TITUS
Rg-Veda: Rg-Veda-Samhita
Part No. 746
Previous part

Hymn: 23_(735) 
Verse: 1 
Halfverse: a    sómā asr̥gram āśávo mádʰor mádasya dʰā́rayā /
   sómā asr̥gram āśávo
   sómāḥ asr̥gram āśávaḥ
   sómā asr̥gram āśávo

Halfverse: b    mádʰor mádasya dʰā́rayā /
   mádʰoḥ mádasya dʰā́rayā /
   mádʰor mádasya dʰā́rayā /

Halfverse: c    abʰí víśvāni kā́vyā //
   abʰí víśvāni kā́vyā //
   abʰí víśvāni kā́vyā //
   abʰí víśvāni kā́viyā //


Verse: 2 
Halfverse: a    ánu pratnā́sa āyávaḥ padáṃ návīyo akramuḥ /
   ánu pratnā́sa āyávaḥ
   ánu pratnā́saḥ āyávaḥ
   ánu pratnā́sa āyávaḥ

Halfverse: b    padáṃ návīyo akramuḥ /
   padám návīyaḥ akramuḥ /
   padáṃ návīyo akramuḥ /

Halfverse: c    rucé jananta sū́ryam //
   rucé jananta sū́ryam //
   rucé jananta sū́ryam //
   rucé jananta sū́riyam //


Verse: 3 
Halfverse: a    ā́ pavamāna no bʰarāryó ádāśuṣo gáyam /
   ā́ pavamāna no bʰara_
   ā́ pavamāna naḥ bʰara
   ā́ pavamāna no bʰara

Halfverse: b    _aryó ádāśuṣo gáyam /
   aryáḥ ádāśuṣaḥ gáyam /
   aryó ádāśuṣo gáyam /

Halfverse: c    kr̥dʰí prajā́vatīr íṣaḥ //
   kr̥dʰí prajā́vatīr íṣaḥ //
   kr̥dʰí prajā́vatīḥ íṣaḥ //
   kr̥dʰí prajā́vatīr íṣaḥ //


Verse: 4 
Halfverse: a    abʰí sómāsa āyávaḥ pávante mádyam mádam /
   abʰí sómāsa āyávaḥ
   abʰí sómāsaḥ āyávaḥ
   abʰí sómāsa āyávaḥ

Halfverse: b    pávante mádyam mádam /
   pávante mádyam mádam /
   pávante mádiyam mádam /

Halfverse: c    abʰí kóśam madʰuścútam //
   abʰí kóśam madʰuścútam //
   abʰí kóśam madʰuścútam //
   abʰí kóśam madʰuścútam //


Verse: 5 
Halfverse: a    sómo arṣati dʰarṇasír dádʰāna indriyáṃ rásam /
   sómo arṣati dʰarṇasír
   sómaḥ arṣati dʰarṇasíḥ
   sómo arṣati dʰarṇasír

Halfverse: b    dádʰāna indriyáṃ rásam /
   dádʰānaḥ indriyám rásam /
   dádʰāna indriyáṃ rásam /

Halfverse: c    suvī́ro abʰiśastipā́ḥ //
   suvī́ro abʰiśastipā́ḥ //
   suvī́raḥ abʰiśastipā́ḥ //
   suvī́ro abʰiśastipā́ḥ //


Verse: 6 
Halfverse: a    índrāya soma pavase devébʰyaḥ sadʰamā́dyaḥ /
   índrāya soma pavase
   índrāya soma pavase
   índrāya soma pavase

Halfverse: b    devébʰyaḥ sadʰamā́dyaḥ /
   devébʰyaḥ sadʰamā́dyaḥ /
   devébʰyaḥ sadʰamā́diyaḥ /

Halfverse: c    índo vā́jaṃ siṣāsasi //
   índo vā́jaṃ siṣāsasi //
   índo vā́jam siṣāsasi //
   índo vā́jaṃ siṣāsasi //


Verse: 7 
Halfverse: a    asyá pītvā́ mádānām índro vr̥trā́ṇy apratí /
   asyá pītvā́ mádānām
   asyá pītvā́ mádānām
   asyá pītvā́ mádānãam

Halfverse: b    índro vr̥trā́ṇy apratí /
   índraḥ vr̥trā́ṇi apratí /
   índro vr̥trā́ṇi apratí /

Halfverse: c    jagʰā́na jagʰánac ca nú //
   jagʰā́na jagʰánac ca nú //
   jagʰā́na jagʰánat ca nú //
   jagʰā́na jagʰánac ca nú //



Next part


This text is part of the TITUS edition of Rg-Veda: Rg-Veda-Samhita.

Copyright TITUS Project, Frankfurt a/M, 28.7.2009. No parts of this document may be republished in any form without prior permission by the copyright holder.