TITUS
Rg-Veda: Rg-Veda-Samhita
Part No. 974
Previous part

Hymn: 137_(963) 
Verse: 1 
Halfverse: a    utá devā ávahitaṃ dévā ún nayatʰā púnaḥ /
   utá devā ávahitaṃ
   utá devāḥ ávahitam
   utá devā ávahitaṃ

Halfverse: b    dévā ún nayatʰā púnaḥ /
   dévāḥ út nayatʰa+ púnar /
   dévā ún nayatʰā púnaḥ /

Halfverse: c    utā́gaś cakrúṣaṃ devā dévā jīváyatʰā púnaḥ //
   utā́gaś cakrúṣaṃ devā
   utá ā́gaḥ cakrúṣam devāḥ
   utā́gaś cakrúṣaṃ devā

Halfverse: d    dévā jīváyatʰā púnaḥ //
   dévāḥ jīváyatʰa+ púnar //
   dévā jīváyatʰā púnaḥ //


Verse: 2 
Halfverse: a    dvā́v imaú vā́tau vāta ā́ síndʰor ā́ parāvátaḥ /
   dvā́v imaú vā́tau vāta
   dvaú imaú vā́tau vātaḥ
   duvā́v imaú vā́tau vāta

Halfverse: b    ā́ síndʰor ā́ parāvátaḥ /
   ā́ síndʰoḥ ā́ parāvátaḥ /
   ā́ síndʰor ā́ parāvátaḥ /

Halfverse: c    dákṣaṃ te anyá ā́ vātu párānyó vātu yád rápaḥ //
   dákṣaṃ te anyá ā́ vātu
   dákṣam te anyáḥ ā́ vātu
   dákṣaṃ te anyá ā́ vātu

Halfverse: d    párānyó vātu yád rápaḥ //
   párā anyáḥ vātu yát rápaḥ //
   párānyó vātu yád rápaḥ //


Verse: 3 
Halfverse: a    ā́ vāta vāhi bʰeṣajáṃ ví vāta vāhi yád rápaḥ /
   ā́ vāta vāhi bʰeṣajáṃ
   ā́ vāta vāhi bʰeṣajám
   ā́ vāta vāhi bʰeṣajáṃ

Halfverse: b    ví vāta vāhi yád rápaḥ /
   ví vāta vāhi yát rápaḥ /
   ví vāta vāhi yád rápaḥ /

Halfverse: c    tváṃ hí viśvábʰeṣajo devā́nāṃ dūtá ī́yase //
   tváṃ hí viśvábʰeṣajo
   tvám hí viśvábʰeṣajaḥ
   tuváṃ hí viśvábʰeṣajo

Halfverse: d    devā́nāṃ dūtá ī́yase //
   devā́nām dūtáḥ ī́yase //
   devā́nāṃ dūtá ī́yase //


Verse: 4 
Halfverse: a    ā́ tvāgamaṃ śáṃtātibʰir átʰo ariṣṭátātibʰiḥ /
   ā́ tvāgamaṃ śáṃtātibʰir
   ā́ tvā agamam śáṃtātibʰiḥ
   ā́ tvāgamaṃ śáṃtātibʰir

Halfverse: b    átʰo ariṣṭátātibʰiḥ /
   átʰa u ariṣṭátātibʰiḥ /
   átʰo ariṣṭátātibʰiḥ /

Halfverse: c    dákṣaṃ te bʰadrám ā́bʰārṣam párā yákṣmaṃ suvāmi te //
   dákṣaṃ te bʰadrám ā́bʰārṣam
   dákṣam te bʰadrám ā́ abʰārṣam
   dákṣaṃ te bʰadrám ā́bʰārṣam

Halfverse: d    párā yákṣmaṃ suvāmi te //
   párā yákṣmam suvāmi te //
   párā yákṣmaṃ suvāmi te //


Verse: 5 
Halfverse: a    trā́yantām ihá devā́s trā́yatām marútāṃ gaṇáḥ /
   trā́yantām ihá devā́s
   trā́yantām ihá devā́ḥ
   trā́yantām ihá devā́s

Halfverse: b    trā́yatām marútāṃ gaṇáḥ /
   trā́yatām marútām gaṇáḥ /
   trā́yatām marútāṃ gaṇáḥ /

Halfverse: c    trā́yantāṃ víśvā bʰūtā́ni yátʰāyám arapā́ ásat //
   trā́yantāṃ víśvā bʰūtā́ni
   trā́yantām víśvā bʰūtā́ni
   trā́yantāṃ víśvā bʰūtā́ni

Halfverse: d    yátʰāyám arapā́ ásat //
   yátʰā ayám arapā́ḥ ásat //
   yátʰāyám arapā́ ásat //


Verse: 6 
Halfverse: a    ā́pa íd vā́ u bʰeṣajī́r ā́po amīvacā́tanīḥ /
   ā́pa íd vā́ u bʰeṣajī́r
   ā́paḥ ít vaí u bʰeṣajī́ḥ
   ā́pa íd vā́ u bʰeṣajī́r

Halfverse: b    ā́po amīvacā́tanīḥ /
   ā́paḥ amīvacā́tanīḥ /
   ā́po amīvacā́tanīḥ /

Halfverse: c    ā́paḥ sárvasya bʰeṣajī́s tā́s te kr̥ṇvantu bʰeṣajám //
   ā́paḥ sárvasya bʰeṣajī́s
   ā́paḥ sárvasya bʰeṣajī́ḥ
   ā́paḥ sárvasya bʰeṣajī́s

Halfverse: d    tā́s te kr̥ṇvantu bʰeṣajám //
   tā́ḥ te kr̥ṇvantu bʰeṣajám //
   tā́s te kr̥ṇvantu bʰeṣajám //


Verse: 7 
Halfverse: a    hástābʰyāṃ dáśaśākʰābʰyāṃ jihvā́ vācáḥ purogavī́ /
   hástābʰyāṃ dáśaśākʰābʰyāṃ
   hástābʰyām dáśaśākʰābʰyām
   hástābʰyāṃ dáśaśākʰābʰyāṃ

Halfverse: b    jihvā́ vācáḥ purogavī́ /
   jihvā́ vācáḥ purogavī́ /
   jihvā́ vācáḥ purogavī́ /

Halfverse: c    anāmayitnúbʰyāṃ tvā tā́bʰyāṃ tvópa spr̥śāmasi //
   anāmayitnúbʰyāṃ tvā
   anāmayitnúbʰyām tvā
   anāmayitnúbʰyāṃ tuvā

Halfverse: d    tā́bʰyāṃ tvópa spr̥śāmasi //
   tā́bʰyām tvā úpa spr̥śāmasi //
   tā́bʰyāṃ tvópa spr̥śāmasi //



Next part


This text is part of the TITUS edition of Rg-Veda: Rg-Veda-Samhita.

Copyright TITUS Project, Frankfurt a/M, 28.7.2009. No parts of this document may be republished in any form without prior permission by the copyright holder.