TITUS
Rg-Veda: Rg-Veda-Samhita
Part No. 33
Previous part

Hymn: 33 
Verse: 1 
Halfverse: a    étā́yāmópa gavyánta índram asmā́kaṃ sú prámatiṃ vāvr̥dʰāti /
   étā́yāmópa gavyánta índram
   ā́ ita áyāma úpa gavyántaḥ índram
   étā́yāma úpa gavyánta índram

Halfverse: b    asmā́kaṃ sú prámatiṃ vāvr̥dʰāti /
   asmā́kam sú prámatim vāvr̥dʰāti /
   asmā́kaṃ sú prámatiṃ vāvr̥dʰāti /

Halfverse: c    anāmr̥ṇáḥ kuvíd ā́d asyá rāyó gávāṃ kétam páram āvárjate naḥ //
   anāmr̥ṇáḥ kuvíd ā́d asyá rāyó
   anāmr̥ṇáḥ kuvít ā́t asyá rāyáḥ
   anāmr̥ṇáḥ kuvíd ā́d asyá rāyó

Halfverse: d    gávāṃ kétam páram āvárjate naḥ //
   gávām kétam páram āvárjate naḥ //
   gávāṃ kétam páram āvárjate naḥ //


Verse: 2 
Halfverse: a    úpéd aháṃ dʰanadā́m ápratītaṃ júṣṭāṃ ná śyenó vasatím patāmi /
   úpéd aháṃ dʰanadā́m ápratītaṃ
   úpa ít ahám dʰanadā́m ápratītam
   úpéd aháṃ dʰanadā́m ápratītaṃ

Halfverse: b    júṣṭāṃ ná śyenó vasatím patāmi /
   júṣṭām \!\ ná śyenáḥ vasatím patāmi /
   júṣṭāṃ ná śyenó vasatím patāmi /

Halfverse: c    índraṃ namasyánn upamébʰir arkaír yá stotŕ̥bʰyo hávyo ásti yā́man //
   índraṃ namasyánn upamébʰir arkaír
   índram namasyán upamébʰiḥ arkaíḥ
   índraṃ namasyánn upamébʰir arkaír

Halfverse: d    yá stotŕ̥bʰyo hávyo ásti yā́man //
   yáḥ stotŕ̥bʰyaḥ hávyaḥ ásti yā́man //
   yá stotŕ̥bʰyo háviyo ásti yā́man //


Verse: 3 
Halfverse: a    ní sárvasena iṣudʰī́m̐r asakta sám aryó gā́ ajati yásya váṣṭi /
   ní sárvasena iṣudʰī́m̐r asakta
   ní sárvasenaḥ iṣudʰī́n asakta
   ní sárvasena iṣudʰī́m̐r asakta

Halfverse: b    sám aryó gā́ ajati yásya váṣṭi /
   sám aryáḥ gā́ḥ ajati yásya váṣṭi /
   sám aryó gā́ ajati yásya váṣṭi /

Halfverse: c    coṣkūyámāṇa indra bʰū́ri vāmám mā́ paṇír bʰūr asmád ádʰi pravr̥ddʰa //
   coṣkūyámāṇa indra bʰū́ri vāmám
   coṣkūyámāṇaḥ indra bʰū́ri vāmám
   coṣkūyámāṇa indra bʰū́ri vāmám

Halfverse: d    mā́ paṇír bʰūr asmád ádʰi pravr̥ddʰa //
   mā́ paṇíḥ bʰūḥ asmát ádʰi pravr̥ddʰa //
   mā́ paṇír bʰūr asmád ádʰi pravr̥ddʰa //


Verse: 4 
Halfverse: a    vádʰīr hí dásyuṃ dʰanínaṃ gʰanénam̐ ékaś cárann upaśākébʰir indra /
   vádʰīr hí dásyuṃ dʰanínaṃ gʰanénam̐
   vádʰīḥ hí dásyum dʰanínam gʰanéna
   vádʰīr hí dásyuṃ dʰanínaṃ gʰanénam̐

Halfverse: b    ékaś cárann upaśākébʰir indra /
   ékaḥ cáran upaśākébʰiḥ indra /
   ékaś cárann upaśākébʰir indra /

Halfverse: c    dʰánor ádʰi viṣuṇák té vy ā̀yann áyajvānaḥ sanakā́ḥ prétim īyuḥ //
   dʰánor ádʰi viṣuṇák té vy ā̀yann
   dʰánoḥ ádʰi viṣuṇák té ví āyan
   dʰánor ádʰi viṣuṇák té ví āyann

