TITUS
Rg-Veda: Rg-Veda-Samhita
Part No. 44
Previous part

Hymn: 44 
Verse: 1 
Halfverse: a    ágne vívasvad uṣásaś citráṃ rā́dʰo amartya /
   ágne vívasvad uṣásaś
   ágne vívasvat uṣásaḥ
   ágne vívasvad uṣásaś

Halfverse: b    citráṃ rā́dʰo amartya /
   citrám rā́dʰaḥ amartya /
   citráṃ rā́dʰo amartiya /

Halfverse: c    ā́ dāśúṣe jātavedo vahā tvám adyā́ devā́m̐ uṣarbúdʰaḥ //
   ā́ dāśúṣe jātavedo vahā tvám
   ā́ dāśúṣe jātavedaḥ vaha+ tvám
   ā́ dāśúṣe jātavedo vahā tuvám

Halfverse: d    adyā́ devā́m̐ uṣarbúdʰaḥ //
   adyá+ devā́n uṣarbúdʰaḥ //
   adyā́ devā́m̐ uṣarbúdʰaḥ //


Verse: 2 
Halfverse: a    júṣṭo hí dūtó ási havyavā́hanó 'gne ratʰī́r adʰvarā́ṇām /
   júṣṭo hí dūtó ási havyavā́hanó
   júṣṭaḥ hí dūtáḥ ási havyavā́hanaḥ
   júṣṭo hí dūtó ási havyavā́hano

Halfverse: b    'gne ratʰī́r adʰvarā́ṇām /
   ágne ratʰī́ḥ adʰvarā́ṇām /
   ágne ratʰī́r adʰvarā́ṇām /

Halfverse: c    sajū́r aśvíbʰyām uṣásā suvī́ryam asmé dʰehi śrávo br̥hát //
   sajū́r aśvíbʰyām uṣásā suvī́ryam
   sajū́ḥ aśvíbʰyām uṣásā suvī́ryam
   sajū́r aśvíbʰyām uṣásā suvī́riyam

Halfverse: d    asmé dʰehi śrávo br̥hát //
   asmé dʰehi śrávaḥ br̥hát //
   asmé dʰehi śrávo br̥hát //


Verse: 3 
Halfverse: a    adyā́ dūtáṃ vr̥ṇīmahe vásum agním purupriyám /
   adyā́ dūtáṃ vr̥ṇīmahe
   adyá+ dūtám vr̥ṇīmahe
   adyā́ dūtáṃ vr̥ṇīmahe

Halfverse: b    vásum agním purupriyám /
   vásum agním purupriyám /
   vásum agním purupriyám /

Halfverse: c    dʰūmáketum bʰā́r̥jīkaṃ vyùṣṭiṣu yajñā́nām adʰvaraśríyam //
   dʰūmáketum bʰā́r̥jīkaṃ vyùṣṭiṣu
   dʰūmáketum bʰā́r̥jīkam vyùṣṭiṣu
   dʰūmáketum bʰā́r̥jīkaṃ víuṣṭiṣu

Halfverse: d    yajñā́nām adʰvaraśríyam //
   yajñā́nām adʰvaraśríyam //
   yajñā́nām adʰvaraśríyam //


Verse: 4 
Halfverse: a    śréṣṭʰaṃ yáviṣṭʰam átitʰiṃ svā̀hutaṃ júṣṭaṃ jánāya dāśúṣe /
   śréṣṭʰaṃ yáviṣṭʰam átitʰiṃ svā̀hutaṃ
   śréṣṭʰam yáviṣṭʰam átitʰim svā̀hutam
   śréṣṭʰaṃ yáviṣṭʰam átitʰiṃ súāhutaṃ

Halfverse: b    júṣṭaṃ jánāya dāśúṣe /
   júṣṭam jánāya dāśúṣe /
   júṣṭaṃ jánāya dāśúṣe /

Halfverse: c    devā́m̐ ácʰā yā́tave jātávedasam agním īḷe vyùṣṭiṣu //
   devā́m̐ ácʰā yā́tave jātávedasam
   devā́n ácʰa+ yā́tave jātávedasam
   devā́m̐ ácʰā yā́tave jātávedasam

Halfverse: d    agním īḷe vyùṣṭiṣu //
   agním īḷe vyùṣṭiṣu //
   agním īḷe víuṣṭiṣu //


Verse: 5 
Halfverse: a    staviṣyā́mi tvā́m aháṃ víśvasyāmr̥ta bʰojana /
   staviṣyā́mi tvā́m aháṃ
   staviṣyā́mi tvā́m ahám
   staviṣyā́mi tuvā́m aháṃ

Halfverse: b    víśvasyāmr̥ta bʰojana /
   víśvasya amr̥ta bʰojana /
   víśvasyāmr̥ta bʰojana /

