TITUS
Rg-Veda: Rg-Veda-Samhita
Part No. 954
Previous part

Hymn: 117_(943) 
Verse: 1 
Halfverse: a    ná vā́ u devā́ḥ kṣúdʰam íd vadʰáṃ dadur utā́śitam úpa gacʰanti mr̥tyávaḥ /
   ná vā́ u devā́ḥ kṣúdʰam íd vadʰáṃ dadur
   ná vaí u devā́ḥ kṣúdʰam ít vadʰám daduḥ
   ná vā́ u devā́ḥ kṣúdʰam íd vadʰáṃ dadur

Halfverse: b    utā́śitam úpa gacʰanti mr̥tyávaḥ /
   utá ā́śitam úpa gacʰanti mr̥tyávaḥ /
   utā́śitam úpa gacʰanti mr̥tyávaḥ /

Halfverse: c    utó rayíḥ pr̥ṇató nópa dasyaty utā́pr̥ṇan marḍitā́raṃ ná vindate //
   utó rayíḥ pr̥ṇató nópa dasyaty
   utá u rayíḥ pr̥ṇatáḥ ná úpa dasyati
   utó rayíḥ pr̥ṇató nópa dasyati

Halfverse: d    utā́pr̥ṇan marḍitā́raṃ ná vindate //
   utá ápr̥ṇan marḍitā́ram ná vindate //
   utā́pr̥ṇan marḍitā́raṃ ná vindate //


Verse: 2 
Halfverse: a    yá ādʰrā́ya cakamānā́ya pitvó 'nnavān sán rapʰitā́yopajagmúṣe /
   yá ādʰrā́ya cakamānā́ya pitvó
   yáḥ ādʰrā́ya cakamānā́ya pitváḥ
   yá ādʰrā́ya cakamānā́ya pitvó

Halfverse: b    'nnavān sán rapʰitā́yopajagmúṣe /
   ánnavān sán rapʰitā́ya upajagmúṣe /
   ánnavān sán rapʰitā́yopajagmúṣe /

Halfverse: c    stʰirám mánaḥ kr̥ṇuté sévate purótó cit sá marḍitā́raṃ ná vindate //
   stʰirám mánaḥ kr̥ṇuté sévate purā́_
   stʰirám mánaḥ kr̥ṇuté sévate purā́
   stʰirám mánaḥ kr̥ṇuté sévate purā́

Halfverse: d    _utó cit sá marḍitā́raṃ ná vindate //
   utá u cit sá marḍitā́ram ná vindate //
   utó cit sá marḍitā́raṃ ná vindate //


Verse: 3 
Halfverse: a    sá íd bʰojó yó gr̥háve dádāty ánnakāmāya cárate kr̥śā́ya /
   sá íd bʰojó yó gr̥háve dádāty
   sáḥ \!\ ít bʰojáḥ yáḥ gr̥háve dádāti
   sá íd bʰojó yó gr̥háve dádāti

Halfverse: b    ánnakāmāya cárate kr̥śā́ya /
   ánnakāmāya cárate kr̥śā́ya /
   ánnakāmāya cárate kr̥śā́ya /

Halfverse: c    áram asmai bʰavati yā́mahūtā utā́parī́ṣu kr̥ṇute sákʰāyam //
   áram asmai bʰavati yā́mahūtā
   áram asmai bʰavati yā́mahūtau
   áram asmai bʰavati yā́mahūtā

Halfverse: d    utā́parī́ṣu kr̥ṇute sákʰāyam //
   utá aparī́ṣu kr̥ṇute sákʰāyam //
   utā́parī́ṣu kr̥ṇute sákʰāyam //


Verse: 4 
Halfverse: a    ná sá sákʰā yó ná dádāti sákʰye sacābʰúve sácamānāya pitváḥ /
   ná sá sákʰā yó ná dádāti sákʰye
   ná sá sákʰā yáḥ ná dádāti sákʰye
   ná sá sákʰā yó ná dádāti sákʰye

Halfverse: b    sacābʰúve sácamānāya pitváḥ /
   sacābʰúve sácamānāya pitváḥ /
   sacābʰúve sácamānāya pitváḥ /

Halfverse: c    ápāsmāt préyān ná tád óko asti pr̥ṇántam anyám áraṇaṃ cid icʰet //
   ápāsmāt préyān ná tád óko asti
   ápa asmāt prá iyāt ná tát ókaḥ asti
   ápāsmāt préyān ná tád óko asti

Halfverse: d    pr̥ṇántam anyám áraṇaṃ cid icʰet //
   pr̥ṇántam anyám áraṇam cit icʰet //
   pr̥ṇántam anyám áraṇaṃ cid icʰet //


Verse: 5 
Halfverse: a    pr̥ṇīyā́d ín nā́dʰamānāya távyān drā́gʰīyāṃsam ánu paśyeta pántʰām /
   pr̥ṇīyā́d ín nā́dʰamānāya távyān
   pr̥ṇīyā́t ít nā́dʰamānāya távyān
   pr̥ṇīyā́d ín nā́dʰamānāya távyān

Halfverse: b    drā́gʰīyāṃsam ánu paśyeta pántʰām /
   drā́gʰīyāṃsam ánu paśyeta pántʰām /
   drā́gʰīyāṃsam ánu paśyeta pántʰām /

