TITUS
Rg-Veda: Rg-Veda-Samhita
Part No. 45
Previous part

Hymn: 45 
Verse: 1 
Halfverse: a    tvám agne vásūm̐r ihá rudrā́m̐ ādityā́m̐ utá /
   tvám agne vásūm̐r ihá
   tvám agne vásūn ihá
   tuvám agne vásūm̐r ihá

Halfverse: b    rudrā́m̐ ādityā́m̐ utá /
   rudrā́n ādityā́n utá /
   rudrā́m̐ āditiyā́m̐ utá /

Halfverse: c    yájā svadʰvaráṃ jánam mánujātaṃ gʰr̥taprúṣam //
   yájā svadʰvaráṃ jánam
   yája+ svadʰvarám jánam
   yájā suadʰvaráṃ jánam

Halfverse: d    mánujātaṃ gʰr̥taprúṣam //
   mánujātam gʰr̥taprúṣam //
   mánujātaṃ gʰr̥taprúṣam //


Verse: 2 
Halfverse: a    śruṣṭīvā́no hí dāśúṣe devā́ agne vícetasaḥ /
   śruṣṭīvā́no hí dāśúṣe
   śruṣṭīvā́naḥ hí dāśúṣe
   śruṣṭīvā́no hí dāśúṣe

Halfverse: b    devā́ agne vícetasaḥ /
   devā́ḥ agne vícetasaḥ /
   devā́ agne vícetasaḥ /

Halfverse: c    tā́n rohidaśva girvaṇas tráyastriṃśatam ā́ vaha //
   tā́n rohidaśva girvaṇas
   tā́n rohidaśva girvaṇaḥ
   tā́n rohidaśva girvaṇas

Halfverse: d    tráyastriṃśatam ā́ vaha //
   tráyastriṃśatam ā́ vaha //
   tráyastriṃśatam ā́ vaha //


Verse: 3 
Halfverse: a    priyamedʰavád atriváj jā́tavedo virūpavát /
   priyamedʰavád atriváj
   priyamedʰavát atrivát
   priyamedʰavád atriváj

Halfverse: b    jā́tavedo virūpavát /
   jā́tavedaḥ virūpavát /
   jā́tavedo virūpavát /

Halfverse: c    aṅgirasván mahivrata práskaṇvasya śrudʰī hávam //
   aṅgirasván mahivrata
   aṅgirasvát mahivrata
   aṅgirasván mahivrata

Halfverse: d    práskaṇvasya śrudʰī hávam //
   práskaṇvasya śrudʰi+ hávam //
   práskaṇvasya śrudʰī hávam //


Verse: 4 
Halfverse: a    máhikerava ūtáye priyámedʰā ahūṣata /
   máhikerava ūtáye
   máhikeravaḥ ūtáye
   máhikerava ūtáye

Halfverse: b    priyámedʰā ahūṣata /
   priyámedʰāḥ ahūṣata /
   priyámedʰā ahūṣata /

Halfverse: c    rā́jantam adʰvarā́ṇām agníṃ śukréṇa śocíṣā //
   rā́jantam adʰvarā́ṇām
   rā́jantam adʰvarā́ṇām
   rā́jantam adʰvarā́ṇãam

Halfverse: d    agníṃ śukréṇa śocíṣā //
   agním śukréṇa śocíṣā //
   agníṃ śukréṇa śocíṣā //


Verse: 5 
Halfverse: a    gʰŕ̥tāhavana santyemā́ u ṣú śrudʰī gíraḥ /
   gʰŕ̥tāhavana santya_
   gʰŕ̥tāhavana santya
   gʰŕ̥tāhavana santiya

Halfverse: b    _imā́ u ṣú śrudʰī gíraḥ /
   imā́ḥ u sú śrudʰi+ gíraḥ /
   imā́ u ṣú śrudʰī gíraḥ /

Halfverse: c    yā́bʰiḥ káṇvasya sūnávo hávanté 'vase tvā //
   yā́bʰiḥ káṇvasya sūnávo
   yā́bʰiḥ káṇvasya sūnávaḥ
   yā́bʰiḥ káṇvasya sūnávo

Halfverse: d    hávanté 'vase tvā //
   hávante ávase tvā //
   hávante ávase tuvā //


