TITUS
Rg-Veda: Rg-Veda-Samhita
Part No. 36
Previous part

Hymn: 36 
Verse: 1 
Halfverse: a    prá vo yahvám purūṇā́ṃ viśā́ṃ devayatī́nām /
   prá vo yahvám purūṇā́ṃ
   prá vaḥ yahvám purūṇā́m
   prá vo yahvám purūṇâáṃ

Halfverse: b    viśā́ṃ devayatī́nām /
   viśā́m devayatī́nām /
   viśā́ṃ devayatī́nãam /

Halfverse: c    agníṃ sūktébʰir vácobʰir īmahe / yáṃ sīm íd anyá ī́ḷate //
   agníṃ sūktébʰir vácobʰir īmahe
   agním sūktébʰiḥ vácobʰiḥ īmahe
   agníṃ suuktébʰir vácobʰir īmahe

Halfverse: d    yáṃ sīm íd anyá ī́ḷate //
   yám sīm ít anyé ī́ḷate //
   yáṃ sīm íd anyá ī́ḷate //


Verse: 2 
Halfverse: a    jánāso agníṃ dadʰire sahovŕ̥dʰaṃ / havíṣmanto vidʰema te /
   jánāso agníṃ dadʰire sahovŕ̥dʰaṃ
   jánāsaḥ agním dadʰire sahovŕ̥dʰam
   jánāso agníṃ dadʰire sahovŕ̥dʰaṃ

Halfverse: b    havíṣmanto vidʰema te /
   havíṣmantaḥ vidʰema te /
   havíṣmanto vidʰema te /

Halfverse: c    sá tváṃ no adyá sumánā ihā́vitā́ / bʰávā vā́jeṣu santya //
   sá tváṃ no adyá sumánā ihā́vitā́
   sá tvám naḥ adyá sumánāḥ ihá avitā́
   sá tváṃ no adyá sumánā ihā́vitā́

Halfverse: d    bʰávā vā́jeṣu santya //
   bʰáva+ vā́jeṣu santya //
   bʰávā vā́jeṣu santiya //


Verse: 3 
Halfverse: a    prá tvā dūtáṃ vr̥ṇīmahe hótāraṃ viśvávedasam /
   prá tvā dūtáṃ vr̥ṇīmahe
   prá tvā dūtám vr̥ṇīmahe
   prá tvā dūtáṃ vr̥ṇīmahe

Halfverse: b    hótāraṃ viśvávedasam /
   hótāram viśvávedasam /
   hótāraṃ viśvávedasam /

Halfverse: c    mahás te sató ví caranty arcáyo / diví spr̥śanti bʰānávaḥ //
   mahás te sató ví caranty arcáyo
   maháḥ te satáḥ ví caranti arcáyaḥ
   mahás te sató ví caranti arcáyo

Halfverse: d    diví spr̥śanti bʰānávaḥ //
   diví spr̥śanti bʰānávaḥ //
   diví spr̥śanti bʰānávaḥ //


Verse: 4 
Halfverse: a    devā́sas tvā váruṇo mitró aryamā́ / sáṃ dūtám pratnám indʰate /
   devā́sas tvā váruṇo mitró aryamā́
   devā́saḥ tvā váruṇaḥ mitráḥ aryamā́
   devā́sas tvā váruṇo mitró aryamā́

Halfverse: b    sáṃ dūtám pratnám indʰate /
   sám dūtám pratnám indʰate /
   sáṃ dūtám pratnám indʰate /

Halfverse: c    víśvaṃ só agne jayati tváyā dʰánaṃ / yás te dadā́śa mártyaḥ //
   víśvaṃ só agne jayati tváyā dʰánaṃ
   víśvam sáḥ agne jayati tváyā dʰánam
   víśvaṃ só agne jayati tváyā dʰánaṃ

Halfverse: d    yás te dadā́śa mártyaḥ //
   yáḥ te dadā́śa mártyaḥ //
   yás te dadā́śa mártiyaḥ //


Verse: 5 
Halfverse: a    mandró hótā gr̥hápatir ágne dūtó viśā́m asi /
   mandró hótā gr̥hápatir
   mandráḥ hótā gr̥hápatiḥ
   mandró hótā gr̥hápatir

