TITUS
Black Yajur-Veda: Taittiriya-Samhita
Part No. 10
Previous part

Chapter: 2 
Paragraph: 1 
Verse: 1 
Sentence: 1    prajā́patiḥ prajā́ asr̥jata
Sentence: 2    tā́ḥ sr̥ṣṭā́ indrāgnī́ ápāgūhatām \
Sentence: 3    sò 'cāyat prajā́patis \
Sentence: 4    indrāgnī́ vái me prajā́ ápāgʰukṣatām íti
Sentence: 5    sá etám aindrāgnám ékādaśakapālam apaśyat
Sentence: 6    táṃ nír avapat
Sentence: 7    tā́v asmai prajā́ḥ prā́sādʰayatām
Sentence: 8    indrāgnī́ vā́ etásya prajā́m ápa gūhato yó 'lam prajā́yai sán prajā́ṃ ná vindáte \
Sentence: 9    aindrāgnám ékādaśakapālaṃ nír vapet prajā́kāmas \
Sentence: 10    indrāgnī́ //

Verse: 2 
Sentence: 1    evá svéna bʰāgadʰéyenópa dʰāvati
Sentence: 2    tā́v evā́smai prajā́m prá sādʰayatas \
Sentence: 3    vindáte prajā́m
Sentence: 4    aindrāgnám ékādaśakapālaṃ nír vapet spárdʰamānaḥ kṣétre vā sajātéṣu vā \
Sentence: 5    indrāgnī́ evá svéna bʰāgadʰéyenópa dʰāvati
Sentence: 6    tā́bʰyām evéndriyáṃ vīryàm bʰrā́tr̥vyasya vr̥ṅkte
Sentence: 7    ví pāpmánā bʰrā́tr̥vyeṇa jayate \
Sentence: 8    ápa vā́ etásmād indriyáṃ vīryàṃ krāmati yáḥ saṃgrāmám upaprayā́ti \
Sentence: 9    aindrāgnám ékādaśakapālaṃ níḥ //

Verse: 3 
Sentence: 1    vapet saṃgrāmám upaprayāsyán \
Sentence: 2    indrāgnī́ evá svéna bʰāgadʰéyenópa dʰāvati
Sentence: 3    tā́v evā́sminn indriyáṃ vīryàṃ dʰattaḥ
Sentence: 4    sahéndriyéṇa vīryèṇópa prá yāti jáyati táṁ saṃgrāmám \
Sentence: 5    ví vā́ eṣá indriyéṇa vīryèṇardʰyate yáḥ saṃgrāmáṃ jáyati \
Sentence: 6    aindrāgnám ékādaśakapālaṃ nír vapet saṃgrāmáṃ jitvā́ \
Sentence: 7    indrāgnī́ evá svéna bʰāgadʰéyenópa dʰāvati
Sentence: 8    tā́v evā́sminn indriyáṃ vīryàm //

Verse: 4 
Sentence: 1    dʰatto néndriyéṇa vīryèṇa vy r̥̀dʰyate \
Sentence: 2    ápa vā́ etásmād indriyáṃ vīryàṃ krāmati yá éti janátām
Sentence: 3    aindrāgnám ékādaśakapālaṃ nír vapej janátām eṣyán \
Sentence: 4    indrāgnī́ evá svéna bʰāgadʰéyenópa dʰāvati
Sentence: 5    tā́v evā́sminn indriyáṃ vīryàṃ dʰattaḥ
Sentence: 6    sahéndriyéṇa vīryèṇa janátām eti
Sentence: 7    pauṣṇáṃ carúm ánu nír vapet
Sentence: 8    pūṣā́ vā́ indriyásya vīryàsyānupradātā́
Sentence: 9    pūṣáṇam evá //

Verse: 5 
Sentence: 1    svéna bʰāgadʰéyenópa dʰāvati
Sentence: 2    sá evā́smā indriyáṃ vīryàm ánu prá yacʰati
Sentence: 3    kṣaitrapatyáṃ carúṃ nír vapej janátām āgátya \
Sentence: 4    iyáṃ vái kṣétrasya pátis \
Sentence: 5    asyā́m evá práti tiṣṭʰati \
Sentence: 6    aindrāgnám ékādaśakapālam upáriṣṭān nír vapet \
Sentence: 7    asyā́m evá pratiṣṭʰā́yendriyáṃ vīryàm upáriṣṭād ātmán dʰatte //

Paragraph: 2 
Verse: 1 
Sentence: 1    agnáye patʰikŕ̥te puroḍā́śam aṣṭā́kapālaṃ nír vaped yó darśapūrṇamāsayājī́ sánn amāvāsyā̀ṃ vā paurṇamāsī́ṃ vātipādáyet
Sentence: 2    patʰó vā́ eṣó 'dʰy ápatʰenaiti yó darśapūrṇamāsayājī́ sánn amāvāyā̀ṃ vā paurṇamāsī́ṃ vātipādáyati \
Sentence: 3    agním evá patʰikŕ̥taṁ svéna bʰāgadʰéyenópa dʰāvati
Sentence: 4    sá eváinam ápatʰāt pántʰām ápi nayati \
Sentence: 5    anaḍvā́n dákṣiṇā vahī́ hy { èṣá ^ èṣás }
Sentence: 6    sámr̥ddʰyai
Sentence: 7    agnáye vratápataye //

Verse: 2 
Sentence: 1    puroḍā́śam aṣṭā́kapālaṃ nír vaped yá ā́hitāgniḥ sánn avratyám iva cáret \
Sentence: 2    agním evá vratápatiṁ svéna bʰāgadʰéyenópa dʰāvati
Sentence: 3    sá eváinaṃ vratám ā́ lambʰayati
Sentence: 4    vrátyo bʰavati \
Sentence: 5    agnáye rakṣogʰné puroḍā́śam aṣṭā́kapālaṃ nír vapati yáṁ rákṣāṁsi sáceran \
Sentence: 6    agním evá rakṣoháṇaṁ svéna bʰāgadʰéyenópa dʰāvati
Sentence: 7    sá evā́smād rákṣāṁsy apa hanti
Sentence: 8    níśitāyāṃ nír vapet //

Verse: 3 
Sentence: 1    níśitāyāṁ hí rákṣāṁsi preráte
Sentence: 2    samprerṇā́ny eváināni hanti
Sentence: 3    páriśrite yājayed rákṣasām ánanvavacārāya
Sentence: 4    rakṣogʰnī́ yājyānuvākyè bʰavato rákṣasāṁ stŕ̥tyai \
Sentence: 5    agnáye rudrávate puroḍā́śam aṣṭā́kapālaṃ nír vaped abʰicáran \
Sentence: 6    eṣā́ vā́ asya gʰorā́ tanū́r yád rudrás
Sentence: 7    tásmā eváinam ā́ vr̥ścati
Sentence: 8    tājág ā́rtim ā́rcʰati \
Sentence: 9    agnáye surabʰimáte puroḍā́śam aṣṭā́kapālaṃ nír vaped yásya gā́vo vā púruṣāḥ //

