TITUS
Black Yajur-Veda: Taittiriya-Samhita
Part No. 12
Previous part

Chapter: 4 
Paragraph: 1 
Verse: 1 
Sentence: 1    devā́ amnuṣyā̀ḥ pitáras tè 'nyáta āsann ásurā rákṣāṁsi piśācā́s tè 'nyátas
Sentence: 2    téṣāṃ devā́nām utá yád álpaṃ lóhitam ákurvan tád rákṣāṁsi rā́trībʰir asubʰnan
Sentence: 3    tā́nt subdʰā́n mr̥tā́n abʰí vy àucʰat
Sentence: 4    té devā́ avidus \
Sentence: 5    yó vái no 'yám mriyáte rákṣāṁsi vā́ imáṃ gʰnantī́ti
Sentence: 6    té rákṣāṁsy úpāmantrayanta tā́ny abruvan
Sentence: 7    váraṃ vr̥ṇāmahai yát //

Verse: 2 
Sentence: 1    ásurāñ jáyāma tán naḥ sahā́sad íti
Sentence: 2    táto vái devā́ ásurān ajayan
Sentence: 3    té 'surāñ jitvā́ rákṣāṁsy ápānudanta
Sentence: 4    tā́ni rákṣāṁsi \
Sentence: 5    ánr̥tam akartéti samantáṃ devā́n páry aviśan
Sentence: 6    té devā́ agnā́v anātʰanta
Sentence: 7    tè 'gnáye právate puroḍā́śam aṣṭā́kapālaṃ nir avapann agnáye vibādʰávate 'gnáye prátīkavate
Sentence: 8    yád agnáye právate nirávapan yā́ny evá purástād rákṣāṁsi //

Verse: 3 
Sentence: 1    ā́san tā́ni téna prā́ṇudanta
Sentence: 2    yád agnáye vibādʰávate yā́ny evā́bʰíto rákṣāṁsy ā́san tā́ni téna vy àbādʰanta
Sentence: 3    yád agnáye prátīkavate yā́ny evá paścā́d rákṣāṁsy ā́san tā́ni ténā́pānudanta
Sentence: 4    táto devā́ ábʰavan párā́surās \
Sentence: 5    yó bʰrā́tr̥vyavānt syā́t sá spárdʰamāna etáyéṣṭyā yajeta \
Sentence: 6    agnáye právate puroḍā́śam aṣṭā́kapālaṃ nír vaped agnáye vibādʰávate //

Verse: 4 
Sentence: 1    agnáye prátīkavate
Sentence: 2    yád agnáye právate nirvápati yá evā́smāc cʰréyān bʰrā́tr̥vyas táṃ téna prá ṇudate
Sentence: 3    yád agnáye vibādʰávate yá eváinena sadŕ̥ṅ táṃ téna ví bādʰate
Sentence: 4    yád agnáye prátīkavate yá evā́smāt pā́pīyān táṃ ténā́pa nudate
Sentence: 5    prá śréyāṁsam bʰrā́tr̥vyaṃ nudatéti sadŕ̥śaṃ krāmati náinam pā́pīyān āpnoti yá eváṃ vidvā́n etáyéṣṭyā yájate //

Paragraph: 2 
Verse: 1 
Sentence: 1    devāsurā́ḥ sáṃyattā āsan
Sentence: 2    té devā́ abruvan
Sentence: 3    yó no vīryā̀vattamas tám ánu samā́rabʰāmahā íti
Sentence: 4    tá índram abruvan
Sentence: 5    tváṃ {F vái} {W vai} {GLOS vái} no vīryā̀vattamo 'si tvā́m ánu samā́rabʰāmahā íti
Sentence: 6    sò 'bravīt
Sentence: 7    tisró ma imā́s tanúvo vīryā̀vatīs tā́ḥ prīṇītā́tʰā́surān abʰí bʰaviṣyatʰéti
Sentence: 8    tā́ vái brūhī́ty abruvan
Sentence: 9    iyám aṁho múg iyáṃ vimr̥dʰéyám indriyā́vatī //

Verse: 2 
Sentence: 1    íty abravīt
Sentence: 2    tá índrāyāṁhomúce puroḍā́śam ékādaśakapālaṃ nír avapann índrāya vaimr̥dʰā́yéndrāyendriyā́vate
Sentence: 3    yád índrāyāṁhomúce nirávapann áṁhasa evá ténāmucyanta
Sentence: 4    yád índrāya vaimr̥dʰā́ya mŕ̥dʰa evá ténāpāgʰnata
Sentence: 5    yád índrāyendriyā́vata indriyám evá ténātmánn adadʰata
Sentence: 6    tráyastriṁśatkapālam puroḍā́śaṃ nír avapan
Sentence: 7    tráyastriṁśad vái devátās tā́ índra ātmánn ánu samā́rambʰayata bʰū́tyai //

