TITUS
Rg-Veda: Rg-Veda-Samhita
Part No. 969
Previous part

Hymn: 132_(958) 
Verse: 1 
Halfverse: a    ījānám íd dyaúr gūrtā́vasur ījānám bʰū́mir abʰí prabʰūṣáṇi /
   ījānám íd dyaúr gūrtā́vasur
   ījānám ít dyaúḥ gūrtā́vasuḥ
   ījānám íd diyaúr gūrtā́vasur

Halfverse: b    ījānám bʰū́mir abʰí prabʰūṣáṇi /
   ījānám bʰū́miḥ abʰí prabʰūṣáṇi /
   ījānám bʰū́mir abʰí prabʰūṣáṇi /

Halfverse: c    ījānáṃ devā́v aśvínāv abʰí sumnaír avardʰatām //
   ījānáṃ devā́v aśvínāv
   ījānám devaú aśvínau
   ījānáṃ devā́v aśvínāv

Halfverse: d    abʰí sumnaír avardʰatām //
   abʰí sumnaíḥ avardʰatām //
   abʰí sumnaír avardʰatām //


Verse: 2 
Halfverse: a    tā́ vām mitrāvaruṇā dʰārayátkṣitī suṣumnéṣitatvátā yajāmasi /
   tā́ vām mitrāvaruṇā dʰārayátkṣitī
   tā́ vām mitrāvaruṇā dʰārayátkṣitī
   tā́ vām mitrāvaruṇā dʰārayátkṣitī

Halfverse: b    suṣumnéṣitatvátā yajāmasi /
   suṣumnā́ iṣitatvátā yajāmasi /
   suṣumnā́ iṣitatvátā yajāmasi /

Halfverse: c    yuvóḥ krāṇā́ya sakʰyaír abʰí ṣyāma rakṣásaḥ //
   yuvóḥ krāṇā́ya sakʰyaír
   yuvóḥ krāṇā́ya sakʰyaíḥ
   yuvóḥ krāṇā́ya sakʰiyaír

Halfverse: d    abʰí ṣyāma rakṣásaḥ //
   abʰí syāma rakṣásaḥ //
   abʰí ṣiyāma rakṣásaḥ //


Verse: 3 
Halfverse: a    ádʰā cin nú yád dídʰiṣāmahe vām abʰí priyáṃ rékṇaḥ pátyamānāḥ /
   ádʰā cin nú yád dídʰiṣāmahe vām
   ádʰa+ cit nú yát dídʰiṣāmahe vām
   ádʰā cin nú yád dídʰiṣāmahe vām

Halfverse: b    abʰí priyáṃ rékṇaḥ pátyamānāḥ /
   abʰí priyám rékṇaḥ pátyamānāḥ /
   abʰí priyáṃ rékaṇaḥ pátyamānāḥ /

Halfverse: c    dadvā́m̐ vā yát púṣyati rékṇaḥ sám v āran nákir asya magʰā́ni //
   dadvā́m̐ vā yát púṣyati rékṇaḥ
   dadvā́n vā yát púṣyati rékṇaḥ
   dadvā́m̐ vā yát púṣyati rékṇaḥ

Halfverse: d    sám v āran nákir asya magʰā́ni //
   sám u āran nákiḥ asya magʰā́ni //
   sám ū āran nákir asya magʰā́ni //


Verse: 4 
Halfverse: a    asā́v anyó asura sūyata dyaús tváṃ víśveṣāṃ varuṇāsi rā́jā /
   asā́v anyó asura sūyata dyaús
   asaú anyáḥ asura sūyata dyaúḥ
   asā́v anyó asura sūyata dyaús

Halfverse: b    tváṃ víśveṣāṃ varuṇāsi rā́jā /
   tvám víśveṣām varuṇa asi rā́jā /
   tuváṃ víśveṣāṃ varuṇāsi rā́jā /

