TITUS
Homer, Odyssee
Part No. 12
Previous part

Chapter: 12    
ΟΔΥΣΣΕΙΑΣ Μ


Verse: 1       Αὐτὰρ ἐπεὶ ποταμοῖο λίπεν ῥόον ᾽Ωκεανοῖο
Verse: 2    νηῦς, ἀπὸ δ' ἵκετο κῦμα θαλάσσης εὐρυπόροιο
Verse: 3    νῆσόν τ' Αἰαίην, ὅθι τ' ᾽Ηοῦς ἠριγενείης
Verse: 4    οἰκία καὶ χοροί εἰσι καὶ ἀντολαὶ ᾽Ηελίοιο,
Verse: 5    νῆα μὲν ἔνθ' ἐλθόντες ἐκέλσαμεν ἐν ψαμάθοισιν,
Verse: 6    ἐκ δὲ καὶ αὐτοὶ βῆμεν ἐπὶ ῥηγμῖνι θαλάσσης:
Verse: 7    ἔνθα δ' ἀποβρίξαντες ἐμείναμεν ᾽Ηῶ δῖαν.

Verse: 8       ἦμος δ' ἠριγένεια ϕάνη ῥοδοδάκτυλος ᾽Ηώς,
Verse: 9    δὴ τότ' ἐγὼν ἑτάρους προί:ειν ἐς δώματα Κίρκης
Verse: 10    οἰσέμεναι νεκρὸν ᾽Ελπήνορα τεθνηῶτα.
Verse: 11    ϕιτροὺς δ' αἶψα ταμόντες, ὅθ' ἀκροτάτη πρόεχ' ἀκτή,
Verse: 12    θάπτομεν ἀχνύμενοι, θαλερὸν κατὰ δάκρυ χέοντες.
Verse: 13    αὐτὰρ ἐπεὶ νεκρός τε κάη καὶ τεύχεα νεκροῦ,
Verse: 14    τύμβον χεύαντες καὶ ἐπὶ στήλην ἐρύσαντες
Verse: 15    πήξαμεν ἀκροτάτῳ τύμβῳ εὐῆρες ἐρετμόν.

Verse: 16       ἡμεῖς μὲν τὰ ἕκαστα διείπομεν· οὐδ' ἄρα Κίρκην
Verse: 17    ἐξ ᾽Αίδεω ἐλθόντες ἐλήθομεν, ἀλλὰ μάλ' ὦκα
Verse: 18    ἦλθ' ἐντυναμένη· ἅμα δ' ἀμϕίπολοι ϕέρον αὐτῇ
Verse: 19    σῖτον καὶ κρέα πολλὰ καὶ αἴθοπα οἶνον ἐρυθρόν.
Verse: 20    ἡ δ' ἐν μέσσῳ στᾶσα μετηύδα δῖα θεάων·

Verse: 21       'σχέτλιοι, οἳ ζώοντες ὑπήλθετε δῶμ' ᾽Αίδαο,
Verse: 22    δισθανέες, ὅτε τ' ἄλλοι ἅπαξ θνῄσκουσ' ἄνθρωποι.
Verse: 23    ἀλλ' ἄγετ' ἐσθίετε βρώμην καὶ πίνετε οἶνον
Verse: 24    αὖθι πανημέριοι· ἅμα δ' ἠοῖ ϕαινομένηϕι
Verse: 25    πλεύσεσθ'· αὐτὰρ ἐγὼ δείξω ὁδὸν ἠδὲ ἕκαστα
Verse: 26    σημανέω, ἵνα μή τι κακορραϕίῃ ἀλεγεινῇ
Verse: 27    ἢ ἁλὸς ἢ ἐπὶ γῆς ἀλγήσετε πῆμα παθόντες.'

Verse: 28       ὣς ἔϕαθ', ἡμῖν δ' αὖτ' ἐπεπείθετο θυμὸς ἀγήνωρ.
Verse: 29    ὣς τότε μὲν πρόπαν ἦμαρ ἐς ἠέλιον καταδύντα
Verse: 30    ἥμεθα δαινύμενοι κρέα τ' ἄσπετα καὶ μέθυ ἡδύ·
Verse: 31    ἦμος δ' ἠέλιος κατέδυ καὶ ἐπὶ κνέϕας ἦλθεν,
Verse: 32    οἱ μὲν κοιμήσαντο παρὰ πρυμνήσια νηός,
Verse: 33    ἡ δ' ἐμὲ χειρὸς ἑλοῦσα ϕίλων ἀπὸ νόσϕιν ἑταίρων
Verse: 34    εἷσέ τε καὶ προσέλεκτο καὶ ἐξερέεινεν ἕκαστα·
Verse: 35    αὐτὰρ ἐγὼ τῇ πάντα κατὰ μοῖραν κατέλεξα.
Verse: 36    καὶ τότε δή μ' ἐπέεσσι προσηύδα πότνια Κίρκη·

