TITUS
Rg-Veda: Rg-Veda-Samhita
Part No. 32
Previous part

Hymn: 32 
Verse: 1 
Halfverse: a    índrasya nú vīryā̀ṇi prá vocaṃ yā́ni cakā́ra pratʰamā́ni vajrī́ /
   índrasya nú vīryā̀ṇi prá vocaṃ
   índrasya nú vīryā̀ṇi prá vocam
   índrasya nú vīríyāṇi prá vocaṃ

Halfverse: b    yā́ni cakā́ra pratʰamā́ni vajrī́ /
   yā́ni cakā́ra pratʰamā́ni vajrī́ /
   yā́ni cakā́ra pratʰamā́ni vajrī́ /

Halfverse: c    áhann áhim ánv apás tatarda prá vakṣáṇā abʰinat párvatānām //
   áhann áhim ánv apás tatarda
   áhan áhim ánu apáḥ tatarda
   áhann áhim ánu apás tatarda

Halfverse: d    prá vakṣáṇā abʰinat párvatānām //
   prá vakṣáṇāḥ abʰinat párvatānām //
   prá vakṣáṇā abʰinat párvatānām //


Verse: 2 
Halfverse: a    áhann áhim párvate śiśriyāṇáṃ tváṣṭāsmai vájraṃ svaryàṃ tatakṣa /
   áhann áhim párvate śiśriyāṇáṃ
   áhan áhim párvate śiśriyāṇám
   áhann áhim párvate śiśriyāṇáṃ

Halfverse: b    tváṣṭāsmai vájraṃ svaryàṃ tatakṣa /
   tváṣṭā asmai vájram svaryàm tatakṣa /
   tváṣṭāsmai vájraṃ svaríyaṃ tatakṣa /

Halfverse: c    vāśrā́ iva dʰenávaḥ syándamānā áñjaḥ samudrám áva jagmur ā́paḥ //
   vāśrā́ iva dʰenávaḥ syándamānā
   vāśrā́ḥ iva dʰenávaḥ syándamānāḥ
   vāśrā́ iva dʰenávaḥ syándamānā

Halfverse: d    áñjaḥ samudrám áva jagmur ā́paḥ //
   áñjaḥ samudrám áva jagmuḥ ā́paḥ //
   áñjaḥ samudrám áva jagmur ā́paḥ //


Verse: 3 
Halfverse: a    vr̥ṣāyámāṇo 'vr̥ṇīta sómaṃ tríkadrukeṣv apibat sutásya /
   vr̥ṣāyámāṇo 'vr̥ṇīta sómaṃ
   vr̥ṣāyámāṇaḥ avr̥ṇīta sómam
   vr̥ṣāyámāṇo avr̥ṇīta sómaṃ

Halfverse: b    tríkadrukeṣv apibat sutásya /
   tríkadrukeṣu apibat sutásya /
   tríkadrukeṣu apibat sutásya /

Halfverse: c    ā́ sā́yakam magʰávādatta vájram áhann enam pratʰamajā́m áhīnām //
   ā́ sā́yakam magʰávādatta vájram
   ā́ sā́yakam magʰávā adatta vájram
   ā́ sā́yakam magʰávādatta vájram

Halfverse: d    áhann enam pratʰamajā́m áhīnām //
   áhan enam pratʰamajā́m áhīnām //
   áhann enam pratʰamajā́m áhīnām //


Verse: 4 
Halfverse: a    yád indrā́han pratʰamajā́m áhīnām ā́n māyínām ámināḥ prótá māyā́ḥ /
   yád indrā́han pratʰamajā́m áhīnām
   yát indra áhan pratʰamajā́m áhīnām
   yád indrā́han pratʰamajā́m áhīnām

Halfverse: b    ā́n māyínām ámināḥ prótá māyā́ḥ /
   ā́t māyínām ámināḥ prá utá māyā́ḥ /
   ā́n māyínām ámināḥ prótá māyā́ḥ /

Halfverse: c    ā́t sū́ryaṃ janáyan dyā́m uṣā́saṃ tādī́tnā śátruṃ ná kílā vivitse //
   ā́t sū́ryaṃ janáyan dyā́m uṣā́saṃ
   ā́t sū́ryam janáyan dyā́m uṣā́sam
   ā́t sū́riyaṃ janáyan dyā́m uṣā́saṃ

Halfverse: d    tādī́tnā śátruṃ ná kílā vivitse //
   tādī́tnā śátrum ná kíla+ vivitse //
   tādī́tnā śátruṃ ná kílā vivitse //


