TITUS
Black Yajur-Veda: Kathaka-Samhita
Part No. 23
Previous part

Sthanaka: 23  
Anuvaka: 1  
Page: 73  
Line : 1  Pada: a     havír vaí dīkṣitás \

Pada: b     ná havír ánabʰigʰr̥taṃ médʰam aśnute

Pada: c     yád abʰyanákti \

Pada: d     abʰy èvaínaṃ gʰārayati

Line : 2  Pada: e     medʰyatvā́ya


Pada: f     gʰr̥táṃ devā́nāṃ níṣpakvaṃ manuṣyā̀ṇām ā́yutaṃ gandʰarvā́ṇām̐ svayaṃvilīnám ādityásya

Line : 3  Pada: g     naítád devatrā́ ná manuṣyatrā́ yán návanītam \

Pada: h     naíṣá devatrā́ ná manuṣyatrā́ yó dīkṣitáḥ

Line : 4  Pada: i     prácyuto 'smā́l lokā́d áprāpto 'múm \

Pada: j     yán návanītenābʰyaṅkté

Line : 5  Pada: k     sámr̥ddʰyai


Pada: l     vā́saḥ páridʰatte \

Pada: m     agnés tū́ṣaḥ pitr̥̄ṇā́ṃ nīvír óṣadʰīnāṃ pragʰātó vāyór vātapā́ víśveṣāṃ devā́nām ótavaś ca tántavaś ca nákṣatrāṇām atīrokā́s

Line : 7  Pada: n     sarvadevatyàṃ vā́sas sarvadevatyò dīkṣitás

Pada: o     sárvābʰir evaínaṃ devátābʰis sámardʰayati \


Line : 8  Pada: p     ā́ṅkte \

Pada: q     índraṃ vaí vr̥tráṃ jagʰnivā́m̐saṃ rákṣām̐sy asacanta

Pada: r     tā́ny añjanagiríṇāntáradʰatta

Line : 9  Pada: s     rákṣām̐sy etám̐ sacante yó dī́kṣate

Pada: t     bʰávati hí

Pada: u     yád āṅkté

Line : 10  Pada: v     rákṣasām antárhityai \


Pada: w     índro vaí vr̥trám ahan \

Pada: x     tásya cákṣuḥ párāpatat

Pada: y     tát trikakúbʰaṃ prā́viśat \

Line : 11  Pada: z     yád āṅkté

Pada: aa     tásyaivá cákṣuṣó 'varuddʰyai


Pada: ab     dvír dákṣiṇam āṅkté sakŕ̥t savyám \

Line : 12  Pada: ac     trivŕ̥d yajñás \

Pada: ad     mukʰatá evá yajñám ā́labʰate


Pada: ae     trír dákṣiṇam āṅkté dvís savyám \

Pada: af     pā́ṅkto yajñás \

Line : 13  Pada: ag     yajñám evā́varunddʰe


Pada: ah     dákṣiṇaṃ pū́rvam ā́ṅkte

Pada: ai     savyám̐ hí pū́rvaṃ manuṣyā̀ āñjáte

Line : 14  Pada: aj     vyā́vr̥ttyai


Pada: ak     yájuṣā́ṅkte \

Pada: al     ayajúṣā hí manuṣyā̀ āñjáte

Pada: am     vyā́vr̥ttyai


Pada: an     parācī́nam ā́nakti

Line : 15  Pada: ao     ná nídʰāvati \

Pada: ap     ācaparācám̐ hí manuṣyā̀ āñjáte

Pada: aq     vyā́vr̥ttyai \


Pada: ar     iṣī́kayā́ṅkte

Line : 16  Pada: as     śalalyā́ hí manuṣyā̀ āñjáte

Pada: at     vyā́vr̥ttyai //


Pada: au     sátūlā bʰavati

Pada: av     maitrī́ vaí sátūlā vāruṇī́ páriśīrṇā maitró dīkṣitás

Line : 17  Pada: aw     sámr̥ddʰyai \


Pada: ax     ūnám iva vā́ etác cʰidrám iva yác cákṣur

Line : 18  Pada: ay     yád āṅkté

Pada: az     tád evā́pūrayati \

Pada: ba     áccʰidratvāya


Pada: bb     pāvayati \

Pada: bc     índro vaí vr̥trám ahan \

Line : 19  Pada: bd     tám apsv èvā́dʰyahan \

Pada: be     tā́sāṃ yā́ yajñíyā médʰyā ā́san \

Pada: bf     tā́ údakrāman \

Line : 20  Pada: bg     tā́ óṣadʰayo 'bʰavan

Pada: bh     yát téjas té darbʰā́s

Pada: bi     tásmāt té pavítram \

Pada: bj     tásmād darbʰaír apáḥ punanti

Line : 21  Pada: bk     yád darbʰapiñjūlaíḥ pāváyati \

Pada: bl     apā́m evaínam óṣadʰīnāṃ téjasā pāvayati


Pada: bm     dvā́bʰyāṃ pāvayati

Page: 74  
Line : 1  Pada: bn     dvé satyáṃ cā́nr̥taṃ ca

Pada: bo     satyénaivā́syā́nr̥taṃ pāvayati

Pada: bp     dvaú prāṇáś cāpānáś ca


Line : 2  Pada: bq     tribʰíḥ pāvayati

Pada: br     tríṣatyā hí devā́s \

Pada: bs     átʰo tráyo hí prāṇā́ḥ prāṇó vyānò 'pānás

Line : 3  Pada: bt     tā́n evá yájamāne dadʰāti


Pada: bu     pañcábʰiḥ pāvayati

Line : 4  Pada: bv     pā́ṅktaḥ púruṣas \

Pada: bw     yā́vān evā́syātmā́ táṃ pāvayati


Pada: bx     saptábʰiḥ pāvayati

Pada: by     saptá vaí cʰándām̐si

Line : 5  Pada: bz     ccʰándobʰir evaínaṃ pāvayati


Pada: ca     navábʰiḥ pāvayati

Pada: cb     náva prāṇā́ḥ

Line : 6  Pada: cc     prāṇaír evaínaṃ pāvayati \


Pada: cd     ékavim̐śatyā pāvayati \

Pada: ce     ekavim̐śó vaí púruṣo dáśa hástyā aṅgúlayo dáśa pádyā ātmaíkavim̐śás \

Line : 7  Pada: cf     yā́vān evā́syātmā́ táṃ pāvayati


Line : 8  Pada: cg     citpatís tvā punātv íti

Pada: ch     bráhma vaí citpatís \

Pada: ci     bráhmaṇaivaínaṃ pāvayati


Pada: cj     vākpatís tvā punātv íti

Line : 9  Pada: ck     sá hí pāvayitā́


Pada: cl     devás tvā savitā́ punātv íti

Pada: cm     savitŕ̥prasūta evaínaṃ devátābʰiḥ pāvayati \


Line : 10  Pada: cn     áccʰidreṇa pavítreṇéti \

Pada: co     áccʰambaṭkāram evaínaṃ pāvayati


Line : 11  Pada: cp     sū́ryasya raśmíbʰir íti \

Pada: cq     ādityásyaivaínaṃ tanvā̀ pāvayati


Line : 12  Pada: cr     tásya te pavitraprate pavítreṇéti

Pada: cs     yajñó vaí pavítrapatis \

Pada: ct     yajñā́yaivaítát punīte


Line : 13  Pada: cu     yásmai káṃ puné tác cʰakeyam íti

Pada: cv     yajñám̐ śakeyam íty evaítád āha \


Pada: cw     anváñcaṃ pāvayati \

Line : 14  Pada: cx     anváṅ vaí púruṣaṃ prāṇás \

Pada: cy     yadā́ vaí prāṇás tiryáṅ bʰávaty átʰa prámīyate

Pada: cz     yát tiryáñcaṃ pāváyet tiryáñcam asya prāṇáṃ kuryāt prámīyeta \

Line : 15  Pada: da     anvātmám evā́sya prāṇáṃ karoti


Line : 16  Pada: db     bahíṣ pāvayati

Pada: dc     manuṣyaloká evaínaṃ pāvayitvā́ pūtáṃ devalokáṃ práṇayati //


Anuvaka: 2  
Line : 18  Pada: a     gárbʰo dīkṣitó yónir dīkṣitavimitám úlbaṃ dīkṣitavásanaṃ jarā́yu kr̥ṣṇājinám