Verse: 3 
Sentence: 1    tā́ṃ vā́vá devā́ víjitim uttamā́m ásurair vy àjayanta
Sentence: 2    yó bʰrā́tr̥vyavānt syā́t sá spárdʰamāna etáyéṣṭyā yajeténdrāyāṁhomúce puroḍā́śam ékādaśakapālaṃ nír vaped índrāya vaimr̥dʰā́yéndrāyendriyā́vate \
Sentence: 3    áṁhasā vā́ eṣá gr̥hītó yásmāc cʰréyān bʰrā́tr̥vyas \
Sentence: 4    yád índrāyāṁhomúce nirvápaty áṁhasa evá téna mucyate
Sentence: 5    mr̥dʰā́ vā́ eṣò 'bʰíṣaṇṇo yásmāt samānéṣv anyáḥ śréyān utá //

Verse: 4 
Sentence: 1    ábʰrātr̥vyas \
Sentence: 2    yád índrāya vaimr̥dʰā́ya mŕ̥dʰa evá ténā́pa hate
Sentence: 3    yád índrāyendriyā́vata indriyám evá ténātmán dʰatte
Sentence: 4    tráyastriṁśatkapālam puroḍā́śaṃ nír vapati
Sentence: 5    ráyastriṁśad vái devátās
Sentence: 6    tā́ evá yájamāna ātmánn ánu samā́rambʰayate bʰū́tyai
Sentence: 7    sā́ vā́ eṣā́ víjitir nā́méṣṭis \
Sentence: 8    yá eváṃ vidvā́n etáyéṣṭyā yájata uttamā́m evá víjitim bʰrā́tr̥vyeṇa ví jayate //

Paragraph: 3 
Verse: 1 
Sentence: 1    devāsurā́ḥ sáṃyattā āsan
Sentence: 2    téṣāṃ gāyatry ójo bálam indriyáṃ vīryàm prajā́m paśū́nt saṃgŕ̥hyādā́yāpakrámyātiṣṭʰat
Sentence: 3    tè 'manyanta
Sentence: 4    yatarā́n vā́ iyáṃ upāvartsyáti tá idám bʰaviṣyantī́ti
Sentence: 5    tā́ṃ vy àhvayanta víśvakarmann íti devā́ dābʰī́ty ásurāḥ
Sentence: 6    sā́ nā́nyatarā́ṁś canópā́vartata
Sentence: 7    té devā́ etád yájur apaśyan \
Sentence: 8    ójo 'si śaho 'si bálam asi //

Verse: 2 
Sentence: 1    bʰrā́jo 'si devā́nāṃ dʰā́ma nā́māsi víśvam asi viśvā́yuḥ sárvam asi sarvā́yur abʰibʰū́s \
Sentence: 2    íti vā́vá devā́ ásurāṇām ójo bálam indriyáṃ vīryàm prajā́m paśū́n avr̥ñjata
Sentence: 3    yád gāyatry àpakrámyā́tiṣṭʰat tásmād etā́ṃ gāyatrī́tī́ṣṭim āhuḥ
Sentence: 4    samvatsaró vái gāyatrī́
Sentence: 5    saṃvatsaró vái tád apakrámyātiṣṭʰat \
Sentence: 6    yád etáyā devā́ ásurāṇām ójo bálam indriyáṃ vīryàm //

Verse: 3 
Sentence: 1    prajā́m paśū́n ávr̥ñjata tásmād etā́ṁ saṃvargá ítī́ṣṭim āhus \
Sentence: 2    yó bʰrā́tr̥vyavānt syā́t sá spárdʰamāna etáyéṣṭyā yajeta \
Sentence: 3    agnáye saṃvargā́ya puroḍā́śam aṣṭā́kapālaṃ nír vapet
Sentence: 4    táṁ śr̥tám ā́sannam eténa yájuṣābʰí mr̥śet \
Sentence: 5    ója evá bálam indriyáṃ vīryàm prajā́m paśū́n bʰrā́tr̥vyasya vr̥ṅkte
Sentence: 6    bʰávaty ātmánā párāsya bʰrā́tr̥vyo bʰavati //

Paragraph: 4 
Verse: 1 
Sentence: 1    prájāpatiḥ prajā́ asr̥jata
Sentence: 2    tā́ asmāt sr̥ṣṭā́ḥ párācīr āyan
Sentence: 3    tā́ yátrā́vasan táto gramúd úd atiṣṭʰat
Sentence: 4    tā́ bŕ̥haspátiś cānvávaitām \
Sentence: 5    sò 'bravīd bŕ̥haspátis \
Sentence: 6    anáyā tvā prá tiṣṭʰāny átʰa tvā prajā́ upā́vartsyantī́ti
Sentence: 7    tám prā́tiṣṭʰat
Sentence: 8    táto vái prajā́patim prajā́ upā́vartanta
Sentence: 9    yáḥ prajā́kāmaḥ syā́t tásmā etám prājāpatyáṃ gārmutáṃ carúṃ nír vapet
Sentence: 10    prajā́patim //