Verse: 37       'ταῦτα μὲν οὕτω πάντα πεπείρανται· σὺ δ' ἄκουσον,
Verse: 38    ὥς τοι ἐγὼν ἐρέω· μνήσει δέ σε καὶ θεὸς αὐτός.
Verse: 39    Σειρῆνας μὲν πρῶτον ἀϕίξεαι, αἵ ῥά τε πάντας
Verse: 40    ἀνθρώπους θέλγουσιν, ὅτίς σϕεας εἰσαϕίκηται.
Verse: 41    ὅς τις ἀιδρείῃ πελάσῃ καὶ ϕθόγγον ἀκούσῃ
Verse: 42    Σειρήνων, τῷ δ' οὔ τι γυνὴ καὶ νήπια τέκνα
Verse: 43    οἴκαδε νοστήσαντι παρίσταται οὐδὲ γάνυνται·
Verse: 44    ἀλλά τε Σειρῆνες λιγυρῇ θέλγουσιν ἀοιδῇ,
Verse: 45    ἥμεναι ἐν λειμῶνι· πολὺς δ' ἀμϕ' ὀστεόϕιν θὶς
Verse: 46    ἀνδρῶν πυθομένων, περὶ δὲ ῥινοὶ μινύθουσιν.
Verse: 47    ἀλλὰ παρ' ἐξ ἐλάαν, ἐπὶ δ' οὔατ' ἀλεῖψαι ἑταίρων
Verse: 48    κηρὸν δεψήσας μελιηδέα, μή τις ἀκούσῃ
Verse: 49    τῶν ἄλλων· ἀτὰρ αὐτὸς ἀκουέμεν αἴ κ' ἐθέλῃσθα,
Verse: 50    δησάντων σ' ἐν νηὶ θοῇ χεῖράς τε πόδας τε
Verse: 51    ὀρθὸν ἐν ἱστοπέδῃ, ἐκ δ' αὐτοῦ πείρατ' ἀνήϕθω,
Verse: 52    ὄϕρα κε τερπόμενος ὄπ' ἀκούῃς Σειρήνοιιν.
Verse: 53    εἰ δέ κε λίσσηαι ἑτάρους λῦσαί τε κελεύῃς,
Verse: 54    οἱ δέ σ' ἐνὶ πλεόνεσσι τότε δεσμοῖσι διδέντων.
Verse: 55    αὐτὰρ ἐπὴν δὴ τάς γε παρ' ἐξ ἐλάσωσιν ἑταῖροι,
Verse: 56    ἔνθα τοι οὐκέτ' ἔπειτα διηνεκέως ἀγορεύσω,
Verse: 57    ὁπποτέρη δή τοι ὁδὸς ἔσσεται, ἀλλὰ καὶ αὐτὸς
Verse: 58    θυμῷ βουλεύειν· ἐρέω δέ τοι ἀμϕοτέρωθεν.
Verse: 59    ἔνθεν μὲν γὰρ πέτραι ἐπηρεϕέες, προτὶ δ' αὐτὰς
Verse: 60    κῦμα μέγα ῥοχθεῖ κυανώπιδος ᾽Αμϕιτρίτης:
Verse: 61    Πλαγκτὰς δή τοι τάς γε θεοὶ μάκαρες καλέουσι.
Verse: 62    τῇ μέν τ' οὐδὲ ποτητὰ παρέρχεται, οὐδὲ πέλειαι
Verse: 63    τρήρωνες, ταί τ' ἀμβροσίην Διὶ πατρὶ ϕέρουσιν,
Verse: 64    ἀλλά τε καὶ τῶν αἰὲν ἀϕαιρεῖται λὶς πέτρη·
Verse: 65    ἀλλ' ἄλλην ἐνίησι πατὴρ ἐναρίθμιον εἶναι.
Verse: 66    τῇ δ' οὔ πώ τις νηῦς ϕύγεν ἀνδρῶν, ἥ τις ἵκηται,
Verse: 67    ἀλλά θ' ὁμοῦ πίνακάς τε νεῶν καὶ σώματα ϕωτῶν
Verse: 68    κύμαθ' ἁλὸς ϕορέουσι πυρός τ' ὀλοοῖο θύελλαι.
Verse: 69    οἴη δὴ κείνῃ γε παρέπλω ποντοπόρος νηῦς
Verse: 70    ᾽Αργὼ πασιμέλουσα, παρ' Αἰήταο πλέουσα·
Verse: 71    καί νύ κε τὴν ἔνθ' ὦκα βάλεν μεγάλας ποτὶ πέτρας,
Verse: 72    ἀλλ' ῞Ηρη παρέπεμψεν, ἐπεὶ ϕίλος ἦεν ᾽Ιήσων.
Verse: 73    οἱ δὲ δύω σκόπελοι ὁ μὲν οὐρανὸν εὐρὺν ἱκάνει
Verse: 74    ὀξείῃ κορυϕῇ, νεϕέλη δέ μιν ἀμϕιβέβηκε
Verse: 75    κυανέη· τὸ μὲν οὔ ποτ' ἐρωεῖ, οὐδέ ποτ' αἴθρη
Verse: 76    κείνου ἔχει κορυϕὴν οὔτ' ἐν θέρει οὔτ' ἐν ὀπώρῃ·
Verse: 77    οὐ δέ κεν ἀμβαίη βροτὸς ἀνὴρ οὐδ' ἐπιβαίη,
Verse: 78    οὐδ' εἴ οἱ χεῖρές τε ἐείκοσι καὶ πόδες εἶεν·
Verse: 79    πέτρη γὰρ λίς ἐστι, περιξέστῃ ἐικυῖα.
Verse: 80    μέσσῳ δ' ἐν σκοπέλῳ ἐστὶ σπέος ἠεροειδές,
Verse: 81    πρὸς ζόϕον εἰς ῎Ερεβος τετραμμένον, ᾗ περ ἂν ὑμεῖς
Verse: 82    νῆα παρὰ γλαϕυρὴν ἰθύνετε, ϕαίδιμ' ᾽Οδυσσεῦ.
Verse: 83    οὐ δέ κεν ἐκ νηὸς γλαϕυρῆς αἰζήιος ἀνὴρ
Verse: 84    τόξῳ ὀιστεύσας κοῖλον σπέος εἰσαϕίκοιτο.
Verse: 85    ἔνθα δ' ἐνὶ Σκύλλη ναίει δεινὸν λελακυῖα·
Verse: 86    τῆς ἤτοι ϕωνὴ μὲν ὅση σκύλακος νεογιλῆς
Verse: 87    γίνεται, αὐτὴ δ' αὖτε πέλωρ κακόν· οὐδέ κέ τίς μιν
Verse: 88    γηθήσειεν ἰδών, οὐδ' εἰ θεὸς ἀντιάσειε.
Verse: 89    τῆς ἤτοι πόδες εἰσὶ δυώδεκα πάντες ἄωροι,
Verse: 90    ἓξ δέ τέ οἱ δειραὶ περιμήκεες, ἐν δὲ ἑκάστῃ
Verse: 91    σμερδαλέη κεϕαλή, ἐν δὲ τρίστοιχοι ὀδόντες,
Verse: 92    πυκνοὶ καὶ θαμέες, πλεῖοι μέλανος θανάτοιο.
Verse: 93    μέσση μέν τε κατὰ σπείους κοίλοιο δέδυκεν,
Verse: 94    ἔξω δ' ἐξίσχει κεϕαλὰς δεινοῖο βερέθρου·
Verse: 95    αὐτοῦ δ' ἰχθυάᾳ, σκόπελον περιμαιμώωσα,
Verse: 96    δελϕῖνάς τε κύνας τε, καὶ εἴ ποθι μεῖζον ἕλῃσι
Verse: 97    κῆτος, ἃ μυρία βόσκει ἀγάστονος ᾽Αμϕιτρίτη.
Verse: 98    τῇ δ' οὔ πώ ποτε ναῦται ἀκήριοι εὐχετόωνται
Verse: 99    παρϕυγέειν σὺν νηί· ϕέρει δέ τε κρατὶ ἑκάστῳ
Verse: 100    ϕῶτ' ἐξαρπάξασα νεὸς κυανοπρῴροιο.
Verse: 101    τὸν δ' ἕτερον σκόπελον χθαμαλώτερον ὄψει, ᾽Οδυσσεῦ,
Verse: 102    πλησίον ἀλλήλων· καί κεν διοιὴστεύσειας.
Verse: 103    τῷ δ' ἐν ἐρινεός ἐστι μέγας, ϕύλλοισι τεθηλώς:
Verse: 104    τῷ δ' ὑπὸ δῖα Χάρυβδις ἀναρροιβδεῖ μέλαν ὕδωρ.
Verse: 105    τρὶς μὲν γάρ τ' ἀνίησιν ἐπ' ἤματι, τρὶς δ' ἀναροιβδεῖ
Verse: 106    δεινόν· μὴ σύγε κεῖθι τύχοις ὅτε ῥοιβδήσειεν·
Verse: 107    οὐ γάρ κεν ῥύσαιτό σ' ὑπ' ἐκ κακοῦ οὐδ' ἐνοσίχθων.
Verse: 108    ἀλλὰ μάλα Σκύλλης σκοπέλῳ πεπλημένος ὦκα
Verse: 109    νῆα παρ' ἐξ ἐλάαν, ἐπεὶ ἦ πολὺ ϕέρτερόν ἐστιν
Verse: 110    ἓξ ἑτάρους ἐν νηὶ ποθήμεναι ἢ ἅμα πάντας.'

Verse: 111       ὣς ἔϕατ', αὐτὰρ ἐγώ μιν ἀτυζόμενος προσέειπον·

Verse: 112       'εἰ δ' ἄγε δή μοι τοῦτο, θεά, νημερτὲς ἐνίσπες,
Verse: 113    εἴ πως τὴν ὀλοὴν μὲν ὑπεκπροϕύγοιμι Χάρυβδιν,
Verse: 114    τὴν δέ κ' ἀμυναίμην, ὅτε μοι σίνοιτό γ' ἑταίρους.'

