TITUS
Rg-Veda: Rg-Veda-Samhita
Part No. 406
Previous part

Hymn: 52_(406) 
Verse: 1 
Halfverse: a    prá śyāvāśva dʰr̥ṣṇuyā́rcā marúdbʰir ŕ̥kvabʰiḥ /
   prá śyāvāśva dʰr̥ṣṇuyā́_
   prá śyāvāśva dʰr̥ṣṇuyā́
   prá śyāvaaśva dʰr̥ṣṇuyā́

Halfverse: b    _árcā marúdbʰir ŕ̥kvabʰiḥ /
   árca+ marúdbʰiḥ ŕ̥kvabʰiḥ /
   árcā marúdbʰir ŕ̥kvabʰiḥ /

Halfverse: c    yé adrogʰám anuṣvadʰáṃ śrávo mádanti yajñíyāḥ //
   yé adrogʰám anuṣvadʰáṃ
   yé adrogʰám anuṣvadʰám
   yé adrogʰám anuṣvadʰáṃ

Halfverse: d    śrávo mádanti yajñíyāḥ //
   śrávaḥ mádanti yajñíyāḥ //
   śrávo mádanti yajñíyāḥ //


Verse: 2 
Halfverse: a    té hí stʰirásya śávasaḥ sákʰāyaḥ sánti dʰr̥ṣṇuyā́ /
   té hí stʰirásya śávasaḥ
   té hí stʰirásya śávasaḥ
   té hí stʰirásya śávasaḥ

Halfverse: b    sákʰāyaḥ sánti dʰr̥ṣṇuyā́ /
   sákʰāyaḥ sánti dʰr̥ṣṇuyā́ /
   sákʰāyaḥ sánti dʰr̥ṣṇuyā́ /

Halfverse: c    té yā́mann ā́ dʰr̥ṣadvínas tmánā pānti śáśvataḥ //
   té yā́mann ā́ dʰr̥ṣadvínas
   té yā́man ā́ dʰr̥ṣadvínaḥ
   té yā́mann ā́ dʰr̥ṣadvínas

Halfverse: d    tmánā pānti śáśvataḥ //
   tmánā pānti śáśvataḥ //
   tmánā pãanti śáśvataḥ //


Verse: 3 
Halfverse: a    té syandrā́so nókṣáṇó 'ti ṣkandanti śárvarīḥ /
   té syandrā́so nókṣáṇó
   té syandrā́saḥ ná ukṣáṇaḥ
   té syandrā́so ná ukṣáṇo

Halfverse: b    'ti ṣkandanti śárvarīḥ /
   áti skandanti śárvarīḥ /
   áti ṣkandanti śárvarīḥ /

Halfverse: c    marútām ádʰā máho diví kṣamā́ ca manmahe //
   marútām ádʰā máho
   marútām ádʰa+ máhaḥ
   marútām ádʰā máho

Halfverse: d    diví kṣamā́ ca manmahe //
   diví kṣamā́ ca manmahe //
   diví kṣamā́ ca manmahe //


Verse: 4 
Halfverse: a    marútsu vo dadʰīmahi stómaṃ yajñáṃ ca dʰr̥ṣṇuyā́ /
   marútsu vo dadʰīmahi
   marútsu vaḥ dadʰīmahi
   marútsu vo dadʰīmahi

Halfverse: b    stómaṃ yajñáṃ ca dʰr̥ṣṇuyā́ /
   stómam yajñám ca dʰr̥ṣṇuyā́ /
   stómaṃ yajñáṃ ca dʰr̥ṣṇuyā́ /

Halfverse: c    víśve yé mā́nuṣā yugā́ pā́nti mártyaṃ riṣáḥ //
   víśve yé mā́nuṣā yugā́
   víśve yé mā́nuṣā yugā́
   víśve yé mā́nuṣā yugā́

Halfverse: d    pā́nti mártyaṃ riṣáḥ //
   pā́nti mártyam riṣáḥ //
   pâánti mártiyaṃ riṣáḥ //


Verse: 5 
Halfverse: a    árhanto yé sudā́navo náro ásāmiśavasaḥ /
   árhanto yé sudā́navo
   árhantaḥ yé sudā́navaḥ
   árhanto yé sudā́navo

