TITUS
Black Yajur-Veda: Taittiriya-Samhita
Part No. 18
Previous part

Chapter: 4 
Paragraph: 1 
Verse: 1 
Sentence: 1    ví vā́ etásya yajñá r̥dʰyate yásya havír atirícyate
Sentence: 2    sū́ryo devó diviṣádbʰya íty āha
Sentence: 3    bŕ̥haspátinā caivā́sya prajā́patinā ca yajñásya vyr̥̀ddʰam ápi vapati
Sentence: 4    rákṣāṁsi vā́ etát paśúṁ sacante yád ekadevatyà ā́labdʰo bʰū́yān bʰávati
Sentence: 5    yásyās te hárito gárbʰa íty āha
Sentence: 6    devatráiváināṃ gamayati rákṣasām ápahatyai \
Sentence: 7    ā́ vartana vartayéty āha //

Verse: 2 
Sentence: 1    bráhmaṇaiváinam ā́ vartayati
Sentence: 2    ví te bʰinadmi takarī́m íty āha
Sentence: 3    yatʰāyajúr eváitát \
Sentence: 4    urudrapsó viśvárūpa índur íty āha
Sentence: 5    prajā́ vái paśáva índuḥ
Sentence: 6    prajáyaiváinam paśúbʰiḥ sám ardʰayati
Sentence: 7    dívaṃ vái yajñásya vyr̥̀ddʰaṃ gacʰati
Sentence: 8    pr̥tʰivī́m átiriktam \
Sentence: 9    tád yán ná śamáyed ā́rtim ā́rcʰed yájamānas \
Sentence: 10    mahī́ dyáuḥ pr̥tʰivī́ ca na íti //

Verse: 3 
Sentence: 1    āha
Sentence: 2    dyā́vāpr̥tʰivī́bʰyām evá yajñásya vyr̥̀ddʰaṃ cā́tiriktaṃ ca śamayati nā́rtim ā́rcʰati yájamānas \
Sentence: 3    bʰásmanābʰí sám ūhati svagā́kr̥tyai \
Sentence: 4    átʰo anáyor vā́ eṣá gárbʰo 'náyor eváinaṃ dadʰāti
Sentence: 5    yád avadyéd áti tád recayet \
Sentence: 6    yán nā́vadyét paśór ā́labdʰasya nā́va dyet
Sentence: 7    purástān {F } {W vái} {GLOS } nā́bʰyā anyád avadyéd upáriṣṭād anyát
Sentence: 8    purástād vái nābʰyai //

Verse: 4 
Sentence: 1    prāṇá upáriṣṭād apānás \
Sentence: 2    yā́vān evá paśús tásyā́va dyati
Sentence: 3    viṣṇave śipiviṣṭā́ya juhoti
Sentence: 4    yád vái yajñásyātirícyate yáḥ paśór bʰūmā́ yā́ púṣṭis tád víṣṇuḥ śipiviṣṭás \
Sentence: 5    átirikta evā́tiriktaṃ dadʰāty átiriktasya śā́ntyai \
Sentence: 6    aṣṭā́prūḍ ḍʰíraṇyaṃ dákṣiṇā \
Sentence: 7    aṣṭā́padī hy èṣā́ \
Sentence: 8    ātmā́ navamáḥ
Sentence: 9    paśór ā́ptyai \
Sentence: 10    antarakośá uṣṇī́ṣeṇā́viṣṭitam bʰavati \
Sentence: 11    evám iva hí paśúr úlbam iva cármeva māṁsám ivā́stʰīva
Sentence: 12    yā́vān evá paśús tám āptvā́va runddʰe
Sentence: 13    yásyaiṣā́ yajñé prā́yaścittiḥ kriyáta iṣṭvā́ vásīyān bʰavati //

Paragraph: 2 
Verse: 1 
Sentence: 1=a    ā́ vāyo bʰūṣa śucipā úpa naḥ sahásraṃ te niyúto viśvavāra / úpo te ándʰo mádyam ayāmi yásya deva dadʰiṣé pūrvapéyam //
Sentence: 2=b    ā́kūtyai tvā kā́māya tvā samŕ̥dʰe tvā kikkiṭā́ te mánaḥ prajā́pataye svā́hā kikkiṭā́ te prāṇáṃ vāyáve svā́hā kikkiṭā́ te cákṣuḥ sū́ryāya svā́hā kikkiṭā́ te śrótraṃ dyā́vāpr̥tʰivī́bʰyāṁ svā́hā kikkiṭā́ te vā́caṁ sárasvatyai svā́hā //

