TITUS
Black Yajur-Veda: Kathaka-Samhita
Part No. 37
Previous part

Sthanaka: 37  
Anuvaka: 1  
Line : 13  Pada: a     prajāpatiḥ prajā asr̥jata

Pada: b     tā asmād apākrāman \

Pada: c     tā akāmayatopa māvarterann iti

Line : 14  Pada: d     sa etam odanam apacat

Pada: e     so 'nnam eva bʰūtvaikadʰātiṣṭʰat

Pada: f     tā anyatrānnam avittvā tāḥ prajāpatim evaikadʰānnādyāyābʰisamāvartanta

Line : 15  Pada: g     yāvatīr ha vai kiyatīś ca prajā vācaṃ vadanti tā enam ekadʰānnādyāyābʰisamāvartante ya etenābʰiṣicyate

Line : 17  Pada: h     sa eṣa odanasavas \


Pada: i     rāḍ asi virāḍ asīti \

Pada: j     etānīva sarvāṇi bʰavanti

Page: 85  
Line : 1  Pada: k     sarvāṇy annāni bʰavanti sarve puruṣās

Pada: l     sarvāṇy evānnāny avarunddʰe sarvān puruṣān


Line : 2  Pada: m     hiraṇyaṃ brahmaṇe dadāti

Pada: n     tejas tena parikrīṇāti


Line : 3  Pada: o     tisr̥dʰanvam \

Pada: p     rājanyāyaujas tena parikrīṇāti \


Pada: q     aṣṭrām \

Pada: r     vaiṣyāya puṣṭiṃ tena parikrīṇāti


Line : 4  Pada: s     māṣakamaṇḍalum \

Pada: t     śūdrāyāyus tena parikrīṇāti


Pada: u     hiraṇyam ābadʰnāti

Line : 5  Pada: v     tad evāsmin pratiṣṭʰāpayati //


Pada: w     yad odanaṃ prāśnāti \

Pada: x     etad eva sarvam avarudʰya tad asminn ekadʰā dadʰāti


Line : 6  Pada: y     rohiṇyāṃ kriyate

Pada: z     yad brāhmaṇā rohiṇī tasmāt \


Pada: aa     yad udyati sūrye kriyate \

Line : 7  Pada: ab     etad vai prajāpate rūpaṃ yarhy eṣa udeti

Pada: ac     sarvā vā etaṃ prajāḥ pratinandanti

Line : 8  Pada: ad     didr̥kṣeṇyo ha darśanīyo bʰavati \


Pada: ae     avetyo 'vabʰr̥tʰā3 nāvetyā3 iti mīmām̐sante


Line : 9  Pada: af     yad darbʰapiñjūlaiḥ pāvayati

Pada: ag     tad evāvaiti

Pada: ah     tad u nāvaiti \

Line : 10  Pada: ai     ubʰayam eva karoti


Pada: aj     dvābʰyāṃ pāvayati

Pada: ak     dve satyaṃ cānr̥taṃ ca

Pada: al     satyenaivāsyānr̥taṃ pāvayati

Line : 11  Pada: am     dvau prāṇaś cāpānaś ca


Pada: an     tribʰiḥ pāvayati

Pada: ao     triṣatyā hi devās \

Line : 12  Pada: ap     atʰo trayo hi prāṇāḥ prāṇo vyāno 'pānaḥ


Pada: aq     pañcabʰiḥ pāvayati \

Pada: ar     apāṃ vā etad oṣadʰīnāṃ tejo yad darbʰās \

Line : 13  Pada: as     yad darbʰapiñjūlaiḥ pāvayati \

Pada: at     apām evainam oṣadʰīnāṃ tejasābʰiṣiñcati //


Anuvaka: 2  
Line : 15  Pada: a     āgneyo 'ṣṭākapālas saumyaś carus sāvitro 'ṣṭākapālo bārhaspatyaś carur agnīṣomīya ekādaśakapālas sārasvataś carur vāruṇo yavamayo daśakapālo dyāvāpr̥tʰivya ekakapālas \


Line : 17  Pada: b     yad āgneyas \

Pada: c     āgneyo hi brāhmaṇas \


Pada: d     yat saumyas

Line : 18  Pada: e     saumyo hi brāhmaṇas \


Pada: f     yat sāvitraḥ

Pada: g     prasavāyaiva sāvitras \


Pada: h     yad bārhaspatyas \

Line : 19  Pada: i     brahma vai br̥haspatis \

Pada: j     etad brāhmaṇasya vākpatyam \


Pada: k     yad agnīṣomīyas \

Pada: l     āgneyo hi saumyo brāhmaṇas

Line : 20  Pada: m     tau yadā saṃgaccʰete atʰa vīryāvān bʰavati


Pada: n     yat sārasvatas \

Line : 21  Pada: o     vāg vai sarasvatī \

Pada: p     etad brāhmaṇasya pratyakṣaṃ vākpatyam \


Pada: q     yad vāruṇas \

Line : 22  Pada: r     nirvaruṇatvāyaiva vāruṇas \

Pada: s     yo hy eva kaś ca san sūyate sa vāruṇas \


Pada: t     yad dyāvāpr̥tʰivyas \

Page: 86  
Line : 1  Pada: u     indro vai vr̥trāya vajram udayaccʰata

Pada: v     taṃ dyāvāpr̥tʰivī nānvamanyetām \

Line : 2  Pada: w     tam etena bʰāgadʰeyenānvamanyetām \

Pada: x     vajrasya vā eṣo 'numānas \

Pada: y     anumatavajras sūyātā iti


Line : 3  Pada: z     yad aṣṭau havīm̐ṣi \

Pada: aa     aṣṭākṣarā gāyatrī

Pada: ab     brahma gāyatrī

Pada: ac     brahmaṇā sūyātā iti


Line : 4  Pada: ad     kr̥ṣṇājine 'dʰyabʰiṣicyate \

Pada: ae     r̥ksāmayor vā etad rūpam \

Line : 5  Pada: af     yat kr̥ṣṇājinam

Pada: ag     r̥ksāmayor evādʰyabʰiṣicyate


Pada: ah     hiraṇyena gʰr̥tam utpunāti

Pada: ai     tejasa eva ruce


Line : 6  Pada: aj     yad gʰr̥tenādʰyabʰiṣicyate

Pada: ak     tena ha śraiṣṭʰyaṃ prāpnoti //


Anuvaka: 3  
Line : 7  Pada: a     āgneyo 'ṣṭākapālaḥ pauṣṇaś carus sāvitro 'ṣṭākapālo vaiśvadevaś carus tvāṣṭro 'ṣṭākapālo vāruṇo yavamayo daśakapālo mārutas saptakapālo mārutī pr̥śnir vaśā


