TITUS
Vetus Testamentum graece iuxta LXX interpretes
Part No. 865
Previous part

Chapter: 14 
Verse: 1    μακάριος ἀνήρ, ὃς οὐκ ὠλίσθησεν ἐν τῷ στόματι αὐτοῦ
   καὶ οὐ κατενύγη ἐν λύπῃ ἁμαρτιῶν·
Verse: 2    μακάριος οὗ οὐ κατέγνω ἡ ψυχὴ αὐτοῦ,
   καὶ ὃς οὐκ ἔπεσεν ἀπὸ τῆς ἐλπίδος αὐτοῦ.
Verse: 3    ᾽Ανδρὶ μικρολόγῳ οὐ καλὸς ὁ πλοῦτος,
   καὶ ἀνθρώπῳ βασκάνῳ ἵνα τί χρήματα;
Verse: 4    ὁ συνάγων ἀπὸ τῆς ψυχῆς αὐτοῦ συνάγει ἄλλοις,
   καὶ ἐν τοῖς ἀγαθοῖς αὐτοῦ τρυϕήσουσιν ἕτεροι.
Verse: 5    ὁ πονηρὸς ἑαυτῷ τίνι ἀγαθὸς ἔσται;
   καὶ οὐ μὴ εὐϕρανθήσεται ἐν τοῖς χρήμασιν αὐτοῦ.
Verse: 6    τοῦ βασκαίνοντος ἑαυτὸν οὐκ ἔστιν πονηρότερος,
   καὶ τοῦτο ἀνταπόδομα τῆς κακίας αὐτοῦ·
Verse: 7    κἂν εὖ ποιῇ, ἐν λήθῃ ποιεῖ,
   καὶ ἐπ' ἐσχάτων ἐκϕαίνει τὴν κακίαν αὐτοῦ.
Verse: 8    πονηρὸς ὁ βασκαίνων ὀϕθαλμῷ,
   ἀποστρέϕων πρόσωπον καὶ ὑπερορῶν ψυχάς.
Verse: 9    πλεονέκτου ὀϕθαλμὸς οὐκ ἐμπίπλαται μερίδι,
   καὶ ἀδικία πονηρὰ ἀναξηραίνει ψυχήν.
Verse: 10    ὀϕθαλμὸς πονηρὸς ϕθονερὸς ἐπ' ἄρτῳ
   καὶ ἐλλιπὴς ἐπὶ τῆς τραπέζης αὐτοῦ.
Verse: 11    Τέκνον, καθὼς ἐὰν ἔχῃς, εὖ ποίει σεαυτὸν
   καὶ προσϕορὰς κυρίῳ ἀξίως πρόσαγε·
Verse: 12    μνήσθητι ὅτι θάνατος οὐ χρονιεῖ
   καὶ διαθήκη ᾅδου οὐχ ὑπεδείχθη σοι·
Verse: 13    πρίν σε τελευτῆσαι εὖ ποίει ϕίλῳ
   καὶ κατὰ τὴν ἰσχύν σου ἔκτεινον καὶ δὸς αὐτῷ.
Verse: 14    μὴ ἀϕυστερήσῃς ἀπὸ ἀγαθῆς ἡμέρας,
   καὶ μερὶς ἐπιθυμίας ἀγαθῆς μή σε παρελθάτω.
Verse: 15    οὐχὶ ἑτέρῳ καταλείψεις τοὺς πόνους σου
   καὶ τοὺς κόπους σου εἰς διαίρεσιν κλήρου;
Verse: 16    δὸς καὶ λαβὲ καὶ ἀπάτησον τὴν ψυχήν σου,
   ὅτι οὐκ ἔστιν ἐν ᾅδου ζητῆσαι τρυϕήν.
Verse: 17    πᾶσα σὰρξ ὡς ἱμάτιον παλαιοῦται·
   ἡ γὰρ διαθήκη ἀπ' αἰῶνος Θανάτῳ ἀποθανῇ.
Verse: 18    ὡς ϕύλλον θάλλον ἐπὶ δένδρου δασέος,
   τὰ μὲν καταβάλλει, ἄλλα δὲ ϕύει,
   οὕτως γενεὰ σαρκὸς καὶ αἵματος,
   ἡ μὲν τελευτᾷ, ἑτέρα δὲ γεννᾶται.
Verse: 19    πᾶν ἔργον σηπόμενον ἐκλείπει,
   καὶ ὁ ἐργαζόμενος αὐτὸ μετ' αὐτοῦ ἀπελεύσεται.
Verse: 20    Μακάριος ἀνήρ, ὃς ἐν σοϕίᾳ μελετήσει
   καὶ ὃς ἐν συνέσει αὐτοῦ διαλεχθήσεται,
Verse: 21    ὁ διανοούμενος τὰς ὁδοὺς αὐτῆς ἐν καρδίᾳ αὐτοῦ
   καὶ ἐν τοῖς ἀποκρύϕοις αὐτῆς ἐννοηθήσεται.
Verse: 22    ἔξελθε ὀπίσω αὐτῆς ὡς ἰχνευτὴς
   καὶ ἐν ταῖς ὁδοῖς αὐτῆς ἐνέδρευε.
Verse: 23    ὁ παρακύπτων διὰ τῶν θυρίδων αὐτῆς
   καὶ ἐπὶ τῶν θυρωμάτων αὐτῆς ἀκροάσεται,
Verse: 24    ὁ καταλύων σύνεγγυς τοῦ οἴκου αὐτῆς
   καὶ πήξει πάσσαλον ἐν τοῖς τοίχοις αὐτῆς,
Verse: 25    στήσει τὴν σκηνὴν αὐτοῦ κατὰ χεῖρας αὐτῆς
   καὶ καταλύσει ἐν καταλύματι ἀγαθῶν,
Verse: 26    θήσει τὰ τέκνα αὐτοῦ ἐν τῇ σκέπῃ αὐτῆς
   καὶ ὑπὸ τοὺς κλάδους αὐτῆς αὐλισθήσεται,
Verse: 27    σκεπασθήσεται ὑπ' αὐτῆς ἀπὸ καύματος
   καὶ ἐν τῇ δόξῃ αὐτῆς καταλύσει.

Next part


This text is part of the TITUS edition of Vetus Testamentum graece iuxta LXX interpretes.

Copyright TITUS Project, Frankfurt a/M, 23.1.2025. No parts of this document may be republished in any form without prior permission by the copyright holder.