Verse: 2 
Sentence: 1=c    tváṃ turī́yā vaśínī vaśā́si sakŕ̥d yát tvā mánasā gárbʰa ā́śayat / vaśā́ tváṃ vaśínī gacʰa devā́nt satyā́ḥ santu yájamānasya kā́māḥ //
Sentence: 2=d    ajā́si rayiṣṭʰā́ pr̥tʰivyā́ṁ sīdordʰvā́ntárikṣam úpa tiṣṭʰasva diví te br̥hád bʰā́ḥ /
Sentence: 3=e    tántuṃ tanván rájaso bʰānúm ánv ihi jyótiṣmataḥ patʰó rakṣa dʰiyā́ kr̥tā́n /
Sentence: 4=f    anulbaṇáṃ vayata jógnvām ápo mánur bʰava janáyā dáivyaṃ jánam //
Sentence: 5=g    mánaso havír asi prajā́pater várṇo gā́trāṇāṃ te gātrabʰā́jo bʰūyāsma //

Paragraph: 3 
Verse: 1 
Sentence: 1    imé vái sahā́stām \
Sentence: 2    té vāyúr vy àvāt
Sentence: 3    té garbʰam adadʰātām \
Sentence: 4    táṁ sómaḥ prā́janayad agnír agrasata
Sentence: 5    sá etám prajā́patir āgneyám aṣṭā́kapālam apaśyat
Sentence: 6    táṃ nír avapat
Sentence: 7    ténaiváinām agnér ádʰi nír akrīṇāt
Sentence: 8    tásmād ápy anyadevatyā̀m ālábʰamāna āgneyám aṣṭā́kapālam purástān nír vapet \
Sentence: 9    agnér eváinām ádʰi niṣkrī́yā́ labʰate
Sentence: 10    yát //

Verse: 2 
Sentence: 1    vāyúr vyávāt tásmād vāyavyā̀
Sentence: 2    yád imé gárbʰam ádadʰātāṃ tásmād dyāvāpr̥tʰivyā̀
Sentence: 3    yát sómaḥ prā́janayad agnír ágrasata tásmād agnīṣomī́yā
Sentence: 4    yád anáyor viyatyór vā́g ávadat tásmāt sārasvatī́
Sentence: 5    yát prajā́patir agnér ádʰi nirákrīṇāt tásmāt prājāpatyā́
Sentence: 6    sā́ vā́ eṣā́ sarvadevatyā̀ yád ajā́ vaśā́
Sentence: 7    vāyavyā̀m ā́ labʰeta bʰū́tikāmas \
Sentence: 8    vāyúr vái kṣépiṣṭʰā devátā
Sentence: 9    vāyúm evá svéna //

Verse: 3 
Sentence: 1    bʰāgadʰéyenópa dʰāvati
Sentence: 2    sá eváinam bʰū́tiṃ gamayati
Sentence: 3    dyāvāpr̥tʰivyā̀m ā́ labʰeta kr̥ṣámāṇaḥ pratiṣṭʰā́kāmas \
Sentence: 4    divá evā́smai parjányo varṣati vy àsyā́m óṣadʰayo rohanti sámardʰukam asya sasyám bʰavati \
Sentence: 5    agnīṣomī́yām ā́ labʰeta yáḥ kāmáyeta \
Sentence: 6    ánnavān annādáḥ syām íti \
Sentence: 7    agnínaivā́nnam áva runddʰe sómenānnā́dyam
Sentence: 8    ánnavān evā́nnādó bʰavati
Sentence: 9    sārasvatī́m ā́ labʰeta yáḥ //

Verse: 4 
Sentence: 1    īśvaró vācó váditoḥ sán vā́caṃ ná vádet \
Sentence: 2    vā́g vái sárasvatī
Sentence: 3    sárasvatīm evá svéna bʰāgadʰéyenópa dʰāvati
Sentence: 4    sáivā́smin vā́caṃ dadʰāti
Sentence: 5    prājāpatyā́m ā́ labʰeta yáḥ kāmáyeta \
Sentence: 6    ánabʰijitam abʰí jayeyam íti
Sentence: 7    vāyavyàyópā́karoti
Sentence: 8    vāyór eváinām avarúdʰyā́ labʰate \
Sentence: 9    ā́kūtyai tvā kā́māya tvā //

Verse: 5 
Sentence: 1    íty āha
Sentence: 2    yatʰāyajúr eváitát
Sentence: 3    kikkiṭākā́raṃ juhoti
Sentence: 4    kikkiṭākāréṇa vái grāmyā́ḥ paśávo ramante prā́raṇyā́ḥ patanti
Sentence: 5    yát kikkiṭākā́raṃ juhóti grāmyā́ṇām paśūnā́ṃ dʰŕ̥tyai
Sentence: 6    páryagnau kriyámāṇe juhoti
Sentence: 7    jī́vantīm eváināṁ suvargáṃ lokám gamayati
Sentence: 8    tváṃ turī́yā vaśínī vaśā́sī́ty āha
Sentence: 9    devatráiváināṃ gamayati
Sentence: 10    satyā́ḥ santu yájamānasya kā́mā íty āha \
Sentence: 11    eṣá vái kā́maḥ //