Verse: 4 
Sentence: 1    vā pramī́yeran yó vā bibʰīyā́t \
Sentence: 2    eṣā́ vā́ asya bʰeṣajyā̀ tanū́r yát surabʰimátī
Sentence: 3    táyaivā́smai bʰeṣajáṃ karoti
Sentence: 4    surabʰimáte bʰavati pūtīgandʰásyā́pahatyai \
Sentence: 5    agnáye kṣā́mavate puroḍā́śam aṣṭā́kapālaṃ nír vapet saṃgrāmé sáṃyatte
Sentence: 6    bʰāgadʰéyenaiváinaṁ śamayitvā́ párān abʰí nír diśati
Sentence: 7    yám ávareṣāṃ vídʰyanti jī́vati { sá ^ sás }
Sentence: 8    yám páreṣām prá sá mīyate
Sentence: 9    jáyati táṁ saṃgrāmám //

Verse: 5 
Sentence: 1    abʰí vā́ eṣá etā́n ucyati yéṣām pūrvāparā́ anváñcaḥ pramī́yante
Sentence: 2    puruṣāhutír hy àsya priyátamāgnáye kṣā́mavate puroḍā́śam aṣṭā́kapālaṃ nír vapet \
Sentence: 3    bʰāgadʰéyenaiváinaṁ śamayati
Sentence: 4    náiṣām purā́yuṣóparaḥ prá mīyate \
Sentence: 5    abʰí vā́ eṣá etásya gr̥hā́n ucyati yásya gr̥hā́n dáhati \
Sentence: 6    agnáye kṣā́mavate puroḍā́śam aṣṭā́kapālaṃ nír vapet \
Sentence: 7    bʰāgadʰéyenaiváinaṁ śamayati
Sentence: 8    nā́syā́paraṃ gr̥hā́n dahati //

Paragraph: 3 
Verse: 1 
Sentence: 1    agnáye kā́māya puroḍā́śam aṣṭā́kapālaṃ nír vaped yáṃ kā́mo nópanámet \
Sentence: 2    agním evá kā́maṁ svéna bʰāgadʰéyenópa dʰāvati
Sentence: 3    sá eváinaṃ kā́mena sám ardʰayati \
Sentence: 4    úpainaṃ kā́mo namati \
Sentence: 5    agnáye yáviṣṭʰāya puroḍā́śam aṣṭā́kapālaṃ nír vapet spárdʰamānaḥ kṣétre vā sajātéṣu vā \
Sentence: 6    agním evá yáviṣṭʰaṁ svéna bʰāgadʰéyenópa dʰāvati
Sentence: 7    ténaivéndriyáṃ vīryàm bʰrā́tr̥vyasya //

Verse: 2 
Sentence: 1    yuvate
Sentence: 2    ví pāpmánā bʰrā́tr̥vyeṇa jayate \
Sentence: 3    agnáye yáviṣṭʰāya puroḍā́śam aṣṭā́kapālaṃ nír vaped abʰicaryámāṇas \
Sentence: 4    agním evá yáviṣṭʰaṁ svéna bʰāgadʰéyenópa dʰāvati
Sentence: 5    sá evā́smād rákṣāṁsi yavayati
Sentence: 6    náinam abʰicárant str̥ṇute \
Sentence: 7    agnáya ā́yuṣmate puroḍā́śam aṣṭā́kapālaṃ nír vaped yáḥ kāmáyeta
Sentence: 8    sárvam ā́yur iyām íti \
Sentence: 9    agním evā́yuṣmantaṁ svéna bʰāgadʰéyenópa dʰāvati
Sentence: 10    sá evā́smin //

Verse: 3 
Sentence: 1    ā́yur dadʰāti
Sentence: 2    sárvam ā́yur eti \
Sentence: 3    agnáye jātávedase puroḍā́śam aṣṭā́kapālaṃ nír vaped bʰū́tikāmas \
Sentence: 4    agním evá jātávedasaṁ svéna bʰāgadʰéyenópa dʰāvati
Sentence: 5    sá eváinam bʰū́tiṃ gamayati
Sentence: 6    bʰávaty evá \
Sentence: 7    agnáye rúkmate puroḍā́śam aṣṭā́kapālaṃ nír vaped rúkkāmas \
Sentence: 8    agním evá rúkmantaṁ svéna bʰāgadʰéyenópa dʰāvati
Sentence: 9    sá evā́smin rúcaṃ dadʰāti
Sentence: 10    rócata evá \
Sentence: 11    agnáye téjasvate puroḍā́śam //

Verse: 4 
Sentence: 1    aṣṭā́kapālaṃ nír vapet téjaskāmas \
Sentence: 2    agním evá téjasvantaṁ svéna bʰāgadʰéyenópa dʰāvati
Sentence: 3    sá evā́smin téjo dadʰāti
Sentence: 4    tejasvy èvá bʰavati \
Sentence: 5    agnáye sāhantyā́ya puroḍā́śam aṣṭā́kapālaṃ nír vapet sī́kṣamāṇas \
Sentence: 6    agním evá sāhantyáṁ svéna bʰāgadʰéyenópa dʰāvati
Sentence: 7    ténaivá sahate yáṁ sī́kṣate //

Paragraph: 4 
Verse: 1 
Sentence: 1    agnáyé 'nnavate puroḍā́śam aṣṭā́kapālaṃ nír vaped yáḥ kāmáyetā́nnavānt syām íti \
Sentence: 2    agním evā́nnavantaṁ svéna bʰāgadʰéyenópa dʰāvati
Sentence: 3    sá eváinam ánnavantaṃ karoty ánnavān evá bʰavati \
Sentence: 4    agnáye 'nnādā́ya puroḍā́śam aṣṭā́kapālaṃ nír vaped yáḥ kāmáyetānnādáḥ syām íti \
Sentence: 5    agním evā́nnādáṁ svéna bʰāgadʰéyenópa dʰāvati
Sentence: 6    sá eváinam annādáṃ karoty annādáḥ //

Verse: 2 
Sentence: 1    evá bʰavati \
Sentence: 2    agnáyé 'nnapataye puroḍā́śam aṣṭā́kapālaṃ nír vaped yáḥ kāmáyetā́nnapatiḥ sayam íti \
Sentence: 3    agním evā́nnapatiṁ svéna bʰāgadʰéyenópa dʰāvati
Sentence: 4    sá eváinam ánnapatiṃ karoty ánnapatir evá bʰavati \
Sentence: 5    agnáye pávamānāya puroḍā́śam aṣṭā́kapālaṃ nír vaped agnáye pāvakā́yāgnáye śúcaye jyógāmayāvī
Sentence: 6    yád agnáye pávamānāya nirvápati
Sentence: 7    prāṇám evā́smin téna dadʰāti
Sentence: 8    yád agnáye //

Verse: 3 
Sentence: 1    pāvakā́ya
Sentence: 2    vā́cam evā́smin téna dadʰāti
Sentence: 3    yád agnáye śúcaye \
Sentence: 4    ā́yur evā́smin téna dadʰāty utá yádītā́sur bʰávati jī́vaty evá \
Sentence: 5    etā́m evá nír vapec cákṣuṣkāmo yád agnáye pávamānāya nirvápati
Sentence: 6    prāṇám evā́smin téna dadʰāti
Sentence: 7    yád agnáye pāvakā́ya
Sentence: 8    vā́cam evā́smin téna dadʰāti
Sentence: 9    yad agnáye śúcaye
Sentence: 10    cákṣur evā́smin téna dadʰāti //