Halfverse: b    ágne dūtó viśā́m asi /
   ágne dūtáḥ viśā́m asi /
   ágne dūtó viśā́m asi /

Halfverse: c    tvé víśvā sáṃgatāni vratā́ dʰruvā́ / yā́ni devā́ ákr̥ṇvata //
   tvé víśvā sáṃgatāni vratā́ dʰruvā́
   tvé víśvā sáṃgatāni vratā́ dʰruvā́
   tuvé víśvā sáṃgatāni vratā́ dʰruvā́

Halfverse: d    yā́ni devā́ ákr̥ṇvata //
   yā́ni devā́ḥ ákr̥ṇvata //
   yā́ni devā́ ákr̥ṇvata //


Verse: 6 
Halfverse: a    tvé íd agne subʰáge yaviṣṭʰya / víśvam ā́ hūyate havíḥ /
   tvé íd agne subʰáge yaviṣṭʰya
   tvé ít agne subʰáge yaviṣṭʰya
   tuvé íd agne subʰáge yaviṣṭʰiya

Halfverse: b    víśvam ā́ hūyate havíḥ /
   víśvam ā́ hūyate havíḥ /
   víśvam ā́ hūyate havíḥ /

Halfverse: c    sá tváṃ no adyá sumánā utā́paráṃ / yákṣi devā́n suvī́ryā //
   sá tváṃ no adyá sumánā utā́paráṃ
   sá tvám naḥ adyá sumánāḥ utá aparám
   sá tváṃ no adyá sumánā utā́paráṃ

Halfverse: d    yákṣi devā́n suvī́ryā //
   yákṣi devā́n suvī́ryā //
   yákṣi devā́n suvī́riyā //


Verse: 7 
Halfverse: a    táṃ gʰem ittʰā́ namasvína úpa svarā́jam āsate /
   táṃ gʰem ittʰā́ namasvína
   tám gʰa īm ittʰā́ namasvínaḥ
   táṃ gʰem ittʰā́ namasvína

Halfverse: b    úpa svarā́jam āsate /
   úpa svarā́jam āsate /
   úpa svarā́jam āsate /

Halfverse: c    hótrābʰir agním mánuṣaḥ sám indʰate / titirvā́ṃso áti srídʰaḥ //
   hótrābʰir agním mánuṣaḥ sám indʰate
   hótrābʰiḥ agním mánuṣaḥ sám indʰate
   hótrābʰir agním mánuṣaḥ sám indʰate

Halfverse: d    titirvā́ṃso áti srídʰaḥ //
   titirvā́ṃsaḥ áti srídʰaḥ //
   titirvā́ṃso áti srídʰaḥ //


Verse: 8 
Halfverse: a    gʰnánto vr̥trám ataran ródasī apá / urú kṣáyāya cakrire /
   gʰnánto vr̥trám ataran ródasī apá
   gʰnántaḥ vr̥trám ataran ródasī apáḥ
   gʰnánto vr̥trám ataran ródasī apá

Halfverse: b    urú kṣáyāya cakrire /
   urú kṣáyāya cakrire /
   urú kṣáyāya cakrire /

Halfverse: c    bʰúvat káṇve vŕ̥ṣā dyumny ā́hutaḥ / krándad áśvo gáviṣṭiṣu //
   bʰúvat káṇve vŕ̥ṣā dyumny ā́hutaḥ
   bʰúvat káṇve vŕ̥ṣā dyumnī́ ā́hutaḥ
   bʰúvat káṇve vŕ̥ṣā diyumnī́ ā́hutaḥ

Halfverse: d    krándad áśvo gáviṣṭiṣu //
   krándat áśvaḥ gáviṣṭiṣu //
   krándad áśvo gáviṣṭiṣu //


Verse: 9 
Halfverse: a    sáṃ sīdasva mahā́m̐ asi śócasva devavī́tamaḥ /
   sáṃ sīdasva mahā́m̐ asi
   sám sīdasva mahā́n asi
   sáṃ sīdasva mahā́m̐ asi