Halfverse: b    náro ásāmiśavasaḥ /
   náraḥ ásāmiśavasaḥ /
   náro ásāmiśavasaḥ /

Halfverse: c    prá yajñáṃ yajñíyebʰyo divó arcā marúdbʰyaḥ //
   prá yajñáṃ yajñíyebʰyo
   prá yajñám yajñíyebʰyaḥ
   prá yajñáṃ yajñíyebʰiyo

Halfverse: d    divó arcā marúdbʰyaḥ //
   diváḥ arca+ marúdbʰyaḥ //
   divó arcā marúdbʰiyaḥ //


Verse: 6 
Halfverse: a    ā́ rukmaír ā́ yudʰā́ nára r̥ṣvā́ r̥ṣṭī́r asr̥kṣata /
   ā́ rukmaír ā́ yudʰā́ nára
   ā́ rukmaíḥ ā́ yudʰā́ náraḥ
   ā́ rukmaír ā́ yudʰā́ nára

Halfverse: b    r̥ṣvā́ r̥ṣṭī́r asr̥kṣata /
   r̥ṣvā́ḥ r̥ṣṭī́ḥ asr̥kṣata /
   r̥ṣvā́ r̥ṣṭī́r asr̥kṣata /

Halfverse: c    ánv enām̐ áha vidyúto marúto jájjʰatīr iva bʰānúr arta tmánā diváḥ //
   ánv enām̐ áha vidyúto
   ánu enān áha vidyútaḥ
   ánv enām̐ áha vidyúto

Halfverse: d    marúto jájjʰatīr iva
   marútaḥ jájjʰatīḥ iva
   marúto jájjʰatīr iva

Halfverse: e    bʰānúr arta tmánā diváḥ //
   bʰānúḥ arta tmánā diváḥ //
   bʰānúr arta tmánā diváḥ //


Verse: 7 
Halfverse: a    yé vāvr̥dʰánta pā́rtʰivā yá urā́v antárikṣa ā́ /
   yé vāvr̥dʰánta pā́rtʰivā
   yé vāvr̥dʰánta pā́rtʰivāḥ
   yé vāvr̥dʰánta pā́rtʰivā

Halfverse: b    yá urā́v antárikṣa ā́ /
   yé uraú antárikṣe ā́ /
   yá urā́v antárikṣa ā́ /

Halfverse: c    vr̥jáne vā nadī́nāṃ sadʰástʰe vā mahó diváḥ //
   vr̥jáne vā nadī́nāṃ
   vr̥jáne vā nadī́nām
   vr̥jáne vā nadī́nãaṃ

Halfverse: d    sadʰástʰe vā mahó diváḥ //
   sadʰástʰe vā maháḥ diváḥ //
   sadʰástʰe vā mahó diváḥ //


Verse: 8 
Halfverse: a    śárdʰo mā́rutam úc cʰam̐sa satyáśavasam ŕ̥bʰvasam /
   śárdʰo mā́rutam úc cʰam̐sa
   śárdʰaḥ mā́rutam út śaṃsa
   śárdʰo mā́rutam úc cʰaṃsa

Halfverse: b    satyáśavasam ŕ̥bʰvasam /
   satyáśavasam ŕ̥bʰvasam /
   satyáśavasam ŕ̥bʰvasam /

Halfverse: c    utá sma té śubʰé náraḥ prá syandrā́ yujata tmánā //
   utá sma té śubʰé náraḥ
   utá sma té śubʰé náraḥ
   utá sma té śubʰé náraḥ

Halfverse: d    prá syandrā́ yujata tmánā //
   prá syandrā́ḥ yujata tmánā //
   prá syandrā́ yujata tmánā //


Verse: 9 
Halfverse: a    utá sma té páruṣṇyām ū́rṇā vasata śundʰyávaḥ /
   utá sma té páruṣṇyām
   utá sma té páruṣṇyām
   utá sma té páruṣṇiyām

Halfverse: b    ū́rṇā vasata śundʰyávaḥ /
   ū́rṇāḥ vasata śundʰyávaḥ /
   ū́rṇā vasata śundʰyávaḥ /