Verse: 6 
Sentence: 1    yájamānasya yád ánārta udŕ̥caṃ gácʰati
Sentence: 2    tásmād evám āha \
Sentence: 3    ajā́si rayiṣṭʰéty āha \
Sentence: 4    eṣv èváināṃ lokéṣu práti ṣṭʰāpayati
Sentence: 5    diví te br̥hád bʰā́ íty āha
Sentence: 6    suvargá evā́smai loké jyótir dadʰāti
Sentence: 7    tántuṃ tanván rájaso bʰānúm ánv ihī́ty āha \
Sentence: 8    imā́n evā́smai lokā́ñ jyótiṣmataḥ karoti \
Sentence: 9    anulbaṇáṃ vayata jóguvām ápa íti //

Verse: 7 
Sentence: 1    āha
Sentence: 2    yád evá yajñá ulbáṇaṃ kriyáte tásyaiváiṣā́ śā́ntis \
Sentence: 3    mánur bʰava jañayā dáivyaṃ jánam íty āha
Sentence: 4    mānavyò vái prajā́s tā́ evā́dyā̀ḥ kurute
Sentence: 5    mánaso havír asī́ty āha
Sentence: 6    svagā́kr̥tyai
Sentence: 7    gā́trāṇāṃ te gātrabʰā́jo bʰūyāsméty āha \
Sentence: 8    āśíṣam eváitā́m ā́ śāste
Sentence: 9    tásyai vā́ etásyā ékam evā́devayajanaṃ yád ā́labdʰāyām abʰráḥ //

Verse: 8 
Sentence: 1    bʰávati
Sentence: 2    yád ā́labdʰāyām abʰráḥ syā́d apsú vā praveśáyet sárvāṃ vā́ prā́śnīyāt \
Sentence: 3    yád apsú praveśáyed yajñaveśasáṃ kuryāt
Sentence: 4    sárvām evá prā́śnīyād indriyám evā́tmán dʰatte
Sentence: 5    sā́ vā́ eṣá tráyāṇām evā́varuddʰā saṃvatsarasádaḥ sahasrayājíno gr̥hamedʰínas
Sentence: 6    tá eváitáyā yajeran
Sentence: 7    téṣām eváiṣā́ptā́ //

Paragraph: 4 
Verse: 1 
Sentence: 1=a    cittáṃ ca cíttiś cā́kūtaṃ cā́kūtiś ca víjñātaṃ ca vijñā́naṃ ca mánaś ca śákvarīś ca dárśaś ca pūrṇámāsaś ca br̥hác ca ratʰaṃtaráṃ ca
Sentence: 2=b    prajā́patir jáyān índrāya vŕ̥ṣṇe prā́yacʰad ugráḥ pr̥tanā́jyeṣu tásmai viśaḥ sám anamanta sárvāḥ sá ugráḥ sá hí hávyo babʰū́va
Sentence: 3    devāsurā́ḥ sáṃyattā āsant sá índraḥ prajā́patim úpādʰāvat tásmā etā́ñ jáyān prā́yacʰat tā́n ajuhot
Sentence: 4    táto vái devā́ ásurān ajayan
Sentence: 5    yád ájayan táj jáyānāṃ jayatvám \
Sentence: 6    spárdʰamānenaité hotavyā̀ jáyaty evá tā́m pŕ̥tanām //

Paragraph: 5 
Verse: 1 
Sentence: 1=a    agnír bʰūtā́nām ádʰipatiḥ sá māvatv índro jyeṣṭʰā́nāṃ yamáḥ pr̥tʰivyā́ vāyúr antárikṣasya sū́ryo diváś candrámā nákṣatrāṇām bŕ̥haspátir bráhmaṇo mitráḥ satyā́nāṃ váruṇo 'pā́ṁ samudráḥ srotyā́nām ánnaṁ sā́mrājyānām ádʰipati tán māvatu sóma óṣadʰīnāṁ savitā́ prasavā́nāṁ rudráḥ paśūnā́ṃ tváṣṭā rūpā́ṇāṃ víṣṇuḥ párvatānām marúto gaṇā́nām ádʰipatayas té māvantu
Sentence: 2=b    pítaraḥ pitāmahāḥ pare 'vare tátās tatāmahā ihá māvata /
Sentence: 3=c    asmín bráhmann asmín kṣatrè 'syā́m āśíṣy asyā́m purodʰā́yām asmín kármann asyā́ṃ deváhūtyām //