Halfverse: b    śócasva devavī́tamaḥ /
   śócasva devavī́tamaḥ /
   śócasva devavī́tamaḥ /

Halfverse: c    ví dʰūmám agne aruṣám miyedʰya sr̥já praśasta darśatám //
   ví dʰūmám agne aruṣám miyedʰya
   ví dʰūmám agne aruṣám miyedʰya
   ví dʰūmám agne aruṣám miyedʰiya

Halfverse: d    sr̥já praśasta darśatám //
   sr̥já praśasta darśatám //
   sr̥já praśasta darśatám //


Verse: 10 
Halfverse: a    yáṃ tvā devā́so mánave dadʰúr ihá / yájiṣṭʰaṃ havyavāhana /
   yáṃ tvā devā́so mánave dadʰúr ihá
   yám tvā devā́saḥ mánave dadʰúḥ ihá
   yáṃ tvā devā́so mánave dadʰúr ihá

Halfverse: b    yájiṣṭʰaṃ havyavāhana /
   yájiṣṭʰam havyavāhana /
   yájiṣṭʰaṃ havyavāhana /

Halfverse: c    yáṃ káṇvo médʰyātitʰir dʰanaspŕ̥taṃ / yáṃ vŕ̥ṣā yám upastutáḥ //
   yáṃ káṇvo médʰyātitʰir dʰanaspŕ̥taṃ
   yám káṇvaḥ médʰyātitʰiḥ dʰanaspŕ̥tam
   yáṃ káṇvo médʰiyātitʰir dʰanaspŕ̥taṃ

Halfverse: d    yáṃ vŕ̥ṣā yám upastutáḥ //
   yám vŕ̥ṣā yám upastutáḥ //
   yáṃ vŕ̥ṣā yám upastutáḥ //


Verse: 11 
Halfverse: a    yám agním médʰyātitʰiḥ káṇva īdʰá r̥tā́d ádʰi /
   yám agním médʰyātitʰiḥ
   yám agním médʰyātitʰiḥ
   yám agním médʰiyātitʰiḥ

Halfverse: b    káṇva īdʰá r̥tā́d ádʰi /
   káṇvaḥ īdʰé r̥tā́t ádʰi /
   káṇva īdʰá r̥tā́d ádʰi /

Halfverse: c    tásya préṣo dīdiyus tám imā́ ŕ̥cas / tám agníṃ vardʰayāmasi //
   tásya préṣo dīdiyus tám imā́ ŕ̥cas
   tásya prá íṣaḥ dīdiyuḥ tám imā́ḥ ŕ̥caḥ
   tásya préṣo dīdiyus tám imā́ ŕ̥cas

Halfverse: d    tám agníṃ vardʰayāmasi //
   tám agním vardʰayāmasi //
   tám agníṃ vardʰayāmasi //


Verse: 12 
Halfverse: a    rāyás pūrdʰi svadʰāvó 'sti hí \!\ té 'gne devéṣv ā́pyam /
   rāyás pūrdʰi svadʰāvó 'sti hí té
   rāyáḥ pūrdʰi svadʰāvaḥ ásti hí te
   rāyás pūrdʰi svadʰāvó ásti hí te

Halfverse: b    'gne devéṣv ā́pyam /
   ágne devéṣu ā́pyam /
   ágne devéṣu ā́piyam /

Halfverse: c    tváṃ vā́jasya śrútyasya rājasi / sá no mr̥ḷa mahā́m̐ asi //
   tváṃ vā́jasya śrútyasya rājasi
   tvám vā́jasya śrútyasya rājasi
   tuváṃ vā́jasya śrútiyasya rājasi

Halfverse: d    sá no mr̥ḷa mahā́m̐ asi //
   sá naḥ mr̥ḷa mahā́n asi //
   sá no mr̥ḷa mahā́m̐ asi //


Verse: 13 
Halfverse: a    ūrdʰvá ū ṣú ṇa ūtáye tíṣṭʰā devó ná savitā́ /
   ūrdʰvá ū ṣú ṇa ūtáye
   ūrdʰváḥ u+ sú naḥ ūtáye
   ūrdʰvá ū ṣú ṇa ūtáye