Line : 9  Pada: b     yad āgneyas \

Pada: c     r̥ddʰyā evāgneyas \

Pada: d     agnimukʰā hy r̥ddʰis \


Line : 10  Pada: e     yat pauṣṇaḥ

Pada: f     puṣṭir vai pūṣā

Pada: g     puṣṭir vaiśyasya


Pada: h     yat sāvitraḥ

Pada: i     prasavāyaiva sāvitras \


Line : 11  Pada: j     yad vaiśvadevas \

Pada: k     vaiśvadevo hi vaiśyas \


Pada: l     yat tvāṣṭras

Pada: m     tvaṣṭā hi rūpāṇi vikaroti


Line : 12  Pada: n     yad vāruṇas \

Pada: o     nirvaruṇatvāyaiva vāruṇas \

Pada: p     yo hy eva kaś ca san sūyate sa vāruṇas \


Line : 13  Pada: q     yan mārutas \

Pada: r     māruto hi vaiśyas \


Pada: s     yat sapta havīm̐ṣi

Pada: t     sapta hi marutas \


Pada: u     atʰaiṣā mārutī pr̥śnir vaśā

Line : 14  Pada: v     tasyā agnaye samavattaṃ bʰavati \

Pada: w     atʰābʰiṣicyate

Pada: x     viḍ vai marutas \

Line : 15  Pada: y     viśa eva madʰyato 'bʰiṣicyate

Pada: z     tasmād eṣa viśaḥ priyas \

Pada: aa     viśo hi madʰyato 'bʰiṣicyate \


Line : 16  Pada: ab     r̥ṣabʰacarme 'dʰyabʰiṣicyate

Pada: ac     sa hi prajanayitā

Line : 17  Pada: ad     prajananāya


Pada: ae     dadʰnābʰiṣicyate

Pada: af     mr̥du dadʰi

Pada: ag     mr̥dum evainaṃ karoti //


Anuvaka: 4  
Line : 18  Pada: a     narāśam̐sasya mahimānam eṣām upastoṣāma yajatasya yajñaiḥ /

Line : 19  Pada: b     ye sukratavaś śucayo dʰiyaṃdʰās svadanti devā ubʰayāni havyā //


Line : 20  Pada: c     yo vai somena yajate sa devasavas \

Pada: d     yaḥ paśunā yajate sa devasavas \

Pada: e     ya iṣṭyā yajate sa manuṣyasavas \

Line : 21  Pada: f     etaṃ vai pr̥tʰyai devā anvamanyanta

Pada: g     tenainam abʰyaṣiñcan

Line : 22  Pada: h     so 'py āraṇyānāṃ paśūnām asūyata

Pada: i     yāvatīr ha vai kiyatīśca prajā vācaṃ vadanti tāsām̐ sarvāsām̐ sūyate ya etenābʰiṣicyate


Line : 23  Pada: j     nihnutyaivaitad abʰiṣicyate nārāśam̐syarcā

Page: 87  
Line : 1  Pada: k     manuṣyā hi narāśam̐sas \


Pada: l     yat kiṃca rājasūye 'nuttaravedikaṃ tad atra sarvaṃ kriyate \


Line : 2  Pada: m     atʰaiṣa māruta ekavim̐śatikapālas

Pada: n     tasyāgnaye samavattaṃ bʰavati \

Line : 3  Pada: o     atʰābʰiṣicyate

Pada: p     trir vai saptasapta marutas \

Pada: q     viṇ marutas \

Pada: r     viśa eva madʰyato 'bʰiṣicyate

Line : 4  Pada: s     tasmād eṣa viśaḥ priyas \

Pada: t     viśo hi madʰyato 'bʰiṣicyate //


Anuvaka: 5  
Line : 6  Pada: a     saṃ te payām̐si sam u yantu vājās saṃ vr̥ṣṇyāny abʰimātiṣāhaḥ /

Line : 7  Pada: b     āpyāyamāno amr̥tāya soma divi śravām̐sy uttamāni dʰiṣva //


Line : 8  Pada: c     na vai somena somasya savo 'sti \

Pada: d     abʰiṣikto hi somas \

Pada: e     gʰnanti hi somam \

Line : 9  Pada: f     na hi hatas sūyate


Pada: g     saumyā triṣṭubʰābʰiṣicyate

Pada: h     sā hi somasavas


Line : 10  Pada: i     saumyām̐ sūtavaśāyām adʰy abʰiṣicyate

Pada: j     sā hi retodʰā retas somas \


Pada: k     yat kiṃca rājasūye 'nyat stomebʰyas tad atra sarvaṃ kriyate \


Line : 11  Pada: l     atʰaiṣa māruta ekavim̐śatikapālas

Line : 12  Pada: m     tasyāgnaye samavattaṃ bʰavati \

Pada: n     atʰābʰiṣicyate

Pada: o     trir vai saptasapta marutas \

Line : 13  Pada: p     viṇ marutas \

Pada: q     viśa eva madʰyato 'bʰiṣicyate

Pada: r     tasmād eṣa viśaḥ priyas \

Pada: s     viśo hi madʰyato 'bʰiśicyate //


Anuvaka: 6  
Line : 15  Pada: a     yad vai rājasūyam̐ sa varuṇasavas \

Pada: b     yad vājapeyam̐ sa samrāṭsavaḥ

Pada: c     prajāpatis sāmrājyaṃ parameṣṭʰī

Line : 16  Pada: d     svārājyaṃ gaur eva

Pada: e     sa eṣa gosavas \

Pada: f     yatʰeva ha gaur evam iva bʰavati ya etenābʰiṣicyate


Line : 17  Pada: g     pratiduhābʰiṣicyate

Pada: h     tad dʰi svārājyam \


Pada: i     br̥hat sāma

Line : 18  Pada: j     tad dʰi svārājyam


Pada: k     ayutaṃ dakṣiṇā

Pada: l     tad dʰi svārājyam \


Pada: m     pavamāne kaṇvaratʰaṃtaraṃ prohanti

Line : 19  Pada: n     dakṣiṇata āhavanīyasyānuddʰate 'bʰiṣicyate \

Pada: o     iyaṃ vai gaus \

Line : 20  Pada: p     asyā evānantarhito 'bʰiṣicyate


Pada: q     ṣaṭtrim̐śas stomo bʰavati

Pada: r     paśustomo vā eṣa

Line : 21  Pada: s     tena gosavaḥ //


Anuvaka: 7  
Line : 22  Pada: a     trivr̥t stomas \

Pada: b     brahmavarcasaṃ vai trivr̥t \

Pada: c     brahmavarcasenaivābʰiṣicyate


Pada: d     ratʰaṃtaram̐ sāma

Page: 88  
Line : 1  Pada: e     brahmavarcasaṃ vai ratʰaṃtaram \

Pada: f     brahmavarcasenābʰiṣicyate \


Pada: g     agniṣṭomas stomas \

Line : 2  Pada: h     brahmavarcasaṃ vā agniṣṭomas \

Pada: i     brahmavarcasenaivābʰiṣicyate


Pada: j     pravargyaḥ pravr̥jyate

Line : 3  Pada: k     brahmavarcasaṃ vai pravargyas \

Pada: l     brahmavarcasenaivābʰiṣicyate


Pada: m     parisrajī hotā \

Pada: n     aruṇo mirmiras triśukriyas \

Line : 4  Pada: o     etad vai brahmavarcasasya rūpam \

Pada: p     rūpeṇaiva brahmavarcasam avarunddʰe \


Line : 5  Pada: q     ekaṃ vā etat savanaṃ yad ekas stoma ekaṃ cʰandas \

Pada: r     ekādaśaikādaśānusavanaṃ dadyāt

Line : 6  Pada: s     savanānāṃ vyāvr̥ttyai

Pada: t     trayastrim̐śat saṃpadyante

Pada: u     trayastrim̐śad devatās \

Pada: v     devatā evāvarunddʰe \


Line : 7  Pada: w     aśvaṃ catustrim̐śaṃ dadāti

Pada: x     prajāpatiś catustrim̐śaḥ

Pada: y     prajāpatim evāpnoti


Line : 8  Pada: z     br̥haspataye vai devā na śradadadʰata

Pada: aa     tam etena prajāpatir ayājayat

Pada: ab     tato 'smai śradadadʰata

Line : 9  Pada: ac     sa eṣa br̥haspatisavas \

Pada: ad     brahmavarcasakāma etena yajeta

Line : 10  Pada: ae     brahmavarcasī bʰavati

Pada: af     tasyaiṣaiva niyatiḥ *
      FN Mittwede, Textkritische Bemerkungen, p. 149