Paragraph: 6 
Verse: 1 
Sentence: 1    devā́ vái yád yajñé 'kurvata tád ásurā akurvata
Sentence: 2    té devā́ etā́n abʰyātānā́n apaśyan
Sentence: 3    tā́n abʰyā́tanvata
Sentence: 4    yád devā́nāṃ kármā́sīd ā́rdʰyata tát \
Sentence: 5    yád ásurāṇāṃ ná tád ārdʰyata
Sentence: 6    yéna kármaṇértset tátra hotavyā̀s \
Sentence: 7    r̥dʰnóty evá téna kármaṇā
Sentence: 8    yád víśve devā́ḥ samábʰaran tásmād abʰyātānā́ vaiśvadevā́s \
Sentence: 9    yád prajā́patir jáyān prā́yacʰat tásmāj jáyāḥ prājāpatyāḥ //

Verse: 2 
Sentence: 1    yád rāṣṭrabʰŕ̥dbʰī rāṣṭrám ā́dadata tád rāṣṭrabʰŕ̥tāṁ rāṣṭrabʰr̥ttvám \
Sentence: 2    té devā́ abʰyātānáir ásurān abʰyā́tanvata jáyair ajayan rāṣṭrabʰŕ̥dbʰī rāṣṭrám ā́dadata
Sentence: 3    yád devā́ abʰyātānáir ásurān abʰyā́tanvata tád abʰyātānā́nām abʰyātānatvám \
Sentence: 4    yáj jáyair ájayan táj jávānāṃ jayatvám \
Sentence: 5    yád rāṣṭrabʰŕ̥dbʰī rāṣṭrám ā́dadata tád rāṣṭrabʰŕ̥tāṁ rāṣṭrabʰr̥ttvám \
Sentence: 6    táto devā́ ábʰavan párā́surās \
Sentence: 7    yó bʰrā́tr̥vyavānt syā́t sá etā́ñ juhuyāt \
Sentence: 8    abʰyātānáir evá bʰrā́tr̥vyān abʰyā́tanute jáyair jayati rāṣṭrabʰŕ̥dbʰī rāṣṭrám ā́ datte
Sentence: 9    bʰávaty ātmánā párāsya bʰrā́tr̥vyo bʰavati //

Paragraph: 7 
Verse: 1 
Sentence: 1=a    r̥tāṣā́ḍ r̥tádʰāmāgnír gandʰarvás tásyáuṣadʰayo 'psarása ū́rjo nā́ma sá idám bráhma kṣatrám pātu tā́ idám bráhma kṣatrám pāntu tásmai svā́hā tā́bʰyaḥ svā́hā
Sentence: 2=b    saṁhitó viśvásāmā sū́ryo gandʰarvás tásya márīcayo 'psarása āyúvaḥ
Sentence: 3=c    suṣumnáḥ sū́ryaraśmiś candrámā gandʰarvás tásya nákṣatrāṇy apsaráso bekúrayas \
Sentence: 4=d    bʰujyúḥ suparṇó yajñó gandʰarvás tásya dákṣiṇā apsarása stavā́ḥ
Sentence: 5=e    prajā́patir viśvákarmā mánaḥ //

Verse: 2 
Sentence: 1    gandʰarvás tásyarksāmā́ny apsaráso váhnayas \
Sentence: 2=f    iṣiró viśvávyacā vā́to gandʰarvás tásyā́po 'psaráso mudā́s \
Sentence: 3=g    bʰúvanasya pate yásya ta upári gr̥hā́ ihá ca / sá no rāsvā́jyāniṁ rāyás póṣaṁ suvī́ryaṁ saṃvatsarī́ṇāṁ svastím
Sentence: 4=h    parameṣṭʰy ádʰipatir mr̥tyúr gandʰarvás tásya víśvam apsaráso bʰúvaḥ
Sentence: 5=i    sukṣitíḥ súbʰūtir bʰadrakŕ̥t súvarvān parjányo gandʰarvás tásya vidyúto 'psaráso rúcas \
Sentence: 6=k    dūréhetir amr̥ḍayáḥ //

Verse: 3 
Sentence: 1    mr̥tyúr gandʰarvás tásya prajā́ apsaráso bʰīrúvas \
Sentence: 2=l    cā́ruḥ kr̥paṇakāśī́ kā́mo gandʰarvás tásyādʰáyo 'psarásaḥ śocáyantīr nā́ma sá idám brā́hma kṣatrám pātu tā́ idám bráhma kṣatrám pāntu tásmai svā́ha tā́bʰyaḥ svā́hā
Sentence: 3=m    sá no bʰuvanasya pate yásya ta upári gr̥hā́ ihá ca / urú bráhmaṇe 'smái kṣatrā́ya máhi śárma yacʰa //