Verse: 115       ὣς ἐϕάμην, ἡ δ' αὐτίκ' ἀμείβετο δῖα θεάων·

Verse: 116       'σχέτλιε, καὶ δ' αὖ τοι πολεμήια ἔργα μέμηλε
Verse: 117    καὶ πόνος, οὐδὲ θεοῖσιν ὑπείξεαι ἀθανάτοισιν;
Verse: 118    ἡ δέ τοι οὐ θνητή, ἀλλ' ἀθάνατον κακόν ἐστι,
Verse: 119    δεινόν τ' ἀργαλέον τε καὶ ἄγριον οὐδὲ μαχητόν·
Verse: 120    οὐδέ τίς ἔστ' ἀλκή· ϕυγέειν κάρτιστον ἀπ' αὐτῆς.
Verse: 121    ἢν γὰρ δηθύνῃσθα κορυσσόμενος παρὰ πέτρῃ,
Verse: 122    δείδω μή σ' ἐξαῦτις ἐϕορμηθεῖσα κίχῃσι
Verse: 123    τόσσῃσιν κεϕαλῇσι, τόσους δ' ἐκ ϕῶτας ἕληται.
Verse: 124    ἀλλὰ μάλα σϕοδρῶς ἐλάαν, βωστρεῖν δὲ Κράταιιν,
Verse: 125    μητέρα τῆς Σκύλλης, ἥ μιν τέκε πῆμα βροτοῖσιν·
Verse: 126    ἥ μιν ἔπειτ' ἀποπαύσει ἐς ὕστερον ὁρμηθῆναι.
Verse: 127    Θρινακίην δ' ἐς νῆσον ἀϕίξεαι· ἔνθα δὲ πολλαὶ
Verse: 128    βόσκοντ' ᾽Ηελίοιο βόες καὶ ἴϕια μῆλα,
Verse: 129    ἑπτὰ βοῶν ἀγέλαι, τόσα δ' οἰῶν πώεα καλά,
Verse: 130    πεντήκοντα δ' ἕκαστα. γόνος δ' οὐ γίνεται αὐτῶν,
Verse: 131    οὐδέ ποτε ϕθινύθουσι. θεαὶ δ' ἐπιποιμένες εἰσί,
Verse: 132    Νύμϕαι ἐυπλόκαμοι, Φαέθουσά τε Λαμπετίη τε,
Verse: 133    ἃς τέκεν ᾽Ηελίῳ ῾Υπερίονι δῖα Νέαιρα.
Verse: 134    τὰς μὲν ἄρα θρέψασα τεκοῦσά τε πότνια μήτηρ
Verse: 135    Θρινακίην ἐς νῆσον ἀπῴκισε τηλόθι ναίειν,
Verse: 136    μῆλα ϕυλασσέμεναι πατρώια καὶ ἕλικας βοῦς.
Verse: 137    τὰς εἰ μέν κ' ἀσινέας ἐάᾳς νόστου τε μέδηαι,
Verse: 138    ἦ τ' ἂν ἔτ' εἰς ᾽Ιθάκην κακά περ πάσχοντες ἵκοισθε·
Verse: 139    εἰ δέ κε σίνηαι, τότε τοι τεκμαίρομ' ὄλεθρον
Verse: 140    νηί τε καὶ ἑτάροις: αὐτὸς δ' εἴ πέρ κεν ἀλύξῃς,
Verse: 141    ὀψὲ κακῶς νεῖαι, ὀλέσας ἄπο πάντας ἑταίρους.'

Verse: 142       ὣς ἔϕατ', αὐτίκα δὲ χρυσόθρονος ἤλυθεν ᾽Ηώς.
Verse: 143    ἡ μὲν ἔπειτ' ἀνὰ νῆσον ἀπέστιχε δῖα θεάων·
Verse: 144    αὐτὰρ ἐγὼν ἐπὶ νῆα κιὼν ὤτρυνον ἑταίρους
Verse: 145    αὐτούς τ' ἀμβαίνειν ἀνά τε πρυμνήσια λῦσαι.
Verse: 146    οἱ δ' αἶψ' εἴσβαινον καὶ ἐπὶ κληῖσι καθῖζον.
Verse: 148    ἡμῖν δ' αὖ κατόπισθε νεὸς κυανοπρῴροιο
Verse: 149    ἴκμενον οὖρον ἵει πλησίστιον, ἐσθλὸν ἑταῖρον,
Verse: 150    Κίρκη ἐυπλόκαμος, δεινὴ θεὸς αὐδήεσσα.
Verse: 151    αὐτίκα δ' ὅπλα ἕκαστα πονησάμενοι κατὰ νῆα
Verse: 152    ἥμεθα· τὴν δ' ἄνεμός τε κυβερνήτης τ' ἴθυνε.
Verse: 153    δὴ τότ' ἐγὼν ἑτάροισι μετηύδων ἀχνύμενος κῆρ·

Verse: 154       'ὦ ϕίλοι, οὐ γὰρ χρὴ ἕνα ἴδμεναι οὐδὲ δύ' οἴους
Verse: 155    θέσϕαθ' ἅ μοι Κίρκη μυθήσατο, δῖα θεάων·
Verse: 156    ἀλλ' ἐρέω μὲν ἐγών, ἵνα εἰδότες ἠὲ θάνωμεν
Verse: 157    ἤ κεν ἀλευάμενοι θάνατον καὶ κῆρα ϕύγοιμεν.
Verse: 158    Σειρήνων μὲν πρῶτον ἀνώγει θεσπεσιάων
Verse: 159    ϕθόγγον ἀλεύασθαι καὶ λειμῶν' ἀνθεμόεντα.
Verse: 160    οἶον ἔμ' ἠνώγει ὄπ' ἀκουέμεν· ἀλλά με δεσμῷ
Verse: 161    δήσατ' ἐν ἀργαλέῳ, ὄϕρ' ἔμπεδον αὐτόθι μίμνω,
Verse: 162    ὀρθὸν ἐν ἱστοπέδῃ, ἐκ δ' αὐτοῦ πείρατ' ἀνήϕθω.
Verse: 163    εἰ δέ κε λίσσωμαι ὑμέας λῦσαί τε κελεύω,
Verse: 164    ὑμεῖς δὲ πλεόνεσσι τότε δεσμοῖσι πιέζειν.'