Pada: ag     prajās sarvā brāhmaṇīr brahmavarcasinīr bʰavanti //


Anuvaka: 8  
Line : 12  Pada: a     pañcadaśas stomas \

Pada: b     ojo vai vīryaṃ pañcadaśas \

Pada: c     ojasaiva vīryeṇābʰiṣicyate


Line : 13  Pada: d     br̥hat sāma \

Pada: e     ojo vai vīryaṃ br̥hat \

Pada: f     ojasaiva vīryeṇābʰiṣicyate \


Pada: g     uktʰyas stomas \

Line : 14  Pada: h     ojo vai vīryam uktʰāni \

Pada: i     ojasaiva vīryeṇābʰiṣicyate \


Pada: j     aindram̐ stotraṃ ca śastraṃ ca triṣṭubʰāḥ pavamānās \

Line : 15  Pada: k     ojo vai vīryaṃ triṣṭub

Pada: l     ojasaiva vīryeṇābʰiṣicyate \


Line : 16  Pada: m     indraṃ vai sarvā mr̥dʰas sarvā nāṣṭrās sarvāṇi rakṣām̐sy ajigʰām̐san \

Line : 17  Pada: n     tam etena prajāpatir ayājayat

Pada: o     sa sarvā mr̥dʰas sarvā nāṣṭrās sarvāṇi rakṣām̐sy atarat \

Line : 18  Pada: p     indro yajamānas \

Pada: q     yad etena yajate

Pada: r     sarvā eva mr̥dʰas sarvā nāṣṭrās sarvāṇi rakṣām̐si tarati

Line : 19  Pada: s     sa eṣa indrasavaḥ //



Anuvaka: 9  
Line : 20  Pada: a     sā́vīr hí deva prtʰamā́ya pitré varṣmā́ṇam asmai varimā́ṇam asmai /

Page: 89  
Line : 1  Pada: b     átʰāsmábʰyam̐ savitar vā́ryāṇi divédiva ā́suvā bʰū́ri paśváḥ //

Line : 2  Pada: c     bʰūtó bʰūtéṣu carati práviṣṭas sá bʰūtā́nām ádʰipatir babʰūva /

Line : 3  Pada: d     tásya mr̥tyóś carati rājasū́yam̐ sá rā́jā rājyám ánumanyatām idám //

Line : 4  Pada: e     yébʰiś śílpaiḥ papratʰānā́m ádr̥m̐had yébʰir dyā́m abʰyápim̐śat prajā́patiḥ /

Line : 5  Pada: f     yébʰir vā́caṃ viśvárūpebʰir ávyayam̐s ténemám ágra ihá várcasā sámaṅgdʰi //

Line : 6  Pada: g     yébʰir ādityás tápati prá ketúbʰir yébʰis sū́ryo dádr̥śe citrábʰānuḥ /

Line : 7  Pada: h     yébʰir vā́caṃ puṣkalébʰir ávyayam̐s ténemám ágra ihá várcasā sámaṅgdʰi //

Line : 8  Pada: i     ā́yáṃ bʰātu śávasā páñca kr̥ṣṭī́r índra iva jyeṣṭʰó bʰavatu prajā́nām /

Line : 9  Pada: j     asmínn astu puṣkaláṃ citrábʰānv ā́yáṃ pr̥ṇātu rájaso vimā́nam //

Line : 10  Pada: k     yát te śílpaṃ kaśyapa rocanā́vad indriyā́vat puṣkaláṃ citrábʰānu /

Line : 11  Pada: l     yásmin sū́ryā árpitās saptá sākáṃ tásmin rā́jānam ádʰi víśrayemám //

Line : 12  Pada: m     vyāgʰró vaíyyāgʰre ádʰi víkramasva díśo mahī́ḥ /

Line : 13  Pada: n     víśas tvā sárvā vāñcʰantv ā́po divyā́ḥ páyasvatīḥ //

Line : 14  Pada: o     yā́ ā́po divyā́ḥ páyasā saṃbabʰūvúr yā́ antarikṣyā̀ utá pā́rtʰivāsaḥ /

Line : 15  Pada: p     tā́sāṃ tvā sárvāsāṃ rucā́bʰíṣiñcāmi várcasā //

Line : 16  Pada: q     abʰí tvā yárcasāsicaṃ yajñéna páyasā sahá /

Line : 17  Pada: r     yátʰā́so mitravárdʰanas tátʰā tvā savitā́ karat //

Page: 90  
Line : 1  Pada: s     índraṃ víśvā avīvr̥dʰan samudrávyacasaṃ gíraḥ /

Line : 2  Pada: t     ratʰī́tamaṃ ratʰī́nāṃ vā́jānām̐ sátpatiṃ pátim //

Line : 3  Pada: u     abʰí préhi vīráyasvográś céttā sapatnahā́ /

Line : 4  Pada: v     ā́tiṣṭʰa mitravárdʰanas túbʰyaṃ devā́ ádʰibruvan //

Line : 5  Pada: w     ā́tiṣṭʰa vr̥trahan rátʰaṃ yuktā́ te bráhmaṇā hárī /

Line : 6  Pada: x     arvācī́nam̐ sú te máno grā́vā kr̥ṇotu vagnúnā //

Line : 7  Pada: y     ātíṣṭʰantaṃ pári víśve abʰūṣañ cʰríyo vásānaś carati svárociḥ /

Line : 8  Pada: z     mahát tád asyā́surasya nā́mā́ viśvárūpo amŕ̥tāni tastʰau //

Line : 9  Pada: aa     ánu tvéndro mádatv ánu bŕ̥haspátir ánu sómo ánv agnír āvīt /

Line : 10  Pada: ab     ánu tvā víśve avantu devā́s saptá rā́jāno yá udābʰiṣiktā́ḥ //

Line : 11  Pada: ac     ánu tvā mitrā́váruṇā ihā́vatām ánu dyā́vāpr̥tʰivī́ óṣadʰībʰiḥ /

Line : 12  Pada: ad     sū́ryó * 'hobʰir ánu tvāvatu candrámā nákṣatrair ánu tvāvīt //
      FN emended. Ed.: súryó. Mittwede, Textkritische Bemerkungen, p. 149