Halfverse: d    áyajvānaḥ sanakā́ḥ prétim īyuḥ //
   áyajvānaḥ \!\ sanakā́ḥ prétim īyuḥ //
   áyajvānaḥ sanakā́ḥ prétim īyuḥ //


Verse: 5 
Halfverse: a    párā cic cʰīrṣā́ vavr̥jus tá indrā́yajvāno yájvabʰi spárdʰamānāḥ /
   párā cic cʰīrṣā́ vavr̥jus tá indra_
   párā cit śīrṣā́ vavr̥juḥ té indra
   párā cic cʰīrṣā́ vavr̥jus tá indra

Halfverse: b    _áyajvāno yájvabʰi spárdʰamānāḥ /
   áyajvānaḥ yájvabʰiḥ spárdʰamānāḥ /
   áyajvāno yájvabʰi spárdʰamānāḥ /

Halfverse: c    prá yád divó hariva stʰātar ugra nír avratā́m̐ adʰamo ródasyoḥ //
   prá yád divó hariva stʰātar ugra
   prá yát diváḥ harivaḥ stʰātar ugra
   prá yád divó hariva stʰātar ugra

Halfverse: d    nír avratā́m̐ adʰamo ródasyoḥ //
   níḥ avratā́n adʰamaḥ ródasyoḥ //
   nír avratā́m̐ adʰamo ródasīyoḥ //


Verse: 6 
Halfverse: a    áyuyutsann anavadyásya sénām áyātayanta kṣitáyo návagvāḥ /
   áyuyutsann anavadyásya sénām
   áyuyutsan anavadyásya sénām
   áyuyutsann anavadyásya sénām

Halfverse: b    áyātayanta kṣitáyo návagvāḥ /
   áyātayanta kṣitáyaḥ návagvāḥ /
   áyātayanta kṣitáyo návagvāḥ /

Halfverse: c    vr̥ṣāyúdʰo ná vádʰrayo níraṣṭāḥ pravádbʰir índrāc citáyanta āyan //
   vr̥ṣāyúdʰo ná vádʰrayo níraṣṭāḥ
   vr̥ṣāyúdʰaḥ ná vádʰrayaḥ níraṣṭāḥ
   vr̥ṣāyúdʰo ná vádʰrayo níraṣṭāḥ

Halfverse: d    pravádbʰir índrāc citáyanta āyan //
   pravádbʰiḥ índrāt citáyantaḥ āyan //
   pravádbʰir índrāc citáyanta āyan //


Verse: 7 
Halfverse: a    tvám etā́n rudató jákṣataś cā́yodʰayo rájasa indra pāré /
   tvám etā́n rudató jákṣataś ca_
   tvám etā́n rudatáḥ jákṣataḥ ca
   tuvám etā́n rudató jákṣataś ca

Halfverse: b    _áyodʰayo rájasa indra pāré /
   áyodʰayaḥ rájasaḥ indra pāré /
   áyodʰayo rájasa indra pāré /

Halfverse: c    ávādaho divá ā́ dásyum uccā́ prá sunvatá stuvatáḥ śáṃsam āvaḥ //
   ávādaho divá ā́ dásyum uccā́
   áva adahaḥ diváḥ ā́ dásyum uccā́
   ávādaho divá ā́ dásyum uccā́

Halfverse: d    prá sunvatá stuvatáḥ śáṃsam āvaḥ //
   prá sunvatáḥ stuvatáḥ śáṃsam āvaḥ //
   prá sunvatá stuvatáḥ śáṃsam āvaḥ //


Verse: 8 
Halfverse: a    cakrāṇā́saḥ parīṇáham pr̥tʰivyā́ híraṇyena maṇínā śúmbʰamānāḥ /
   cakrāṇā́saḥ parīṇáham pr̥tʰivyā́
   cakrāṇā́saḥ parīṇáham pr̥tʰivyā́ḥ
   cakrāṇā́saḥ parīṇáham pr̥tʰivyā́

Halfverse: b    híraṇyena maṇínā śúmbʰamānāḥ /
   híraṇyena maṇínā śúmbʰamānāḥ /
   híraṇyena maṇínā śúmbʰamānāḥ /

Halfverse: c    ná hinvānā́sas titirus tá índram pári spáśo adadʰāt sū́ryeṇa //
   ná hinvānā́sas titirus tá índram
   ná hinvānā́saḥ titiruḥ té índram
   ná hinvānā́sas titirus tá índram