Line : 19  Pada: b     etásmād vaí yóner índro 'jāyata

Pada: c     kulā́yam evaítád āsī́vanaṃ kr̥tvópacarati

Line : 20  Pada: d     tásmād dīkṣitáṃ nā́nyátra dīkṣitavimitā́t sū́ryo 'bʰinimrócen nā́nyátrābʰyúdiyāt

Line : 21  Pada: e     svā́d evá yóneḥ prájāyate \


Pada: f     ā́kūtyai prayúje agnáye svā́héti \

Line : 22  Pada: g     ākū́ya vaí yajñáḥ práyujyate

Pada: h     yátraivá yajñám ākuváte tád enam ā́labʰate


Pada: i     medʰā́yai mánase agnáye svā́héti

Page: 75  
Line : 1  Pada: j     medʰáyā vaí mánasābʰígaccʰati yájatām̐ syá íti

Line : 2  Pada: k     yajñám evā́labʰate


Pada: l     dīkṣā́yai tápase agnáye svā́héti

Pada: m     dīkṣáyā vaí tápasā yajñáṃ prā́pnoti

Line : 3  Pada: n     yajñám evā́varunddʰe


Pada: o     sárasvatyai pūṣṇé agnáye svā́héti

Pada: p     vā́g vaí sárasvatī paśávaḥ pūṣā́

Line : 4  Pada: q     vācā́ paśúbʰyo yajñá ā́labʰyate

Pada: r     vācaívá paśúbʰyó 'dʰi yajñám ā́labʰate \


Line : 5  Pada: s     ā́po devīr br̥hatīr viśvaśaṃbʰuva íti \

Pada: t     ā́po vaí yajñás \

Pada: u     diví yajñò 'ntárikṣe pr̥tʰivyā́m \

Line : 6  Pada: v     bráhma bŕ̥haspátir

Pada: w     átrātra vaí yajñás \

Pada: x     yátrayatraivá yajñás táta enaṃ bráhmaṇā́labʰate


Line : 7  Pada: y     páñcaitā́ni juhoti

Pada: z     pā́ṅkto yajñás \

Pada: aa     yajñám evā́varunddʰe


Line : 8  Pada: ab     yajñásya vā́ eté saṃbʰārā́ yád etā́ni yájūm̐ṣi

Pada: ac     yád etā́ni ná juhuyā́d ásaṃbʰr̥to 'sya yajñás syāt \

Line : 9  Pada: ad     yád etā́ni juhóti

Pada: ae     yā́vān evá yajñás tám̐ sáṃbʰarati \


Pada: af     ádīkṣito vā́ ékayā́hutyā \

Line : 10  Pada: ag     adánti ha sma vā́ etásya purā́nnaṃ yásyaitā́ni ná hūyánte

Line : 11  Pada: ah     yád etā́ni juhóti

Pada: ai     dīkṣitatvā́yaivá dvitīyatvā́ya \


Pada: aj     agnáye svā́hāgnáye svā́héti juhoti \

Line : 12  Pada: ak     agnís sárvā devátās

Pada: al     sárvā evá devátā ávarunddʰe


Pada: am     páñcaitā́ni juhoti \

Line : 13  Pada: an     audgrabʰaṇám̐ ṣaṣṭʰám \

Pada: ao     ṣáḍ r̥távas \

Pada: ap     r̥túṣv evá prátitiṣṭʰati //


Pada: aq     yajñás sr̥ṣṭáḥ prá yájur ávlināt prá sā́ma

Line : 14  Pada: ar     tám ŕ̥g evā́yaccʰan náva sā́māni dvā́daśa yájūm̐ṣi

Pada: as     tásmān navábʰir bahiṣpavamānám̐ stuvánti \

Line : 15  Pada: at     r̥caúdgrabʰaṇáṃ juhvati


Pada: au     yád r̥caúdgrabʰaṇáṃ juhóti

Pada: av     yajñám evá sr̥ṣṭáṃ práty úd r̥cā́ yaccʰati


Line : 16  Pada: aw     dvādaśabʰir ha sma vaí kārudveṣíṇa audgrabʰaṇáṃ juhvati \

Line : 17  Pada: ax     etád evá sá dvādaśagr̥hītáṃ kr̥tvā́ juhuyāt

Pada: ay     ténaivá tád āpnoti


Line : 18  Pada: az     pūrṇáyā srucā́ juhoti

Pada: ba     pūrṇáḥ prajā́patiḥ

Pada: bb     prajā́patim evā́pnoti

Pada: bc     yád ūnáyā juhuyā́d bʰrā́tr̥vyāya lokáṃ kuryāt

Line : 19  Pada: bd     kā́martaṃ vaí pūrṇám \

Pada: be     yám̐ hí kā́maṃ kāmáyate táṃ pūrṇásya kurute

Page: 76  
Line : 1  Pada: bf     yám evá kā́maṃ kāmáyate tám ávarunddʰe //


Pada: bg     své cʰándasi yajñáḥ pratiṣṭʰā́pyas \

Line : 2  Pada: bh     anuṣṭúb vaí prajā́pates sváṃ cʰándas \

Pada: bi     yajñáḥ prajā́patis \

Pada: bj     yád anuṣṭúbʰaudgrabʰaṇáṃ juhóti

Line : 3  Pada: bk     svá evá ccʰándasi yajñáṃ prátiṣṭʰāpayati


Pada: bl     ccʰándaḥpratiṣṭʰāno vaí yajñás

Line : 4  Pada: bm     sá yatʰācʰandasáṃ cʰándassu pratiṣṭʰā́pyas

Pada: bn     saíṣā́nuṣṭúp

Pada: bo     tásyās saptā́kṣaram ékaṃ padám aṣṭā́kṣarāṇi trī́ṇi

Line : 5  Pada: bp     téṣām̐ saptānā́ṃ yā́ni trī́ṇi tā́ny aṣṭā́ úpayanti

Line : 6  Pada: bq     tā́ny ékādaśa

Pada: br     sā́ triṣṭúb

Pada: bs     yā́ni catvā́ri tā́ny aṣṭā́ úpayanti

Pada: bt     tā́ni dvā́daśa

Line : 7  Pada: bu     sā́ jágatī

Pada: bv     yā́ny aṣṭaú sā́ gāyatrī \

Pada: bw     ávibʰaktānuṣṭúp

Pada: bx     svāhākāréṇa paṅktís \

Pada: by     etā́vanti vaí cʰándām̐si

Line : 8  Pada: bz     yajñám evá yatʰācʰandasáṃ cʰándassu prátiṣṭʰāpayati //


Pada: ca     yajñás sr̥ṣṭó devátābʰir ālábʰyas \

Line : 9  Pada: cb     víśvo devásya netúr íti

Pada: cc     yán netr̥mátī téna sāvitrī́

Line : 10  Pada: cd     márta íti

Pada: ce     pitr̥devatyā̀

Pada: cf     víśva íti

Pada: cg     vaiśvadevī́

Pada: ch     dyumnám íti

Pada: ci     bārhaspatyā́

Line : 11  Pada: cj     puṣyatv íti

Pada: ck     pauṣṇī́

Pada: cl     sārasvatás svāhākārás \

Pada: cm     etā́vatīr vaí devátās \

Line : 12  Pada: cn     yajñám evá sr̥ṣṭáṃ devátābʰir ā́labʰate


Pada: co     yajñás sr̥ṣṭás tredʰā́ prā́viśad ŕ̥caṃ tŕ̥tīyena sā́ma tŕ̥tīyena yájus tŕ̥tīyena