Line : 13  Pada: ae     dyaúś ca tvā pr̥tʰivī́ ca prácetasā yajñó bŕ̥had dákṣiṇā * tvā pipartu /
      FN Mittwede, Textkritische Bemerkungen, p. 149

Line : 14  Pada: af     ánu svadʰā́ cikite sómo agnír ánu tvāvatu savitā́ savéna //

Line : 15  Pada: ag     enā́ vyāgʰráṃ pariṣasvajānám̐ sim̐hám̐ hinvanti mahaté dʰánāya /

Line : 16  Pada: ah     marmr̥jyánte dvīpínam apsv àntár aruṣáṃ ná subʰvàs tastʰivā́m̐sam //


Anuvaka: 10  
Line : 17  Pada: a     bodʰaś ca mā pratībodʰaś ca purastād gopāyatām

Pada: b     asvapnaś ca mānavadrāṇaś ca dakṣiṇato gopāyatām \

Page: 91  
Line : 1  Pada: c     gopāyamānaś ca mā rakṣamāṇaś ca paścād gopāyatām \

Line : 2  Pada: d     jāgr̥viś ca mārundʰatī cottarād gopāyatām //

Line : 3  Pada: e     anamitraṃ no adʰarāg anamitram udak kr̥dʰi /

Line : 4  Pada: f     indrānamitraṃ naḥ paścād anamitraṃ puras kr̥dʰi //

Line : 5  Pada: g     anamitrair ahobʰis sacīmahi viśve devā anamitrā na uṣasas santu nimrucaḥ //

Line : 6  Pada: h     yāṣ ṣaḍ urvīḥ pañca pradiśas tā naḥ pāntu

Pada: i     mitradʰā no mitre dadʰātā *
      FN dadʰātās? (dadʰātā abʰayaṃ)

Line : 7  Pada: j     abʰayaṃ no astu //


Line : 8  Pada: k     ye rātrīm anutiṣṭʰatʰa ye ca bʰūteṣu jāgr̥tʰa /

Line : 9  Pada: l     paśūn ye sarvān rakṣatʰa te na ātmasu jāgr̥ta //


Line : 10  Pada: m     bodʰa pratībodʰāsvapnānavadrāṇa gopāyamāna rakṣamāṇa jāgr̥ve 'rundʰati ye devās tanūpās stʰa te ma iha tanvaṃ pāta


Line : 11  Pada: n     bodʰa pratībodʰeti \

Pada: o     asau vā ādityo bodʰas \

Line : 12  Pada: p     agniḥ pratībodʰas \


Pada: q     asvapnānavadrāṇeti

Pada: r     candramā vā asvapnas \

Line : 13  Pada: s     yaḥ pavate so 'navadrāṇas \


Pada: t     gopāyamāna rakṣamāṇeti \

Pada: u     ahar vai gopāyamānas \

Line : 14  Pada: v     rātrī rakṣamāṇas \


Pada: w     jāgr̥ve 'rundʰatīti

Pada: x     yajño vai jāgr̥vir

Pada: y     dakṣiṇārundʰatī \


Line : 15  Pada: z     ete vai devā rāṣṭrabʰr̥tas

Pada: aa     tān eveṭṭe \

Pada: ab     ātmano gopītʰāya //


Anuvaka: 11  
Line : 16  Pada: a     yé rāṣṭrabʰŕ̥to yé rāṣṭrásyānubʰartā́ras tébʰyo rāṣṭrī́yaḥ paridéyas \

Pada: b     imé vā́vá té prāṇā́s

Line : 17  Pada: c     tébʰya evaínaṃ páridadāti


Pada: d     téṣām etā́ḥ pátnyas tā́n etā́ ánu tā́bʰyó 'trā́pi kāryàm \

Line : 18  Pada: e     tā́bʰya evaítát kriyate

Pada: f     tā́ hy ètā́ ánu


Pada: g     purodʰā́kāmaḥ kurvīta

Line : 19  Pada: h     bráhma caivá kṣatráṃ ca sayújau karoti


Pada: i     yádi kṣatrám abʰicáret sá na idáṃ bráhma pātv íti brūyān ná kṣatrám

Line : 20  Pada: j     ápi bráhmaṇi vaí kṣatráṃ prátiṣṭʰitam \

Pada: k     bráhmaṇa evá kṣatrám antáreti tāják prádʰanvati \


Line : 21  Pada: l     aparurutsyámānaḥ kurvīta

Pada: m     saṃgrāmé kurvīta

Page: 92  
Line : 1  Pada: n     yé rāṣṭrabʰŕ̥to yé rāṣṭrásyānubʰartā́ras tā́n evópāsarat

Pada: o     tè 'smai rāṣṭrám ánubibʰrati


Line : 2  Pada: p     yá eṣā́ṃ lokā́nāṃ dvandváṃ rāṣṭrabʰŕ̥to véda nā́sya rāṣṭráṃ vyatʰate //


Line : 3  Pada: q     agníś cāsyā́ mánaś ca vāyúś cāntárikṣasya yajñáś ca sū́ryaś ca diváś candrámāś ca rátʰas saptatʰás

Line : 4  Pada: r     sá hí bʰayā́d apaváhati

Pada: s     triṣaptā́ḥ kavacínas triṣaptā́ niṣaṅgíṇas triṣaptā́ āyudʰínas

Line : 5  Pada: t     tébʰyo rāṣṭrī́yaḥ paridéyas \

Pada: u     imé vā́vá té prāṇā́s

Pada: v     tébʰya evaínaṃ páridadāti \


Line : 6  Pada: w     abʰíto vā́ agniṣṭomáṃ devāsurā́ yattā́ āsann agniṣṭomé devā́ uktʰéṣv ásurās

Line : 7  Pada: x     té devā́ yadóktʰā́ny ā́gaccʰan yadóktʰā́ny abʰyájayann átʰéndro 'bravīt káś cāháṃ cedám ā́hariṣyāva íti \

Line : 8  Pada: y     aháṃ céty abravīd váruṇas

Pada: z     táṃ váruṇo 'nvátiṣṭʰata \

Line : 9  Pada: aa     índra ā́harat

Pada: ab     sò 'bravīt káś cāháṃ cedám ā́hariṣyāva íti \

Pada: ac     aháṃ céty abravīd bŕ̥haspátis

Line : 10  Pada: ad     táṃ bŕ̥haspátir anvátiṣṭʰata \

Pada: ae     índra ā́harat

Pada: af     sò 'bravīt káś cāháṃ cedám ā́hariṣyāva íti \

Line : 11  Pada: ag     aháṃ céty abravīd víṣṇus

Pada: ah     táṃ víṣṇur anvátiṣṭʰata \

Pada: ai     índra ā́harat \

Pada: aj     etā́bʰir vaí devátābʰis sā́yujyena devā́ ásurāṇāṃ rāṣṭrám ā́dadata \

Line : 12  Pada: ak     etā́bʰir evá devátābʰis sā́yujyena bʰrā́tr̥vyād rāṣṭrám ādā́ya tád rāṣṭráṃ kr̥tvā́ yé rāṣṭrabʰŕ̥to yé rāṣṭrásyānubʰartā́ras tébʰya enat saṃpráyaccʰati \