Verse: 2 
Sentence: 1    evá svéna bʰāgadʰéyenópa dʰāvati
Sentence: 2    sá evā́smai prajā́m prá janayati
Sentence: 3    prajā́patiḥ paśū́n asr̥jata tè 'smāt sr̥ṣṭā́ḥ párāñca āyan
Sentence: 4    té yátrā́vasan táto garmúd úd atiṣṭʰat
Sentence: 5    tā́n pūṣā́ cānvávaitām \
Sentence: 6    sò 'bravīt pūṣā́ \
Sentence: 7    anáyā mā prá tiṣṭʰā́tʰa tvā paśáva upā́vartsyantī́ti
Sentence: 8    mā́m prá tiṣṭʰéti sómo 'bravīn máma vái //

Verse: 3 
Sentence: 1    akr̥ṣṭapacyám íti \
Sentence: 2    ubʰáu vām prá tiṣṭʰānī́ty abravīt
Sentence: 3    táu prā́tiṣṭʰat
Sentence: 4    táto vái prajā́patim paśáva upā́vartanta
Sentence: 5    yáḥ paśúkāmaḥ syā́t tásmā etáṁ somāpauṣṇáṃ gārmutáṃ carúṃ nír vapet
Sentence: 6    somāpūṣáṇāv evá svéna bʰāgadʰéyenópa dʰāvati
Sentence: 7    tā́v evā́smai paśū́n prá janayataḥ
Sentence: 8    sómo vái retodʰā́ḥ
Sentence: 9    pūṣā́ paśūnā́m prajanayitā́
Sentence: 10    sóma evā́smai réto dádʰāti pūṣā́ paśū́n prá janayati //

Paragraph: 5 
Verse: 1 
Sentence: 1=a    ágne góbʰir na ā́ gahī́ndo puṣṭyā́ juṣasva naḥ / índro dʰartā́ gr̥héṣu naḥ //
Sentence: 2=b    savitā́ yáḥ sahasríyaḥ sá no gr̥héṣu rāraṇat / ā́ puṣā́ etv ā́ vásu //
Sentence: 3=c    dʰātā́ dadātu no rayím ī́śāno jágatas pátiḥ / sá naḥ pūrṇéna vāvanat //
Sentence: 4=d    tváṣṭā yó vr̥ṣabʰó vŕ̥ṣā sá no gr̥héṣu rāraṇat / sahásreṇāyútena ca //
Sentence: 5=e    yéna devā́ amŕ̥tam //

Verse: 2 
Sentence: 1    dīrgʰáṁ śrávo divy áirayanta / rā́yas poṣa tvám asmábʰyaṃ gávāṃ kulmíṃ jīvása ā́ yuvasva //
Sentence: 2=f    agnír gr̥hápatiḥ sómo viśvavániḥ savitā́ sumedʰā́ḥ svā́hā /
Sentence: 3=g    ágne gr̥hapate yás te gʰŕ̥tyo bʰāgás téna sáha ója ākrámamāṇāya dʰehi śráiṣṭʰyāt patʰó mā́ yoṣaṃ mūrdʰā́ bʰūyāsaṁ svā́hā //

Paragraph: 6 
Verse: 1 
Sentence: 1    citráyā yajeta paśúkāmas \
Sentence: 2    iyáṃ vái citrā́
Sentence: 3    yád vā́ asyā́ṃ víśvam bʰūtám ádʰi prajā́yate téneyáṃ citrā́
Sentence: 4    yá eváṃ vidvā́ṁś citráyā paśúkāmo yájate prá prajáyā paśúbʰir mitʰunáir jāyate
Sentence: 5    práivā́gneyéna vāpayati
Sentence: 6    rétaḥ samuyéna dadʰāti
Sentence: 7    réta evá hitáṃ tváṣṭā rūpā́ṇi ví karoti
Sentence: 8    sārasvatáu bʰavata etád vái dáivyam mitʰunáṃ dáivyam evā́smai //

Verse: 2 
Sentence: 1    mitʰunám madʰyató dadʰāti púṣṭyai prajánanāya
Sentence: 2    sinīvālyái carúr bʰavati vā́g vái sinīvālī́ púṣṭiḥ kʰálu vái vā́k púṣṭim evá vā́cam úpaiti \
Sentence: 3    aindrá uttamó bʰavati ténaivá tán mitʰunám \
Sentence: 4    saptáitā́ni havī́ṁṣi bʰavanti
Sentence: 5    saptá grāmyā́ḥ paśávaḥ saptā́raṇyā́ḥ saptá cʰándāṁsi \
Sentence: 6    ubʰáyasyā́varuddʰyai \
Sentence: 7    átʰaitā́ ā́hutīr juhoti \
Sentence: 8    eté vái devā́ḥ púṣṭipatayas
Sentence: 9    tá evā́smin púṣṭiṃ dadʰati
Sentence: 10    púṣyati prajáyā paśúbʰis \
Sentence: 11    tá evā́smin púṣṭiṃ dadʰati
Sentence: 12    púṣyati prajáyā paśúbʰis \
Sentence: 13    átʰo yád etā́ ā́hutīr juhóti prátiṣṭʰityai //