Halfverse: c    ó hí vártante rátʰyeva cakrā́nyám-anyam úpa tiṣṭʰanta rā́yaḥ //
   ó hí vártante rátʰyeva cakrā́_
   ā́ u hí vártante rátʰyā iva cakrā́
   ó hí vártante rátʰiyeva cakrā́

Halfverse: d    _anyám-anyam úpa tiṣṭʰanta rā́yaḥ //
   anyám-anyam úpa tiṣṭʰanta rā́yaḥ //
   anyám-anyam úpa tiṣṭʰanta rā́yaḥ //


Verse: 6 
Halfverse: a    mógʰam ánnaṃ vindate ápracetāḥ satyám bravīmi vadʰá ít sá tásya /
   mógʰam ánnaṃ vindate ápracetāḥ
   mógʰam ánnam vindate ápracetāḥ
   mógʰam ánnaṃ vindate ápracetāḥ

Halfverse: b    satyám bravīmi vadʰá ít sá tásya /
   satyám bravīmi vadʰáḥ ít sá tásya /
   satyám bravīmi vadʰá ít sá tásya /

Halfverse: c    nā́ryamáṇam púṣyati nó sákʰāyaṃ kévalāgʰo bʰavati kevalādī́ //
   nā́ryamáṇam púṣyati nó sákʰāyaṃ
   ná aryamáṇam púṣyati ná u sákʰāyam
   nā́ryamáṇam púṣyati nó sákʰāyaṃ

Halfverse: d    kévalāgʰo bʰavati kevalādī́ //
   kévalāgʰaḥ bʰavati kevalādī́ //
   kévalāgʰo bʰavati kevalādī́ //


Verse: 7 
Halfverse: a    kr̥ṣánn ít pʰā́la ā́śitaṃ kr̥ṇoti yánn ádʰvānam ápa vr̥ṅkte carítraiḥ /
   kr̥ṣánn ít pʰā́la ā́śitaṃ kr̥ṇoti
   kr̥ṣán ít pʰā́laḥ ā́śitam kr̥ṇoti
   kr̥ṣánn ít pʰā́la ā́śitaṃ kr̥ṇoti

Halfverse: b    yánn ádʰvānam ápa vr̥ṅkte carítraiḥ /
   yán ádʰvānam ápa vr̥ṅkte carítraiḥ /
   yánn ádʰvānam ápa vr̥ṅkte carítraiḥ /

Halfverse: c    vádan brahmā́vadato vánīyān pr̥ṇánn āpír ápr̥ṇantam abʰí ṣyāt //
   vádan brahmā́vadato vánīyān
   vádan brahmā́ ávadataḥ vánīyān
   vádan brahmā́ ávadato vánīyān

Halfverse: d    pr̥ṇánn āpír ápr̥ṇantam abʰí ṣyāt //
   pr̥ṇán āpíḥ ápr̥ṇantam abʰí syāt //
   pr̥ṇánn āpír ápr̥ṇantam abʰí ṣyāt //


Verse: 8 
Halfverse: a    ékapād bʰū́yo dvipádo ví cakrame dvipā́t tripā́dam abʰy èti paścā́t /
   ékapād bʰū́yo dvipádo ví cakrame
   ékapāt bʰū́yaḥ dvipádaḥ ví cakrame
   ékapād bʰū́yo dvipádo ví cakrame

Halfverse: b    dvipā́t tripā́dam abʰy èti paścā́t /
   dvipā́t tripā́dam abʰí eti paścā́t /
   dvipā́t tripā́dam abʰí eti paścā́t /

Halfverse: c    cátuṣpād eti dvipádām abʰisvaré sampáśyan paṅktī́r upatíṣṭʰamānaḥ //
   cátuṣpād eti dvipádām abʰisvaré
   cátuṣpāt eti dvipádām abʰisvaré
   cátuṣpād eti dvipádām abʰisvaré

Halfverse: d    sampáśyan paṅktī́r upatíṣṭʰamānaḥ //
   sampáśyan paṅktī́ḥ upatíṣṭʰamānaḥ //
   sampáśyan paṅktī́r upatíṣṭʰamānaḥ //


Verse: 9 
Halfverse: a    samaú cid dʰástau ná samáṃ viviṣṭaḥ sammātárā cin ná samáṃ duhāte /
   samaú cid dʰástau ná samáṃ viviṣṭaḥ
   samaú cit hástau ná samám viviṣṭaḥ
   samaú cid dʰástau ná samáṃ viviṣṭaḥ

Halfverse: b    sammātárā cin ná samáṃ duhāte /
   sammātárā cit ná samám duhāte /
   sammātárā cin ná samáṃ duhāte /

Halfverse: c    yamáyoś cin ná samā́ vīryā̀ṇi jñātī́ cit sántau ná samám pr̥ṇītaḥ //
   yamáyoś cin ná samā́ vīryā̀ṇi
   yamáyoḥ cit ná samā́ vīryā̀ṇi
   yamáyoś cin ná samā́ vīríyāṇi

Halfverse: d    jñātī́ cit sántau ná samám pr̥ṇītaḥ //
   jñātī́ cit sántau ná samám pr̥ṇītaḥ //
   jñātī́ cit sántau ná samám pr̥ṇītaḥ //



Next part


This text is part of the TITUS edition of Rg-Veda: Rg-Veda-Samhita.

Copyright TITUS Project, Frankfurt a/M, 28.7.2009. No parts of this document may be republished in any form without prior permission by the copyright holder.