Halfverse: b    tíṣṭʰā devó ná savitā́ /
   tíṣṭʰa+ deváḥ ná savitā́ /
   tíṣṭʰā devó ná savitā́ /

Halfverse: c    ūrdʰvó vā́jasya sánitā yád añjíbʰir / vāgʰádbʰir vihváyāmahe //
   ūrdʰvó vā́jasya sánitā yád añjíbʰir
   ūrdʰváḥ vā́jasya sánitā yát añjíbʰiḥ
   ūrdʰvó vā́jasya sánitā yád añjíbʰir

Halfverse: d    vāgʰádbʰir vihváyāmahe //
   vāgʰádbʰiḥ vihváyāmahe //
   vāgʰádbʰir vihváyāmahe //


Verse: 14 
Halfverse: a    ūrdʰvó naḥ pāhy áṃhaso ní ketúnā / víśvaṃ sám atríṇaṃ daha /
   ūrdʰvó naḥ pāhy áṃhaso ní ketúnā
   ūrdʰváḥ naḥ pāhi áṃhasaḥ ní ketúnā
   ūrdʰvó naḥ pāhi áṃhaso ní ketúnā

Halfverse: b    víśvaṃ sám atríṇaṃ daha /
   víśvam sám atríṇam daha /
   víśvaṃ sám atríṇaṃ daha /

Halfverse: c    kr̥dʰī́ na ūrdʰvā́ñ carátʰāya jīváse / vidā́ devéṣu no dúvaḥ //
   kr̥dʰī́ na ūrdʰvā́ñ carátʰāya jīváse
   kr̥dʰí+ naḥ ūrdʰvā́n carátʰāya jīváse
   kr̥dʰī́ na ūrdʰvā́ñ carátʰāya jīváse

Halfverse: d    vidā́ devéṣu no dúvaḥ //
   vidā́ḥ devéṣu naḥ dúvaḥ //
   vidā́ devéṣu no dúvaḥ //


Verse: 15 
Halfverse: a    pāhí no agne rakṣásaḥ pāhí dʰūrtér árāvṇaḥ /
   pāhí no agne rakṣásaḥ
   pāhí naḥ agne rakṣásaḥ
   pāhí no agne rakṣásaḥ

Halfverse: b    pāhí dʰūrtér árāvṇaḥ /
   pāhí dʰūrtéḥ árāvṇaḥ /
   pāhí dʰūrtér árāvaṇaḥ /

Halfverse: c    pāhí rī́ṣata utá vā jígʰāṃsato / bŕ̥hadbʰāno yáviṣṭʰya //
   pāhí rī́ṣata utá vā jígʰāṃsato
   pāhí rī́ṣataḥ utá vā jígʰāṃsataḥ
   pāhí rī́ṣata utá vā jígʰāṃsato

Halfverse: d    bŕ̥hadbʰāno yáviṣṭʰya //
   bŕ̥hadbʰāno yáviṣṭʰya //
   bŕ̥hadbʰāno yáviṣṭʰiya //


Verse: 16 
Halfverse: a    gʰanéva víṣvag ví jahy árāvṇas / tápurjambʰa yó asmadʰrúk /
   gʰanéva víṣvag ví jahy árāvṇas
   gʰanā́ iva víṣvak ví jahi árāvṇaḥ
   gʰanéva víṣvag ví jahi árāvaṇas

Halfverse: b    tápurjambʰa yó asmadʰrúk /
   tápurjambʰa yáḥ asmadʰrúk /
   tápurjambʰa yó asmadʰrúk /

Halfverse: c    yó mártyaḥ śíśīte áty aktúbʰir / mā́ naḥ sá ripúr īśata //
   yó mártyaḥ śíśīte áty aktúbʰir
   yáḥ mártyaḥ śíśīte áti aktúbʰiḥ
   yó mártiyaḥ śíśīte áti aktúbʰir

Halfverse: d    mā́ naḥ sá ripúr īśata //
   mā́ naḥ sá ripúḥ īśata //
   mā́ naḥ sá ripúr īśata //