Line : 14  Pada: al     etád bibʰr̥taitán mā́ riṣad íti \

Pada: am     asaú vā́ ādityó rāṣṭrám r̥távo rāṣṭrabʰŕ̥tas

Line : 15  Pada: an     tébʰya evaínat saṃpráyaccʰati \


Pada: ao     etád bibʰr̥taitán mā́ riṣad íti

Line : 16  Pada: ap     yá eṣá saptatʰáḥ prajā́patir evaíṣá


Pada: aq     yán mádʰye juhuyā́d vyávadʰūnvītainam \

Pada: ar     parogavyūtí hotavyàs

Line : 17  Pada: as     tátʰā hainaṃ ná vyávadʰūnute \


Pada: at     ūrdʰvás tíṣṭʰañ juhoti \

Pada: au     ūrdʰvó hí tíṣṭʰan vīryā̀vattaraḥ


Line : 18  Pada: av     pūrṇáyā srucā́ juhoti

Pada: aw     pūrṇáḥ prajā́patiḥ

Pada: ax     prajā́patim evā́pnoti //


Anuvaka: 12  
Line : 20  Pada: a     devāś ca vā asurāś ca samāvad eva yajñe 'kurvata

Pada: b     yad eva devā akurvata tad asurā akurvata

Line : 21  Pada: c     te devā etān rāṣṭrabʰr̥to 'paśyan \

Pada: d     teṣām agniṃ cauṣadʰīś ca pratʰamenāvr̥ñjata

Page: 93  
Line : 1  Pada: e     sūryaṃ ca manām̐si ca dvitīyena

Pada: f     candramasaṃ ca nakṣatrāṇi ca tr̥tīyena

Line : 2  Pada: g     yajñaṃ ca dakṣiṇāṃ ca caturtʰena

Pada: h     te 'surā ayajñā adakṣiṇā anakṣatrā yat kiṃcākurvata tāṃ kr̥tyām evākurvata

Line : 3  Pada: i     tasmān nādakṣiṇaṃ gr̥he haviṣ kurvīta

Line : 4  Pada: j     yat kurute kr̥tyāṃ kurute

Pada: k     prajāpatiṃ carksāmāni ca pañcamena vāyum apa oṣadʰīr ūrjam̐ ṣaṣṭʰena \

Line : 5  Pada: l     etāvad vāvāsti

Pada: m     yāvad evāsti tad eṣām etair avr̥ñjata

Line : 6  Pada: n     ya eṣa saptatʰaḥ prajāpatir evaiṣa tenainān prāṇudanta

Pada: o     tato devā abʰavan parāsurā abʰavan \


Line : 7  Pada: p     etair yajeta bʰrātr̥vyavān

Pada: q     etāvad vāvāsti

Pada: r     yāvad evāsti tad etair bʰrātr̥vyasya vr̥ṅkte

Line : 8  Pada: s     ya eṣa saptatʰaḥ prajāpatir evaiṣa tenainaṃ praṇudate

Pada: t     bʰavaty ātmanā parāsya bʰrātr̥vyo bʰavati \


Line : 9  Pada: u     etair yājayed rājānam̐ saṃgrāme saṃyatte \

Pada: v     etāvad vāvāsti

Line : 10  Pada: w     yāvad evāsti tad eṣām etair vr̥ṅkte

Pada: x     ya eṣa saptatʰaḥ prajāpatir evaiṣa tenainān praṇudate

Line : 11  Pada: y     jityai

Pada: z     jayaty eva \


Pada: aa     etair yājayed yad rāṣṭram̐ śitʰilam ivāvahatam̐ syāt

Line : 12  Pada: ab     teṣāṃ yāvanto ratʰās syus tān sarvān yojayitvā yaś śreṣṭʰas syāt tasya dakṣiṇaṃ ratʰacakraṃ pravr̥hya nāḍyāṃ juhuyāt \

Line : 13  Pada: ac     vīryaṃ vai ratʰas \

Pada: ad     vīryeṇaivaiṣāṃ rāṣṭraṃ visam̐śyati


Line : 14  Pada: ae     ratʰacakraṃ vigr̥hṇanti

Pada: af     vajro vai ratʰas \

Pada: ag     vajreṇaivaiṣāṃ pāpmānaṃ vigr̥hṇanti


Line : 15  Pada: ah     yadi kl̥ptāhutir atyeti kalpata ebʰyo yasya nāḍyāṃ juhoti

Pada: ai     sa dakṣiṇā

Line : 16  Pada: aj     samr̥ddʰyai //


Anuvaka: 13  
Line : 17  Pada: a     ko 'si

Pada: b     katamo 'si

Pada: c     ko nāmāsi

Pada: d     kasmai tvā

Pada: e     katamasmai tvā

Pada: f     kāya tvā

Line : 18  Pada: g     kāmasya tvā \

Pada: h     āsann asā * apidadʰāmi
      FN registered as sannamā

Pada: i     sa tvaṃ no deva gāyatreṇa ccʰandasāhne paripāhi

Line : 19  Pada: j     mr̥ḍo 'si mr̥ḍase dvipade catuṣpade \

Pada: k     ādityo 'si vr̥ṣṇo aśvasya retas \

Line : 20  Pada: l     devānāṃ yātur asi

Pada: m     yātur me 'si \

Pada: n     asumaddʰitaṃ jahi

Pada: o     sa tvaṃ no deva traiṣṭubʰena ccʰandasā rātryai paripāhi

Line : 21  Pada: p     mr̥ṇo 'si mr̥ṇāmuṣya dvipadaś catuṣpadas

Line : 22  Pada: q     skambʰo 'si varuṇasya rājño varuṇasya pāśas so 'mum ahne badʰāna

Line : 23  Pada: r     bleṣko 'si nirr̥tyāḥ pāśas so 'muṃ rātryai badʰāna \

Pada: s     agnaye vītamanyave svāhā //

Page: 94  
Line : 1  Pada: t     yenendro vr̥traṃ niraham̐s cʰandasas svād anuṣṭubʰaḥ /

Line : 2  Pada: u     tenāham adya śam̐senāmuṃ nirhanmy okasaḥ //


Anuvaka: 14  
Line : 3  Pada: a     devāś ca vā asurāś ca saṃyattā āsan \

Pada: b     asureṣu tarhy amr̥tam āsīc cʰuṣṇe dānave

Line : 4  Pada: c     tac cʰuṣṇa evāntar āsye 'bibʰar

Pada: d     yān devānām agʰnam̐s tad eva te 'bʰavan

Pada: e     yān asurāṇāṃ tāñ cʰuṣṇo 'mr̥tenābʰivyānīt

Line : 5  Pada: f     te samānan

Pada: g     sa indro 'ved asureṣu vā amr̥tam̐ śuṣṇe dānava iti

Line : 6  Pada: h     sa madʰvaṣṭʰīlā bʰūtvā prapatʰe 'śayat

Pada: i     tām̐ śuṣṇo 'bʰi vyādadāt

Line : 7  Pada: j     tasyendraś śyeno bʰūtvāsyād amr̥taṃ niramatʰnāt *
      FN emended. Ed.: niramuṣṇāt. Mittwede, Textkritische Bemerkungen, p. 149