Verse: 165       ἤτοι ἐγὼ τὰ ἕκαστα λέγων ἑτάροισι πίϕαυσκον·
Verse: 166    τόϕρα δὲ καρπαλίμως ἐξίκετο νηῦς ἐυεργὴς
Verse: 167    νῆσον Σειρήνοιιν· ἔπειγε γὰρ οὖρος ἀπήμων.
Verse: 168    αὐτίκ' ἔπειτ' ἄνεμος μὲν ἐπαύσατο, ἡ δὲ γαλήνη
Verse: 169    ἔπλετο νηνεμίη, κοίμησε δὲ κύματα δαίμων.
Verse: 170    ἀνστάντες δ' ἕταροι νεὸς ἱστία μηρύσαντο,
Verse: 171    καὶ τὰ μὲν ἐν νηὶ γλαϕυρῇ βάλον, οἱ δ' ἐπ' ἐρετμὰ
Verse: 172    ἑζόμενοι λεύκαινον ὕδωρ ξεστῇσ' ἐλάτῃσιν.
Verse: 173    αὐτὰρ ἐγὼ κηροῖο μέγαν τροχὸν ὀξέι χαλκῷ
Verse: 174    τυτθὰ διατμήξας χερσὶ στιβαρῇσι πίεζον.
Verse: 175    αἶψα δ' ἰαίνετο κηρός, ἐπεὶ κέλετο μεγάλη ἲς
Verse: 176    ᾽Ηελίου τ' αὐγὴ ῾Υπεριονίδαο ἄνακτος:
Verse: 177    ἑξείης δ' ἑτάροισιν ἐπ' οὔατα πᾶσιν ἄλειψα.
Verse: 178    οἱ δ' ἐν νηί μ' ἔδησαν ὁμοῦ χεῖράς τε πόδας τε
Verse: 179    ὀρθὸν ἐν ἱστοπέδῃ, ἐκ δ' αὐτοῦ πείρατ' ἀνῆπτον·
Verse: 180    αὐτοὶ δ' ἑζόμενοι πολιὴν ἅλα τύπτον ἐρετμοῖς.
Verse: 181    ἀλλ' ὅτε τόσσον ἀπῆν, ὅσσον τε γέγωνε βοήσας,
Verse: 182    ῥίμϕα διώκοντες, τὰς δ' οὐ λάθεν ὠκύαλος νηῦς
Verse: 183    ἐγγύθεν ὀρνυμένη, λιγυρὴν δ' ἔντυνον ἀοιδήν·

Verse: 184       'δεῦρ' ἄγ' ἰών, πολύαιν' ᾽Οδυσεῦ, μέγα κῦδος ᾽Αχαιῶν,
Verse: 185    νῆα κατάστησον, ἵνα νωιτέρην ὄπ' ἀκούσῃς.
Verse: 186    οὐ γάρ πώ τις τῇδε παρήλασε νηὶ μελαίνῃ,
Verse: 187    πρίν γ' ἡμέων μελίγηρυν ἀπὸ στομάτων ὄπ' ἀκοῦσαι,
Verse: 188    ἀλλ' ὅ γε τερψάμενος νεῖται καὶ πλείονα εἰδώς:
Verse: 189    ἴδμεν γάρ τοι πάνθ' ὅσ' ἐνὶ Τροίῃ εὐρείῃ
Verse: 190    ᾽Αργεῖοι Τρῶές τε θεῶν ἰότητι μόγησαν,
Verse: 191    ἴδμεν δ' ὅσσα γένηται ἐπὶ χθονὶ πουλυβοτείρῃ.'

Verse: 192       ὣς ϕάσαν ἱεῖσαι ὄπα κάλλιμον· αὐτὰρ ἐμὸν κῆρ
Verse: 193    ἤθελ' ἀκουέμεναι, λῦσαί τ' ἐκέλευον ἑταίρους
Verse: 194    ὀϕρύσι νευστάζων· οἱ δὲ προπεσόντες ἔρεσσον.
Verse: 195    αὐτίκα δ' ἀνστάντες Περιμήδης Εὐρύλοχός τε
Verse: 196    πλείοσί μ' ἐν δεσμοῖσι δέον μᾶλλόν τε πίεζον.
Verse: 197    αὐτὰρ ἐπεὶ δὴ τάς γε παρήλασαν, οὐδ' ἔτ' ἔπειτα
Verse: 198    ϕθόγγον Σειρήνων ἠκούομεν οὐδέ τ' ἀοιδήν,
Verse: 199    αἶψ' ἀπὸ κηρὸν ἕλοντο ἐμοὶ ἐρίηρες ἑταῖροι,
Verse: 200    ὅν σϕιν ἐπ' ὠσὶν ἄλειψ', ἐμέ τ' ἐκ δεσμῶν ἀνέλυσαν.

Verse: 201       ἀλλ' ὅτε δὴ τὴν νῆσον ἐλείπομεν, αὐτίκ' ἔπειτα
Verse: 202    καπνὸν καὶ μέγα κῦμα ἴδον καὶ δοῦπον ἄκουσα.
Verse: 203    τῶν δ' ἄρα δεισάντων ἐκ χειρῶν ἔπτατ' ἐρετμά,
Verse: 204    βόμβησαν δ' ἄρα πάντα κατὰ ῥόον· ἔσχετο δ' αὐτοῦ
Verse: 205    νηῦς, ἐπεὶ οὐκέτ' ἐρετμὰ προήκεα χερσὶν ἔπειγον.
Verse: 206    αὐτὰρ ἐγὼ διὰ νηὸς ἰὼν ὤτρυνον ἑταίρους
Verse: 207    μειλιχίοις ἐπέεσσι παρασταδὸν ἄνδρα ἕκαστον·

Verse: 208       'ὦ ϕίλοι, οὐ γάρ πώ τι κακῶν ἀδαήμονές εἰμεν·
Verse: 209    οὐ μὲν δὴ τόδε μεῖζον ἔπι κακόν ἢ ὅτε Κύκλωψ
Verse: 210    εἴλει ἐνὶ σπῆι γλαϕυρῷ κρατερῆϕι βίηϕιν·
Verse: 211    ἀλλὰ καὶ ἔνθεν ἐμῇ ἀρετῇ βουλῇ τε νόῳ τε
Verse: 212    ἐκϕύγομεν, καί που τῶνδε μνήσεσθαι ὀίω.
Verse: 213    νῦν δ' ἄγεθ', ὡς ἂν ἐγὼν εἴπω, πειθώμεθα πάντες.
Verse: 214    ὑμεῖς μὲν κώπῃσιν ἁλὸς ῥηγμῖνα βαθεῖαν
Verse: 215    τύπτετε κληίδεσσιν ἐϕήμενοι, αἴ κέ ποθι Ζεὺς
Verse: 216    δώῃ τόνδε γ' ὄλεθρον ὑπεκϕυγέειν καὶ ἀλύξαι·
Verse: 217    σοὶ δέ, κυβερνῆθ', ὧδ' ἐπιτέλλομαι· ἀλλ' ἐνὶ θυμῷ
Verse: 218    βάλλευ, ἐπεὶ νηὸς γλαϕυρῆς οἰήια νωμᾷς:
Verse: 219    τούτου μὲν καπνοῦ καὶ κύματος ἐκτὸς ἔεργε
Verse: 220    νῆα, σὺ δὲ σκοπέλου ἐπιμαίεο, μή σε λάθῃσι
Verse: 221    κεῖσ' ἐξορμήσασα καὶ ἐς κακὸν ἄμμε βάλῃσθα.'

Verse: 222       ὣς ἐϕάμην, οἱ δ' ὦκα ἐμοῖς ἐπέεσσι πίθοντο.
Verse: 223    Σκύλλην δ' οὐκέτ' ἐμυθεόμην, ἄπρηκτον ἀνίην,
Verse: 224    μή πώς μοι δείσαντες ἀπολήξειαν ἑταῖροι
Verse: 225    εἰρεσίης, ἐντὸς δὲ πυκάζοιεν σϕέας αὐτούς.
Verse: 226    καὶ τότε δὴ Κίρκης μὲν ἐϕημοσύνης ἀλεγεινῆς
Verse: 227    λανθανόμην, ἐπεὶ οὔ τί μ' ἀνώγει θωρήσσεσθαι·
Verse: 228    αὐτὰρ ἐγὼ καταδὺς κλυτὰ τεύχεα καὶ δύο δοῦρε
Verse: 229    μάκρ' ἐν χερσὶν ἑλὼν εἰς ἴκρια νηὸς ἔβαινον
Verse: 230    πρῴρης: ἔνθεν γάρ μιν ἐδέγμην πρῶτα ϕανεῖσθαι
Verse: 231    Σκύλλην πετραίην, ἥ μοι ϕέρε πῆμ' ἑτάροισιν.
Verse: 232    οὐ δέ πῃ ἀθρῆσαι δυνάμην· ἔκαμον δέ μοι ὄσσε
Verse: 233    πάντῃ παπταίνοντι πρὸς ἠεροειδέα πέτρην.