Paragraph: 7 
Verse: 1 
Sentence: 1=a    mārutám asi marútām ójo 'pā́ṃ dʰā́rām bʰinddʰi
Sentence: 2=b    ramáyata marutaḥ śyenám āyínam mánojavasaṃ vŕ̥ṣaṇaṁ suvr̥ktím / yéna śárdʰa ugrám ávasr̥ṣṭam éti tád aśvinā pári dʰattaṁ svastí //
Sentence: 3=c    purovātó várṣañ jinvár āvŕ̥t svā́hā vātā́vad várṣann ugrár āvŕ̥t svā́hā stanáyan várṣan bʰīmár āvŕ̥t svā́hānaśany àvaspʰū́rjan didyúd várṣan tveṣár āvŕ̥t svā́hātirātráṃ várṣan pūrtír āvŕ̥t //

Verse: 2 
Sentence: 1    svā́hā bahú hāyám avr̥ṣād íti śrutár āvŕ̥t svā́hātápati várṣan virā́ḍ āvŕ̥t svā́hāvaspʰū́rjan didyúd várṣan bʰūtár āvŕ̥t svā́hā
Sentence: 2=d    mā́ndā vā́śāḥ śúndʰyūr ájirāḥ / jyótiṣmatīs támasvarīr úndatīḥ súpʰenāḥ / mítrabʰr̥taḥ kṣátrabʰr̥taḥ súrāṣṭrā ihá māvata
Sentence: 3=e    vŕ̥ṣṇo áśvasya saṃdā́nam asi vŕ̥ṣṭyai tvópa nahyāmi //

Paragraph: 8 
Verse: 1 
Sentence: 1=a    dévā vasavyā ágne soma sūrya / dévāḥ śarmaṇyā mítrāvaruṇāryaman / dévāḥ sapītayó 'pāṃ napād āśuheman / udnó datto 'dadʰím bʰintta diváḥ parjányād antárikṣāt pr̥tʰivyā́s táto no vŕ̥ṣṭyāvata
Sentence: 2=b    dívā cit támaḥ kr̥ṇvanti parjányenodavāhéna / pr̥tʰivī́ṃ yád vyundánti //
Sentence: 3=c    ā́ yáṃ náraḥ sudā́navo dadāśúṣe diváḥ kóśam ácucyavuḥ / ví parjányāḥ sr̥janti ródasī ánu dʰánvanā yanti //

Verse: 2 
Sentence: 1    vr̥ṣṭáyaḥ //
Sentence: 2=d    úd īrayatʰā marutaḥ samudrató yūyáṃ vr̥ṣṭíṃ varṣayatʰā purīṣiṇaḥ / ná vo dasrā úpa dasyanti dʰenávaḥ śubʰáṃ yātā́m ánu rátʰā avr̥tsata //
Sentence: 3=e    sr̥jā́ vr̥ṣṭíṃ divá ā́dbʰíḥ samudrám pr̥ṇa / abjā́ asi pratʰamajā́ bálam asi samudríyam //
Sentence: 4=f    ún nambʰaya pr̥tʰivī́m bʰinddʰī́dáṃ divyáṃ nábʰaḥ / udnó divyásya no dehī́śāno ví sr̥jā dŕ̥tim //
Sentence: 5=g    yé devā́ divíbʰāgā yè 'ntárikṣabʰāgā yé pr̥tʰivíbʰāgāḥ / tá imáṃ yajñám avantu tá idáṃ kṣétram ā́ viśantu tá idáṃ kṣétram ánu ví viśantu //

Paragraph: 9 
Verse: 1 
Sentence: 1    mārutám asi marútām ója íti kr̥ṣṇáṃ vā́saḥ kr̥ṣṇátūṣam pári dʰatte \
Sentence: 2    etád vái vŕ̥ṣṭyai rūpám \
Sentence: 3    sárūpa evá bʰūtvā́ parjányaṃ varṣayati
Sentence: 4    ramáyata marutaḥ śyenám āyínam íti paścādvātám práti mīvati purovātám evá janayati varṣásyā́varuddʰyai
Sentence: 5    vātanāmā́ni juhoti
Sentence: 6    vāyúr vái vŕ̥ṣṭyā īśe
Sentence: 7    vāyúm evá svéna bʰāgadʰéyenópa dʰāvati
Sentence: 8    sá evā́smai parjányaṃ varṣayati \
Sentence: 9    aṣṭáu //

Verse: 2 
Sentence: 1    juhoti
Sentence: 2    cátasro vái díśaś cátasro 'vāntaradiśā́s \
Sentence: 3    digbʰyá evá vŕ̥ṣṭiṁ sám prá cyāvayati
Sentence: 4    kr̥ṣṇājiné sáṃ yauti
Sentence: 5    havír evā́kar
Sentence: 6    antarvedí sáṃ yauti \
Sentence: 7    ávaruddʰyai
Sentence: 8    yátīnām adyámānānāṁ śīrṣā́ṇi párāpatan
Sentence: 9    té kʰarjū́rā abʰavan
Sentence: 10    téṣāṁ rása ūrdʰvò 'patat
Sentence: 11    tā́ni karī́rāṇy abʰavan \
Sentence: 12    saumyā́ni vái karī́rāṇi
Sentence: 13    saumyā́ kʰálu vā ā́hutir divó vŕ̥ṣṭiṃ cyāvayati
Sentence: 14    yát karī́rāṇi bʰávanti //