Halfverse: d    pári spáśo adadʰāt sū́ryeṇa //
   pári spáśaḥ adadʰāt sū́ryeṇa //
   pári spáśo adadʰāt sū́riyeṇa //


Verse: 9 
Halfverse: a    pári yád indra ródasī ubʰé ábubʰojīr mahinā́ viśvátaḥ sīm /
   pári yád indra ródasī ubʰé
   pári yát indra ródasī ubʰé
   pári yád indara ródasī ubʰé

Halfverse: b    ábubʰojīr mahinā́ viśvátaḥ sīm /
   ábubʰojīḥ mahinā́ viśvátaḥ sīm /
   ábubʰojīr mahinā́ viśvátaḥ sīm /

Halfverse: c    ámanyamānām̐ abʰí mányamānair nír brahmábʰir adʰamo dásyum indra //
   ámanyamānām̐ abʰí mányamānair
   ámanyamānān abʰí mányamānaiḥ
   ámanyamānām̐ abʰí mányamānair

Halfverse: d    nír brahmábʰir adʰamo dásyum indra //
   níḥ brahmábʰiḥ adʰamaḥ dásyum indra //
   nír brahmábʰir adʰamo dásyum indra //


Verse: 10 
Halfverse: a    ná yé diváḥ pr̥tʰivyā́ ántam āpúr ná māyā́bʰir dʰanadā́m paryábʰūvan /
   ná yé diváḥ pr̥tʰivyā́ ántam āpúr
   ná yé diváḥ pr̥tʰivyā́ḥ ántam āpúḥ
   ná yé diváḥ pr̥tʰivyā́ ántam āpúr

Halfverse: b    ná māyā́bʰir dʰanadā́m paryábʰūvan /
   ná māyā́bʰiḥ dʰanadā́m paryábʰūvan /
   ná māyā́bʰir dʰanadā́m paryábʰūvan /

Halfverse: c    yújaṃ vájraṃ vr̥ṣabʰáś cakra índro nír jyótiṣā támaso gā́ adukṣat //
   yújaṃ vájraṃ vr̥ṣabʰáś cakra índro
   yújam vájram vr̥ṣabʰáḥ cakre índraḥ
   yújaṃ vájraṃ vr̥ṣabʰáś cakra índro

Halfverse: d    nír jyótiṣā támaso gā́ adukṣat //
   níḥ jyótiṣā támasaḥ gā́ḥ adukṣat //
   nír jyótiṣā támaso gā́ adukṣat //


Verse: 11 
Halfverse: a    ánu svadʰā́m akṣarann ā́po asyā́vardʰata mádʰya ā́ nāvyā̀nām /
   ánu svadʰā́m akṣarann ā́po asya_
   ánu svadʰā́m akṣaran ā́paḥ asya
   ánu svadʰā́m akṣarann ā́po asya

Halfverse: b    _ávardʰata mádʰya ā́ nāvyā̀nām /
   ávardʰata mádʰye ā́ nāvyā̀nām /
   ávardʰata mádʰya ā́ nāvíyānām /

Halfverse: c    sadʰrīcī́nena mánasā tám índra ójiṣṭʰena hánmanāhann abʰí dyū́n //
   sadʰrīcī́nena mánasā tám índra
   sadʰrīcī́nena mánasā tám índraḥ
   sadʰrīcī́nena mánasā tám índra

Halfverse: d    ójiṣṭʰena hánmanāhann abʰí dyū́n //
   ójiṣṭʰena hánmanā ahan abʰí dyū́n //
   ójiṣṭʰena hánmanāhann abʰí dyū́n //


Verse: 12 
Halfverse: a    ny ā̀vidʰyad ilībíśasya dr̥ḷʰā́ ví śr̥ṅgíṇam abʰinac cʰúṣṇam índraḥ /
   ny ā̀vidʰyad ilībíśasya dr̥ḷʰā́
   ní āvidʰyat ilībíśasya dr̥ḷʰā́
   ní āvidʰyad ilībíśasya dr̥ḷʰā́

Halfverse: b    ví śr̥ṅgíṇam abʰinac cʰúṣṇam índraḥ /
   ví śr̥ṅgíṇam abʰinat śúṣṇam índraḥ /
   ví śr̥ṅgíṇam abʰinac cʰúṣṇam índraḥ /

