TITUS
Rg-Veda: Rg-Veda-Samhita
Part No. 41
Previous part

Hymn: 41 
Verse: 1 
Halfverse: a    yáṃ rákṣanti prácetaso váruṇo mitró aryamā́ /
   yáṃ rákṣanti prácetaso
   yám rákṣanti prácetasaḥ
   yáṃ rákṣanti prácetaso

Halfverse: b    váruṇo mitró aryamā́ /
   váruṇaḥ mitráḥ aryamā́ /
   váruṇo mitró aryamā́ /

Halfverse: c    nū́ cit sá dabʰyate jánaḥ //
   nū́ cit sá dabʰyate jánaḥ //
   nú+ cit sá dabʰyate jánaḥ //
   nū́ cit sá dabʰyate jánaḥ //


Verse: 2 
Halfverse: a    yám bāhúteva píprati pā́nti mártyaṃ riṣáḥ /
   yám bāhúteva píprati
   yám bāhútā iva píprati
   yám bāhúteva píprati

Halfverse: b    pā́nti mártyaṃ riṣáḥ /
   pā́nti mártyam riṣáḥ /
   pâánti mártiyaṃ riṣáḥ /

Halfverse: c    áriṣṭaḥ sárva edʰate //
   áriṣṭaḥ sárva edʰate //
   áriṣṭaḥ sárvaḥ edʰate //
   áriṣṭaḥ sárva edʰate //


Verse: 3 
Halfverse: a    ví durgā́ ví dvíṣaḥ puró gʰnánti rā́jāna eṣām /
   ví durgā́ ví dvíṣaḥ puró
   ví durgā́ ví dvíṣaḥ puráḥ
   ví durgā́ ví dvíṣaḥ puró

Halfverse: b    gʰnánti rā́jāna eṣām /
   gʰnánti rā́jānaḥ eṣām /
   gʰnánti rā́jāna eṣãam /

Halfverse: c    náyanti duritā́ tiráḥ //
   náyanti duritā́ tiráḥ //
   náyanti duritā́ tiráḥ //
   náyanti duritā́ tiráḥ //


Verse: 4 
Halfverse: a    sugáḥ pántʰā anr̥kṣará ā́dityāsa r̥táṃ yaté /
   sugáḥ pántʰā anr̥kṣará
   sugáḥ pántʰāḥ anr̥kṣaráḥ
   sugáḥ pántʰā anr̥kṣará

Halfverse: b    ā́dityāsa r̥táṃ yaté /
   ā́dityāsaḥ r̥tám yaté /
   ā́dityāsa r̥táṃ yaté /

Halfverse: c    nā́trāvakʰādó asti vaḥ //
   nā́trāvakʰādó asti vaḥ //
   ná átra avakʰādáḥ asti vaḥ //
   nā́trāvakʰādó asti vaḥ //


Verse: 5 
Halfverse: a    yáṃ yajñáṃ náyatʰā nara ā́dityā r̥júnā patʰā́ /
   yáṃ yajñáṃ náyatʰā nara
   yám yajñám náyatʰa+ naraḥ
   yáṃ yajñáṃ náyatʰā nara

Halfverse: b    ā́dityā r̥júnā patʰā́ /
   ā́dityāḥ r̥júnā patʰā́ /
   ā́dityā r̥júnā patʰā́ /

Halfverse: c    prá vaḥ sá dʰītáye naśat //
   prá vaḥ sá dʰītáye naśat //
   prá vaḥ sá dʰītáye naśat //
   prá vaḥ sá dʰītáye naśat //


Verse: 6 
Halfverse: a    sá rátnam mártyo vásu víśvaṃ tokám utá tmánā /
   sá rátnam mártyo vásu
   sá rátnam mártyaḥ vásu
   sá rátnam mártiyo vásu

Halfverse: b    víśvaṃ tokám utá tmánā /
   víśvam tokám utá tmánā /
   víśvaṃ tokám utá tmánā /

Halfverse: c    ácʰā gacʰaty ástr̥taḥ //
   ácʰā gacʰaty ástr̥taḥ //
   ácʰa+ gacʰati ástr̥taḥ //
   ácʰā gacʰati ástr̥taḥ //


Verse: 7 
Halfverse: a    katʰā́ rādʰāma sakʰāya stómam mitrásyāryamṇáḥ /
   katʰā́ rādʰāma sakʰāya
   katʰā́ rādʰāma sakʰāyaḥ
   katʰā́ rādʰāma sakʰāya

Halfverse: b    stómam mitrásyāryamṇáḥ /
   stómam mitrásya aryamṇáḥ /
   stómam mitrásya aryamṇáḥ /

Halfverse: c    máhi psáro váruṇasya //
   máhi psáro váruṇasya //
   máhi psáraḥ váruṇasya //
   máhi psáro váruṇasya //


Verse: 8 
Halfverse: a    mā́ vo gʰnántam mā́ śápantam práti voce devayántam /
   mā́ vo gʰnántam mā́ śápantam
   mā́ vaḥ gʰnántam mā́ śápantam
   mā́ vo gʰnántam mā́ śápantam

Halfverse: b    práti voce devayántam /
   práti voce devayántam /
   práti voce devayántam /

Halfverse: c    sumnaír íd va ā́ vivāse //
   sumnaír íd va ā́ vivāse //
   sumnaíḥ ít vaḥ ā́ vivāse //
   sumnaír íd va ā́ vivāse //


Verse: 9 
Halfverse: a    catúraś cid dádamānād bibʰīyā́d ā́ nídʰātoḥ /
   catúraś cid dádamānād
   catúraḥ cit dádamānāt
   catúraś cid dádamānād

Halfverse: b    bibʰīyā́d ā́ nídʰātoḥ /
   bibʰīyā́t ā́ nídʰātoḥ /
   bibʰīyā́d ā́ nídʰātoḥ /

Halfverse: c    ná duruktā́ya spr̥hayet //
   ná duruktā́ya spr̥hayet //
   ná duruktā́ya spr̥hayet //
   ná duruktā́ya spr̥hayet //


Next part


This text is part of the TITUS edition of Rg-Veda: Rg-Veda-Samhita.

Copyright TITUS Project, Frankfurt a/M, 28.7.2009. No parts of this document may be republished in any form without prior permission by the copyright holder.