Verse: 6 
Halfverse: a    tvā́ṃ citraśravastama hávante vikṣú jantávaḥ /
   tvā́ṃ citraśravastama
   tvā́m citraśravastama
   tuvā́ṃ citraśravastama

Halfverse: b    hávante vikṣú jantávaḥ /
   hávante vikṣú jantávaḥ /
   hávante vikṣú jantávaḥ /

Halfverse: c    śocíṣkeśam purupriyā́gne havyā́ya vóḷʰave //
   śocíṣkeśam purupriya_
   śocíṣkeśam purupriya
   śocíṣkeśam purupriya

Halfverse: d    _ágne havyā́ya vóḷʰave //
   ágne havyā́ya vóḷʰave //
   ágne havyā́ya vóḷʰave //


Verse: 7 
Halfverse: a    ní tvā hótāram r̥tvíjaṃ dadʰiré vasuvíttamam /
   ní tvā hótāram r̥tvíjaṃ
   ní tvā hótāram r̥tvíjam
   ní tvā hótāram r̥tvíjaṃ

Halfverse: b    dadʰiré vasuvíttamam /
   dadʰiré vasuvíttamam /
   dadʰiré vasuvíttamam /

Halfverse: c    śrútkarṇaṃ saprátʰastamaṃ víprā agne díviṣṭiṣu //
   śrútkarṇaṃ saprátʰastamaṃ
   śrútkarṇam saprátʰastamam
   śrútkarṇaṃ saprátʰastamaṃ

Halfverse: d    víprā agne díviṣṭiṣu //
   víprāḥ agne díviṣṭiṣu //
   víprā agne díviṣṭiṣu //


Verse: 8 
Halfverse: a    ā́ tvā víprā acucyavuḥ sutásomā abʰí práyaḥ /
   ā́ tvā víprā acucyavuḥ
   ā́ tvā víprāḥ acucyavuḥ
   ā́ tvā víprā acucyavuḥ

Halfverse: b    sutásomā abʰí práyaḥ /
   sutásomāḥ abʰí práyaḥ /
   sutásomā abʰí práyaḥ /

Halfverse: c    br̥hád bʰā́ bíbʰrato havír ágne mártāya dāśúṣe //
   br̥hád bʰā́ bíbʰrato havír
   br̥hát bʰā́ḥ bíbʰrataḥ havíḥ
   br̥hád bʰā́ bíbʰrato havír

Halfverse: d    ágne mártāya dāśúṣe //
   ágne mártāya dāśúṣe //
   ágne mártāya dāśúṣe //


Verse: 9 
Halfverse: a    prātaryā́vṇaḥ sahaskr̥ta somapéyāya santya /
   prātaryā́vṇaḥ sahaskr̥ta
   prātaryā́vṇaḥ sahaskr̥ta
   prātaryā́vṇaḥ sahaskr̥ta

Halfverse: b    somapéyāya santya /
   somapéyāya santya /
   somapéyāya santiya /

Halfverse: c    ihā́dyá daívyaṃ jánam barhír ā́ sādayā vaso //
   ihā́dyá daívyaṃ jánam
   ihá adyá daívyam jánam
   ihā́dyá daíviyaṃ jánam

Halfverse: d    barhír ā́ sādayā vaso //
   barhíḥ ā́ sādaya+ vaso //
   barhír ā́ sādayā vaso //


Verse: 10 
Halfverse: a    arvā́ñcaṃ daívyaṃ jánam ágne yákṣva sáhūtibʰiḥ /
   arvā́ñcaṃ daívyaṃ jánam
   arvā́ñcam daívyam jánam
   arvā́ñcaṃ daíviyaṃ jánam

Halfverse: b    ágne yákṣva sáhūtibʰiḥ /
   ágne yákṣva sáhūtibʰiḥ /
   ágne yákṣva sáhūtibʰiḥ /

Halfverse: c    ayáṃ sómaḥ sudānavas tám pāta tiróahnyam //
   ayáṃ sómaḥ sudānavas
   ayám sómaḥ sudānavaḥ
   ayáṃ sómaḥ sudānavas

Halfverse: d    tám pāta tiróahnyam //
   tám pāta tiróahnyam //
   tám pāta tiróahniyam //


Next part


This text is part of the TITUS edition of Rg-Veda: Rg-Veda-Samhita.

Copyright TITUS Project, Frankfurt a/M, 28.7.2009. No parts of this document may be republished in any form without prior permission by the copyright holder.