TITUS
Vetus Testamentum graece iuxta LXX interpretes
Part No. 858
Previous part

Chapter: 7 
Verse: 1    Μὴ ποίει κακά, καὶ οὐ μή σε καταλάβῃ κακόν·
Verse: 2    ἀπόστηθι ἀπὸ ἀδίκου, καὶ ἐκκλινεῖ ἀπὸ σοῦ.
Verse: 3    υἱέ, μὴ σπεῖρε ἐπ' αὔλακας ἀδικίας,
   καὶ οὐ μὴ θερίσῃς αὐτὰ ἑπταπλασίως.
Verse: 4    μὴ ζήτει παρὰ κυρίου ἡγεμονίαν
   μηδὲ παρὰ βασιλέως καθέδραν δόξης.
Verse: 5    μὴ δικαιοῦ ἔναντι κυρίου
   καὶ παρὰ βασιλεῖ μὴ σοϕίζου.
Verse: 6    μὴ ζήτει γενέσθαι κριτής,
   μὴ οὐκ ἰσχύσεις ἐξᾶραι ἀδικίας,
   μήποτε εὐλαβηθῇς ἀπὸ προσώπου δυνάστου
   καὶ θήσεις σκάνδαλον ἐν εὐθύτητί σου.
Verse: 7    μὴ ἁμάρτανε εἰς πλῆθος πόλεως
   καὶ μὴ καταβάλῃς σεαυτὸν ἐν ὄχλῳ.
Verse: 8    μὴ καταδεσμεύσῃς δὶς ἁμαρτίαν·
   ἐν γὰρ τῇ μιᾷ οὐκ ἀθῷος ἔσῃ.
Verse: 9    μὴ εἴπῃς Τῷ πλήθει τῶν δώρων μου ἐπόψεται
   καὶ ἐν τῷ προσενέγκαι με θεῷ ὑψίστῳ προσδέξεται.
Verse: 10    μὴ ὀλιγοψυχήσῃς ἐν τῇ προσευχῇ σου
   καὶ ἐλεημοσύνην ποιῆσαι μὴ παρίδῃς.
Verse: 11    μὴ καταγέλα ἄνθρωπον ὄντα ἐν πικρίᾳ ψυχῆς αὐτοῦ·
   ἔστιν γὰρ ὁ ταπεινῶν καὶ ἀνυψῶν.
Verse: 12    μὴ ἀροτρία ψεῦδος ἐπ' ἀδελϕῷ σου
   μηδὲ ϕίλῳ τὸ ὅμοιον ποίει.
Verse: 13    μὴ θέλε ψεύδεσθαι πᾶν ψεῦδος·
   ὁ γὰρ ἐνδελεχισμὸς αὐτοῦ οὐκ εἰς ἀγαθόν.
Verse: 14    μὴ ἀδολέσχει ἐν πλήθει πρεσβυτέρων
   καὶ μὴ δευτερώσῃς λόγον ἐν προσευχῇ σου.
Verse: 15    μὴ μισήσῃς ἐπίπονον ἐργασίαν
   καὶ γεωργίαν ὑπὸ ὑψίστου ἐκτισμένην.
Verse: 16    μὴ προσλογίζου σεαυτὸν ἐν πλήθει ἁμαρτωλῶν·
   μνήσθητι ὅτι ὀργὴ οὐ χρονιεῖ.
Verse: 17    ταπείνωσον σϕόδρα τὴν ψυχήν σου,
   ὅτι ἐκδίκησις ἀσεβοῦς πῦρ καὶ σκώληξ.
Verse: 18    Μὴ ἀλλάξῃς ϕίλον ἕνεκεν διαϕόρου
   μηδὲ ἀδελϕὸν γνήσιον ἐν χρυσίῳ Σουϕιρ.
Verse: 19    μὴ ἀστόχει γυναικὸς σοϕῆς καὶ ἀγαθῆς·
   ἡ γὰρ χάρις αὐτῆς ὑπὲρ τὸ χρυσίον.
Verse: 20    μὴ κακώσῃς οἰκέτην ἐργαζόμενον ἐν ἀληθείᾳ
   μηδὲ μίσθιον διδόντα τὴν ψυχὴν αὐτοῦ·