Verse: 17 
Halfverse: a    agnír vavne suvī́ryam agníḥ káṇvāya saúbʰagam /
   agnír vavne suvī́ryam
   agníḥ vavne suvī́ryam
   agnír vavne suvī́riyam

Halfverse: b    agníḥ káṇvāya saúbʰagam /
   agníḥ káṇvāya saúbʰagam /
   agníḥ káṇvāya saúbʰagam /

Halfverse: c    agníḥ prā́van mitrótá médʰyātitʰim / agníḥ sātā́ upastutám //
   agníḥ prā́van mitrótá médʰyātitʰim
   agníḥ prá āvat mitrā́ utá médʰyātitʰim
   agníḥ prā́van mitrótá médʰiyātitʰim

Halfverse: d    agníḥ sātā́ upastutám //
   agníḥ sātaú upastutám //
   agníḥ sātā́ upastutám //


Verse: 18 
Halfverse: a    agnínā turváśaṃ yádum \.\ parāváta / ugrā́devaṃ havāmahe /
   agnínā turváśaṃ yádum parāváta
   agnínā turváśam yádum parāvátaḥ
   agnínā turváśaṃ yádum parāváta

Halfverse: b    ugrā́devaṃ havāmahe /
   ugrā́devam havāmahe /
   ugrā́devaṃ havāmahe /

Halfverse: c    agnír nayan návavāstvam br̥hádratʰaṃ / turvī́tiṃ dásyave sáhaḥ //
   agnír nayan návavāstvam br̥hádratʰaṃ
   agníḥ nayat návavāstvam br̥hádratʰam
   agnír nayan návavāstvam br̥hádratʰaṃ

Halfverse: d    turvī́tiṃ dásyave sáhaḥ //
   turvī́tim dásyave sáhaḥ //
   turvī́tiṃ dásyave sáhaḥ //


Verse: 19 
Halfverse: a    ní tvā́m agne mánur dadʰe jyótir jánāya śáśvate /
   ní tvā́m agne mánur dadʰe
   ní tvā́m agne mánuḥ dadʰe
   ní tvā́m agne mánur dadʰe

Halfverse: b    jyótir jánāya śáśvate /
   jyótiḥ jánāya śáśvate /
   jyótir jánāya śáśvate /

Halfverse: c    dīdétʰa káṇva r̥tájāta ukṣitó / yáṃ namasyánti kr̥ṣṭáyaḥ //
   dīdétʰa káṇva r̥tájāta ukṣitó
   dīdétʰa káṇve r̥tájātaḥ ukṣitáḥ
   dīdétʰa káṇva r̥tájāta ukṣitó

Halfverse: d    yáṃ namasyánti kr̥ṣṭáyaḥ //
   yám namasyánti kr̥ṣṭáyaḥ //
   yáṃ namasyánti kr̥ṣṭáyaḥ //


Verse: 20 
Halfverse: a    tveṣā́so agnér ámavanto arcáyo / bʰīmā́so ná prátītaye /
   tveṣā́so agnér ámavanto arcáyo
   tveṣā́saḥ agnéḥ ámavantaḥ arcáyaḥ
   tveṣā́so agnér ámavanto arcáyo

Halfverse: b    bʰīmā́so ná prátītaye /
   bʰīmā́saḥ ná prátītaye /
   bʰīmā́so ná prátītaye /

Halfverse: c    rakṣasvínaḥ sádam íd yātumā́vato víśvaṃ sám atríṇaṃ daha //
   rakṣasvínaḥ sádam íd yātumā́vato
   rakṣasvínaḥ sádam ít yātumā́vataḥ
   rakṣasvínaḥ sádam íd yātumā́vato

Halfverse: d    víśvaṃ sám atríṇaṃ daha //
   víśvam sám atríṇam daha //
   víśvaṃ sám atríṇaṃ daha //


Next part


This text is part of the TITUS edition of Rg-Veda: Rg-Veda-Samhita.

Copyright TITUS Project, Frankfurt a/M, 28.7.2009. No parts of this document may be republished in any form without prior permission by the copyright holder.