TITUS
Vetus Testamentum graece iuxta LXX interpretes
Part No. 857
Previous part

Chapter: 6 
Verse: 2    Μὴ ἐπάρῃς σεαυτὸν ἐν βουλῇ ψυχῆς σου,
   ἵνα μὴ διαρπαγῇ ὡς ταῦρος ἡ ψυχή σου·
Verse: 3    τὰ ϕύλλα σου καταϕάγεσαι καὶ τοὺς καρπούς σου ἀπολέσεις
   καὶ ἀϕήσεις σεαυτὸν ὡς ξύλον ξηρόν.
Verse: 4    ψυχὴ πονηρὰ ἀπολεῖ τὸν κτησάμενον αὐτὴν
   καὶ ἐπίχαρμα ἐχθρῶν ποιήσει αὐτόν.
Verse: 5    Λάρυγξ γλυκὺς πληθυνεῖ ϕίλους αὐτοῦ,
   καὶ γλῶσσα εὔλαλος πληθυνεῖ εὐπροσήγορα.
Verse: 6    οἱ εἰρηνεύοντές σοι ἔστωσαν πολλοί,
   οἱ δὲ σύμβουλοί σου εἷς ἀπὸ χιλίων.
Verse: 7    εἰ κτᾶσαι ϕίλον, ἐν πειρασμῷ κτῆσαι αὐτὸν
   καὶ μὴ ταχὺ ἐμπιστεύσῃς αὐτῷ.
Verse: 8    ἔστιν γὰρ ϕίλος ἐν καιρῷ αὐτοῦ
   καὶ οὐ μὴ παραμείνῃ ἐν ἡμέρᾳ θλίψεώς σου.
Verse: 9    καὶ ἔστιν ϕίλος μετατιθέμενος εἰς ἔχθραν
   καὶ μάχην ὀνειδισμοῦ σου ἀποκαλύψει.
Verse: 10    καὶ ἔστιν ϕίλος κοινωνὸς τραπεζῶν
   καὶ οὐ μὴ παραμείνῃ ἐν ἡμέρᾳ θλίψεώς σου·
Verse: 11    καὶ ἐν τοῖς ἀγαθοῖς σου ἔσται ὡς σὺ
   καὶ ἐπὶ τοὺς οἰκέτας σου παρρησιάσεται·
Verse: 12    ἐὰν ταπεινωθῇς, ἔσται κατὰ σοῦ
   καὶ ἀπὸ τοῦ προσώπου σου κρυβήσεται.
Verse: 13    ἀπὸ τῶν ἐχθρῶν σου διαχωρίσθητι
   καὶ ἀπὸ τῶν ϕίλων σου πρόσεχε.
Verse: 14    ϕίλος πιστὸς σκέπη κραταιά,
   ὁ δὲ εὑρὼν αὐτὸν εὗρεν θησαυρόν.
Verse: 15    ϕίλου πιστοῦ οὐκ ἔστιν ἀντάλλαγμα,
   καὶ οὐκ ἔστιν σταθμὸς τῆς καλλονῆς αὐτοῦ.
Verse: 16    ϕίλος πιστὸς ϕάρμακον ζωῆς,
   καὶ οἱ ϕοβούμενοι κύριον εὑρήσουσιν αὐτόν.
Verse: 17    ὁ ϕοβούμενος κύριον εὐθυνεῖ ϕιλίαν αὐτοῦ,
   ὅτι κατ' αὐτὸν οὕτως καὶ ὁ πλησίον αὐτοῦ.
Verse: 18    Τέκνον, ἐκ νεότητός σου ἐπίλεξαι παιδείαν,
   καὶ ἕως πολιῶν εὑρήσεις σοϕίαν.
Verse: 19    ὡς ὁ ἀροτριῶν καὶ ὁ σπείρων πρόσελθε αὐτῇ
   καὶ ἀνάμενε τοὺς ἀγαθοὺς καρποὺς αὐτῆς·
   ἐν γὰρ τῇ ἐργασίᾳ αὐτῆς ὀλίγον κοπιάσεις
   καὶ ταχὺ ϕάγεσαι τῶν γενημάτων αὐτῆς.
Verse: 20    ὡς τραχεῖά ἐστιν σϕόδρα τοῖς ἀπαιδεύτοις,
   καὶ οὐκ ἐμμενεῖ ἐν αὐτῇ ἀκάρδιος·