Paragraph: 8 
Verse: 1 
Sentence: 1    rāṣṭrákāmāya hotavyā̀ rāṣṭráṃ vái rāṣṭrabʰŕ̥to rāṣṭréṇaivā́smai rāṣṭrám áva runddʰe rāṣṭrám evá bʰavati \
Sentence: 2    ātmáne hotavyā̀ rāṣṭráṃ vái rāṣṭrabʰŕ̥to rāṣṭrám prajā́ rāṣṭrám paśávo rāṣṭráṃ yác cʰréṣṭʰo bʰávati rāṣṭréṇaivá rāṣṭrám áva runddʰe vásiṣṭʰaḥ samānā́nām bʰavati
Sentence: 3    grā́makāmāya hotavyā̀ rāṣṭráṃ vái rāṣṭrabʰŕ̥to rāṣṭráṁ sajātā́ rāṣṭréṇaivā́smai rāṣṭráṁ sajātā́n áva runddʰe grāmī́ //

Verse: 2 
Sentence: 1    evá bʰavati \
Sentence: 2    adʰidévane juhoty adʰidévana evā́smai sajātā́n áva runddʰe tá enam ávaruddʰā úpa tiṣṭʰante
Sentence: 3    ratʰamukʰá ójaskāmasya hotavyā̀ ójo vái rāṣṭrabʰŕ̥ta ójo rátʰa ójasaivā́smā ójó 'va runddʰa ojasvy èvá bʰavati
Sentence: 4    yó rāṣṭrā́d ápabʰūtaḥ syā́t tásmai hotavyā̀ yā́vanto 'sya rátʰāḥ syús tā́n brūyād yuṅgdʰvám íti rāṣṭrám evā́smai yunakti //

Verse: 3 
Sentence: 1    ā́hutayo vā́ etásyā́kḷptā yásya rāṣṭráṃ ná kálpate svaratʰásya dákṣiṇaṃ cakrám pravŕ̥hya nāḍī́m abʰí juhuyād ā́hutīr evā́sya kalpayati tā́ asya kálpamānā rāṣṭrám ánu kalpate
Sentence: 2    saṃgrāmé sáṃyatte hotavyā̀ rāṣṭráṃ vái rāṣṭrabʰŕ̥to rāṣṭré kʰálu vā́ eté vyā́yacʰante yé saṃgrāmáṁ saṃyánti yásya pū́rvasya júhvati sá evá bʰavati jáyati táṃ saṃgrāmáṃ māndʰuká idʰmáḥ //

Verse: 4 
Sentence: 1    bʰavaty áṅgārā evá prativéṣṭamānā amítrāṇām asya sénām práti veṣṭayanti
Sentence: 2    yá unmā́dyet tásmai hotavyā̀ gandʰarvāpsaráso vā́ etám ún mādayanti yá unmā́dyaty eté kʰálu vái gandʰarvāpsaráso yád rāṣṭrabʰŕ̥tas tásmai svā́hā tā́bʰyaḥ svā́héti juhoti ténaiváināñ cʰamayati
Sentence: 3    náiyagrodʰa áudumbara ā́śvattʰaḥ plā́kṣa ítīdʰmó bʰavaty eté vái gandʰarvāpsarásāṃ gr̥hā́ḥ svá eváinān //

Verse: 5 
Sentence: 1    āyátane śamayati \
Sentence: 2    abʰicáratā pratilomáṁ hotavyā̀ḥ prāṇā́n evā́sya pratī́caḥ práti yauti táṃ táto yéna kéna ca str̥ṇute
Sentence: 3    svákr̥ta íriṇe juhoti pradaré vaitád vā́ asyái nírr̥tigr̥hītaṃ nírr̥tigr̥hīta eváinaṃ nírr̥tyā grāhayati yád vācáḥ krūrám téna váṣaṭ karoti vācá eváinaṃ krūréṇa prá vr̥ścati tājág ā́rtim ā́rcʰati
Sentence: 4    yásya kāmáyetānnā́dyam //

Verse: 6 
Sentence: 1    ā́ dadīyéti tásya sabʰā́yām uttānó nipádya bʰúvanasya pata íti tŕ̥ṇāni sáṃ gr̥hṇīyāt prajā́patir vái bʰúvanasya pátiḥ prajā́patinaivā́syānnā́dyam ā́ datta idám ahám amúṣyāmuṣyāyaṇásyānnā́dyaṁ harāmī́ty āhānnā́dyam evā́sya harati ṣaḍbʰír harati ṣáḍ vā́ r̥távaḥ prajā́patinaivā́syānnādyam ādā́yartávo 'smā ánu prá yacʰanti //