Line : 13  Pada: cp     tásya yā́ priyā́ tanū́r ā́sīt táyā yájuḥ prā́viśat

Line : 14  Pada: cq     tásmād yájuṣo nóccaíḥ kīrtayitavyàm \

Pada: cr     yajñásya priyā́ṃ tanvàm údūrṇoti \

Pada: cs     ábrahmavarcasī bʰavati nagnaṃbʰā́vukaḥ //


Anuvaka: 3  
Line : 16  Pada: a     yajñó vaí devébʰyó 'pākrāmat kŕ̥ṣṇo bʰūtvā́

Pada: b     tásmāt púnar upāvártamānād r̥ksāmé ápākrāmatām \

Line : 17  Pada: c     té kŕ̥ṣṇaṃ prā́viśatāṃ yajñáṃ mányāmāne

Pada: d     śuklám̐ sā́ma kr̥ṣṇám ŕ̥g

Line : 18  Pada: e     yát kr̥ṣṇājinéna dī́kṣate \

Pada: f     r̥ksāmé evā́labʰate \


Pada: g     ahorātré vaí mitʰunám̐ sámabʰavatām \

Line : 19  Pada: h     táyor ójo vīryàm ápākrāmat

Pada: i     tát kŕ̥ṣṇaṃ prā́viśat \

Pada: j     yát kr̥ṣṇājinéna dī́kṣate \

Line : 20  Pada: k     ahorātráyor evaújo vīryàm ā́labʰate


Pada: l     dyā́vāpr̥tʰivī́ vaí mitʰunám̐ sámabʰavatām \

Line : 21  Pada: m     táyos téjo yajñíyam ápākrāmat

Pada: n     tát kŕ̥ṣṇaṃ prā́viśat \

Pada: o     yát kr̥ṣṇājinéna dī́kṣate

Page: 77  
Line : 1  Pada: p     dyā́vāpr̥tʰivyór evá téjo yajñíyam ā́labʰate \


Pada: q     r̥ksāmáyoś śílpe stʰa íti \

Line : 2  Pada: r     r̥ksāmé evā́labʰate

Pada: s     yátʰā nā́vau tariṣyám̐s té enam̐ sáṃpārayatas \


Line : 3  Pada: t     ódŕ̥caś śármāsi śárma me yaccʰéti

Pada: u     devátāś ca vā́ eṣá yajñáṃ cābʰyā́rohati

Line : 4  Pada: v     yát kr̥ṣṇājinám āróhati

Pada: w     yadā́ vaí śréyān * kāmáyaté 'tʰa pā́pīyām̐saṃ prátinudate
      FN emended. Ed.: śreyān

Line : 5  Pada: x     devátābʰyaś caivá yajñā́ya ca námaskaroti \

Pada: y     ápratinodāya \


Pada: z     āśumávanti vā́ anyā́ni ccʰándām̐sy ā́sann ánāśum avanty anyā́ni

Line : 6  Pada: aa     tā́ny ājím ayur

Line : 7  Pada: ab     yā́ny āśumávanty ā́sam̐s tā́ni prádʰakṣyāmaha íti bʰīṣā́ kŕ̥ṣṇaṃ prā́viśan \

Line : 8  Pada: ac     tā́nīmā́ni yajñáṃ vahanti

Pada: ad     yā́ny ánāśumavanty ā́sam̐s tā́n imā́n vakṣyāmaha íti bʰīṣā́ kŕ̥ṣṇaṃ prā́viśan \

Line : 9  Pada: ae     tā́nīmā́ni ccʰándām̐si

Pada: af     yā́ny áyajñavāhāni tā́ni svā́rājyam agaccʰan

Line : 10  Pada: ag     svā́rājyaṃ gaccʰati yá eváṃ véda

Pada: ah     yát kr̥ṣṇājinéna dī́kṣate \

Line : 11  Pada: ai     āśumávanti caivā́nāśumavanti cobʰáyāni ccʰándām̐sy ávarunddʰe //


Line : 12  Pada: aj     hótrā vaí devébʰyó 'pākrāman \

Pada: ak     tád vaṣaṭkāró 'pyacarat kŕ̥ṣṇo bʰūtvā́ \

Pada: al     áskannaṃ vaí vaṣaṭkārā́d dʰavís

Line : 13  Pada: am     tásmāt kr̥ṣṇājiné havíṣ pim̐ṣanti


Pada: an     havír vaí dīkṣitás

Pada: ao     tásmāt kr̥ṣṇājinám ádʰyāste

Line : 14  Pada: ap     tásmān ná níṣṭʰīvati

Pada: aq     havíṣó 'skandāya


Pada: ar     bahíṣṭād vaí paśūnā́ṃ yajñás ca devátāś cāntarā́n médas \

Line : 15  Pada: as     yád bahírlomaṃ kr̥ṣṇājináṃ kuryā́d antárhito yájamāno yajñā́c ca devátābʰyaś ca syāt \

Line : 16  Pada: at     yád antárlomam antárhito yajñó devátābʰyas \

Line : 17  Pada: au     dvé sámasyed antármām̐se bahírlomnī

Pada: av     yády ékam̐ syā́t pā́daṃ prátiṣīvyet \

Line : 18  Pada: aw     ánantarhito yájamāno yajñā́c ca devátābʰyaś ca bʰávaty ánantarhito yajñó devátābʰyas \


Line : 19  Pada: ax     víṣṇoś śármāsi śárma yájamānasyéti

Pada: ay     víṣṇur vaí yajñó vaiṣṇavó yájamānas \

Line : 20  Pada: az     víṣṇunaivá yajñénātmā́nam ubʰayátas sayújaṃ kurute


Pada: ba     yajñó yád ásr̥jyata tásyólbam ánvaveṣṭata

Line : 21  Pada: bb     tád dīkṣitavásanam abʰavat \

Pada: bc     gárbʰo dīkṣitás \

Pada: bd     yád dīkṣitavásanaṃ paridʰatté

Page: 78  
Line : 1  Pada: be     svénaivá yóninātmā́nam órṇute *
      FN Oertel, Zur Kapiṣṭʰala-Kaṭʰa-Saṃhitā, p.27f., declines Caland's emendation: prórṇute. Mittwede, Textkritische Bemerkungen, p. 112


Pada: bf     tásmān mahát kāryàm

Line : 2  Pada: bg     evám iva hy úlbena gárbʰa ā́vr̥ta iva ccʰanná iva


Pada: bh     ná pratyákṣaṃ vadet \

Pada: bi     vācó 'yātayāmatvāya //


Anuvaka: 4  
Line : 4  Pada: a     áṅgiraso vaí svargáṃ lokáṃ yántas té mékʰalās saṃnyàkiran \

Pada: b     tátaś śará údatiṣṭʰat \

Line : 5  Pada: c     yác cʰaramáyī mékʰalā bʰávati

Pada: d     tā́m evá mékʰalām ā́labʰate


Pada: e     devā́ vaí yátrórjaṃ vyábʰajanta tátaś śará údatiṣṭʰat \

Line : 6  Pada: f     yác cʰaramáyī mékʰalā bʰávati

Pada: g     tā́m evórjam ā́labʰate \


Line : 7  Pada: h     ū́rg vaí mékʰalā

Pada: i     mádʰyaṃ práti párivyayati \

Pada: j     ū́rjam evá madʰyató dadʰāti yájamāne ca prajā́su ca

Line : 8  Pada: k     tásmān madʰyatáḥ prajā́ ū́rg ūrjayati


Pada: l     nā́bʰiṃ práti párivyayati \

Line : 9  Pada: m     ūrdʰváṃ vaí púruṣasya nā́bʰyā médʰyam avācī́nam amedʰyám \

Pada: n     médʰyasya cāmedʰyásya ca vyā́vr̥ttyai


Line : 10  Pada: o     trivŕ̥d bʰavati

Pada: p     trivŕ̥tā vaí stómena prajā́patiḥ prajā́ asr̥jata

Line : 11  Pada: q     tr̥vŕ̥d vájras \

Pada: r     vájram evá bʰrā́tr̥vyāya práharati \


Pada: s     índro vaí vr̥trā́ya vájraṃ prā́harat

Line : 12  Pada: t     tásya yát prā́śīryata sá śarò 'bʰavat

Pada: u     tác cʰarásya śaratvám \

Pada: v     vájro vaí śarás \

Line : 13  Pada: w     yác cʰaramáyī mékʰalā bʰávati

Pada: x     vájram evá bʰrā́tr̥vyāya práharati

Pada: y     str̥ṇutá enam \


Line : 14  Pada: z     yáṃ dviṣyā́t táṃ parivyáyan dʰyāyet \

Pada: aa     vájreṇaivaínam̐ sámarpayati


Pada: ab     mékʰalā pum̐só bʰávati yóktram̐ striyā́s

Line : 15  Pada: ac     strī́ vaí mékʰalā

Pada: ad     pumā́n yóktraṃ

Pada: ae     mitʰunám evá yajñamukʰé vipáryūhete *
      FN Mittwede, Textkritische Bemerkungen, p. 112: vipáryūhate

Line : 16  Pada: af     prajánanāya


Pada: ag     vájro vaí mékʰalā

Pada: ah     kṣúd udáraṃ * pāpmā́ bʰrā́tr̥vyas \
      FN emended. Ed.: udā́raṃ. Raghuvira, KpS, xxvi. Mittwede, Textkritische Bemerkungen, p. 113

