TITUS
Black Yajur-Veda: Taittiriya-Samhita
Part No. 9
Previous part

Book: 2 
Chapter: 1 
Paragraph: 1 
Verse: 1 
Sentence: 1    vāyavyàṁ śvetám ā́ labʰeta bʰū́tikāmas \
Sentence: 2    vāyúr vái kṣépiṣṭʰā devátā
Sentence: 3    vāyúm evá svéna bʰāgadʰéyenópadʰāvati
Sentence: 4    sá eváinam bʰū́tiṃ gamayati
Sentence: 5    bʰávaty evá \
Sentence: 6    átikṣiprā devátéty āhuḥ sáinam īśvarā́ pradáha íti \
Sentence: 7    etám evá sántaṃ vāyáve niyútvata ā́ labʰeta
Sentence: 8    niyúd vā́ asya dʰŕ̥tis \
Sentence: 9    dʰr̥tá evá bʰū́tim úpaity ápradāhāya
Sentence: 10    bʰávaty evá //

Verse: 2 
Sentence: 1    vāyáve niyútvata ā́ labʰeta grā́makāmas \
Sentence: 2    vāyúr vā́ imā́ḥ prajā́ nasyotā́ nenīyate
Sentence: 3    vāyúm evá niyútvantaṁ svéna bʰāgadʰéyenópa dʰāvati
Sentence: 4    sá evā́smai prajā́ nasyotā́ ní yacʰati
Sentence: 5    grāmy èvá bʰavati
Sentence: 6    niyútvate bʰavati
Sentence: 7    dʰruvā́ evā́smā ánapagāḥ karoti
Sentence: 8    vāyáve niyútvata ā́ labʰeta prajā́kāmas \
Sentence: 9    prāṇó vái vāyúr apānó niyút
Sentence: 10    prāṇāpānáu kʰálu vā́ etásya prajā́yāḥ //

Verse: 3 
Sentence: 1    ápa krāmato yó 'lam prajā́yai sán prajā́ṃ ná vindáte
Sentence: 2    vāyúm evá niyútvantaṁ svéna bʰāgadʰéyenópa dʰāvati
Sentence: 3    sá evā́smai prāṇāpānā́bʰyām prajā́m prá janayati
Sentence: 4    vindáte prajā́m \
Sentence: 5    vāyáve niyútvata ā́ labʰeta jyógāmayāvī
Sentence: 6    prāṇó vái vāyúr apānó niyút
Sentence: 7    prāṇāpānáu kʰálu vā́ etásmād ápa krāmato yásya jyóg āmáyati
Sentence: 8    vāyúm evá niyútvantaṁ svéna bʰāgadʰéyenópa //

Verse: 4 
Sentence: 1    dʰāvati
Sentence: 2    sá evā́smin prāṇāpānáu dadʰāti \
Sentence: 3    utá yádītā́sur bʰávati jī́vaty evá
Sentence: 4    prajā́patir vā́ idám éka āsīt
Sentence: 5    sò 'kāmayata
Sentence: 6    prajā́ḥ paśū́nt sr̥jeyéti
Sentence: 7    sá ātmáno vapā́m úd akkʰidat
Sentence: 8    tā́m agnáu prā́gr̥hṇāt
Sentence: 9    táto 'jás tūparáḥ sám abʰavat
Sentence: 10    táṁ svā́yai devátāyā ā́labʰata
Sentence: 11    táto vái sá prajā́ḥ paśū́n asr̥jata
Sentence: 12    yáḥ prajā́kāmaḥ //

Verse: 5 
Sentence: 1    paśúkāmaḥ syā́t sá etám prajāpatyám ajáṃ tūparám ā́ labʰeta
Sentence: 2    prajā́patim evá svéna bʰāgadʰéyenópa dʰāvati
Sentence: 3    sá evā́smai prajā́m paśū́n prá janayati
Sentence: 4    yác cʰmaśruṇás tát púruṣāṇāṁ rūpám \
Sentence: 5    yát tūparás tád áśvānām
Sentence: 6    yád anyátodan tád gávām
Sentence: 7    yád ávyā iva śapʰā́s tád ávīnām \
Sentence: 8    yád ajás tád ajā́nām
Sentence: 9    etā́vanto vái grāmyā́ḥ paśávas
Sentence: 10    tā́n //

Verse: 6 
Sentence: 1    rūpéṇaivā́va runddʰe
Sentence: 2    somāpauṣṇáṃ traitám ā́ labʰeta paśúkāmas \
Sentence: 3    dváu vā́ ajā́yai stánau
Sentence: 4    nā́naivá dvā́v abʰí jā́yete ū́rjam púṣṭiṃ tr̥tī́yaḥ
Sentence: 5    somāpūṣáṇāv evá svéna bʰāgadʰéyenópa dʰāvati
Sentence: 6    tā́v evā́smai paśū́n prá janayataḥ
Sentence: 7    sómo vái retodʰā́ḥ pūṣā́ paśūnā́m prajanayitā́
Sentence: 8    sóma evā́smai réto dádʰāti pūṣā́ paśū́n prá janayati \
Sentence: 9    áudumbaro yū́po bʰavati \
Sentence: 10    ū́rg vā́ udumbára ū́rk paśáva ūrjaivā́smā ū́rjam paśū́n áva runddʰe //

Paragraph: 2 
Verse: 1 
Sentence: 1    prajā́patiḥ prajā́ asr̥jata
Sentence: 2    tā́ asmāt sr̥ṣṭā́ḥ párācīr āyan
Sentence: 3    tā́ váruṇam agacʰan
Sentence: 4    tā́ ánv ait
Sentence: 5    tā́ḥ púnar ayācata
Sentence: 6    tā́ asmai ná púnar adadāt
Sentence: 7    sò 'bravīt \
Sentence: 8    váraṃ vr̥ṇīṣvā́tʰa me púnar dehī́ti
Sentence: 9    tā́sāṃ váram ā́labʰata
Sentence: 10    sá kr̥ṣṇá ékaśitipād abʰavat \
Sentence: 11    yó váruṇagr̥hītaḥ syā́t sá etáṃ vāruṇáṃ kr̥ṣṇám ékaśitipādam ā́ labʰeta
Sentence: 12    váruṇam //

Verse: 2 
Sentence: 1    evá svéna bʰāgadʰéyenópa dʰāvati
Sentence: 2    sá eváinaṃ varuṇapāśā́n muñcati
Sentence: 3    kr̥ṣṇá ékaśtipād bʰavati
Sentence: 4    vāruṇó hy èṣá devátayā
Sentence: 5    sámr̥ddʰyai
Sentence: 6    súvarbʰānur āsuráḥ sū́ryaṃ támasāvidʰyat
Sentence: 7    tásmai devā́ḥ prā́yaścittim aicʰan
Sentence: 8    tásya yát pratʰamáṃ támo 'pā́gʰnant sā́ kr̥ṣṇā́vir abʰavat \
Sentence: 9    yád dvitī́yaṁ sā́ pʰálgunī
Sentence: 10    yát tr̥tī́yaṁ sā́ bʰalakṣī́
Sentence: 11    yád adʰyastʰā́d apā́kr̥ntant sā́vir vaśā́ //

