετέπειτα δὲ ἡδέι οἴνῳ,
Verse: 28    τὸ τρίτον αὖθ' ὕδατι· ἐπὶ δ' ἄλϕιτα λευκὰ πάλυνον.
Verse: 29    πολλὰ δὲ γουνούμην νεκύων ἀμενηνὰ κάρηνα,
Verse: 30    ἐλθὼν εἰς ᾽Ιθάκην στεῖραν βοῦν, ἥ τις ἀρίστη,
Verse: 31    ῥέξειν ἐν μεγάροισι πυρήν τ' ἐμπλησέμεν ἐσθλῶν,
Verse: 32    Τειρεσίῃ δ' ἀπάνευθεν ὄιν ἱερευσέμεν οἴῳ
Verse: 33    παμμέλαν', ὃς μήλοισι μεταπρέπει ἡμετέροισι.
Verse: 34    τοὺς δ' ἐπεὶ εὐχωλῇσι λιτῇσί τε, ἔθνεα νεκρῶν,
Verse: 35    ἐλλισάμην, τὰ δὲ μῆλα λαβὼν ἀπεδειροτόμησα
Verse: 36    ἐς βόθρον, ῥέε δ' αἷμα κελαινεϕές: αἱ δ' ἀγέροντο
Verse: 37    ψυχαὶ ὑπ' ἐξ ᾽Ερέβευς νεκύων κατατεθνηώτων·
Verse: 38    νύμϕαι τ' ἠίθεοί τε πολύτλητοί τε γέροντες
Verse: 39    παρθενικαί τ' ἀταλαὶ νεοπενθέα θυμὸν ἔχουσαι·
Verse: 40    πολλοὶ δ' οὐτάμενοι χαλκήρεσιν ἐγχείῃσιν,
Verse: 41    ἄνδρες ᾽Αρηίϕατοι βεβροτωμένα τεύχε' ἔχοντες:
Verse: 42    οἳ πολλοὶ περὶ βόθρον ἐϕοίτων ἄλλοθεν ἄλλος
Verse: 43    θεσπεσίῃ ἰαχῇ· ἐμὲ δὲ χλωρὸν δέος ᾕρει.
Verse: 44    δὴ τότ' ἔπειθ' ἑτάροισιν ἐποτρύνας ἐκέλευσα
Verse: 45    μῆλα, τὰ δὴ κατέκειτ' ἐσϕαγμένα νηλέι χαλκῷ,
Verse: 46    δείραντας κατακῆαι, ἐπεύξασθαι δὲ θεοῖσιν,
Verse: 47    ἰϕθίμῳ τ' ᾽Αίδῃ καὶ ἐπαινῇ Περσεϕονείῃ.
Verse: 48    αὐτὸς δὲ ξίϕος ὀξὺ ἐρυσσάμενος παρὰ μηροῦ
Verse: 49    ἥμην οὐδ' εἴων νεκύων ἀμενηνὰ κάρηνα
Verse: 50    αἵματος ἄσσον ἴμεν πρὶν Τειρεσίαο πυθέσθαι.

Verse: 51       πρώτη δὲ ψυχὴ ᾽Ελπήνορος ἦλθεν ἑταίρου·
Verse: 52    οὐ γάρ πω ἐτέθαπτο ὑπὸ χθονὸς εὐρυοδείης:
Verse: 53    σῶμα γὰρ ἐν Κίρκης μεγάρῳ κατελείπομεν ἡμεῖς
Verse: 54    ἄκλαυτον καὶ ἄθαπτον, ἐπεὶ πόνος ἄλλος ἔπειγε.
Verse: 55    τὸν μὲν ἐγὼ δάκρυσα ἰδὼν ἐλέησά τε θυμῷ,
Verse: 56    καί μιν ϕωνήσας ἔπεα πτερόεντα προσηύδων·

Verse: 57       '᾽Ελπῆνορ, πῶς ἦλθες ὑπὸ ζόϕον ἠερόεντα;
Verse: 58    ἔϕθης πεζὸς ἰὼν ἢ ἐγὼ σὺν νηὶ μελαίνῃ.'

Verse: 59       ὣς ἐϕάμην, ὁ δέ μ' οἰμώξας ἠμείβετο μύθῳ·

Verse: 60       'Διογενὲς Λαερτιάδη, πολυμήχαν' ᾽Οδυσσεῦ,
Verse: 61    ἆσέ με δαίμονος αἶσα κακὴ καὶ ἀθέσϕατος οἶνος:
Verse: 62    Κίρκης δ' ἐν μεγάρῳ καταλέγμενος οὐκ ἐνόησα
Verse: 63    ἄψορρον καταβῆναι ἰὼν ἐς κλίμακα μακρήν,
Verse: 64    ἀλλὰ κατ' ἀντικρὺ τέγεος πέσον· ἐκ δέ μοι αὐχὴν
Verse: 65    ἀστραγάλων ἐάγη, ψυχὴ δ' ῎Αιδος δὲ κατῆλθε.
Verse: 66    νῦν δέ σε τῶν ὄπιθεν γουνάζομαι, οὐ παρεόντων,
Verse: 67    πρός τ' ἀλόχου καὶ πατρός, ὅ σε τρέϕε τυτθὸν ἐόντα,
Verse: 68    Τηλεμάχου θ', ὃν μοῦνον ἐνὶ μεγάροισιν ἔλειπες:
Verse: 69    οἶδα γὰρ ὡς ἐνθένδε κιὼν δόμου ἐξ ᾽Αίδαο
Verse: 70    νῆσον ἐς Αἰαίην σχήσεις εὐεργέα νῆα·
Verse: 71    ἔνθα σ' ἔπειτα, ἄναξ, κέλομαι μνήσασθαι ἐμεῖο.
Verse: 72    μή μ' ἄκλαυτον, ἄθαπτον ἰὼν ὄπιθεν καταλείπειν,
Verse: 73    νοσϕισθείς, μή τοί τι θεῶν μήνιμα γένωμαι,
Verse: 74    ἀλλά με κακκῆαι σὺν τεύχεσιν, ἅσσα μοί ἐστι,
Verse: 75    σῆμά τέ μοι χεῦαι πολιῆς ἐπὶ θινὶ θαλάσσης,
Verse: 76    ἀνδρὸς δυστήνοιο, καὶ ἐσσομένοισι πυθέσθαι·
Verse: 77    ταῦτά τέ μοι τελέσαι πῆξαί τ' ἐπὶ τύμβῳ ἐρετμόν,
Verse: 78    τῷ καὶ ζωὸς ἔρεσσον ἐὼν μετ' ἐμοῖς ἑτάροισιν.'

Verse: 79       ὣς ἔϕατ', αὐτὰρ ἐγώ μιν ἀμειβόμενος προσέειπον·

Verse: 80       'ταῦτά τοι, ὦ δύστηνε, τελευτήσω τε καὶ ἕρξω.'

Verse: 81       νῶι μὲν ὣς ἐπέεσσιν ἀμειβομένω στυγεροῖσιν
Verse: 82    ἥμεθ', ἐγὼ μὲν ἄνευθεν ἐϕ' αἵματι ϕάσγανον ἴσχων,
Verse: 83    εἴδωλον δ' ἑτέρωθεν ἑταίρου πόλλ' ἀγόρευεν.

Verse: 84       ἦλθε δ' ἐπὶ ψυχὴ μητρὸς κατατεθνηυίης,
Verse: 85    Αὐτολύκου θυγάτηρ μεγαλήτορος ᾽Αντίκλεια,
Verse: 86    τὴν ζωὴν κατέλειπον ἰὼν εἰς ῎Ιλιον ἱρήν.
Verse: 87    τὴν μὲν ἐγὼ δάκρυσα ἰδὼν ἐλέησά τε θυμῷ·
Verse: 88    ἀλλ' οὐδ' ὧς εἴων προτέρην, πυκινόν περ ἀχεύων,
Verse: 89    αἵματος ἄσσον ἴμεν πρὶν Τειρεσίαο πυθέσθαι.

Verse: 90       ἦλθε δ' ἐπὶ ψυχὴ Θηβαίου Τειρεσίαο,
Verse: 91    χρύσεον σκῆπτρον ἔχων· ἐμὲ δ' ἔγνω καὶ προσέειπε·

Verse: 93       'τίπτ' αὖτ', ὦ δύστηνε, λιπὼν ϕάος ἠελίοιο
Verse: 94    ἤλυθες, ὄϕρα ἴδῃ νέκυας καὶ ἀτερπέα χῶρον;
Verse: 95    ἀλλ' ἀποχάζεο βόθρου, ἄπισχε δὲ ϕάσγανον ὀξύ,
Verse: 96    αἵματος ὄϕρα πίω καί τοι νημερτέα εἴπω.'

