TITUS
Rg-Veda: Rg-Veda-Samhita
Part No. 417
Previous part

Hymn: 63_(417) 
Verse: 1 
Halfverse: a    ŕ̥tasya gopāv ádʰi tiṣṭʰatʰo rátʰaṃ sátyadʰarmāṇā paramé vyòmani /
   ŕ̥tasya gopāv ádʰi tiṣṭʰatʰo rátʰaṃ
   ŕ̥tasya gopau ádʰi tiṣṭʰatʰaḥ rátʰam
   ŕ̥tasya gopāv ádʰi tiṣṭʰatʰo rátʰaṃ

Halfverse: b    sátyadʰarmāṇā paramé vyòmani /
   sátyadʰarmāṇā paramé vyòmani /
   sátyadʰarmāṇā paramé víomani /

Halfverse: c    yám átra mitrāvaruṇā́vatʰo yuváṃ tásmai vr̥ṣṭír mádʰumat pinvate diváḥ //
   yám átra mitrāvaruṇā́vatʰo yuváṃ
   yám átra mitrāvaruṇā ávatʰaḥ yuvám
   yám átra mitrāvaruṇā́vatʰo yuváṃ

Halfverse: d    tásmai vr̥ṣṭír mádʰumat pinvate diváḥ //
   tásmai vr̥ṣṭíḥ mádʰumat pinvate diváḥ //
   tásmai vr̥ṣṭír mádʰumat pinvate diváḥ //


Verse: 2 
Halfverse: a    samrā́jāv asyá bʰúvanasya rājatʰo mítrāvaruṇā vidátʰe svardŕ̥śā /
   samrā́jāv asyá bʰúvanasya rājatʰo
   samrā́jau asyá bʰúvanasya rājatʰaḥ
   samrā́jāv asyá bʰúvanasya rājatʰo

Halfverse: b    mítrāvaruṇā vidátʰe svardŕ̥śā /
   mítrāvaruṇā vidátʰe svardŕ̥śā /
   mítrāvaruṇā vidátʰe suvardŕ̥śā /

Halfverse: c    vr̥ṣṭíṃ vāṃ rā́dʰo amr̥tatvám īmahe dyā́vāpr̥tʰivī́ ví caranti tanyávaḥ //
   vr̥ṣṭíṃ vāṃ rā́dʰo amr̥tatvám īmahe
   vr̥ṣṭím vām rā́dʰaḥ amr̥tatvám īmahe
   vr̥ṣṭíṃ vāṃ rā́dʰo amr̥tatvám īmahe

Halfverse: d    dyā́vāpr̥tʰivī́ ví caranti tanyávaḥ //
   dyā́vāpr̥tʰivī́ ví caranti tanyávaḥ //
   dyā́vāpr̥tʰivī́ ví caranti tanyávaḥ //


Verse: 3 
Halfverse: a    samrā́jā ugrā́ vr̥ṣabʰā́ divás pátī pr̥tʰivyā́ mitrā́váruṇā vícarṣaṇī /
   samrā́jā ugrā́ vr̥ṣabʰā́ divás pátī
   samrā́jau ugrā́ vr̥ṣabʰā́ diváḥ pátī
   samrā́jā ugrā́ vr̥ṣabʰā́ divás pátī

Halfverse: b    pr̥tʰivyā́ mitrā́váruṇā vícarṣaṇī /
   pr̥tʰivyā́ḥ mitrā́váruṇā vícarṣaṇī \!\ /
   pr̥tʰivyā́ mitrā́váruṇā vícarṣaṇī \!\ /

Halfverse: c    citrébʰir abʰraír úpa tiṣṭʰatʰo rávaṃ dyā́ṃ varṣayatʰo ásurasya māyáyā //
   citrébʰir abʰraír úpa tiṣṭʰatʰo rávaṃ
   citrébʰiḥ abʰraíḥ úpa tiṣṭʰatʰaḥ rávam
   citrébʰir abʰraír úpa tiṣṭʰatʰo rávaṃ

Halfverse: d    dyā́ṃ varṣayatʰo ásurasya māyáyā //
   dyā́m varṣayatʰaḥ ásurasya māyáyā //
   dyā́ṃ varṣayatʰo ásurasya māyáyā //


Verse: 4 
Halfverse: a    māyā́ vām mitrāvaruṇā diví śritā́ sū́ryo jyótiś carati citrám ā́yudʰam /
   māyā́ vām mitrāvaruṇā diví śritā́
   māyā́ vām mitrāvaruṇā diví śritā́
   māyā́ vām mitrāvaruṇā diví śritā́

