TITUS
Rg-Veda: Rg-Veda-Samhita
Part No. 968
Previous part

Hymn: 131_(957) 
Verse: 1 
Halfverse: a    ápa prā́ca indra víśvām̐ amítrān ápā́pāco abʰibʰūte nudasva /
   ápa prā́ca indra víśvām̐ amítrān
   ápa prā́caḥ indra víśvān amítrān
   ápa prā́ca indra víśvām̐ amítrān

Halfverse: b    ápā́pāco abʰibʰūte nudasva /
   ápa ápācaḥ abʰibʰūte nudasva /
   ápā́pāco abʰibʰūte nudasva /

Halfverse: c    ápódīco ápa śūrādʰarā́ca uraú yátʰā táva śárman mádema //
   ápódīco ápa śūrādʰarā́ca
   ápa údīcaḥ ápa śūra adʰarā́caḥ
   ápódīco ápa śūrādʰarā́ca

Halfverse: d    uraú yátʰā táva śárman mádema //
   uraú yátʰā táva śárman mádema //
   uraú yátʰā táva śárman mádema //


Verse: 2 
Halfverse: a    kuvíd aṅgá yávamanto yávaṃ cid yátʰā dā́nty anupūrváṃ viyū́ya /
   kuvíd aṅgá yávamanto yávaṃ cid
   kuvít aṅgá yávamantaḥ yávam cit
   kuvíd aṅgá yávamanto yávaṃ cid

Halfverse: b    yátʰā dā́nty anupūrváṃ viyū́ya /
   yátʰā dā́nti anupūrvám viyū́ya /
   yátʰā dā́nti anupūrváṃ viyū́ya /

Halfverse: c    ihéhaiṣāṃ kr̥ṇuhi bʰójanāni yé barhíṣo námovr̥ktiṃ ná jagmúḥ //
   ihéhaiṣāṃ kr̥ṇuhi bʰójanāni
   ihéha eṣām kr̥ṇuhi bʰójanāni
   ihéhaiṣāṃ kr̥ṇuhi bʰójanāni

Halfverse: d    yé barhíṣo námovr̥ktiṃ ná jagmúḥ //
   yé barhíṣaḥ námovr̥ktim ná jagmúḥ //
   yé barhíṣo námovr̥ktiṃ ná jagmúḥ //


Verse: 3 
Halfverse: a    nahí stʰū́ry r̥tutʰā́ yātám ásti nótá śrávo vivide saṃgaméṣu /
   nahí stʰū́ry r̥tutʰā́ yātám ásti
   nahí stʰū́ri r̥tutʰā́ yātám ásti
   nahí stʰū́ri r̥tutʰā́ yātám ásti

Halfverse: b    nótá śrávo vivide saṃgaméṣu /
   ná utá śrávaḥ vivide saṃgaméṣu /
   nótá śrávo vivide saṃgaméṣu /

Halfverse: c    gavyánta índraṃ sakʰyā́ya víprā aśvāyánto vŕ̥ṣaṇaṃ vājáyantaḥ //
   gavyánta índraṃ sakʰyā́ya víprā
   gavyántaḥ índram sakʰyā́ya víprāḥ
   gavyánta índraṃ sakʰiyā́ya víprā

Halfverse: d    aśvāyánto vŕ̥ṣaṇaṃ vājáyantaḥ //
   aśvāyántaḥ vŕ̥ṣaṇam vājáyantaḥ //
   aśvāyánto vŕ̥ṣaṇaṃ vājáyantaḥ //


Verse: 4 
Halfverse: a    yuváṃ surā́mam aśvinā námucāv āsuré sácā /
   yuváṃ surā́mam aśvinā
   yuvám surā́mam aśvinā
   yuváṃ surā́mam aśvinā

Halfverse: b    námucāv āsuré sácā /
   námucau āsuré sácā /
   námucāv āsuré sácā /