Pada: ai     yán mékʰalāṃ parivyáyate

Line : 17  Pada: aj     vájreṇaivá pāpmā́naṃ bʰrā́tr̥vyam ápahate //


Pada: ak     yajñó vaí devéṣv ā́sīd dákṣiṇā pitŕ̥ṣu

Line : 18  Pada: al     sá yajñó dákṣiṇām abʰyàkāmayata

Pada: am     táṃ pitáro 'bruvan

Line : 19  Pada: an     devéṣu no bʰāgadʰéyam iccʰéti

Pada: ao     tè 'bruvan \

Pada: ap     tr̥tīyasavanábʰāgā asann * íti
      FN emended. Ed.: āsann. Raghuvira, KpS, xxvi. Mittwede, Textkritische Bemerkungen, p. 113

Line : 20  Pada: aq     tásmāt pitŕ̥bʰyas tr̥tīyasavanáṃ * kriyate
      FN Mittwede, Textkritische Bemerkungen, p. 113: tr̥tīyasavané


Pada: ar     tám ahvayat tā́ṃ hūtò 'dʰāvat

Pada: as     tásmāt púmān striyā́ hūtó dʰāvati

Line : 21  Pada: at     tásmāc cʰrótriyas strī́kāmatamas

Pada: au     sá hí yajñásya nediṣṭʰī́ tā́m̐ sámabʰavat

Line : 22  Pada: av     tád índro 'cāyat

Pada: aw     sò 'manyata

Pada: ax     yó vā́ itó janiṣyáte sá evédáṃ bʰaviṣyatī́ti

Page: 79  
Line : 1  Pada: ay     táṃ yóniṃ prā́viśat

Pada: az     tásmād ajāyata

Pada: ba     sá púnaḥ pratyávaikṣata

Line : 2  Pada: bb     sò 'manyata

Pada: bc     yó vā́ itó 'paro janiṣyáte sá me sapátno bʰaviṣyatī́ti

Line : 3  Pada: bd     tám anuhā́ya nivéṣṭyā́ccʰinat

Pada: be     sā́ viṣā́ṇābʰavat \

Pada: bf     yád viṣā́ṇā bʰávati

Line : 4  Pada: bg     yajñásyaivá réta índrasya yóniṃ dákṣiṇāyā yónim ā́labʰate


Pada: bh     páñcāvr̥d bʰavati

Line : 5  Pada: bi     pañcábʰir hí sá tā́ṃ nivéṣṭyā́ccʰinat \


Pada: bj     índrasya yónir asī́ti \

Pada: bk     índrasya hy èṣā́ yóniḥ


Line : 6  Pada: bl     kr̥ṣyaí tvā susasyā́yā * íti
      FN emended. Ed.: sumanasyā́yā. Raghuvira, KpS, xxvi. Oertel, Zur Kapiṣṭʰala-Kaṭʰa-Saṃhitā, p. 89. Mittwede, Textkritische Bemerkungen, p. 113

Pada: bm     tásmāt kr̥ṣṭáṃ pacyate \


Pada: bn     útkr̥dʰī́ti

Line : 7  Pada: bo     tásmād ūrdʰvā́ óṣadʰaya útpadyante *
      FN emended. Ed.: útpacyante. Oertel, Zur Kapiṣṭʰala-Kaṭʰa-Saṃhitā, p. 22f. Mittwede, Textkritische Bemerkungen, p. 113


Pada: bp     yájuṣā kaṇḍūyate \

Pada: bq     ayajúṣā hí manuṣyā̀ḥ kaṇḍūyánte

Line : 8  Pada: br     vyā́vr̥ttyai


Pada: bs     yád ayajúṣā kaṇḍūyéta varuṇavát kaṇḍūyetā́pi gárbʰāḥ pāmanā́ jāyeran

Line : 9  Pada: bt     vā́g vaí devā́n manuṣyā̀n praviśánty ait

Pada: bu     tásyā yád atyáricyata tád vánaspátīn prā́viśat

Line : 10  Pada: bv     saíṣā́ vánaspátiṣu vā́g vadati yā́ dundubʰaú yā́ nāḍyā́ṃ yā́ tū́ṇave

Line : 11  Pada: bw     yád daṇḍó bʰávati

Pada: bx     vācá evā́tiriktam ávarunddʰe


Pada: by     táṃ maitrāvaruṇā́ya práyaccʰati

Line : 12  Pada: bz     vā́cam evā́smai tát práyaccʰati


Pada: ca     tā́m̐ śáśvad r̥tvígbʰyo víbʰajati

Line : 13  Pada: cb     tásmād asya vā́ṅ nópadasyati \


Pada: cc     āsyadagʰnáḥ kāryàs

Pada: cd     tā́vatī hī̀yáṃ vā́g vádati \

Line : 14  Pada: ce     átʰo etā́vati hí vācā́ vīryàṃ kriyáte


Pada: cf     yó vr̥kṣáḥ pʰalagráhis tásya kuryāt pʰalagráhir asānī́ti //


Anuvaka: 5  
Line : 16  Pada: a     svāhā yajñaṃ manasa iti

Pada: b     manasā vai yajña ālabʰyate

Pada: c     vātayonir yajñas \

Line : 17  Pada: d     divi yajño 'ntarikṣe pr̥tʰivyām

Pada: e     atrātra vai yajñas \

Pada: f     yatrayatraiva yajñas tata enaṃ manasālabʰate

Line : 18  Pada: g     taṃ yatvāste

Pada: h     yajñam eva tad yatvāste


Pada: i     yad visr̥jed yajñaṃ visr̥jet \

Pada: j     yadi visr̥jet punar dīkṣayet \


Line : 19  Pada: k     yat punar dīkṣayed āhutīr atirecayet * \
      FN emended. Ed.: abʰirecayat. Oertel, Zur Kapiṣṭʰala-Kaṭʰa-Saṃhitā, p.25. Mittwede, Textkritische Bemerkungen, p. 113

Pada: l     gāyatrīṃ vaiṣṇavīm anubrūyāt \

Line : 20  Pada: m     vāg vai gāyatrī

Pada: n     yajño viṣṇus \

Pada: o     vācaiva yajñam̐ saṃtanoti


Pada: p     bārhaspatyām uttarām anubrūyāt \

Page: 80  
Line : 1  Pada: q     brahma vai br̥haspatis \

Pada: r     brahmaṇā yajñasyārtaṃ niṣkriyate

Pada: s     brahamaṇaiva yajñasyārtaṃ niṣkaroti


Line : 2  Pada: t     tvam agne vratapā asīty agnaye vratapataye 'nubrūyāt \

Pada: u     vratapatiṃ vā etasya vrataṃ gaccʰati yo dīkṣitas san na vrataṃ carati \

Line : 3  Pada: v     agnir devānāṃ vratapatis \

Line : 4  Pada: w     vratapater evādʰi vratam ālabʰate \


Pada: x     adīkṣiṣṭāyam asā āmuṣyāyaṇa iti trir upām̐śv āha trir uccais \

Line : 5  Pada: y     devebʰyaś caiva manuṣyebʰyaś ca yajñaṃ prāha


Pada: z     nakṣatraṃ dr̥ṣṭvā * vācaṃ visr̥jate
      FN emended. Ed.: dr̥ṣṭʰvā. Mittwede, Textkritische Bemerkungen, p. 113

Line : 6  Pada: aa     divā vai manuṣyā yajñena caranti naktaṃ devās \

Pada: ab     ahnaiva rātrīm abʰisaṃtatya devebʰyo yajñam̐ saṃprayaccʰati

Line : 7  Pada: ac     gopītʰāya


Pada: ad     vrataṃ kr̥ṇuteti

Pada: ae     yajñaṃ kurutety evaitad āha


Line : 8  Pada: af     pāṅkty eṣā vyāhr̥tiḥ

Pada: ag     pāṅkto yajñas \

Pada: ah     vāca evaitat samyag udyate


Line : 9  Pada: ai     nottāno dīkṣitaś śayīta

Pada: aj     yad uttānaś śayīta devalokam upāvarteta


Pada: ak     na nyaṅ śayīta

Line : 10  Pada: al     yan nyaṅ śayīta pitr̥lokam upāvarteta //

Pada: am     jano vā itaḥ pitaro dūre

Line : 11  Pada: an     janād āgaccʰati

Pada: ao     pramāyukas syāt


Pada: ap     tiryaṅṅ eva śayīta \

Pada: aq     antarikṣadevatyo vai dīkṣitas

Line : 12  Pada: ar     svam eva lokam̐ svamāyatanam upāvr̥tya śaye


Pada: as     nāgneḥ parāṅ śayīta \

Line : 13  Pada: at     agnis sarvā devatās \

Pada: au     devatābʰya āvr̥ścyeta \


Pada: av     agnim evābʰyāvr̥tya śayīta \

Pada: aw     agnis sarvā devatās \

Line : 14  Pada: ax     devatā evābʰyāvr̥tya śaye


Pada: ay     daivīṃ dʰiyaṃ manāmaha iti mārjayate

Line : 15  Pada: az     brahmaṇā

Pada: ba     satejastvāya \


Pada: bb     atʰo āpo me ned dīkṣām avamuṣṇān ity annaṃ vai manuṣyebʰya udabībʰatsata