Verse: 97       ὣς ϕάτ', ἐγὼ δ' ἀναχασσάμενος ξίϕος ἀργυρόηλον
Verse: 98    κουλεῷ ἐγκατέπηξ'· ὁ δ' ἐπεὶ πίεν αἷμα κελαινόν,
Verse: 99    καὶ τότε δή μ' ἐπέεσσι προσηύδα μάντις ἀμύμων·

Verse: 100       'νόστον δίζηαι μελιηδέα, ϕαίδιμ' ᾽Οδυσσεῦ·
Verse: 101    τὸν δέ τοι ἀργαλέον θήσει θεός. οὐ γὰρ ὀίω
Verse: 102    λήσειν ἐννοσίγαιον, ὅ τοι κότον ἔνθετο θυμῷ,
Verse: 103    χωόμενος ὅτι οἱ υἱὸν ϕίλον ἐξαλάωσας.
Verse: 104    ἀλλ' ἔτι μέν κε καὶ ὧς κακά περ πάσχοντες ἵκοισθε,
Verse: 105    αἴ κ' ἐθέλῃς σὸν θυμὸν ἐρυκακέειν καὶ ἑταίρων,
Verse: 106    ὁππότε κεν πρῶτον πελάσῃς εὐεργέα νῆα
Verse: 107    Θρινακίῃ νήσῳ, προϕυγὼν ἰοειδέα πόντον,
Verse: 108    βοσκομένας δ' εὕρητε βόας καὶ ἴϕια μῆλα
Verse: 109    ᾽Ηελίου, ὃς πάντ' ἐϕορᾷ καὶ πάντ' ἐπακούει.
Verse: 110    τὰς εἰ μέν κ' ἀσινέας ἐάᾳς νόστου τε μέδηαι,
Verse: 111    καί κεν ἔτ' εἰς ᾽Ιθάκην κακά περ πάσχοντες, ἵκοισθε·
Verse: 112    εἰ δέ κε σίνηαι, τότε τοι τεκμαίρομ' ὄλεθρον
Verse: 113    νηί τε καὶ ἑτάροις: αὐτὸς δ' εἴ πέρ κεν ἀλύξῃς,
Verse: 114    ὀψὲ κακῶς νεῖαι, ὀλέσας ἄπο πάντας ἑταίρους,
Verse: 115    νηὸς ἐπ' ἀλλοτρίης: δήεις δ' ἐν πήματα οἴκῳ,
Verse: 116    ἄνδρας ὑπερϕιάλους, οἵ τοι βίοτον κατέδουσι
Verse: 117    μνώμενοι ἀντιθέην ἄλοχον καὶ ἕδνα διδόντες.
Verse: 118    ἀλλ' ἤτοι κείνων γε βίας ἀποτείσεαι ἐλθών·
Verse: 119    αὐτὰρ ἐπὴν μνηστῆρας ἐνὶ μεγάροισι τεοῖσι
Verse: 120    κτείνῃς ἠὲ δόλῳ ἢ ἀμϕαδὸν ὀξέι χαλκῷ,
Verse: 121    ἔρχεσθαι δὴ ἔπειτα, λαβὼν εὐῆρες ἐρετμόν,
Verse: 122    εἰς ὅ κε τοὺς ἀϕίκηαι, οἳ οὐκ ἴσασι θάλασσαν
Verse: 123    ἀνέρες οὐδέ θ' ἅλεσσι μεμιγμένον εἶδαρ ἔδουσιν·
Verse: 124    οὐδ' ἄρα τοὶ ἴσασι νέας ϕοινικοπαρῄους
Verse: 125    οὐδ' εὐήρε' ἐρετμά, τά τε πτερὰ νηυσὶ πέλονται.
Verse: 126    σῆμα δέ τοι ἐρέω μάλ' ἀριϕραδές, οὐδέ σε λήσει·
Verse: 127    ὁππότε κεν δή τοι ξυμβλήμενος ἄλλος ὁδίτης
Verse: 128    ϕήῃ ἀθηρηλοιγὸν ἔχειν ἀνὰ ϕαιδίμῳ ὤμῳ,
Verse: 129    καὶ τότε δὴ γαίῃ πήξας εὐῆρες ἐρετμόν,
Verse: 130    ῥέξας ἱερὰ καλὰ Ποσειδάωνι ἄνακτι,
Verse: 131    ἀρνειὸν ταῦρόν τε συῶν τ' ἐπιβήτορα κάπρον,
Verse: 132    οἴκαδ' ἀποστείχειν ἕρδειν θ' ἱερὰς ἑκατόμβας
Verse: 133    ἀθανάτοισι θεοῖσι, τοὶ οὐρανὸν εὐρὺν ἔχουσι,
Verse: 134    πᾶσι μάλ' ἑξείης. θάνατος δέ τοι ἐξ ἁλὸς αὐτῷ
Verse: 135    ἀβληχρὸς μάλα τοῖος ἐλεύσεται, ὅς κέ σε πέϕνῃ
Verse: 136    γήρᾳ ὕπο λιπαρῷ ἀρημένον· ἀμϕὶ δὲ λαοὶ
Verse: 137    ὄλβιοι ἔσσονται. τὰ δέ τοι νημερτέα εἴρω.'

Verse: 138       ὣς ἔϕατ', αὐτὰρ ἐγώ μιν ἀμειβόμενος προσέειπον·

Verse: 139       'Τειρεσίη, τὰ μὲν ἄρ που ἐπέκλωσαν θεοὶ αὐτοί.
Verse: 140    ἀλλ' ἄγε μοι τόδε εἰπὲ καὶ ἀτρεκέως κατάλεξον·
Verse: 141    μητρὸς τήνδ' ὁρόω ψυχὴν κατατεθνηυίης:
Verse: 142    ἡ δ' ἀκέουσ' ἧσται σχεδὸν αἵματος οὐδ' ἑὸν υἱὸν
Verse: 143    ἔτλη ἐσ' ἄντα ἰδεῖν οὐδὲ προτιμυθήσασθαι·
Verse: 144    εἰπέ, ἄναξ, πῶς κέν με ἀναγνοίη τὸν ἐόντα;'

Verse: 145       ὣς ἐϕάμην, ὁ δέ μ' αὐτίκ' ἀμειβόμενος προσέειπε·

Verse: 146       'ῥηίδιόν τοι ἔπος ἐρέω καὶ ἐνὶ ϕρεσὶ θήσω·
Verse: 147    ὅν τινα μέν κεν ἐᾷς νεκύων κατατεθνηώτων
Verse: 148    αἵματος ἄσσον ἴμεν, ὁ δέ τοι νημερτὲς ἐνίψει·
Verse: 149    ᾧ δέ κ' ἐπιϕθονέῃς, ὁ δέ τοι πάλιν εἶσιν ὀπίσσω.'

Verse: 150       ὣς ϕαμένη ψυχὴ μὲν ἔβη δόμον ῎Αιδος εἴσω
Verse: 151    Τειρεσίαο ἄνακτος, ἐπεὶ κατὰ θέσϕατ' ἔλεξεν.
Verse: 152    αὐτὰρ ἐγὼν αὐτοῦ μένον ἔμπεδον, ὄϕρ' ἐπὶ μήτηρ
Verse: 153    ἤλυθε καὶ πίεν αἷμα κελαινεϕές: αὐτίκα δ' ἔγνω,
Verse: 154    καί μ' ὀλοϕυρομένη ἔπεα πτερόεντα προσηύδα·

Verse: 155       'τέκνον ἐμόν, πῶς ἦλθες ὑπὸ ζόϕον ἠερόεντα
Verse: 156    ζωὸς ἐών; χαλεπὸν δὲ τάδε ζωοῖσιν ὁρᾶσθαι.
Verse: 157    μέσσῳ γὰρ μεγάλοι ποταμοὶ καὶ δεινὰ ῥέεθρα,
Verse: 158    ᾽Ωκεανὸς μὲν πρῶτα, τὸν οὔ πως ἔστι περῆσαι
Verse: 159    πεζὸν ἐόντ', ἢν μή τις ἔχῃ εὐεργέα νῆα.
Verse: 160    ἦ νῦν δὴ Τροίηθεν ἀλώμενος ἐνθάδ' ἱκάνεις
Verse: 161    νηί τε καὶ ἑτάροισι πολὺν χρόνον; οὐδέ πω ἦλθες
Verse: 162    εἰς ᾽Ιθάκην οὐδ' εἶδες ἐνὶ μεγάροισι γυναῖκα;'

Verse: 163       ὣς ἔϕατ', αὐτὰρ ἐγώ μιν ἀμειβόμενος προσέειπον·

Verse: 164       'μῆτερ ἐμή, χρειώ με κατήγαγεν εἰς ᾽Αίδαο
Verse: 165    ψυχῇ χρησόμενον Θηβαίου Τειρεσίαο·
Verse: 166    οὐ γάρ πω σχεδὸν ἦλθον ᾽Αχαιίδος, οὐδέ πω ἁμῆς
Verse: 167    γῆς ἐπέβην, ἀλλ' αἰὲν ἔχων ἀλάλημαι ὀιζύν,
Verse: 168    ἐξ οὗ τὰ πρώτισθ' ἑπόμην ᾽Αγαμέμνονι δίῳ
Verse: 169    ῎Ιλιον εἰς εὔπωλον, ἵνα Τρώεσσι μαχοίμην.
Verse: 170    ἀλλ' ἄγε μοι τόδε εἰπὲ καὶ ἀτρεκέως κατάλεξον·
Verse: 171    τίς νύ σε κὴρ ἐδάμασσε τανηλεγέος θανάτοιο;
Verse: 172    ἢ δολιχὴ νοῦσος, ἦ ῎Αρτεμις ἰοχέαιρα
Verse: 173    οἷς ἀγανοῖσι βέλεσσιν ἐποιχομένη κατέπεϕνεν;
Verse: 174    εἰπὲ δέ μοι πατρός τε καὶ υἱέος, ὃν κατέλειπον,
Verse: 175    ἢ ἔτι πὰρ κείνοισιν ἐμὸν γέρας, ἦέ τις ἤδη
Verse: 176    ἀνδρῶν ἄλλος ἔχει, ἐμὲ δ' οὐκέτι ϕασὶ νέεσθαι.
Verse: 177    εἰπὲ δέ μοι μνηστῆς ἀλόχου βουλήν τε νόον τε,
Verse: 178    ἠὲ μένει παρὰ παιδὶ καὶ ἔμπεδα πάντα ϕυλάσσει,
Verse: 179    ἦ ἤδη μιν ἔγημεν ᾽Αχαιῶν ὅς τις ἄριστος.'