Verse: 3 
Sentence: 1    sám abʰavat
Sentence: 2    té devā́ abruvan
Sentence: 3    devapaśúr vā́ ayáṁ sám abʰūt kásmā imám ā́ lapsyāmaha íti \
Sentence: 4    átʰa vái tárhy álpā pr̥tʰivy ā́sīd ájātā óṣadʰayas
Sentence: 5    tā́m áviṃ vaśā́m ādityébʰyaḥ kā́māyā́labʰanta
Sentence: 6    táto vā́ ápratʰata pr̥tʰivy ájāyantáuṣadʰayas \
Sentence: 7    yáḥ kāmáyeta
Sentence: 8    prátʰeya paśúbʰiḥ prá prajáyā jāyeyéti sá etā́m áviṃ vaśā́m ādityébʰyaḥ kā́māya //

Verse: 4 
Sentence: 1    ā́ labʰeta \
Sentence: 2    ādityā́n evá kā́maṁ svéna {F bʰāgadʰéyenópa} {W bʰagadʰéyenópa} {GLOS bʰāgadʰéyenópa} dʰāvati
Sentence: 3    tá eváinam pratʰáyanti paśúbʰiḥ prá prajáyā janayanti \
Sentence: 4    asā́v ādityó ná vy àrocata
Sentence: 5    tásmai devā́ḥ prā́yaścittim aicʰan
Sentence: 6    tásmā etā́ malhā́ ā́labʰantāgneyī́ṃ kr̥ṣṇagrīvī́ṁ saṁhitā́m aindrī́ṁ śvetā́m bārhaspatyā́m \
Sentence: 7    tā́bʰir evā́smin rúcam adadʰus \
Sentence: 8    yó brahmavarcasákāmaḥ syā́t tásmā etā́ malhā́ ā́ labʰeta //

Verse: 5 
Sentence: 1    āgneyī́ṃ kr̥ṣṇagrīvī́ṁ saṁhitā́m aindrī́ṁ śvetā́m bārhaspatyā́m
Sentence: 2    etā́ evá devátāḥ svéna bʰāgadʰéyenópa dʰāvati
Sentence: 3    tā́ evā́smin brahmavarcasáṃ dadʰati
Sentence: 4    brahmavarcasy èvá bʰavati
Sentence: 5    vasántā prātár āgneyī́ṃ kr̥ṣṇagrīvī́m ā́ labʰeta grīṣmé madʰyáṃdine saṁhitā́m aindrī́ṁ śarády aparāhṇé śvetā́m bārhaspatyā́m \
Sentence: 6    trī́ṇi vā́ ādityásya téjāṁsi vasántā prātár grīṣmé madʰyáṃdine śarády aparāhṇé
Sentence: 7    yā́vanty evá téjāṁsi tā́ny evá //

Verse: 6 
Sentence: 1    áva runddʰe
Sentence: 2    saṃvatsarám paryā́labʰyante
Sentence: 3    saṃvatsaró vái brahmavarcasásya pradātā́
Sentence: 4    saṃvatsará evā́smai brahmavarcasám prá yacʰati
Sentence: 5    brahmavarcasy èvá bʰavati
Sentence: 6    garbʰíṇayo bʰavanti \
Sentence: 7    indriyáṃ vái gárbʰas \
Sentence: 8    indriyám evā́smin dadʰati
Sentence: 9    sārasvatī́m meṣī́m ā́ labʰeta yá īśvaró vācó váditoḥ sán vā́caṃ ná vádet \
Sentence: 10    vā́g vái sárasvatī
Sentence: 11    sárasvatīm evá svéna bʰāgadʰéyenópa dʰāvati sáivā́smin //

Verse: 7 
Sentence: 1    vā́caṃ dadʰāti pravaditā́ vācó bʰavati \
Sentence: 2    ápannadatī bʰavati
Sentence: 3    tásmān manuṣyā̀ḥ sárvāṃ vā́cam vadanti \
Sentence: 4    āgneyáṃ kr̥ṣṇágrīvam ā́ labʰeta saumyám babʰrúṃ jyógāmayāvī \
Sentence: 5    agníṃ vā́ etásya śárīraṃ gacʰati sómaṁ ráso yásya jyóg āmáyati \
Sentence: 6    agnér evā́sya śárīraṃ niṣkrīṇā́ti sómād rásam
Sentence: 7    utá yádītā́sur bʰávati jī́vaty evá
Sentence: 8    saumyám babʰrúm ā́ labʰetāgneyáṃ kr̥ṣṇágrīvam prajā́kāmaḥ
Sentence: 9    sómaḥ //

Verse: 8 
Sentence: 1    vái retodʰā́ agníḥ prajā́nām prajanayitā́
Sentence: 2    sóma evā́smai réto dádʰāty agníḥ prajā́m prá janayati
Sentence: 3    vindáte prajā́m
Sentence: 4    āgneyáṃ kr̥ṣṇágrīvam ā́ labʰeta saumyám babʰrúṃ yó brāhmaṇó vidyā́m anū́cya ná viróceta
Sentence: 5    yád āgneyó bʰávati téja evā́smin téna dadʰāti
Sentence: 6    yát saumyó brahmavarcasáṃ téna
Sentence: 7    kr̥ṣṇágrīva āgneyó bʰavati táma evā́smād ápa hanti
Sentence: 8    śvetó bʰavati //

Verse: 9 
Sentence: 1    rúcam evā́smin dadʰāti
Sentence: 2    babʰrúḥ saumyó bʰavati brahmavarcasám evā́smin tvíṣiṃ dadʰāti \
Sentence: 3    āgneyáṃ kr̥ṣṇágrīvam ā́ labʰeta saumyám babʰrúm āgneyáṃ kr̥ṣṇágrīvam purodʰā́yāṁ spárdʰamānas \
Sentence: 4    āgneyó vái brāhmaṇáḥ saumyó rājanyàs \
Sentence: 5    abʰítaḥ saumyám āgneyáu bʰavatas
Sentence: 6    téjasaivá bráhmaṇobʰayáto rāṣṭrám pári gr̥hṇāti \
Sentence: 7    ekadʰā́ samā́vr̥ṅkte purá enaṃ dadʰate //

Paragraph: 3 
Verse: 1 
Sentence: 1    devāsurā́ eṣú lokéṣv aspardʰanta
Sentence: 2    sá etáṃ víṣṇur vāmanám apaśyat
Sentence: 3    táṁ svā́yai devátāyā ā́labʰata
Sentence: 4    táto vái sá imā́m̐ lokā́n abʰy àjayat \
Sentence: 5    vaiṣṇaváṃ vāmanám ā́ labʰeta spárdʰamānas \
Sentence: 6    víṣṇur evá bʰūtvémā́m̐ lokā́n abʰí jayati
Sentence: 7    víṣama ā́ labʰeta
Sentence: 8    víṣamā iva hī́mé lokā́ḥ
Sentence: 9    sámr̥ddʰyai \
Sentence: 10    índrāya manyumáte mánasvate lalā́mam prāśr̥ṅgám ā́ labʰeta saṃgrāmé //