Verse: 21    ὡς λίθος δοκιμασίας ἰσχυρὸς ἔσται ἐπ' αὐτῷ,
   καὶ οὐ χρονιεῖ ἀπορρῖψαι αὐτήν.
Verse: 22    σοϕία γὰρ κατὰ τὸ ὄνομα αὐτῆς ἐστιν
   καὶ οὐ πολλοῖς ἐστιν ϕανερά.
Verse: 23    ῎Ακουσον, τέκνον, καὶ ἔκδεξαι γνώμην μου
   καὶ μὴ ἀπαναίνου τὴν συμβουλίαν μου·
Verse: 24    καὶ εἰσένεγκον τοὺς πόδας σου εἰς τὰς πέδας αὐτῆς
   καὶ εἰς τὸν κλοιὸν αὐτῆς τὸν τράχηλόν σου·
Verse: 25    ὑπόθες τὸν ὦμόν σου καὶ βάσταξον αὐτὴν
   καὶ μὴ προσοχθίσῃς τοῖς δεσμοῖς αὐτῆς·
Verse: 26    ἐν πάσῃ ψυχῇ σου πρόσελθε αὐτῇ
   καὶ ἐν ὅλῃ δυνάμει σου συντήρησον τὰς ὁδοὺς αὐτῆς·
Verse: 27    ἐξίχνευσον καὶ ζήτησον, καὶ γνωσθήσεταί σοι,
   καὶ ἐγκρατὴς γενόμενος μὴ ἀϕῇς αὐτήν·
Verse: 28    ἐπ' ἐσχάτων γὰρ εὑρήσεις τὴν ἀνάπαυσιν αὐτῆς,
   καὶ στραϕήσεταί σοι εἰς εὐϕροσύνην·
Verse: 29    καὶ ἔσονταί σοι αἱ πέδαι εἰς σκέπην ἰσχύος
   καὶ οἱ κλοιοὶ αὐτῆς εἰς στολὴν δόξης.
Verse: 30    κόσμος γὰρ χρύσεός ἐστιν ἐπ' αὐτῆς,
   καὶ οἱ δεσμοὶ αὐτῆς κλῶσμα ὑακίνθινον·
Verse: 31    στολὴν δόξης ἐνδύσῃ αὐτὴν
   καὶ στέϕανον ἀγαλλιάματος περιθήσεις σεαυτῷ.
Verse: 32    ᾽Εὰν θέλῃς, τέκνον, παιδευθήσῃ,
   καὶ ἐὰν ἐπιδῷς τὴν ψυχήν σου, πανοῦργος ἔσῃ·
Verse: 33    ἐὰν ἀγαπήσῃς ἀκούειν, ἐκδέξῃ,
   καὶ ἐὰν κλίνῃς τὸ οὖς σου, σοϕὸς ἔσῃ.
Verse: 34    ἐν πλήθει πρεσβυτέρων στῆθι·
   καὶ τίς σοϕός; αὐτῷ προσκολλήθητι.
Verse: 35    πᾶσαν διήγησιν θείαν θέλε ἀκροᾶσθαι,
   καὶ παροιμίαι συνέσεως μὴ ἐκϕευγέτωσάν σε.
Verse: 36    ἐὰν ἴδῃς συνετόν, ὄρθριζε πρὸς αὐτόν,
   καὶ βαθμοὺς θυρῶν αὐτοῦ ἐκτριβέτω ὁ πούς σου.
Verse: 37    διανοοῦ ἐν τοῖς προστάγμασιν κυρίου
   καὶ ἐν ταῖς ἐντολαῖς αὐτοῦ μελέτα διὰ παντός·
   αὐτὸς στηριεῖ τὴν καρδίαν σου,
   καὶ ἡ ἐπιθυμία τῆς σοϕίας δοθήσεταί σοι.

Next part


This text is part of the TITUS edition of Vetus Testamentum graece iuxta LXX interpretes.

Copyright TITUS Project, Frankfurt a/M, 23.1.2025. No parts of this document may be republished in any form without prior permission by the copyright holder.