Verse: 180       ὣς ἐϕάμην, ἡ δ' αὐτίκ' ἀμείβετο πότνια μήτηρ·

Verse: 181       'καὶ λίην κείνη γε μένει τετληότι θυμῷ
Verse: 182    σοῖσιν ἐνὶ μεγάροισιν· ὀιζυραὶ δέ οἱ αἰεὶ
Verse: 183    ϕθίνουσιν νύκτες τε καὶ ἤματα δάκρυ χεούσῃ.
Verse: 184    σὸν δ' οὔ πώ τις ἔχει καλὸν γέρας, ἀλλὰ ἕκηλος
Verse: 185    Τηλέμαχος τεμένεα νέμεται καὶ δαῖτας ἐίσας
Verse: 186    δαίνυται, ἃς ἐπέοικε δικασπόλον ἄνδρ' ἀλεγύνειν·
Verse: 187    πάντες γὰρ καλέουσι. πατὴρ δὲ σὸς αὐτόθι μίμνει
Verse: 188    ἀγρῷ, οὐδὲ πόλιν δὲ κατέρχεται· οὐδέ οἱ εὐναὶ
Verse: 189    δέμνια καὶ χλαῖναι καὶ ῥήγεα σιγαλόεντα,
Verse: 190    ἀλλ' ὅ γε χεῖμα μὲν εὕδει ὅθι δμῶες ἐνὶ οἴκῳ,
Verse: 191    ἐν κόνι ἄγχι πυρός, κακὰ δὲ χροὶ: εἵματα εἷται·
Verse: 192    αὐτὰρ ἐπὴν ἔλθῃσι θέρος τεθαλυῖά τ' ὀπώρη,
Verse: 193    πάντῃ οἱ κατὰ γουνὸν ἀλῳῆς οἰνοπέδοιο
Verse: 194    ϕύλλων κεκλιμένων χθαμαλαὶ βεβλήαται εὐναί.
Verse: 195    ἔνθ' ὅ γε κεῖτ' ἀχέων, μέγα δὲ ϕρεσὶ πένθος ἀέξει
Verse: 196    σὸν νόστον ποθέων· χαλεπὸν δ' ἐπὶ γῆρας ἱκάνει.
Verse: 197    οὕτω γὰρ καὶ ἐγὼν ὀλόμην καὶ πότμον ἐπέσπον·
Verse: 198    οὔτ' ἐμέ γ' ἐν μεγάροισιν ἐύσκοπος ἰοχέαιρα
Verse: 199    οἷς ἀγανοῖσι βέλεσσιν ἐποιχομένη κατέπεϕνεν,
Verse: 200    οὔτε τις οὖν μοι νοῦσος ἐπήλυθεν, ἥ τε μάλιστα
Verse: 201    τηκεδόνι στυγερῇ μελέων ἐξείλετο θυμόν·
Verse: 202    ἀλλά με σός τε πόθος σά τε μήδεα, ϕαίδιμ' ᾽Οδυσσεῦ,
Verse: 203    σή τ' ἀγανοϕροσύνη μελιηδέα θυμὸν ἀπηύρα.'

Verse: 204       ὣς ἔϕατ', αὐτὰρ ἔγωγ' ἔθελον ϕρεσὶ μερμηρίξας
Verse: 205    μητρὸς ἐμῆς ψυχὴν ἑλέειν κατατεθνηυίης.
Verse: 206    τρὶς μὲν ἐϕωρμήθην, ἑλέειν τέ με θυμὸς ἀνώγει,
Verse: 207    τρὶς δέ μοι ἐκ χειρῶν σκιῇ εἴκελον ἢ καὶ ὀνείρῳ
Verse: 208    ἔπτατ'. ἐμοὶ δ' ἄχος ὀξὺ γενέσκετο κηρόθι μᾶλλον,
Verse: 209    καί μιν ϕωνήσας ἔπεα πτερόεντα προσηύδων·

Verse: 210       'μῆτερ ἐμή, τί νύ μ' οὐ μίμνεις ἑλέειν μεμαῶτα,
Verse: 211    ὄϕρα καὶ εἰν ᾽Αίδαο ϕίλας περὶ χεῖρε βαλόντε
Verse: 212    ἀμϕοτέρω κρυεροῖο τεταρπώμεσθα γόοιο;
Verse: 213    ἦ τί μοι εἴδωλον τόδ' ἀγαυὴ Περσεϕόνεια
Verse: 214    ὤτρυν', ὄϕρ' ἔτι μᾶλλον ὀδυρόμενος στεναχίζω;'

Verse: 215       ὣς ἐϕάμην, ἡ δ' αὐτίκ' ἀμείβετο πότνια μήτηρ·

Verse: 216       'ὤ μοι, τέκνον ἐμόν, περὶ πάντων κάμμορε ϕωτῶν,
Verse: 217    οὔ τί σε Περσεϕόνεια, Διὸς θυγάτηρ, ἀπαϕίσκει,
Verse: 218    ἀλλ' αὕτη δίκη ἐστὶ βροτῶν, ὅτε τίς κε θάνῃσιν·
Verse: 219    οὐ γὰρ ἔτι σάρκάς τε καὶ ὀστέα ἶνες ἔχουσιν,
Verse: 220    ἀλλὰ τὰ μέν τε πυρὸς κρατερὸν μένος αἰθομένοιο
Verse: 221    δαμνᾷ, ἐπεί κε πρῶτα λίπῃ λεύκ' ὀστέα θυμός,
Verse: 222    ψυχὴ δ' ἠύτ' ὄνειρος ἀποπταμένη πεπότηται.
Verse: 223    ἀλλὰ ϕόως δὲ τάχιστα λιλαίεο· ταῦτα δὲ πάντα
Verse: 224    ἴσθ', ἵνα καὶ μετόπισθε τεῇ εἴπῃσθα γυναικί.'

Verse: 225       νῶι μὲν ὣς ἐπέεσσιν ἀμειβόμεθ', αἱ δὲ γυναῖκες
Verse: 226    ἤλυθον ή ὤτρυνεν γὰρ ἀγαυὴ Περσεϕόνεια ή
Verse: 227    ὅσσαι ἀριστήων ἄλοχοι ἔσαν ἠδὲ θύγατρες.
Verse: 228    αἱ δ' ἀμϕ' αἷμα κελαινὸν ἀολλέες ἠγερέθοντο,
Verse: 229    αὐτὰρ ἐγὼ βούλευον ὅπως ἐρέοιμι ἑκάστην.
Verse: 230    ἥδε δέ μοι κατὰ θυμὸν ἀρίστη ϕαίνετο βουλή·
Verse: 231    σπασσάμενος τανύηκες ἄορ παχέος παρὰ μηροῦ
Verse: 232    οὐκ εἴων πίνειν ἅμα πάσας αἷμα κελαινόν.
Verse: 233    αἱ δὲ προμνηστῖναι ἐπήισαν, ἠδὲ ἑκάστη
Verse: 234    ὃν γόνον ἐξαγόρευεν· ἐγὼ δ' ἐρέεινον ἁπάσας.

Verse: 235       ἔνθ' ἤτοι πρώτην Τυρὼ ἴδον εὐπατέρειαν,
Verse: 236    ἣ ϕάτο Σαλμωνῆος ἀμύμονος ἔκγονος εἶναι,
Verse: 237    ϕῆ δὲ Κρηθῆος γυνὴ ἔμμεναι Αἰολίδαο·
Verse: 238    ἣ ποταμοῦ ἠράσσατ', ᾽Ενιπῆος θείοιο,
Verse: 239    ὃς πολὺ κάλλιστος ποταμῶν ἐπὶ γαῖαν ἵησι,
Verse: 240    καί ῥ' ἐπ' ᾽Ενιπῆος πωλέσκετο καλὰ ῥέεθρα.
Verse: 241    τῷ δ' ἄρα εἰσάμενος γαιήοχος ἐννοσίγαιος
Verse: 242    ἐν προχοῇς ποταμοῦ παρελέξατο δινήεντος:
Verse: 243    πορϕύρεον δ' ἄρα κῦμα περιστάθη, οὔρειὴ ἶσον,
Verse: 244    κυρτωθέν, κρύψεν δὲ θεὸν θνητήν τε γυναῖκα.
Verse: 245    λῦσε δὲ παρθενίην ζώνην, κατὰ δ' ὕπνον ἔχευεν.
Verse: 246    αὐτὰρ ἐπεί ῥ' ἐτέλεσσε θεὸς ϕιλοτήσια ἔργα,
Verse: 247    ἔν τ' ἄρα οἱ ϕῦ χειρὶ ἔπος τ' ἔϕατ' ἔκ τ' ὀνόμαζε·

Verse: 248       'χαῖρε, γύναι, ϕιλότητι· περιπλομένου δ' ἐνιαυτοῦ
Verse: 249    τέξεις ἀγλαὰ τέκνα, ἐπεὶ οὐκ ἀποϕώλιοι εὐναὶ
Verse: 250    ἀθανάτων· σὺ δὲ τοὺς κομέειν ἀτιταλλέμεναί τε.
Verse: 251    νῦν δ' ἔρχευ πρὸς δῶμα, καὶ ἴσχεο μηδ' ὀνομήνῃς:
Verse: 252    αὐτὰρ ἐγώ τοί εἰμι Ποσειδάων ἐνοσίχθων.'

Verse: 253       ὣς εἰπὼν ὑπὸ πόντον ἐδύσετο κυμαίνοντα.
Verse: 254    ἡ δ' ὑποκυσαμένη Πελίην τέκε καὶ Νηλῆα,
Verse: 255    τὼ κρατερὼ θεράποντε Διὸς μεγάλοιο γενέσθην
Verse: 256    ἀμϕοτέρω· Πελίης μὲν ἐν εὐρυχόρῳ ᾽Ιαολκῷ
Verse: 257    ναῖε πολύρρηνος, ὁ δ' ἄρ' ἐν Πύλῳ ἠμαθόεντι.
Verse: 258    τοὺς δ' ἑτέρους Κρηθῆι τέκεν βασίλεια γυναικῶν,
Verse: 259    Αἴσονά τ' ἠδὲ Φέρητ' ᾽Αμυθάονά θ' ἱππιοχάρμην.