Verse: 4 
Sentence: 1    utá yády andʰó bʰavati práivá paśyati \
Sentence: 2    agnáye putrávate puroḍā́śam aṣṭā́kapālaṃ nír vapet \
Sentence: 3    índrāya putríṇe puroḍā́śam ékādaśakapālam prajā́kāmas \
Sentence: 4    agnír evā́smai prajā́m prajanáyati
Sentence: 5    vr̥ddʰā́m índraḥ prá yacʰati \
Sentence: 6    agnáye rásavate 'jakṣīré carúṃ nír vaped yáḥ kāmáyeta rásavānt syām íti \
Sentence: 7    agním evá rásavantaṁ svéna bʰāgadʰéyenópa dʰāvati
Sentence: 8    sá eváinaṁ rásavantaṃ karoti //

Verse: 5 
Sentence: 1    rásavān evá bʰavaty ajakṣīré bʰavati \
Sentence: 2    āgneyī́ vā́ eṣā́ yád ajā́
Sentence: 3    sākṣā́d evá rásam áva runddʰe \
Sentence: 4    agnáye vásumate puroḍā́śam aṣṭā́kapālaṃ nír vaped yáḥ kāmáyeta vásumānt syām íti \
Sentence: 5    agním {F evá} {W eva} vásumantaṁ svéna bʰāgadʰéyenópa dʰāvati
Sentence: 6    sá eváinaṃ vásumantaṃ karoti vásumān evá bʰavati \
Sentence: 7    agnáye vājasŕ̥te puroḍā́śam aṣṭā́kapālaṃ nír vapet saṃgrāmé sáṃyatte
Sentence: 8    vā́jaṃ //

Verse: 6 
Sentence: 1    vā́ eṣá sisīrṣati yáḥ saṃgrāmáṃ jígīṣati \
Sentence: 2    agníḥ kʰálu vái devā́nāṃ vājasŕ̥d agním evá vājasŕ̥taṁ svéna bʰāgadʰéyenópa dʰāvati
Sentence: 3    dʰā́vati vā́jaṁ hánti vr̥tráṃ jáyati táṁ saṃgrāmám
Sentence: 4    átʰo agnír iva ná pratidʰŕ̥ṣe bʰavati \
Sentence: 5    agnáye 'gniváte puroḍā́śam aṣṭā́kapālaṃ nír vaped yásyāgnā́v agním abʰyuddʰáreyus \
Sentence: 6    nírdiṣṭabʰāgo vā́ etáyor anyó 'nirdiṣṭabʰāgo 'nyás táu sambʰávantau yájamānam //

Verse: 7 
Sentence: 1    abʰí sám bʰavatas \
Sentence: 2    sá īśvará ā́rtim ā́rtor yád agnáye 'gniváte nirvápati
Sentence: 3    bʰāgadʰéyenaiváinau śamayati
Sentence: 4    nā́rtim ā́rcʰati yájamānas \
Sentence: 5    agnáye jyótiṣmate puroḍā́śam aṣṭā́kapālaṃ nír vaped yásyāgnír úddʰr̥tó 'hute 'gnihotrá udvā́yed ápara ādī́pyānūddʰŕ̥tya íty āhus tát tátʰā ná kāryàṃ yád bʰāgadʰéyam abʰí pū́rva uddʰriyáte kím áparo 'bʰy út //

Verse: 8 
Sentence: 1    hriyetéti tā́ny evā́vakṣā́ṇāni saṃnidʰā́ya mantʰét \
Sentence: 2    itáḥ pratʰamáṃ jajñe agníḥ svā́d yóner ádʰi jātávedāḥ / sá gāyatriyā́ triṣṭúbʰā jágatyā devébʰyo havyáṃ vahatu prajānánn íti
Sentence: 3    cʰándobʰir eváinaṁ svā́d yóneḥ prá janayaty eṣá vā́vá sò 'gnír íty āhur jyótis tvā́ asya párāpatitam íti yád agnáye jyótiṣmate nirvápati yád evā́sya jyótiḥ párāpatitaṃ tád evā́va runddʰe //

Paragraph: 5 
Verse: 1 
Sentence: 1    vaiśvānaráṃ dvā́daśakapālaṃ nír vaped vāruṇáṃ carúṃ dadʰikrā́vṇe carúm abʰiśasyámānas \
Sentence: 2    yád vaiśvānaró dvā́daśakapālo bʰávati saṃvatsaró vā́ agnír vaiśvānaráḥ saṃvatsaréṇaiváinaṁ svadayaty ápa pāpáṃ várṇaṁ hate vāruṇénaiváinaṃ varuṇapāśā́n muñcati dadʰikrā́vṇā punāti
Sentence: 3    híraṇyaṃ dákṣiṇā pavítraṃ vái híraṇyam punā́ty eváinam ādyàm asyā́nnam bʰavati \
Sentence: 4    etā́m evá nír vapet prajā́kāmaḥ
Sentence: 5    saṃvatsaráḥ //

Verse: 2 
Sentence: 1    vā́ etásyā́śānto yónim prajā́yai paśūnā́ṃ nír dahati yó 'lam prajā́yai sán prajā́ṃ ná vindáte
Sentence: 2    yád vaiśvānaró dvā́daśakapālo bʰávati saṃvatsaró vā́ agnír vaiśvānaráḥ saṃvatsarám evá bʰāgadʰéyena śamayati sò 'smai śāntáḥ svā́d yóneḥ prajā́m prá {F janayati} {W janayaty} {GLOS janayati} vāruṇénaiváinaṃ varuṇapāśā́n muñcati dadʰikrā́vṇā punāti
Sentence: 3    híraṇyaṃ dákṣiṇā pavítraṃ vái híraṇyam punā́ty eváinam //

Verse: 3 
Sentence: 1    vindáte prajā́m \
Sentence: 2    vaiśvānaráṃ dvā́daśakapālaṃ nír vapet putré jāté
Sentence: 3    yád aṣṭā́kapālo bʰávati gāyatriyáiváinam brahmavarcaséna punāti yán návakapālas trivŕ̥taivā́smin téjo dadʰāti yád dáśakapālo virā́jaivā́sminn annā́dyaṃ dadʰāti yád ékādaśakapālas tr̥ṣṭúbʰaivā́sminn indriyáṃ dadʰāti yád dvā́daśakapālo jágatyaivā́smin paśū́n dadʰāti
Sentence: 4    yásmiñ jātá etā́m íṣṭim nirvápati pūtáḥ //

Verse: 4 
Sentence: 1    evá tejasy ànnādá indriyāvī́ paśumā́n bʰavati \
Sentence: 2    áva vā́ eṣá suvargā́l lokā́c cʰidyate yó darśapūrṇamāsayājī́ sánn amāvāsyā̀ṃ vā paurṇamāsī́ṃ vātipādáyati suvargā́ya hí lokā́ya darśapūrṇamāsā́v ijyéte
Sentence: 3    vaiśvānaráṃ dvā́daśakapālaṃ nír vaped amāvāsyā̀ṃ vā paurṇamāsī́ṃ vātipā́dya
Sentence: 4    saṃvatsaró vā́ agnír vaiśvānaráḥ saṃvatsarám evá prīṇāty átʰo saṃvatsarám evā́smā úpa dadʰāti suvargásya lokásya sámaṣṭyai //