Verse: 3 
Sentence: 1    saumyáyaivā́hutyā divó vŕ̥ṣṭim áva runddʰe
Sentence: 2    mádʰuṣā sáṃ yauti \
Sentence: 3    apā́ṃ vā́ eṣá óṣadʰīnāṁ ráso yán mádʰu \
Sentence: 4    adbʰyá eváuṣadʰībʰyo varṣati \
Sentence: 5    átʰo adbʰyá eváuṣadʰībʰyo vŕ̥ṣṭiṃ ní nayati
Sentence: 6    mā́ndā vā́śā íti sáṃ yauti
Sentence: 7    nāmadʰéyair eváinā ácʰaiti \
Sentence: 8    átʰo yátʰā brūyā́t \
Sentence: 9    ásāv éhī́ty evám eváinā nāmadʰéyair ā́ //

Verse: 4 
Sentence: 1    cyāvayati
Sentence: 2    vŕ̥ṣṇo áśvasya saṃdā́nam asi vŕ̥ṣṭyai tvópa nahyāmī́ty āha
Sentence: 3    vŕ̥ṣā vā́ áśvas \
Sentence: 4    vŕ̥ṣā parjányaḥ
Sentence: 5    kr̥ṣṇá iva kʰálu vái bʰūtvā́ varṣati
Sentence: 6    rūpéṇaiváinaṁ sám ardʰayati
Sentence: 7    várṣasyā́varuddʰyai //

Paragraph: 10 
Verse: 1 
Sentence: 1    dévā vasavyās \
Sentence: 2    dévā śarmaṇyās \
Sentence: 3    dévāḥ sapītaya íty ā́ badʰnāti devátābʰir evā́nvaháṃ vŕ̥ṣṭim icʰati
Sentence: 4    yádi várṣet tā́vaty evá hotavyàm \
Sentence: 5    yádi ná várṣec cʰvó bʰūté havír nír vapet \
Sentence: 6    ahorātré vái mitrā́váruṇau \
Sentence: 7    ahorātrā́bʰyāṃ kʰálu vái parjányo varṣati
Sentence: 8    náktaṃ vā hí dívā vā várṣati
Sentence: 9    mitrā́váruṇāv evá svéna bʰāgadʰéyenópa dʰāvati
Sentence: 10    tā́v evā́smai //

Verse: 2 
Sentence: 1    ahorātrā́bʰyām parjányaṃ varṣayatas \
Sentence: 2    agnáye bʰācʰáde puroḍā́śam aṣṭā́kapālaṃ nír vapen mārutáṁ saptákapālaṁ sauryám ékakapālam
Sentence: 3    agnír vā́ itó vŕ̥ṣṭim úd īrayati
Sentence: 4    marútaḥ sr̥ṣṭā́ṃ nayanti
Sentence: 5    yadā́ kʰálu vā́ asā́v ādityó nyàṅ raśmíbʰiḥ paryāvártaté 'tʰa varṣati dʰāmacʰád iva kʰálu vái bʰūtvā́ varṣati \
Sentence: 6    etā́ vái devátā vŕ̥ṣṭyā īśate tā́ evá svéna bʰāgadʰéyenópa dʰāvati
Sentence: 7    tā́ḥ //

Verse: 3 
Sentence: 1    evā́smai parjányaṃ varṣayanti \
Sentence: 2    utā́varṣiṣyan várṣaty evá
Sentence: 3    sr̥jā́ vr̥ṣṭíṃ divá ā́dbʰíḥ samudrám pr̥ṇéty āha \
Sentence: 4    imā́ś caivā́mū́ś cāpáḥ sám ardʰayati \
Sentence: 5    átʰo ābʰír evā́mū́r ácʰaiti \
Sentence: 6    abjā́ asi pratʰamajā́ bálam asi samudríyam íty āha
Sentence: 7    yatʰāyajúr eváitát \
Sentence: 8    ún nambʰaya pr̥tʰivī́m íti varṣāhvā́ṃ juhoti \
Sentence: 9    eṣā́ vā́ óṣadʰīnāṃ vr̥ṣṭivánis
Sentence: 10    táyaivá vŕ̥ṣṭim ā́ cyāvayati
Sentence: 11    yé devā́ divíbʰāgā íti kr̥ṣṇājinám áva dʰūnoti \
Sentence: 12    imá evā́smai lokā́ḥ prītā́ abʰī́ṣṭā bʰavanti //

Paragraph: 11 
Verse: 1 
Sentence: 1    sárvāṇi cʰándāṁsy etásyām íṣṭyām anū́cyānī́ty āhus
Sentence: 2    triṣṭúbʰo vā́ etád vīryàṃ yát kakúd uṣṇíhā jágatyai
Sentence: 3    yád uṣṇihakakúbʰāv anvā́ha ténaivá sárvāṇi cʰándāṁsy áva runddʰe
Sentence: 4    gāyatrī́ vā́ eṣā́ yád uṣṇíhā
Sentence: 5    yā́ni catvā́ry ádʰy akṣárāṇi cátuṣpāda evá té paśávas \
Sentence: 6    yátʰā puroḍā́śe puroḍā́śo 'dʰy evám evá tád yád r̥cy ádʰy akṣárāṇi
Sentence: 7    yáj jágatyā //