Verse: 5 
Halfverse: a    áhan vr̥tráṃ vr̥tratáraṃ vyàṃsam índro vájreṇa mahatā́ vadʰéna /
   áhan vr̥tráṃ vr̥tratáraṃ vyàṃsam
   áhan vr̥trám vr̥tratáram vyàṃsam
   áhan vr̥tráṃ vr̥tratáraṃ víaṃsam

Halfverse: b    índro vájreṇa mahatā́ vadʰéna /
   índraḥ vájreṇa mahatā́ vadʰéna /
   índro vájreṇa mahatā́ vadʰéna /

Halfverse: c    skándʰāṃsīva kúliśenā vívr̥kṇā́hiḥ śayata upapŕ̥k pr̥tʰivyā́ḥ //
   skándʰāṃsīva kúliśenā vívr̥kṇā_
   skándʰāṃsi iva kúliśena+ vívr̥kṇā
   skándʰāṃsīva kúliśenā vívr̥kṇā

Halfverse: d    _áhiḥ śayata upapŕ̥k pr̥tʰivyā́ḥ //
   áhiḥ śayate upapŕ̥k pr̥tʰivyā́ḥ //
   áhiḥ śayata upapŕ̥k pr̥tʰivyā́ḥ //


Verse: 6 
Halfverse: a    ayoddʰéva durmáda ā́ hí juhvé mahāvīráṃ tuvibādʰám r̥jīṣám /
   ayoddʰéva durmáda ā́ hí juhvé
   ayoddʰā́ iva durmádaḥ ā́ hí juhvé
   ayoddʰéva durmáda ā́ hí juhvé

Halfverse: b    mahāvīráṃ tuvibādʰám r̥jīṣám /
   mahāvīrám tuvibādʰám r̥jīṣám /
   mahāvīráṃ tuvibādʰám r̥jīṣám /

Halfverse: c    nā́tārīd asya sámr̥tiṃ vadʰā́nāṃ sáṃ rujā́nāḥ pipiṣa índraśatruḥ //
   nā́tārīd asya sámr̥tiṃ vadʰā́nāṃ
   ná atārīt asya sámr̥tim vadʰā́nām
   nā́tārīd asya sámr̥tiṃ vadʰā́nāṃ

Halfverse: d    sáṃ rujā́nāḥ pipiṣa índraśatruḥ //
   sám rujā́nāḥ pipiṣe índraśatruḥ //
   sáṃ rujā́nāḥ pipiṣa índraśatruḥ //


Verse: 7 
Halfverse: a    apā́d ahastó apr̥tanyad índram ā́sya vájram ádʰi sā́nau jagʰāna /
   apā́d ahastó apr̥tanyad índram
   apā́t ahastáḥ apr̥tanyat índram
   apā́d ahastó apr̥tanyad índram

Halfverse: b    ā́sya vájram ádʰi sā́nau jagʰāna /
   ā́ asya vájram ádʰi sā́nau jagʰāna /
   ā́sya vájram ádʰi sā́nau jagʰāna /

Halfverse: c    vŕ̥ṣṇo vádʰriḥ pratimā́nam búbʰūṣan purutrā́ vr̥tró aśayad vyàstaḥ //
   vŕ̥ṣṇo vádʰriḥ pratimā́nam búbʰūṣan
   vŕ̥ṣṇaḥ vádʰriḥ pratimā́nam búbʰūṣan
   vŕ̥ṣṇo vádʰriḥ pratimā́nam búbʰūṣan

Halfverse: d    purutrā́ vr̥tró aśayad vyàstaḥ //
   purutrā́ vr̥tráḥ aśayat vyàstaḥ //
   purutrā́ vr̥tró aśayad víastaḥ //


Verse: 8 
Halfverse: a    nadáṃ ná bʰinnám amuyā́ śáyānam máno rúhāṇā áti yanty ā́paḥ /
   nadáṃ ná bʰinnám amuyā́ śáyānam
   nadám ná bʰinnám amuyā́ śáyānam
   nadáṃ ná bʰinnám amuyā́ śáyānam

Halfverse: b    máno rúhāṇā áti yanty ā́paḥ /
   mánoḥ ! úhānāḥ ! áti yanti ā́paḥ /
   máno rúhāṇā áti yanti ā́paḥ /