Verse: 5 
Sentence: 1    átʰo devátā evā́nvārábʰya suvargáṃ lokám eti
Sentence: 2    vīrahā́ vā́ eṣá devā́nāṃ yò 'gním udvāsáyate ná vā́ etásya brāhmaṇā́ r̥tāyávaḥ purā́nnam akṣan \
Sentence: 3    āgneyám aṣṭā́kapālaṃ nír vapet \
Sentence: 4    vaiśvānaráṃ dvā́daśakapālam agním udvāsayiṣyán
Sentence: 5    yád aṣṭā́kapālo bʰávaty aṣṭā́kṣarā gāyatrī́ gāyatrò 'gnír yā́vān evā́gnís tásmā ātitʰyáṃ karoti \
Sentence: 6    átʰo yátʰā jánaṃ yatè 'vasáṃ karóti tādŕ̥k //

Verse: 6 
Sentence: 1    evá tát \
Sentence: 2    dvā́daśakapālo vaiśvānaró bʰavati
Sentence: 3    dvā́daśa mā́sāḥ saṃvatsaráḥ saṃvatsaráḥ kʰálu vā́ agnér yóniḥ svā́m eváinaṃ yóniṃ gamayati \
Sentence: 4    ādyàm asyā́nnam bʰavati
Sentence: 5    vaiśvānaráṃ dvā́daśakapālaṃ nír vapen mārutáṁ saptákapālaṃ grā́makāmas \
Sentence: 6    āhavanī́ye vaiśvānarám ádʰi śrayati gā́rhapatye mārutám pāpavasyasásya vídʰr̥tyai
Sentence: 7    dvā́daśakapālo vaiśvānaró bʰavati dvā́daśa mā́sāḥ saṃvatsaráḥ saṃvatsaréṇaivā́smai sajātā́ṁś cyāvayati
Sentence: 8    mārutó bʰavati //

Verse: 7 
Sentence: 1    marúto vái devā́nāṃ víśo devaviśénaivā́smai manuṣyaviśám áva runddʰe
Sentence: 2    saptákapālo bʰavati saptágaṇā vái marúto gaṇaśá evā́smai sajātā́n áva runddʰe \
Sentence: 3    anūcyámāna ā́ sādayati
Sentence: 4    víśam evā́smā ánuvartmānaṃ karoti //

Paragraph: 6 
Verse: 1 
Sentence: 1    ādityáṃ carúṃ nír vapet saṃgrāmám upaprayāsyán \
Sentence: 2    iyáṃ vā́ áditis \
Sentence: 3    asyā́m evá pū́rve práti tiṣṭʰanti
Sentence: 4    vaiśvānaráṃ dvā́daśakapālaṃ nír vaped āyátanaṃ gatvā́
Sentence: 5    saṃvatsaró vā́ agnír vaiśvānaráḥ
Sentence: 6    saṃvatsaráḥ kʰálu vái devā́nām āyátanam
Sentence: 7    etásmād vā́ āyátanād devā́ ásurān ajayan
Sentence: 8    yád vaiśvānaráṃ dvā́daśakapālaṃ nirvápati
Sentence: 9    devā́nām evā́yátane yatate
Sentence: 10    jáyati táṁ saṃgrāmám
Sentence: 11    etásmin vā́ etáu mr̥jāte //

Verse: 2 
Sentence: 1    yó vidviṣāṇáyor ánnam átti
Sentence: 2    vaiśvānaráṃ dvā́daśakapālaṃ nír vaped vidviṣāṇáyor ánnaṃ jagdʰvā́
Sentence: 3    saṃvatsaró vā́ agnír vaiśvānaráḥ
Sentence: 4    saṃvatsarásvaditam evā́tti
Sentence: 5    nā́smin mr̥jāte
Sentence: 6    saṃvatsarā́ya vā́ etáu sám amāte yáu samamā́te
Sentence: 7    táyor yáḥ pū́rvo 'bʰidrúhyati táṃ váruṇo gr̥hṇāti
Sentence: 8    vaiśvānaráṃ dvā́daśakapālaṃ nír vapet samamānáyoḥ pū́rvo 'bʰidrúhya
Sentence: 9    saṃvatsaró vā́ agnír vaiśvānaráḥ
Sentence: 10    samvatsarám evā́ptvā́ nirvaruṇám //

Verse: 3 
Sentence: 1    parástād abʰí druhyati náinaṃ váruṇo gr̥hṇāti \
Sentence: 2    āvyàṃ vā́ eṣá práti gr̥hṇāti yó 'vim pratigr̥hṇā́ti
Sentence: 3    vaiśvānaráṃ dvā́daśakapālaṃ nír vaped ávim pratigŕ̥hya
Sentence: 4    saṃvatsaró vā́ agnír vaiśvānaráḥ
Sentence: 5    saṃvatsarásvaditām evá prátigr̥hṇāti
Sentence: 6    nā́vyàm práti gr̥hṇāti \
Sentence: 7    ātmáno vā́ eṣá mā́trām āpnoti yá ubʰayā́dat pratigr̥hṇā́ty áśvaṃ vā púruṣaṃ vā
Sentence: 8    vaiśvānaráṃ dvā́daśakapālaṃ nír vaped ubʰayā́dat //

Verse: 4 
Sentence: 1    pratigŕ̥hya
Sentence: 2    saṃvatsaró vā́ agnír vaiśvānaráḥ
Sentence: 3    saṃvatsarásvaditam evá práti gr̥hṇāti
Sentence: 4    nā́tmáno mā́trām āpnoti
Sentence: 5    vaiśvānaráṃ dvā́daśakapālaṃ nír vapet saním eṣyán \
Sentence: 6    saṃvatsaró vā́ agnír vaiśvānarás \
Sentence: 7    yadā́ kʰálu vái saṃvatsaráṃ janátāyāṃ cáraty átʰa sá dʰanārgʰó bʰavati
Sentence: 8    yád vaiśvānaráṃ dvā́daśakapālaṃ nirvápati saṃvatsarásātām evá saním abʰí prá cyavate
Sentence: 9    dā́nakāmā asmai prajā́ bʰavanti
Sentence: 10    yó vái saṃvatsarám //

Verse: 5 
Sentence: 1    prayújya ná vimuñcáty apratiṣṭʰānó vái sá bʰavati \
Sentence: 2    etám evá vaiśvānarám púnar āgátya nír vapet \
Sentence: 3    yám evá prayuṅkté tám bʰāgadʰéyena ví muñcati prátiṣṭʰityai
Sentence: 4    yáyā rájjvottamā́ṃ gā́m ājét tā́m bʰrā́tr̥vyāya prá hiṇuyāt \
Sentence: 5    nírr̥tim evā́smai prá hiṇoti //

Paragraph: 7 
Verse: 1 
Sentence: 1    aindráṃ carúṃ nír vapet paśúkāmas \
Sentence: 2    aindrā́ vái paśávas \
Sentence: 3    índram evá svéna bʰāgadʰéyenópa dʰāvati
Sentence: 4    sá evā́smai paśū́n prá yacʰati
Sentence: 5    paśumā́n evá bʰavati
Sentence: 6    carúr bʰavati
Sentence: 7    svā́d evā́smai yóneḥ paśū́n prá janayati \
Sentence: 8    índrāyendriyā́vate puroḍā́śam ékādaśakapālaṃ nír vapet paśúkāmas \
Sentence: 9    indriyáṃ vái paśávas \
Sentence: 10    índram evéndriyā́vantaṁ svéna bʰāgadʰéyenópa dʰāvati
Sentence: 11    sáḥ //