Pada: k     tasmād eṣa vayasāṃ vīryāvattamas \

Line : 8  Pada: l     indrasya hy eṣaikā tanūr

Pada: m     amr̥tam eṣa bibʰarti ya evaṃ veda


Pada: n     yaṃ kāmayetāmayāvinaṃ jīved iti taṃ vyādāyābʰivyanyāt \

Line : 9  Pada: o     amr̥tenaivainam abʰivyaniti

Line : 10  Pada: p     jīvati

Pada: q     sarvam āyur eti

Pada: r     na purāyuṣaḥ pramīyate //


Pada: s     devāś ca vā asurāś ca saṃyattā āsan \

Line : 11  Pada: t     te devā asurān agʰnan \

Pada: u     teṣāṃ ya udaśiṣyanta

Pada: v     te devān anvarohan \

Line : 12  Pada: w     ta enān vr̥ñjānāḥ pratyasyamānā āyan \

Pada: x     te devās samitim akurvata

Pada: y     ta etau brahmayātuṃ ca devayātuṃ cāpaśyan \

Line : 13  Pada: z     tā ebʰyaḥ pratyavāsr̥jan \

Pada: aa     tā enān niradahatām \

Line : 14  Pada: ab     tā enān vr̥ñjānau pratyasyamānā aitām \

Pada: ac     teṣāṃ ye 'tyamucyanta te manuṣyān prāviśan \

Line : 15  Pada: ad     tajjanmāno yātudʰānāḥ kravyāda itare

Pada: ae     na ha vā asya yātudʰānā na kravyādo na piśācā na rakṣām̐sīśate

Line : 16  Pada: af     nainam̐ śaptaṃ nābʰicaritam āgaccʰati ya evaṃ veda //


Line : 17  Pada: ag     tad yady enaṃ yātudʰāna iti brūyur nāpahnuvīta \

Line : 18  Pada: ah     etau hy eva tasya yātū


Pada: ai     ko 'si katamo 'sīti \

Pada: aj     eṣa vai brahmayātus

Pada: ak     tasmā evainam apidadʰāti


Line : 19  Pada: al     sa tvaṃ no deva gāyatreṇa ccʰandasāhne paripāhīti \

Pada: am     ahna evātmānaṃ paridadāti


Line : 20  Pada: an     mr̥ḍo 'si mr̥ḍase dvipade catuṣpada iti

Pada: ao     dvipadaś caivāsmai catuṣpadaś ca paśūn paridadāti \


Line : 21  Pada: ap     ādityo 'si vr̥ṣṇo aśvasya reto devānāṃ yātur asi yātur me 'sy asumaddʰitaṃ jahīti \

Line : 22  Pada: aq     eṣa vai devayātus

Pada: ar     tasmā evainam apidadʰāti


Line : 23  Pada: as     sa tvaṃ no deva traiṣṭubʰena ccʰandasā rātryai paripāhīti

Page: 95  
Line : 1  Pada: at     rātryā evātmānaṃ paridadāti


Pada: au     mr̥ṇo 'si mr̥ṇāmuṣya dvipadaś catuṣpada iti

Line : 2  Pada: av     dvipadaś caivāsmai catuṣpadaś ca paśūn apidadʰāti //


Pada: aw     skambʰo 'si bleṣko 'sīti \

Line : 3  Pada: ax     etau vai yamaśvā ahaś ca rātrī ca

Pada: ay     tā idaṃ manuṣyān vr̥ñjānau pratyasyamānā itas

Line : 4  Pada: az     tābʰyām evainam apidadʰāti

Pada: ba     tā enaṃ vr̥ñjānau pratyasyamānā itas \


Line : 5  Pada: bb     yadā pravlayavyatʰita * iva manyetāgnaye vītamanyave svāheti juhuyāt \
      FN Mittwede, Textkritische Bemerkungen, p. 149: pravlayavyatʰitam

Line : 6  Pada: bc     īśvaro vā abʰicaro * 'śāntaḥ pratyaṅṅ etoś *
      FN Mittwede, Textkritische Bemerkungen, p. 149: abʰicaritor
      FN emended. Ed.: etā. Mittwede, Textkritische Bemerkungen, p. 149

Pada: bd     śāntyai //


Anuvaka: 15  
Line : 7  Pada: a     pr̥tʰivyai svāhā \

Pada: b     antarikṣāya svāhā

Pada: c     dive svāhā

Pada: d     kāmāya svāhā

Pada: e     svapnāya svāhā \

Line : 8  Pada: f     ahne svāhā

Pada: g     rātryai svāhā

Pada: h     tr̥ptas tvam \

Pada: i     tr̥pto 'ham \

Pada: j     tr̥pto me prāṇas tr̥pto me vyānas tr̥pto me 'pānas

Line : 9  Pada: k     tr̥ptaṃ me cakṣus tr̥ptaṃ me śrotraṃ tr̥ptā me vāk tr̥pto ma ātmā

Line : 10  Pada: l     dyaur me pitā pr̥tʰivī me mātā

Pada: m     sūryo me cakṣur vāto me prāṇas \

Line : 11  Pada: n     astr̥to nāmāham asmi sa idaṃ dyāvāpr̥tʰivyor ātmānaṃ paridade tayoś śraye tayoḥ parākrame

Line : 12  Pada: o     gopītʰāya pipr̥taṃ mā

Pada: p     mā mā him̐siṣṭam \

Pada: q     pāhi dviṣaḥ pāhi riṣaḥ

Line : 13  Pada: r     pāhy adevyā abʰiśastyās \

Pada: s     aśmāsi tanūpānas

Pada: t     sa ma iha tanvaṃ pāhi //

Line : 14  Pada: u     tvayi me marma br̥haspatau prāṇas sa mā mr̥tyoḥ pāhi \

Pada: v     ud vācam un manīṣām ud indriyam ut prajām ut paśūn etam̐ sa r̥ccʰatu yo maitasyā diśo 'bʰidāsati \

Line : 16  Pada: w     indrāgnī maitasyā diśo gopāyatām \

Pada: x     pitaro maitasyā diśo gopāyantu

Line : 17  Pada: y     savitā maitasyā diśo gopāyatu

Pada: z     mitrāvaruṇau maitasyā diśo gopāyatām \

Line : 18  Pada: aa     br̥haspatir maitasyā diśo gopāyatu \

Pada: ab     āyuṣkr̥d āyupatnī * svadʰāvas \
      FN emended. Ed.: āyuṣ ṭad āyupatni. Mittwede, Textkritische Bemerkungen, p. 150

Line : 19  Pada: ac     gopā nas stʰa rakṣitāras \

Pada: ad     mā naḥ kaścit prakʰān mā prameṣmahi //


Anuvaka: 16  
Line : 21  Pada: a     yā́n vā́ ásurā devébʰyo nyádadʰata tā́n devā́ ánvapaśyan