Verse: 260       τὴν δὲ μέτ' ᾽Αντιόπην ἴδον, ᾽Ασωποῖο θύγατρα,
Verse: 261    ἣ δὴ καὶ Διὸς εὔχετ' ἐν ἀγκοίνῃσιν ἰαῦσαι·
Verse: 262    καί ῥ' ἔτεκεν δύο παῖδ', ᾽Αμϕίονά τε Ζῆθόν τε,
Verse: 263    οἳ πρῶτοι Θήβης ἕδος ἔκτισαν ἑπταπύλοιο,
Verse: 264    πύργωσάν τ', ἐπεὶ οὐ μὲν ἀπύργωτόν γ' ἐδύναντο
Verse: 265    ναιέμεν εὐρύχορον Θήβην, κρατερώ περ ἐόντε.

Verse: 266       τὴν δὲ μετ' ᾽Αλκμήνην ἴδον, ᾽Αμϕιτρύωνος ἄκοιτιν,
Verse: 267    ἥ ῥ' ῾Ηρακλῆα θρασυμέμνονα θυμολέοντα
Verse: 268    γείνατ' ἐν ἀγκοίνῃσι Διὸς μεγάλοιο μιγεῖσα,
Verse: 269    καὶ Μεγάρην, Κρείοντος ὑπερθύμοιο θύγατρα,
Verse: 270    τὴν ἔχεν ᾽Αμϕιτρύωνος υἱὸς μένος αἰὲν ἀτειρής.

Verse: 271       μητέρα τ' Οἰδιπόδαο ἴδον, καλὴν ᾽Επικάστην,
Verse: 272    ἣ μέγα ἔργον ἔρεξεν ἀιδρείῃσι νόοιο,
Verse: 273    γημαμένη ᾧ υἷι· ὁ δ' ὃν πατέρ' ἐξεναρίξας
Verse: 274    γῆμεν· ἄϕαρ δ' ἀνάπυστα θεοὶ θέσαν ἀνθρώποισιν.
Verse: 275    ἀλλ' ὁ μὲν ἐν Θήβῃ πολυηράτῳ ἄλγεα πάσχων
Verse: 276    Καδμείων ἤνασσε θεῶν ὀλοὰς διὰ βουλάς:
Verse: 277    ἡ δ' ἔβη εἰς ᾽Αίδαο πυλάρταο κρατεροῖο,
Verse: 278    ἁψαμένη βρόχον αἰπὺν ἀϕ' ὑψηλοῖο μελάθρου
Verse: 279    ᾧ ἄχειὴ σχομένη· τῷ δ' ἄλγεα κάλλιπ' ὀπίσσω
Verse: 280    πολλὰ μάλ', ὅσσα τε μητρὸς ᾽Ερινύες ἐκτελέουσι.

Verse: 281       καὶ Χλῶριν εἶδον περικαλλέα, τήν ποτε Νηλεὺς
Verse: 282    γῆμεν ἑὸν διὰ κάλλος, ἐπεὶ πόρε μυρία ἕδνα,
Verse: 283    ὁπλοτάτην κούρην ᾽Αμϕίονος ᾽Ιασίδαο,
Verse: 284    ὅς ποτ' ἐν ᾽Ορχομενῷ Μινυηίῳ ἶϕι ἄνασσεν·
Verse: 285    ἡ δὲ Πύλου βασίλευε, τέκεν δέ οἱ ἀγλαὰ τέκνα,
Verse: 286    Νέστορά τε Χρομίον τε Περικλύμενόν τ' ἀγέρωχον.
Verse: 287    τοῖσι δ' ἐπ' ἰϕθίμην Πηρὼ τέκε, θαῦμα βροτοῖσι,
Verse: 288    τὴν πάντες μνώοντο περικτίται· οὐδέ τι Νηλεὺς
Verse: 289    τῷ ἐδίδου ὃς μὴ ἕλικας βόας εὐρυμετώπους
Verse: 290    ἐκ Φυλάκης ἐλάσειε βίης ᾽Ιϕικληείης
Verse: 291    ἀργαλέας. τὰς δ' οἶος ὑπέσχετο μάντις ἀμύμων
Verse: 292    ἐξελάαν· χαλεπὴ δὲ θεοῦ κατὰ μοῖρα πέδησε,
Verse: 293    δεσμοί τ' ἀργαλέοι καὶ βουκόλοι ἀγροιῶται.
Verse: 294    ἀλλ' ὅτε δὴ μῆνές τε καὶ ἡμέραι ἐξετελεῦντο
Verse: 295    ἂψ περιτελλομένου ἔτεος καὶ ἐπήλυθον ὧραι,
Verse: 296    καὶ τότε δή μιν ἔλυσε βίη ᾽Ιϕικληείη,
Verse: 297    θέσϕατα πάντ' εἰπόντα· Διὸς δ' ἐτελείετο βουλή.

Verse: 298       καὶ Λήδην εἶδον, τὴν Τυνδαρέου παράκοιτιν,
Verse: 299    ἥ ῥ' ὑπὸ Τυνδαρέῳ κρατερόϕρονε γείνατο παῖδε,
Verse: 300    Κάστορά θ' ἱππόδαμον καὶ πὺξ ἀγαθὸν Πολυδεύκεα,
Verse: 301    τοὺς ἄμϕω ζωοὺς κατέχει ϕυσίζοος αἶα·
Verse: 302    οἳ καὶ νέρθεν γῆς τιμὴν πρὸς Ζηνὸς ἔχοντες
Verse: 303    ἄλλοτε μὲν ζώουσ' ἑτερήμεροι, ἄλλοτε δ' αὖτε
Verse: 304    τεθνᾶσιν· τιμὴν δὲ λελόγχασιν ἶσα θεοῖσι.

Verse: 305       τὴν δὲ μέτ' ᾽Ιϕιμέδειαν, ᾽Αλωῆος παράκοιτιν,
Verse: 306    εἴσιδον, ἣ δὴ ϕάσκε Ποσειδάωνι μιγῆναι·
Verse: 307    καί ῥ' ἔτεκεν δύο παῖδε ή μινυνθαδίω δὲ γενέσθην ή,
Verse: 308    ῎Ωτόν τ' ἀντίθεον τηλεκλειτόν τ' ᾽Εϕιάλτην,
Verse: 309    ουἠς δὴ μηκίστους θρέψε ζείδωρος ἄρουρα
Verse: 310    καὶ πολὺ καλλίστους μετά γε κλυτὸν ᾽Ωρίωνα·
Verse: 311    ἐννέωροι γὰρ τοί γε καὶ ἐννεαπήχεες ἦσαν
Verse: 312    εὖρος, ἀτὰρ μῆκός γε γενέσθην ἐννεόργυιοι.
Verse: 313    οἵ ῥα καὶ ἀθανάτοισιν ἀπειλήτην ἐν ᾽Ολύμπῳ
Verse: 314    ϕυλόπιδα στήσειν πολυάικος πολέμοιο.
Verse: 315    ῎Οσσαν ἐπ' Οὐλύμπῳ μέμασαν θέμεν, αὐτὰρ ἐπ' ῎Οσσῃ
Verse: 316    Πήλιον εἰνοσίϕυλλον, ἵν' οὐρανὸς ἀμβατὸς εἴη.
Verse: 317    καί νύ κεν ἐξετέλεσσαν, εἰ ἥβης μέτρον ἵκοντο·
Verse: 318    ἀλλ' ὄλεσεν Διὸς υἱός, ὃν ἠύκομος τέκε Λητώ,
Verse: 319    ἀμϕοτέρω, πρίν σϕωιν ὑπὸ κροτάϕοισιν ἰούλους
Verse: 320    ἀνθῆσαι πυκάσαι τε γένυς εὐανθέι λάχνῃ.

Verse: 321       Φαίδρην τε Πρόκρίν τε ἴδον καλήν τ' ᾽Αριάδνην,
Verse: 322    κούρην Μίνωος ὀλοόϕρονος, ἥν ποτε Θησεὺς
Verse: 323    ἐκ Κρήτης ἐς γουνὸν ᾽Αθηνάων ἱεράων
Verse: 324    ἦγε μέν, οὐ δ' ἀπόνητο· πάρος δέ μιν ῎Αρτεμις ἔκτα
Verse: 325    Δίῃ ἐν ἀμϕιρύτῃ Διονύσου μαρτυρίῃσι.

Verse: 326       Μαῖράν τε Κλυμένην τε ἴδον στυγερήν τ' ᾽Εριϕύλην,
Verse: 327    ἣ χρυσὸν ϕίλου ἀνδρὸς ἐδέξατο τιμήεντα.
Verse: 328    πάσας δ' οὐκ ἂν ἐγὼ μυθήσομαι οὐδ' ὀνομήνω,
Verse: 329    ὅσσας ἡρώων ἀλόχους ἴδον ἠδὲ θύγατρας:
Verse: 330    πρὶν γάρ κεν καὶ νὺξ ϕθῖτ' ἄμβροτος. ἀλλὰ καὶ ὥρη
Verse: 331    εὕδειν, ἢ ἐπὶ νῆα θοὴν ἐλθόντ' ἐς ἑταίρους
Verse: 332    ἢ αὐτοῦ· πομπὴ δὲ θεοῖς ὑμῖν τε μελήσει."