Verse: 2 
Sentence: 1    evā́smā indriyám paśū́n prá yacʰati
Sentence: 2    paśumā́n evá bʰavati \
Sentence: 3    índrāya gʰarmávate puroḍā́śam ékādaśakapālaṃ nír vaped brahmavarcasákāmas \
Sentence: 4    brahmavarcasáṃ vái gʰarmás \
Sentence: 5    índram evá gʰarmávantaṁ svéna bʰāgadʰéyenópa dʰāvati
Sentence: 6    sá evā́smin brahmavarcasáṃ dadʰāti
Sentence: 7    brahmavarcasy èvá bʰavati \
Sentence: 8    índrāyārkávate puroḍā́śam ékādaśakapālaṃ nír vaped ánnakāmas \
Sentence: 9    arkó vái devā́nām ánnam
Sentence: 10    índram evā́rkávantaṁ svéna bʰāgadʰéyena //

Verse: 3 
Sentence: 1    úpa dʰāvati
Sentence: 2    sá evā́smā ánnam prá yacʰati \
Sentence: 3    annādá evá bʰavati \
Sentence: 4    índrāya gʰarmávate puroḍā́śam ékādaśakapālaṃ nír vaped índrāyendriyā́vata índrāyārkávate bʰū́tikāmas \
Sentence: 5    yád índrāya gʰarmávate nirvápati śíra evā́sya téna karoti
Sentence: 6    yád índrāyendriyā́vata ātmā́nam evā́sya téna karoti
Sentence: 7    yád índrāyārkávate bʰūtá evā́nnā́dye práti tiṣṭʰati bʰávaty evá \
Sentence: 8    índrāya //

Verse: 4 
Sentence: 1    aṁhomúce puroḍā́śam ékādaśakapālaṃ nír vaped yáḥ pāpmánā gr̥hītáḥ syā́t
Sentence: 2    pāpmā́ vā́ áṁhas \
Sentence: 3    índram evā́ṁhomúcaṁ svéna bʰāgadʰéyenópa dʰāvati
Sentence: 4    sá eváinam pāpmánó 'ṁhaso muñcati \
Sentence: 5    índrāya vaimr̥dʰā́ya puroḍā́śam ékādaśakapālaṃ nír vaped yám mŕ̥dʰo 'bʰí pravéperan rāṣṭrā́ṇi vābʰí samiyús \
Sentence: 6    índram evá vaimr̥dʰáṁ svéna bʰāgadʰéyenópa dʰāvati
Sentence: 7    sá evā́smān mŕ̥dʰaḥ //

Verse: 5 
Sentence: 1    ápa hanti \
Sentence: 2    índrāya trātré puroḍā́śam ékādaśakapālaṃ nír vaped baddʰó vā páriyatto vā \
Sentence: 3    índram evá trātā́raṁ svéna bʰāgadʰéyenópa dʰāvati
Sentence: 4    sá eváinaṃ trāyate \
Sentence: 5    índrāyārkāśvamedʰávate puroḍā́śam ékādaśakapālaṃ nír vaped yám mahāyajñó nópanámet \
Sentence: 6    eté vái mahāyajñásyāntye tanū́ yád arkāśvamedʰáu \
Sentence: 7    índram evā́rkāśvamedʰávantaṁ svéna bʰāgadʰéyenópa dʰāvati
Sentence: 8    sá evā́smā antató mahāyajñáṃ cyāvayati \
Sentence: 9    úpainaṃ mahāyajñó namati //

Paragraph: 8 
Verse: 1 
Sentence: 1    índrāyā́nvr̥jave puroḍā́śam ékādaśakapālaṃ nír vaped grā́makāmas \
Sentence: 2    índram evā́nvr̥juṁ svéna bʰāgadʰéyenópa dʰāvati
Sentence: 3    sá evā́smai sajātā́n ánukān karoti
Sentence: 4    grāmy èvá bʰavati \
Sentence: 5    indrāṇyái carúṃ nír vaped yásya sénā́saṁśiteva syā́t \
Sentence: 6    indrāṇī́ vái sénāyai devátā \
Sentence: 7    indrāṇī́ṃ evá svéna bʰāgadʰéyenópa dʰāvati
Sentence: 8    sáivā́sya sénāṁ sáṁ śyati
Sentence: 9    bálbajān ápi //

Verse: 2 
Sentence: 1    idʰmé sáṃ nahyet \
Sentence: 2    gáur yátrā́dʰiṣkannā nyámehat táto bálbajā úd atiṣṭʰan
Sentence: 3    gávām eváinaṃ nyāyám apinī́ya gā́ vedayati \
Sentence: 4    índrāya manyumáte mánasvate puroḍā́śam ékādaśakapālaṃ nír vapet saṃgrāmé sáṃyatte \
Sentence: 5    indriyéṇa vái manyúnā mánasā saṃgrāmáṃ jayati \
Sentence: 6    índram evá manyumántam mánasvantaṁ svéna bʰāgadʰéyenópa dʰāvati
Sentence: 7    sá evā́sminn indriyám manyúm máno dadʰāti
Sentence: 8    jáyati tám //

Verse: 3 
Sentence: 1    saṃgrāmám
Sentence: 2    etā́m evá nír vaped yó hatámanāḥ svayámpāpa iva syā́t \
Sentence: 3    etā́ni hí vā́ etásmād ápakrāntāni \
Sentence: 4    átʰaiṣá hatámanāḥ svayámpāpa índram evá manyumántam mánasvantaṁ svéna bʰāgadʰéyenópa dʰāvati
Sentence: 5    sá evā́sminn indriyám manyúm máno dadʰāti
Sentence: 6    ná hatámanāḥ svayámpāpo bʰavati \
Sentence: 7    índrāya dātré puroḍā́śam ékādaśakapālaṃ nír vaped yáḥ kāmáyeta
Sentence: 8    dā́nakāmā me prajā́ḥ syuḥ //

Verse: 4 
Sentence: 1    íti \
Sentence: 2    índram evá dātā́raṁ svéna bʰāgadʰéyenópa dʰāvati
Sentence: 3    sá evā́smai dā́nakāmāḥ prajā́ḥ karoti
Sentence: 4    dā́nakāmā asmai prajā́ bʰavanti \
Sentence: 5    índrāya pradātré puroḍāśam ékādaśakapālaṃ nír vaped yásmai práttam iva sán ná pradīyéta \
Sentence: 6    índram evá pradātā́raṁ svéna bʰāgadʰéyenópa dʰāvati
Sentence: 7    sá evā́smai prá dāpayati \
Sentence: 8    índrāya sutrā́mṇe puroḍā́śam ékādaśakapālaṃ nír vaped áparuddʰo vā //

Verse: 5 
Sentence: 1    aparudʰyámāno vā \
Sentence: 2    índram evá sutrā́māṇaṁ svéna bʰāgadʰéyenópa dʰāvati
Sentence: 3    sá eváinaṃ trāyate \
Sentence: 4    anaparudʰyó bʰavati \
Sentence: 5    índro vái sadŕ̥ṅ devátābʰir āsīt
Sentence: 6    sá ná vyāvŕ̥tam agacʰat
Sentence: 7    sá prajā́patim úpādʰāvat
Sentence: 8    tásmā etám aindrám ékādaśakapālaṃ nír avapat
Sentence: 9    ténaivā́sminn indriyám adadʰāt \
Sentence: 10    śakvarī yājyānuvākyè akarot \
Sentence: 11    vájro vái śákvarī
Sentence: 12    sá enaṃ vájro bʰū́tyā ainddʰa //