Line : 16  Pada: bc     tad devā ayiyam̐san \

Pada: bd     tā āpo 'bruvann upāvartasva vayaṃ ta etān svadayiṣyāma iti

Line : 17  Pada: be     tad upāvartata

Pada: bf     yad dīkṣito mārjayate \

Line : 18  Pada: bg     annādyasyāvaruddʰyai //


Pada: bh     tasmād brāhmaṇa āhārya āhr̥te hastā avanejīta \

Line : 19  Pada: bi     annādyasyāvaruddʰyai


Pada: bj     na vā etena hutaṃ vratayitavyaṃ nāhutaṃ yo dīkṣitas \

Line : 20  Pada: bk     ye devā manujātā iti vratayati

Pada: bl     prāṇā vai devā manujātās

Pada: bm     svāyām eva devatāyām̐ hutaṃ vratayati

Line : 21  Pada: bn     tenāsya na hutaṃ bʰavati nāhutam


Pada: bo     agne tvam̐ su jāgr̥hīti svapsyann agnim abʰimantrayeta

Line : 22  Pada: bp     bahu vā eṣa supto vratyaṃ nigaccʰati \

Page: 81  
Line : 1  Pada: bq     agnir devānāṃ vratapatir

Pada: br     vratapataya eva vratam̐ saṃpradāya kāmam r̥dʰate


Pada: bs     tvam agne vratapā asīti prabudʰyāgnim abʰimantrayeta

Line : 2  Pada: bt     vratapataye vā eṣa vratam̐ saṃprayaccʰati \

Line : 3  Pada: bu     agnir devānāṃ vratapatis \

Pada: bv     vratapater evādʰi vratam ālabʰate //


Anuvaka: 6  
Line : 4  Pada: a     na dīkṣitena hotavyam \


Pada: b     havir vai dīkṣito rudro 'gnir

Pada: c     yaj juhuyād dʰavirbʰūtam ātmānaṃ rudrāyāpidadʰyāt \

Line : 5  Pada: d     yan na juhuyād yajñaṃ viccʰindyāt

Pada: e     tad etad vratam aparasminn agnā adʰiśritya pūrvam agnim abʰisaṃcarati

Line : 6  Pada: f     tenaiva yajñam̐ saṃtanoti


Pada: g     yatʰā vi gaur ūdʰaḥ kuruta evam eṣa devebʰyo yajñam̐ saṃbʰarati yo dīkṣate

Line : 7  Pada: h     yaj juhuyād yajñaṃ viduhyāt srevayet \

Line : 8  Pada: i     yatʰopadʰīte * sūta evaṃ tat \
      FN Mittwede, Textkritische Bemerkungen, p. 113: yatʰopadʰītā

Pada: j     yad upari juhoti

Pada: k     sakr̥d eva yāma āgate devebʰyo yajñaṃ duhe


Line : 9  Pada: l     sarvaṃ vā etasya havirbʰūtaṃ yo dīkṣitas \

Pada: m     nirādiśya hi dīkṣate

Line : 10  Pada: n     tasya yo 'nnam atti yajñaṃ girati

Pada: o     tasya yajñenaiva prāyaścittiḥ //


Line : 11  Pada: p     pāśena vā eṣo 'bʰihito yo dīkṣito varuṇyaḥ pāśas tasya

Line : 12  Pada: q     yo 'nnam atti varuṇa enaṃ grāhuko bʰavati

Pada: r     tasmād baddʰasya nigasya cānnaṃ nādyāt \


Line : 13  Pada: s     devānāṃ vā etat pariṣūtaṃ yo dīkṣito manuṣyāṇām in nvai pariṣūtam̐ surabʰyavāyam \

Line : 14  Pada: t     tasmād dīkṣitasyānnaṃ nādyāt


Pada: u     tredʰā vā etasya pāpmānaṃ vibʰajante yo dīkṣitas \

Line : 15  Pada: v     yo 'nnam atti sa tr̥tīyam \

Pada: w     yo 'ślīlaṃ kīrtayati sa tr̥tīyam \

Line : 16  Pada: x     yo nāma gr̥hṇāti sa tr̥tīyam \

Pada: y     tasmād dīkṣitasya nānnam adyān nāślīlaṃ kīrtayen na nāma gr̥hṇīyāt \


Line : 17  Pada: z     dānāya vā eṣa dīkṣate 'tʰaitad anr̥taṃ karoti

Line : 18  Pada: aa     yat pratigr̥hṇāti

Pada: ab     garbʰo dīksito hinasti garbʰaṃ pratigr̥hītam \


Pada: ac     pūṣā sanīnām̐ somo rādʰasām iti

Line : 19  Pada: ad     pūṣā hi sanīnām īśe somo rādʰasām \


Line : 20  Pada: ae     rāsveyat someti

Pada: af     somo vā etad etasmai rāsate yad vanute \


Pada: ag     ā bʰūyo bʰareti \

Pada: ah     āgame hy enaṃ bʰūyas \


Line : 21  Pada: ai     devas savitā vasor vasudāveti

Pada: aj     savitr̥prasūta eva pratigr̥hṇāti \

Line : 22  Pada: ak     ātmano 'him̐sāyai


Pada: al     devebʰyo vai yajño na prābʰavat

Pada: am     taṃ dakṣiṇābʰis samabʰāvayan

Page: 82  
Line : 1  Pada: an     yad dīkṣito bʰr̥tiṃ vanute yajñam eva saṃbʰāvayati

Pada: ao     tasmād dvādaśa rātrīr dīkṣito bʰr̥tiṃ vanvīta

Line : 2  Pada: ap     yāvān eva yajñas taṃ saṃbʰāvayati //


Pada: aq     devebʰyo vā anyā dakṣiṇā nīyante manuṣyebʰyo 'nyās

Line : 3  Pada: ar     tā etā anudiśati

Pada: as     vāyave tveti

Line : 4  Pada: at     yā naśyati

Pada: au     nirr̥tyai tveti

Pada: av     yāvasīdati

Pada: aw     rudrāya tveti

Pada: ax     yāṃ rudro hanti yā sam̐śīryate

Line : 5  Pada: ay     varuṇāya tveti

Pada: az     yāpsu yā bleṣkeṇa

Pada: ba     yamāya tveti

Line : 6  Pada: bb     yānyena mr̥tyunā \

Pada: bc     etā vai devebʰyo nīyante manuṣyebʰya itarās

Pada: bd     tā etāḥ

Pada: be     puṇyabrāhmaṇa etābʰir bʰūya upardʰnoti \

Line : 7  Pada: bf     r̥dʰnoti ya evaṃ veda


Pada: bg     devīr āpo apāṃ napād ity apo 'tigāhate

Line : 8  Pada: bh     yad evāsāṃ yajñiyaṃ yad dʰaviṣyaṃ tat parivr̥ṇakti \

Pada: bi     anavakleśāya \


Line : 9  Pada: bj     agnir vai dīkṣitas \

Pada: bk     śamayanty agnim āpas \

Pada: bl     yajuṣātigāhate \

Pada: bm     aśāntyai *
      FN emended. Ed.: yajuṣātigāhate śāntyai. Mittwede, Textkritische Bemerkungen, p. 113