Verse: 333       ὣς ἔϕαθ', οἱ δ' ἄρα πάντες ἀκὴν ἐγένοντο σιωπῇ,
Verse: 334    κηληθμῷ δ' ἔσχοντο κατὰ μέγαρα σκιόεντα.
Verse: 335    τοῖσιν δ' ᾽Αρήτη λευκώλενος ἤρχετο μύθων·

Verse: 336       "Φαίηκες, πῶς ὔμμιν ἀνὴρ ὅδε ϕαίνεται εἶναι
Verse: 337    εἶδός τε μέγεθός τε ἰδὲ ϕρένας ἔνδον ἐίσας...
Verse: 338    ξεῖνος δ' αὖτ' ἐμός ἐστιν, ἕκαστος δ' ἔμμορε τιμῆς.
Verse: 339    τῶ μὴ ἐπειγόμενοι ἀποπέμπετε, μηδὲ τὰ δῶρα
Verse: 340    οὕτω χρηίζοντι κολούετε· πολλὰ γὰρ ὑμῖν
Verse: 341    κτήματ' ἐνὶ μεγάροισι θεῶν ἰότητι κέονται."

Verse: 342       τοῖσι δὲ καὶ μετέειπε γέρων ἥρως ᾽Εχένηος,
Verse: 343    ὃς δὴ Φαιήκων ἀνδρῶν προγενέστερος ἦεν·

Verse: 344       "ὦ ϕίλοι, οὐ μὰν ἧμιν ἀπὸ σκοποῦ οὐδ' ἀπὸ δόξης
Verse: 345    μυθεῖται βασίλεια περίϕρων· ἀλλὰ πίθεσθε.
Verse: 346    ᾽Αλκινόου δ' ἐκ τοῦδ' ἔχεται ἔργον τε ἔπος τε."

Verse: 347       τὸν δ' αὖτ' ᾽Αλκίνοος ἀπαμείβετο ϕώνησέν τε·

Verse: 348       "τοῦτο μὲν οὕτω δὴ ἔσται ἔπος, αἴ κεν ἔγωγε
Verse: 349    ζωὸς Φαιήκεσσι ϕιληρέτμοισιν ἀνάσσω.
Verse: 350    ξεῖνος δὲ τλήτω, μάλα περ νόστοιο χατίζων,
Verse: 351    ἔμπης οὖν ἐπιμεῖναι ἐς αὔριον, εἰς ὅ κε πᾶσαν
Verse: 352    δωτίνην τελέσω. πομπὴ δ' ἄνδρεσσι μελήσει
Verse: 353    πᾶσι, μάλιστα δ' ἐμοί· τοῦ γὰρ κράτος ἔστ' ἐνὶ δήμῳ."

Verse: 354       τὸν δ' ἀπαμειβόμενος προσέϕη πολύμητις ᾽Οδυσσεύς:

Verse: 355       "᾽Αλκίνοε κρεῖον, πάντων ἀριδείκετε λαῶν,
Verse: 356    εἴ με καὶ εἰς ἐνιαυτὸν ἀνώγοιτ' αὐτόθι μίμνειν,
Verse: 357    πομπήν τ' ὀτρύνοιτε καὶ ἀγλαὰ δῶρα διδοῖτε,
Verse: 358    καί κε τὸ βουλοίμην, καί κεν πολὺ κέρδιον εἴη,
Verse: 359    πλειοτέρῃ σὺν χειρὶ ϕίλην ἐς πατρίδ' ἱκέσθαι·
Verse: 360    καί κ' αἰδοιότερος καὶ ϕίλτερος ἀνδράσιν εἴην
Verse: 361    πᾶσιν, ὅσοι μ' ᾽Ιθάκην δὲ ἰδοίατο νοστήσαντα."

Verse: 362       τὸν δ' αὖτ' ᾽Αλκίνοος ἀπαμείβετο ϕώνησέν τε·

Verse: 363       "ὦ ᾽Οδυσεῦ, τὸ μὲν οὔ τί σ' ἐίσκομεν εἰσορόωντες,
Verse: 364    ἠπεροπῆά τ' ἔμεν καὶ ἐπίκλοπον, οἷά τε πολλοὺς
Verse: 365    βόσκει γαῖα μέλαινα πολυσπερέας ἀνθρώπους
Verse: 366    ψεύδεά τ' ἀρτύνοντας, ὅθεν κέ τις οὐδὲ ἴδοιτο·
Verse: 367    σοὶ δ' ἔπι μὲν μορϕὴ ἐπέων, ἔνι δὲ ϕρένες ἐσθλαί,
Verse: 368    μῦθον δ' ὡς ὅτ' ἀοιδὸς ἐπισταμένως κατέλεξας,
Verse: 369    πάντων ᾽Αργείων σέο τ' αὐτοῦ κήδεα λυγρά.
Verse: 370    ἀλλ' ἄγε μοι τόδε εἰπὲ καὶ ἀτρεκέως κατάλεξον,
Verse: 371    εἴ τινας ἀντιθέων ἑτάρων ἴδες, οἵ τοι ἅμ' αὐτῷ
Verse: 372    ῎Ιλιον εἰς ἅμ' ἕποντο καὶ αὐτοῦ πότμον ἐπέσπον.
Verse: 373    νὺξ δ' ἥδε μάλα μακρή, ἀθέσϕατος: οὐδέ πω ὥρη
Verse: 374    εὕδειν ἐν μεγάρῳ· σὺ δέ μοι λέγε θέσκελα ἔργα.
Verse: 375    καί κεν ἐς ᾽Ηῶ δῖαν ἀνασχοίμην, ὅτε μοι σὺ
Verse: 376    τλαίης ἐν μεγάρῳ τὰ σὰ κήδεα μυθήσασθαι."

Verse: 377       τὸν δ' ἀπαμειβόμενος προσέϕη πολύμητις ᾽Οδυσσεύς:

Verse: 378       "᾽Αλκίνοε κρεῖον, πάντων ἀριδείκετε λαῶν,
Verse: 379    ὥρη μὲν πολέων μύθων, ὥρη δὲ καὶ ὕπνου·
Verse: 380    εἰ δ' ἔτ' ἀκουέμεναί γε λιλαίεαι, οὐκ ἂν ἔγωγε
Verse: 381    τούτων σοι ϕθονέοιμι καὶ οἰκτρότερ' ἄλλ' ἀγορεύειν,
Verse: 382    κήδε' ἐμῶν ἑτάρων, οἳ δὴ μετόπισθεν ὄλοντο·
Verse: 383    οἳ Τρώων μὲν ὑπεξέϕυγον στονόεσσαν ἀυτήν,
Verse: 384    ἐν νόστῳ δ' ἀπόλοντο κακῆς ἰότητι γυναικός.

Verse: 385       αὐτὰρ ἐπεὶ ψυχὰς μὲν ἀπεσκέδασ' ἄλλυδις ἄλλῃ
Verse: 386    ἁγνὴ Περσεϕόνεια γυναικῶν θηλυτεράων,
Verse: 387    ἦλθε δ' ἐπὶ ψυχὴ ᾽Αγαμέμνονος ᾽Ατρείδαο
Verse: 388    ἀχνυμένη· περὶ δ' ἄλλοι ἀγηγέραθ', ὅσσοι ἄριστοι
Verse: 389    οἴκῳ ἐν Αἰγίσθοιο θάνον καὶ πότμον ἐπέσπον.
Verse: 390    ἔγνω δ' αἶψ' ἐμὲ κεῖνος, ἐπεὶ πίεν αἷμα κελαινόν·
Verse: 391    κλαῖε δ' ὅ γε λιγέως, θαλερὸν κατὰ δάκρυον εἴβων,
Verse: 392    πιτνὰς εἰς ἐμὲ χεῖρας ὀρέξασθαι μενεαίνων·
Verse: 393    ἀλλ' οὐ γάρ οἱ ἔτ' ἦν ἲς ἔμπεδος οὐδ' ἔτι κῖκυς,
Verse: 394    οἵη περ πάρος ἔσκεν ἐνὶ γναμπτοῖσι μέλεσσι.
Verse: 395    τὸν μὲν ἐγὼ δάκρυσα ἰδὼν ἐλέησά τε θυμῷ,
Verse: 396    καί μιν ϕωνήσας ἔπεα πτερόεντα προσηύδων·

Verse: 397       '᾽Ατρείδη κύδιστε, ἄναξ ἀνδρῶν, ᾽Αγάμεμνον,
Verse: 398    τίς νύ σε κὴρ ἐδάμασσε τανηλεγέος θανάτοιο;
Verse: 399    ἠέ σέγ' ἐν νήεσσι Ποσειδάων ἐδάμασσεν
Verse: 400    ὄρσας ἀργαλέων ἀνέμων ἀμέγαρτον ἀυτμήν;
Verse: 401    ἦέ σ' ἀνάρσιοι ἄνδρες ἐδηλήσαντ' ἐπὶ χέρσου
Verse: 402    βοῦς περιταμνόμενον ἠδ' οἰῶν πώεα καλὰ
Verse: 403    ἠὲ περὶ πτόλιος μαχεούμενον ἠδὲ γυναικῶν;'