Halfverse: c    vipipānā́ śubʰas patī índraṃ kármasv āvatam //
   vipipānā́ śubʰas patī
   vipipānā́ śubʰaḥ patī
   vipipānā́ śubʰas patī

Halfverse: d    índraṃ kármasv āvatam //
   índram kármasu āvatam //
   índraṃ kármasu āvatam //


Verse: 5 
Halfverse: a    putrám iva pitárāv aśvínobʰéndrāvátʰuḥ kā́vyair daṃsánābʰiḥ /
   putrám iva pitárāv aśvínobʰā́_
   putrám iva pitárau aśvínā ubʰā́
   putrám iva pitárāv aśvínobʰā

Halfverse: b    _índrāvátʰuḥ kā́vyair daṃsánābʰiḥ /
   índra āvátʰuḥ kā́vyaiḥ daṃsánābʰiḥ /
   índrāvátʰuḥ kā́viyair daṃsánābʰiḥ /

Halfverse: c    yát surā́maṃ vy ápibaḥ śácībʰiḥ sárasvatī tvā magʰavann abʰiṣṇak //
   yát surā́maṃ vy ápibaḥ śácībʰiḥ
   yát surā́mam ví ápibaḥ śácībʰiḥ
   yát surā́maṃ ví ápibaḥ śácībʰiḥ

Halfverse: d    sárasvatī tvā magʰavann abʰiṣṇak //
   sárasvatī tvā magʰavan abʰiṣṇak //
   sárasvatī tvā magʰavann abʰiṣṇak //


Verse: 6 
Halfverse: a    índraḥ sutrā́mā svávām̐ ávobʰiḥ sumr̥ḷīkó bʰavatu viśvávedāḥ /
   índraḥ sutrā́mā svávām̐ ávobʰiḥ
   índraḥ sutrā́mā svávān ávobʰiḥ
   índraḥ sutrā́mā suávām̐ ávobʰiḥ

Halfverse: b    sumr̥ḷīkó bʰavatu viśvávedāḥ /
   sumr̥ḷīkáḥ bʰavatu viśvávedāḥ /
   sumr̥ḷīkó bʰavatu viśvávedāḥ /

Halfverse: c    bā́dʰatāṃ dvéṣo ábʰayaṃ kr̥ṇotu suvī́ryasya pátayaḥ syāma //
   bā́dʰatāṃ dvéṣo ábʰayaṃ kr̥ṇotu
   bā́dʰatām dvéṣaḥ ábʰayam kr̥ṇotu
   bā́dʰatāṃ dvéṣo ábʰayaṃ kr̥ṇotu

Halfverse: d    suvī́ryasya pátayaḥ syāma //
   suvī́ryasya pátayaḥ syāma //
   suvī́riyasya pátayaḥ siyāma //


Verse: 7 
Halfverse: a    tásya vayáṃ sumataú yajñíyasyā́pi bʰadré saumanasé syāma /
   tásya vayáṃ sumataú yajñíyasya_
   tásya vayám sumataú yajñíyasya
   tásya vayáṃ sumataú yajñíyasya

Halfverse: b    _ápi bʰadré saumanasé syāma /
   ápi bʰadré saumanasé syāma /
   ápi bʰadré saumanasé siyāma /

Halfverse: c    sá sutrā́mā svávām̐ índro asmé ārā́c cid dvéṣaḥ sanutár yuyotu //
   sá sutrā́mā svávām̐ índro asmé
   sá sutrā́mā svávān índraḥ asmé
   sá sutrā́mā suávām̐ índro asmé

Halfverse: d    ārā́c cid dvéṣaḥ sanutár yuyotu //
   ārā́t cit dvéṣaḥ sanutár yuyotu //
   ārā́c cid dvéṣaḥ sanutár yuyotu //



Next part


This text is part of the TITUS edition of Rg-Veda: Rg-Veda-Samhita.

Copyright TITUS Project, Frankfurt a/M, 28.7.2009. No parts of this document may be republished in any form without prior permission by the copyright holder.