Verse: 21    οἰκέτην συνετὸν ἀγαπάτω σου ἡ ψυχή,
   μὴ στερήσῃς αὐτὸν ἐλευθερίας.
Verse: 22    κτήνη σοί ἐστιν; ἐπισκέπτου αὐτά·
   καὶ εἰ ἔστιν σοι χρήσιμα, ἐμμενέτω σοι.
Verse: 23    τέκνα σοί ἐστιν; παίδευσον αὐτὰ
   καὶ κάμψον ἐκ νεότητος τὸν τράχηλον αὐτῶν.
Verse: 24    θυγατέρες σοί εἰσιν; πρόσεχε τῷ σώματι αὐτῶν
   καὶ μὴ ἱλαρώσῃς πρὸς αὐτὰς τὸ πρόσωπόν σου.
Verse: 25    ἔκδου θυγατέρα, καὶ ἔσῃ τετελεκὼς ἔργον μέγα,
   καὶ ἀνδρὶ συνετῷ δώρησαι αὐτήν.
Verse: 26    γυνή σοί ἐστιν κατὰ ψυχήν; μὴ ἐκβάλῃς αὐτήν·
   καὶ μισουμένῃ μὴ ἐμπιστεύσῃς σεαυτόν.
Verse: 27    ᾽Εν ὅλῃ καρδίᾳ σου δόξασον τὸν πατέρα σου
   καὶ μητρὸς ὠδῖνας μὴ ἐπιλάθῃ·
Verse: 28    μνήσθητι ὅτι δι' αὐτῶν ἐγεννήθης,
   καὶ τί ἀνταποδώσεις αὐτοῖς καθὼς αὐτοὶ σοί;
Verse: 29    ἐν ὅλῃ ψυχῇ σου εὐλαβοῦ τὸν κύριον
   καὶ τοὺς ἱερεῖς αὐτοῦ θαύμαζε.
Verse: 30    ἐν ὅλῃ δυνάμει ἀγάπησον τὸν ποιήσαντά σε
   καὶ τοὺς λειτουργοὺς αὐτοῦ μὴ ἐγκαταλίπῃς.
Verse: 31    ϕοβοῦ τὸν κύριον καὶ δόξασον ἱερέα
   καὶ δὸς τὴν μερίδα αὐτῷ, καθὼς ἐντέταλταί σοι,
   ἀπαρχὴν καὶ περὶ πλημμελείας καὶ δόσιν βραχιόνων
   καὶ θυσίαν ἁγιασμοῦ καὶ ἀπαρχὴν ἁγίων.
Verse: 32    Καὶ πτωχῷ ἔκτεινον τὴν χεῖρά σου,
   ἵνα τελειωθῇ ἡ εὐλογία σου.
Verse: 33    χάρις δόματος ἔναντι παντὸς ζῶντος,
   καὶ ἐπὶ νεκρῷ μὴ ἀποκωλύσῃς χάριν.
Verse: 34    μὴ ὑστέρει ἀπὸ κλαιόντων
   καὶ μετὰ πενθούντων πένθησον.
Verse: 35    μὴ ὄκνει ἐπισκέπτεσθαι ἄρρωστον ἄνθρωπον·
   ἐκ γὰρ τῶν τοιούτων ἀγαπηθήσῃ.
Verse: 36    ἐν πᾶσι τοῖς λόγοις σου μιμνῄσκου τὰ ἔσχατά σου,
   καὶ εἰς τὸν αἰῶνα οὐχ ἁμαρτήσεις.

Next part


This text is part of the TITUS edition of Vetus Testamentum graece iuxta LXX interpretes.

Copyright TITUS Project, Frankfurt a/M, 23.1.2025. No parts of this document may be republished in any form without prior permission by the copyright holder.