TITUS
Rg-Veda: Rg-Veda-Samhita
Part No. 1005
Previous part

Hymn: 168_(994) 
Verse: 1 
Halfverse: a    vā́tasya nú mahimā́naṃ rátʰasya rujánn eti stanáyann asya gʰóṣaḥ /
   vā́tasya nú mahimā́naṃ rátʰasya
   vā́tasya nú mahimā́nam rátʰasya
   vā́tasya nú mahimā́naṃ rátʰasya

Halfverse: b    rujánn eti stanáyann asya gʰóṣaḥ /
   ruján eti stanáyan asya gʰóṣaḥ /
   rujánn eti stanáyann asya gʰóṣaḥ /

Halfverse: c    divispŕ̥g yāty aruṇā́ni kr̥ṇvánn utó eti pr̥tʰivyā́ reṇúm ásyan //
   divispŕ̥g yāty aruṇā́ni kr̥ṇvánn
   divispŕ̥k yāti aruṇā́ni kr̥ṇván
   divispŕ̥g yāti aruṇā́ni kr̥ṇvánn

Halfverse: d    utó eti pr̥tʰivyā́ reṇúm ásyan //
   utá u eti pr̥tʰivyā́ reṇúm ásyan //
   utó eti pr̥tʰivyā́ reṇúm ásyan //


Verse: 2 
Halfverse: a    sám prérate ánu vā́tasya viṣṭʰā́ aínaṃ gacʰanti sámanaṃ ná yóṣāḥ /
   sám prérate ánu vā́tasya viṣṭʰā́
   sám prá īrate ánu vā́tasya viṣṭʰā́ḥ
   sám prérate ánu vā́tasya viṣṭʰā́

Halfverse: b    aínaṃ gacʰanti sámanaṃ ná yóṣāḥ /
   ā́ enam gacʰanti sámanam ná yóṣāḥ /
   aínaṃ gacʰanti sámanaṃ ná yóṣāḥ /

Halfverse: c    tā́bʰiḥ sayúk sarátʰaṃ devá īyate 'syá víśvasya bʰúvanasya rā́jā //
   tā́bʰiḥ sayúk sarátʰaṃ devá īyate
   tā́bʰiḥ sayúk sarátʰam deváḥ īyate
   tā́bʰiḥ sayúk sarátʰaṃ devá īyate

Halfverse: d    'syá víśvasya bʰúvanasya rā́jā //
   asyá víśvasya bʰúvanasya rā́jā //
   asyá víśvasya bʰúvanasya rā́jā //


Verse: 3 
Halfverse: a    antárikṣe patʰíbʰir ī́yamāno ná ní viśate katamác canā́haḥ /
   antárikṣe patʰíbʰir ī́yamāno
   antárikṣe patʰíbʰiḥ ī́yamānaḥ
   antárikṣe patʰíbʰir ī́yamāno

Halfverse: b    ná ní viśate katamác canā́haḥ /
   ná ní viśate katamát caná áhar /
   ná ní viśate katamác canā́haḥ /

Halfverse: c    apā́ṃ sákʰā pratʰamajā́ r̥tā́vā kvà svij jātáḥ kúta ā́ babʰūva //
   apā́ṃ sákʰā pratʰamajā́ r̥tā́vā
   apā́m sákʰā pratʰamajā́ḥ r̥tā́vā
   apā́ṃ sákʰā pratʰamajā́ r̥tā́vā

Halfverse: d    kvà svij jātáḥ kúta ā́ babʰūva //
   kvà svit jātáḥ kútaḥ ā́ babʰūva //
   kúva svij jātáḥ kúta ā́ babʰūva //


Verse: 4 
Halfverse: a    ātmā́ devā́nām bʰúvanasya gárbʰo yatʰāvaśáṃ carati devá eṣáḥ /
   ātmā́ devā́nām bʰúvanasya gárbʰo
   ātmā́ devā́nām bʰúvanasya gárbʰaḥ
   ātmā́ devā́nām bʰúvanasya gárbʰo

Halfverse: b    yatʰāvaśáṃ carati devá eṣáḥ /
   yatʰāvaśám carati deváḥ eṣáḥ /
   yatʰāvaśáṃ carati devá eṣáḥ /

Halfverse: c    gʰóṣā íd asya śr̥ṇvire ná rūpáṃ tásmai vā́tāya havíṣā vidʰema //
   gʰóṣā íd asya śr̥ṇvire ná rūpáṃ
   gʰóṣāḥ ít asya śr̥ṇvire ná rūpám
   gʰóṣā íd asya śr̥ṇvire ná rūpáṃ

Halfverse: d    tásmai vā́tāya havíṣā vidʰema //
   tásmai vā́tāya havíṣā vidʰema //
   tásmai vā́tāya havíṣā vidʰema //



Next part


This text is part of the TITUS edition of Rg-Veda: Rg-Veda-Samhita.

Copyright TITUS Project, Frankfurt a/M, 28.7.2009. No parts of this document may be republished in any form without prior permission by the copyright holder.