Halfverse: c    yā́vat táro magʰavan yā́vad ójo vájreṇa śátrum avadʰīḥ pr̥tanyúm //
   yā́vat táro magʰavan yā́vad ójo
   yā́vat táraḥ magʰavan yā́vat ójaḥ
   yā́vat táro magʰavan yā́vad ójo

Halfverse: d    vájreṇa śátrum avadʰīḥ pr̥tanyúm //
   vájreṇa śátrum avadʰīḥ pr̥tanyúm //
   vájreṇa śátrum avadʰīḥ pr̥tanyúm //


Verse: 13 
Halfverse: a    abʰí sidʰmó ajigād asya śátrūn ví tigména vr̥ṣabʰéṇā púro 'bʰet /
   abʰí sidʰmó ajigād asya śátrūn
   abʰí sidʰmáḥ ajigāt asya śátrūn
   abʰí sidʰmó ajigād asya śátrūn

Halfverse: b    ví tigména vr̥ṣabʰéṇā púro 'bʰet /
   ví tigména vr̥ṣabʰéṇa+ púraḥ abʰet /
   ví tigména vr̥ṣabʰéṇā púro 'bʰet /

Halfverse: c    sáṃ vájreṇāsr̥jad vr̥trám índraḥ prá svā́m matím atirac cʰā́śadānaḥ //
   sáṃ vájreṇāsr̥jad vr̥trám índraḥ
   sám vájreṇa asr̥jat vr̥trám índraḥ
   sáṃ vájreṇa asr̥jad vr̥trám índraḥ

Halfverse: d    prá svā́m matím atirac cʰā́śadānaḥ //
   prá svā́m matím atirat śā́śadānaḥ //
   prá svā́m matím atirac cʰā́śadānaḥ //


Verse: 14 
Halfverse: a    ā́vaḥ kútsam indra yásmiñ cākán prā́vo yúdʰyantaṃ vr̥ṣabʰáṃ dáśadyum /
   ā́vaḥ kútsam indra yásmiñ cākán
   ā́vaḥ kútsam indra yásmin cākán
   ā́vaḥ kútsam indara yásmi* cākán

Halfverse: b    prā́vo yúdʰyantaṃ vr̥ṣabʰáṃ dáśadyum /
   prá āvaḥ yúdʰyantam vr̥ṣabʰám dáśadyum /
   prā́vo yúdʰyantaṃ vr̥ṣabʰáṃ dáśadyum /

Halfverse: c    śapʰácyuto reṇúr nakṣata dyā́m úc cʰvaitreyó nr̥ṣā́hyāya tastʰau //
   śapʰácyuto reṇúr nakṣata dyā́m
   śapʰácyutaḥ reṇúḥ nakṣata dyā́m
   śapʰácyuto rẽeṇúr nakṣata dyā́m

Halfverse: d    úc cʰvaitreyó nr̥ṣā́hyāya tastʰau //
   út śvaitreyáḥ nr̥ṣā́hyāya tastʰau //
   úc cʰvaitreyó nr̥ṣā́hiyāya tastʰau //


Verse: 15 
Halfverse: a    ā́vaḥ śámaṃ vr̥ṣabʰáṃ túgryāsu kṣetrajeṣé magʰavañ cʰvítryaṃ gā́m /
   ā́vaḥ śámaṃ vr̥ṣabʰáṃ túgryāsu
   ā́vaḥ śámam vr̥ṣabʰám túgryāsu
   ā́vaḥ śámaṃ vr̥ṣabʰáṃ túgriyāsu

Halfverse: b    kṣetrajeṣé magʰavañ cʰvítryaṃ gā́m /
   kṣetrajeṣé magʰavan śvítryam gā́m /
   kṣetrajeṣé magʰavañ cʰvítriyaṃ gā́m /

Halfverse: c    jyók cid átra tastʰivā́ṃso akrañ cʰatrūyatā́m ádʰarā védanākaḥ //
   jyók cid átra tastʰivā́ṃso akrañ
   jyók cit átra tastʰivā́ṃsaḥ akran
   jiyók cid átra tastʰivā́ṃso akrañ

Halfverse: d    cʰatrūyatā́m ádʰarā védanākaḥ //
   śatrūyatā́m ádʰarā védanā akar //
   cʰatrūyatā́m ádʰarā védanākaḥ //


Next part


This text is part of the TITUS edition of Rg-Veda: Rg-Veda-Samhita.

Copyright TITUS Project, Frankfurt a/M, 28.7.2009. No parts of this document may be republished in any form without prior permission by the copyright holder.