Line : 10  Pada: bn     śāntir hy āpas \

Pada: bo     atʰo teja evātman bʰūyas samādʰatte


Pada: bp     yad ayajuṣātigāheta vihradinīr āpas syur

Line : 11  Pada: bq     yajuṣātigāhate //

Pada: br     tasmād āpas saṃtatā aviccʰinnā dʰāvanti


Line : 12  Pada: bs     yadi nāvyāṃ tared araṇī ca ratʰaṃ cādʰāya taret \

Pada: bt     agnir vai sarvā devatās \

Line : 13  Pada: bu     yajño ratʰas \

Pada: bv     devatābʰiś caiva yajñena ca saha tarati \


Pada: bw     ā pārād gantor loṣṭaṃ vimr̥ṇann āsīta

Line : 14  Pada: bx     tenāsyā naiti *
      FN emended. Ed.: tenāsyā naite. Oertel, Zur Kapiṣṭʰala-Kaṭʰa-Saṃhitā, p.28, supports Caland's emendation. Mittwede, Textkritische Bemerkungen, p. 114


Pada: by     sakṣehy * ayaṃ te yonir r̥tviya iti
      FN Ed.: sakʰyehy. KS.2.4:10.12 Ed.: sakṣemahi, KpS. 1.16:14.12, 36.3:222.1: sakṣehi, Oertel, Zur Kapiṣṭʰala-Kaṭʰa-Saṃhitā, p.55. Mittwede, Textkritische Bemerkungen, p. 114

Pada: bz     yatʰāyajus \


Line : 15  Pada: ca     edam aganma devayajanaṃ pr̥tʰivyā iti devayajanam adʰyavasyati \

Pada: cb     r̥ksāmābʰyām̐ saṃtaranto yajurbʰir iti \

Line : 16  Pada: cc     r̥ksāmābʰyāṃ caiva devatābʰiś ca devayajanam abʰisaṃtarati //


Anuvaka: 7  
Line : 18  Pada: a     devāś ca vā asurāś ca samāvad eva yajñe 'kurvata

Pada: b     yad eva devā akurvata tad asurā akurvatāgnihotraṃ darśapūrṇamāsau cāturmāsyāni \

Line : 19  Pada: c     eṣa vāva tarhi yajña āsīt

Line : 20  Pada: d     te devā etam̐ saumyam adʰvaram apaśyan \

Pada: e     tam āharan \

Pada: f     te 'dīkṣayan \

Pada: g     te 'gnihotraṃ vratam akurvata \

Line : 21  Pada: h     agnihotraṃ vāva vratam \

Pada: i     tasmād yāgnihotrasya skannasya prāyaścittis sā vratasya skannasya prāyaścittis

Line : 22  Pada: j     tasmād dvivrato dīkṣitas syāt \

Page: 83  
Line : 1  Pada: k     dvir hy agnihotraṃ juhvati


Pada: l     teṣāṃ yat paurṇamāsam āsīt tam agnīṣomīyaṃ paśum akurvata yaḥ pūrvedyur ālabʰyate

Line : 2  Pada: m     yad dārśaṃ tam āgneyaṃ yo 'nusavanam ālabʰyate

Pada: n     vaiśvadevaṃ prātassavanam akurvata

Line : 3  Pada: o     varuṇapragʰāsān mādʰyandinam̐ savanam \

Pada: p     sākamedʰām̐s tr̥tīyasavanam \

Line : 4  Pada: q     tr̥tīyasavane pitr̥yajñam avākalpayan \

Pada: r     tr̥tīyasavane tryambakān \

Pada: s     te 'surā apakrāmanto 'bruvan

Line : 5  Pada: t     na vā ime dʰvartavā abʰūvann iti

Pada: u     tad adʰvarasyādʰvaratvam \

Line : 6  Pada: v     tato devā abʰavan parāsurā abʰavan

Pada: w     ya evaṃ vidvān dīkṣate yam evaṃ vidvān dīkṣayati bʰavaty ātmanā parāsya bʰrātr̥vyo bʰavati //


Anuvaka: 8  
Line : 8  Pada: a     svargaṃ vā etena lokaṃ prayanti yat prāyaṇīyam \

Pada: b     tat prāyaṇīyasya prāyaṇīyatvam \

Line : 9  Pada: c     cʰidyate vā eṣo 'smāl lokād yo 'muṃ lokaṃ gaccʰati

Pada: d     yad ādityam udayanīyaṃ bʰavati \

Line : 10  Pada: e     asminn eva loke pratitiṣṭʰati


Pada: f     devā vā asurān hatvā vairadeyād īṣamāṇās te diśo 'mohayannenna idam anyo 'nu prajānād iti

Line : 12  Pada: g     tad āhus

Pada: h     sādʰyā vai nāma devā āsan pūrve devebʰyas

Pada: i     te diśo mohayitvā svargaṃ lokam āyan

Line : 13  Pada: j     nen na imaṃ lokam anyo 'nu prajānād iti

Pada: k     tā ime 'vare devā anu prājijñāsanta

Line : 14  Pada: l     tā na prājānan

Pada: m     sāditir abravīd vāryaṃ vr̥ṇā ahaṃ va imā diśaḥ pravakṣyāmi matprāyaṇa eva yajño 'san madudayana iti

Line : 15  Pada: n     tasmād ādityaṃ prāyaṇīyam bʰavaty ādityam udayanīyam \

Line : 16  Pada: o     vāryavr̥tam̐ hy asyāḥ


Pada: p     patʰyām̐ svastiṃ yajatety abravīt tayā prācīṃ diśaṃ prajñāsyatʰeti \

Line : 17  Pada: q     agniṃ yajatety abravīt tena dakṣiṇām \

Line : 18  Pada: r     somaṃ yajatety abravīt tena pratīcīm \

Pada: s     savitāraṃ yajatety abravīt tenodīcīm

Line : 19  Pada: t     aham evemā ubʰau lokau vedety abravīd iyam aditis tasyā iyam ūrdʰvā dig *
      FN < diś

Line : 20  Pada: u     ūrdʰvā eva tena svargaṃ lokam āyan \

Pada: v     tā etā evaṃ devatā ijyante

Line : 21  Pada: w     diśāṃ kl̥ptyai

Pada: x     svargasya lokasya prajñātyai


Pada: y     patʰyayā vai svastyā devāḥ prācīṃ diśaṃ prājānan

Page: 84  
Line : 1  Pada: z     agnīṣomā anusamapaśyatām \

Pada: aa     savitā prāsuvat \

Pada: ab     iyam aditir asyām adʰi yajñaṃ prāñcam atanvata //

Line : 2  Pada: ac     yajñamukʰaṃ vā etat saṃbʰriyate yat prāyaṇīyam \

Line : 3  Pada: ad     vāk patʰyā svastis \

Pada: ae     yat patʰyām̐ svastiṃ yajati

Pada: af     vācam eva tat saṃbʰarayati

Line : 4  Pada: ag     prāṇāpānā evāgnīṣomābʰyām̐ saṃbʰarati

Pada: ah     prasavāyaiva

Pada: ai     saviteyam aditir

Line : 5  Pada: aj     asyām adʰi yajñamukʰam̐ saṃbʰarayati


Pada: ak     kl̥ptyai vā etan nirupyate yat prāyaṇīyam \

Line : 6  Pada: al     maruto * devaviśā
      FN emended. Ed.: marutāṃ. Mittwede, Textkritische Bemerkungen, p. 114

Pada: am     devaviśāṃ vai kalpamānāṃ manuṣyaviśānukalpate

Line : 7  Pada: an     yan marutvadyājyāyāḥ padaṃ bʰavati *svasti rāye maruto dadʰātaneti *
      FN R̥V.10.63.15 pāda d
      FN external reference