Halfverse: c    ágne trātā́ram amŕ̥tam miyedʰya yájiṣṭʰaṃ havyavāhana //
   ágne trātā́ram amŕ̥tam miyedʰya
   ágne trātā́ram amŕ̥tam miyedʰya
   ágne trātā́ram amŕ̥tam miyedʰiya

Halfverse: d    yájiṣṭʰaṃ havyavāhana //
   yájiṣṭʰam havyavāhana //
   yájiṣṭʰaṃ havyavāhana //


Verse: 6 
Halfverse: a    suśáṃso bodʰi gr̥ṇaté yaviṣṭʰya mádʰujihvaḥ svā̀hutaḥ /
   suśáṃso bodʰi gr̥ṇaté yaviṣṭʰya
   suśáṃsaḥ bodʰi gr̥ṇaté yaviṣṭʰya
   suśáṃso bodʰi gr̥ṇaté yaviṣṭʰiya

Halfverse: b    mádʰujihvaḥ svā̀hutaḥ /
   mádʰujihvaḥ svā̀hutaḥ /
   mádʰujihvaḥ súāhutaḥ /

Halfverse: c    práskaṇvasya pratiránn ā́yur jīváse namasyā́ daívyaṃ jánam //
   práskaṇvasya pratiránn ā́yur jīváse
   práskaṇvasya pratirán ā́yuḥ jīváse
   práskaṇvasya pratiránn ā́yu* jīváse

Halfverse: d    namasyā́ daívyaṃ jánam //
   namasyá+ daívyam jánam //
   namasyā́ daíviyaṃ jánam //


Verse: 7 
Halfverse: a    hótāraṃ viśvávedasaṃ sáṃ hí tvā víśa indʰáte /
   hótāraṃ viśvávedasaṃ
   hótāram viśvávedasam
   hótāraṃ viśvávedasaṃ

Halfverse: b    sáṃ hí tvā víśa indʰáte /
   sám hí tvā víśaḥ indʰáte /
   sáṃ hí tvā víśa indʰáte /

Halfverse: c    sá ā́ vaha puruhūta prácetasó 'gne devā́m̐ ihá dravát //
   sá ā́ vaha puruhūta prácetasó
   sáḥ \!\ ā́ vaha puruhūta prácetasaḥ
   sá ā́ vaha puruhūta prácetaso

Halfverse: d    'gne devā́m̐ ihá dravát //
   ágne devā́n ihá dravát //
   ágne devā́m̐ ihá dravát //


Verse: 8 
Halfverse: a    savitā́ram uṣásam aśvínā bʰágam agníṃ vyùṣṭiṣu kṣápaḥ /
   savitā́ram uṣásam aśvínā bʰágam
   savitā́ram uṣásam aśvínā bʰágam
   savitā́ram uṣásam aśvínā bʰágam

Halfverse: b    agníṃ vyùṣṭiṣu kṣápaḥ /
   agním vyùṣṭiṣu kṣápaḥ /
   agníṃ víuṣṭiṣu kṣápaḥ /

Halfverse: c    káṇvāsas tvā sutásomāsa indʰate havyavā́haṃ svadʰvara //
   káṇvāsas tvā \!\ sutásomāsa indʰate
   káṇvāsaḥ tvā sutásomāsaḥ indʰate
   káṇvāsas tvā sutásomāsa indʰate

Halfverse: d    havyavā́haṃ svadʰvara //
   havyavā́ham svadʰvara //
   havyavā́haṃ suadʰvara //


Verse: 9 
Halfverse: a    pátir hy àdʰvarā́ṇām ágne dūtó viśā́m ási /
   pátir hy àdʰvarā́ṇām
   pátiḥ hí adʰvarā́ṇām
   pátir hí adʰvarā́ṇãam

Halfverse: b    ágne dūtó viśā́m ási /
   ágne dūtáḥ viśā́m ási /
   ágne dūtó viśā́m ási /

Halfverse: c    uṣarbúdʰa ā́ vaha sómapītaye devā́m̐ adyá svardŕ̥śaḥ //
   uṣarbúdʰa ā́ vaha sómapītaye
   uṣarbúdʰaḥ ā́ vaha sómapītaye
   uṣarbúdʰa ā́ vaha sómapītaye

Halfverse: d    devā́m̐ adyá svardŕ̥śaḥ //
   devā́n adyá svardŕ̥śaḥ //
   devā́m̐ adyá suvardŕ̥śaḥ //


Verse: 10 
Halfverse: a    ágne pū́rvā ánūṣáso vibʰāvaso dīdétʰa viśvádarśataḥ /
   ágne pū́rvā ánūṣáso vibʰāvaso
   ágne pū́rvāḥ ánu uṣásaḥ vibʰāvaso
   ágne pū́rvā ánūṣáso vibʰāvaso

Halfverse: b    dīdétʰa viśvádarśataḥ /
   dīdétʰa viśvádarśataḥ /
   dīdétʰa viśvádarśataḥ /