Verse: 2 
Sentence: 1    paridadʰyā́d ántaṃ yajñáṃ gamayet
Sentence: 2    triṣṭúbʰā pári dadʰāti \
Sentence: 3    indriyáṃ vái vīryàṃ { triṣṭúg ^ triṣṭúbʰ }
Sentence: 4    indriyá evá vīryè yajñám práti ṣṭʰāpayati nā́ntaṃ gamayati \
Sentence: 5    ágne trī́ te vā́jinā trī́ ṣadʰástʰéti trívatyā pári dadʰāti
Sentence: 6    sarūpatvā́ya
Sentence: 7    sárvo vā́ eṣá yajñó yát traidʰātavī́yam \
Sentence: 8    kā́māyakāmāya prá yujyate
Sentence: 9    sárvebʰyo hí kā́mebʰyo yajñáḥ prayujyáte
Sentence: 10    traidʰātavī́yena yajetābʰicáran \
Sentence: 11    sárvo vái //

Verse: 3 
Sentence: 1    eṣá yajñó yát traidʰātavī́yam \
Sentence: 2    sárveṇaiváinaṃ yajñénābʰí carati
Sentence: 3    str̥ṇutá eváinam
Sentence: 4    etáyaivá yajetābʰicaryámāṇaḥ
Sentence: 5    sárvo vā́ eṣá yajñó yát traidʰātavī́yam \
Sentence: 6    sárveṇaivá yajñéna yajate
Sentence: 7    náinam abʰicárant str̥ṇute \
Sentence: 8    etáyaivá yajeta sahásreṇa yakṣyámānaḥ
Sentence: 9    prájātam eváinad dadāti \
Sentence: 10    etáyaivá yajeta sahásreṇejānás \
Sentence: 11    ántaṃ vā́ eṣá paśūnā́ṃ gacʰati //

Verse: 4 
Sentence: 1    yáḥ sahásreṇa yájate
Sentence: 2    prajā́patiḥ kʰálu vái paśū́n asr̥jata
Sentence: 3    tā́ṁs traidʰātavī́yenaivā́sr̥jata
Sentence: 4    yá eváṃ vidvā́ṁs traidʰātavī́yena paśúkāmo yájate yásmād evá yóneḥ prajā́patiḥ paśū́n ásr̥jata tásmād eváinānt sr̥jata úpainam úttaraṁ sahásraṃ namati
Sentence: 5    devátābʰyo vā́ eṣá ā́ vr̥ścyate yó yakṣyá íty uktvā́ ná yájate
Sentence: 6    traidʰātavī́yena yajeta
Sentence: 7    sárvo vā́ eṣá yajñáḥ //

Verse: 5 
Sentence: 1    yát traidʰātavī́yam \
Sentence: 2    sárveṇaivá yajñéna yajate
Sentence: 3    ná devátābʰya ā́ vr̥ścyate
Sentence: 4    dvā́daśakapālaḥ puroḍā́śo bʰavati
Sentence: 5    té tráyaś cátuṣkapālās
Sentence: 6    triṣṣamr̥ddʰatvā́ya
Sentence: 7    tráyaḥ puroḍā́śā bʰavanti
Sentence: 8    tráya imé lokā́s \
Sentence: 9    eṣā́ṃ lokā́nām ā́ptyai \
Sentence: 10    úttarauttaro jyā́yān bʰavati \
Sentence: 11    evám iva hī́mé lokā́s \
Sentence: 12    yavamáyo mádʰyas \
Sentence: 13    etád vā́ antárikṣasya rūpám \
Sentence: 14    sámr̥ddʰyai
Sentence: 15    sárveṣām abʰigamáyann áva dyati \
Sentence: 16    ácʰambaṭkāram \
Sentence: 17    híraṇyaṃ dadāti
Sentence: 18    téja evá //

Verse: 6 
Sentence: 1    áva runddʰe
Sentence: 2    tārpyáṃ dadāti
Sentence: 3    paśū́n evā́va runddʰe
Sentence: 4    dʰenúṃ dadāti \
Sentence: 5    āśíṣa evā́va runddʰe
Sentence: 6    sā́mno vā́ eṣá várṇo yád dʰíraṇyam \
Sentence: 7    yájuṣāṃ tārpyám
Sentence: 8    uktʰāmadā́nāṃ dʰenús \
Sentence: 9    etā́n evá sárvān várṇān áva runddʰe //

Paragraph: 12 
Verse: 1 
Sentence: 1    tváṣṭā hatáputro vī́ndraṁ sómam ā́harat
Sentence: 2    tásminn índra upahavám aicʰata
Sentence: 3    táṃ nópāhvayata
Sentence: 4    putrám me 'vadʰīr íti
Sentence: 5    sá yajñaveśasáṃ kr̥tvā́ prāsáhā sómam apibat
Sentence: 6    tásya yád atyáśiṣyata tát tváṣṭāhavanī́yam úpa prā́vartayat
Sentence: 7    svā́héndraśatrur vardʰasvéti
Sentence: 8    sá yā́vad ūrdʰváḥ parāvídʰyati tā́vati svayám evá vy àramata
Sentence: 9    yádi vā tā́vat pravaṇám //

