TITUS
Vetus Testamentum graece iuxta LXX interpretes
Part No. 852
Previous part

Chapter: 1 
Verse: 1    Πᾶσα σοϕία παρὰ κυρίου
   
καὶ μετ' αὐτοῦ ἐστιν εἰς τὸν αἰῶνα.
Verse: 2    
ἄμμον θαλασσῶν καὶ σταγόνας ὑετοῦ
   
καὶ ἡμέρας αἰῶνος τίς ἐξαριθμήσει;
Verse: 3    
ὕψος οὐρανοῦ καὶ πλάτος γῆς
   
καὶ ἄβυσσον καὶ σοϕίαν τίς ἐξιχνιάσει;
Verse: 4    
προτέρα πάντων ἔκτισται σοϕία
   
καὶ σύνεσις ϕρονήσεως ἐξ αἰῶνος.
Verse: 6    
ῥίζα σοϕίας τίνι ἀπεκαλύϕθη;
   
καὶ τὰ πανουργεύματα αὐτῆς τίς ἔγνω;
Verse: 8    
εἷς ἐστιν σοϕός, ϕοβερὸς σϕόδρα,
   
καθήμενος ἐπὶ τοῦ θρόνου αὐτοῦ.
Verse: 9    
κύριος αὐτὸς ἔκτισεν αὐτὴν
   
καὶ εἶδεν καὶ ἐξηρίθμησεν αὐτὴν
   
καὶ ἐξέχεεν αὐτὴν ἐπὶ πάντα τὰ ἔργα αὐτοῦ,
Verse: 10    
μετὰ πάσης σαρκὸς κατὰ τὴν δόσιν αὐτοῦ,
   
καὶ ἐχορήγησεν αὐτὴν τοῖς ἀγαπῶσιν αὐτόν.
Verse: 11    
Φόβος κυρίου δόξα καὶ καύχημα
   
καὶ εὐϕροσύνη καὶ στέϕανος ἀγαλλιάματος.
Verse: 12    
ϕόβος κυρίου τέρψει καρδίαν
   
καὶ δώσει εὐϕροσύνην καὶ χαρὰν καὶ μακροημέρευσιν.
Verse: 13    
τῷ ϕοβουμένῳ τὸν κύριον εὖ ἔσται ἐπ' ἐσχάτων,
   
καὶ ἐν ἡμέρᾳ τελευτῆς αὐτοῦ εὐλογηθήσεται.
Verse: 14    
᾽Αρχὴ σοϕίας ϕοβεῖσθαι τὸν κύριον,
   
καὶ μετὰ πιστῶν ἐν μήτρᾳ συνεκτίσθη αὐτοῖς.
Verse: 15    
μετὰ ἀνθρώπων θεμέλιον αἰῶνος ἐνόσσευσεν
   
καὶ μετὰ τοῦ σπέρματος αὐτῶν ἐμπιστευθήσεται.
Verse: 16    
πλησμονὴ σοϕίας ϕοβεῖσθαι τὸν κύριον
   
καὶ μεθύσκει αὐτοὺς ἀπὸ τῶν καρπῶν αὐτῆς·
Verse: 17    
πάντα τὸν οἶκον αὐτῶν ἐμπλήσει ἐπιθυμημάτων
   
καὶ τὰ ἀποδοχεῖα ἀπὸ τῶν γενημάτων αὐτῆς.
Verse: 18    
στέϕανος σοϕίας ϕόβος κυρίου
   
ἀναθάλλων εἰρήνην καὶ ὑγίειαν ἰάσεως.
Verse: 19    
καὶ εἶδεν καὶ ἐξηρίθμησεν αὐτήν,
   
ἐπιστήμην καὶ γνῶσιν συνέσεως ἐξώμβρησεν
   
καὶ δόξαν κρατούντων αὐτῆς ἀνύψωσεν.
Verse: 20    
ῥίζα σοϕίας ϕοβεῖσθαι τὸν κύριον,
   
καὶ οἱ κλάδοι αὐτῆς μακροημέρευσις.
Verse: 22    
Οὐ δυνήσεται θυμὸς ἄδικος δικαιωθῆναι·
   
ἡ γὰρ ῥοπὴ τοῦ θυμοῦ αὐτοῦ πτῶσις αὐτῷ.
Verse: 23    
ἕως καιροῦ ἀνθέξεται μακρόθυμος,
   
καὶ ὕστερον αὐτῷ ἀναδώσει εὐϕροσύνη·
Verse: 24    
ἕως καιροῦ κρύψει τοὺς λόγους αὐτοῦ,
   
καὶ χείλη πολλῶν ἐκδιηγήσεται σύνεσιν αὐτοῦ.
Verse: 25    
᾽Εν θησαυροῖς σοϕίας παραβολαὶ ἐπιστήμης,
   
βδέλυγμα δὲ ἁμαρτωλῷ θεοσέβεια.
Verse: 26    
ἐπιθυμήσας σοϕίαν διατήρησον ἐντολάς,
   
καὶ κύριος χορηγήσει σοι αὐτήν.
Verse: 27    
σοϕία γὰρ καὶ παιδεία ϕόβος κυρίου,
   
καὶ ἡ εὐδοκία αὐτοῦ πίστις καὶ πραότης.
Verse: 28    
μὴ ἀπειθήσῃς ϕόβῳ κυρίου
   
καὶ μὴ προσέλθῃς αὐτῷ ἐν καρδίᾳ δισσῇ.
Verse: 29    
μὴ ὑποκριθῇς ἐν στόμασιν ἀνθρώπων
   
καὶ ἐν τοῖς χείλεσίν σου πρόσεχε.
Verse: 30    
μὴ ἐξύψου σεαυτόν, ἵνα μὴ πέσῃς
   
καὶ ἐπαγάγῃς τῇ ψυχῇ σου ἀτιμίαν,
   
καὶ ἀποκαλύψει κύριος τὰ κρυπτά σου
   
καὶ ἐν μέσῳ συναγωγῆς καταβαλεῖ σε,
   
ὅτι οὐ προσῆλθες ϕόβῳ κυρίου
   
καὶ ἡ καρδία σου πλήρης δόλου.

Next part



This text is part of the TITUS edition of Vetus Testamentum graece iuxta LXX interpretes.

Copyright TITUS Project, Frankfurt a/M, 23.1.2025. No parts of this document may be republished in any form without prior permission by the copyright holder.