TITUS
Rg-Veda: Rg-Veda-Samhita
Part No. 408
Previous part

Hymn: 54_(408) 
Verse: 1 
Halfverse: a    prá śárdʰāya mā́rutāya svábʰānava imā́ṃ vā́cam anajā parvatacyúte /
   prá śárdʰāya mā́rutāya svábʰānava
   prá śárdʰāya mā́rutāya svábʰānave
   prá śárdʰāya mā́rutāya svábʰānava

Halfverse: b    imā́ṃ vā́cam anajā parvatacyúte /
   imā́m vā́cam anajā ! parvatacyúte /
   imā́ṃ vā́cam anajā parvatacyúte /

Halfverse: c    gʰarmastúbʰe divá ā́ pr̥ṣṭʰayájvane dyumnáśravase máhi nr̥mṇám arcata //
   gʰarmastúbʰe divá ā́ pr̥ṣṭʰayájvane
   gʰarmastúbʰe diváḥ ā́ pr̥ṣṭʰayájvane
   gʰarmastúbʰe divá ā́ pr̥ṣṭʰayájvane

Halfverse: d    dyumnáśravase máhi nr̥mṇám arcata //
   dyumnáśravase máhi nr̥mṇám arcata //
   dyumnáśravase máhi nr̥mṇám arcata //


Verse: 2 
Halfverse: a    prá vo marutas taviṣā́ udanyávo vayovŕ̥dʰo aśvayújaḥ párijrayaḥ /
   prá vo marutas taviṣā́ udanyávo
   prá vaḥ marutaḥ taviṣā́ḥ udanyávaḥ
   prá vo marutas taviṣā́ udanyávo

Halfverse: b    vayovŕ̥dʰo aśvayújaḥ párijrayaḥ /
   vayovŕ̥dʰaḥ aśvayújaḥ párijrayaḥ /
   vayovŕ̥dʰo aśvayújaḥ párijrayaḥ /

Halfverse: c    sáṃ vidyútā dádʰati vā́śati tritáḥ sváranty ā́po 'vánā párijrayaḥ //
   sáṃ vidyútā dádʰati vā́śati tritáḥ
   sám vidyútā dádʰati vā́śati tritáḥ
   sáṃ vidyútā dádʰati vā́śati tritáḥ

Halfverse: d    sváranty ā́po 'vánā párijrayaḥ //
   sváranti ā́paḥ avánā párijrayaḥ //
   sváranti ā́po avánā párijrayaḥ //


Verse: 3 
Halfverse: a    vidyúnmahaso náro áśmadidyavo vā́tatviṣo marútaḥ parvatacyútaḥ /
   vidyúnmahaso náro áśmadidyavo
   vidyúnmahasaḥ náraḥ áśmadidyavaḥ
   vidyúnmahaso náro áśmadidyavo

Halfverse: b    vā́tatviṣo marútaḥ parvatacyútaḥ /
   vā́tatviṣaḥ marútaḥ parvatacyútaḥ /
   vā́tatviṣo marútaḥ parvatacyútaḥ /

Halfverse: c    abdayā́ cin múhur ā́ hrādunīvŕ̥ta stanáyadamā rabʰasā́ údojasaḥ //
   abdayā́ cin múhur ā́ hrādunīvŕ̥ta
   abdayā́ cit múhur ā́ hrādunīvŕ̥taḥ
   abdayā́ cin múhur ā́ hrādunīvŕ̥taḥ

Halfverse: d    stanáyadamā rabʰasā́ údojasaḥ //
   stanáyadamāḥ rabʰasā́ḥ údojasaḥ //
   stanáyadamā rabʰasā́ údojasaḥ //


Verse: 4 
Halfverse: a    vy àktū́n rudrā vy áhāni śikvaso vy àntárikṣaṃ ví rájām̐si dʰūtayaḥ /
   vy àktū́n rudrā vy áhāni śikvaso
   ví aktū́n rudrāḥ ví áhāni śikvasaḥ
   ví aktū́n rudrā ví áhāni śikvaso

Halfverse: b    vy àntárikṣaṃ ví rájām̐si dʰūtayaḥ /
   ví antárikṣam ví rájāṃsi dʰūtayaḥ /
   ví antárikṣaṃ ví rájāṃsi dʰūtayaḥ /

Halfverse: c    ví yád ájrām̐ ájatʰa nā́va īṃ yatʰā ví durgā́ṇi maruto nā́ha riṣyatʰa //
   ví yád ájrām̐ ájatʰa nā́va īṃ yatʰā
   ví yát ájrān ájatʰa nā́vaḥ īm yatʰā
   ví yád ájrām̐ ájatʰa nā́va īṃ yatʰā

