TITUS
Rg-Veda: Rg-Veda-Samhita
Part No. 959
Previous part

Hymn: 122_(948) 
Verse: 1 
Halfverse: a    vásuṃ ná citrámahasaṃ gr̥ṇīṣe vāmáṃ śévam átitʰim adviṣeṇyám /
   vásuṃ ná citrámahasaṃ gr̥ṇīṣe
   vásum ná citrámahasam gr̥ṇīṣe
   vásuṃ ná citrámahasaṃ gr̥ṇīṣe

Halfverse: b    vāmáṃ śévam átitʰim adviṣeṇyám /
   vāmám śévam átitʰim adviṣeṇyám /
   vāmáṃ śévam átitʰim adviṣeṇyám /

Halfverse: c    sá rāsate śurúdʰo viśvádʰāyaso 'gnír hótā gr̥hápatiḥ suvī́ryam //
   sá rāsate śurúdʰo viśvádʰāyaso
   sá rāsate śurúdʰaḥ viśvádʰāyasaḥ
   sá rāsate śurúdʰo viśvádʰāyaso

Halfverse: d    'gnír hótā gr̥hápatiḥ suvī́ryam //
   agníḥ hótā gr̥hápatiḥ suvī́ryam //
   agnír hótā gr̥hápatiḥ suvī́ryam //


Verse: 2 
Halfverse: a    juṣāṇó agne práti harya me váco víśvāni vidvā́n vayúnāni sukrato /
   juṣāṇó agne práti harya me váco
   juṣāṇáḥ agne práti harya me vácaḥ
   juṣāṇó agne práti harya me váco

Halfverse: b    víśvāni vidvā́n vayúnāni sukrato /
   víśvāni vidvā́n vayúnāni sukrato /
   víśvāni vidvā́n vayúnāni sukrato /

Halfverse: c    gʰŕ̥tanirṇig bráhmaṇe gātúm éraya táva devā́ ajanayann ánu vratám //
   gʰŕ̥tanirṇig bráhmaṇe gātúm éraya
   gʰŕ̥tanirṇik bráhmaṇe gātúm ā́ īraya
   gʰŕ̥tanirṇig bráhmaṇe gātúm éraya

Halfverse: d    táva devā́ ajanayann ánu vratám //
   táva devā́ḥ ajanayan ánu vratám //
   táva devā́ ajanayann ánu vratám //


Verse: 3 
Halfverse: a    saptá dʰā́māni pariyánn ámartyo dā́śad dāśúṣe sukŕ̥te māmahasva /
   saptá dʰā́māni pariyánn ámartyo
   saptá dʰā́māni pariyán ámartyaḥ
   saptá dʰā́māni pariyánn ámartiyo

Halfverse: b    dā́śad dāśúṣe sukŕ̥te māmahasva /
   dā́śat dāśúṣe sukŕ̥te māmahasva /
   dā́śad dāśúṣe sukŕ̥te māmahasva /

Halfverse: c    suvī́reṇa rayíṇāgne svābʰúvā yás ta ā́naṭ samídʰā táṃ juṣasva //
   suvī́reṇa rayíṇāgne svābʰúvā
   suvī́reṇa rayíṇā agne svābʰúvā
   suvī́reṇa rayíṇāgne suābʰúvā

Halfverse: d    yás ta ā́naṭ samídʰā táṃ juṣasva //
   yáḥ te ā́naṭ samídʰā tám juṣasva //
   yás ta ā́naṭ samídʰā táṃ juṣasva //


Verse: 4 
Halfverse: a    yajñásya ketúm pratʰamám puróhitaṃ havíṣmanta īḷate saptá vājínam /
   yajñásya ketúm pratʰamám puróhitaṃ
   yajñásya ketúm pratʰamám puróhitam
   yajñásya ketúm pratʰamám puróhitaṃ

Halfverse: b    havíṣmanta īḷate saptá vājínam /
   havíṣmantaḥ īḷate saptá vājínam /
   havíṣmanta īḷate saptá vājínam /

Halfverse: c    śr̥ṇvántam agníṃ gʰr̥tápr̥ṣṭʰam ukṣáṇam pr̥ṇántaṃ devám pr̥ṇaté suvī́ryam //
   śr̥ṇvántam agníṃ gʰr̥tápr̥ṣṭʰam ukṣáṇam
   śr̥ṇvántam agním gʰr̥tápr̥ṣṭʰam ukṣáṇam
   śr̥ṇvántam agníṃ gʰr̥tápr̥ṣṭʰam ukṣáṇam

Halfverse: d    pr̥ṇántaṃ devám pr̥ṇaté suvī́ryam //
   pr̥ṇántam devám pr̥ṇaté suvī́ryam //
   pr̥ṇántaṃ devám pr̥ṇaté suvī́riyam //


Verse: 5 
Halfverse: a    tváṃ dūtáḥ pratʰamó váreṇyaḥ sá hūyámāno amŕ̥tāya matsva /
   tváṃ dūtáḥ pratʰamó váreṇyaḥ
   tvám dūtáḥ pratʰamáḥ váreṇyaḥ
   tuváṃ dūtáḥ ? pratʰamó váreṇyaḥ