Verse: 234       ἡμεῖς μὲν στεινωπὸν ἀνεπλέομεν γοόωντες:
Verse: 235    ἔνθεν γὰρ Σκύλλη, ἑτέρωθι δὲ δῖα Χάρυβδις
Verse: 236    δεινὸν ἀνερροίβδησε θαλάσσης ἁλμυρὸν ὕδωρ.
Verse: 237    ἤτοι ὅτ' ἐξεμέσειε, λέβης ὣς ἐν πυρὶ πολλῷ
Verse: 238    πᾶσ' ἀναμορμύρεσκε κυκωμένη· ὑψόσε δ' ἄχνη
Verse: 239    ἄκροισι σκοπέλοισιν ἐπ' ἀμϕοτέροισιν ἔπιπτεν.
Verse: 240    ἀλλ' ὅτ' ἀναβρόξειε θαλάσσης ἁλμυρὸν ὕδωρ,
Verse: 241    πᾶσ' ἔντοσθε ϕάνεσκε κυκωμένη, ἀμϕὶ δὲ πέτρη
Verse: 242    δεινὸν βεβρύχει, ὑπένερθε δὲ γαῖα ϕάνεσκε
Verse: 243    ψάμμῳ κυανέη· τοὺς δὲ χλωρὸν δέος ᾕρει.
Verse: 244    ἡμεῖς μὲν πρὸς τὴν ἴδομεν δείσαντες ὄλεθρον·
Verse: 245    τόϕρα δέ μοι Σκύλλη κοίλης ἐκ νηὸς ἑταίρους
Verse: 246    ἓξ ἕλεθ', οἳ χερσίν τε βίηϕί τε ϕέρτατοι ἦσαν.
Verse: 247    σκεψάμενος δ' ἐς νῆα θοὴν ἅμα καὶ μεθ' ἑταίρους
Verse: 248    ἤδη τῶν ἐνόησα πόδας καὶ χεῖρας ὕπερθεν
Verse: 249    ὑψόσ' ἀειρομένων· ἐμὲ δὲ ϕθέγγοντο καλεῦντες
Verse: 250    ἐξονομακλήδην, τότε γ' ὕστατον, ἀχνύμενοι κῆρ.
Verse: 251    ὡς δ' ὅτ' ἐπὶ προβόλῳ ἁλιεὺς περιμήκειὴ ῥάβδῳ
Verse: 252    ἰχθύσι τοῖς ὀλίγοισι δόλον κατὰ εἴδατα βάλλων
Verse: 253    ἐς πόντον προί:ησι βοὸς κέρας ἀγραύλοιο,
Verse: 254    ἀσπαίροντα δ' ἔπειτα λαβὼν ἔρριψε θύραζε,
Verse: 255    ὣς οἵ γ' ἀσπαίροντες ἀείροντο προτὶ πέτρας:
Verse: 256    αὐτοῦ δ' εἰνὶ θύρῃσι κατήσθιε κεκληγῶτας,
Verse: 257    χεῖρας ἐμοὶ ὀρέγοντας ἐν αἰνῇ δηιοτῆτι.
Verse: 258    οἴκτιστον δὴ κεῖνο ἐμοῖς ἴδον ὀϕθαλμοῖσι
Verse: 259    πάντων ὅσσ' ἐμόγησα πόρους ἁλὸς ἐξερεείνων.

Verse: 260       αὐτὰρ ἐπεὶ πέτρας ϕύγομεν δεινήν τε Χάρυβδιν
Verse: 261    Σκύλλην τ', αὐτίκ' ἔπειτα θεοῦ ἐς ἀμύμονα νῆσον
Verse: 262    ἱκόμεθ'· ἔνθα δ' ἔσαν καλαὶ βόες εὐρυμέτωποι,
Verse: 263    πολλὰ δὲ ἴϕια μῆλ' ῾Υπερίονος ᾽Ηελίοιο.
Verse: 264    δὴ τότ' ἐγὼν ἔτι πόντῳ ἰὼν ἐν νηὶ μελαίνῃ
Verse: 265    μυκηθμοῦ τ' ἤκουσα βοῶν αὐλιζομενάων
Verse: 266    οἰῶν τε βληχήν· καί μοι ἔπος ἔμπεσε θυμῷ
Verse: 267    μάντηος ἀλαοῦ, Θηβαίου Τειρεσίαο,
Verse: 268    Κίρκης τ' Αἰαίης, οἵ μοι μάλα πόλλ' ἐπέτελλον
Verse: 269    νῆσον ἀλεύασθαι τερψιμβρότου ᾽Ηελίοιο.
Verse: 270    δὴ τότ' ἐγὼν ἑτάροισι μετηύδων ἀχνύμενος κῆρ·

Verse: 271       'κέκλυτέ μευ μύθων, κακά περ πάσχοντες ἑταῖροι,
Verse: 272    ὄϕρ' ὕμιν εἴπω μαντήια Τειρεσίαο
Verse: 273    Κίρκης τ' Αἰαίης, οἵ μοι μάλα πόλλ' ἐπέτελλον
Verse: 274    νῆσον ἀλεύασθαι τερψιμβρότου ᾽Ηελίοιο·
Verse: 275    ἔνθα γὰρ αἰνότατον κακὸν ἔμμεναι ἄμμιν ἔϕασκον.
Verse: 276    ἀλλὰ παρ' ἐξ τὴν νῆσον ἐλαύνετε νῆα μέλαιναν.'

Verse: 277       ὣς ἐϕάμην, τοῖσιν δὲ κατεκλάσθη ϕίλον ἦτορ·
Verse: 278    αὐτίκα δ' Εὐρύλοχος στυγερῷ μ' ἠμείβετο μύθῳ·

Verse: 279       'σχέτλιός εἰς, ᾽Οδυσεῦ· περί τοι μένος, οὐδέ τι γυῖα
Verse: 280    κάμνεις: ἦ ῥά νυ σοίγε σιδήρεα πάντα τέτυκται,
Verse: 281    ὅς ῥ' ἑτάρους καμάτῳ ἀδηκότας ἠδὲ καὶ ὕπνῳ
Verse: 282    οὐκ ἐάᾳς γαίης ἐπιβήμεναι, ἔνθα κεν αὖτε
Verse: 283    νήσῳ ἐν ἀμϕιρύτῃ λαρὸν τετυκοίμεθα δόρπον,
Verse: 284    ἀλλ' αὔτως διὰ νύκτα θοὴν ἀλάλησθαι ἄνωγας,
Verse: 285    νήσου ἀποπλαγχθέντας, ἐν ἠεροειδέι πόντῳ.
Verse: 286    ἐκ νυκτῶν δ' ἄνεμοι χαλεποί, δηλήματα νηῶν,
Verse: 287    γίνονται· πῇ κέν τις ὑπεκϕύγοι αἰπὺν ὄλεθρον,
Verse: 288    ἤν πως ἐξαπίνης ἔλθῃ ἀνέμοιο θύελλα,
Verse: 289    ἢ Νότου ἢ Ζεϕύροιο δυσαέος, οἵ τε μάλιστα
Verse: 290    νῆα διαραίουσι, θεῶν ἀέκητι ἀνάκτων;
Verse: 291    ἀλλ' ἤτοι νῦν μὲν πειθώμεθα νυκτὶ μελαίνῃ
Verse: 292    δόρπον θ' ὁπλισόμεσθα θοῇ παρὰ νηὶ μένοντες:
Verse: 293    ἠῶθεν δ' ἀναβάντες ἐνήσομεν εὐρέι πόντῳ.'