Verse: 404       ὣς ἐϕάμην, ὁ δέ μ' αὐτίκ' ἀμειβόμενος προσέειπε·

Verse: 405       'Διογενὲς Λαερτιάδη, πολυμήχαν' ᾽Οδυσσεῦ,
Verse: 406    οὔτ' ἔμεγ' ἐν νήεσσι Ποσειδάων ἐδάμασσεν,
Verse: 408    οὔτε μ' ἀνάρσιοι ἄνδρες ἐδηλήσαντ' ἐπὶ χέρσου,
Verse: 409    ἀλλά μοι Αἴγισθος τεύξας θάνατόν τε μόρον τε
Verse: 410    ἔκτα σὺν οὐλομένῃ ἀλόχῳ, οἶκόνδε καλέσσας,
Verse: 411    δειπνίσσας, ὥς τίς τε κατέκτανε βοῦν ἐπὶ ϕάτνῃ.
Verse: 412    ὣς θάνον οἰκτίστῳ θανάτῳ· περὶ δ' ἄλλοι ἑταῖροι
Verse: 413    νωλεμέως κτείνοντο, σύες ὣς ἀργιόδοντες,
Verse: 414    οἵ ῥά τ' ἐν ἀϕνειοῦ ἀνδρὸς μέγα δυναμένοιο
Verse: 415    ἢ γάμῳ ἢ ἐράνῳ ἢ εἰλαπίνῃ τεθαλυίῃ.
Verse: 416    ἤδη μὲν πολέων ϕόνῳ ἀνδρῶν ἀντεβόλησας
Verse: 417    μουνὰξ κτεινομένων καὶ ἐνὶ κρατερῇ ὑσμίνῃ·
Verse: 418    ἀλλά κε κεῖνα μάλιστα ἰδὼν ὀλοϕύραο θυμῷ,
Verse: 419    ὡς ἀμϕὶ κρητῆρα τραπέζας τε πληθούσας
Verse: 420    κείμεθ' ἐνὶ μεγάρῳ, δάπεδον δ' ἅπαν αἵματι θῦεν.
Verse: 421    οἰκτροτάτην δ' ἤκουσα ὄπα Πριάμοιο θυγατρὸς,
Verse: 422    Κασσάνδρης, τὴν κτεῖνε Κλυταιμνήστρη δολόμητις
Verse: 423    ἀμϕ' ἐμοί· αὐτὰρ ἐγὼ ποτὶ γαίῃ χεῖρας ἀείρων
Verse: 424    βάλλον ἀποθνῄσκων περὶ ϕασγάνῳ· ἡ δὲ κυνῶπις
Verse: 425    νοσϕίσατ', οὐδέ μοι ἔτλη ἰόντι περ εἰς ᾽Αίδαο
Verse: 426    χερσὶ κατ' ὀϕθαλμοὺς ἑλέειν σύν τε στόμ' ἐρεῖσαι.
Verse: 427    ὣς οὐκ αἰνότερον καὶ κύντερον ἄλλο γυναικός,
Verse: 428    ἥ τις δὴ τοιαῦτα μετὰ ϕρεσὶν ἔργα βάληται·
Verse: 429    οἷον δὴ καὶ κείνη ἐμήσατο ἔργον ἀεικές,
Verse: 430    κουριδίῳ τεύξασα πόσει ϕόνον. ἦ τοι ἔϕην γε
Verse: 431    ἀσπάσιος παίδεσσιν ἰδὲ δμώεσσιν ἐμοῖσιν
Verse: 432    οἴκαδ' ἐλεύσεσθαι· ἡ δ' ἔξοχα λύγρ' εἰδυῖα
Verse: 433    οἷ τε κατ' αἶσχος ἔχευε καὶ ἐσσομένῃσιν ὀπίσσω
Verse: 434    θηλυτέρῃσι γυναιξί, καὶ ἥ κ' εὐεργὸς ἔῃσιν.'

Verse: 435       ὣς ἔϕατ', αὐτὰρ ἐγώ μιν ἀμειβόμενος προσέειπον·

Verse: 436       'ὢ πόποι, ἦ μάλα δὴ γόνον ᾽Ατρέος εὐρύοπα Ζεὺς
Verse: 437    ἐκπάγλως ἤχθηρε γυναικείας διὰ βουλὰς
Verse: 438    ἐξ ἀρχῆς: ῾Ελένης μὲν ἀπωλόμεθ' εἵνεκα πολλοί,
Verse: 439    σοὶ δὲ Κλυταιμνήστρη δόλον ἤρτυε τηλόθ' ἐόντι.'

Verse: 440       ὣς ἐϕάμην, ὁ δέ μ' αὐτίκ' ἀμειβόμενος προσέειπε·

Verse: 441       'τῶ νῦν μή ποτε καὶ σὺ γυναικί περ ἤπιος εἶναι,
Verse: 442    μηδ' οἱ μῦθον ἅπαντα πιϕαυσκέμεν, ὅν κ' ἔυ εἰδῇς,
Verse: 443    ἀλλὰ τὸ μὲν ϕάσθαι, τὸ δὲ καὶ κεκρυμμένον εἶναι.
Verse: 444    ἀλλ' οὐ σοίγ', ᾽Οδυσεῦ, ϕόνος ἔσσεται ἔκ γε γυναικός:
Verse: 445    λίην γὰρ πινυτή τε καὶ εὖ ϕρεσὶ μήδεα οἶδε
Verse: 446    κούρη ᾽Ικαρίοιο, περίϕρων Πηνελόπεια.
Verse: 447    ἦ μέν μιν νύμϕην γε νέην κατελείπομεν ἡμεῖς
Verse: 448    ἐρχόμενοι πόλεμον δέ· πάις δέ οἱ ἦν ἐπὶ μαζῷ
Verse: 449    νήπιος, ὅς που νῦν γε μετ' ἀνδρῶν ἵζει ἀριθμῷ,
Verse: 450    ὄλβιος: ἦ γὰρ τόν γε πατὴρ ϕίλος ὄψεται ἐλθών,
Verse: 451    καὶ κεῖνος πατέρα προσπτύξεται, ἣ θέμις ἐστίν.
Verse: 452    ἡ δ' ἐμὴ οὐδέ περ υἷος ἐνιπλησθῆναι ἄκοιτις
Verse: 453    ὀϕθαλμοῖσιν ἔασε· πάρος δέ με πέϕνε καὶ αὐτόν.
Verse: 454    ἄλλο δέ τοι ἐρέω, σὺ δ' ἐνὶ ϕρεσὶ βάλλεο σῇσι·
Verse: 455    κρύβδην μηδ' ἀναϕανδά ϕίλην ἐς πατρίδα γαῖαν
Verse: 456    νῆα κατισχέμεναι, ἐπεὶ οὐκέτι πιστὰ γυναιξίν.
Verse: 457    ἀλλ' ἄγε μοι τόδε εἰπὲ καὶ ἀτρεκέως κατάλεξον,
Verse: 458    εἴ που ἔτι ζώοντος ἀκούετε παιδὸς ἐμοῖο,
Verse: 459    ἤ που ἐν ᾽Ορχομενῷ ἢ ἐν Πύλῳ ἠμαθόεντι
Verse: 460    ἤ που πὰρ Μενελάῳ ἐνὶ Σπάρτῃ εὐρείῃ·
Verse: 461    οὐ γάρ πω τέθνηκεν ἐπὶ χθονὶ δῖος ᾽Ορέστης.'

Verse: 462       ὣς ἔϕατ', αὐτὰρ ἐγώ μιν ἀμειβόμενος προσέειπον·

Verse: 463       '᾽Ατρεί:δη, τί με ταῦτα διείρεαι; οὐδέ τι οἶδα,
Verse: 464    ζώει ὅ γ' ἦ τέθνηκε· κακὸν δ' ἀνεμώλια βάζειν.'

Verse: 465       νῶι μὲν ὣς ἐπέεσσιν ἀμειβομένω στυγεροῖσιν
Verse: 466    ἕσταμεν ἀχνύμενοι, θαλερὸν κατὰ δάκρυ χέοντες:
Verse: 467    ἦλθε δ' ἐπὶ ψυχὴ Πηληιάδεω ᾽Αχιλῆος
Verse: 468    καὶ Πατροκλῆος καὶ ἀμύμονος ᾽Αντιλόχοιο
Verse: 469    Αἴαντός θ', ὃς ἄριστος ἔην εἶδός τε δέμας τε
Verse: 470    τῶν ἄλλων Δαναῶν μετ' ἀμύμονα Πηλείωνα.
Verse: 471    ἔγνω δὲ ψυχή με ποδώκεος Αἰακίδαο,
Verse: 472    καί ῥ' ὀλοϕυρομένη ἔπεα πτερόεντα προσηύδα·

Verse: 473       'Διογενὲς Λαερτιάδη, πολυμήχαν' ᾽Οδυσσεῦ,
Verse: 474    σχέτλιε, τίπτ' ἔτι μεῖζον ἐνὶ ϕρεσὶ μήσεαι ἔργον;
Verse: 475    πῶς ἔτλης ῎Αιδος δὲ κατελθέμεν, ἔνθα τε νεκροὶ
Verse: 476    ἀϕραδέες ναίουσι, βροτῶν εἴδωλα καμόντων;'

Verse: 477       ὣς ἔϕατ', αὐτὰρ ἐγώ μιν ἀμειβόμενος προσέειπον·

Verse: 478       'ὦ ᾽Αχιλεῦ, Πηλῆος υἱέ, μέγα ϕέρτατ' ᾽Αχαιῶν,
Verse: 479    ἦλθον Τειρεσίαο κατὰ χρέος, εἴ τινα βουλὴν
Verse: 480    εἴποι, ὅπως ᾽Ιθάκην ἐς παιπαλόεσσαν ἱκοίμην·
Verse: 481    οὐ γάρ πω σχεδὸν ἦλθον ᾽Αχαιίδος, οὐδέ πω ἁμῆς
Verse: 482    γῆς ἐπέβην, ἀλλ' αἰὲν ἔχω κακά. σεῖο δ', ᾽Αχιλλεῦ,
Verse: 483    οὔ τις ἀνὴρ προπάροιθε μακάρτερος οὔτ' ἄρ' ὀπίσσω·
Verse: 484    πρὶν μὲν γάρ σε ζωὸν ἐτίομεν ἶσα θεοῖσιν
Verse: 485    ᾽Αργεῖοι, νῦν αὖτε μέγα κρατέεις νεκύεσσιν
Verse: 486    ἐνθάδ' ἐών· τῶ μή τι θανὼν ἀκαχίζευ, ᾽Αχιλλεῦ.'