Halfverse: b    sá hūyámāno amŕ̥tāya matsva /
   sá hūyámānaḥ amŕ̥tāya matsva /
   sá hūyámāno amŕ̥tāya matsva /

Halfverse: c    tvā́m marjayan marúto dāśúṣo gr̥hé tvā́ṃ stómebʰir bʰŕ̥gavo ví rurucuḥ //
   tvā́m marjayan marúto dāśúṣo gr̥hé
   tvā́m marjayan marútaḥ dāśúṣaḥ gr̥hé
   tvā́m marjayan marúto dāśúṣo gr̥hé

Halfverse: d    tvā́ṃ stómebʰir bʰŕ̥gavo ví rurucuḥ //
   tvā́m stómebʰiḥ bʰŕ̥gavaḥ ví rurucuḥ //
   tuvā́ṃ stómebʰir bʰŕ̥gavo ví rurucuḥ //


Verse: 6 
Halfverse: a    íṣaṃ duhán sudúgʰāṃ viśvádʰāyasaṃ yajñapríye yájamānāya sukrato /
   íṣaṃ duhán sudúgʰāṃ viśvádʰāyasaṃ
   íṣam duhán sudúgʰām viśvádʰāyasam
   íṣaṃ duhán sudúgʰāṃ viśvádʰāyasaṃ

Halfverse: b    yajñapríye yájamānāya sukrato /
   yajñapríye yájamānāya sukrato /
   yajñapríye yájamānāya sukrato /

Halfverse: c    ágne gʰr̥tásnus trír r̥tā́ni dī́dyad vartír yajñám pariyán sukratūyase //
   ágne gʰr̥tásnus trír r̥tā́ni dī́dyad
   ágne gʰr̥tásnuḥ tríḥ r̥tā́ni dī́dyat
   ágne gʰr̥tásnus trír r̥tā́ni dī́diyad

Halfverse: d    vartír yajñám pariyán sukratūyase //
   vartíḥ yajñám pariyán sukratūyase //
   vartír yajñám pariyán sukratūyase //


Verse: 7 
Halfverse: a    tvā́m íd asyā́ uṣáso vyùṣṭiṣu dūtáṃ kr̥ṇvānā́ ayajanta mā́nuṣāḥ /
   tvā́m íd asyā́ uṣáso vyùṣṭiṣu
   tvā́m ít asyā́ḥ uṣásaḥ vyùṣṭiṣu
   tuvā́m íd asyā́ uṣáso víuṣṭiṣu

Halfverse: b    dūtáṃ kr̥ṇvānā́ ayajanta mā́nuṣāḥ /
   dūtám kr̥ṇvānā́ḥ ayajanta mā́nuṣāḥ /
   dūtáṃ kr̥ṇvānā́ ayajanta mā́nuṣāḥ /

Halfverse: c    tvā́ṃ devā́ mahayā́yyāya vāvr̥dʰur ā́jyam agne nimr̥jánto adʰvaré //
   tvā́ṃ devā́ mahayā́yyāya vāvr̥dʰur
   tvā́m devā́ḥ mahayā́yyāya vāvr̥dʰuḥ
   tvā́ṃ devā́ mahayā́yiyāya vāvr̥dʰur

Halfverse: d    ā́jyam agne nimr̥jánto adʰvaré //
   ā́jyam agne nimr̥jántaḥ adʰvaré //
   ā́jiyam agne nimr̥jánto adʰvaré //


Verse: 8 
Halfverse: a    ní tvā vásiṣṭʰā ahvanta vājínaṃ gr̥ṇánto agne vidátʰeṣu vedʰásaḥ /
   ní tvā vásiṣṭʰā ahvanta vājínaṃ
   ní tvā vásiṣṭʰāḥ ahvanta vājínam
   ní tvā vásiṣṭʰā ahuvanta vājínaṃ

Halfverse: b    gr̥ṇánto agne vidátʰeṣu vedʰásaḥ /
   gr̥ṇántaḥ agne vidátʰeṣu vedʰásaḥ /
   gr̥ṇánto agne vidátʰeṣu vedʰásaḥ /

Halfverse: c    rāyás póṣaṃ yájamāneṣu dʰāraya yūyám pāta svastíbʰiḥ sádā naḥ //
   rāyás póṣaṃ yájamāneṣu dʰāraya
   rāyáḥ póṣam yájamāneṣu dʰāraya
   rāyás póṣaṃ yájamāneṣu dʰāraya

Halfverse: d    yūyám pāta svastíbʰiḥ sádā naḥ //
   yūyám pāta svastíbʰiḥ sádā naḥ //
   yūyám pāta suastíbʰiḥ sádā naḥ //



Next part


This text is part of the TITUS edition of Rg-Veda: Rg-Veda-Samhita.

Copyright TITUS Project, Frankfurt a/M, 28.7.2009. No parts of this document may be republished in any form without prior permission by the copyright holder.