Verse: 6 
Sentence: 1    sò 'bʰavat
Sentence: 2    sò 'bibʰed bʰūtáḥ
Sentence: 3    prá mā dʰakṣyatī́ti
Sentence: 4    sá prajā́patim púnar úpādʰāvat
Sentence: 5    sá prajā́patiḥ śákvaryā ádʰi revátīṃ nír amimīta śā́ntyā ápradāhāya
Sentence: 6    yó 'laṁ śriyái sánt sadŕ̥ṅk samānáiḥ syā́t tásmā etám aiṁdrám ékādaśakapālaṃ nír vapet \
Sentence: 7    índram evá svéna bʰāgadʰéyenópa dʰāvati
Sentence: 8    sá evā́sminn indriyáṃ dadʰāti
Sentence: 9    revátī puro'nuvākyā̀ bʰavati śā́ntyā ápradāhāya
Sentence: 10    śákvarī yājyā̀
Sentence: 11    vájro vái śákvarī
Sentence: 12    sá enaṃ vájro bʰū́tyā inddʰe
Sentence: 13    bʰávaty evá //

Paragraph: 9 
Verse: 1 
Sentence: 1    āgnāvaiṣṇavám ékādaśakapālaṃ nír vaped abʰicárant sárasvaty ā́jyabʰāgā syād bārhaspatyáś carús \
Sentence: 2    yád āgnāvaiṣṇavá ékādaśakapālo bʰávati \
Sentence: 3    agníḥ sárvā devátā víṣṇur yajñó devátābʰiś caiváinaṃ yajñéna cābʰí carati
Sentence: 4    sárasvaty ā́jyabʰāgā bʰavati vā́g vái sárasvatī vācáiváinam abʰí carati
Sentence: 5    bārhaspatyáś carúr bʰavati bráhma vái devā́nām bŕ̥haspátir bráhmaṇaiváinam abʰí carati //

Verse: 2 
Sentence: 1    práti vái parástād abʰicárantam abʰí caranti
Sentence: 2    dvédve puró'nuvākyè kuryād áti práyuktyai \
Sentence: 3    etáyaivá yajetābʰicaryámāṇó devátābʰir evá devátāḥ praticárati yajñéna yajñáṃ vācā́ vā́cam bráhmaṇā bráhma sá devátāś caivá yajñáṃ ca madʰyató vyávasarpati tásya ná kútaś canópāvyādʰó bʰavati
Sentence: 4    náinam abʰicárant str̥ṇute \
Sentence: 5    āgnāvaiṣṇavám ékādaśakapālaṃ nír vaped yáṃ yajñó ná //

Verse: 3 
Sentence: 1    upanámet \
Sentence: 2    agníḥ sárvā devátā víṣṇur yajñò 'gníṃ caivá víṣṇuṃ ca svéna bʰāgadʰéyenópa dʰāvati tā́v evā́smai yajñám prá yacʰata úpainaṃ yajñó namati \
Sentence: 3    āgnāvaiṣṇaváṃ gʰr̥té carúṃ nír vapec cákṣuṣkāmas \
Sentence: 4    agnér vái cákṣuṣā manuṣyā̀ ví paśyanti yajñásya devā́ agníṃ caivá víṣṇuṃ ca svéna bʰāgadʰéyenópa dʰāvati
Sentence: 5    tā́v evá //

Verse: 4 
Sentence: 1    asmiñ cákṣur dʰattaś cákṣuṣmān evá bʰavati
Sentence: 2    dʰenvái vā́ etád réto yád ā́jyam anaḍúhas taṇḍulā́ mitʰunā́d evā́smai cákṣuḥ prá janayati
Sentence: 3    gʰr̥té bʰavati téjo vái gʰr̥táṃ téjaś cákṣus téjasaivā́smai téjaś cákṣur áva runddʰe \
Sentence: 4    indriyáṃ vái vīryàṃ vr̥ṅkte bʰrā́tr̥vyo yájamānó 'yajamānasyādʰvarákalpām práti nír vaped bʰrā́tr̥vye yájamāne nā́syendriyáṃ //

Verse: 5 
Sentence: 1    vīryàṃ vr̥ṅkte
Sentence: 2    purā́ vācáḥ právaditor nír vaped yā́vaty evá vā́k tā́m áproditām bʰrā́tr̥vyasya vr̥ṅkte tā́m asya vā́cam pravádantīm ányā vā́có 'nu prá vadanti tā́ indriyáṃ vīryàṃ yájamāne dadʰati \
Sentence: 3    āgnāvaiṣṇavám aṣṭā́kapālaṃ nír vaped prātaḥsavanásyākālé sárasvaty ā́jyabʰāgā syād bārhaspatyáś carús \
Sentence: 4    yád aṣṭā́kapālo bʰávaty aṣṭā́kṣarā gāyatrī́ gāyatrám prātaḥsavanám prātaḥsavanám evá ténāpnoti //

Verse: 6 
Sentence: 1    āgnāvaiṣṇavám ékādaśakapālaṃ nír vapen mā́dʰyaṃdinasya sávanasyākālé sárasvaty ā́jyabʰāgā syād bārhaspatyáś carús \
Sentence: 2    yád ékādaśakapālo bʰávaty ékādaśākṣarā tr̥ṣṭúp tráiṣṭubʰam mā́dʰyaṃdinaṁ sávanam mā́dʰyaṃdinam evá sávanaṃ ténāpnoti \
Sentence: 3    āgnāvaiṣṇaváṃ dvā́daśakapālaṃ nír vaped tr̥tīyasavanásyākālé sárasvaty ā́jyabʰāgā syād bārhaspatyáś carús \
Sentence: 4    yád dvā́daśakapālo bʰávati dvā́daśākṣarā jágatī jā́gataṃ tr̥tīyasavanáṃ tr̥tīyasavanám evá ténāpnoti
Sentence: 5    devátābʰir evá devátāḥ //

Verse: 7 
Sentence: 1    praticárati yajñéna yajñáṃ vācā́ vā́cam bráhmaṇā bráhma kapā́lair evá cʰándāṁsy āpnóti puroḍā́śaiḥ sávanāni
Sentence: 2    maitrāvaruṇám ékakapālaṃ nír vaped vaśā́yai kālé
Sentence: 3    yáivā́sáu bʰrā́tr̥vyasya vaśā́nubandʰyā̀ só eváiṣáitásyáikakapālo bʰavati ná hí kapā́laiḥ paśúm árhaty ā́ptum //

Paragraph: 10 
Verse: 1 
Sentence: 1    asā́v ādityó ná vy àrocata tásmai devā́ḥ prā́yaścittim aicʰan tásmā etáṁ somāraudráṃ carúṃ nír avapan ténaivā́smin rúcam adadʰus \
Sentence: 2    yó brahmavarcasákāmaḥ syā́t tásmā etáṁ somāraudráṃ carúṃ nír vapet
Sentence: 3    sómaṃ caivá rudráṃ ca svéna bʰāgadʰéyenópa dʰāvati tā́v evā́smin brahmavarcasáṃ dʰatto brahmavarcasy èvá bʰavati
Sentence: 4    tiṣyāpūrṇamāsé nír vaped rudráḥ //