Halfverse: c    utá pavyā́ rátʰānām ádrim bʰindanty ójasā //
   utá pavyā́ rátʰānām
   utá pavyā́ rátʰānām
   utá pavyā́ rátʰānãam

Halfverse: d    ádrim bʰindanty ójasā //
   ádrim bʰindanti ójasā //
   ádrim bʰindanti ójasā //


Verse: 10 
Halfverse: a    ā́patʰayo vípatʰayó 'ntaspatʰā ánupatʰāḥ /
   ā́patʰayo vípatʰayó
   ā́patʰayaḥ vípatʰayaḥ
   ā́patʰayo vípatʰayo

Halfverse: b    'ntaspatʰā ánupatʰāḥ /
   ántaspatʰāḥ ánupatʰāḥ /
   ántaspatʰā ánupatʰāḥ /

Halfverse: c    etébʰir máhyaṃ nā́mabʰir yajñáṃ viṣṭārá ohate //
   etébʰir máhyaṃ nā́mabʰir
   etébʰiḥ máhyam nā́mabʰiḥ
   etébʰir máhya ՙ nā́mabʰir

Halfverse: d    yajñáṃ viṣṭārá ohate //
   yajñám viṣṭāráḥ ohate //
   yajñáṃ viṣṭārá ohate //


Verse: 11 
Halfverse: a    ádʰā náro ny òhaté 'dʰā niyúta ohate /
   ádʰā náro ny òhaté
   ádʰa+ náraḥ ní ohate
   ádʰā náro ní ohate

Halfverse: b    'dʰā niyúta ohate /
   ádʰa+ niyútaḥ ohate /
   ádʰā niyúta ohate /

Halfverse: c    ádʰā pā́rāvatā íti citrā́ rūpā́ṇi dárśyā //
   ádʰā pā́rāvatā íti
   ádʰa+ pā́rāvatāḥ íti
   ádʰā pā́rāvatā íti

Halfverse: d    citrā́ rūpā́ṇi dárśyā //
   citrā́ rūpā́ṇi dárśyā //
   citrā́ rūpā́ṇi dárśiyā //


Verse: 12 
Halfverse: a    cʰandastúbʰaḥ kubʰanyáva útsam ā́ kīríṇo nr̥tuḥ /
   cʰandastúbʰaḥ kubʰanyáva
   cʰandastúbʰaḥ kubʰanyávaḥ
   cʰandastúbʰaḥ kubʰanyáva

Halfverse: b    útsam ā́ kīríṇo nr̥tuḥ /
   útsam ā́ kīríṇaḥ nr̥tuḥ /
   útsam ā́ kīríṇo nr̥tuḥ /

Halfverse: c    té me ké cin ná tāyáva ū́mā āsan dr̥śí tviṣé //
   té me ké cin ná tāyáva
   té me ké cit ná tāyávaḥ
   té me ké cin ná tāyáva

Halfverse: d    ū́mā āsan dr̥śí tviṣé //
   ū́māḥ āsan dr̥śí tviṣé //
   ū́mā āsan dr̥śí tviṣé //


Verse: 13 
Halfverse: a    yá r̥ṣvā́ r̥ṣṭívidyutaḥ kaváyaḥ sánti vedʰásaḥ /
   yá r̥ṣvā́ r̥ṣṭívidyutaḥ
   yé r̥ṣvā́ḥ r̥ṣṭívidyutaḥ
   yá r̥ṣvā́ r̥ṣṭívidyutaḥ

Halfverse: b    kaváyaḥ sánti vedʰásaḥ /
   kaváyaḥ sánti vedʰásaḥ /
   kaváyaḥ sánti vedʰásaḥ /

Halfverse: c    tám r̥ṣe mā́rutaṃ gaṇáṃ namasyā́ ramáyā girā́ //
   tám r̥ṣe mā́rutaṃ gaṇáṃ
   tám r̥ṣe mā́rutam gaṇám
   tám r̥ṣe mā́rutaṃ gaṇáṃ

Halfverse: d    namasyā́ ramáyā girā́ //
   namasyá+ ramáya+ girā́ //
   namasyā́ ramáyā girā́ //