Verse: 7 
Sentence: 1    yó jyeṣṭʰábandʰur ápabʰūtaḥ syā́t táṁ stʰále 'vasā́yya brahmaudanáṃ cátuḥśarāvam paktvā́ tásmai hotavyā̀ várṣma vái rāṣṭrabʰŕ̥to várṣma stʰálaṃ várṣmaṇaiváinaṃ várṣma samānā́nāṃ gamayati cátuḥśarāvo bʰavati dikṣv èvá práti tiṣṭʰati kṣīré bʰavati rúcaṃ evā́smin dadʰāty úd dʰarati śr̥tatvā́ya sarpíṣvān bʰavati medʰyatvā́ya cátvāra ārṣeyā́ḥ prā́śnanti diśā́m evá jyótiṣi juhoti //

Paragraph: 9 
Verse: 1 
Sentence: 1    dévikā nír vapet prajā́kāmaś cʰándāṁsi vái dévikāś cʰándāṁsīva kʰálu vái prajā́ś cʰándobʰir evā́smai prajā́ḥ prá janayati
Sentence: 2    pratʰamáṃ dʰātā́raṃ karoti mitʰunī́ evá téna karoty ánv evā́smā ánumatir manyate rāté rākā́ prá sinīvalī́ janayati prajā́sv evá prájātāsu kuhvā̀ vā́caṃ dadʰāti \
Sentence: 3    etā́ evá nír vapet paśúkāmaś cʰándāṁsi vái dévikāś cʰándāṁsi //

Verse: 2 
Sentence: 1    iva kʰálu vái paśávaś cʰándobʰir evā́smai paśū́n prá janayati pratʰamáṃ dʰātā́raṃ karoti práivá téna vāpayaty ánv evā́smā ánumatir manyate rāté rākā́ prá sinīvālī́ janayati paśū́n evá prájātān kuhvā̀ práti ṣṭʰāpayati \
Sentence: 2    etā́ evá nír vaped grā́makāmaś cʰándāṁsi vái dévikāś cʰándāṁsīva kʰálu vái grā́maś cʰándobʰir evā́smai grā́mam //

Verse: 3 
Sentence: 1    áva runddʰe madʰyató dʰātā́raṃ karoti madʰyatá eváinaṃ grā́masya dadʰāti \
Sentence: 2    etā́ evá nír vapej jyógāmayāvī cʰándāṁsi vái dévikāś cʰándāṁsi kʰálu vā́ etám abʰí manayante yásya jyóg āmáyati cʰándobʰir eváinam agadáṃ karoti madʰyató dʰātā́raṃ karoti madʰyató vā́ etásyā́kḷptaṃ yásya jyóg āmáyati madʰyatá evā́sya téna kalpayati \
Sentence: 3    etā́ evá niḥ //

Verse: 4 
Sentence: 1    vaped yáṃ yajñó nópanámec cʰándāṁsi vái dévikāś cʰándāṁsi kʰálu vā́ etáṃ nópa namanti yáṃ yajñó nópanámati pratʰamáṃ dʰātā́raṃ karoti mukʰatá evā́smai cʰándāṁsi dadʰāty úpainaṃ yajñó namati \
Sentence: 2    etā́ evá nír vaped ījānáś cʰándāṁsi vái dévikā yātáyāmānīva kʰálu vā́ etásya cʰándāṁsi yá ījāná uttamáṃ dʰātā́raṃ karoti //

Verse: 5 
Sentence: 1    upáriṣṭād evā́smai cʰándāṁsy áyātayāmāny áva runddʰa úpainam úttaro yajñó namati \
Sentence: 2    etā́ evá nír vaped yám medʰā́ nópanámec cʰándāṁsi vái dévikāś cʰándāṁsi kʰálu vā́ etáṃ nópa namantí yám medʰā́ nópanámati pratʰamáṃ dʰātā́raṃ karoti mukʰatá evā́smai cʰándāṁsi dadʰāty úpainam medʰā́ namati \
Sentence: 3    etā́ evá nír vapet //

Verse: 6 
Sentence: 1    rúkkāmaś cʰándāṁsi vái dévikāś cʰándāṁsīva kʰálu vái rúk cʰándobʰir evā́smin rúcaṃ dadʰāti kṣīré bʰavanti rúcam evā́smin dadʰati madʰyató dʰātā́raṃ karoti madʰyatá eváinaṁ rucó dadʰāti
Sentence: 2    gāyatrī́ vā́ ánumatis tr̥ṣṭúg rākā́ jágatī sinīvāly ànuṣṭúp kuhū́r dʰātā́ vaṣaṭkāráḥ pūrvapakṣó rākā́parapakṣáḥ kuhū́r amāvāsyā̀ sinīvalī́ paurṇamāsy ánumatiś candrámā dʰātā́ \
Sentence: 3    aṣṭáu //