Verse: 2 
Sentence: 1    ā́sīt yádi vā tā́vad ádʰy agnér ā́sīt
Sentence: 2    sá sambʰávann agnī́ṣómāv abʰí sám abʰavat
Sentence: 3    sá iṣumātráṃ víṣvaṅṅ avardʰata
Sentence: 4    sá imā́m̐ lokā́n avr̥ṇot \
Sentence: 5    yád imā́m̐ lokā́n ávr̥ṇot tád vr̥trásya vr̥tratvám \
Sentence: 6    tásmād índro 'bibʰet \
Sentence: 7    ápi tváṣṭā
Sentence: 8    tásmai tváṣṭā vájram asiñcat
Sentence: 9    tápo vái sá vájra āsīt
Sentence: 10    tám údyantuṃ nā́śaknot \
Sentence: 11    átʰa vái tárhi víṣṇuḥ //

Verse: 3 
Sentence: 1    anyā́ devátāsīt
Sentence: 2    sò 'bravīt \
Sentence: 3    víṣṇav éhī́dám ā́ hariṣyāvo yénāyám idám íti
Sentence: 4    sá víṣṇus tredʰā́tmā́naṃ ví ny àdʰatta pr̥tʰivyā́ṃ tŕ̥tīyam antárikṣe tŕ̥tīyaṃ diví tŕ̥tīyam
Sentence: 5    abʰiparyāvartā́d dʰy ábibʰet \
Sentence: 6    yát pr̥tʰivyā́ṃ tŕ̥tīyam ā́sīt ténéndro vájram úd ayacʰad víṣṇvanustʰitaḥ
Sentence: 7    sò 'bravīt \
Sentence: 8    mā́ me prá hār ásti vā́ idám //

Verse: 4 
Sentence: 1    máyi vīryàṃ tát te prá dāsyāmī́ti
Sentence: 2    tád asmai prā́yacʰat
Sentence: 3    tát práty agr̥hṇāt \
Sentence: 4    ádʰā méti tád víṣṇavéti prā́yacʰat
Sentence: 5    tád víṣṇuḥ práty agr̥hṇāt \
Sentence: 6    asmā́sv índra indriyáṃ dadʰātv íti
Sentence: 7    yád antárikṣe tŕ̥tīyam ā́sīt ténéndro vájram úd ayacʰad víṣṇvanustʰitaḥ
Sentence: 8    sò 'bravīt \
Sentence: 9    mā́ me prá hār ásti vā́ idám //

Verse: 5 
Sentence: 1    máyi vīryàṃ tát te prá dāsyāmī́ti
Sentence: 2    tád asmai prā́yacʰat
Sentence: 3    tát práty agr̥hṇāt \
Sentence: 4    dvír mādʰā íti tád víṣṇavéti prā́yacʰat
Sentence: 5    tád víṣṇuḥ práty agr̥ḥṇāt \
Sentence: 6    asmā́sv índra indriyáṃ dadʰātv íti
Sentence: 7    yád diví tŕ̥tīyam ā́sīt ténéndro vájram úd ayacʰad víṣṇvanustʰitaḥ
Sentence: 8    sò 'bravīt \
Sentence: 9    mā́ me prá hār {F yénāhám} {W yénā́hám} {GLOS yénāhám} //

Verse: 6 
Sentence: 1    idám ásmi tát te prá dāsyāmī́ti
Sentence: 2    tvī́3 íty abravīt
Sentence: 3    saṃdʰā́ṃ tú sáṃ dadʰāvahai tvā́m evá prá viśānī́ti
Sentence: 4    yán mā́m praviśéḥ kím mā bʰuñjyā íty abravīt
Sentence: 5    tvā́m evéndʰīya táva bʰógāya tvā́m prá viśeyam íty abravīt
Sentence: 6    tám vr̥tráḥ prā́viśat \
Sentence: 7    udáraṃ vái vr̥tráḥ
Sentence: 8    kṣút kʰálu vái manuṣyàsya bʰrā́tr̥vyas \
Sentence: 9    yáḥ //

Verse: 7 
Sentence: 1    eváṃ véda hánti kṣúdʰam bʰrā́tr̥vyam \
Sentence: 2    tád asmai prā́yacʰat
Sentence: 3    tát práty agr̥hṇāt
Sentence: 4    trír mādʰā íti tád víṣṇavéti prā́ yacʰat
Sentence: 5    tád víṣṇuḥ práty agr̥hṇād asmā́sv índra indriyáṃ dadʰātv íti
Sentence: 6    yát tríḥ prā́yacʰat tríḥ pratyágr̥hṇāt tát tridʰā́tos tridʰātutvám \
Sentence: 7    yád víṣṇur anvátiṣṭʰata víṣṇavéti prā́yacʰat tásmād aindrāvaiṣṇaváṁ havír bʰavati
Sentence: 8    yád vā́ idáṃ kíṃ ca tád asmai tát prā́yacʰad ŕ̥caḥ sā́māni yájūṁṣi
Sentence: 9    sahásraṃ vā́ asmai tát prā́yacʰat
Sentence: 10    tásmāt sahásradakṣiṇam //

