TITUS
Rg-Veda: Rg-Veda-Samhita
Part No. 975
Previous part

Hymn: 138_(964) 
Verse: 1 
Halfverse: a    táva tyá indra sakʰyéṣu váhnaya r̥tám manvānā́ vy àdardirur valám /
   táva tyá indra sakʰyéṣu váhnaya
   táva tyé indra sakʰyéṣu váhnayaḥ
   táva tyá indra sakʰiyéṣu váhnaya

Halfverse: b    r̥tám manvānā́ vy àdardirur valám /
   r̥tám manvānā́ḥ ví adardiruḥ valám /
   r̥tám manvānā́ ví adardirur valám /

Halfverse: c    yátrā daśasyánn uṣáso riṇánn apáḥ kútsāya mánmann ahyàś ca daṃsáyaḥ //
   yátrā daśasyánn uṣáso riṇánn apáḥ
   yátra+ daśasyán uṣásaḥ riṇán apáḥ
   yátrā daśasyánn uṣáso riṇánn apáḥ

Halfverse: d    kútsāya mánmann ahyàś ca daṃsáyaḥ //
   kútsāya mánman ahyàḥ ca daṃsáyaḥ //
   kútsāya mánmann ahíyaś ca daṃsáyaḥ //


Verse: 2 
Halfverse: a    ávāsr̥jaḥ prasvàḥ śvañcáyo girī́n úd āja usrā́ ápibo mádʰu priyám /
   ávāsr̥jaḥ prasvàḥ śvañcáyo girī́n
   áva asr̥jaḥ prasvàḥ śvañcáyaḥ girī́n
   ávāsr̥jaḥ prasúvaḥ śvañcáyo girī́n

Halfverse: b    úd āja usrā́ ápibo mádʰu priyám /
   út ājaḥ usrā́ḥ ápibaḥ mádʰu priyám /
   úd āja usrā́ ápibo mádʰu priyám /

Halfverse: c    ávardʰayo vaníno asya dáṃsasā śuśóca sū́rya r̥tájātayā girā́ //
   ávardʰayo vaníno asya dáṃsasā
   ávardʰayaḥ vanínaḥ asya dáṃsasā
   ávardʰayo vaníno asya dáṃsasā

Halfverse: d    śuśóca sū́rya r̥tájātayā girā́ //
   śuśóca sū́ryaḥ r̥tájātayā girā́ //
   śuśóca sū́rya r̥tájātayā girā́ //


Verse: 3 
Halfverse: a    ví sū́ryo mádʰye amucad rátʰaṃ divó vidád dāsā́ya pratimā́nam ā́ryaḥ /
   ví sū́ryo mádʰye amucad rátʰaṃ divó
   ví sū́ryaḥ mádʰye amucat rátʰam diváḥ
   ví sū́ryo mádʰye amucad rátʰaṃ divó

Halfverse: b    vidád dāsā́ya pratimā́nam ā́ryaḥ /
   vidát dāsā́ya pratimā́nam ā́ryaḥ /
   vidád dāsā́ya pratimā́nam ā́riyaḥ /

Halfverse: c    dr̥ḷʰā́ni pípror ásurasya māyína índro vy ā̀syac cakr̥vā́m̐ r̥jíśvanā //
   dr̥ḷʰā́ni pípror ásurasya māyína
   dr̥ḷʰā́ni píproḥ ásurasya māyínaḥ
   dr̥ḷʰā́ni pípror ásurasya māyína

Halfverse: d    índro vy ā̀syac cakr̥vā́m̐ r̥jíśvanā //
   índraḥ ví āsyat cakr̥vā́n r̥jíśvanā //
   índro ví āsyac cakr̥vā́m̐ r̥jíśvanā //