Verse: 2 
Sentence: 1    sáṃyatte \
Sentence: 2    indriyéṇa vái manyúnā mánasā saṃgrāmáṃ jayati \
Sentence: 3    índram evá manyumántam mánasvantaṁ svéna bʰāgadʰéyenópa dʰāvati
Sentence: 4    sá evā́sminn indriyám manyúm máno dadʰāti
Sentence: 5    jáyati táṁ saṃgrāmám
Sentence: 6    índrāya marútvate pr̥śnisaktʰám ā́ labʰeta grā́makāmas \
Sentence: 7    índram evá marútvantaṁ svéna bʰāgadʰéyenópa dʰāvati
Sentence: 8    sá evā́smai sajātā́n prá yacʰti
Sentence: 9    grāmy èvá bʰavati
Sentence: 10    yád r̥ṣabʰás téna //

Verse: 3 
Sentence: 1    aindrás \
Sentence: 2    yát pŕ̥śnis téna mārutáḥ
Sentence: 3    sámr̥ddʰyai
Sentence: 4    paścā́t pr̥śnisaktʰó bʰavati
Sentence: 5    paścādanvavasāyínīm evā́smai víśaṃ karoti
Sentence: 6    saumyám babʰrúm ā́ labʰetā́nnakāmaḥ
Sentence: 7    saumyáṃ vā́ ánnam \
Sentence: 8    sómam evá svéna bʰāgadʰéyenópa dʰāvati
Sentence: 9    sá evā́smā ánnam prá yacʰati \
Sentence: 10    annādá evá bʰavati
Sentence: 11    babʰrúr bʰavati \
Sentence: 12    etád vā́ ánnasya rūpám \
Sentence: 13    sámr̥ddʰyai
Sentence: 14    saumyám babʰrúm ā́ labʰeta yám álam //

Verse: 4 
Sentence: 1    rājyā́ya sántaṁ rājyáṃ nópanámet
Sentence: 2    saumyáṃ vái rājyám \
Sentence: 3    sómam evá svéna bʰāgadʰéyenópa dʰāvati
Sentence: 4    sá evā́smai rājyám prá yacʰati \
Sentence: 5    úpainaṁ rājyáṃ namati
Sentence: 6    babʰrúr bʰavati \
Sentence: 7    etád vái sómasya rūpám \
Sentence: 8    sámr̥ddʰyai \
Sentence: 9    índrāya vr̥tratúre lalā́mam prāśr̥ṅgám ā́ labʰeta gatáśrīḥ pratiṣṭʰā́kā́maḥ
Sentence: 10    pāpmā́nam evá vr̥tráṃ tīrtvā́ pratiṣṭʰā́ṃ gacʰati \
Sentence: 11    índrāyābʰimātigʰné lalā́mam prāśr̥ṅgám ā́ //

Verse: 5 
Sentence: 1    labʰeta yáḥ pāpmánā gr̥hītáḥ syā́t
Sentence: 2    pāpmā́ vā́ abʰímātis \
Sentence: 3    índram evā́bʰimātihánaṁ svéna bʰāgadʰéyenópa dʰāvati
Sentence: 4    sá evā́smāt pāpmā́nam abʰímātim prá ṇudate \
Sentence: 5    índrāya vajríṇe lalā́mam prāśr̥ṅgám ā labʰeta yám álaṁ rājyā́ya sántaṁ rājyáṃ nópanámet \
Sentence: 6    índram evá varíṇaṁ svéna bʰāgadʰéyenópadʰāvati
Sentence: 7    sá evāsmai vájram prá yacʰati
Sentence: 8    sá enaṃ vájro bʰū́tyā inddʰe \
Sentence: 9    úpainaṁ rājyáṃ namati
Sentence: 10    lalā́maḥ prāśr̥ṅgó bʰavati \
Sentence: 11    etád vái vájrasya rūpám \
Sentence: 12    sámr̥ddʰyai //

Paragraph: 4 
Verse: 1 
Sentence: 1    asā́v ādityó ná vy àrocata
Sentence: 2    tásmai devā́ḥ prā́yaścittim aicʰan
Sentence: 3    tásmā etā́ṃ dáśarṣabʰām ā́labʰanta táyaivā́smin rúcam adadʰus \
Sentence: 4    yó brahmavarcasákāmaḥ syā́t tásmā etā́ṃ dáśarṣabʰām ā́ labʰeta \
Sentence: 5    amúm evā́dityáṁ svéna bʰāgadʰéyenópa dʰāvati
Sentence: 6    sá evā́smin brahmavarcasáṃ dadʰāti
Sentence: 7    brahmavarcasy èvá bʰavati
Sentence: 8    vasántā prātás trī́m̐ lalā́mān ā́ labʰeta grīṣmé madʰyáṃdine //

Verse: 2 
Sentence: 1    cʰitipr̥ṣṭʰā́ṁ cʰarády aparā́hṇé trī́ñ cʰitivā́rān
Sentence: 2    trī́ṇi vā́ ādityásya téjāṁsi vasántā prātár gr̥ṣmé madʰyáṃdine śarády aparāhṇé
Sentence: 3    yā́vanty evá téjāṁsi tā́ny evā́va runddʰe
Sentence: 4    tráyastraya ā́ labʰyante \
Sentence: 5    abʰipūrvám evā́smin téjo dadʰāti
Sentence: 6    saṃvatsarám paryā́labʰyante
Sentence: 7    saṃvatsaró vái brahmavarcasásya pradātā́
Sentence: 8    saṃvatsará evā́smai brahmavarcasám prá yacʰati
Sentence: 9    brahmavarcasy èvá bʰavati
Sentence: 10    saṃvatsarásya parástāt prājāpatyáṃ kádrum //

Verse: 3 
Sentence: 1    ā́ labʰeta
Sentence: 2    prajā́patiḥ sárvā devátās \
Sentence: 3    devátāsu evá práti tiṣṭʰati
Sentence: 4    yádi bibʰīyā́t \
Sentence: 5    duścármā bʰaviṣyāmī́ti somāpauṣṇáṁ śyāmám ā́ labʰeta
Sentence: 6    saumyó vái devátayā púruṣaḥ pauṣṇā́ḥ paśávaḥ
Sentence: 7    sváyaivā́smai devátayā paśúbʰis tvácaṃ karoti
Sentence: 8    ná duścármā bʰavati
Sentence: 9    devā́ś ca vái yamáś cāsmim̐ lokè 'spardʰanta
Sentence: 10    sá yamó devā́nām indriyáṃ vīryàm ayuvata
Sentence: 11    tád yamásya //

Verse: 4 
Sentence: 1    yamatvám \
Sentence: 2    té devā́ amanyanta
Sentence: 3    yamó vā́ idám abʰūd yád vayáṁ smá íti
Sentence: 4    té prajā́patim úpādʰāvan \
Sentence: 5    sá etáu prajā́patir ātmána ukṣavaśáu nír amimīta
Sentence: 6    té devā́ vaiṣṇāvaruṇī́ṃ vaśā́m ā́labʰantaindrám ukṣā́ṇam
Sentence: 7    táṃ váruṇenaivá grāhayitvā́ víṣṇunā yajñéna prā́ṇudantaindréṇaivā́syéndriyám avr̥ñjata
Sentence: 8    yó bʰrā́tr̥vyavānt syā́t sá spárdʰamāno vaiṣṇāvaruṇī́m //