Halfverse: d    ví durgā́ṇi maruto nā́ha riṣyatʰa //
   ví durgā́ṇi marutaḥ ná áha riṣyatʰa //
   ví durgā́ṇi maruto nā́ha riṣyatʰa //


Verse: 5 
Halfverse: a    tád vīryàṃ vo maruto mahitvanáṃ dīrgʰáṃ tatāna sū́ryo ná yójanam \.\ /
   tád vīryàṃ vo maruto mahitvanáṃ
   tát vīryàm vaḥ marutaḥ mahitvanám
   tád vīríyaṃ vo maruto mahitvanáṃ

Halfverse: b    dīrgʰáṃ tatāna sū́ryo ná yójanam /
   dīrgʰám tatāna sū́ryaḥ ná yójanam /
   dīrgʰáṃ tatāna sū́riyo ná yójanam /

Halfverse: c    étā ná yā́me ágr̥bʰītaśociṣó 'naśvadāṃ yán ny áyātanā girím //
   étā ná yā́me ágr̥bʰītaśociṣó
   étāḥ ná yā́me ágr̥bʰītaśociṣaḥ
   étā ná yā́me ágr̥bʰītaśociṣo

Halfverse: d    'naśvadāṃ yán ny áyātanā girím //
   ánaśvadām yát ní áyātana+ girím //
   ánaśvadāṃ yán ní áyātanā girím //


Verse: 6 
Halfverse: a    ábʰrāji śárdʰo maruto yád arṇasám móṣatʰā vr̥kṣáṃ kapanéva vedʰasaḥ /
   ábʰrāji śárdʰo maruto yád arṇasám
   ábʰrāji śárdʰaḥ marutaḥ yát arṇasám
   ábʰrāji śárdʰo maruto yád arṇasám

Halfverse: b    móṣatʰā vr̥kṣáṃ kapanéva vedʰasaḥ /
   móṣatʰa+ vr̥kṣám kapanā́ iva vedʰasaḥ /
   móṣatʰā vr̥kṣáṃ kapanéva vedʰasaḥ /

Halfverse: c    ádʰa smā no arámatiṃ sajoṣasaś cákṣur iva yántam ánu neṣatʰā sugám //
   ádʰa smā no arámatiṃ sajoṣasaś
   ádʰa sma+ naḥ arámatim sajoṣasaḥ
   ádʰa smā no arámatiṃ sajoṣasaś

Halfverse: d    cákṣur iva yántam ánu neṣatʰā sugám //
   cákṣuḥ iva yántam ánu neṣatʰa+ sugám //
   cákṣur 'va ՙ yántam ánu neṣatʰā sugám //


Verse: 7 
Halfverse: a    ná sá jīyate maruto ná hanyate ná sredʰati ná vyatʰate ná riṣyati /
   ná sá jīyate maruto ná hanyate
   ná sá jīyate marutaḥ ná hanyate
   ná sá jīyate maruto ná hanyate

Halfverse: b    ná sredʰati ná vyatʰate ná riṣyati /
   ná sredʰati ná vyatʰate ná riṣyati /
   ná sredʰati ná vyatʰate ná riṣyati /

Halfverse: c    nā́sya rā́ya úpa dasyanti nótáya ŕ̥ṣiṃ vā yáṃ rā́jānaṃ vā súṣūdatʰa //
   nā́sya rā́ya úpa dasyanti nótáya
   ná asya rā́yaḥ úpa dasyanti ná ūtáyaḥ
   nā́sya rā́ya úpa dasyanti nótáya

Halfverse: d    ŕ̥ṣiṃ vā yáṃ rā́jānaṃ vā súṣūdatʰa //
   ŕ̥ṣim vā yám rā́jānam vā súṣūdatʰa //
   ŕ̥ṣiṃ vā yáṃ rā́jānaṃ vā súṣūdatʰa //


Verse: 8 
Halfverse: a    niyútvanto grāmajíto yátʰā náro 'ryamáṇo ná marútaḥ kabandʰínaḥ /
   niyútvanto grāmajíto yátʰā náro
   niyútvantaḥ grāmajítaḥ yátʰā náraḥ
   niyútvanto grāmajíto yátʰā náro

Halfverse: b    'ryamáṇo ná marútaḥ kabandʰínaḥ /
   aryamáṇaḥ ná marútaḥ kabandʰínaḥ /
   aryamáṇo ná marútaḥ kabandʰínaḥ /