Verse: 14 
Halfverse: a    ácʰa r̥ṣe mā́rutaṃ gaṇáṃ dānā́ mitráṃ ná yoṣáṇā /
   ácʰa r̥ṣe mā́rutaṃ gaṇáṃ
   ácʰa r̥ṣe mā́rutam gaṇám
   ácʰa rṣe mā́rutaṃ gaṇáṃ

Halfverse: b    dānā́ mitráṃ ná yoṣáṇā /
   dānā́ mitrám ná yoṣáṇā /
   dānā́ mitráṃ ná yoṣáṇā /

Halfverse: c    divó vā dʰr̥ṣṇava ójasā stutā́ dʰībʰír iṣaṇyata //
   divó vā dʰr̥ṣṇava ójasā
   diváḥ vā dʰr̥ṣṇavaḥ ójasā
   divó vā dʰr̥ṣṇava ójasā

Halfverse: d    stutā́ dʰībʰír iṣaṇyata //
   stutā́ḥ dʰībʰíḥ iṣaṇyata //
   stutā́ dʰībʰír iṣaṇyata //


Verse: 15 
Halfverse: a    nū́ manvāná eṣāṃ devā́m̐ ácʰā ná vakṣáṇā /
   nū́ manvāná eṣāṃ
   nú+ manvānáḥ eṣām
   nū́ manvāná eṣãaṃ

Halfverse: b    devā́m̐ ácʰā ná vakṣáṇā /
   devā́n ácʰa+ ná vakṣáṇā /
   devā́m̐ ácʰā ná vakṣáṇā /

Halfverse: c    dānā́ saceta sūríbʰir yā́maśrutebʰir añjíbʰiḥ //
   dānā́ saceta sūríbʰir
   dānā́ saceta sūríbʰiḥ
   dānā́ saceta sūríbʰir

Halfverse: d    yā́maśrutebʰir añjíbʰiḥ //
   yā́maśrutebʰiḥ añjíbʰiḥ //
   yā́maśrutebʰir añjíbʰiḥ //


Verse: 16 
Halfverse: a    prá yé me bandʰveṣé gā́ṃ vócanta sūráyaḥ pŕ̥śniṃ vocanta mātáram /
   prá yé me bandʰveṣé
   prá yé me bandʰveṣé
   prá yé me bandʰueṣé

Halfverse: b    gā́ṃ vócanta sūráyaḥ
   gā́m vócanta sūráyaḥ
   gâáṃ vócanta sūráyaḥ

Halfverse: c    pŕ̥śniṃ vocanta mātáram /
   pŕ̥śnim vocanta mātáram /
   pŕ̥śniṃ vocanta mātáram /

Halfverse: d    ádʰā pitáram iṣmíṇaṃ rudráṃ vocanta śíkvasaḥ //
   ádʰā pitáram iṣmíṇaṃ
   ádʰa+ pitáram iṣmíṇam
   ádʰā pitáram iṣmíṇaṃ

Halfverse: e    rudráṃ vocanta śíkvasaḥ //
   rudrám vocanta śíkvasaḥ //
   rudráṃ vocanta śíkvasaḥ //


Verse: 17 
Halfverse: a    saptá me saptá śākína ékam-ekā śatā́ daduḥ /
   saptá me saptá śākína
   saptá me saptá śākínaḥ
   saptá me saptá śākína

Halfverse: b    ékam-ekā śatā́ daduḥ /
   ékam-ekā śatā́ daduḥ /
   ékam-ekā śatā́ daduḥ /

Halfverse: c    yamúnāyām ádʰi śrutám úd rā́dʰo gávyam mr̥je ní rā́dʰo áśvyam mr̥je //
   yamúnāyām ádʰi śrutám
   yamúnāyām ádʰi śrutám
   yamúnāyām ádʰi śrutám

Halfverse: d    úd rā́dʰo gávyam mr̥je
   út rā́dʰaḥ gávyam mr̥je
   úd rā́dʰo gáviyam mr̥je

Halfverse: e    ní rā́dʰo áśvyam mr̥je //
   ní rā́dʰaḥ áśvyam mr̥je //
   ní rā́dʰo áśviyam mr̥je //



Next part


This text is part of the TITUS edition of Rg-Veda: Rg-Veda-Samhita.

Copyright TITUS Project, Frankfurt a/M, 28.7.2009. No parts of this document may be republished in any form without prior permission by the copyright holder.