Verse: 5 
Sentence: 1    vaśā́m ā́ labʰetaindrám ukṣā́ṇam \
Sentence: 2    váruṇenaivá bʰrā́tr̥vyaṃ grāhayitvā́ víṣṇunā yajñena prá ṇudata aindréṇaivā́syendriyáṃ vr̥ṅkte
Sentence: 3    bʰávaty ātmánā párāsya bʰrā́tr̥vyo bʰavati \
Sentence: 4    índro vr̥trám ahan
Sentence: 5    táṃ vr̥tró hatáḥ ṣoḍaśábʰir bʰogáir asināt
Sentence: 6    tásya vr̥trásya śīrṣató gā́va úd āyan
Sentence: 7    tā́ vaidehyò 'bʰavan
Sentence: 8    tā́sām r̥ṣabʰó jagʰáné 'nū́d ait
Sentence: 9    tám índraḥ //

Verse: 6 
Sentence: 1    acāyat
Sentence: 2    sò 'manyata
Sentence: 3    yó vā́ imám ālábʰeta múcyetāsmā́t pāpmána íti
Sentence: 4    sá āgneyáṃ kr̥ṣṇágrīvam ā́labʰataindrám r̥ṣabʰám \
Sentence: 5    tásyāgnír evá svéna bʰāgadʰéyenópasr̥taḥ ṣoḍaśadʰā́ vr̥trásya bʰogā́n ápy adahad aindréṇendriyám ātmánn adʰatta
Sentence: 6    yáḥ pāpmánā gr̥hītáḥ syā́t sá āgneyáṃ kr̥ṣṇágrīvam ā́ labʰetaindrám r̥ṣabʰám
Sentence: 7    agnír evā́sya svéna bʰāgadʰéyenópasr̥taḥ //

Verse: 7 
Sentence: 1    pāpmā́nam ápi dahaty aindréṇendriyám ātmán dʰatte
Sentence: 2    múcyate pāpmánas \
Sentence: 3    bʰávaty evá
Sentence: 4    dyāvāpr̥tʰivyā̀ṃ dʰenúm ā́ labʰeta jyógaparuddʰas \
Sentence: 5    anáyor hí vā́ eṣó 'pratiṣṭʰitas \
Sentence: 6    átʰaiṣá jyóg áparuddʰo dyā́vāpr̥tʰivī́ evá svéna bʰāgadʰéyenópa dʰāvati
Sentence: 7    té eváinam pratiṣṭʰā́ṃ gamayataḥ
Sentence: 8    práty evá tiṣṭʰati
Sentence: 9    paryāríṇī bʰavati
Sentence: 10    paryārī́va hy ètásya rāṣṭráṃ yó jyógaparuddʰaḥ
Sentence: 11    sámr̥ddʰayai
Sentence: 12    vāyavyàm //

Verse: 8 
Sentence: 1    vatsám ā́ labʰeta
Sentence: 2    vāyúr vā́ anáyor vatsás \
Sentence: 3    imé vā́ etásmai lokā́ ápaśuṣkā víḍ ápaśuṣkā \
Sentence: 4    átʰaiṣá jyóg áparuddʰo vāyúm evá svéna bʰāgadʰéyenópa dʰāvati
Sentence: 5    sá evā́smā imā́m̐ lokā́n víśam prá dāpayati
Sentence: 6    prā́smā imé lokā́ḥ snuvanti
Sentence: 7    bʰuñjaty ènaṃ víḍ úpa tiṣṭʰate //

Paragraph: 5 
Verse: 1 
Sentence: 1    índro valásya bílam ápaurṇot
Sentence: 2    sá yá uttamáḥ paśúr ā́sīt tám pr̥ṣṭʰám práti saṃgŕ̥hyód akkʰidat
Sentence: 3    táṁ sahásram paśávó 'nū́d āyan \
Sentence: 4    sá unnatò 'bʰavat \
Sentence: 5    yáḥ paśúkāmaḥ syā́t sá etám aindrám unnátám ā́ labʰeta \
Sentence: 6    índram evá svéna bʰāgadʰéyonópa dʰāvati
Sentence: 7    sá evā́smai paśū́n prá yacʰati
Sentence: 8    paśumā́n evá bʰavati \
Sentence: 9    unnatáḥ //

Verse: 2 
Sentence: 1    bʰavati
Sentence: 2    sāhasrī́ vā́ eṣā́ lakṣmī́ yád unnatás \
Sentence: 3    lakṣmíyaivá paśū́n áva runddʰe
Sentence: 4    yadā́ sahásram paśū́n prāpnuyā́t átʰa vaiṣṇaváṃ vāmanám ā́ labʰeta \
Sentence: 5    etásmin vái tát sahásram ádʰy atiṣṭʰat
Sentence: 6    tásmād eṣá vāmanáḥ sámīṣitaḥ paśúbʰya evá prájātebʰyaḥ pratiṣṭʰā́ṃ dadʰāti
Sentence: 7    kò 'rhati saháram paśū́n prā́ptum íty āhus \
Sentence: 8    ahorātrā́ṇy evá sahásraṁ sampā́dyā́ labʰeta
Sentence: 9    paśávaḥ //

Verse: 3 
Sentence: 1    vā́ ahorātrā́ṇi
Sentence: 2    paśū́n evá prájātān pratiṣṭʰā́ṃ gamayati \
Sentence: 3    óṣadʰībʰyo vehátam ā́ labʰeta prajā́kāmas \
Sentence: 4    óṣadʰayo vā́ etám prajā́yai pári bādʰante yó 'lam prajā́yai sán prajā́ṃ ná vindáte \
Sentence: 5    óṣadʰayaḥ kʰálu vā́ etásyai sū́tum ápi gʰnanti yā́ vehád bʰávati \
Sentence: 6    óṣadʰīr evá svéna bʰāgadʰéyenópa dʰāvati
Sentence: 7    tā́ evā́smai svā́d yóneḥ prajā́m prá janayanti
Sentence: 8    vindáte //

Verse: 4 
Sentence: 1    prajā́m
Sentence: 2    ā́po vā́ óṣadʰayó 'sat púruṣas \
Sentence: 3    ā́pa evā́smā ásataḥ sád dadati
Sentence: 4    tásmād āhur yáś caiváṃ véda yáś ca ná \
Sentence: 5    ā́pas tvā́vā́sataḥ sád dadatī́ti \
Sentence: 6    aindrī́ṁ sūtávaśām ā́ labʰeta bʰū́tikāmás \
Sentence: 7    ájāto vā́ eṣá yó 'lam bʰū́tyai sán bʰū́tiṃ ná prāpnóti \
Sentence: 8    índram kʰálu vā́ eṣā́ sūtvā́ vaśā́bʰavat //