Verse: 2 
Sentence: 1    vái tiṣyàḥ sómaḥ pūrṇámāsaḥ sākṣā́d evá brahmavarcasám áva runddʰe
Sentence: 2    páriśrite yājayati brahmavarcasásya párigr̥hītyai
Sentence: 3    śvetā́yai śvetávatsāyai dugdʰám matʰitám ā́jyam abʰavaty ā́jyam prókṣaṇam ā́jyena mārjayante yávad evá brahmavarcasáṃ tát sárvaṃ karoty áti brahmavarcasáṃ kriyata íty āhus \
Sentence: 4    īśvaró duścármā bʰávitor íti mānavī́ ŕ̥cau dʰāyyè kuryād yád vái kíṃ ca mánur ávadat tád bʰeṣajám //

Verse: 3 
Sentence: 1    bʰeṣajám evā́smai karoti
Sentence: 2    yádi bibʰīyā́d duścármā bʰaviṣyāmī́ti somāpauṣṇáṃ carúṃ nír vapet saumyó vái devátayā púruṣaḥ pauṣṇā́ḥ paśávaḥ sváyaivā́smai devátayā paśúbʰis tvácaṃ karoti ná duścármā bʰavati
Sentence: 3    somāraudráṃ carúṃ nír vapet prajā́kāmaḥ sómo vái retodʰā́ agníḥ prajā́nām prajanayitā́ sóma evā́smai réto dádʰātya ganíḥ prajā́m prá janayati vindáte //

Verse: 4 
Sentence: 1    prajā́m \
Sentence: 2    somāraudráṃ carúṃ nír vaped abʰicárant saumyó vái devátayā púruṣa eṣá rudró yád agníḥ svā́yā eváinaṃ devátāyai niṣkrī́ya rudrā́yā́pi dadʰāti tā́jag ā́rtim ā́rcʰati
Sentence: 3    somāraudráṃ carúṃ nír vapej jyógāmayāvī sómaṃ vā́ etásya ráso gacʰaty agníṁ śárīraṃ yásya jyóg āmáyati sómād evā́sya rásaṃ niṣkrīṇā́ty agnéḥ śárīram utá yádi //

Verse: 5 
Sentence: 1    itā́sur bʰávati jī́vaty evá somārudráyor vā́ etáṃ grasitáṁ hótā níṣ kʰidati sá īśvará ā́rtim ā́rtor anaḍvā́n hótrā déyo váhnir vā́ anaḍvā́n váhnir hótā váhninaivá váhnim ātmā́naṁ spr̥ṇoti
Sentence: 2    somāraudráṃ carúṃ nír vaped yáḥ kāmáyeta své 'smā āyátane bʰrā́tr̥vyaṃ janayeyam íti védim parigŕ̥hyārdʰám uddʰanyā́d ardʰáṃ nā́rdʰám barhíṣa str̥ṇīyā́d ardʰáṃ nā́rdʰám idʰmásyābʰyādadʰyā́d ardʰáṃ ná svá evā́smā āyátane bʰrā́tr̥vyaṃ janayati //

Paragraph: 11 
Verse: 1 
Sentence: 1    aindrám ékādaśakapālaṃ nír vapen mārutáṁ saptákapālaṃ grā́makāmas \
Sentence: 2    índraṃ caivá marútaś ca svéna bʰāgadʰéyenópa dʰāvati
Sentence: 3    tá evā́smai sajātā́n prá yacʰanti
Sentence: 4    grāmy èvá bʰavati \
Sentence: 5    āhavanī́ya aindrám ádʰi śrayati gā́rhapatye mārutám
Sentence: 6    pāpavasyasásya vídʰr̥tyai
Sentence: 7    saptákapālo mārutó bʰavati
Sentence: 8    saptágaṇā vái marútas \
Sentence: 9    gaṇaśá evā́smai sajātā́n áva runddʰe \
Sentence: 10    anūcyámāna ā́ sādayati
Sentence: 11    víśam evá //

Verse: 2 
Sentence: 1    asmā ánuvartmānaṃ karoti \
Sentence: 2    etā́m evá nír vaped yáḥ kāmáyeta
Sentence: 3    kṣatrā́ya ca viśé ca samádaṃ dadʰyām íti \
Sentence: 4    aindrásyāvadyán brūyāt \
Sentence: 5    índrāyā́nu brūhī́ty āśrā́vya brūyāt \
Sentence: 6    marúto yajéti
Sentence: 7    mārutásyāvadyán brūyāt \
Sentence: 8    marúdbʰyó 'nu brūhī́ty āśrā́vya brūyāt \
Sentence: 9    índraṃ yajéti
Sentence: 10    svá eváibʰyo bʰāgadʰéye samádaṃ dadʰāti
Sentence: 11    vitr̥ṁhāṇā́s tiṣṭʰanti \
Sentence: 12    etā́m evá //

Verse: 3 
Sentence: 1    nír vaped yáḥ kāmáyeta
Sentence: 2    kálperann íti
Sentence: 3    yatʰādevatám avadā́ya yatʰādevatáṃ yajet \
Sentence: 4    bʰāgadʰéyenaiváinān yatʰāyatʰáṃ kalpayati
Sentence: 5    kálpanta evá \
Sentence: 6    aindrám ékādaśakapālaṃ nír vaped vaiśvadeváṃ dvā́daśakapālaṃ grā́makāmas \
Sentence: 7    índraṃ caivá víśvāṁś ca devā́nt svéna bʰāgadʰéyenópa dʰāvati
Sentence: 8    tá evā́smai sajātā́n prá yacʰanti
Sentence: 9    grāmy èvá bʰavati \
Sentence: 10    aindrásyāvadā́ya vaiśvadevásyā́va dyed átʰaindrásya //

Verse: 4 
Sentence: 1    upáriṣṭāt \
Sentence: 2    indriyénaivā́smā ubʰayátaḥ sajātā́n pári gr̥hṇāti \
Sentence: 3    upādʰāyyàpūrvayaṃ vā́so dákṣiṇā sajātā́nām úpahityai
Sentence: 4    pŕ̥śniyai dugdʰé práiyaṃgavaṃ carúṃ nír vapen marúdbʰyo grā́makāmaḥ
Sentence: 5    pŕ̥śniyai vái páyaso marúto jātā́ḥ pŕ̥śniyai priyáṃgavas \
Sentence: 6    mārutā́ḥ kʰálu vái devátayā sajātā́s \
Sentence: 7    marúta evá svéna bʰāgadʰéyenópa dʰāvati
Sentence: 8    tá evā́smai sajātā́n prá yacʰanti
Sentence: 9    grāmy èvá bʰavati
Sentence: 10    priyávatī yājyānuvākyè //

Verse: 5 
Sentence: 1    bʰavataḥ priyám eváinaṁ samānā́nāṃ karoti
Sentence: 2    dvipádā puro'nuvākyā̀ bʰavati dvipáda evā́va runddʰe
Sentence: 3    cátuṣpadā yājyā̀ cátuṣpada evá paśū́n áva runddʰe
Sentence: 4    devā́surā́ḥ sáṃyattā āsan
Sentence: 5    té devā́ mitʰó vípriyā āsan
Sentence: 6    tè 'nyò'nyásmai jyáiṣṭʰyāyā́tiṣṭʰamānāś caturdʰā́ vy àkrāmann agnír vásubʰiḥ sómo rudráir índro marúdbʰir váruṇa ādityáiḥ
Sentence: 7    sá índraḥ prajā́patim úpādʰāvat
Sentence: 8    tám //