Halfverse: c    yā́ś cid vr̥tró mahinā́ paryátiṣṭʰat tā́sām áhiḥ patsutaḥśī́r babʰūva //
   yā́ś cid vr̥tró mahinā́ paryátiṣṭʰat
   yā́ḥ cit vr̥tráḥ mahinā́ paryátiṣṭʰat
   yā́ś cid vr̥tró mahinā́ paryátiṣṭʰat

Halfverse: d    tā́sām áhiḥ patsutaḥśī́r babʰūva //
   tā́sām áhiḥ patsutaḥśī́ḥ babʰūva //
   tā́sām áhiḥ patsutaḥśī́r babʰūva //


Verse: 9 
Halfverse: a    nīcā́vayā abʰavad vr̥tráputréndro asyā áva vádʰar jabʰāra /
   nīcā́vayā abʰavad vr̥tráputrā_
   nīcā́vayāḥ abʰavat vr̥tráputrā
   nīcā́vayā abʰavad vr̥tráputra

Halfverse: b    _índro asyā áva vádʰar jabʰāra /
   índraḥ asyāḥ áva vádʰar jabʰāra /
   índro asyā áva vádʰar jabʰāra /

Halfverse: c    úttarā sū́r ádʰaraḥ putrá āsīd dā́nuḥ śaye sahávatsā ná dʰenúḥ //
   úttarā sū́r ádʰaraḥ putrá āsīd
   úttarā sū́ḥ ádʰaraḥ putráḥ āsīt
   úttarā sū́r ádʰaraḥ putrá āsīd

Halfverse: d    dā́nuḥ śaye sahávatsā ná dʰenúḥ //
   dā́nuḥ śaye sahávatsā ná dʰenúḥ //
   dā́nuḥ śaye sahávatsā ná dʰenúḥ //


Verse: 10 
Halfverse: a    átiṣṭʰantīnām aniveśanā́nāṃ kā́ṣṭʰānām mádʰye níhitaṃ śárīram /
   átiṣṭʰantīnām aniveśanā́nāṃ
   átiṣṭʰantīnām aniveśanā́nām
   átiṣṭʰantīnām aniveśanā́nāṃ

Halfverse: b    kā́ṣṭʰānām mádʰye níhitaṃ śárīram /
   kā́ṣṭʰānām mádʰye níhitam śárīram /
   kā́ṣṭʰānām mádʰye níhitaṃ śárīram /

Halfverse: c    vr̥trásya niṇyáṃ ví caranty ā́po dīrgʰáṃ táma ā́śayad índraśatruḥ //
   vr̥trásya niṇyáṃ ví caranty ā́po
   vr̥trásya niṇyám ví caranti ā́paḥ
   vr̥trásya niṇyáṃ ví caranti ā́po

Halfverse: d    dīrgʰáṃ táma ā́śayad índraśatruḥ //
   dīrgʰám támaḥ ā́ aśayat índraśatruḥ //
   dīrgʰáṃ táma ā́śayad índraśatruḥ //


Verse: 11 
Halfverse: a    dāsápatnīr áhigopā atiṣṭʰan níruddʰā ā́paḥ paṇíneva gā́vaḥ /
   dāsápatnīr áhigopā atiṣṭʰan
   dāsápatnīḥ áhigopāḥ atiṣṭʰan
   dāsápatnīr áhigopā atiṣṭʰan

Halfverse: b    níruddʰā ā́paḥ paṇíneva gā́vaḥ /
   níruddʰāḥ ā́paḥ paṇínā iva gā́vaḥ /
   níruddʰā ā́paḥ paṇíneva gā́vaḥ /

Halfverse: c    apā́m bílam ápihitaṃ yád ā́sīd vr̥tráṃ jagʰanvā́m̐ ápa tád vavāra //
   apā́m bílam ápihitaṃ yád ā́sīd
   apā́m bílam ápihitam yát ā́sīt
   apā́m bílam ápihitaṃ yád ā́sīd

Halfverse: d    vr̥tráṃ jagʰanvā́m̐ ápa tád vavāra //
   vr̥trám jagʰanvā́n ápa tát vavāra //
   vr̥tráṃ jagʰanvā́m̐ ápa tád vavāra //


Verse: 12 
Halfverse: a    áśvyo vā́ro abʰavas tád indra sr̥ké yát tvā pratyáhan devá ékaḥ /
   áśvyo vā́ro abʰavas tád indra
   áśvyaḥ vā́raḥ abʰavaḥ tát indra
   áśviyo vā́ro abʰavas tád indra

