TITUS
Rg-Veda: Aitareya-Brahmana
Part No. 153
Previous part

Paragraph: 32 


Sentence: 1    yā ta ūtir avamā yā parameti sūktaṃ,
   jahi vr̥ṣṇyāni kr̥ṇuhī parāca iti vr̥ṣaṇvad dvitīye 'hani dvitīyasyāhno rūpaṃ
Sentence: 2    viśvo devasya netus, tat savitur vareṇyam,
   ā viśvadevaṃ satpatim iti vaiśvadevasya pratipadanucarau.
   bārhate 'hani dvitīye 'hani dvitīyasyāhno rūpam
Sentence: 3    ud uṣya devaḥ savitā hiraṇyayeti sāvitram
   ūrdʰvavad dvitīye 'hani dvitīyasyāhno rūpaṃ
Sentence: 4    te hi dyāvapr̥tʰivī viśvaśambʰuveti dyāvāpr̥tʰivīyaṃ,
   sujanmanī dʰiṣaṇe antar īyata ity
   antarvad dvitīye 'hani dvitīyasyāhno rūpaṃ
Sentence: 5    takṣan ratʰaṃ suvr̥taṃ vidmanāpasa ity ārbʰavaṃ,
   takṣan hari indravāhā vr̥ṣaṇvasū iti
   vr̥ṣaṇvad dvitīye 'hani dvitīyasyāhno rūpaṃ
Sentence: 6    yajñasya vo ratʰyaṃ viśpatiṃ viśām iti vaiśvadevaṃ,
   vr̥ṣā ketur yajato dyām aśāyateti
   vr̥ṣaṇvad dvitīye 'hani dvitīyasyāhno rūpaṃ
Sentence: 7    tad u śāryātam.
   Aṅgiraso vai svargāya lokāya satram āsata,
   te ha sma dvitīyaṃ-dvitīyam evāhar āgatya muhyanti.
   tān vā etac Cʰāryāto Mānavo dvitīye 'hani sūktam aśaṃsayat,
   tato vai te pra yajñam ajānan pra svargaṃ lokaṃ.
   tad yad etat sūktaṃ dvitīye 'hani śaṃsati,
   yajñasya prajñātyai svargasya lokasyānukʰyātyai
Sentence: 8    pr̥kṣasya vr̥ṣṇo aruṣasya nū saha ity āgnimārutasya pratipad.
   vr̥ṣaṇvad dvitīye 'hani dvitīyasyāhno rūpaṃ
Sentence: 9    vr̥ṣṇe śardʰāya sumakʰāya vedʰasa iti mārutaṃ.
   vr̥ṣaṇvad dvitīye 'hani dvitīyasyāhno rūpaṃ
Sentence: 10    jātavedase sunavāma somam iti jātavedasyācyutā
Sentence: 11    yajñena vardʰata jātavedasam iti jātavedasyaṃ.
   vr̥dʰanvad dvitīye 'hani dvitīyasyāhno rūpam ahno rūpam




Next part


This text is part of the TITUS edition of Rg-Veda: Aitareya-Brahmana.

Copyright TITUS Project, Frankfurt a/M, 1.11.2013. No parts of this document may be republished in any form without prior permission by the copyright holder.