Verse: 294       ὣς ἔϕατ' Εὐρύλοχος, ἐπὶ δ' ᾔνεον ἄλλοι ἑταῖροι.
Verse: 295    καὶ τότε δὴ γίνωσκον ὃ δὴ κακὰ μήδετο δαίμων,
Verse: 296    καί μιν ϕωνήσας ἔπεα πτερόεντα προσηύδων·

Verse: 297       'Εὐρύλοχ', ἦ μάλα δή με βιάζετε μοῦνον ἐόντα·
Verse: 298    ἀλλ' ἄγε δή μοι πάντες ὀμόσσατε καρτερὸν ὅρκον,
Verse: 299    εἴ κέ τιν' ἠὲ βοῶν ἀγέλην ἢ πῶυ μέγ' οἰῶν
Verse: 300    εὕρωμεν, μή που τις ἀτασθαλίῃσι κακῇσιν
Verse: 301    ἢ βοῦν ἠέ τι μῆλον ἀποκτάνῃ· ἀλλὰ ἕκηλοι
Verse: 302    ἐσθίετε βρώμην, τὴν ἀθανάτη πόρε Κίρκη.'

Verse: 303       ὣς ἐϕάμην, οἱ δ' αὐτίκ' ἀπώμνυον ὡς ἐκέλευον.
Verse: 304    αὐτὰρ ἐπεί ῥ' ὄμοσάν τε τελεύτησάν τε τὸν ὅρκον,
Verse: 305    στήσαμεν ἐν λιμένι γλαϕυρῷ εὐεργέα νῆα
Verse: 306    ἄγχ' ὕδατος γλυκεροῖο, καὶ ἐξαπέβησαν ἑταῖροι
Verse: 307    νηός, ἔπειτα δὲ δόρπον ἐπισταμένως τετύκοντο.
Verse: 308    αὐτὰρ ἐπεὶ πόσιος καὶ ἐδητύος ἐξ ἔρον ἕντο,
Verse: 309    μνησάμενοι δὴ ἔπειτα ϕίλους ἔκλαιον ἑταίρους,
Verse: 310    ουἠς ἔϕαγε Σκύλλη γλαϕυρῆς ἐκ νηὸς ἑλοῦσα·
Verse: 311    κλαιόντεσσι δὲ τοῖσιν ἐπήλυθε νήδυμος ὕπνος.
Verse: 312    ἦμος δὲ τρίχα νυκτὸς ἔην, μετὰ δ' ἄστρα βεβήκει,
Verse: 313    ὦρσεν ἔπι ζαὴν ἄνεμον νεϕεληγερέτα Ζεὺς
Verse: 314    λαίλαπι θεσπεσίῃ, σὺν δὲ νεϕέεσσι κάλυψε
Verse: 315    γαῖαν ὁμοῦ καὶ πόντον· ὀρώρει δ' οὐρανόθεν νύξ.
Verse: 316    ἦμος δ' ἠριγένεια ϕάνη ῥοδοδάκτυλος ᾽Ηώς,
Verse: 317    νῆα μὲν ὡρμίσαμεν, κοῖλον σπέος εἰσερύσαντες:
Verse: 318    ἔνθα δ' ἔσαν Νυμϕέων καλοὶ χοροὶ ἠδὲ θόωκοι.
Verse: 319    καὶ τότ' ἐγὼν ἀγορὴν θέμενος μετὰ πᾶσιν ἔειπον·

Verse: 320       'ὦ ϕίλοι, ἐν γὰρ νηὶ θοῇ βρῶσίς τε πόσις τε
Verse: 321    ἔστιν, τῶν δὲ βοῶν ἀπεχώμεθα, μή τι πάθωμεν·
Verse: 322    δεινοῦ γὰρ θεοῦ αἵδε βόες καὶ ἴϕια μῆλα,
Verse: 323    ᾽Ηελίου, ὃς πάντ' ἐϕορᾷ καὶ πάντ' ἐπακούει.'

Verse: 324       ὣς ἐϕάμην, τοῖσιν δ' ἐπεπείθετο θυμὸς ἀγήνωρ.
Verse: 325    μῆνα δὲ πάντ' ἄλληκτος ἄη Νότος, οὐδέ τις ἄλλος
Verse: 326    γίνετ' ἔπειτ' ἀνέμων, εἰ μὴ Εὖρός τε Νότος τε.
Verse: 327    οἱ δ' εἷως μὲν σῖτον ἔχον καὶ οἶνον ἐρυθρόν,
Verse: 328    τόϕρα βοῶν ἀπέχοντο λιλαιόμενοι βιότοιο.
Verse: 329    ἀλλ' ὅτε δὴ νηὸς ἐξέϕθιτο ἤια πάντα,
Verse: 330    καὶ δὴ ἄγρην ἐϕέπεσκον ἀλητεύοντες ἀνάγκῃ,
Verse: 331    ἰχθῦς ὄρνιθάς τε, ϕίλας ὅ τι χεῖρας ἵκοιτο,
Verse: 332    γναμπτοῖς ἀγκίστροισιν· ἔτειρε δὲ γαστέρα λιμός.
Verse: 333    δὴ τότ' ἐγὼν ἀνὰ νῆσον ἀπέστιχον, ὄϕρα θεοῖσιν
Verse: 334    εὐξαίμην, εἴ τίς μοι ὁδὸν ϕήνειε νέεσθαι.
Verse: 335    ἀλλ' ὅτε δὴ διὰ νήσου ἰὼν ἤλυξα ἑταίρους,
Verse: 336    χεῖρας νιψάμενος, ὅθ' ἐπὶ σκέπας ἦν ἀνέμοιο,
Verse: 337    ἠρώμην πάντεσσι θεοῖς οἳ ῎Ολυμπον ἔχουσιν·
Verse: 338    οἱ δ' ἄρα μοι γλυκὺν ὕπνον ἐπὶ βλεϕάροισιν ἔχευαν.
Verse: 339    Εὐρύλοχος δ' ἑτάροισι κακῆς ἐξήρχετο βουλῆς:

Verse: 340       'κέκλυτέ μευ μύθων, κακά περ πάσχοντες ἑταῖροι·
Verse: 341    πάντες μὲν στυγεροὶ θάνατοι δειλοῖσι βροτοῖσι,
Verse: 342    λιμῷ δ' οἴκτιστον θανέειν καὶ πότμον ἐπισπεῖν.
Verse: 343    ἀλλ' ἄγετ', ᾽Ηελίοιο βοῶν ἐλάσαντες ἀρίστας
Verse: 344    ῥέξομεν ἀθανάτοισι, τοὶ οὐρανὸν εὐρὺν ἔχουσιν.
Verse: 345    εἰ δέ κεν εἰς ᾽Ιθάκην ἀϕικοίμεθα, πατρίδα γαῖαν,
Verse: 346    αἶψά κεν ᾽Ηελίῳ ῾Υπερίονι πίονα νηὸν
Verse: 347    τεύξομεν, ἐν δέ κε θεῖμεν ἀγάλματα πολλὰ καὶ ἐσθλά.
Verse: 348    εἰ δὲ χολωσάμενός τι βοῶν ὀρθοκραιράων
Verse: 349    νῆ' ἐθέλῃ ὀλέσαι, ἐπὶ δ' ἕσπωνται θεοὶ ἄλλοι,
Verse: 350    βούλομ' ἅπαξ πρὸς κῦμα χανὼν ἀπὸ θυμὸν ὀλέσσαι
Verse: 351    ἢ δηθὰ στρεύγεσθαι ἐὼν ἐν νήσῳ ἐρήμῃ.'