Verse: 7 
Sentence: 1    vásavo 'ṣṭā́kṣarā gāyatry ékādaśa rudrā́ ékādaśākṣarā triṣṭúb dvā́daśādityā́ dvā́daśākṣarā jágatī prajā́patir anuṣṭúb dʰātā́ vaṣaṭkārás \
Sentence: 2    etád vái dévikāḥ sárvāṇi ca cʰándāṁsi sárvāś ca devátā vaṣaṭkārás tā́ yát sahá sárvā nirváped īśvarā́ enam pradáho dvé pratʰamé nirúpya dʰātús tr̥tī́yaṃ nír vapet tátʰo evottare nír vapet tátʰainaṃ ná prá dahanty átʰo yásmai kā́māya nirupyánte tám evā́bʰir úpāpnoti //

Paragraph: 10 
Verse: 1 
Sentence: 1=a    vā́stoṣ pate práti jānīhy asmā́nt svāveśó anamīvó bʰavā naḥ / yát tvémahe práti tán no juṣasva śáṃ na edʰi dvipáde śáṃ cátuṣpade //
Sentence: 2=b    vā́stoṣ pate śagmáyā saṁsádā te sakṣīmáhi raṇváyā gātumátyā / ā́vaḥ kṣéma utá yóge váraṃ no yūyám pāta svastíbʰiḥ sádā naḥ //
Sentence: 3    yát sāyámprātar agnihotráṃ juhóty āhutīṣṭakā́ evá tā́ úpa dʰatte //

Verse: 2 
Sentence: 1    yájamāno 'horātrā́ṇi vā́ etásyéṣṭakā yá ā́hitāgnir yát sāyámprātar juhóty ahorātrā́ṇy evā́ptvéṣṭakāḥ kr̥tvópa dʰatte
Sentence: 2    dáśa samānátra juhoti dáśākṣarā virā́ḍ virā́jam evā́ptvéṣṭakāṃ kr̥tvópa dʰatte \
Sentence: 3    átʰo virā́jy evá yajñám āpnoti cítyaścityo 'sya bʰavati tásmād yátra dáśoṣitvā́ prayā́ti tád yajñávāstv ávāstv evá tád yát táto 'rvācī́nam //

Verse: 3 
Sentence: 1    rudráḥ kʰálu vái vāstoṣpatír yád áhutvā vāstoṣpatī́yam prayāyā́d rudrá enam bʰūtvā́gnír anūttʰā́ya hanyād vāstoṣpatī́yaṃ juhoti bʰāgadʰéyenaiváinaṁ śamayati nā́rtim ā́rcʰati yájamānas \
Sentence: 2    yád yukté juhuyā́d yátʰā práyāte vā́stāv ā́hutiṃ juhóti tādŕ̥g evá tád yád áyukte juhuyā́d yátʰā kṣéma ā́hutiṃ juhóti tādŕ̥g evá tád áhutam asya vāstoṣpatī́yaṁ syāt //

Verse: 4 
Sentence: 1    dákṣiṇo yuktó bʰávati savyó 'yuktas \
Sentence: 2    átʰa vāstoṣpatī́yaṃ juhoty ubʰáyam evā́kar áparivargam eváinaṁ śamayati
Sentence: 3    yád ékayā juhuyā́d darvihomáṃ kuryāt puro'nuvākyā̀m anū́cya yājyàyā juhoti sadevatvā́ya
Sentence: 4    yád dʰutá ādadʰyā́d rudráṃ gr̥hā́n anvā́rohayed yád avakṣā́ṇāny ásamprakṣāpya prayāyā́d yátʰā yajñaveśasáṃ vādáhanaṃ vā tādŕ̥g evá tát \
Sentence: 5    ayáṃ te yónir r̥tvíya íty aráṇyoḥ samā́rohayati //

Verse: 5 
Sentence: 1    eṣá vā́ agnér yóniḥ svá eváinaṃ yónau samā́rohayati \
Sentence: 2    átʰo kʰálv āhur yád aráṇyoḥ samā́rūḍʰo náśyed úd asyāgníḥ sīdet punarādʰéyaḥ syād íti
Sentence: 3    yā́ te agne yajñíyā tanū́s táyehy ā́ rohéty ātmánt samā́rohayate
Sentence: 4    yájamāno vā́ agnér yóniḥ svā́yām eváinaṃ yónyāṁ samā́rohayate //