Verse: 5 
Sentence: 1    índram evá svéna bʰāgadʰéyenópa dʰāvati
Sentence: 2    sá eváinam bʰū́tiṃ gamayati
Sentence: 3    bʰávaty evá
Sentence: 4    yáṁ sūtvā́ vaśā́ syā́t tám aindrám evā́ labʰeta \
Sentence: 5    etád vā́vá tád inriyám \
Sentence: 6    sākṣā́d evéndriyám áva runddʰe \
Sentence: 7    aindrāgnám punarutsr̥ṣṭám ā́ labʰeta yá ā́ tr̥tī́yāt púruṣāt sómaṃ ná píbet \
Sentence: 8    vícʰinno vā́ etásya somapītʰó yó brāhmaṇáḥ sánn ā́ //

Verse: 6 
Sentence: 1    tr̥tī́yāt púruṣāt sómaṃ ná píbati \
Sentence: 2    indrāgnī́ evá svéna bʰāgadʰéyenópa dʰāvati
Sentence: 3    tā́v evā́smai soma pītʰám prá yacʰatas \
Sentence: 4    úpainaṁ somapītʰó namati
Sentence: 5    yád aindró bʰávatīndriyáṃ vái somapītʰá índriyám evá somapītʰám áva runddʰe
Sentence: 6    yád āgneyó bʰávaty āgneyó vái brāhmaṇáḥ svā́m evá devátām ánu sáṃ tanoti
Sentence: 7    punarutsr̥ṣṭó bʰavati
Sentence: 8    punarutr̥ṣṭá iva hy ètásya //

Verse: 7 
Sentence: 1    somapītʰáḥ
Sentence: 2    sámr̥ddʰyai
Sentence: 3    brāhmaṇaspatyáṃ tūparám ā́ labʰetābʰicáran
Sentence: 4    bráhmaṇas pátim evá svéna bʰāgadʰéyenópa dʰāvati
Sentence: 5    tásmā eváinam ā́ vr̥ścati
Sentence: 6    tājág ā́rtim ā́rcʰati
Sentence: 7    tūparó bʰavati
Sentence: 8    kṣurápavir vā́ eṣā́ lakṣmī́ yát tūparáḥ
Sentence: 9    sámr̥ddʰyai
Sentence: 10    spʰyó yū́po bʰavati vájro vái spʰyó vájram evā́smai prá harati
Sentence: 11    śaramáyam barhíh śr̥ṇā́ty eváinam \
Sentence: 12    váibʰīdaka idʰmó bʰinátty eváinam //

Paragraph: 6 
Verse: 1 
Sentence: 1    bārhaspatyáṁ śitipr̥ṣṭʰám ā́ labʰeta grā́makāmo {F yáḥ} {W yaḥ} {GLOS } kāmáyeta
Sentence: 2    pr̥ṣṭʰáṁ samānā́nāṁ syām íti
Sentence: 3    bŕ̥haspátim evá svéna bʰāgadʰéyenópa dʰāvati
Sentence: 4    sá eváinam pr̥ṣṭʰáṁ samānā́nāṃ karoti
Sentence: 5    grāmy èvá bʰavati
Sentence: 6    śitipr̥ṣṭʰó bʰavati
Sentence: 7    bārhaspatyó hy èṣá devátayā
Sentence: 8    sámr̥ddʰayai
Sentence: 9    pauṣṇáṁ śyāmám ā́ labʰetā́nnakāmás \
Sentence: 10    ánnaṃ vái pūṣā́
Sentence: 11    pūṣáṇam evá svéna bʰāgadʰéyenópa dʰāvati
Sentence: 12    sá evā́smai //

Verse: 2 
Sentence: 1    ánam prá yacʰati \
Sentence: 2    annādá evá bʰavati
Sentence: 3    śyāmó bʰavati \
Sentence: 4    etád vā́ ánnasya rūpám \
Sentence: 5    sámr̥ddʰyai
Sentence: 6    mārutám pŕ̥śnim ā́ labʰetā́nnakāmás \
Sentence: 7    ánnaṃ vái marútas \
Sentence: 8    marúta evá svéna bʰāgadʰéyenópa dʰāvati
Sentence: 9    tá evā́smā ánnam prá yacʰanti \
Sentence: 10    annādá evá bʰavati
Sentence: 11    pŕ̥śnir bʰavati \
Sentence: 12    etád vā́ ánnasya rūpám \
Sentence: 13    sámr̥ddʰyai \
Sentence: 14    aindrám aruṇám ā́ labʰetendriyákāmas \
Sentence: 15    índram evá //

Verse: 3 
Sentence: 1    svéna bʰāgadʰéyenópa dʰāvati
Sentence: 2    sá evā́sminn indriyáṃ badʰāti \
Sentence: 3    indriyāvy èvá bʰavati \
Sentence: 4    aruṇó bʰrū́mān bʰavati \
Sentence: 5    etád vā́ índrasya rūpám \
Sentence: 6    sámr̥ddʰyai
Sentence: 7    sāvitrám upadʰvastám ā́ labʰeta saníkāmaḥ
Sentence: 8    savitā́ vái prasavā́nām īśe
Sentence: 9    savitā́ram evá svéna bʰāgadʰéyenópa dʰāvati
Sentence: 10    sá evā́smai saním prá suvati
Sentence: 11    dā́nakāmā asmai prajā́ bʰavanti \
Sentence: 12    upadʰvastó bʰavati
Sentence: 13    sāvitró hy èṣáḥ //

Verse: 4 
Sentence: 1    devátayā
Sentence: 2    sámr̥ddʰyai
Sentence: 3    vaiśvadevám bahurūpám ā́ labʰetā́nnakāmas \
Sentence: 4    vaiśvadeváṃ vā́ ánnam \
Sentence: 5    víśvān evá devā́nt svéna bʰāgadʰéyenópa dʰāvati
Sentence: 6    tá evā́smā ánnam prá yacʰanti \
Sentence: 7    annādá evá bʰavati
Sentence: 8    bahurūpó bʰavati
Sentence: 9    bahurūpáṁ hy ánnam \
Sentence: 10    sámr̥ddʰyai
Sentence: 11    vaiśvadevám bahurūpám ā́ labʰeta grā́makāmas \
Sentence: 12    vaiśvadevā́ vái sajātā́s \
Sentence: 13    víśvān evá devā́nt svéna bʰāgadʰéyenópa dʰāvati
Sentence: 14    tá evā́smai //

Verse: 5 
Sentence: 1    sajātā́n prá yacʰanti
Sentence: 2    grāmy èvá bʰavati
Sentence: 3    bahurūpó bʰavati
Sentence: 4    bahudevatyò hy { èṣá ^ èṣás } \
Sentence: 5    sámr̥ddʰyai
Sentence: 6    prajāpatyáṃ tūparám ā́ labʰeta yásyā́nājñātam eva jyóg āmáyet
Sentence: 7    prājāpatyó vái púruṣaḥ
Sentence: 8    prajā́patiḥ kʰálu vái tásya veda yásyānājñātam iva jyóg āmáyati
Sentence: 9    prajā́patim evá svéna bʰāgadʰéyenópa dʰāvati
Sentence: 10    sá eváinaṃ tásmāt srā́mān muñcati
Sentence: 11    tūparó bʰavati
Sentence: 12    prājāpatyó hy èṣá devátayā
Sentence: 13    sámr̥ddʰyai //