Verse: 352       ὣς ἔϕατ' Εὐρύλοχος, ἐπὶ δ' ᾔνεον ἄλλοι ἑταῖροι.
Verse: 353    αὐτίκα δ' ᾽Ηελίοιο βοῶν ἐλάσαντες ἀρίστας
Verse: 354    ἐγγύθεν ή οὐ γὰρ τῆλε νεὸς κυανοπρῴροιο
Verse: 355    βοσκέσκονθ' ἕλικες καλαὶ βόες εὐρυμέτωποι ή,
Verse: 356    τὰς δὲ περίστησάν τε καὶ εὐχετόωντο θεοῖσι,
Verse: 357    ϕύλλα δρεψάμενοι τέρενα δρυὸς ὑψικόμοιο·
Verse: 358    οὐ γὰρ ἔχον κρῖ λευκὸν ἐυσσέλμου ἐπὶ νηός.
Verse: 359    αὐτὰρ ἐπεί ῥ' εὔξαντο καὶ ἔσϕαξαν καὶ ἔδειραν,
Verse: 360    μηρούς τ' ἐξέταμον κατά τε κνίσῃ ἐκάλυψαν
Verse: 361    δίπτυχα ποιήσαντες, ἐπ' αὐτῶν δ' ὠμοθέτησαν.
Verse: 362    οὐ δ' εἶχον μέθυ λεῖψαι ἐπ' αἰθομένοις ἱεροῖσιν,
Verse: 363    ἀλλ' ὕδατι σπένδοντες ἐπώπτων ἔγκατα πάντα.
Verse: 364    αὐτὰρ ἐπεὶ κατὰ μῆρ' ἐκάη καὶ σπλάγχνα πάσαντο,
Verse: 365    μίστυλλόν τ' ἄρα τἆλλα καὶ ἀμϕ' ὀβελοῖσιν ἔπειραν.

Verse: 366       καὶ τότε μοι βλεϕάρων ἐξέσσυτο νήδυμος ὕπνος:
Verse: 367    βῆν δ' ἰέναι ἐπὶ νῆα θοὴν καὶ θῖνα θαλάσσης.
Verse: 368    ἀλλ' ὅτε δὴ σχεδὸν ἦα κιὼν νεὸς ἀμϕιελίσσης,
Verse: 369    καὶ τότε με κνίσης ἀμϕήλυθεν ἡδὺς ἀυτμή·
Verse: 370    οἰμώξας δὲ θεοῖσι μετ' ἀθανάτοις ἐγεγώνευν·

Verse: 371       'Ζεῦ πάτερ ἠδ' ἄλλοι μάκαρες θεοὶ αἰὲν ἐόντες,
Verse: 372    ἦ με μάλ' εἰς ἄτην κοιμήσατε νηλέι ὕπνῳ,
Verse: 373    οἱ δ' ἕταροι μέγα ἔργον ἐμητίσαντο μένοντες.'

Verse: 374       ὠκέα δ' ᾽Ηελίῳ ῾Υπερίονι ἄγγελος ἦλθε,
Verse: 375    Λαμπετίη τανύπεπλος, ὅ οἱ βόας ἔκταμεν ἡμεῖς.
Verse: 376    αὐτίκα δ' ἀθανάτοισι μετηύδα χωόμενος κῆρ·

Verse: 377       'Ζεῦ πάτερ ἠδ' ἄλλοι μάκαρες θεοὶ αἰὲν ἐόντες,
Verse: 378    τῖσαι δὴ ἑτάρους Λαερτιάδεω ᾽Οδυσῆος,
Verse: 379    οἵ μευ βοῦς ἔκτειναν ὑπέρβιον, ᾗσιν ἔγωγε
Verse: 380    χαίρεσκον μὲν ἰὼν εἰς οὐρανὸν ἀστερόεντα,
Verse: 381    ἠδ' ὁπότ' ἂψ ἐπὶ γαῖαν ἀπ' οὐρανόθεν προτραποίμην.
Verse: 382    εἰ δέ μοι οὐ τίσουσι βοῶν ἐπιεικέ' ἀμοιβήν,
Verse: 383    δύσομαι εἰς ᾽Αί:δαο καὶ ἐν νεκύεσσι ϕαείνω.'

Verse: 384       τὸν δ' ἀπαμειβόμενος προσέϕη νεϕεληγερέτα Ζεύς:

Verse: 385       '᾽Ηέλι', ἤτοι μὲν σὺ μετ' ἀθανάτοισι ϕάεινε
Verse: 386    καὶ θνητοῖσι βροτοῖσιν ἐπὶ ζείδωρον ἄρουραν·
Verse: 387    τῶν δέ κ' ἐγὼ τάχα νῆα θοὴν ἀργῆτι κεραυνῷ
Verse: 388    τυτθὰ βαλὼν κεάσαιμι μέσῳ ἐνὶ οἴνοπι πόντῳ.'

Verse: 389       ταῦτα δ' ἐγὼν ἤκουσα Καλυψοῦς ἠυὴκόμοιο·
Verse: 390    ἡ δ' ἔϕη ῾Ερμείαο διακτόρου αὐτὴ ἀκοῦσαι.

Verse: 391       αὐτὰρ ἐπεί ῥ' ἐπὶ νῆα κατήλυθον ἠδὲ θάλασσαν,
Verse: 392    νείκεον ἄλλοθεν ἄλλον ἐπισταδόν, οὐ δέ τι μῆχος
Verse: 393    εὑρέμεναι δυνάμεσθα· βόες δ' ἀποτέθνασαν ἤδη.
Verse: 394    τοῖσιν δ' αὐτίκ' ἔπειτα θεοὶ τέραα προύϕαινον·
Verse: 395    εἷρπον μὲν ῥινοί, κρέα δ' ἀμϕ' ὀβελοῖς ἐμεμύκει,
Verse: 396    ὀπταλέα τε καὶ ὠμά· βοῶν δ' ὣς γίνετο ϕωνή.