Pada: b     yā́n devā́ ásurebʰyas tā́n ásurā nā́nvapaśyan \

Line : 22  Pada: c     táto devā́ ábʰavan párā́surā abʰavan

Pada: d     yátrānyó nā́nupáśyet tád etā́n nídadʰīta

Page: 96  
Line : 1  Pada: e     bʰrā́tr̥vyasyā́nanukśatyai

Pada: f     bʰávaty ātmánā párāsya bʰrā́tr̥vyo bʰavati


Line : 2  Pada: g     pr̥tʰivyaí svā́hāntárikṣāya svā́hā divé svā́héti

Line : 3  Pada: h     tráya imé lokā́s \

Pada: i     ebʰyá evaínaṃ lokébʰyaḥ páridadāti


Pada: j     kā́māya svā́héti \

Pada: k     ā́yur vaí paramáḥ kā́mas \

Line : 4  Pada: l     ā́yur evá téna spr̥ṇoti


Pada: m     svápnāya svā́héti

Pada: n     yā́ evaínam̐ svapántaṃ nāṣṭrā́ dípsanti svápna enaṃ tā́bʰyaḥ pāti \


Line : 5  Pada: o     áhne svā́hā rā́tryai svā́héti

Line : 6  Pada: p     dvaú vā́ r̥tū́ áhaś ca rā́trī ca

Pada: q     tā́bʰyām evaínaṃ páridadāti


Pada: r     saptaítā́ ā́hutīr juhoti

Line : 7  Pada: s     saptá prāṇā́s

Pada: t     tā́n evā́smin dadʰāti

Pada: u     tā́n asminn ádʰi víyātayati

Line : 8  Pada: v     tā́n asmād ánapagān karoti //


Pada: w     gʰr̥ténā́śmānam anakti \

Pada: x     eṣá hy ètárhy etásyātmā́

Line : 9  Pada: y     téjo gʰr̥tám \

Pada: z     yā́vān evā́syātmā́ táṃ téjasānakti


Pada: aa     sarváto 'nakti

Pada: ab     sarváta evaínaṃ téjasā sámardʰayati


Line : 10  Pada: ac     tr̥ptás tváṃ tr̥ptò 'hám íti

Pada: ad     prāṇā́n evā́syaitán mahimnó vyā́caṣṭe

Line : 11  Pada: ae     prāṇā́ hí mahimā́nas \


Pada: af     dyaúr me pitā́ pr̥tʰivī́ me mātā́ sū́ryo me cákṣur vā́to me prāṇá íti \

Line : 12  Pada: ag     etā́bʰya evá devátābʰya ātmā́naṃ páridadāti \


Line : 13  Pada: ah     ástr̥to nā́māhám asmi sá idáṃ dyā́vāpr̥tʰivyór ātmā́naṃ páridada íti

Line : 14  Pada: ai     dyā́vāpr̥tʰivyór evā́tmā́naṃ páridatte


Pada: aj     táyoś śraye táyoḥ párākrama íti

Pada: ak     yó vā́ anáyoḥ parākrámate ná sá vyatʰate \

Line : 15  Pada: al     anáyor evá párākram̐sta


Pada: am     gopītʰā́ya pipr̥táṃ mā mā́ mā him̐siṣṭam íti \

Line : 16  Pada: an     ātmánó 'him̐sāyai


Pada: ao     pāhí dviṣáḥ pāhí riṣáḥ pāhy ádevyā abʰíśastyā íti \

Line : 17  Pada: ap     āśíṣam evā́śāste //


Pada: aq     sarvátó 'śmānaṃ páriharati \

Line : 18  Pada: ar     eṣá hy ètám̐ sarvátaḥ pā́tīyāntaṃ loṣṭám údrujati \

Pada: as     etā́vān hy ā̀tmā́


Pada: at     bāhumātrám avaṭáṃ kʰanati \

Line : 19  Pada: au     etā́vān hí púruṣas


Pada: av     tám avadʰā́yā́tʰā́śmānam átʰa híraṇyam

Line : 20  Pada: aw     asyā́ evaínam uttarārdʰé nídadʰāti \

Pada: ax     ánikʰāto bʰavati


Pada: ay     nā́bʰiṃ práti níkʰanati

Line : 21  Pada: az     nā́bʰir vaí prā́ṇān dādʰāra yé cordʰvā́ yé cā́vāñcaḥ

Pada: ba     prāṇā́nāṃ dʰŕ̥tyai


Pada: bb     híraṇyena sám̐sparśayati \

Page: 97  
Line : 1  Pada: bc     amŕ̥taṃ vaí híraṇyam

Pada: bd     amŕ̥tenaivaínam̐ sáṃdadʰāti \


Pada: be     úd vā́cam ún manīṣā́m * íti \
      FN emended. Ed.: manīṣā́mam

Line : 2  Pada: bf     etā́ni vā́ asya níkʰanet tā́ny * evóddʰarati \
      --
      FN Ch: nikʰanetanye *


Pada: bg     ātmamātrī́ védir bʰavati \

Pada: bh     ātmamātrám̐ hí várma

Line : 3  Pada: bi     yán nā́tmamātrī́ syā́n nā́tmáne kriyeta \

Pada: bj     etā́vatī pr̥tʰivī́ yā́vatī védis \

Line : 4  Pada: bk     asyā́ evaítád ánteṣu púro 'dʰita

Pada: bl     devapurā́ evā́kr̥ta \

Pada: bm     átʰo etā́ evá devátā etā́sāṃ diśā́ṃ paraspā́ akr̥ta

Line : 5  Pada: bn     gopītʰā́ya //


Anuvaka: 17  
Line : 6  Pada: a     r̥ṣayo vā indraṃ pratyakṣaṃ nāpaśyan \

Pada: b     taṃ vasiṣṭʰa eva pratyakṣam apaśyat

Pada: c     so 'bibʰed itarebʰyo marṣibʰyaḥ pravakṣyatīti

Line : 7  Pada: d     so 'bravīd brāhmaṇaṃ te vakṣyāmi yatʰā tvatpurohitāḥ prajāḥ prajaniṣyante 'tʰa metarebʰya r̥ṣibʰyo mā pravoca iti

Line : 9  Pada: e     tasmā etān stomabʰāgān abravīt

Pada: f     tato vasiṣṭʰapurohitāḥ prajāḥ prājāyanta

Line : 10  Pada: g     stomo vā eteṣāṃ bʰāgas

Pada: h     tat stomabʰāgānām̐ stomabʰāgatvam \


Line : 11  Pada: i     raśmir asi kṣayāya tvā kṣayaṃ jinveti

Pada: j     kṣayo vai devās \

Pada: k     devebʰya eva yajñaṃ prāha


Line : 12  Pada: l     pretir asi dʰarmeṇa tvā dʰarmaṃ jinveti

Pada: m     dʰarmo manuṣyās \

Pada: n     manuṣyebʰya eva yajñaṃ prāha \


Line : 13  Pada: o     anvitir asi dive tvā divaṃ jinva saṃdʰir asy antarikṣāya tvāntarikṣaṃ jinva pratidʰir asi pr̥tʰivyai tvā pr̥tʰivīṃ jinveti