Paragraph: 13 
Verse: 1 
Sentence: 1    devā́ vái rājanyā̀j jā́yamānād abibʰayus
Sentence: 2    tám antár evá sántaṃ dā́mnā́paumbʰan \
Sentence: 3    sá vā́ eṣó 'pobdʰo jāyate yád rājanyàs \
Sentence: 4    yád vā́ eṣó 'napobdʰo jā́yeta vr̥trā́n gʰnáṁś caret \
Sentence: 5    yáṃ kāmáyeta rājanyàm
Sentence: 6    ánapobdʰo jāyeta vr̥trā́n gʰnáṁś cared íti tásmā etám aindrābārhaspatyáṃ carúṃ nír vapet \
Sentence: 7    aindró vái rājanyò bráhma bŕ̥haspátis \
Sentence: 8    bráhmaṇaiváinaṃ dā́mno 'pómbʰanān muñcati
Sentence: 9    hiraṇmáyaṃ dā́ma dákṣiṇā
Sentence: 10    sākṣā́d eváinaṃ dā́mno 'pómbʰanān muñcati //

Paragraph: 14 
Verse: 1 
Sentence: 1=a    návonavo bʰavati jā́yamānó 'hnāṃ ketúr uṣásām ety ágre / bʰāgáṃ devébʰyo ví dadʰāty āyán prá candrámās tirati dīrgʰám ā́yuḥ //
Sentence: 2=b    yám ādityā́ aṁśúm āpyāyáyanti yám ákṣitam ákṣitayaḥ píbanti / téna no rā́jā váruṇo bŕ̥haspátir ā́ pyāyayantu bʰúvanasya gopā́ḥ //
Sentence: 3=c    prā́cyāṃ diśí tvám indrāsi rā́jotódīcyāṃ vr̥trahan vr̥trahā́si / yátra yánti srotyā́s tát //

Verse: 2 
Sentence: 1    jitáṃ te dakṣiṇató vr̥ṣabʰá edʰi hávyaḥ /
Sentence: 2=d    índro jayāti ná párā jayātā adʰirājó rā́jasu rājayāti / víśvā hí bʰūyā́ḥ pr̥tanā abʰiṣṭī́r upasádyo namasyò yátʰā́sat //
Sentence: 3=e    asyéd evá prá ririce mahitváṃ diváḥ pr̥tʰivyā́ḥ páry antárikṣāt / svarā́ḍ índro dáma ā viśvágūrtaḥ svarír ámatro vavakṣe ráṇāya /
Sentence: 4=f    abʰí tvā śūra nonumó 'dugdʰā iva dʰenávaḥ / ī́śānam //

Verse: 3 
Sentence: 1    asyá jágataḥ suvardŕ̥śam ī́śānam indra tastʰúṣaḥ //
Sentence: 2=g    tvā́m íd dʰí hávāmahe sātā́ vā́jasya kārávaḥ / tvā́ṃ vr̥tréṣv indra sátpatiṃ náras tvā́ṃ kā́ṣṭʰāsv árvataḥ //
Sentence: 3=h    yád dyā́va indra te śatáṁ śatám bʰū́mīr utá syúḥ / ná tvā vajrint sahásraṁ sū́ryā ánu ná jātám aṣṭa ródasī //
Sentence: 4=i    píbā sómam indra mándatu tvā yáṃ te suṣā́va haryaśvā́driḥ //

Verse: 4 
Sentence: 1    sotúr bāhúbʰyāṁ súyato nā́rvā //
Sentence: 2=k    révatīr naḥ sadʰamā́da índre santu tuvívājāḥ / kṣumánto yā́bʰir mádema //
Sentence: 3=l    úd agne śúcayas táva
Sentence: 4=m    ví jyótiṣā \
Sentence: 5=n    úd u tyáṃ jātávedasam \
Sentence: 6=o    saptá tvā haríto rátʰe váhanti deva sūrya / śocíṣkeśaṃ vicakṣaṇa //
Sentence: 7=p    citráṃ devā́nām úd agād ánīkaṃ cákṣur mitrásya váruṇasyāgnéḥ / ā́prā dyā́vāpr̥tʰivī́ antárikṣaṁ sū́rya ātmā́ jágatas tástʰuṣaḥ //

Verse: 5 
Sentence: 1    ca //
Sentence: 2=q    víśve devā́ r̥tāvŕ̥dʰa r̥túbʰir havanaśrútaḥ / júṣantāṃ yújyam páyaḥ //
Sentence: 3=r    víśve devāḥ śr̥ṇutémáṁ hávam me yé antárikṣe yá úpa dyávi ṣṭʰá / yé agnijihvā́ utá vā yájatrā āsádyāsmín barhíṣi mādayadʰvam //

Next part


This text is part of the TITUS edition of Black Yajur-Veda: Taittiriya-Samhita.

Copyright TITUS Project, Frankfurt a/M, 9.2.2018. No parts of this document may be republished in any form without prior permission by the copyright holder.