TITUS
Vetus Testamentum graece iuxta LXX interpretes
Part No. 853
Previous part

Chapter: 2 
Verse: 1    Τέκνον, εἰ προσέρχῃ δουλεύειν κυρίῳ,
   
ἑτοίμασον τὴν ψυχήν σου εἰς πειρασμόν·
Verse: 2    
εὔθυνον τὴν καρδίαν σου καὶ καρτέρησον
   
καὶ μὴ σπεύσῃς ἐν καιρῷ ἐπαγωγῆς·
Verse: 3    
κολλήθητι αὐτῷ καὶ μὴ ἀποστῇς,
   
ἵνα αὐξηθῇς ἐπ' ἐσχάτων σου.
Verse: 4    
πᾶν, ὃ ἐὰν ἐπαχθῇ σοι, δέξαι
   
καὶ ἐν ἀλλάγμασιν ταπεινώσεώς σου μακροθύμησον·
Verse: 5    
ὅτι ἐν πυρὶ δοκιμάζεται χρυσὸς
   
καὶ ἄνθρωποι δεκτοὶ ἐν καμίνῳ ταπεινώσεως.
Verse: 6    
πίστευσον αὐτῷ, καὶ ἀντιλήμψεταί σου·
   
εὔθυνον τὰς ὁδούς σου καὶ ἔλπισον ἐπ' αὐτόν.
Verse: 7    
Οἱ ϕοβούμενοι τὸν κύριον, ἀναμείνατε τὸ ἔλεος αὐτοῦ
   
καὶ μὴ ἐκκλίνητε, ἵνα μὴ πέσητε.
Verse: 8    
οἱ ϕοβούμενοι κύριον, πιστεύσατε αὐτῷ,
   
καὶ οὐ μὴ πταίσῃ ὁ μισθὸς ὑμῶν.
Verse: 9    
οἱ ϕοβούμενοι κύριον, ἐλπίσατε εἰς ἀγαθὰ
   
καὶ εἰς εὐϕροσύνην αἰῶνος καὶ ἔλεος.
Verse: 10    
ἐμβλέψατε εἰς ἀρχαίας γενεὰς καὶ ἴδετε·
   
τίς ἐνεπίστευσεν κυρίῳ καὶ κατῃσχύνθη;
   
ἢ τίς ἐνέμεινεν τῷ ϕόβῳ αὐτοῦ καὶ ἐγκατελείϕθη;
   
ἢ τίς ἐπεκαλέσατο αὐτόν, καὶ ὑπερεῖδεν αὐτόν;
Verse: 11    
διότι οἰκτίρμων καὶ ἐλεήμων ὁ κύριος
   
καὶ ἀϕίησιν ἁμαρτίας καὶ σῴζει ἐν καιρῷ θλίψεως.
Verse: 12    
Οὐαὶ καρδίαις δειλαῖς καὶ χερσὶν παρειμέναις
   
καὶ ἁμαρτωλῷ ἐπιβαίνοντι ἐπὶ δύο τρίβους.
Verse: 13    
οὐαὶ καρδίᾳ παρειμένῃ, ὅτι οὐ πιστεύει·
   
διὰ τοῦτο οὐ σκεπασθήσεται.
Verse: 14    
οὐαὶ ὑμῖν τοῖς ἀπολωλεκόσιν τὴν ὑπομονήν·
   
καὶ τί ποιήσετε ὅταν ἐπισκέπτηται ὁ κύριος;
Verse: 15    
οἱ ϕοβούμενοι κύριον οὐκ ἀπειθήσουσιν ῥημάτων αὐτοῦ,
   
καὶ οἱ ἀγαπῶντες αὐτὸν συντηρήσουσιν τὰς ὁδοὺς αὐτοῦ.
Verse: 16    
οἱ ϕοβούμενοι κύριον ζητήσουσιν εὐδοκίαν αὐτοῦ,
   
καὶ οἱ ἀγαπῶντες αὐτὸν ἐμπλησθήσονται τοῦ νόμου.
Verse: 17    
οἱ ϕοβούμενοι κύριον ἑτοιμάσουσιν καρδίας αὐτῶν
   
καὶ ἐνώπιον αὐτοῦ ταπεινώσουσιν τὰς ψυχὰς αὐτῶν.
Verse: 18    
ἐμπεσούμεθα εἰς χεῖρας κυρίου
   
καὶ οὐκ εἰς χεῖρας ἀνθρώπων·
   
ὡς γὰρ ἡ μεγαλωσύνη αὐτοῦ,
   
οὕτως καὶ τὸ ἔλεος αὐτοῦ.

Next part



This text is part of the TITUS edition of Vetus Testamentum graece iuxta LXX interpretes.

Copyright TITUS Project, Frankfurt a/M, 23.1.2025. No parts of this document may be republished in any form without prior permission by the copyright holder.