Line : 14  Pada: p     traya ime lokās \

Line : 15  Pada: q     ebʰya eva lokebʰyo yajñaṃ prāha


Pada: r     viṣṭambʰo 'si vr̥ṣṭyai tvā vr̥ṣṭiṃ jinveti

Line : 16  Pada: s     vr̥ṣṭim evāvarunddʰe


Pada: t     pravāsy anuvāsīti

Pada: u     mitʰunam eva karoti \


Pada: v     uśig asi vasubʰyas tvā vasūñ jinva praketo 'si rudrebʰyas tvā rudrāñ jinva suditir asy ādityebʰyas tvādityāñ jinveti \

Line : 18  Pada: w     aṣṭau vasava ekādaśa rudrā dvādaśādityā vāg dvātrim̐śī svaras trayastrim̐śas

Line : 19  Pada: x     trayastrim̐śad devatās \

Pada: y     devatābʰya eva yajñaṃ prāha \


Line : 20  Pada: z     ojo 'si pitr̥bʰyas tvā pitr̥̄ñ jinveti

Pada: aa     devān eva pitr̥̄n anusaṃtanoti


Line : 21  Pada: ab     tantur asi prajābʰyas tvā prajā jinveti

Pada: ac     prajā eva paśūn anusaṃtanoti


Pada: ad     pr̥tanāṣāḍ asi paśubʰyas tvā paśūñ jinveti

Line : 22  Pada: ae     prajā eva paśūn anusaṃtanoti


Page: 98  
Line : 1  Pada: af     revad asy oṣadʰībʰyas tvauṣadʰīr jinveti \

Pada: ag     oṣadʰīṣv * eva paśūn pratiṣṭʰāpayati \
      FN Mittwede, Textkritische Bemerkungen, p. 150: oṣadʰiṣv


Pada: ah     abʰijid asi yuktagrāvendrāya tvendraṃ jinveti

Line : 2  Pada: ai     vajro vai ṣoḍaśī

Pada: aj     vyāvr̥tto 'nyair vajras

Line : 3  Pada: ak     tasmād eṣo 'nyair vyāvr̥ttas \


Pada: al     adʰipatir asi prāṇāya tvā prāṇaṃ jinveti

Pada: am     prāṇam evāvarunddʰe


Line : 4  Pada: an     dʰaruṇo 'sy apānāya tvāpānaṃ jinveti \

Pada: ao     apānam evāvarunddʰe


Line : 5  Pada: ap     sam̐sarpo 'si cakṣuṣe tvā cakṣur jinveti

Pada: aq     cakṣur evāvarunddʰe


Pada: ar     vayodʰā asi śrotrāya tvā śrotraṃ jinveti

Line : 6  Pada: as     śrotram evāvarunddʰe //


Pada: at     etad vai puruṣam akar


Pada: au     atʰātaḥ prāṇān upaiti

Line : 7  Pada: av     prajāpatim eva


Pada: aw     trivr̥d asi trivr̥te tvā savr̥d asi savr̥te tvā pravr̥d asi pravr̥te tvānūvr̥d asy anūvr̥te tveti

Line : 8  Pada: ax     mitʰunam eva karoti


Pada: ay     saṃroho 'si viroho 'si praroho 'sy anūroho 'sīti

Line : 9  Pada: az     prajāpatir eva


Pada: ba     vasuko 'si vasyaṣṭir * asi veṣaśrīr asīti
      FN emended. Ed.: vasvaṣṭir. see 17.7:250.15. Mittwede, Textkritische Bemerkungen, p. 150

Line : 10  Pada: bb     pratiṣṭʰir eva


Pada: bc     devasya savituḥ prasave br̥haspataye stuteti

Line : 11  Pada: bd     yadyad vai savitā devebʰyaḥ prāsuvat tenārdʰnuvan

Pada: be     savitr̥prasūtā eva stuvanti \

Line : 12  Pada: bf     r̥dʰnuvanti yasyaivaṃ viduṣo yasyaivaṃ vidvān stomabʰāgair brahmā bʰavati vasīyān bʰavati //


Anuvaka: 18  
Line : 14  Pada: a     svādvīṃ tvā svādunā tīvrāṃ tīvreṇāmr̥tam amr̥tena madʰumatīṃ madʰumatā sr̥jāmi

Line : 15  Pada: b     sam̐ somena

Pada: c     somo 'si \

Pada: d     aśvibʰyāṃ pacyasva

Pada: e     sarasvatyai pacyasva \

Line : 16  Pada: f     indrāya sutrāmṇe pacyasva //

Line : 17  Pada: g     parīto ṣiñcatā sutam̐ somo ya uttamam̐ haviḥ /

Line : 18  Pada: h     dadʰanvān yo naryo apsv antar ā suṣāva somam adribʰiḥ //

Line : 19  Pada: i     vāyuḥ pūtaḥ

Pada: j     punātu te //

Line : 20  Pada: k     brahma kṣatraṃ pavate teja indriyam̐ surayā somas suta āsuto madāya /

Line : 21  Pada: l     śukreṇa deva devatāḥ pipr̥gdʰi rasenānnaṃ yajamānāya dʰehi //

Page: 99  
Line : 1  Pada: m     kuvid aṅga yavamanto yavaṃ cid yatʰā dānty anupūrvaṃ viyūya /

Line : 2  Pada: n     ihehaiṣāṃ kr̥ṇuta bʰojanāni ye barhiṣo namovr̥ktiṃ na jagmuḥ //

Line : 3  Pada: o     upayāmagr̥hīto 'si \

Pada: p     aśvibʰyāṃ tvā juṣṭaṃ gr̥hṇāmi

Pada: q     sarasvatyā indrāya sutrāmṇe \

Line : 4  Pada: r     eṣa te yonis

Pada: s     tejase tvā

Pada: t     vīryāya tvā

Pada: u     balāya tvā //

Line : 5  Pada: v     nānā hi vāṃ devakr̥tam̐ sadas kr̥taṃ mā sam̐sr̥kṣātʰāṃ parame vyoman /

Line : 6  Pada: w     surā tvam asi śuṣmiṇī soma eṣa mā mā him̐sīs svaṃ yonim āviśan //

Line : 7  Pada: x     upayāmagr̥hīto 'si \

Pada: y     āśvinaṃ tejas

Pada: z     sārasvataṃ vīryam

Pada: aa     aindraṃ balam

Pada: ab     eṣa te yonis \

Line : 8  Pada: ac     modāya tvā \

Pada: ad     ānandāya tvā

Pada: ae     mahase tvā //

Line : 9  Pada: af     yā vyāgʰraṃ viṣūcikobʰau vr̥kaṃ ca rakṣati /

Line : 10  Pada: ag     śyenaṃ patatriṇam̐ sim̐ham̐ somaṃ pātv am̐hasaḥ //

Line : 11  Pada: ah     saṃpr̥cas stʰa saṃ mā bʰadreṇa pr̥ṅkta

Pada: ai     vipr̥cas stʰa vi mā pāpmanā pr̥ṅkta //


Line : 12  Pada: aj     iti śrīmadyajuṣi kāṭʰake carakaśākʰāyām orimikāyāṃ savā nāma saptatriṃśaṃ stʰānakaṃ saṃpūrṇam //


Next part


This text is part of the TITUS edition of Black Yajur-Veda: Kathaka-Samhita.

Copyright TITUS Project, Frankfurt a/M, 9.5.2016. No parts of this document may be republished in any form without prior permission by the copyright holder.