Paragraph: 11 
Verse: 1 
Sentence: 1=a    tvám agne br̥hád váyo dádʰāsi deva dāśúṣe / kavír gr̥hápatir yúvā //
Sentence: 2=b    havyavā́ḍ agnír ajáraḥ pitā́ no vibʰúr vibʰā́vā sudŕ̥śīko asmé / sugārhapatyā́ḥ sám íṣo didīhy asmadríyak sám mimīhi śrávāṁsi //
Sentence: 3=c    tváṃ ca soma no váśo jīvā́tuṃ ná marāmahe / priyástotro vánaspátiḥ //
Sentence: 4=d    brahmā́ devā́nām padavī́ḥ kavīnā́m ŕ̥ṣir víprāṇām mahiṣó mr̥gā́ṇām / śyenó gŕ̥dʰrāṇāṁ svádʰitir vánānāṁ sómaḥ //

Verse: 2 
Sentence: 1    pavítram áty eti rébʰan //
Sentence: 2=e    ā́ viśvádevaṁ sátpatiṁ sūktáir adyā́ vr̥ṇīmahe / satyásavaṁ savitā́ram //
Sentence: 3=f    ā́ satyéna rájasā vártamāno niveśáyann amŕ̥tam mártyaṃ ca / hirṇyáyena savitā́ rátʰenā devó yāti bʰúvanā vipáśyan //
Sentence: 4=g    yátʰā no áditiḥ kárat páśve nŕ̥bʰyo yátʰā gáve / yátʰā tokā́ya rudríyam //
Sentence: 5=h    mā́ nas toké tánaye mā́ na ā́yuṣi mā́ no góṣu mā́ //

Verse: 3 
Sentence: 1    no áśveṣu rīriṣaḥ / vīrā́n mā́ no rudra bʰāmitó vadʰīr havíṣmanto námasā vidʰema te //
Sentence: 2=i    udaprúto ná váyo rákṣamāṇā vā́vadato abʰríyasyeva gʰóṣāḥ / giribʰrájo nórmáyo mádanto bŕ̥haspátim abʰy àrkā́ anāvan //
Sentence: 3=k    haṁsáir iva sákʰibʰir vā́vadadbʰir aśmanmáyāni náhanā vyásyan / bŕ̥haspátir abʰikánikradad gā́ utá prā́staud úc ca vidvā́n agāyat //
Sentence: 4=l    éndra sānasíṁ rayím //

Verse: 4 
Sentence: 1    sajítvānaṁ sadāsáham / várṣiṣṭʰam ūtáye bʰara //
Sentence: 2=m    prá sasāhiṣe puruhūta śátrūñ jyéṣṭʰas te śúṣma ihá rātír astu / índrā bʰava dákṣiṇenā vásūni pátiḥ síndʰūnām asi revátīnām //
Sentence: 3=n    tváṁ sutásya pītáye sadyó vr̥ddʰó ajāyatʰāḥ / índra jyáiṣṭʰyāya sukrato //
Sentence: 4=o    bʰuvás tvám indra bráhmaṇā mahā́n bʰúvo víśveṣu sávaneṣu yajñíyaḥ / bʰúvo nŕ̥̄ṁś cyautnó víśvasmin bʰáre jyéṣṭʰaś ca mántraḥ //

Verse: 5 
Sentence: 1    viśvacarṣaṇe //
Sentence: 2=p    mitrásya carṣaṇīdʰŕ̥taḥ śrávo devásya sānasím / satyáṃ citráśravastamam //
Sentence: 3=q    mitró jánān yātayati prajānán mitró dādʰāra pr̥tʰivī́m utá dyā́m / mitráḥ kr̥ṣṭī́r ánimiṣābʰí caṣṭe satyā́ya havyáṃ gʰr̥távad vidʰema //
Sentence: 4=r    prá sá mitra márto astu práyasvān yás ta āditya śíkṣati vraténa / ná hanyate ná jīyate tvóto náinam áṁho aśnoty ántito ná dūrā́t //
Sentence: 5=s    yát //

Verse: 6 
Sentence: 1    cid dʰí te víśo yatʰā prá deva varuṇa vratám / mimīmási dyávidyavi //
Sentence: 2=t    yát kíṃ cedáṃ varuṇa dáivye jáne 'bʰidrohám manuṣyā̀ś cárāmasi / ácittī yát táva dʰármā yuyopimá mā́ nas tásmād énaso deva rīriṣaḥ //
Sentence: 3=u    kitavā́so yád riripúr ná dīví yád vā gʰā satyám utá yán ná vidmá / sárvā tā́ ví ṣya śitʰiréva devā́tʰā te syāma varuṇa priyā́saḥ //

Next part


This text is part of the TITUS edition of Black Yajur-Veda: Taittiriya-Samhita.

Copyright TITUS Project, Frankfurt a/M, 9.2.2018. No parts of this document may be republished in any form without prior permission by the copyright holder.