Verse: 487       ὣς ἐϕάμην, ὁ δέ μ' αὐτίκ' ἀμειβόμενος προσέειπε·

Verse: 488       'μὴ δή μοι θάνατόν γε παραύδα, ϕαίδιμ' ᾽Οδυσσεῦ.
Verse: 489    βουλοίμην κ' ἐπάρουρος ἐὼν θητευέμεν ἄλλῳ,
Verse: 490    ἀνδρὶ παρ' ἀκλήρῳ, ᾧ μὴ βίοτος πολὺς εἴη,
Verse: 491    ἢ πᾶσιν νεκύεσσι καταϕθιμένοισιν ἀνάσσειν.
Verse: 492    ἀλλ' ἄγε μοι τοῦ παιδὸς ἀγαυοῦ μῦθον ἐνίσπες,
Verse: 493    ἢ ἕπετ' ἐς πόλεμον πρόμος ἔμμεναι ἦε καὶ οὐκί.
Verse: 494    εἰπὲ δέ μοι, Πηλῆος ἀμύμονος εἴ τι πέπυσσαι,
Verse: 495    ἢ ἔτ' ἔχει τιμὴν πολέσιν μετὰ Μυρμιδόνεσσιν,
Verse: 496    ἦ μιν ἀτιμάζουσιν ἀν' ῾Ελλάδα τε Φθίην τε,
Verse: 497    οὕνεκά μιν κατὰ γῆρας ἔχει χεῖράς τε πόδας τε.
Verse: 498    οὐ γὰρ ἐγὼν ἐπαρωγὸς ὑπ' αὐγὰς ἠελίοιο,
Verse: 499    τοῖος ἐὼν οἷός ποτ' ἐνὶ Τροίῃ εὐρείῃ
Verse: 500    πέϕνον λαὸν ἄριστον, ἀμύνων ᾽Αργείοισιν,
Verse: 501    εἰ τοιόσδ' ἔλθοιμι μίνυνθά περ ἐς πατέρος δῶ,
Verse: 502    τῶ κέ τεῳ στύξαιμι μένος καὶ χεῖρας ἀάπτους,
Verse: 503    οἳ κεῖνον βιόωνται ἐέργουσίν τ' ἀπὸ τιμῆς.'

Verse: 504       ὣς ἔϕατ', αὐτὰρ ἐγώ μιν ἀμειβόμενος προσέειπον·

Verse: 505       'ἤτοι μὲν Πηλῆος ἀμύμονος οὔ τι πέπυσμαι,
Verse: 506    αὐτάρ τοι παιδός γε Νεοπτολέμοιο ϕίλοιο
Verse: 507    πᾶσαν ἀληθείην μυθήσομαι, ὥς με κελεύεις:
Verse: 508    αὐτὸς γάρ μιν ἐγὼ κοίλης ἐπὶ νηὸς ἐίσης
Verse: 509    ἤγαγον ἐκ Σκύρου μετ' ἐυκνήμιδας ᾽Αχαιούς.
Verse: 510    ἤτοι ὅτ' ἀμϕὶ πόλιν Τροίην ϕραζοίμεθα βουλάς,
Verse: 511    αἰεὶ πρῶτος ἔβαζε καὶ οὐχ ἡμάρτανε μύθων·
Verse: 512    Νέστωρ δ' ἀντίθεος καὶ ἐγὼ νικάσκομεν οἴω.
Verse: 513    αὐτὰρ ὅτ' ἀμϕὶ πόλιν Τροίην μαρναίμεθ' ᾽Αχαιοί,
Verse: 514    οὔ ποτ' ἐνὶ πληθυῖ μένεν ἀνδρῶν οὐδ' ἐν ὁμίλῳ,
Verse: 515    ἀλλὰ πολὺ προθέεσκε, τὸ ὃν μένος οὐδενὶ εἴκων·
Verse: 516    πολλοὺς δ' ἄνδρας ἔπεϕνεν ἐν αἰνῇ δηιοτῆτι.
Verse: 517    πάντας δ' οὐκ ἂν ἐγὼ μυθήσομαι οὐδ' ὀνομήνω,
Verse: 518    ὅσσον λαὸν ἔπεϕνεν ἀμύνων ᾽Αργείοισιν,
Verse: 519    ἀλλ' οἷον τὸν Τηλεϕίδην κατενήρατο χαλκῷ,
Verse: 520    ἥρω' Εὐρύπυλον· πολλοὶ δ' ἀμϕ' αὐτὸν ἑταῖροι
Verse: 521    Κήτειοι κτείνοντο γυναίων εἵνεκα δώρων.
Verse: 522    κεῖνον δὴ κάλλιστον ἴδον μετὰ Μέμνονα δῖον.
Verse: 523    αὐτὰρ ὅτ' εἰς ἵππον κατεβαίνομεν, ὃν κάμ' ᾽Επειός,
Verse: 524    ᾽Αργείων οἱ ἄριστοι, ἐμοὶ δ' ἐπὶ πάντ' ἐτέταλτο,
Verse: 525    ἠμὲν ἀνακλῖναι πυκινὸν λόχον ἠδ' ἐπιθεῖναι,
Verse: 526    ἔνθ' ἄλλοι Δαναῶν ἡγήτορες ἠδὲ μέδοντες
Verse: 527    δάκρυά τ' ὠμόργνυντο, τρέμον θ' ὑπὸ γυῖα ἑκάστου·
Verse: 528    κεῖνον δ' οὔ ποτε πάμπαν ἐγὼν ἴδον ὀϕθαλμοῖσιν
Verse: 529    οὔτ' ὠχρήσαντα χρόα κάλλιμον οὔτε παρειῶν
Verse: 530    δάκρυ' ὀμορξάμενον· ὁ δέ με μάλα πόλλ' ἱκέτευεν
Verse: 531    ἱππόθεν ἐξέμεναι, ξίϕεος δ' ἐπεμαίετο κώπην
Verse: 532    καὶ δόρυ χαλκοβαρές, κακὰ δὲ Τρώεσσι μενοίνα.
Verse: 533    ἀλλ' ὅτε δὴ Πριάμοιο πόλιν διεπέρσαμεν αἰπήν,
Verse: 534    μοῖραν καὶ γέρας ἐσθλὸν ἔχων ἐπὶ νηὸς ἔβαινεν
Verse: 535    ἀσκηθής, οὔτ' ἂρ βεβλημένος ὀξέι χαλκῷ
Verse: 536    οὔτ' αὐτοσχεδίην οὐτασμένος, οἷά τε πολλὰ
Verse: 537    γίνεται ἐν πολέμῳ· ἐπιμὶξ δέ τε μαίνεται ῎Αρης.'

Verse: 538       ὣς ἐϕάμην, ψυχὴ δὲ ποδώκεος Αἰακίδαο
Verse: 539    ϕοίτα μακρὰ βιβᾶσα κατ' ἀσϕοδελὸν λειμῶνα,
Verse: 540    γηθοσύνη ὅ οἱ υἱὸν ἔϕην ἀριδείκετον εἶναι.

Verse: 541       αἱ δ' ἄλλαι ψυχαὶ νεκύων κατατεθνηώτων
Verse: 542    ἕστασαν ἀχνύμεναι, εἴροντο δὲ κήδε' ἑκάστη.
Verse: 543    οἴη δ' Αἴαντος ψυχὴ Τελαμωνιάδαο
Verse: 544    νόσϕιν ἀϕεστήκει, κεχολωμένη εἵνεκα νίκης,
Verse: 545    τήν μιν ἐγὼ νίκησα δικαζόμενος παρὰ νηυσὶ
Verse: 546    τεύχεσιν ἀμϕ' ᾽Αχιλῆος: ἔθηκε δὲ πότνια μήτηρ,
Verse: 547    παῖδες δὲ Τρώων δίκασαν καὶ Παλλὰς ᾽Αθήνη.
Verse: 548    ὡς δὴ μὴ ὄϕελον νικᾶν τοιῷδ' ἐπ' ἀέθλῳ·
Verse: 549    τοίην γὰρ κεϕαλὴν ἕνεκ' αὐτῶν γαῖα κατέσχεν,
Verse: 550    Αἴανθ', ὃς περὶ μὲν εἶδος, περὶ δ' ἔργα τέτυκτο
Verse: 551    τῶν ἄλλων Δαναῶν μετ' ἀμύμονα Πηλείωνα.
Verse: 552    τὸν μὲν ἐγὼν ἐπέεσσι προσηύδων μειλιχίοισιν·

Verse: 553       'Αἶαν, παῖ Τελαμῶνος ἀμύμονος, οὐκ ἄρ' ἔμελλες
Verse: 554    οὐδὲ θανὼν λήσεσθαι ἐμοὶ χόλου εἵνεκα τευχέων
Verse: 555    οὐλομένων; τὰ δὲ πῆμα θεοὶ θέσαν ᾽Αργείοισι·
Verse: 556    τοῖος γάρ σϕιν πύργος ἀπώλεο· σεῖο δ' ᾽Αχαιοὶ
Verse: 557    ἶσον ᾽Αχιλλῆος κεϕαλῇ Πηληιάδαο
Verse: 558    ἀχνύμεθα ϕθιμένοιο διαμπερές. ου 'δέ τις ἄλλος
Verse: 559    αἴτιος, ἀλλὰ Ζεὺς Δαναῶν στρατὸν αἰχμητάων
Verse: 560    ἐκπάγλως ἤχθηρε, τεὶ:ν δ' ἐπὶ μοῖραν ἔθηκεν.
Verse: 561    ἀλλ' ἄγε δεῦρο, ἄναξ, ἵν' ἔπος καὶ μῦθον ἀκούσῃς
Verse: 562    ἡμέτερον· δάμασον δὲ μένος καὶ ἀγήνορα θυμόν.'

Verse: 563       ὣς ἐϕάμην, ὁ δέ μ' οὐδὲν ἀμείβετο, βῆ δὲ μετ' ἄλλας
Verse: 564    ψυχὰς εἰς ῎Ερεβος νεκύων κατατεθνηώτων.
Verse: 565    ἔνθά χ' ὁμῶς προσέϕη κεχολωμένος, ἤ κεν ἐγὼ τόν·
Verse: 566    ἀλλά μοι ἤθελε θυμὸς ἐνὶ στήθεσσι ϕίλοισι
Verse: 567    τῶν ἄλλων ψυχὰς ἰδέειν κατατεθνηώτων.