Verse: 6 
Sentence: 1    etáyā saṃjñā́nyāyājayat \
Sentence: 2    agnáye vásumate puroḍā́śam aṣṭā́kapālaṃ nír avapat sómāya rudrávate carúm índrāya marútvate puroḍā́śam ékādaśakapālaṃ váruṇāyādityávate cárum \
Sentence: 3    táto vā́ índraṃ devā́ jyáiṣṭʰyāyābʰí sám ajānata
Sentence: 4    yáḥ samānáir mitʰó vípriyaḥ syā́t tám etáyā saṃjñā́nyā yājayet \
Sentence: 5    agnáye vásumate puroḍā́śam aṣṭā́kapālaṃ nír vapet sómāya rudrávate carúm índrāya marútvate puroḍā́śam ékādaśakapālaṃ váruṇāyādityávate carúm
Sentence: 6    índram eváinam bʰūtáṃ jyáiṣṭʰyāya samānā́ abʰí sáṃ jānate
Sentence: 7    vásiṣṭʰaḥ samānā́nām bʰavati //

Paragraph: 12 
Verse: 1 
Sentence: 1=a    hirṇyagarbʰás \
Sentence: 2=b    ā́po ha yát
Sentence: 3=c    prájāpate
Sentence: 4=d    sá veda putráḥ pitáraṁ sá mātáraṁ sá sūnúr bʰuvat sá bʰuvat púnarmagʰaḥ / sá dyā́m áurṇod antárikṣaṁ sá súvaḥ sá víśvā bʰúvo abʰavat sá ā́bʰavat //
Sentence: 5=e    úd u tyám \
Sentence: 6=f    citrám
Sentence: 7=g    sá pratnaván návīyasā́gne dyumnéna saṃyátā / br̥hát tatantʰa bʰānúnā //
Sentence: 8=h    ní kā́vyā vedʰásaḥ śáśvatas kar háste dádʰānaḥ //

Verse: 2 
Sentence: 1    náryā purū́ṇi / agnír bʰuvad rayipátī rayīṇā́ṁ satrā́ cakrāṇó amŕ̥tāni víśvā //
Sentence: 2=i    híraṇyapānim ūtáye savitā́ram úpa hvaye / sá céttā devátā padám //
Sentence: 3=k    vāmám adyá savitar vāmám u śvó divédive vāmám asmábʰyaṁ sāvīḥ / vāmásya hí kṣáyasya deva bʰū́rer ayā́ dʰiyā́ vāmabʰā́jaḥ syāma //
Sentence: 4=l    báḍ ittʰā́ párvatānāṃ kʰidrám bibʰarṣi pr̥tʰivi / prá yā́ bʰūmi pravatvati mahnā́ jinóṣi //

Verse: 3 
Sentence: 1    mahini //
Sentence: 2=m    stómāsas tvā vicāriṇi práti ṣṭobʰanty aktúbʰiḥ / prá yā́ vā́jaṃ ná héṣantam prerúm ásyasy arjuni //
Sentence: 3=n    r̥dūdáreṇa sákʰyā saceya yó mā ná ríṣyed dʰaryaśva pītáḥ / ayáṃ yáḥ sómo nyádʰāyy asmé tásmā índram pratíram emy ácʰa //
Sentence: 4=o    ā́pāntamanyus tr̥pálaprabʰarmā dʰúniḥ śímīvāñ cʰárumāṁ r̥jīṣī́ / sómo víśvāny atasā́ vánāni nā́rvā́g índram pratimā́nāni debʰuḥ //
Sentence: 5=p    prá //

Verse: 4 
Sentence: 1    suvānáḥ sóma r̥tayúś ciketéndrāya bráhma jamádagnir árcan / vŕ̥ṣā yantā́si śávasas turásyāntár yacʰa gr̥ṇaté dʰartráṃ dr̥ṁha //
Sentence: 2=q    sabā́dʰas te mádaṃ ca śuṣmayáṃ ca bráhma náro brahmakŕ̥taḥ saparyan / arkó vā yát turáte sómacakṣās tátréd índro dadʰate pr̥sú turyā́m //
Sentence: 3=r    váṣaṭ te viṣṇav āsá ā́ kr̥ṇomi tán me juṣasva śipiviṣṭa havyám //

Verse: 5 
Sentence: 1    várdʰantu tvā suṣṭutáyo gíro me yūyám pāta svastíbʰiḥ sádā naḥ //
Sentence: 2=s    prá tát te adyá śipiviṣṭa nā́māryáḥ śaṁsāmi vayúnāni vidvā́n / táṃ tvā gr̥ṇāmi tavásam átavīyān kṣáyantam asya rájasaḥ parāké //
Sentence: 3=t    kím ít te viṣṇo paricákṣyam bʰūt prá yád vavakṣé śipiviṣṭó asmi / mā́ várpo asmád ápa gūha etád yád anyárūpaḥ samitʰé babʰū́tʰa //

Verse: 6 
Sentence: 1=u    ágne dā́ dāśúṣe rayíṃ vīrávantam párīṇasam / śiśīhí naḥ sūnumátaḥ //
Sentence: 2=v    dā́ no agne śatíno dā́ḥ sahasríṇo duró ná vā́jaṁ śrútyā ápā vr̥dʰi / prā́cī dyā́vāpr̥tʰivī́ bráhmaṇā kr̥dʰi súvar ṇá śukrám uṣáso ví didyutuḥ //
Sentence: 3=w    agnír dā dráviṇaṃ vīrápeśā agnír ŕ̥ṣiṃ yáḥ sahásrā sanóti / agnír diví havyám ā́ tatānāgnér dʰā́māni víbʰr̥tā purutrā́ //
Sentence: 4=x    mā́ //

Verse: 7 
Sentence: 1    no mardʰīs \
Sentence: 2=y    ā́ tū́ bʰara
Sentence: 3=z    gʰr̥táṃ ná pūtáṃ tanū́r arepā́ḥ śúci híraṇyam / tát te rukmó ná rocata svadʰāvaḥ
Sentence: 4=aa    ubʰé suścandra sarpíṣo dárvī śrīṇīṣa āsáni / utó na út pupūryā uktʰéṣu śavasas pata íṣaṁ stotŕ̥bʰya ā́ bʰara //
Sentence: 5=bb    vā́yo śatáṁ hárīṇāṃ yuvásva póṣyānām / utá vā te sahasŕ̥ṇo rátʰa ā́ yātu pā́jasā //
Sentence: 6=cc    prá yā́bʰiḥ //

Verse: 8 
Sentence: 1    yā́si dāśvā́ṁsam ácʰā niyúdbʰir vāyav iṣṭáye duroṇé / ní no rayíṁ subʰójasaṃ yuvehá ní vīrávad gávyam áśviyaṃ ca rā́dʰaḥ //
Sentence: 2=dd    revátīr naḥ sadʰamā́da índre santu tuvívājāḥ / kṣumánto yā́bʰir mádema //
Sentence: 3=ee    revā́ṁ íd reváta stotā́ syā́t tvā́vato magʰónaḥ / préd u harivaḥ śrutásya //

Next part


This text is part of the TITUS edition of Black Yajur-Veda: Taittiriya-Samhita.

Copyright TITUS Project, Frankfurt a/M, 9.2.2018. No parts of this document may be republished in any form without prior permission by the copyright holder.