Verse: 397       ἑξῆμαρ μὲν ἔπειτα ἐμοὶ ἐρίηρες ἑταῖροι
Verse: 398    δαίνυντ' ᾽Ηελίοιο βοῶν ἐλόωντες ἀρίστας:
Verse: 399    ἀλλ' ὅτε δὴ ἕβδομον ἦμαρ ἐπὶ Ζεὺς θῆκε Κρονίων,
Verse: 400    καὶ τότ' ἔπειτ' ἄνεμος μὲν ἐπαύσατο λαίλαπι θύων,
Verse: 401    ἡμεῖς δ' αἶψ' ἀναβάντες ἐνήκαμεν εὐρέι πόντῳ,
Verse: 402    ἱστὸν στησάμενοι ἀνά θ' ἱστία λεύκ' ἐρύσαντες.
Verse: 403    ἀλλ' ὅτε δὴ τὴν νῆσον ἐλείπομεν, οὐδέ τις ἄλλη
Verse: 404    ϕαίνετο γαιάων, ἀλλ' οὐρανὸς ἠδὲ θάλασσα,
Verse: 405    δὴ τότε κυανέην νεϕέλην ἔστησε Κρονίων
Verse: 406    νηὸς ὕπερ γλαϕυρῆς, ἤχλυσε δὲ πόντος ὑπ' αὐτῆς.
Verse: 407    ἡ δ' ἔθει οὐ μάλα πολλὸν ἐπὶ χρόνον· αἶψα γὰρ ἦλθε
Verse: 408    κεκληγὼς Ζέϕυρος, μεγάλῃ σὺν λαίλαπι θύων,
Verse: 409    ἱστοῦ δὲ προτόνους ἔρρηξ' ἀνέμοιο θύελλα
Verse: 410    ἀμϕοτέρους: ἱστὸς δ' ὀπίσω πέσεν, ὅπλα τε πάντα
Verse: 411    εἰς ἄντλον κατέχυνθ'· ὁ δ' ἄρα πρυμνῇ ἐνὶ νηὶ
Verse: 412    πλῆξε κυβερνήτεω κεϕαλήν, σὺν δ' ὀστέ' ἄραξε
Verse: 413    πάντ' ἄμυδις κεϕαλῆς: ὁ δ' ἄρ' ἀρνευτῆρι ἐοικὼς
Verse: 414    κάππεσ' ἀπ' ἰκριόϕιν, λίπε δ' ὀστέα θυμὸς ἀγήνωρ.
Verse: 415    Ζεὺς δ' ἄμυδις βρόντησε καὶ ἔμβαλε νηὶ κεραυνόν·
Verse: 416    ἡ δ' ἐλελίχθη πᾶσα Διὸς πληγεῖσα κεραυνῷ,
Verse: 417    ἐν δὲ θεείου πλῆτο· πέσον δ' ἐκ νηὸς ἑταῖροι.
Verse: 418    οἱ δὲ κορώνῃσιν ἴκελοι περὶ νῆα μέλαιναν
Verse: 419    κύμασιν ἐμϕορέοντο, θεὸς δ' ἀποαίνυτο νόστον.
Verse: 420    αὐτὰρ ἐγὼ διὰ νηὸς ἐϕοίτων, ὄϕρ' ἀπὸ τοίχους
Verse: 421    λῦσε κλύδων τρόπιος: τὴν δὲ ψιλὴν ϕέρε κῦμα.
Verse: 422    ἐκ δέ οἱ ἱστὸν ἄραξε ποτὶ τρόπιν· αὐτὰρ ἐπ' αὐτῷ
Verse: 423    ἐπίτονος βέβλητο, βοὸς ῥινοῖο τετευχώς.
Verse: 424    τῷ ῥ' ἄμϕω συνέεργον ὁμοῦ τρόπιν ἠδὲ καὶ ἱστόν,
Verse: 425    ἑζόμενος δ' ἐπὶ τοῖς ϕερόμην ὀλοοῖς ἀνέμοισιν.

Verse: 426       ἔνθ' ἤτοι Ζέϕυρος μὲν ἐπαύσατο λαίλαπι θύων,
Verse: 427    ἦλθε δ' ἐπὶ Νότος ὦκα, ϕέρων ἐμῷ ἄλγεα θυμῷ,
Verse: 428    ὄϕρ' ἔτι τὴν ὀλοὴν ἀναμετρήσαιμι Χάρυβδιν.
Verse: 429    παννύχιος ϕερόμην, ἅμα δ' ἠελίῳ ἀνιόντι
Verse: 430    ἦλθον ἐπὶ Σκύλλης σκόπελον δεινήν τε Χάρυβδιν.
Verse: 431    ἡ μὲν ἀνερροίβδησε θαλάσσης ἁλμυρὸν ὕδωρ·
Verse: 432    αὐτὰρ ἐγὼ ποτὶ μακρὸν ἐρινεὸν ὑψόσ' ἀερθείς,
Verse: 433    τῷ προσϕὺς ἐχόμην ὡς νυκτερίς: οὐδέ πῃ εἶχον
Verse: 434    οὔτε στηρίξαι ποσὶν ἔμπεδον οὔτ' ἐπιβῆναι·
Verse: 435    ῥίζαι γὰρ ἑκὰς εἶχον, ἀπήωροι δ' ἔσαν ὄζοι,
Verse: 436    μακροί τε μεγάλοι τε, κατεσκίαον δὲ Χάρυβδιν.
Verse: 437    νωλεμέως δ' ἐχόμην, ὄϕρ' ἐξεμέσειεν ὀπίσσω
Verse: 438    ἱστὸν καὶ τρόπιν αὖτις: ἐελδομένῳ δέ μοι ἦλθον
Verse: 439    ὄψ'· ἦμος δ' ἐπὶ δόρπον ἀνὴρ ἀγορῆθεν ἀνέστη
Verse: 440    κρίνων νείκεα πολλὰ δικαζομένων αἰζηῶν,
Verse: 441    τῆμος δὴ τά γε δοῦρα Χαρύβδιος ἐξεϕαάνθη.
Verse: 442    ἧκα δ' ἐγὼ καθύπερθε πόδας καὶ χεῖρε ϕέρεσθαι,
Verse: 443    μέσσῳ δ' ἐνδούπησα παρ' ἐξ περιμήκεα δοῦρα,
Verse: 444    ἑζόμενος δ' ἐπὶ τοῖσι διήρεσα χερσὶν ἐμῇσι.
Verse: 445    Σκύλλην δ' οὐκέτ' ἔασε πατὴρ ἀνδρῶν τε θεῶν τε
Verse: 446    εἰσιδέειν· οὐ γάρ κεν ὑπέκϕυγον αἰπὺν ὄλεθρον.

Verse: 447       ἔνθεν δ' ἐννῆμαρ ϕερόμην, δεκάτῃ δέ με νυκτὶ
Verse: 448    νῆσον ἐς ᾽Ωγυγίην πέλασαν θεοί, ἔνθα Καλυψὼ
Verse: 449    ναίει ἐυπλόκαμος, δεινὴ θεὸς αὐδήεσσα,
Verse: 450    ἥ μ' ἐϕίλει τ' ἐκόμει τε. τί τοι τάδε μυθολογεύω;
Verse: 451    ἤδη γάρ τοι χθιζὸς ἐμυθεόμην ἐνὶ οἴκῳ
Verse: 452    σοί τε καὶ ἰϕθίμῃ ἀλόχῳ· ἐχθρὸν δέ μοί ἐστιν
Verse: 453    αὖτις ἀριζήλως εἰρημένα μυθολογεύειν."


Next part


This text is part of the TITUS edition of Homer, Odyssee.

Copyright TITUS Project, Frankfurt a/M, 30.11.2024. No parts of this document may be republished in any form without prior permission by the copyright holder.