Halfverse: c    pínvanty útsaṃ yád inā́so ásvaran vy ùndanti pr̥tʰivī́m mádʰvo ándʰasā //
   pínvanty útsaṃ yád inā́so ásvaran
   pínvanti útsam yát inā́saḥ ásvaran
   pínvanti útsaṃ yád inā́so ásvaran

Halfverse: d    vy ùndanti pr̥tʰivī́m mádʰvo ándʰasā //
   ví undanti pr̥tʰivī́m mádʰvaḥ ándʰasā //
   ví undanti pr̥tʰivī́m mádʰvo ándʰasā //


Verse: 9 
Halfverse: a    pravátvatīyám pr̥tʰivī́ marúdbʰyaḥ pravátvatī dyaúr bʰavati prayádbʰyaḥ /
   pravátvatīyám pr̥tʰivī́ marúdbʰyaḥ
   pravátvatī iyám pr̥tʰivī́ marúdbʰyaḥ
   pravátvatīyám pr̥tʰivī́ marúdbʰiyaḥ

Halfverse: b    pravátvatī dyaúr bʰavati prayádbʰyaḥ /
   pravátvatī dyaúḥ bʰavati prayádbʰyaḥ /
   pravátvatī dyaúr bʰavati prayádbʰiyaḥ /

Halfverse: c    pravátvatīḥ patʰyā̀ antárikṣyāḥ pravátvantaḥ párvatā jīrádānavaḥ //
   pravátvatīḥ patʰyā̀ antárikṣyāḥ
   pravátvatīḥ patʰyā̀ḥ antárikṣyāḥ
   pravátvatīḥ patʰíyā antárikṣiyāḥ

Halfverse: d    pravátvantaḥ párvatā jīrádānavaḥ //
   pravátvantaḥ párvatāḥ jīrádānavaḥ //
   pravátvantaḥ párvatā jīrádānavaḥ //


Verse: 10 
Halfverse: a    yán marutaḥ sabʰarasaḥ svarṇaraḥ sū́rya údite mádatʰā divo naraḥ /
   yán marutaḥ sabʰarasaḥ svarṇaraḥ
   yát marutaḥ sabʰarasaḥ svarṇaraḥ
   yán marutaḥ sabʰarasaḥ suvarṇaraḥ

Halfverse: b    sū́rya údite mádatʰā divo naraḥ /
   sū́rye údite mádatʰa+ divaḥ naraḥ /
   sū́rya údite mádatʰā divo naraḥ /

Halfverse: c    ná vó 'śvāḥ śratʰayantā́ha sísrataḥ sadyó asyā́dʰvanaḥ pārám aśnutʰa //
   ná vó 'śvāḥ śratʰayantā́ha sísrataḥ
   ná vaḥ áśvāḥ śratʰayanta áha sísrataḥ
   ná vo áśvāḥ śratʰayantā́ha sísrataḥ

Halfverse: d    sadyó asyā́dʰvanaḥ pārám aśnutʰa //
   sadyáḥ asya ádʰvanaḥ pārám aśnutʰa //
   sadyó asyá ádʰvanaḥ pārám aśnutʰa //


Verse: 11 
Halfverse: a    ám̐seṣu va r̥ṣṭáyaḥ patsú kʰādáyo vákṣassu rukmā́ maruto rátʰe śúbʰaḥ /
   ám̐seṣu va r̥ṣṭáyaḥ patsú kʰādáyo
   áṃseṣu vaḥ r̥ṣṭáyaḥ patsú kʰādáyaḥ
   áṃseṣu va r̥ṣṭáyaḥ patsú kʰādáyo

Halfverse: b    vákṣassu rukmā́ maruto rátʰe śúbʰaḥ /
   vákṣassu rukmā́ḥ marutaḥ rátʰe śúbʰaḥ /
   vákṣassu rukmā́ maruto rátʰe śúbʰaḥ /

Halfverse: c    agníbʰrājaso vidyúto gábʰastyoḥ śíprāḥ śīrṣásu vítatā hiraṇyáyīḥ //
   agníbʰrājaso vidyúto gábʰastyoḥ
   agníbʰrājasaḥ vidyútaḥ gábʰastyoḥ
   agníbʰrājaso vidyúto gábʰastiyoḥ

Halfverse: d    śíprāḥ śīrṣásu vítatā hiraṇyáyīḥ //
   śíprāḥ śīrṣásu vítatāḥ hiraṇyáyīḥ //
   śíprāḥ śīrṣásu vítatā hiraṇyáyīḥ //


Verse: 12 
Halfverse: a    táṃ nā́kam aryó ágr̥bʰītaśociṣaṃ rúśat píppalam maruto ví dʰūnutʰa /
   táṃ nā́kam aryó ágr̥bʰītaśociṣaṃ
   tám nā́kam aryáḥ ágr̥bʰītaśociṣam
   táṃ nā́kam aryó ágr̥bʰītaśociṣaṃ