Pada: ao     devaviśām eva kalpayati

Line : 8  Pada: ap     tāṃ kalpamānāṃ manuṣyaviśānukalpate


Pada: aq     patʰyām̐ svastiṃ yajati

Line : 9  Pada: ar     tasmād asā ādityo 'ccʰinnaṃ pura udeti paścān nimrocati

Pada: as     patʰyām̐ hy eṣa svastim anusaṃcarati \


Line : 10  Pada: at     agniṃ yajati

Pada: au     tasmād dakṣiṇato 'gra oṣadʰayaḥ pacyamānā āyanti \

Line : 11  Pada: av     āgneyā hy oṣadʰayas


Pada: aw     somaṃ yajati

Pada: ax     tasmād āpaḥ pratīcīr bʰūyiṣṭʰā dʰāvanti

Line : 12  Pada: ay     saumīr hy āpas


Pada: az     savitāraṃ yajati

Pada: ba     tasmād ayam uttarād bʰūyiṣṭʰaṃ pavate

Line : 13  Pada: bb     savitr̥prasūto hy eṣa pavate \


Pada: bc     aditiṃ yajati

Pada: bd     tasmād iyam upariṣṭāt prajābʰyo varṣati


Line : 14  Pada: be     pañcaitā devatā yajati

Pada: bf     pāṅkto yajñas \

Pada: bg     yajñam evāvarunddʰe \


Line : 15  Pada: bh     agnaye ṣaṣṭʰam avadyati

Pada: bi     ṣaḍ r̥tavas \

Pada: bj     r̥tuṣv eva pratitiṣṭʰati


Pada: bk     daśa yājyānuvākyā bʰavanti

Line : 16  Pada: bl     daśākṣarā virāḍ annaṃ virāḍ

Pada: bm     virājy evānnādye pratitiṣṭʰati


Pada: bn     sviṣṭakr̥te dvādaśī bʰavatas \

Line : 17  Pada: bo     dvādaśa māsās saṃvatsaras

Pada: bp     saṃvatsarsyāptyai


Pada: bq     saptadaśa sāmidʰenyo bʰavanti

Line : 18  Pada: br     saptadaśo vai saṃvatsaraḥ

Pada: bs     pañcartavo dvādaśa māsā eṣa vāva sa saṃvatsaras

Line : 19  Pada: bt     saṃvatsarād evādʰi yajñamukʰaṃ pratanute //


Anuvaka: 9  
Line : 20  Pada: a     patʰyām̐ svastiṃ yajati

Pada: b     vāg vai patʰyā svastis \

Pada: c     vācam eva tad ātmanas spr̥ṇoti \


Line : 21  Pada: d     agniṃ yajati

Pada: e     yad evāsya śuṣkam agnidāhyaṃ tat tena sprṇoti


Pada: f     somaṃ yajati

Line : 22  Pada: g     yad evāsyārdram ātmano 'nagnidāhyaṃ tat tena sprṇoti


Pada: h     prasavāyaiva savitā

Page: 85  
Line : 1  Pada: i     samiṣṭyai pratiṣṭʰityā aditiḥ

Pada: j     patʰyayā svastyā prayanti patʰyayā svastyodyanti

Line : 2  Pada: k     vāg vai patʰyā svastis \

Pada: l     vācaiva prayanti vācodyanti \

Pada: m     ādityaṃ prāyaṇīyaṃ bʰavaty ādityam udayanīyam

Line : 3  Pada: n     asmim̐ś caiva loke 'muṣmim̐ś ca yajñamukʰena pratitiṣṭʰati


Line : 4  Pada: o     diśo vai svargo lokas \

Pada: p     etaddevatyā diśas \

Pada: q     yat prāyaṇīyena yajate

Line : 5  Pada: r     diśa eva svargaṃ lokam abʰyātiṣṭʰati


Pada: s     yatʰā vai tejany ūyata evaṃ yajña ūyate

Line : 6  Pada: t     yad ādityaṃ prāyaṇīyaṃ bʰavaty ādityam udayanīyam \

Pada: u     barsā evaitā antato nahyati

Line : 7  Pada: v     draḍʰimne 'prasram̐sāya


Pada: w     yāḥ prāyaṇīyasyānuvākyās tā udayanīyasya yājyās \

Line : 8  Pada: x     yā yājyās tā anuvākyās \

Pada: y     yenaiva prayanti tenodyanti

Line : 9  Pada: z     pratipadatvāya pratiprajñātyai


Pada: aa     vyatiṣajed yājyānuvākyā yaṃ dviṣyāt tasya

Pada: ab     prainam asmāl lokāc cyāvayati nāmuṃ prāpayati

Line : 10  Pada: ac     yatʰā patʰa udety evaṃ tat \

Pada: ad     ubʰayata evainaṃ cʰinatti \


Line : 11  Pada: ae     ananuyājaṃ prāyaṇīyam̐ syād aprayājam udayanīyam \

Pada: af     samānaṃ vā etad dʰavis

Line : 12  Pada: ag     saṃtatyai \


Pada: ah     ātmā vai prayājāḥ prajānuyājās \

Pada: ai     yad evaṃ kuryād ātmānaṃ ca prajāṃ cāntariyād aprajāḥ pramīyeta

Line : 13  Pada: aj     prayājavatī evānuyājavatī syātām \

Line : 14  Pada: ak     samānaṃ vā etad dʰavis samānī devatā samānaṃ mekṣaṇam \

Pada: al     tenaiva yajñam̐ samtanoti

Line : 15  Pada: am     nātmānaṃ na prajām antareti //


Pada: an     sam̐stʰāpyā3n na sam̐stʰāpyā3m iti mīmām̐sante

Line : 16  Pada: ao     sravati vai yajño 'sam̐stʰitas

Pada: ap     tam̐ sravantaṃ yajamāno 'nu parāsravati prajayā ca paśubʰiś ca

Line : 17  Pada: aq     sam̐stʰāpyam eva


Pada: ar     patnīṃ tu na saṃyājayet \

Pada: as     amedʰyā vā eṣāpūtā neśvarā svargaṃ lokaṃ gantos

Line : 18  Pada: at     tām udayanīye saṃyājayati

Pada: au     yatʰā pravāsī svam āyatanam āgaccʰaty evam evaitat patnīṃ yajamāno 'smiṃl loke 'bʰi pratitiṣṭʰati


Line : 20  Pada: av     dīkṣitānnam̐ hi vā ījānā adanty atʰa na vasīyām̐so bʰavanti

Line : 21  Pada: aw     dīkṣito vai tarhi yarhi prāyaṇīyena yajate

Pada: ax     dīkṣitas tarhi yarhy avabʰr̥tʰād udeti

Page: 86  
Line : 1  Pada: ay     prāyaṇīyasya niṣkāṣa udayanīyam abʰinirvapati \

Pada: az     udayanīyasyaiva nāśnīyāt \

Line : 2  Pada: ba     dīkṣitānnam eva parivr̥ṇakti vasīyān bʰavati //


Anuvaka: 10  
Line : 3  Pada: a     kadrūś ca vai suparṇī cātmarūpayor aspardʰetām \

Pada: b     sā kadrūs suparṇīm ātmarūpam ajayat \

Line : 4  Pada: c     iyaṃ vai kadrūr dyaus suparṇī

Pada: d     cʰandām̐si vai sauparṇāni

Pada: e     sā kadrūs suparṇīm abravīt

Line : 5  Pada: f     tr̥tīyasyām ito divi somas tam āhara tenātmānaṃ niṣkrīṇīṣveti

Line : 6  Pada: g     sā suparṇī cʰandām̐sy abravīt \

Pada: h     etasmai vai pitarau putrān bibʰr̥ta īdr̥śān mā spr̥ṇavān ito mā niṣkrīṇīteti

Line : 7  Pada: i     sā jagaty udapatac caturdaśākṣarā satī

Line : 8  Pada: j     sāprāpya * nyavartata
      FN Raghuvira, KpS, xxvi. Mittwede, Textkritische Bemerkungen, p. 114

Pada: k     tasyā dve akṣare ahīyetām \

Pada: l     sā paśūm̐ś ca dīkṣāṃ cādāyāpatat

Line : 9  Pada: m     tasmāt paśumantaṃ dīkṣopanamati

Pada: n     tasmād āhur jagatī cʰandasāṃ paśavyatameti

Line : 10  Pada: o     sā triṣṭub udapatat trayodaśākṣarā satī

Pada: p     sāprāpya * nyavartata
      FN Mittwede, Textkritische Bemerkungen, p. 114

Pada: q     tasyā dve akṣare ahīyetām \

Line : 11  Pada: r     sā dakṣiṇāṃ ca tapaś cādāyāpatat

Pada: s     tasmāt triṣṭubʰo loke dakṣiṇā nīyanta

Line : 12  Pada: t     etad vāva tapo yat svaṃ dadāti

Pada: u     tasmād āhur mādʰyandinam̐ savanānāṃ tapasvitamam iti

Line : 13  Pada: v     sā gāyatry udapatac caturakṣarā satī

Line : 14  Pada: w     sājayā karṇagr̥hyodapatat

Pada: x     tam asyā ajābʰyāruṇat

Pada: y     tad ajāyā ajātvam \

Pada: z     sā tāni ca catvāryakṣarāṇi somaṃ cādāyāpatat

Line : 15  Pada: aa     sāṣṭākṣarābʰavat \

Pada: ab     brahamavādino vadanti

Line : 16  Pada: ac     kasmād gāyatrī kaniṣṭʰā cʰandasām̐ satī yajñamukʰaṃ parīyāya kasmāt tejasvinitameti