Paragraph: 7 
Verse: 1 
Sentence: 1    vaṣaṭkāró vái gāyatriyái śíro 'cʰinat
Sentence: 2    tásyai rásaḥ párāpatat tám bŕ̥haspátir úpāgr̥hṇāt sā́ śitipr̥ṣṭʰā́ vaśā́bʰavat \
Sentence: 3    yó dvitī́yaḥ parā́patat tám mitrā́váruṇāv úpāgr̥hṇītāṁ sā́ dvirūpā́ vaśā́bʰavat \
Sentence: 4    yás tr̥tī́yaḥ parā́patat táṃ víśve devā́ úpāgr̥hṇant sā́ bahurūpā́ vaśā́bʰavat \
Sentence: 5    yáś caturtʰáḥ parā́patat sá pr̥tʰivī́m prā́viśat tám bŕ̥haspátir abʰí //

Verse: 2 
Sentence: 1    agr̥hṇāt \
Sentence: 2    ástv evā́yám bʰógāyéti sá ukṣavaśáḥ sám abʰavat \
Sentence: 3    yál lóhitam parā́patat tád rudrá úpāgr̥hṇāt sā́ raudrī́ róhiṇī vaśā́bʰavat \
Sentence: 4    bārhaspatyā́ṁ śitipr̥ṣṭʰā́m ā́ labʰeta brahmavarcasákāmas \
Sentence: 5    bŕ̥haspátim evá svéna bʰāgadʰéyenópa dʰāvati
Sentence: 6    sá evā́smin brahmavarcasáṃ dadʰāti
Sentence: 7    brahmavarcasy èvá bʰavati
Sentence: 8    cʰándasāṃ vā́ eṣá ráso yád vaśā́
Sentence: 9    rása iva kʰálu //

Verse: 3 
Sentence: 1    vái brahmavarcasám \
Sentence: 2    cʰándasām evá rásena rásam brahmavarcasám áva runddʰe
Sentence: 3    maitrāvaruṇī́ṃ dvirūpā́m ā́ labʰeta vŕ̥ṣṭikāmas \
Sentence: 4    maitráṃ vā́ áhar vāruṇī́ rā́tris \
Sentence: 5    ahorātrā́bʰyāṃ kʰálu vái parjányo varṣati
Sentence: 6    mitrā́váruṇāv evá svéna bʰāgadʰeyenópa dʰāvati
Sentence: 7    tā́v evā́smā ahorātrā́bʰyām parjányaṃ varṣayatas \
Sentence: 8    cʰándasāṃ vā́ eṣá ráso yád vaśā́
Sentence: 9    rása iva kʰálu vái vŕ̥ṣṭis \
Sentence: 10    cʰándasām evá rásena //

Verse: 4 
Sentence: 1    rásaṃ vŕ̥ṣṭim áva runddʰe
Sentence: 2    maitrāvaruṇī́ṃ dvirūpā́m ā́ labʰeta prajā́kāmas \
Sentence: 3    maitráṃ vā́ áhar vāruṇī́ rā́tris \
Sentence: 4    ahorātrā́bʰyāṃ kʰálu vái prajā́ḥ prá jāyante
Sentence: 5    mitrā́váruṇāv evá svéna bʰāgadʰéyenópa dʰāvati
Sentence: 6    tā́v evā́smā ahorātrā́bʰyām prajā́m prá janayatas \
Sentence: 7    cʰándasāṃ vā́ eṣá ráso yád vaśā́
Sentence: 8    rása iva kʰálu vái prajā́
Sentence: 9    cʰándasām evá rásena rásam prajā́m áva //

Verse: 5 
Sentence: 1    runddʰe
Sentence: 2    vaiśvadevī́m bahurūpā́m ā́ labʰetā́nnakāmas \
Sentence: 3    vaiśvadeváṃ vā́ ánnam \
Sentence: 4    víśvān evá devā́nt svéna bʰāgadʰéyenópa dʰāvati
Sentence: 5    tá evā́smā ánnam prá yacʰanti \
Sentence: 6    annādá evá bʰavati
Sentence: 7    cʰándasāṃ vā́ eṣá ráso yád vaśā́
Sentence: 8    rása iva kʰálu vā́ ánnam \
Sentence: 9    cʰándasām evá rásena rásam ánnam áva runddʰe
Sentence: 10    vaiśvadevī́m bahurūpā́m ā́ labʰeta grāmákāmas \
Sentence: 11    vaiśvadevā́ vái //

Verse: 6 
Sentence: 1    sajātā́s \
Sentence: 2    víśvān evá devā́nt svéna bʰāgadʰéyenópa dʰāvati
Sentence: 3    tá evā́smai sajātā́n prá yacʰanti
Sentence: 4    grāmy èvá bʰavati
Sentence: 5    cʰándasāṃ vā́ eṣá ráso yád vaśā́
Sentence: 6    rása iva kʰálu vái sajātā́s \
Sentence: 7    cʰándasām evá rásena rásaṁ sajātā́n áva runddʰe
Sentence: 8    bārhaspatyám ukṣavaśám ā́ labʰeta brahmavarcasákāmas \
Sentence: 9    bŕ̥haspátim evá svéna bʰāgadʰéyenópa dʰāvati
Sentence: 10    sá evā́smin brahmavarcasám //

Verse: 7 
Sentence: 1    dadʰāti
Sentence: 2    brahmavarcasy èvá bʰavati
Sentence: 3    váśaṃ vā́ eṣá carati yád ukṣā́
Sentence: 4    váśa iva kʰálu vái brahmavarcasám \
Sentence: 5    váśenaivá váśam brahmavarcasám áva runddʰe
Sentence: 6    raudrī́ṁ róhiṇīm ā́ labʰetābʰicáran
Sentence: 7    rudrám evá svéna bʰāgadʰéyenópa dʰāvati
Sentence: 8    tásmā eváinam ā́ vr̥ścati
Sentence: 9    tājág ā́rtim ā́rcʰati
Sentence: 10    róhiṇī bʰavati raudrī́ hy èṣā́ devátayā sámr̥ddʰyai
Sentence: 11    spʰyó yū́po bʰavati vájro vái spʰyó vájram evā́smai prá harati
Sentence: 12    śaramáyam barhíḥ śr̥ṇā́ty eváinam \
Sentence: 13    váibʰīdaka idʰmó bʰinátty eváinam //

Paragraph: 8 
Verse: 1 
Sentence: 1    asā́v ādityó ná vy àrocata
Sentence: 2    tásmai devā́ḥ prā́yaścittim aicʰan
Sentence: 3    táyaivā́smin rúcam adadʰus \
Sentence: 4    {F yó} {W yo} {GLOS yó} brahmavarcasákāmaḥ syā́t tásmā etā́ṁ saurī́ṁ śvetā́ṃ vaśā́m ā́ labeta \
Sentence: 5    amúm evā́dityáṁ svéna bʰāgadʰéyenópa dʰāvati
Sentence: 6    sá evā́smin brahmavarcasáṃ dadʰāti
Sentence: 7    brahmavarcasy èvá bʰavati
Sentence: 8    bailvó yū́po bʰavati \
Sentence: 9    asáu //