Verse: 4 
Halfverse: a    ánādʰr̥ṣṭāni dʰr̥ṣitó vy ā̀syan nidʰī́m̐r ádevām̐ amr̥ṇad ayā́syaḥ /
   ánādʰr̥ṣṭāni dʰr̥ṣitó vy ā̀syan
   ánādʰr̥ṣṭāni dʰr̥ṣitáḥ ví āsyat
   ánādʰr̥ṣṭāni dʰr̥ṣitó ví āsiyan

Halfverse: b    nidʰī́m̐r ádevām̐ amr̥ṇad ayā́syaḥ /
   nidʰī́n ádevān amr̥ṇat ayā́syaḥ /
   nidʰī́m̐r ádevām̐ amr̥ṇad ayā́siyaḥ /

Halfverse: c    māséva sū́ryo vásu púryam ā́ dade gr̥ṇānáḥ śátrūm̐r aśr̥ṇād virúkmatā //
   māséva sū́ryo vásu púryam ā́ dade
   māsā́ iva sū́ryaḥ vásu púryam ā́ dade
   māséva sū́ryo vásu púryam ā́ dade

Halfverse: d    gr̥ṇānáḥ śátrūm̐r aśr̥ṇād virúkmatā //
   gr̥ṇānáḥ śátrūn aśr̥ṇāt virúkmatā //
   gr̥ṇānáḥ śátrūm̐r aśr̥ṇād virúkmatā //


Verse: 5 
Halfverse: a    áyuddʰaseno vibʰvā̀ vibʰindatā́ dā́śad vr̥trahā́ tújyāni tejate /
   áyuddʰaseno vibʰvā̀ vibʰindatā́
   áyuddʰasenaḥ vibʰvā̀ vibʰindatā́
   áyuddʰaseno vibʰúvā vibʰindatā́

Halfverse: b    dā́śad vr̥trahā́ tújyāni tejate /
   dā́śat vr̥trahā́ tújyāni tejate /
   dā́śad vr̥trahā́ tújiyāni tejate /

Halfverse: c    índrasya vájrād abibʰed abʰiśnátʰaḥ prā́krāmac cʰundʰyū́r ájahād uṣā́ ánaḥ //
   índrasya vájrād abibʰed abʰiśnátʰaḥ
   índrasya vájrāt abibʰet abʰiśnátʰaḥ
   índrasya vájrād abibʰed abʰiśnátʰaḥ

Halfverse: d    prā́krāmac cʰundʰyū́r ájahād uṣā́ ánaḥ //
   prá akrāmat śundʰyúḥ ájahāt uṣā́ḥ ánaḥ //
   prā́krāmac cʰundʰyū́r ájahād uṣā́ ánaḥ //


Verse: 6 
Halfverse: a    etā́ tyā́ te śrútyāni kévalā yád éka ékam ákr̥ṇor ayajñám /
   etā́ tyā́ te śrútyāni kévalā
   etā́ tyā́ te śrútyāni kévalā
   etā́ tiyā́ te śrútiyāni kévalā

Halfverse: b    yád éka ékam ákr̥ṇor ayajñám /
   yát ékaḥ ékam ákr̥ṇoḥ ayajñám /
   yád éka ékam ákr̥ṇor ayajñám /

Halfverse: c    māsā́ṃ vidʰā́nam adadʰā ádʰi dyávi tváyā víbʰinnam bʰarati pradʰím pitā́ //
   māsā́ṃ vidʰā́nam adadʰā ádʰi dyávi
   māsā́m vidʰā́nam adadʰāḥ ádʰi dyávi
   māsā́ṃ vidʰā́nam adadʰā ádʰi dyávi

Halfverse: d    tváyā víbʰinnam bʰarati pradʰím pitā́ //
   tváyā víbʰinnam bʰarati pradʰím pitā́ //
   tváyā víbʰinnam bʰarati pradʰím pitā́ //



Next part


This text is part of the TITUS edition of Rg-Veda: Rg-Veda-Samhita.

Copyright TITUS Project, Frankfurt a/M, 28.7.2009. No parts of this document may be republished in any form without prior permission by the copyright holder.