Line : 17  Pada: ad     yad evādas somam āharat tasmād gāyatrī yajñamukʰaṃ tasmāt tejasvinitamā

Line : 18  Pada: ae     sā padmāṃ dve savane āharan

Pada: af     mukʰena tr̥tīyam \

Pada: ag     yan mukʰenāharat tad adʰayat

Line : 19  Pada: ah     tasmād dve savane śukravatī dʰītam iva tr̥tīyasavanam \

Pada: ai     tasmād r̥jīṣaṃ tr̥tīyasavane 'bʰiṣuṇvanti

Line : 20  Pada: aj     yat tr̥tīyasavana āśiram avanayanti

Pada: ak     tr̥tīyasavanam eva tat saṃbʰaranto manyante //


Anuvaka: 11  
Page: 87  
Line : 1  Pada: a     índrāgnī

Pada: b     śnátʰad vr̥trám

Pada: c     índrāváruṇayor ahám \

Pada: d     nū́ na indrāvaruṇā

Pada: e     sáṃ vāṃ kármaṇā \

Line : 2  Pada: f     ubʰā́ jigyatʰur

Pada: g     asmé indrābr̥haspatī

Pada: h     bŕ̥haspátir * naḥ //
      FN emended. Ed.: bŕ̥haspátiṃ. cf. 10.13:142.9

Line : 3  Pada: i     índrāsomā tápataṃ rákṣa ubjátaṃ nyàrpayataṃ vr̥ṣaṇā tamovŕ̥dʰaḥ /

Line : 4  Pada: j     párā śr̥ṇītam acíto nyòṣatam̐ hatáṃ nudétʰāṃ níśiśītam atríṇaḥ //

Line : 5  Pada: k     índrāsomā sám agʰáśam̐sam abʰy àgʰáṃ tápur yayastu carúr agnimā́m̐ iva /

Line : 6  Pada: l     brahmadvíṣe kravyā́de gʰorácakṣase dvéṣo dʰattam anavāyáṃ kimīdíne //

Line : 7  Pada: m     índrā nú pūṣáṇā vayám̐ sakʰyā́ya svastáye /

Line : 8  Pada: n     huvéma vā́jasātaye //

Line : 9  Pada: o     yád índro ánayad ríto mahī́r apó vŕ̥ṣantamaḥ /

Line : 10  Pada: p     tátra pūṣā́bʰavat sácā //

Line : 11  Pada: q     índrāparvatā br̥hatā́ rátʰena vāmī́r íṣa ā́vahatam̐ suvī́rāḥ /

Line : 12  Pada: r     vītám̐ havyā́ny adʰvaréṣu devā várdʰetʰāṃ gīrbʰír íḍayā mádantā //

Line : 13  Pada: s     mamáttu naḥ párijmā vasarhā́ mamáttu vā́to apā́ṃ vŕ̥ṣaṇvān /

Line : 14  Pada: t     śiśītám indrāparvatā yuváṃ nas tán no víśve varivasyantu devā́ḥ //

Line : 15  Pada: u     r̥bʰúr r̥bʰúbʰir abʰí vas syāma víbʰvo vibʰúbʰiś śávasā śávām̐si /

Line : 16  Pada: v     vā́jo asmā́m̐ avatu vā́jasātā índreṇa yujā́ taruṣema vr̥trám //

Line : 17  Pada: w     śácyākarta pitárā yúvānā śácyākarta camasáṃ devapā́nam /

Line : 18  Pada: x     śácyā hárī dʰánutarā ataṣṭendravā́hā r̥bʰavo vājaratnāḥ //

Line : 19  Pada: y     vádʰīṃ vr̥trám \

Pada: z     bʰū́ri cakartʰa

Pada: aa     viśvā́héndras \

Pada: ab     enā́ṅgūṣéṇa * //
      FN emended. Ed.: enā́ṅguṣéṇa


Anuvaka: 12  
Line : 20  Pada: a     tvam agne br̥had vayo dadāsi deva dāśuṣe /

Line : 21  Pada: b     kavir gr̥hapatir yuvā

Pada: c     havyavāḍ agnir ajaraḥ // pitaro vibʰur vibʰāvā sudr̥śīko asme

Page: 88  
Line : 1  Pada: d     sugārhapatyās sam iṣo dīdihy asmadryak saṃmimīhi śravām̐si

Line : 2  Pada: e     ya imā viśvā jātāni

Pada: f     viśvā rūpāṇi //

Line : 4  Pada: g     tvaṃ ca soma no vaśo jīvātuṃ na marāmahe /

Line : 5  Pada: h     priyastotro vanaspatiḥ //

Line : 6  Pada: i     brahmā devānāṃ padavīḥ kavīnām r̥ṣir viprāṇāṃ mahiṣo mr̥gāṇām /

Line : 7  Pada: j     śyeno gr̥dʰrāṇām̐ svadʰitir vanānām̐ somaḥ pavitram atyeti rebʰan //

Line : 8  Pada: k     udapruto na vayo rakṣamāṇā vāvadato abʰriyasyeva gʰoṣāḥ /

Line : 9  Pada: l     giribʰrajo normayo madanto br̥haspatim abʰy arkā anāvan //

Line : 10  Pada: m     ham̐sair iva sakʰibʰir vāvadadbʰir aśmanmayāni nahanā vyasyan /

Line : 11  Pada: n     br̥haspatir abʰikanikradad gā uta prāstaud uc ca vidvām̐ agāyat //

Line : 12  Pada: o     tvam̐ sutasya pītaye sadyo vr̥ddʰo ajāyatʰāḥ /

Line : 13  Pada: p     indra jyaiṣṭʰyāya sukrato //

Line : 14  Pada: q     bʰuvas tvam indra brahmaṇā mahān bʰuvo viśveṣu savaneṣu yajñiyaḥ /

Line : 15  Pada: r     bʰuvo nr̥̄m̐ś cyautno viśvasmin bʰare jyeṣṭʰaś ca mantro viśvacarṣaṇe //

Line : 16  Pada: s     mitrasya carṣaṇīdʰr̥taś śravo devasya sānasi /

Line : 17  Pada: t     satyaṃ citraśravastamam //

Line : 18  Pada: u     mitro janān yātayati bruvāṇo mitro dādʰāra pr̥tʰivīm uta dyām /

Line : 19  Pada: v     mitraḥ kr̥ṣṭīr animiṣābʰicaṣṭe satyāya havyaṃ gʰr̥tavad vidʰema //

Line : 20  Pada: w     pra sa mitra marto astu prayasvān yas ta āditya śikṣate vratena /

Line : 21  Pada: x     na hanyate na jīyate tvoto nainam am̐ho aśnoty antito na dūrāt //

Page: 89  
Line : 1  Pada: y     yat kiṃcedaṃ varuṇa daivye jane 'bʰidrohaṃ manuṣyāś carāmasi /

Line : 2  Pada: z     acittī yat tava dʰarmā yuyopima mā nas tasmād enaso deva rīriṣaḥ //

Line : 3  Pada: aa     kitavāso yad riripur na dīvi yad vā gʰā satyam uta yan na vidma /

Line : 4  Pada: ab     sarvā tā vi ṣya śitʰireva devādʰā te syāma varuṇa priyāsaḥ //

Line : 5  Pada: ac     yatʰā no aditiḥ karat paśve nr̥bʰyo yatʰā gave /

Line : 6  Pada: ad     yatʰā tokāya rudriyam //

Line : 7  Pada: ae     mā nas toke tanaye mā na āyau mā no goṣu mā no aśveṣu rīriṣaḥ /

Line : 8  Pada: af     vīrān mā no rudra bʰāmito vadʰīr haviṣmanto namasā vidʰema te //


Line : 10  Pada: ag     iti śrīyajuṣi kāṭʰake carakaśākʰāyāṃ madʰyamikāyāṃ dīkṣitannāma trayoviṃśaṃ stʰānakaṃ saṃpūrṇam //


Next part


This text is part of the TITUS edition of Black Yajur-Veda: Kathaka-Samhita.

Copyright TITUS Project, Frankfurt a/M, 9.5.2016. No parts of this document may be republished in any form without prior permission by the copyright holder.