TITUS
Vetus Testamentum graece iuxta LXX interpretes
Part No. 818
Previous part

Chapter: 29 
Verse: 1  ῎Ετι δὲ προσθεὶς Ιωβ εἶπεν τῷ προοιμίῳ
Verse: 2  Τίς ἄν με θείη κατὰ μῆνα ἔμπροσθεν ἡμερῶν, ὧν με ὁ θεὸς ἐϕύλαξεν;
Verse: 3  ὡς ὅτε ηὔγει ὁ λύχνος αὐτοῦ ὑπὲρ κεϕαλῆς μου,
ὅτε τῷ ϕωτὶ αὐτοῦ ἐπορευόμην ἐν σκότει·
Verse: 4  ὅτε ἤμην ἐπιβρίθων ὁδοῖς,
ὅτε ὁ θεὸς ἐπισκοπὴν ἐποιεῖτο τοῦ οἴκου μου·
Verse: 5  ὅτε ἤμην ὑλώδης λίαν,
κύκλῳ δέ μου οἱ παῖδες·
Verse: 6  ὅτε ἐχέοντό μου αἱ ὁδοὶ βουτύρῳ,
τὰ δὲ ὄρη μου ἐχέοντο γάλακτι·
Verse: 7  ὅτε ἐξεπορευόμην ὄρθριος ἐν πόλει,
ἐν δὲ πλατείαις ἐτίθετό μου ὁ δίϕρος.
Verse: 8  ἰδόντες με νεανίσκοι ἐκρύβησαν,
πρεσβῦται δὲ πάντες ἔστησαν·
Verse: 9  ἁδροὶ δὲ ἐπαύσαντο λαλοῦντες
δάκτυλον ἐπιθέντες ἐπὶ στόματι.
Verse: 10  οἱ δὲ ἀκούσαντες ἐμακάρισάν με,
καὶ γλῶσσα αὐτῶν τῷ λάρυγγι αὐτῶν ἐκολλήθη·
Verse: 11  ὅτι οὖς ἤκουσεν καὶ ἐμακάρισέν με,S
ὀϕθαλμὸς δὲ ἰδών με ἐξέκλινεν.
Verse: 12  διέσωσα γὰρ πτωχὸν ἐκ χειρὸς δυνάστου
καὶ ὀρϕανῷ, ᾧ οὐκ ἦν βοηθός, ἐβοήθησα·
Verse: 13  εὐλογία ἀπολλυμένου ἐπ' ἐμὲ ἔλθοι,S
στόμα δὲ χήρας με εὐλόγησεν.
Verse: 14  δικαιοσύνην δὲ ἐνεδεδύκειν,
ἠμϕιασάμην δὲ κρίμα ἴσα διπλοίδι.
Verse: 15  ὀϕθαλμὸς ἤμην τυϕλῶν,
ποὺς δὲ χωλῶν.
Verse: 16  ἐγὼ ἤμην πατὴρ ἀδυνάτων,
δίκην δέ, ἣν οὐκ ᾔδειν, ἐξιχνίασα·
Verse: 17  συνέτριψα δὲ μύλας ἀδίκων,
ἐκ δὲ μέσου τῶν ὀδόντων αὐτῶν ἅρπαγμα ἐξέσπασα.
Verse: 18  εἶπα δέ ῾Η ἡλικία μου γηράσει,
ὥσπερ στέλεχος ϕοίνικος πολὺν χρόνον βιώσω·
Verse: 19  ἡ ῥίζα μου διήνοικται ἐπὶ ὕδατος,
καὶ δρόσος αὐλισθήσεται ἐν τῷ θερισμῷ μου·
Verse: 20  ἡ δόξα μου καινὴ μετ' ἐμοῦ,
καὶ τὸ τόξον μου ἐν χειρὶ αὐτοῦ πορεύσεται.S
Verse: 21  ἐμοῦ ἀκούσαντες προσέσχον,
ἐσιώπησαν δὲ ἐπὶ τῇ ἐμῇ βουλῇ·
Verse: 22  ἐπὶ δὲ τῷ ἐμῷ ῥήματι οὐ προσέθεντο,
περιχαρεῖς δὲ ἐγίνοντο, ὁπόταν αὐτοῖς ἐλάλουν·
Verse: 23  ὥσπερ γῆ διψῶσα προσδεχομένη τὸν ὑετόν,
οὕτως οὗτοι τὴν ἐμὴν λαλιάν.
Verse: 24  ἐὰν γελάσω πρὸς αὐτούς, οὐ μὴ πιστεύσωσιν,
καὶ ϕῶς τοῦ προσώπου μου οὐκ ἀπέπιπτεν·
Verse: 25  ἐξελεξάμην ὁδὸν αὐτῶν καὶ ἐκάθισα ἄρχων
καὶ κατεσκήνουν ὡσεὶ βασιλεὺς ἐν μονοζώνοις ὃν τρόπον παθεινοὺς παρακαλῶν.S

Next part


This text is part of the TITUS edition of Vetus Testamentum graece iuxta LXX interpretes.

Copyright TITUS Project, Frankfurt a/M, 23.1.2025. No parts of this document may be republished in any form without prior permission by the copyright holder.