TITUS
Vetus Testamentum graece iuxta LXX interpretes
Part No. 861
Previous part

Chapter: 10 
Verse: 1    Κριτὴς σοϕὸς παιδεύσει τὸν λαὸν αὐτοῦ,
   καὶ ἡγεμονία συνετοῦ τεταγμένη ἔσται.
Verse: 2    κατὰ τὸν κριτὴν τοῦ λαοῦ οὕτως καὶ οἱ λειτουργοὶ αὐτοῦ,
   καὶ κατὰ τὸν ἡγούμενον τῆς πόλεως πάντες οἱ κατοικοῦντες αὐτήν.
Verse: 3    βασιλεὺς ἀπαίδευτος ἀπολεῖ τὸν λαὸν αὐτοῦ,
   καὶ πόλις οἰκισθήσεται ἐν συνέσει δυναστῶν.
Verse: 4    ἐν χειρὶ κυρίου ἡ ἐξουσία τῆς γῆς,
   καὶ τὸν χρήσιμον ἐγερεῖ εἰς καιρὸν ἐπ' αὐτῆς.
Verse: 5    ἐν χειρὶ κυρίου εὐοδία ἀνδρός,
   καὶ προσώπῳ γραμματέως ἐπιθήσει δόξαν αὐτοῦ.
Verse: 6    ᾽Επὶ παντὶ ἀδικήματι μὴ μηνιάσῃς τῷ πλησίον
   καὶ μὴ πρᾶσσε μηδὲν ἐν ἔργοις ὕβρεως.
Verse: 7    μισητὴ ἔναντι κυρίου καὶ ἀνθρώπων ὑπερηϕανία,
   καὶ ἐξ ἀμϕοτέρων πλημμελὴς ἡ ἀδικία.
Verse: 8    βασιλεία ἀπὸ ἔθνους εἰς ἔθνος μετάγεται
   διὰ ἀδικίας καὶ ὕβρεις καὶ χρήματα.
Verse: 9    τί ὑπερηϕανεύεται γῆ καὶ σποδός;
   ὅτι ἐν ζωῇ ἔρριψα τὰ ἐνδόσθια αὐτοῦ.
Verse: 10    μακρὸν ἀρρώστημα, σκώπτει ἰατρός·
   καὶ βασιλεὺς σήμερον, καὶ αὔριον τελευτήσει.
Verse: 11    ἐν γὰρ τῷ ἀποθανεῖν ἄνθρωπον
   κληρονομήσει ἑρπετὰ καὶ θηρία καὶ σκώληκας.
Verse: 12    ᾽Αρχὴ ὑπερηϕανίας ἀνθρώπου ἀϕίστασθαι ἀπὸ κυρίου,
   καὶ ἀπὸ τοῦ ποιήσαντος αὐτὸν ἀπέστη ἡ καρδία αὐτοῦ.
Verse: 13    ὅτι ἀρχὴ ὑπερηϕανίας ἁμαρτία,
   καὶ ὁ κρατῶν αὐτῆς ἐξομβρήσει βδέλυγμα·
   διὰ τοῦτο παρεδόξασεν κύριος τὰς ἐπαγωγὰς
   καὶ κατέστρεψεν εἰς τέλος αὐτούς.
Verse: 14    θρόνους ἀρχόντων καθεῖλεν ὁ κύριος
   καὶ ἐκάθισεν πραεῖς ἀντ' αὐτῶν·
Verse: 15    ῥίζας ἐθνῶν ἐξέτιλεν ὁ κύριος
   καὶ ἐϕύτευσεν ταπεινοὺς ἀντ' αὐτῶν·
Verse: 16    χώρας ἐθνῶν κατέστρεψεν ὁ κύριος
   καὶ ἀπώλεσεν αὐτὰς ἕως θεμελίων γῆς·
Verse: 17    ἐξῆρεν ἐξ αὐτῶν καὶ ἀπώλεσεν αὐτοὺς
   καὶ κατέπαυσεν ἀπὸ γῆς τὸ μνημόσυνον αὐτῶν.
Verse: 18    οὐκ ἔκτισται ἀνθρώποις ὑπερηϕανία
   οὐδὲ ὀργὴ θυμοῦ γεννήμασιν γυναικῶν.
Verse: 19    Σπέρμα ἔντιμον ποῖον; σπέρμα ἀνθρώπου.
   σπέρμα ἔντιμον ποῖον; οἱ ϕοβούμενοι τὸν κύριον.
   σπέρμα ἄτιμον ποῖον; σπέρμα ἀνθρώπου.
   σπέρμα ἄτιμον ποῖον; οἱ παραβαίνοντες ἐντολάς.
Verse: 20    ἐν μέσῳ ἀδελϕῶν ὁ ἡγούμενος αὐτῶν ἔντιμος,
   καὶ οἱ ϕοβούμενοι κύριον ἐν ὀϕθαλμοῖς αὐτοῦ.
Verse: 22    πλούσιος καὶ ἔνδοξος καὶ πτωχός,
   τὸ καύχημα αὐτῶν ϕόβος κυρίου.
Verse: 23    οὐ δίκαιον ἀτιμάσαι πτωχὸν συνετόν,
   καὶ οὐ καθήκει δοξάσαι ἄνδρα ἁμαρτωλόν.
Verse: 24    μεγιστὰν καὶ κριτὴς καὶ δυνάστης δοξασθήσεται,
   καὶ οὐκ ἔστιν αὐτῶν τις μείζων τοῦ ϕοβουμένου τὸν κύριον.
Verse: 25    οἰκέτῃ σοϕῷ ἐλεύθεροι λειτουργήσουσιν,
   καὶ ἀνὴρ ἐπιστήμων οὐ γογγύσει.
Verse: 26    Μὴ σοϕίζου ποιῆσαι τὸ ἔργον σου
   καὶ μὴ δοξάζου ἐν καιρῷ στενοχωρίας σου.
Verse: 27    κρείσσων ἐργαζόμενος καὶ περισσεύων ἐν πᾶσιν
   ἢ περιπατῶν δοξαζόμενος καὶ ἀπορῶν ἄρτων.
Verse: 28    τέκνον, ἐν πραύτητι δόξασον τὴν ψυχήν σου
   καὶ δὸς αὐτῇ τιμὴν κατὰ τὴν ἀξίαν αὐτῆς.
Verse: 29    τὸν ἁμαρτάνοντα εἰς τὴν ψυχὴν αὐτοῦ τίς δικαιώσει;
   καὶ τίς δοξάσει τὸν ἀτιμάζοντα τὴν ζωὴν αὐτοῦ;
Verse: 30    πτωχὸς δοξάζεται δι' ἐπιστήμην αὐτοῦ,
   καὶ πλούσιος δοξάζεται διὰ τὸν πλοῦτον αὐτοῦ.
Verse: 31    ὁ δεδοξασμένος ἐν πτωχείᾳ, καὶ ἐν πλούτῳ ποσαχῶς;
   καὶ ὁ ἄδοξος ἐν πλούτῳ, καὶ ἐν πτωχείᾳ ποσαχῶς;

Next part


This text is part of the TITUS edition of Vetus Testamentum graece iuxta LXX interpretes.

Copyright TITUS Project, Frankfurt a/M, 23.1.2025. No parts of this document may be republished in any form without prior permission by the copyright holder.