Halfverse: c    ási grā́meṣv avitā́ puróhitó 'si yajñéṣu mā́nuṣaḥ //
   ási grā́meṣv avitā́ puróhitó
   ási grā́meṣu avitā́ puróhitaḥ
   ási grā́meṣu avitā́ puróhito

Halfverse: d    'si yajñéṣu mā́nuṣaḥ //
   ási yajñéṣu mā́nuṣaḥ //
   ási yajñéṣu mā́nuṣaḥ //


Verse: 11 
Halfverse: a    ní tvā yajñásya sā́dʰanam ágne hótāram r̥tvíjam /
   ní tvā yajñásya sā́dʰanam
   ní tvā yajñásya sā́dʰanam
   ní tvā yajñásya sā́dʰanam

Halfverse: b    ágne hótāram r̥tvíjam /
   ágne hótāram r̥tvíjam /
   ágne hótāram r̥tvíjam /

Halfverse: c    manuṣvád deva dʰīmahi prácetasaṃ jīráṃ dūtám ámartyam //
   manuṣvád deva dʰīmahi prácetasaṃ
   manuṣvát deva dʰīmahi prácetasam
   manuṣvád deva dʰīmahi prácetasaṃ

Halfverse: d    jīráṃ dūtám ámartyam //
   jīrám dūtám ámartyam //
   jīráṃ dūtám ámartiyam //


Verse: 12 
Halfverse: a    yád devā́nām mitramahaḥ puróhitó 'ntaro yā́si dūtyàm /
   yád devā́nām mitramahaḥ puróhitó
   yát devā́nām mitramahaḥ puróhitaḥ
   yád devā́nām mitramahaḥ puróhito

Halfverse: b    'ntaro yā́si dūtyàm /
   ántaraḥ yā́si dūtyàm /
   ántaro yā́si dūtíyam /

Halfverse: c    síndʰor iva prásvanitāsa ūrmáyo 'gnér bʰrājante arcáyaḥ //
   síndʰor iva prásvanitāsa ūrmáyo
   síndʰoḥ iva prásvanitāsaḥ ūrmáyaḥ
   síndʰor iva prásvanitāsa ūrmáyo

Halfverse: d    'gnér bʰrājante arcáyaḥ //
   agnéḥ bʰrājante arcáyaḥ //
   agnér bʰrājante arcáyaḥ //


Verse: 13 
Halfverse: a    śrudʰí śrutkarṇa váhnibʰir devaír agne sayā́vabʰiḥ /
   śrudʰí śrutkarṇa váhnibʰir
   śrudʰí śrutkarṇa váhnibʰiḥ
   śrudʰí śrutkarṇa váhnibʰir

Halfverse: b    devaír agne sayā́vabʰiḥ /
   devaíḥ agne sayā́vabʰiḥ /
   devaír agne sayā́vabʰiḥ /

Halfverse: c    ā́ sīdantu barhíṣi mitró aryamā́ prātaryā́vāṇo adʰvarám //
   ā́ sīdantu barhíṣi mitró aryamā́
   ā́ sīdantu barhíṣi mitráḥ aryamā́
   ā́ sīdantu barhíṣi mitró aryamā́

Halfverse: d    prātaryā́vāṇo adʰvarám //
   prātaryā́vāṇaḥ adʰvarám //
   prātaryā́vāṇo adʰvarám //


Verse: 14 
Halfverse: a    śr̥ṇvántu stómam marútaḥ sudā́navo 'gnijihvā́ r̥tāvŕ̥dʰaḥ /
   śr̥ṇvántu stómam marútaḥ sudā́navo
   śr̥ṇvántu stómam marútaḥ sudā́navaḥ
   śr̥ṇvántu stómam marútaḥ sudā́navo

Halfverse: b    'gnijihvā́ r̥tāvŕ̥dʰaḥ /
   agnijihvā́ḥ r̥tāvŕ̥dʰaḥ /
   agnijihvā́ r̥tāvŕ̥dʰaḥ /

Halfverse: c    píbatu sómaṃ váruṇo dʰr̥távrato 'śvíbʰyām uṣásā sajū́ḥ //
   píbatu sómaṃ váruṇo dʰr̥távrato
   píbatu sómam váruṇaḥ dʰr̥távrataḥ
   píbatu sómaṃ váruṇo dʰr̥távrato

Halfverse: d    'śvíbʰyām uṣásā sajū́ḥ //
   aśvíbʰyām uṣásā sajū́ḥ //
   aśvíbʰyām uṣásā sajū́ḥ //


Next part


This text is part of the TITUS edition of Rg-Veda: Rg-Veda-Samhita.

Copyright TITUS Project, Frankfurt a/M, 28.7.2009. No parts of this document may be republished in any form without prior permission by the copyright holder.