Verse: 2 
Sentence: 1    vā́ ādityó yátó 'jāyata táto bilvà úd atiṣṭʰat
Sentence: 2    sáyony evá brahmavarcasám áva runddʰe
Sentence: 3    brāhmaṇaspatyā́m babʰrukarṇī́m ā́ labʰetābʰicáran
Sentence: 4    vāruṇáṃ dáśakapālam purástān nír vapet \
Sentence: 5    váruṇenaivá bʰrā́tr̥vyaṃ grāhayitvā́ bráhmaṇā str̥ṇute
Sentence: 6    babʰrukarṇī́ bʰavati \
Sentence: 7    etád vái bráhmaṇo rūpám \
Sentence: 8    sámr̥ddʰyai
Sentence: 9    spʰyó yū́po bʰavati vájro vái spʰyó vájram evā́smai prá harati
Sentence: 10    śaramáyam barhíḥ śr̥ṇā́ti //

Verse: 3 
Sentence: 1    eváinam \
Sentence: 2    váibʰīdaka idʰmó bʰinátty eváinam / vaiṣṇaváṃ vāmanám ā́ labʰeta yáṃ yajñó nópanámet \
Sentence: 3    víṣṇur vái yajñás \
Sentence: 4    víṣṇum evá svéna bʰāgadʰéyenópa dʰāvati
Sentence: 5    sá evā́smai yajñám prá yacʰati \
Sentence: 6    úpainaṃ yajñó namati
Sentence: 7    vāmanó bʰavati
Sentence: 8    vaiṣṇavó hy èṣá devátayā
Sentence: 9    sámr̥ddʰyai
Sentence: 10    tvāṣṭráṃ vaḍabám ā́ labʰeta paśukāmas
Sentence: 11    tváṣṭā vái paśūnā́m mitʰunā́nām //

Verse: 4 
Sentence: 1    prajanayitā́
Sentence: 2    tváṣṭāram evá svéna bʰāgadʰéyenópa dʰāvati
Sentence: 3    sá evā́smai paśū́n mitʰunā́n prá janayati
Sentence: 4    prajā́ hí vā́ etásmin paśávaḥ práviṣṭās \
Sentence: 5    átʰaiṣá pumā́nt sán vaḍabáḥ sākṣā́d evá prajā́m paśū́n áva runddʰe
Sentence: 6    maitráṁ śvetám ā́ labʰeta saṃgrāmé sáṃyatte samayákāmas \
Sentence: 7    mitrám evá svéna bʰāgadʰéyenópa dʰāvati
Sentence: 8    sá eváinam mitréṇa sáṃ nayati //

Verse: 5 
Sentence: 1    viśāló bʰavati
Sentence: 2    vyávasāyayaty eváinam
Sentence: 3    prājāpatyáṃ kr̥ṣṇám ā́ labʰeta vŕ̥ṣṭikāmaḥ
Sentence: 4    prajā́patir vái vŕ̥ṣṭyā īṣe
Sentence: 5    prajā́patim evá svéna bʰāgadʰéyenópa dʰāvati
Sentence: 6    sá evā́smai prajányaṃ varṣayati
Sentence: 7    kr̥ṣṇó bʰavati \
Sentence: 8    etád vái vŕ̥ṣṭyai rūpám \
Sentence: 9    rūpéṇaivá vŕ̥ṣṭim áva runddʰe
Sentence: 10    śabálo bʰavati
Sentence: 11    vidyútam evā́smai janayitvā́ varṣayati \
Sentence: 12    avāśr̥ṅgó bʰavati
Sentence: 13    vŕ̥ṣṭim evā́smai ní yacʰati //

Paragraph: 9 
Verse: 1 
Sentence: 1    váruṇaṁ suṣuvāṇám annā́dyaṃ nópānamat
Sentence: 2    sá etā́ṃ vāruṇī́ṃ kr̥ṣṇā́ṃ vaśā́m apaśyat
Sentence: 3    tā́ṁ svā́yai devátāyā ā́labʰata táto vái tám annā́dyam úpānamat \
Sentence: 4    yám álam annā́dyāya sántam annā́dyaṃ nópanámet sá etā́ṃ vāruṇī́ṃ kr̥ṣṇā́ṃ vaśā́m ā́ labʰeta
Sentence: 5    váruṇam evá svéna bʰāgadʰéyenópa dʰāvati sá evā́smā ánnam prá yacʰaty annādáḥ //

Verse: 2 
Sentence: 1    evá bʰavati
Sentence: 2    kr̥ṣṇā́ bʰavati
Sentence: 3    vāruṇī́ hy èṣā́ devátayā
Sentence: 4    sámr̥ddʰyai
Sentence: 5    maitráṁ śvetám ā́ labʰeta vāruṇáṃ kr̥ṣṇám apā́ṃ cáuṣadʰīnāṃ ca saṃdʰā́v ánnakāmas \
Sentence: 6    maitrī́r vā́ óṣadʰayo vāruṇī́r ā́pas \
Sentence: 7    apā́ṃ ca kʰálu vā́ óṣadʰīnāṃ ca rásam úpa jīvāmas \
Sentence: 8    mitrā́váruṇāv evá svéna bʰāgadʰéyenópa dʰāvati
Sentence: 9    tā́v evā́smā ánnam prá yacʰato 'nnādá evá bʰavati //

Verse: 3 
Sentence: 1    apā́ṃ cáuṣadʰīnāṃ ca saṃdʰā́v ā́ labʰata ubʰáyasyā́varuddʰyai
Sentence: 2    maitráṁ śvetám ā́ labʰeta vāruṇáṃ kr̥ṣṇáṃ jyógāmayāvī
Sentence: 3    yán maitró bʰávati mitréṇaivā́smai váruṇaṁ śamayati
Sentence: 4    yád vāruṇáḥ sākṣā́d eváinaṃ varuṇapāśā́n muñcati \
Sentence: 5    utá yádītā́sur bʰávati jī́vaty evá
Sentence: 6    devā́ vái púṣṭiṃ nā́vindan //

Verse: 4 
Sentence: 1    tā́m mitʰunè 'paśyan
Sentence: 2    tásyām ná sám arādʰayan
Sentence: 3    tā́v aśvínāv abrūtām
Sentence: 4    āváyor vā́ eṣā́ máitásyāṃ vadadʰvam íti
Sentence: 5    sā́śvínor evā́bʰavat \
Sentence: 6    yáḥ púṣṭikāmaḥ syā́t sá etā́m āśvinī́ṃ yamī́ṃ vaśā́m ā́ labʰeta \
Sentence: 7    aśvínāv evá svéna bʰāgadʰéyenópa dʰāvati
Sentence: 8    tā́v evā́smin púṣṭiṃ dʰattaḥ
Sentence: 9    púṣyati prajáyā paśúbʰiḥ //