Halfverse: b    sr̥ké yát tvā pratyáhan devá ékaḥ /
   sr̥ké yát tvā pratyáhan deváḥ ékaḥ /
   sr̥ké yát tvā pratyáhan devá ékaḥ /

Halfverse: c    ájayo gā́ ájayaḥ śūra sómam ávāsr̥jaḥ sártave saptá síndʰūn //
   ájayo gā́ ájayaḥ śūra sómam
   ájayaḥ gā́ḥ ájayaḥ śūra sómam
   ájayo gā́ ájayaḥ śūra sómam

Halfverse: d    ávāsr̥jaḥ sártave saptá síndʰūn //
   áva asr̥jaḥ sártave saptá síndʰūn //
   ávāsr̥jaḥ sártave saptá síndʰūn //


Verse: 13 
Halfverse: a    nā́smai vidyún ná tanyatúḥ siṣedʰa ná yā́m míham ákirad dʰrādúniṃ ca /
   nā́smai vidyún ná tanyatúḥ siṣedʰa
   ná asmai vidyút ná tanyatúḥ siṣedʰa
   nā́smai vidyún ná tanyatúḥ siṣedʰa

Halfverse: b    ná yā́m míham ákirad dʰrādúniṃ ca /
   ná yā́m míham ákirat hrādúnim ca /
   ná yā́m míham ákirad dʰrādúniṃ ca /

Halfverse: c    índraś ca yád yuyudʰā́te áhiś cotā́parī́bʰyo magʰávā ví jigye //
   índraś ca yád yuyudʰā́te áhiś ca_
   índraḥ ca yát yuyudʰā́te áhiḥ ca
   índraś ca yád yuyudʰā́te áhiś ca

Halfverse: d    _utā́parī́bʰyo magʰávā ví jigye //
   utá aparī́bʰyaḥ magʰávā ví jigye //
   utā́parī́bʰyo magʰávā ví jigye //


Verse: 14 
Halfverse: a    áher yātā́raṃ kám apaśya indra hr̥dí yát te jagʰnúṣo bʰī́r ágacʰat /
   áher yātā́raṃ kám apaśya indra
   áheḥ yātā́ram kám apaśyaḥ indra
   áher yātā́raṃ kám apaśya indra

Halfverse: b    hr̥dí yát te jagʰnúṣo bʰī́r ágacʰat /
   hr̥dí yát te jagʰnúṣaḥ bʰī́ḥ ágacʰat /
   hr̥dí yát te jagʰnúṣo bʰī́r ágacʰat /

Halfverse: c    náva ca yán navatíṃ ca srávantīḥ śyenó ná bʰītó átaro rájāṃsi //
   náva ca yán navatíṃ ca srávantīḥ
   náva ca yát navatím ca srávantīḥ
   náva ca yán navatíṃ ca srávantīḥ

Halfverse: d    śyenó ná bʰītó átaro rájāṃsi //
   śyenáḥ ná bʰītáḥ átaraḥ rájāṃsi //
   śyenó ná bʰītó átaro rájāṃsi //


Verse: 15 
Halfverse: a    índro yātó 'vasitasya rā́jā śámasya ca śr̥ṅgíṇo vájrabāhuḥ /
   índro yātó 'vasitasya rā́jā
   índraḥ yātáḥ ávasitasya rā́jā
   índro yātó ávasitasya rā́jā

Halfverse: b    śámasya ca śr̥ṅgíṇo vájrabāhuḥ /
   śámasya ca śr̥ṅgíṇaḥ vájrabāhuḥ /
   śámasya ca śr̥ṅgíṇo vájrabāhuḥ /

Halfverse: c    séd u rā́jā kṣayati carṣaṇīnā́m arā́n ná nemíḥ pári tā́ babʰūva //
   séd u rā́jā kṣayati carṣaṇīnā́m
   sá ít u rā́jā kṣayati carṣaṇīnā́m
   séd u rā́jā kṣayati carṣaṇīnā́m

Halfverse: d    arā́n ná nemíḥ pári tā́ babʰūva //
   arā́n ná nemíḥ pári tā́ babʰūva //
   arā́n ná nemíḥ pári tā́ babʰūva //


Next part


This text is part of the TITUS edition of Rg-Veda: Rg-Veda-Samhita.

Copyright TITUS Project, Frankfurt a/M, 28.7.2009. No parts of this document may be republished in any form without prior permission by the copyright holder.