Halfverse: b    sū́ryo jyótiś carati citrám ā́yudʰam /
   sū́ryaḥ jyótiḥ carati citrám ā́yudʰam /
   sū́ryo jyótiś carati citrám ā́yudʰam /

Halfverse: c    tám abʰréṇa vr̥ṣṭyā́ gūhatʰo diví párjanya drapsā́ mádʰumanta īrate //
   tám abʰréṇa vr̥ṣṭyā́ gūhatʰo diví
   tám abʰréṇa vr̥ṣṭyā́ gūhatʰaḥ diví
   tám abʰréṇa vr̥ṣṭiyā́ gūhatʰo diví

Halfverse: d    párjanya drapsā́ mádʰumanta īrate //
   párjanya drapsā́ḥ mádʰumantaḥ īrate //
   párjanya drapsā́ mádʰumanta īrate //


Verse: 5 
Halfverse: a    rátʰaṃ yuñjate marútaḥ śubʰé sukʰáṃ śū́ro ná mitrāvaruṇā gáviṣṭiṣu /
   rátʰaṃ yuñjate marútaḥ śubʰé sukʰáṃ
   rátʰam yuñjate marútaḥ śubʰé sukʰám
   rátʰaṃ yuñjate marútaḥ śubʰé sukʰáṃ

Halfverse: b    śū́ro ná mitrāvaruṇā gáviṣṭiṣu /
   śū́raḥ ná mitrāvaruṇā gáviṣṭiṣu /
   śū́ro ná mitrāvaruṇā gáviṣṭiṣu /

Halfverse: c    rájām̐si citrā́ ví caranti tanyávo diváḥ samrājā páyasā na ukṣatam //
   rájām̐si citrā́ ví caranti tanyávo
   rájāṃsi citrā́ ví caranti tanyávaḥ
   rájāṃsi citrā́ ví caranti tanyávo

Halfverse: d    diváḥ samrājā páyasā na ukṣatam //
   diváḥ samrājā páyasā naḥ ukṣatam //
   diváḥ samrājā páyasā na ukṣatam //


Verse: 6 
Halfverse: a    vā́caṃ sú mitrāvaruṇāv írāvatīm parjányaś citrā́ṃ vadati tvíṣīmatīm /
   vā́caṃ sú mitrāvaruṇāv írāvatīm
   vā́cam sú mitrāvaruṇau írāvatīm
   vā́caṃ sú mitrāvaruṇāv írāvatīm

Halfverse: b    parjányaś citrā́ṃ vadati tvíṣīmatīm /
   parjányaḥ citrā́m vadati tvíṣīmatīm /
   parjányaś citrā́ṃ vadati tvíṣīmatīm /

Halfverse: c    abʰrā́ vasata marútaḥ sú māyáyā dyā́ṃ varṣayatam aruṇā́m arepásam //
   abʰrā́ vasata marútaḥ sú māyáyā
   abʰrā́ vasata marútaḥ sú māyáyā
   abʰrā́ vasata marútaḥ sú māyáyā

Halfverse: d    dyā́ṃ varṣayatam aruṇā́m arepásam //
   dyā́m varṣayatam aruṇā́m arepásam //
   dyā́ṃ varṣayatam aruṇā́m arepásam //


Verse: 7 
Halfverse: a    dʰármaṇā mitrāvaruṇā vipaścitā vratā́ rakṣetʰe ásurasya māyáyā /
   dʰármaṇā mitrāvaruṇā vipaścitā
   dʰármaṇā mitrāvaruṇā vipaścitā
   dʰármaṇā mitrāvaruṇā vipaścitā

Halfverse: b    vratā́ rakṣetʰe ásurasya māyáyā /
   vratā́ rakṣetʰe ásurasya māyáyā /
   vratā́ rakṣetʰe ásurasya māyáyā /

Halfverse: c    r̥téna víśvam bʰúvanaṃ ví rājatʰaḥ sū́ryam ā́ dʰattʰo diví cítryaṃ rátʰam //
   r̥téna víśvam bʰúvanaṃ ví rājatʰaḥ
   r̥téna víśvam bʰúvanam ví rājatʰaḥ
   r̥téna víśvam bʰúvanaṃ ví rājatʰaḥ

Halfverse: d    sū́ryam ā́ dʰattʰo diví cítryaṃ rátʰam //
   sū́ryam ā́ dʰattʰaḥ diví cítryam rátʰam //
   sū́ryam ā́ dʰattʰo diví cítriyaṃ rátʰam //



Next part


This text is part of the TITUS edition of Rg-Veda: Rg-Veda-Samhita.

Copyright TITUS Project, Frankfurt a/M, 28.7.2009. No parts of this document may be republished in any form without prior permission by the copyright holder.