Halfverse: c    mūrdʰā́ rátʰasya cākan naítā́vataínasāntakadʰrúk //
   mūrdʰā́ rátʰasya cākan
   mūrdʰā́ rátʰasya cākan
   mūrdʰā́ rátʰasya cākan

Halfverse: d    naítā́vataínasāntakadʰrúk //
   ná etā́vatā énasā antakadʰrúk //
   naítā́vatā énasā antakadʰrúk //


Verse: 5 
Halfverse: a    asmín sv ètác cʰákapūta éno hité mitré nígatān hanti vīrā́n /
   asmín sv ètác cʰákapūta éno
   asmín sú etát śákapūte énaḥ
   asmín sú etác cʰákapūta éno

Halfverse: b    hité mitré nígatān hanti vīrā́n /
   hité mitré nígatān hanti vīrā́n /
   hité mitré nígatān hanti vīrā́n /

Halfverse: c    avór vā yád dʰā́t tanū́ṣv ávaḥ priyā́su yajñíyāsv árvā //
   avór vā yád dʰā́t tanū́ṣv
   avóḥ vā yát dʰā́t tanū́ṣu
   avór vā yád dʰā́t tanū́ṣu

Halfverse: d    ávaḥ priyā́su yajñíyāsv árvā //
   ávaḥ priyā́su yajñíyāsu árvā //
   ávaḥ priyā́su yajñíyāsu árvā //


Verse: 6 
Halfverse: a    yuvór hí mātā́ditir vicetasā dyaúr ná bʰū́miḥ páyasā pupūtáni /
   yuvór hí mātā́ditir vicetasā
   yuvóḥ hí mātā́ áditiḥ vicetasā
   yuvór hí mātā́ áditir vicetasā

Halfverse: b    dyaúr ná bʰū́miḥ páyasā pupūtáni /
   dyaúḥ ná bʰū́miḥ páyasā pupūtáni /
   diyaúr ná bʰū́miḥ páyasā pupūtáni /

Halfverse: c    áva priyā́ didiṣṭana sū́ro ninikta raśmíbʰiḥ //
   áva priyā́ didiṣṭana
   áva priyā́ didiṣṭana
   áva priyā́ didiṣṭana

Halfverse: d    sū́ro ninikta raśmíbʰiḥ //
   sū́raḥ ninikta raśmíbʰiḥ //
   sū́ro ninikta raśmíbʰiḥ //


Verse: 7 
Halfverse: a    yuváṃ hy àpnarā́jāv ásīdataṃ tíṣṭʰad rátʰaṃ ná dʰūrṣádaṃ vanarṣádam /
   yuváṃ hy àpnarā́jāv ásīdataṃ
   yuvám hí apnarā́jau ásīdatam
   yuváṃ hí ? apnarā́jāv ásīdataṃ

Halfverse: b    tíṣṭʰad rátʰaṃ ná dʰūrṣádaṃ vanarṣádam /
   tíṣṭʰat rátʰam ná dʰūrṣádam vanarṣádam /
   tíṣṭʰad rátʰaṃ ná dʰūrṣádaṃ vanarṣádam /

Halfverse: c    tā́ naḥ kaṇūkayántīr nr̥médʰas tatre áṃhasaḥ sumédʰas tatre áṃhasaḥ //
   tā́ naḥ kaṇūkayántīr
   tā́ḥ naḥ kaṇūkayántīḥ
   tā́ naḥ kaṇūkayántīr

Halfverse: d    nr̥médʰas tatre áṃhasaḥ
   nr̥médʰaḥ tatre áṃhasaḥ
   nr̥médʰas tatre áṃhasaḥ

Halfverse: e    sumédʰas tatre áṃhasaḥ //
   sumédʰaḥ tatre áṃhasaḥ //
   sumédʰas tatre áṃhasaḥ //



Next part


This text is part of the TITUS edition of Rg-Veda: Rg-Veda-Samhita.

Copyright TITUS Project, Frankfurt a/M, 28.7.2009. No parts of this document may be republished in any form without prior permission by the copyright holder.