Paragraph: 10 
Verse: 1 
Sentence: 1    āśvináṃ dʰūmrálalāmam ā́ labʰeta yó dúrbrāhmaṇaḥ sómam pípāset \
Sentence: 2    aśvínau vái devā́nām ásomapāv āstām \
Sentence: 3    táu paścā́ somapītʰám prā́pnutām
Sentence: 4    aśvínāv etásya devátā yó dúrbrāhmaṇaḥ sómam pípāsati \
Sentence: 5    aśvínāv evá svéna bʰāgadʰéyenópa dʰāvati
Sentence: 6    táv evā́smai somapītʰám prá yacʰata úpainaṁ somapītʰó namati
Sentence: 7    yád dʰūmró bʰávati dʰūmrimā́ṇam evā́smād ápa hanti
Sentence: 8    lalā́maḥ //

Verse: 2 
Sentence: 1    bʰavati mukʰatá evā́smin téjo dadʰāti
Sentence: 2    vāyavyàṃ gomr̥gám ā́ labʰeta yám ájagʰnivāṁsam abʰiśáṁseyus \
Sentence: 3    ápūtā vā́ etáṃ vā́g r̥cʰati yám ájagʰnivāṁsam abʰiśáṁsanti
Sentence: 4    náiṣá grāmyáḥ paśúr nā́raṇyó yád gomr̥gás \
Sentence: 5    névaiṣá grā́me nā́raṇye yám ájagʰnivāṁsam abʰiśáṁsanti
Sentence: 6    vāyúr vái devā́nām pavítram \
Sentence: 7    vāyúm evá svéna bʰāgadʰéyenópa dʰāvati
Sentence: 8    sá evá //

Verse: 3 
Sentence: 1    enam pavayati
Sentence: 2    párācī vā́ etásmai vyucʰántī vy ùcʰati támaḥ pāpmā́nam prá viśati yásyāśviné śasyámāne sū́ryo nā́vír bʰávati
Sentence: 3    sauryám bahurūpám ā́ labʰeta \
Sentence: 4    amúm evā́dityáṁ svéna bʰāgadʰéyenópa dʰāvati
Sentence: 5    sá evā́smāt támaḥ pāpmā́nam ápa hanti
Sentence: 6    pratī́cy asmai vyucʰántī vy ùcʰaty ápa támaḥ pāpmā́naṁ hate //

Paragraph: 11 
Verse: 1 
Sentence: 1=a    índraṃ vo viśvátas pári \
Sentence: 2=b    índraṃ náras \
Sentence: 3=c    máruto yád dʰa vo divás \
Sentence: 4=d    yā́ vaḥ śárma
Sentence: 5=e    bʰáreṣv índraṁ suhávaṁ havāmaheṁhomúcaṁ sukŕ̥taṃ dáivyaṃ jánam / agním mitráṃ váruṇaṁ sātáye bʰágaṃ dyā́vāpr̥tʰivī́ marútaḥ svastáye //
Sentence: 6=f    mamáttu naḥ párijmā vasarhā́ mamáttu vā́to apā́ṃ vŕ̥ṣaṇvān / śiśītám indrāparvatā yuváṃ nas tán no víśve varivasyantu devā́ḥ
Sentence: 7=g    priyā́ vo nā́ma //

Verse: 2 
Sentence: 1    huve turā́ṇām / ā́ yát tr̥pán maruto vāvaśānā́ḥ //
Sentence: 2=h    śriyáse kám bʰānúbʰiḥ sám mimikṣire té raśmíbʰis tá ŕ̥kvabʰiḥ sukʰādáyaḥ / té vā́śīmanta iṣmíṇo ábʰīravo vidré priyásya mā́rutasya dʰā́mnaḥ //
Sentence: 3=i    agníḥ pratʰamó vásubʰir no avyāt sómo rudrébʰir abʰí rakṣatu tmánā / índro marúdbʰir r̥tudʰā́ kr̥ṇotv ādityáir no váruṇaḥ sáṁ śiśātu //
Sentence: 4=k    sáṃ no devó vásubʰir agníḥ sám //

Verse: 3 
Sentence: 1    sómas tanū́bʰī rudríyābʰiḥ / sám índro marúdbʰir yajñíyaiḥ sám ādityáir no váruṇo ajijñipat //
Sentence: 2=l    yátʰādityā́ vásubʰiḥ sambabʰūvúr marúdbʰī rudrā́ḥ samájānatābʰí / evā́ triṇāmann áhr̥ṇīyamānā víśve devā́ḥ sámanaso bʰavantu
Sentence: 3=m    kútrā cid yásya sámr̥tau raṇvā́ náro nr̥ṣádane / árhantaś cid yám indʰaté saṃjanáyanti jantávaḥ //
Sentence: 4=n    sáṃ yád iṣó vánāmahe sáṁ havyā́ mā́nuṣāṇām / utá dyumnásya śávasaḥ //

Verse: 4 
Sentence: 1    r̥tásya raśmím ā́ dade //
Sentence: 2=o    yajñó devā́nām práty eti sumnám ā́dityāso bʰávatā mr̥ḍayántaḥ / ā́ vo 'rvā́cī sumatír vavr̥tyād aṁhóś cid yā́ varivovíttarā́sat //
Sentence: 3=p    śúcir apáḥ sūyávasā ádabdʰa úpa kṣeti vr̥ddʰávayāḥ suvī́raḥ / nákiṣ ṭáṃ gʰnanty ántito ná dūrā́d yá ādityā́nām bʰávati práṇītau //
Sentence: 4=q    dʰāráyanta ādityā́so jágat stʰā́ devā́ víśvasya bʰúvanasya gopā́ḥ / dīrgʰā́dʰiyo rákṣamāṇāḥ //

Verse: 5 
Sentence: 1    asuryàm r̥tā́vānaś cáyamānā r̥ṇā́ni //
Sentence: 2=r    tisró bʰū́mīr dʰārayan trī́ṁr utá dyū́n trī́ṇi vratā́ vidátʰe antár eṣām / r̥ténādityā máhi vo mahitváṃ tád aryaman varuṇa mitra cā́ru //
Sentence: 3=s    tyā́n nú kṣatríyāṁ áva ādityā́n yāciṣāmahe sumr̥ḍīkā́ṁ abʰíṣṭaye //
Sentence: 4=t    ná dakṣiṇā́ ví cikite ná savyā́ ná prācī́nam ādityā nótá paścā́ / pākyā̀ cid vasavo dʰīryā̀ cit //

Verse: 6 
Sentence: 1    yuṣmā́nīto ábʰayaṃ jyótir aśyām //
Sentence: 2=u    ādityā́nām ávasā nū́tanena sakṣīmáhi śármaṇā śáṃtamena / anāgāstvé adititvé turā́sa imáṃ yajñáṃ dadʰatu śróṣamāṇāḥ //
Sentence: 3=v    imám me varuṇa śrudʰī hávam adyā́ ca mr̥ḍaya / tvā́m avasyúr ā́ cake //
Sentence: 4=w    tát tvā yāmi bráhmaṇā vándamānas tád ā́ śāste yájamāno havírbʰiḥ / áheḍamāno varuṇehá bodʰy úruśaṁsa mā́ na ā́yuḥ prá moṣīḥ //

Next part


This text is part of the TITUS edition of Black Yajur-Veda: Taittiriya-Samhita.

Copyright TITUS Project, Frankfurt a/M, 9.2.2018. No parts of this document may be republished in any form without prior permission by the copyright holder.