Halfverse: b    rúśat píppalam maruto ví dʰūnutʰa /
   rúśat píppalam marutaḥ ví dʰūnutʰa /
   rúśat píppalam maruto ví dʰūnutʰa /

Halfverse: c    sám acyanta vr̥jánā́titviṣanta yát sváranti gʰóṣaṃ vítatam r̥tāyávaḥ //
   sám acyanta vr̥jánā́titviṣanta yát
   sám acyanta vr̥jánā átitviṣanta yát
   sám acyanta vr̥jánā́titviṣanta yát

Halfverse: d    sváranti gʰóṣaṃ vítatam r̥tāyávaḥ //
   sváranti gʰóṣam vítatam r̥tāyávaḥ //
   sváranti gʰóṣaṃ vítatam r̥tāyávaḥ //


Verse: 13 
Halfverse: a    yuṣmā́dattasya maruto vicetaso rāyáḥ syāma ratʰyò váyasvataḥ /
   yuṣmā́dattasya maruto vicetaso
   yuṣmā́dattasya marutaḥ vicetasaḥ
   yuṣmā́dattasya maruto vicetaso

Halfverse: b    rāyáḥ syāma ratʰyò váyasvataḥ /
   rāyáḥ syāma ratʰyàḥ váyasvataḥ /
   rāyáḥ siyāma ratʰíyo váyasvataḥ /

Halfverse: c    ná yó yúcʰati tiṣyò yátʰā divò 'smé rāranta marutaḥ sahasríṇam //
   ná yó yúcʰati tiṣyò yátʰā divò
   ná yáḥ yúcʰati tiṣyàḥ yátʰā diváḥ
   ná yó yúcʰati tiṣíyo yátʰā divò

Halfverse: d    'smé rāranta marutaḥ sahasríṇam //
   asmé rāranta marutaḥ sahasríṇam //
   asmé rāranta marutaḥ sahasríṇam //


Verse: 14 
Halfverse: a    yūyáṃ rayím maruta spārhávīraṃ yūyám ŕ̥ṣim avatʰa sā́mavipram /
   yūyáṃ rayím maruta spārhávīraṃ
   yūyám rayím marutaḥ spārhávīram
   yūyáṃ rayím maruta spārhávīraṃ

Halfverse: b    yūyám ŕ̥ṣim avatʰa sā́mavipram /
   yūyám ŕ̥ṣim avatʰa sā́mavipram /
   yūyám ŕ̥ṣim avatʰa sā́mavipram /

Halfverse: c    yūyám árvantam bʰaratā́ya vā́jaṃ yūyáṃ dʰattʰa rā́jānaṃ śruṣṭimántam //
   yūyám árvantam bʰaratā́ya vā́jaṃ
   yūyám árvantam bʰaratā́ya vā́jam
   yūyám árvantam bʰaratā́ya vā́jaṃ

Halfverse: d    yūyáṃ dʰattʰa rā́jānaṃ śruṣṭimántam //
   yūyám dʰattʰa rā́jānam śruṣṭimántam //
   yūyáṃ dʰattʰa rā́jānaṃ śruṣṭimántam //


Verse: 15 
Halfverse: a    tád vo yāmi dráviṇaṃ sadyaūtayo yénā svàr ṇá tatánāma nŕ̥̄m̐r abʰí /
   tád vo yāmi dráviṇaṃ sadyaūtayo
   tát vaḥ yāmi dráviṇam sadyaūtayaḥ
   tád vo yāmi dráviṇaṃ sadyaūtayo

Halfverse: b    yénā svàr ṇá tatánāma nŕ̥̄m̐r abʰí /
   yéna+ svàr ná tatánāma nŕ̥̄n abʰí /
   yénā súvar ṇá tatánāma nŕ̥̄m̐r abʰí /

Halfverse: c    idáṃ sú me maruto haryatā váco yásya tárema tárasā śatáṃ hímāḥ //
   idáṃ sú me maruto haryatā váco
   idám sú me marutaḥ haryata+ vácaḥ
   idáṃ sú me maruto haryatā váco

Halfverse: d    yásya tárema tárasā śatáṃ hímāḥ //
   yásya tárema tárasā śatám hímāḥ //
   yásya tárema tárasā śatáṃ hímāḥ //



Next part


This text is part of the TITUS edition of Rg-Veda: Rg-Veda-Samhita.

Copyright TITUS Project, Frankfurt a/M, 28.7.2009. No parts of this document may be republished in any form without prior permission by the copyright holder.