Verse: 568       ἔνθ' ἦ τοι Μίνωα ἴδον, Διὸς ἀγλαὸν υἱόν,
Verse: 569    χρύσεον σκῆπτρον ἔχοντα, θεμιστεύοντα νέκυσσιν,
Verse: 570    ἥμενον· οἱ δέ μιν ἀμϕὶ δίκας εἴροντο ἄνακτα,
Verse: 571    ἥμενοι ἑσταότες τε, κατ' εὐρυπυλὲς ῎Αιδος δῶ.

Verse: 572       τὸν δὲ μέτ' ᾽Ωρίωνα πελώριον εἰσενόησα
Verse: 573    θῆρας ὁμοῦ εἰλεῦντα κατ' ἀσϕοδελὸν λειμῶνα,
Verse: 574    τοὺς αὐτὸς κατέπεϕνεν ἐν οἰοπόλοισιν ὄρεσσι,
Verse: 575    χερσὶν ἔχων ῥόπαλον παγχάλκεον, αἰὲν ἀαγές.

Verse: 576       καὶ Τιτυὸν εἶδον, Γαίης ἐρικυδέος υἱόν,
Verse: 577    κείμενον ἐν δαπέδῳ. ὁ δ' ἐπ' ἐννέα κεῖτο πέλεθρα,
Verse: 578    γῦπε δέ μιν ἑκάτερθε παρημένω ἧπαρ ἔκειρον,
Verse: 579    δέρτρον ἔσω δύνοντες: ὁ δ' οὐκ ἀπαμύνετο χερσί·
Verse: 580    Λητὼ γὰρ ἕλκησε, Διὸς κυδρὴν παράκοιτιν,
Verse: 581    Πυθώ δ' ἐρχομένην διὰ καλλιχόρου Πανοπῆος.

Verse: 582       καὶ μὴν Τάνταλον εἰσεῖδον χαλέπ' ἄλγε' ἔχοντα,
Verse: 583    ἑστεῶτ' ἐν λίμνῃ· ἡ δὲ προσέπλαζε γενείῳ.
Verse: 584    στεῦτο δὲ διψάων, πιέειν δ' οὐκ εἶχεν ἑλέσθαι·
Verse: 585    ὁσσάκι γὰρ κύψει' ὁ γέρων πιέειν μενεαίνων,
Verse: 586    τοσσάχ' ὕδωρ ἀπολέσκετ' ἀναβροχέν, ἀμϕὶ δὲ ποσσὶ
Verse: 587    γαῖα μέλαινα ϕάνεσκε, καταζήνασκε δὲ δαίμων.
Verse: 588    δένδρεα δ' ὑψιπέτηλα κατὰ κρῆθεν χέε καρπόν,
Verse: 589    ὄγχναι καὶ ῥοιαὶ καὶ μηλέαι ἀγλαόκαρποι
Verse: 590    συκέαι τε γλυκεραὶ καὶ ἐλαῖαι τηλεθόωσαι·
Verse: 591    τῶν ὁπότ' ἰθύσει' ὁ γέρων ἐπὶ χερσὶ μάσασθαι,
Verse: 592    τὰς δ' ἄνεμος ῥίπτασκε ποτὶ νέϕεα σκιόεντα.

Verse: 593       καὶ μὴν Σίσυϕον εἰσεῖδον κρατέρ' ἄλγε' ἔχοντα,
Verse: 594    λᾶαν βαστάζοντα πελώριον ἀμϕοτέρῃσιν.
Verse: 595    ἤτοι ὁ μὲν σκηριπτόμενος χερσίν τε ποσίν τε
Verse: 596    λᾶαν ἄνω ὤθεσκε ποτὶ λόϕον· ἀλλ' ὅτε μέλλοι
Verse: 597    ἄκρον ὑπερβαλέειν, τότ' ἀποστρέψασκε κραταιίς:
Verse: 598    αὖτις ἔπειτα πέδον δὲ κυλίνδετο λᾶας ἀναιδής.
Verse: 599    αὐτὰρ ὅ γ' ἂψ ὤσασκε τιταινόμενος, κατὰ δ' ἱδρὼς
Verse: 600    ἔρρεεν ἐκ μελέων, κονίη δ' ἐκ κρατὸς ὀρώρει.

Verse: 601       τὸν δὲ μέτ' εἰσενόησα βίην ῾Ηρακληείην,
Verse: 602    εἴδωλον· αὐτὸς δὲ μετ' ἀθανάτοισι θεοῖσι
Verse: 603    τέρπεται ἐν θαλίῃς καὶ ἔχει καλλίσϕυρον ῞Ηβην,
Verse: 604    παῖδα Διὸς μεγάλοιο καὶ ῞Ηρης χρυσοπεδίλου.
Verse: 605    ἀμϕὶ δέ μιν κλαγγὴ νεκύων ἦν οἰωνῶν ὥς,
Verse: 606    πάντοσ' ἀτυζομένων· ὁ δ' ἐρεμνῇ νυκτὶ ἐοικώς,
Verse: 607    γυμνὸν τόξον ἔχων καὶ ἐπὶ νευρῆϕιν ὀιστόν,
Verse: 608    δεινὸν παπταίνων, αἰεὶ βαλέοντι ἐοικώς.
Verse: 609    σμερδαλέος δέ οἱ ἀμϕὶ περὶ στήθεσσιν ἀορτὴρ
Verse: 610    χρύσεος ἦν τελαμών, ἵνα θέσκελα ἔργα τέτυκτο,
Verse: 611    ἄρκτοι τ' ἀγρότεροί τε σύες χαροποί τε λέοντες,
Verse: 612    ὑσμῖναί τε μάχαι τε ϕόνοι τ' ἀνδροκτασίαι τε.
Verse: 613    μὴ τεχνησάμενος μηδ' ἄλλο τι τεχνήσαιτο,
Verse: 614    ὃς κεῖνον τελαμῶνα ἑῇ ἐγκάτθετο τέχνῃ.
Verse: 615    ἔγνω δ' αἶψ' ἐμὲ κεῖνος, ἐπεὶ ἴδεν ὀϕθαλμοῖσι,
Verse: 616    καί μ' ὀλοϕυρόμενος ἔπεα πτερόεντα προσηύδα·

Verse: 617       'Διογενὲς Λαερτιάδη, πολυμήχαν' ᾽Οδυσσεῦ,
Verse: 618    ἆ δείλ', ἦ τινὰ καὶ σὺ κακὸν μόρον ἡγηλάζεις,
Verse: 619    ὅν περ ἐγὼν ὀχέεσκον ὑπ' αὐγὰς ἠελίοιο.
Verse: 620    Ζηνὸς μὲν πάις ἦα Κρονίονος, αὐτὰρ ὀιζὺν
Verse: 621    εἶχον ἀπειρεσίην· μάλα γὰρ πολὺ χείρονι ϕωτὶ
Verse: 622    δεδμήμην, ὁ δέ μοι χαλεποὺς ἐπετέλλετ' ἀέθλους.
Verse: 623    καί ποτέ μ' ἐνθάδ' ἔπεμψε κύν' ἄξοντ'· οὐ γὰρ ἔτ' ἄλλον
Verse: 624    ϕράζετο τοῦδέ τίv μοι κρατερώτερον εἶναι ἄεθλον.
Verse: 625    τὸν μὲν ἐγὼν ἀνένεικα καὶ ἤγαγον ἐξ ᾽Αίδαο·
Verse: 626    ῾Ερμείας δέ μ' ἔπεμπεν ἰδὲ γλαυκῶπις ᾽Αθήνη.'

Verse: 627       ὣς εἰπὼν ὁ μὲν αὖτις ἔβη δόμον ῎Αιδος εἴσω,
Verse: 628    αὐτὰρ ἐγὼν αὐτοῦ μένον ἔμπεδον, εἴ τις ἔτ' ἔλθοι
Verse: 629    ἀνδρῶν ἡρώων, οἳ δὴ τὸ πρόσθεν ὄλοντο.
Verse: 630    καί νύ κ' ἔτι προτέρους ἴδον ἀνέρας, ουἠς ἔθελόν περ,
Verse: 631    Θησέα Πειρίθοόν τε, θεῶν ἐρικυδέα τέκνα·
Verse: 632    ἀλλὰ πρὶν ἐπὶ ἔθνε' ἀγείρετο μυρία νεκρῶν
Verse: 633    ἠχῇ θεσπεσίῃ· ἐμὲ δὲ χλωρὸν δέος ᾕρει,
Verse: 634    μή μοι Γοργείην κεϕαλὴν δεινοῖο πελώρου
Verse: 635    ἐξ ᾽Αίδεω πέμψειεν ἀγαυὴ Περσεϕόνεια.
Verse: 636    αὐτίκ' ἔπειτ' ἐπὶ νῆα κιὼν ἐκέλευον ἑταίρους
Verse: 637    αὐτούς τ' ἀμβαίνειν ἀνά τε πρυμνήσια λῦσαι·
Verse: 638    οἱ δ' αἶψ' εἴσβαινον καὶ ἐπὶ κληῖσι καθῖζον.
Verse: 639    τὴν δὲ κατ' ᾽Ωκεανὸν ποταμὸν ϕέρε κῦμα ῥόοιο,
Verse: 640    πρῶτα μὲν εἰρεσίῃ, μετέπειτα δὲ κάλλιμος οὖρος.



Next part


This text is part of the TITUS edition of Homer, Odyssee.

Copyright TITUS Project, Frankfurt a/M, 30.11.2024. No parts of this document may be republished in any form without prior permission by the copyright holder.